གནམ་འོག་གསར་འགྱུར་ཟེར་བར་ལན་འདེབས།

 གནམ་འོག་གསར་འགྱུར་ཟེར་བས་༸གོང་ས་༸སྐྱབས་མགོན་ཆེན་པོ་མཆོག་ལ་ཟུར་ཟ་དང་དབུ་མའི་ལམ་ལ་འཁྱོག་བཤད་ཀྱི་དྲི་བར་ལན་འདེབས།།

ཚེ་རིང་སྲི་བརྟན།

༄༅། །ཕྱི་ལོ་ ༢༠༢༠ ཟླ་ ༧  ཚེས་ ༡༩  རེས་གཟའ་ཉི་མ་ཉིན་གནམ་འོག་གསར་འགྱུར་ཟེར་བའི་བརྙན་ལམ་ཐོག་ནས་གྲྭ་ལོག་བློ་དགའ་ཟེར་བས།  དབུ་མའི་ལམ་གྱི་སྲིད་བྱུས་དང་འབྲེལ་བ་རྒྱ་ཆེའི་བོད་མི་མང་ཚོགས་ལ་དྲི་བའི་ལས་རིམ་ཞེས་པ་ཞིག་བཤད་སོང་། སྤྱིར་བཏང་ཁོ་པས་གཏམ་འཆལ་དེ་འདྲ་ཤོད་བཞིན་འདུག་ཀྱང་དེ་ལ་དོ་སྣང་དང་ལན་འདེབས་བྱེད་རྒྱུའི་འབད་བརྩོན་དགོས་གལ་བརྩིས་མེད་པ་དེ་ནི་ཆོས་རྗེ་ས་པཎ་གྱིས།    ངན་སྐྱུགས་ཁྲོན་པ་སུ་ཞིག་སློང་།     །སྐྱུགས་པ་མཁས་པ་སུ་ཞིག་མྱོང་།  གསུངས་པ་ལྟར་རེད།  འོན་ཀྱང་ཁོ་པའི་གཏམ་འཆལ་དེ་ཚོའི་ནང་༸གོང་ས་༸སྐྱབས་མགོན་ཆེན་པོ་མཆོག་དང་དགའ་ལྡན་ཕོ་ བྲང་ལ་ཟུར་ཟ་ཇེ་མང་དུ་གཏོང་བཞིན་ཡོད་པ་དང་།  ལྷག་པར་དུ་ད་ལམ་གྱི་ལེའུ་ཚན་དེའི་ནང་མི་ལོ་བཅུ་ཕྲག་མང་པོའི་དུས་ ཚོད་བཟང་པོ་ཆུད་ཟོས་སུ་ཕྱིན་ནས་དབུ་མའི་ལམ་ལ་གྲུབ་འབྲས་ཏིལ་འབྲུ་ཙམ་མ་བྱུང་བ་དང་།  བརྒྱུད་ལམ་དེའི་ནང་ལ་ཕྱོགས་ གཅིག་ནས་ཐ་ན་རྒྱལ་བ་རིན་པོ་ཆེའི་སྐུ་སྲོག་ལའང་ཉེན་འཚབ་དེ་འདྲ་ཞིག་བྱུང་བ་ཡིན་ཚུལ་སོགས་འགོ་མཇུག་བར་གསུམ་དུ་དབུ་ མའི་ལམ་གྱི་སྲིད་བྱུས་ལ་སྐྱོན་བརྗོད་དང་སྦྲེལ་ནས་༸གོང་ས་༸སྐྱབས་མགོན་རྒྱལ་བའི་དབང་པོ་མཆོག་ལ་ཁག་ངན་འགེལ་བའི་ ཚིག་བརྗོད་མང་པོ་ཞིག་བཀོད་འདུག་པ་དེ་ཚོར་ལན་འདེབས་མདོར་བསྡུས་ཤིག་མ་བྱས་ན་སྤྲང་པོའི་སྤྲེའུ་འཁྲབ་པ་དེར་དབྱུག་པས་བཀོད་བྱུས་གཏོང་མཁན་ཡོད་པ་དེ་ཚོ་ངན་པ་བྱ་རྒྱས་སུ་སོང་ནས་༸གོང་ས་མཆོག་གི་བཀའ་དྲིན་ལ་བསམ་ཤེས་ཡེ་ནས་མེད་པར་ དྲིན་ལན་ལོག་འཇལ་གྱིས་ལས་ངན་གསོག་མཁན་བསོད་དམན་པ་ཇེ་མང་དུ་འགྲོ་རྒྱུ་མ་ཟད། སྤྱི་ཚོགས་ནང་དབུ་མའི་ལམ་གྱི་གནད་ དོན་ཇི་བཞིན་མ་རྟོགས་མཁན་འགར་བློ་དོགས་ཡོང་མི་སྲིད་པ་མིན་ཅིང་།  ལྷག་པར་དུ་རྒྱལ་བ་རིན་པོ་ཆེའི་སྐུ་སྲོག་ལའང་ཉེན་ འཚབ་བཟོ་མཁན་ནི་རྒྱ་དམར་གུང་ཁྲན་དང་།  གསོས་ཕྲུག་དོལ་རྒྱལ་རྗེས་འབྲང་པ་ཚོ་ཡིན་པ་ལས་དབུ་མའི་ལམ་གྱི་གནད་དོན་ དང་འབྲེལ་བ་སྦྱར་བ་ནི་གཞི་རྩ་མེད་པའི་དཀྲོག་གཏམ་ཆེན་པོ་ཞིག་ཆེད་བཟོས་བྱས་འདུག་པ་ཧ་ཅང་མ་འོས་པ་ཡིན།   ཁོ་པའི་དྲི་ བ་ཁག་གི་ནང་དོན་མང་ཆེ་བ་འདྲ་པོ་ཡིན་སྟབས་རེ་རེ་བཞིན་དབྱེ་འབྱེད་ཀྱིས་ལན་བརྒྱབ་ན་སྐད་ཆ་ཉིས་ཟློས་ཡིག་ཚོགས་ཀྱི་རྒྱུ་ལས་མ་འདས་པར་ཕྱོགས་བསྡོམས་ཀྱིས་ལན་འདེབས་བྱས་པས་མ་འཐུས་པ་མི་འདུག་ཀྱང་།  མང་ཚོགས་ནང་རང་དང་རང་འདྲ་བ་ ཀློག་པ་པོ་རྣམས་ལ་མཁྱེན་རྟོགས་བདེ་བའི་སླད་དུ་གཤམ་གསལ་དོན་ཚན་རེ་རེ་བཞིན་ལན་འདེབས་མདོར་བསྡུས་ཤིག་བྱེད་རྒྱུ་ཡིན།

༡༽  དབུ་མའི་ལམ་གྱི་སྲིད་བྱུས་དེ་རྒྱ་དམར་གུང་ཁྲན་འོག་ཏུ་མགོ་སྒུར་རྒྱུ་དེ་ཡིན་པས་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་དོན་ཚན་བཞི་པ་ བོད་མིའི་སྒྲིག་འཛུགས་ཀྱི་རྩ་དོན་ཞེས་པའི་ནང་དོན་དང་འགལ་ཟླ་ཆགས་ཡོད་པ་ཁྱེད་རང་ལ་ཐུགས་སྣང་ཨེ་བྱུང་།

ལན།     བཅའ་ཁྲིམས་དོན་ཚན་བཞི་པའི་ནང་༼ལྷག་པར་དུ་བོད་དོན་བདེན་མཐའ་གསལ་ཐབས་དང་།  བོད་མི་ཡོངས་ཀྱི་བསམ་སྤྱོད་ དང་དངོས་པོའི་ཁེ་ཕན་ཡར་རྒྱས་གཏོང་བའི་ལས་འགན་བསྒྲུབ་རྒྱུ།༽ ཞེས་གསལ་ཡོད་པ་ལྟར་དེ་དག་སྒྲུབ་པར་དེང་འཛམ་བུ་ གླིང་གི་དངོས་ཡོད་གནས་སྟངས་དང་ཕུགས་རྒྱང་རིང་པོའི་ཁེ་ཕན་གང་ཅིའི་ཐད་ནས་གྲུབ་འབྲས་སོན་ཐུབ་པ་དེ་དབུ་མའི་ལམ་གྱི་ཐབས་ལམ་ལས་ལྷག་པ་ཞིག་མེད་པ་རྒྱ་ཆེའི་མང་ཚོགས་ཀྱིས་གསལ་པོ་མཁྱེན་པའི་ཐོག་ནས་དབུ་མའི་ལམ་གྱི་སྲིད་བྱུས་མང་གཙོའི་ བརྒྱུད་རིམ་ཐོག་ནས་གཏན་འབེབས་གནང་པ་མ་ཡིན་ནམ། ལྷག་པར་དུ་བཅའ་ཁྲིམས་དོན་ཚན་གསུམ་པ། ཆབ་སྲིད་ཀྱི་རང་བཞིན་ ནང་།༼མ་འོངས་བོད་ཀྱི་ཆབ་སྲིད་ནི་འཚེ་བ་མེད་པའི་ལྟ་བར་གཞི་བཅོལ་པའི་ཐོག་ནས་རང་དབང་དང་། ཞེས་པ་ནས་བཙན་ བྱོལ་བོད་མིའི་ཆབ་སྲིད་ཀྱང་དེ་དང་ཕྱོགས་མཐུན་བྱ་རྒྱུ།༽ཞེས་གསལ་པོ་ཡོད།  དེས་ན་འཚེ་བ་མེད་པའི་ཐོག་ནས་བོད་དོན་བདེན་ མཐའ་གསལ་དགོས་ན་དབུ་མའི་ལམ་ལས་གཞན་པའི་ཐབས་ལམ་ཞིག་མེད་ཅིང་།   དེ་མ་ཡིན་པ་རྒྱུ་མཚན་ལྡན་པའི་ཐབས་ལམ་ ཞིག་ཡོད་ན་སྟོན་དང་།

༢༽  རྒྱ་དམར་གུང་ཁྲན་གྱི་རྩ་འཛིན་ཡིག་ཆ་ཁྱེད་རང་གིས་བཀླགས་ཡོད་སྲིད་པ་རེད།   དབུ་མའི་ལམ་གྱི་སྲིད་བྱུས་དེའི་ནང་དོན་སྙིང་པོ་རྒྱ་མི་གུང་ཁྲན་གྱི་དབང་འཛིན་པས་རྡོ་ལག་བརྒྱུད་བྱས་པ་ཧ་ཅང་གཏིང་གནག་པོའི་སྲིད་བྱུས་ཤིག་ཡིན་པ་བོད་མི་ཚོ་དེའི་མགོ་བསྐོར་འོག་ཚུད་སོང་བ་ཞིག་ཡིན་པ་བསམ་བློ་བཏང་ཨེ་མྱོང་།

ལན།     དབུ་མའི་ལམ་གྱི་སྲིད་བྱུས་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་འདིར་འདས་མ་འོངས་ད་ལྟ་དུས་ གསུམ་གྱི་གནས་སྟངས་ལ་ཐུགས་ཞིབ་ལོ་མང་གནང་པའི་ཉམས་མྱོང་གི་སྙིང་པོ་ཡང་དག་པའི་ལམ་སྟོན་འོག་བྱེས་འབྱོར་མི་མང་ ནང་ཡུན་རིང་རང་དབང་གི་ཐོག་ནས་འདུ་འཛོམས་གྲོས་བསྡུར་སྦྱངས་བཤད་མཐིལ་ཕྱིན་བྱས་པ་དང་།  གཞིས་བཞུགས་རྒྱ་ཆེའི་ མང་ཚོགས་ནས་དངོས་ཤུགས་བརྒྱུད་གསུམ་དུ་ཡིག་ངག་གཉིས་ཐོག་ནས་བསམ་ཚུལ་བསྡུས་ཏེ་མང་གཙོའི་འགྲོ་ལུགས་དང་ཡོངས་ སུ་མཐུན་པའི་ཐོག་ནས་ཕྱོགས་བསྡོམས་བརྒྱབ་པའི་ཚད་མཐོའི་མང་མོས་ལ་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་ པའི་སྲིད་བྱུས་ཞིག་ཡིན་པ་ས་རིས་ཐང་གསལ་ཡིན་བཞིན་དུ་རྒྱ་དམར་གུང་ཁྲན་གྱི་རྩ་འཛིན་ཡིག་ཆ་རྡོ་ལག་བརྒྱུད་བྱས་པའི་སྲིད་ བྱུས་བོད་མི་ཚོ་དེའི་མགོ་སྐོར་འོག་ཚུད་པ་ཞིག་ཡིན་ཟེར་བ་རྒྱ་དམར་གྱི་རྒྱུག་ཁྱི་དེ་ཚོས་དགོས་པའི་དབང་གིས་ལོག་བཤད་དཀྲོག་ གཏམ་སྣ་ཚོགས་ཇི་ཙམ་བཤད་ཀྱང་དེར་རྒྱ་ཆེ་མང་ཚོགས་དབུ་འཁོར་ནས་ཡིད་ཆེས་བྱེད་མཁན་ཡོང་མི་ཐུབ།

༣༽  རྒྱ་ནག་གི་སྟོབས་ཤུགས་དེ་རྟག་པ་བརྟན་པ་ཡོད་པ་ཞིག་ལ་ཁྱེད་རང་ཡིད་ཆེས་ག་ཚོད་ཡོད་དམ་མེད། དབུ་མའི་ལམ་གྱི་སྲིད་བྱུས་འོག་རྒྱ་ནག་ལ་ སྐྱབས་བཅོལ་རྒྱུ་དེ་ཕུགས་བརྟན་པོ་ཞིག་རེད་འདུག་དང་མི་འདུག

ལན།     སྤྱིར་འཇིག་རྟེན་གྱི་བྱ་བ་གང་ལའང་རྟག་པ་དང་བརྟན་པ་མེད་པ་ཤེས་བཞིན་དུ་རྒྱ་ནག་གི་སྟོབས་ཤུགས་ལ་རྟག་པ་དང་བརྟན་པ་ཡོད་པའི་ཡིད་ཆེས་བྱེད་མཁན་ནི་སྐབས་འཚོལ་བ་དེ་ཚོ་རེད།  དབུ་མའི་ལམ་གྱི་སྲིད་བྱུས་ཀྱི་ཐོག་ནས་བོད་རྒྱ་ཆེའི་མི་མང་གི་འཕྲལ་ ཕུགས་གཉིས་ཀྱི་བདེ་དོན་རླབས་ཆེན་རྩོད་བཞིན་པ་དེར་རྒྱ་དམར་གཞུང་གི་འགོ་འཁྲིད་ཚོས་རྒྱལ་སྤྱིའི་སྤྱི་ཚོགས་ནང་༼ཁ་བྲལ་བཤད་ཀྱི་འདུག་༽ཟེར་ནས་ཁག་འདོགས་འདྲ་མིན་བྱེད་པ་ལས་རྒྱུ་མཚན་ལྡན་པའི་ལན་སྤྲད་མ་ཐུབ་པའི་དཀའ་ངལ་ཆེན་པོ་ཞིག་འཕྲད་ཡོད་པ་དེ་རྒྱ་ནག་ལ་སྐྱབས་བཅོལ་བ་རེད་ཟེར་གྱི་ཡོད་དམ།  ད་དུང་ཡང་དབུ་མའི་ལམ་གྱི་སྲིད་བྱུས་གཞི་ལ་བཞག་པའི་ཐོག་ནས་ཆུ་མོའི་འགྲོ་ལུགས་ལ་གཞིགས་པའི་ཀོ་བ་གཏོང་ཕྱོགས་ཟེར་བའི་དཔེ་ལྟར་འཛམ་གླིང་ནང་སྲིད་དོན་གྱི་འགྱུར་བ་དང་བསྟུན་ནས་སྐབས་བབ་རྣམ་དཔྱོད་བེད་སྤྱོད་གཏོང་ས་ཡོད་པ་ཞིག་ཡིན།

༤༽  རྒྱ་ནག་ལ་བསམ་ཤེས་དང་གུ་ཡངས་ཡོང་རྒྱུ་མེད་པ་མི་ལོ་བཅུ་ཕྲག་མང་པོའི་རིང་བོད་གཙོས་པའི་འཛམ་གླིང་མི་མང་གི་ཉམས་མྱོང་ཡིན་དུས་དོན་ངོ་མ་ཁྱེད་རང་གིས་གུང་ཁྲན་ཏང་ལ་བཅངས་པའི་རེ་བ་དེར་དོན་སྙིང་ག་རེ་འདུག

ལན།     འདས་པའི་མི་ལོ་བཅུ་ཕྲག་འགའ་ཤས་ནང་རྒྱ་དམར་སྲིད་གཞུང་ལ་འགྱུར་བ་རབས་དང་རིམ་པར་ཕྱིན་ཡོད་པ་དེ་ཚོ་བསམ་ཤེས་དང་གུ་ཡངས་ཐོག་ནས་བྱུང་པ་རེད་ལ་ད་དུང་ཡང་འགྲོ་རྒྱུ་ཉག་གཅིག་རེད།  བོད་ཀྱི་གནད་དོན་འདི་རྒྱ་དམར་གཞུང་གི་ཐོག་མའི་དམིགས་ཡུལ་དང་འཆར་གཞི་ལས་ཡོངས་སུ་བརྒལ་ཏེ་ཁོ་པ་ཚོའི་རེ་བའི་ལྡོག་ཕྱོགས་ཤིག་ཏུ་གྱུར་ཡོད།    དེར་བརྟེན་རྒྱ་དམར་གྱི་འགོ་འཁྲིད་ཚོར་བོད་རྒྱའི་དཀའ་རྙོག་མ་སེལ་ཐབས་མེད་ཀྱི་འགན་འཁུར་ཆེན་པོ་ཞིག་ཆགས་ཡོད་པ་ལས་ཕྱོགས་གཅིག་ རྐྱང་པས་གུང་ཁྲན་བཏང་ལ་རེ་བ་བཅངས་ནས་བསྡད་པ་ཞིག་མིན།   བོད་དོན་འཐབ་རྩོད་ནི་བདེན་དོན་ཡིན་པར་སོང་དབུ་མའི་ ལམ་གྱི་ཐོག་ནས་བདེན་པའི་མཐའ་གསལ་ངེས་ཡིན།  དོན་སྙིང་གང་ཡང་མེད་པ་ནི་བོད་སྤྱི་དོན་ལ་འགན་འཁུར་ཏིལ་འབྲུ་ཙམ་མེད་པར་སྤྱི་ཚོགས་ནང་རྒྱ་དམར་གྱི་ལག་ཆར་དཀྲོག་གཏམ་སྤེལ་མུས་དེ་ཚོ་ཡིན་པ་གསལ་པོ་ངོས་འཛིན་དགོས།

༥༽  བོད་ནང་རྒྱལ་གཅེས་པ་མང་པོ་ཞིག་གིས་རང་ལུས་མེར་བསྲེགས་ནས་རྒྱ་ནག་དམར་པོའི་གཞུང་ལ་ངོ་རྒོལ་གནང་པ་དེ་བོད་གཞུང་གིས་འུ་ཐུག་ཐབས་ཟད་ཅིག་ཡིན་པ་ངོས་ འཛིན་དང་ཁྱབ་བསྒྲགས་གནང་པ་རེད།   ད་དུང་ཡང་འུ་ཐུག་རང་བཞིན་གྱི་དབུ་མའི་ལམ་གྱི་སྲིད་བྱུས་དེས་རྒྱ་ནག་ལ་ཨུ་ཚུག་བརྒྱབ་ན་འགྲོ་ས་ཡོད་པ་ཞིག་ཡིན་པ་བོད་མི་མང་ལ་ཡིད་ འཆེས་འཕེར་བའི་འགྲེལ་བཤད་བརྒྱབ་ཡས་ཨེ་ཡོད།

ལན།     བོད་རྒྱལ་ཁབ་དེ་རྒྱ་དམར་གྱིས་ཧམ་བཟས་བྱས་པ་ཙམ་མ་ཚད་རང་ཡུལ་དུ་རང་གི་ཆོས་དང་རིག་གཞུང་མི་རིགས་སྐད་ཡིག་དང་ བཅས་པ་རྩ་བརླག་འགྲོ་རྒྱུའི་ཛ་དྲག་ཉེན་ཁ་ཆེན་པོའི་གནས་སུ་ལྷུང་བཞིན་པར་བརྟེན།  རྒྱ་དམར་གཞུང་གི་བཙན་གནོན་གདུག་ རྩུབ་འོག་བཟོད་སྲན་གྱི་མཐའ་བྲལ་ནས་གཞན་ལ་འཚེ་བ་སྤངས་ཏེ་རང་ལུས་མེར་བསྲེགས་ཀྱི་ཞི་རྒོལ་བྱེད་པ་ཞིག་དང་།  གཞིས་ བཞུགས་རྒྱ་ཆེའི་མི་མང་རྣམས་ཛ་དྲག་འཇིགས་དངངས་དེ་ལས་སྐྱོབ་ཐབས་སུ་དབུ་མའི་ལམ་གྱི་ཐོག་ནས་འབད་བརྩོན་ཡོད་དགུ་ རྩལ་སྤྲུགས་གནང་པ་ནི་འགན་འཁུར་ཡོད་པའི་ཐབས་ལམ་བཟང་ཤོས་དེ་ཡིན།  དེ་མིན་བསྒྲུབ་བྱའི་ཐབས་ལམ་རྒྱུ་མཚན་ལྡན་པ་ འདི་ཡིན་སྣེ་གཅིག་བསྟན་རྒྱུ་མེད་པར་ཁ་སྟོང་གཏམ་བཤད་ཀྱིས་མི་མང་ལ་རེ་སྟོང་དབུ་བསྐོར་ཞུས་ན་དེའི་རྗེས་འབྲས་ངན་པས་ ནམ་ཞིག་བོད་མི་རིགས་རིག་གཞུང་དང་བཅས་པ་རྩ་བརླག་ཏུ་འགྲོ་རྒྱུར་རྒྱ་དམར་གྱི་དམིགས་ཡུལ་བསྒྲུབ་ཐབས་ལ་ཤུགས་ཀྱིས་ མཐུན་གྱུར་བྱས་པ་ཞིག་མ་ཡིན་ནམ།

༦༽   དབུ་མའི་ལམ་གྱི་སྲིད་བྱུས་དེ་རྒྱལ་ཁབ་གཅིག་གི་དཀའ་ངལ་སེལ་ཐབས་བྱས་པ་མ་ཡིན་པ།  མི་སྒེར་རམ་ཁྱིམ་ཚང་སྒེར་པ་ཞིག་གི་བདེ་བ་སྡུག་བསྔལ་གྱི་དོན་དག་ཞིག་ལ་བོད་ཀྱི་མ་འོངས་པའི་མི་རབས་ཕྱི་མས་ངོས་འཛིན་གནང་པ་ཡིན་ན་དེ་ལ་སྔ་ས་ནས་ཁུངས་བཙན་པའི་འགྲེལ་བཤད་ཡང་དག་པ་ཞིག་བརྒྱབ་ཡས་ཨེ་ཡོད།

ལན།     དབུ་མའི་ལམ་གྱི་སྲིད་བྱུས་དེ་རྒྱལ་ཁབ་གཅིག་གི་དཀའ་ངལ་སེལ་ཐབས་བྱས་པ་མ་ཡིན་པ་མི་སྒེར་རམ་ཁྱིམ་ཚང་གཅིག་གི་བདེ་བ་སྡུག་བསྔལ་གྱི་དོན་དག་ཞིག་ཟེར་བ་དེ་སུ་ལ་ཟེར་གྱི་ཡོད་དམ།  འདི་ནི་ཚེར་ཕུང་ལ་བསྐོར་ནས་རི་བོང་ལ་འཇབ་རྡོ་ཟེར་བའི་ དཔེ་ལྟར་དོན་དུ་རྒྱལ་བ་རིན་པོ་ཆེ་དང་དགའ་ལྡན་ཕོ་བྲང་ལ་བསྟིང་ཚིག་ངན་ཁག་གཡོགས་ཐབས་ཤིག་ལས་རྒྱུ་མཚན་གཞན་གང་ཡང་མེད།  དེ་ལ་འདིར་དཔེ་མཚོན་ཙམ་བཤད་ན།  ཕྱི་ལོ་ ༡༩༨༧ ཟླ་  ༡༢ ཚེས་  ༡༧  ཉིན་འཐབ་ཕྱོགས་གཅིག་གྱུར་ལས་ཁུངས་ཀྱི་ འགོ་འཛིན་ཡན་མིང་ཕུ་ལ་བཏང་པའི་ཚིག་ཐོར་ཀྲུང་དབྱང་གིས་ཏཱ་ལའི་བླ་མར་འཛིན་པའི་མཛད་ཕྱོགས་༼དོན་ཚན་ལྔ་༽ལ་ འགྱུར་བ་མེད་ཟེར་བར་བཙན་བྱོལ་གཞུང་གིས་ལན་འདེབས་གནང་པའི་ནང་།༸སྐྱབས་མགོན་ཏཱ་ལའི་བླ་མ་མཆོག་ནས་དུས་རྒྱུན་དུ་ང་ནི་བོད་མི་མང་གི་མགྲིན་ཚབ་པ་ཞིག་ཡིན་གསུངས་མུས་དང་། བོད་དོན་ནི་བོད་མིའི་ཆེད་དང་།  དེ་ཡང་བོད་མི་ཚོས་ཐག་གཅོད་བྱ་རྒྱུ་ཡིན།  ཞེས་བཀའ་གནང་ཡོད་པ་དང་། ༸སྐྱབས་མགོན་ཏཱ་ལའི་བླ་མ་སྐུ་སྒེར་གྱི་ཐོབ་ཐང་དོན་གནད་སྐོར་ང་ཚོས་སྔར་ཕན་གོ་ བསྡུར་བྱས་མེད་ལ་མ་འོངས་པར་ཡང་བཀའ་མོལ་གནང་དགོས་གང་ཡང་མེད།  ཅེས་དང་།  ཕྱི་ལོ་ ༡༩༩༢  ཟླ་ ༩ ཚེས་  ༡༡  ཉིན་ ༸གོང་ས་ཏཱ་ལའི་བླ་མ་མཆོག་ནས་ཏིང་ཞའོ་ཕིང་དང་།   ཅང་ཙེ་མིང་སོ་སོར་ཕྱག་བྲིས་དང་མཉམ་དུ་བཏང་པའི་དྲན་ཐོ་ནང་།   ཕྱི་ལོ་  ༡༩༨༡  ཟླ་ ༧  ཚེས་ ༢༨ ཉིན་ཧུའུ་ཡོ་པང་གིས་རྒྱ་ལོ་དོན་གྲུབ་ལ།  ཏཱ་ལའི་བླ་མར་འཛིན་པའི་བྱེད་ཕྱོགས་དོན་ཚན་ལྔ་ ཞེས་པའི་ཡི་གེ་ཞིག་སྤྲད་པ་དེར་ཧ་ཅང་ཡ་མཚན་དང་། བློ་འཕམ་པོ་བྱུང་། གང་ལགས་ཟེར་ན། ང་ཚོས་པེ་ཅིང་ལ་འབྲེལ་བ་མུ་ མཐུད་བྱེད་པའི་དགོས་དོན་སྙིང་པོ།   མི་རབས་ནས་མི་རབས་བར་བོད་རྒྱ་ཁྱིམ་མཚེས་སུ་སྡོད་དགོས་པའི་བོད་མི་ས་ཡ་དྲུག་འཕྲལ་ཕུགས་བདེ་བར་འཁོད་ཐབས་ཀྱི་རྩ་དོན་ལ་དོ་སྣང་བདག་སྤྲོད་ཅི་ཡང་མ་བྱས་པར་ངོས་རང་མི་སྒེར་གཅིག་གི་གནང་སྟངས་སྐོར་བཤད་དེ་ང་ཚོའི་གྲོས་གཞི་སྙིང་པོ་ཁ་ཕྱོགས་སྒྱུར་ཐབས་བྱས་སོང་། ཞེས་དང་།  གཞན་ཡང་གསུམ་བཅུའི་དུས་དྲན་སྐབས་ཀྱི་ གསུང་འཕྲིན་སོགས་ནང་འཛམ་གླིང་ཡོངས་ལ་ཕྱི་གསལ་ནང་གསལ་ཡོད།   དེར་བརྟེན་མ་འོངས་པའི་མི་རབས་རྣམས་ལོ་རྒྱུས་ དངོས་ཡོད་ལ་དཔྱད་པ་བྱེད་སྐབས་༸གོང་ས་མཆོག་གི་རླབས་ཆེན་གྱི་དགོངས་གཞི་ལ་ཡིད་དབང་འཕྲོག་སྟེ་དད་པ་ལྷག་པར་དུ་འཕེལ་བ་ཞིག་ཡོང་རྒྱུ་ཡིན་པར་གདོན་མི་ཟ། ཁྱོད་ལྟ་བུ་རང་གི་ལྟོ་གོས་ཙམ་ཡང་ལོག་འཚོར་མ་བསྟེན་པར་ཁུངས་མི་འཁྱོལ་མཁན་ རྨོངས་པ་འགའ་ནི་ད་ལྟའང་མངོན་སུམ་ལ་བསྙོན་པའི་དཀྲོག་གཏམ་ཆེད་བཟོ་བྱེད་བཞིན་པ་དེ་འདྲ་མ་འོངས་པར་ཡང་རེ་ཟུང་ཡོང་སྲིད་ན་དེ་ལ་སྙིང་རྗེའི་ཡུལ་དུ་བལྟ་རྒྱུ་ལས་གཞན་ཅི་བྱེད།

༧༽   དབུ་མའི་ལམ་གྱི་སྲིད་བྱུས་ཀྱིས་རྟ་ལམ་བོང་བུས་བཀག་ནས་མི་ལོ་བཅུ་ཕྲག་མང་པོའི་རིང་བོད་རྒྱལ་ཁབ་བསྐྱར་གསོའི་ལས་དོན་འཐུས་ཤོར་བཏང་སོང་ཟེར་མཁན་མང་པོ་འདུག  མི་ཚང་མས་གསལ་པོ་མཐོང་བཞིན་པ་ད་ལྟའི་བོད་ཀྱི་ཆབ་སྲིད་ཀྱི་གོ་སྐབས་བཟང་པོ་དེ་བར་ཆད་ཤོར་ན་དེའི་ཉེས་འགན་དང་ལས་འགན་དེ་སུ་ལ་ཡོད་རེད།

ལན།     འདས་པའི་བྱུང་རབས་དང་བོད་མི་རིགས་ལ་འགན་འཁུར་བའི་ཐོག་ནས་དངོས་ཡོད་གནས་ཚུལ་ལ་བསམ་གཞིགས་མ་བྱས་པར་རང་ཉིད་ཀྱི་འཚོ་གོས་ཆེད་དུ་རང་དབང་ལུང་པར་རང་སྣང་གང་དྲན་ཤོད་མཁན་འགའ་ཤས་ཡོད་ངེས་རེད།  དེ་མིན་བོད་དང་ བོད་མི་རིགས་ཀྱི་བདེ་དོན་ལ་བསམ་གཞིགས་ནན་པོ་བྱས་པ་ཡིན་ན།  ཕྱི་ལོ་ ༡༩༥༩ ལོར་རྒྱ་དམར་གཞུང་གིས་བོད་ས་ཡོངས་ལ་ དྲག་གནོན་འཚབས་ཆེན་བྱས་ཏེ་བོད་མི་རྣམས་གདུག་རྩུབ་མནར་གཅོད་སྣ་ཚོགས་འོག་བོད་ཡུལ་དེ་དམྱལ་བའི་འཇིག་རྟེན་ཞིག་ གྱུར་པ་དང་། མི་ལོ་ཉི་ཤུའི་རིང་བོད་ཕྱི་ནང་དབར་འབྲེལ་བ་མེད་པར་རྒྱ་དམར་གྱིས་མི་སྤྱོད་ལས་འདས་པའི་སྡུག་སྦྱོང་ཡ་ང་བ་ཇི་ བྱས་རྣམས་ཕྱི་ལ་ཁྱབ་བསྒྲགས་མ་ཐུབ་པར་ཆེས་མུན་ནག་གི་དུས་དེར་བོད་ནང་འཚམས་གཟིགས་སྐུ་ཚབ་སྔ་རྗེས་ཕེབས་ཐུབ་པ་ དང་།  བོད་ཕྱི་ནང་གཉེན་འཕྲད་འགྲོ་འོངས།  བོད་ནས་ན་གཞོན་མང་པོ་རང་དབང་ལུང་པར་སློབ་གཉེར་དང་གྲྭ་སར་འཛུལ་ ཞུགས་ཐུབ་པ་སོགས་ཀྱིས་བོད་ནང་གི་གནས་ཚུལ་འཛམ་གླིང་ཡོངས་ལ་གསལ་པོ་ཆགས་ཐུབ་པ་དང་།   བོད་ནང་སྲིད་བྱུས་གུ་ ཡངས་ཕྲན་བུ་ཐོབ་ནས་ཆོས་དང་རིག་གཞུང་དཔལ་འབྱོར་ཉམས་པ་སླར་གསོ་བྱེད་རྒྱུའི་མཚོན་པའི་མང་ཚོགས་ལ་དབུག་ངལ་གསོ་བའི་གོ་སྐབས་ཤིག་ཐོབ་པ་མ་ཟད།  བོད་རྒྱ་འབྲེལ་མོལ་སྔ་རྗེས་རིམ་པར་བྱུང་ཐུབ་པ་དང་།  སྤྱི་ནོར་༸གོང་ས་༸སྐྱབས་མགོན་ཆེན་ པོ་མཆོག་འཛམ་གླིང་ཤར་ནུབ་གང་སར་ཞབས་སོར་འཁོད་ནས་ཆོས་སྲིད་ཀྱི་མཛད་པ་རླབས་ཆེན་རྒྱ་ཆེ་རྒྱུན་མི་ཆད་པ་བསྐྱངས་ དང་སྐྱོང་བཞིན་པ་དེ་ཚོར་རྒྱ་གཞུང་གིས་འགོག་རྐྱེན་བཟོ་མ་ཐུབ་པ།  ལྷག་པར་དུ་འཛམ་གླིང་ནང་ཆེས་སྙན་གྲགས་ཆེ་བའི་ནོ་སྦེལ་ ཞི་བདེའི་གཟེངས་རྟགས་སོགས་སྙན་གྲགས་ཆེ་བའི་གཟེངས་རྟགས་བརྒྱ་ཕྲག་གཉིས་ལ་ཉེ་བ་འབུལ་བཞེས་བསྐྱངས་པ།  དེ་ལ་བརྟེན་ ནས་བོད་དོན་འཛམ་གླིང་ཐོག་གསོན་གནས་ཐུབ་པ་ཙམ་མ་ཟད།  བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གྱིས་འཛམ་ གླིང་ནང་དར་ཁྱབ་ཐུབ་པ་སོགས་བརྗོད་ཀྱིས་མི་ལང་པའི་མཛད་འཕྲིན་ཉི་མ་ལྟར་ཤར་བ་འདི་རྣམས་དབུ་མའི་ལམ་གྱི་སྲིད་བྱུས་ལ་བརྟེན་ནས་བྱུང་པ་འོན་པས་གོ་ཚོད་དང་ལོང་བས་མཐོང་ཚོད་ཡིན།  དེ་བཞིན་དབུ་མའི་ལམ་གྱི་སྲིད་བྱུས་ལ་དེ་སྔོན་ཨ་རིའི་སྲིད་ འཛིན་བྷུ་ཤུ་ དང་།  སྲིད་འཛིན་ཨོ་བ་མ་སོགས་ཆེས་མཐོའི་དབུ་འཁྲིད་ཁག་དང་།  ཨ་རིའི་གྲོས་ཚོགས་དང་ཡུ་རོབ་གྲོས་ཚོགས་སོགས་མཁས་དབང་དང་གྲགས་ཅན་སྤྱི་སྒེར་གནད་ཡོད་ཧ་ཅང་མང་པོས་རྒྱབ་སྐྱོར་ཐོབ་དང་ཐོབ་བཞིན་ཡོད།  རྒྱ་དམར་གུང་ཁྲན་ དཔོན་རིགས་ཚོས་ཀྱང་བོད་དོན་འདི་བཏང་ན་རྫ་མ་ཆག་མ་བཏང་ན་ལག་པ་འཚིགས་པའི་དཔེ་ལྟར་དངོས་དོན་དང་མཐུན་པའི་ལག་ལེན་བསྟར་མ་ཐུབ་པར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ལ་ངང་སྒུག་བྱེད་པ་དང་།  ཕྱོགས་གཞན་ནས་བོད་ ནང་རྒྱ་མི་གནས་སྤོས་ཀྱིས་བོད་ཡུལ་རྒྱ་ཡུལ་ཏུ་སྒྱུར་རྒྱུའི་ཆེད་དུ་བཙན་བྱོལ་ནང་བོད་མི་ཀླད་སྟོང་ལྟ་ལོག་པ་ཁག་གཅིག་བེད་སྤྱད་ནས་དཀྲོག་གཏམ་སྣ་ཚོགས་ཁྱབ་སྤེལ་གྱིས་དུས་ཚོད་སྐྱེལ་ཐབས་བྱེད་བཞིན་པ་རེད།  དེར་བརྟེན་ད་ལྟ་རྒྱལ་བ་རིན་པོ་ཆེ་སྐུ་འཚོ་ བཞུགས་ཡོད་པའི་གོ་སྐབས་བཟང་པོ་འདིར་བོད་དོན་ལ་བར་ཆད་ཤོར་ན་དེའི་ཉེས་འགན་ནི་བཙན་བྱོལ་ནང་བོད་མི་རྒྱ་དམར་གུང་ཁྲན་གྱི་རྒྱུག་ཁྱི་བྱེད་མཁན་ཚོས་ཁུར་དགོས།

༨༽   དབུ་མའི་ལམ་གྱི་སྲིད་བྱུས་ཀྱི་ཐོག་ནས་སྤྲང་པོའི་ལྟོ་སློང་སློང་བྱེད་པའི་བྱ་སྤྱོད་དེའི་ལག་པ་ཡ་གཅིག་བཟེད་ས་དེ་རྒྱལ་སྤྱིའི་རྒྱལ་ཁབ་ཁག་ཆགས་ཡོད།  བོད་ལ་རྒྱབ་སྐྱོར་བྱེད་མཁན་གྱི་རྒྱལ་སྤྱིའི་རྒྱལ་ཁབ་ཕལ་ཆེ་བ་ད་ལྟའི་ཆར་རྒྱ་ནག་ལ་ངོ་ལོག་ཟིན་པ་རེད།  ལག་པ་ཡ་གཅིག་ཆད་ཚར་བ་དེ་ཁྱེད་རང་གིས་ཚོར་གྱི་འདུག་གམ།

ལན།     དབུ་མའི་ལམ་གྱི་སྲིད་བྱུས་ནི་བདེན་པ་དང་འཚེ་བ་མེད་པ་གཞི་རྩར་བཞག་སྟེ་དངོས་ཡོད་གནས་སྟངས་དང་འཚམས་པའི་རྣམ་དཔྱོད་ཀྱི་ཐོག་ནས་བདེན་པ་བདེན་ཐོག་ཏུ་འཁྱོལ་བ་བྱེད་བཞིན་པ་ཡིན་སྟབས་དེ་ལ་ཨ་རི་དང་ཡུ་རོབ་སྤྱི་མཐུན་རྒྱལ་ཁབ་ཁག་ གིས་མཚོན་པའི་དྲང་བདེན་ལ་དགའ་བའི་དབུ་འཁྲིད་དང་།   གྲོས་ཚོགས། ཚོགས་པ་ཁག་ནས་རྒྱབ་སྐྱོར་ལ་འགྱུར་བ་མེད་པར་སྔར་ལྷག་གནས་ཡོད་པར་རྒྱ་དམར་སྲིད་གཞུང་དངངས་འཚབ་སྐྱེས་ནས་ཐབས་ལམ་སྣ་ཚོགས་ཀྱིས་རྒྱུག་ཁྱི་དག་ལ་དཀྲོག་གཏམ་སྤེལ་བཅུགས་པ་འདི་རེད།  དེ་མིན་འཁོས་ཞན་དཔལ་འབྱོར་དོན་གཉེར་བ་རྒྱལ་ཁབ་ཆུང་གྲས་རེ་གཉིས་སྒེར་གྱི་དཔལ་འབྱོར་ཁེ་ཕན་ ཆེད་རྒྱ་གཞུང་ལ་སྤྲེལ་ལད་འཁྲབ་པ་དེ་ཚོ་དོན་དམ་པས་དགའ་ཞེན་གྱིས་ངོ་ལོག་པ་ཞིག་ཡིན་པ་མཚོན་མི་ཐུབ།  དེ་ནི་ཁོ་རང་ཚོ་ རང་གི་གནས་སྐབས་ཁེ་ཕན་ཙམ་ལས་ང་ཚོའི་བདེན་དོན་ལ་འགྱུར་བ་གང་ཡང་གཏོང་མི་ཐུབ།

༩༽   དུས་ཚོད་འདི་འདྲ་ཞིག་ལ་ཁྱེད་རང་གིས་བོད་མི་མང་བློས་བཏང་པ་ཡིན་ན་ངས་བོད་ཀྱི་ལོ་རྒྱུས་ལ་འགན་བླངས་པ་ཡིན།  བོད་ཀྱི་རྩ་དོན་ལ་འཁུར་བླངས་པ་ཡིན་ཟེར་ན་སྐད་ཆ་དེ་མི་སུའི་རྣ་བར་འགྲོ་གི་རེད་ཨ།

ལན།     དབུ་མའི་ལམ་གྱི་སྲིད་བྱུས་ལ་སྐྱོན་བརྗོད་ཀྱི་དྲི་བ་འདི་ཉིད་བཟོ་དགོས་པའི་དམིགས་འབེན་གཙོ་བོ་དེ་༸གོང་ས་༸སྐྱབས་མགོན་ཆེན་པོ་མཆོག་ལ་ཟུར་ཟ་བྱེད་རྒྱུ་དེ་ཡིན་པ་འདི་ནས་གསལ་པོ་ཤེས་ཐུབ།   འདས་པའི་མི་ལོ་བཅུ་ཕྲག་ནང་བོད་རྒྱལ་ཁབ་དང་མི་ རིགས་ཟུངས་ཟད་ཀྱི་ནད་པ་སྨན་པས་བོར་བ་ལྟར་གྱི་ཉམ་ཐག་འ་ཆད་འུ་ཐུག་གི་གནས་སུ་གྱར་བའི་སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བླ་ན་མེད་པའི་ཐུགས་རྗེ་བཀའ་དྲིན་ཉག་གཅིག་ལས་ད་ཆ་བོད་མི་རིགས་ཆོས་དང་རིག་གཞུང་བཅས་པ་ཉམས་པ་སླར་གསོས་ཀྱིས་འཛམ་གླིང་འདིའི་སྟེང་གསོན་པོར་གནས་ཐུབ་པ་དང་། གཞིས་བཞུགས་བོད་རྒྱ་ཆེའི་མི་མང་གི་ ཡིད་ཆེས་དང་རེ་བ་བློ་གཏད་བཅོལ་ས་དེ་རྒྱལ་བ་ཐམས་ཅད་མཁྱེན་པ་མཆོག་ཁོ་ན་དང་།   ཁོང་གིས་ལམ་སྟོན་དབུ་འཁྲིད་བཟང་ པོའི་འོག་ཡོད་པའི་མང་གཙོའི་ཀ་བ་གསུམ་ལྡན་དབུས་བོད་མིའི་སྒྲིག་འཛུགས་ཀྱིས་ཐུགས་འགན་བཞེས་བཞིན་པ་འདི་བོད་དོན་ བློས་བཏང་པ་རེད་ཟེར་གྱི་ཡོད་དམ། བོད་སྤྱི་པའི་དོན་དུ་ལྷག་བསམ་རྣམ་དག་གི་བསམ་བློ་ཡོད་པ་ཞིག་ཡིན་ན་བོད་དོན་བདེན་ མཐའ་གསལ་བའི་ནུས་པ་ཡོད་པ་དེ་༸གོང་ས་༸སྐྱབས་མགོན་ཆེན་པོ་མཆོག་ཁོ་ན་མ་གཏོགས་གཞན་སུ་ལ་ཡོད་དམ།   མདོར་ན་ཡོངས་གྲགས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་འགན་ཆེན་པོ་བཞི་ཡོད་པ་ནས་གསུམ་པ་དེ་བོད་དོན་མ་ཡིན་ནམ།

༡༠༽  བོད་ཀྱི་འབངས་མི་སེར་ཁྲོད་ནས་ལྟོ་གོས་གཏམ་གསུམ་ཚང་མ་གྱོང་བཏང་ནས་བོད་ཕྱི་ནང་གཉིས་ཀྱི་བོད་དོན་འཐབ་རྩོད་ལ་ངར་ཤུགས་ཅན་དང་གཏོང་ཕོད་ཅན་སྙིང་སྟོབས་ཅན་དེ་ཚོ་བློས་བཏང་ནས།  དབུ་མའི་ལམ་ཟེར་བ་དེ་ལ་ཤི་འཐམ་རོ་འཐམ་བྱེད་བསྡད་དགོས་ཡག་དེ་ག་རེ་ཡིན་ནམ།

ལན།     འདས་པའི་མི་ལོ་བཅུ་ཕྲག་གི་རིང་བསྟན་པ་ཆབ་སྲིད་ཀྱི་དོན་དུ་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་མཁན་གྱི་དཔའ་བོ་ཕོ་མོ་རྣམས་ཀྱི་རེ་འདོད་མངོན་དུ་གྱུར་ཕྱིར་དབུ་མའི་ལམ་གྱི་སྲིད་བྱུས་ནི་བདེན་པ་གཞི་རྩར་བཞག་ སྟེ་དངོས་ཡོད་གནས་སྟངས་དང་འཚམས་ཤིང་ཁ་བཤད་ལག་སྟོང་མ་ཡིན་པར་དོན་འབྲས་སོན་ཐུབ་པའི་ཐབས་ལམ་བླ་ན་མེད་པ་དེ་ཡིན།  གོང་དུ་གསལ་བ་ལྟར་དབུ་མའི་ལམ་ལ་འཛམ་གླིང་གི་དབུ་འཁྲིད་མང་པོ་དང་།  རྒྱ་རིགས་ཤེས་ཡོན་ཅན་གྱིས་མཚོན་པའི་རྒྱ་མི་རིགས་མང་པོ། བོད་ཕྱི་ནང་གཉིས་ནས་རྒྱབ་སྐྱོར་ཚད་མཐོན་པོ་ཐོབ་ཡོད།   དེ་ལས་ལྷག་པའི་བསྒྲུབ་བྱ་སྒྲུབ་བྱེད་ཀྱི་ ཐབས་ལམ་ཡང་དག་པ་ཡོད་པའི་བདམ་ཀ་གཞན་ཞིག་ད་བར་སུས་ཀྱང་བསྟན་ཐུབ་པ་བྱུང་མེད།

  ༡༡༽  དབུ་མའི་ལམ་དེ་བོད་ཀྱི་བདེན་མཐའ་གསལ་ཐབས་ཟེར་བ་ཕར་ཞོག  སྲིད་བྱུས་དེས་བོད་མི་ནང་ཁུལ་དུམ་བུར་བཏང་པའི་དགྲ་བོ་རྒྱ་དམར་པོའི་ལག་ཆ་ཞིག་ཏུ་གྱུར་ཟིན་པ་ཁྱེད་རང་གིས་ད་དུང་ཡང་ཤེས་མ་བྱུང་ངམ།

ལན།     དབུ་བའི་ལམ་གྱི་དགོས་དོན་དོར་ཐབས་མེད་པ་གཅིག་ནི་རྒྱ་དམར་གཞུང་གིས་བོད་ཡུལ་དུམ་བུ་ལྔ་ལ་བཅད་ནས་ཁག་བགོས་པའི་བོད་ཆོལ་ཁ་གསུམ་དེ་གཅིག་ཏུ་བསྒྲིལ་ནས་སྐྱིད་ན་སྐྱིད་མཉམ་དང་སྡུག་མཉམ་གནས་ཐུབ་པ་བྱེད་རྒྱུ་དེ་རེད།    དེ་ལས་ལྡོག་སྟེ་དངོས་ཡོད་གནས་ཚུལ་དང་མཐུན་པའི་བསྒྲུབ་བྱ་སྒྲུབ་བྱེད་ཀྱི་ཐབས་ལམ་འདི་ཡིན་མེད་པར་ཁ་སྟོང་ཚིག་སྟོང་གིས་དབུ་མའི་ལམ་གྱི་རླབས་ཆེན་ལས་དོན་ལམ་དུ་འགྲོ་མི་བཅུག་པའི་འགོག་རྐྱེན་བཟོ་མཁན་དེ་ཚོས་ཆོལ་ཁ་དང་ཆོས་བརྒྱུད་ལུང་མཚན་ནང་ཁུལ་དུ་གཞི་མེད་དཀྲོག་གཏམ་སྤེལ་ནས་བོད་མིའི་ཆིག་བསྒྲིལ་གཏོར་བཤིག་གཏོང་བ་དེ་རིགས་རྒྱ་དམར་གྱི་ལག་ཆ་ངོ་མ་དེ་ཡིན་པ་རྒྱ་ཆེའི་མང་ཚོགས་ཀྱིས་གསལ་པོ་མཁྱེན་གྱི་རེད།

༡༢༽   དབུ་མའི་ལམ་གྱི་སྲིད་བྱུས་ནི་བོད་རྒྱ་གཉིས་ཕན་ཟེར་གྱི་འདུག   དགྲ་བོ་རྒྱ་དམར་ལ་གང་ཕན་པའི་ཕན་རབས་བོད་ལ་གང་ཕན་པའི་ཕན་རབས་ཤིག་ཤོད་ཡས་ཨ་ཡོད།  མ་གཞི་ནས་དགྲ་བོ་རྒྱ་དམར་ལ་ཕན་པ་སྒྲུབ་དགོས་པའི་ལས་འགན་དེ་ཁྱེད་རང་ལ་སུས་སྤྲད་སོང་།

ལན།     དེང་དུས་རབས་ཉེར་གཅིག་པ་འདིར་འཛམ་གླིང་ཞི་བདེ་གནས་དགོས་ན་དཀའ་རྙོག་མཐའ་དག་འབྲེལ་མོལ་གྱི་ལམ་ནས་སེལ་དགོས་ཤིང་།  དེས་ན་དབུ་མའི་ལམ་གྱི་སྲིད་བྱུས་འདི་ཐབས་ལམ་བཟང་ཤོས་དེ་ཡིན་པ་རྒྱལ་སྤྱིའི་ནང་བློ་གཟུ་བོར་གནས་པའི་དབུ་ འཁྲིད་དང་མཁས་དབང་སོགས་གནད་ཡོད་མི་སྣ་མང་པོས་བསྔགས་བརྗོད་ཞུ་བཞིན་ཡོད་པ་དང་། དབུ་མའི་ལམ་གྱི་ཐོག་ནས་བོད་ རྒྱའི་དཀའ་རྙོག་སེལ་ཐུབ་པ་ཡིན་ན་དེ་ནི་འཛམ་གླིང་ནང་ཞི་མཐུན་གྱི་མིག་དཔེ་ཡག་ཤོས་ཤིག་བསྟན་ཐུབ་པ་སྨོས་ཅི་དགོས།  བོད་རྒྱ་ཕྱོགས་གཉིས་ཀར་ཕན་རབས་རྒྱུ་མཚན་ཁུངས་འཕེར་ཡོངས་བསྒྲགས་སུ་ཡོད་པ་ཉི་ཤར་སྤར་མོས་འགོག་ཐབས་བྲལ་བ་ཡོད་ཀྱང་།    ཁྱོད་འདྲ་བ་ལ་ཆོས་རྗེ་ས་པཎ་གྱིས།  བཟང་ངན་མི་ཤེས་དྲིན་བྱས་བརྗེད། །ངོ་མཚར་གཏམ་ལ་མཚར་མི་འཛིན།  །མངོན་སུམ་མཐོང་ བ་སླར་ཡང་འདྲི། །ཞུམ་ཞིང་རྗེས་འབྲང་བླུན་པོའི་རྟགས། གསུངས་པ་ལྟར་དང་། དེ་བཞིན་དགྲ་བོ་རྒྱ་དམར་ལ་ཕན་པ་བསྒྲུབ་པའི་ ལས་འགན་ཡང་རྗེ་ས་པཎ་གྱིས། དུག་གི་ཚེར་མ་བཏོན་པ་བཞིན། །དགྲ་བོ་རྩད་ནས་བཅད་དོ་ཞེས། །རྒྱལ་པོ་ལུགས་ལས་བྱུང་མོད་ ཀྱང་། །བུ་བཞིན་བསྐྱངས་ན་བུ་བཞིན་བྱེད། གསུངས་པ་དང་། དེ་བཞིན་ལུགས་ཀྱི་བསྟན་བཅོས་ལས། ལྷ་དང་དྲང་སྲོང་སྟོབས་ལྡན་རྒྱལ། །ཐབས་མཁས་བསོད་ནམས་ལྡན་པ་ཡིས།  །ཚིག་ཙམ་གྱིས་ཀྱང་ཕན་གནོད་ཆེར།  །ནུས་ན་བྱ་བས་ལྟ་ཅི་སྨོས།  ཞེས་གསུངས་པ་བཞིན་སྐྱེས་བུ་དམ་པའི་ཐབས་མཁས་ཀྱི་མཛད་པ་རྣམས་ཐ་མལ་པ་རྣམས་ཀྱི་བསམ་བློའི་ནང་ཤོང་མི་ཐུབ།

༡༣༽   ག་རེ་རྒྱལ་ཁབ་གཅིག་ལ་ལམ་ལུགས་གཉིས།   དབུ་མའི་ལམ་གྱི་སྲིད་བྱུས་པང་ལ་ཉར་ནས་སྡོད་མཁན་ཚོས་ཉིན་མཚན་མེད་པར་དེ་སྒོམ། ཡོད་ཚད་བློས་བཏང་ནས་དེ་ལ་རེ་བ་བརྒྱབ།  དེང་སང་ཧོང་ཀོང་གི་རྒྱལ་ཁབ་གཅིག་ལ་ལམ་ལུགས་གཉིས་ཟེར་བ་དེའི་བྲོ་བ་མྱོང་བཞིན་ཡོད་རེད། བྱས་ཙང་ཧོང་ཀོང་གི་གནས་ཚུལ་ལ་ལྟ་གི་ཨ་ཡོད།

ལན།     ད་ལྟའི་ཆར་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་ཡིག་ཆ་རྒྱ་གཞུང་ལ་སྤྲད་པ་དེར་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྐད་ཆ་མེད། དབུ་མའི་ལམ་གྱི་སྲིད་བྱུས་པང་ལ་ཉར་ནས་ཉིན་མཚན་མེད་པར་སྒོམ་གྱི་ཡོད་ན་དེ་ནི་བོད་སྤྱི་པའི་རྩ་དོན་ལ་ཚུལ་མཐུན་གྱིས་འགན་འཁུར་ལེན་པ་ཞིག་རེད།  ཡོད་ཚད་བློས་བཏང་ཟེར་བ་དེ་སུ་ལ་ཁག་ངན་གཡོགས་རྩིས་ཡིན་ནམ།  ཕྱི་ལོ་ ༡༩༥༩ ལོར་བོད་ཀྱི་སྣོད་བཅུད་ཡོངས་རྫོགས་རྒྱ་དམར་གྱིས་བཙན་འཕྲོག་བྱས་ཟིན་པ་དེ་རང་མོས་ཀྱིས་ཡོད་ཚད་བློས་ བཏང་པ་རེད་ཟེར་གྱི་ཡོད་དམ།   དབུ་མའི་ལམ་གྱི་ཐོག་ནས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་ཡིག་ཆ་རྒྱ་དམར་གཞུང་ལ་སྤྲད་པ་དེའི་དོན་ཚན་དྲུག་པར་རང་སྐྱོང་གི་ངོ་བོ་དང་སྒྲོམ་གཞི་ཁ་གསལ་བཀོད་ཡོད་པ་དེར་རང་སེམས་རྣལ་དུ་ཕབ་ནས་བལྟས་ན་རྒྱུ་མཚན་ཡང་དག་ཤེས་ཐུབ། བོད་ནི་གནའ་དུས་ནས་རང་བཙན་རྒྱལ་ཁབ་གཅིག་ཡིན་པར་སོང་ དབུ་མའི་ལམ་ལ་གདེང་ཚོད་དང་ལྡན་པའི་ཐོག་ནས་དགོས་འདུན་སྟོན་ཡོད། ཧོང་ཀོང་གནའ་དུས་ནས་རྒྱ་ནག་གི་ཆ་ཤས་ཡིན་པ་མ་ཟད།  ཧོང་ཀོང་རྒྱལ་ཁབ་གཅིག་ལ་ལམ་ལུགས་གཉིས་ཟེར་བ་དེར་ཡང་ཚད་གཞི་དང་དུས་བཀག་ཡོད།  དེར་བརྟེན་བོད་དང་ ཧོང་ཀོང་གཉིས་ཀྱི་ལོ་རྒྱུས་གནས་སྟངས་ཐ་དད་ཡིན་པ་དེ་མི་མཐུན་བཞིན་དུ་ཞྭ་དཔེ་ལྷམ་བཀབ་ཀྱིས་མཚུངས་བསྡུར་བྱེད་པ་ནི་ རྨོངས་རྟགས་རེད།  མ་གཞི་ནས་སྲིད་དོན་ཟེར་བ་དེ་རྒྱུན་དུ་དབང་ཆ་དང་ཐོབ་ཐང་རྩོད་རྒྱུ་དང།  ནུས་ཤུགས་སྤེལ་རེས་བྱེད་རྒྱུ་ནི་ ཆོས་ཉིད་ཞིག་ཡིན་སྟབས་རྙོག་གླེང་རྩ་བ་ནས་མེད་པ་ཞིག་ཡོང་རྒྱུ་དཀའ། གཙོ་བོ་བོད་རིགས་གཅིག་བསྒྲིལ་གྱི་གོང་བུའི་ནུས་ཤུགས་དེ་གལ་ཆེན་པོ་ཡིན།  དེར་བརྟེན་རྒྱ་དམར་གྱིས་བོད་ནང་དུམ་བུར་བཏང་ནས་དབང་བསྒྱུར་བྱས་པ་དང་།   བཙན་བྱོལ་ནང་ཆོལ་ ཁ་དང་། ལུང་ཚན། ཆོས་ལུགས།  རྩ་དོན་བསྒྲུབ་བྱའི་བསམ་ཚུལ་མི་འདྲ་བའི་དབར་དཀྲོག་གཏམ་དཀྲུགས་ཤིང་གི་ལས་འགུལ་སྤེལ་བཞིན་པ་དེ་བོད་མིའི་གཅིག་བསྒྲིལ་མེད་པ་བཟོས་ནས་རྒྱ་དམར་གྱི་འདོད་དོན་སྒྲུབ་ཐབས་ཡིན་པ་མང་ཚོགས་གྱིས་མཁྱེན་ཐུབ།

༡༤༽ དབུ་མའི་ལམ་ཟེར་བའི་གུང་ཕྲན་གྱི་བྱུས་ངན་དེའི་རིས་སུ་སོང་ན།  བོད་ཀྱི་ལོ་རྒྱུས་ལ་སྙིང་པོ་མེད་པ།  བོད་རང་བཙན་ལ་རྒྱབ་ལྗོངས་མེད་པ། བོད་མི་མང་ལ་ནུས་པ་མེད་པ།  བོད་ཀྱི་སྲོལ་རྒྱུན་རིགས་གཞུང་ལས་ཀྱང་རྒྱ་གར་གྱི་ཨ་ཁུ་གཽཏཾ་མའི་ནང་ཆོས་རིག་གཞུང་རྩ་ཆེ་བ་མཐོང་གི་རེད་ཟེར་བ་དེ་བདེན་པ་རེད་དམ་མ་རེད།

ལན།     དབུ་མའི་ལམ་གྱི་ཐོག་ནས་བོད་ཀྱི་ལོ་རྒྱུས་ལ་སྙིང་པོ་མེད་པ། བོད་རང་བཙན་ལ་རྒྱབ་ལྗོངས་མེད་པ། བོད་མི་མང་ལ་ནུས་པ་མེད་པ།  ཟེར་བ་དེ་སུས། ག་དུས། ག་པར་བཤད་འདུག  འཛུབ་སྟོན་གྱིས་དང་།  དབུ་མའི་ལམ་ནི་འདས་པའི་ལོ་རྒྱུས་ཀྱི་བོད་རང་བཙན་ཡིན་པ་དེ་རྩ་བར་ཟིན་ནས་རྒྱུ་མཚན་ཡང་དག་གི་སྒོ་ནས་བོད་མི་རིགས་རྩ་བརླག་མི་འགྲོ་བ་དང་།  ཆོས་དང་རིག་གཞུང་སྐད་ཡིག་ འཁོར་ཡུག་རྣམས་སྲུང་སྐྱོབ་ཐུབ་ཐབས་སུ་ཁ་ཡོད་ལག་ཡོད་ཀྱི་ཐབས་ལམ་ཞིག་ལག་བསྟར་བྱེད་བཞིན་པ་དེར་མངོན་སུམ་ལ་བསྙོན་པའི་ལོག་འགྲེལ་བྱེད་པ་ནི་རྒྱ་དམར་གྱི་ལས་འགན་སྒྲུབ་པ་མིན་ན་ཅི་རེད།  བོད་ཀྱི་སྲོལ་རྒྱུན་རིག་གཞུང་ཐོག་བོད་ལ་ནང་ཆོས་ཆུ་ འགོ་གངས་གཏུགས་ཀྱིས་རྒྱ་གར་ནས་དར་བ་ཡིན་པ་དེར་སྲིད་དོན་གྱི་ལོག་བཤད་བྱེད་ས་གང་ཡང་མེད་པ་དང་། འཚེ་བ་མེད་པའི་ལྟ་བ་ནི་ལོ་སྟོང་ཕྲག་སྔོན་ནས་དར་བའི་རྒྱ་གར་གྱི་རིག་གཞུང་བཟང་པོ་ཞིག་ཡིན་པ་དེར་མི་འདོད་པ་ནི་དྲག་སྤྱོད་རིང་ལུགས་པའི་རང་གཤིས་ངན་པ་ཞིག་རེད།  ལར་ནས་ཨ་ཁུ་གཽཏཾ་གྱི་ནང་ཆོས་ཞེས་ཁྱད་གསོད་ཀྱི་ཚིག་བེད་སྤྱོད་གཏོང་ཕོད་པ་ནི་དམ་ལོག་གི་རང་མདོག་དངོས་སུ་བསྟན་འདུག

༡༥༽ དབུ་མའི་ལམ་ལ་རྒྱབ་སྐྱོར་མང་པོ་ཐོབ་ཀྱི་འདུག་ཟེར། རྒྱ་རིགས་མཁས་པས། ག་རེའི་རྒྱ་རིགས་མཁས་པ། རྒྱ་རིགས་རྩོམ་པོ་ཨར་པིས་བོད་རྒྱ་ཞི་མོལ་ལ་ལྟ་བ་ཟེར་བ་དེའི་ནང་ངྷ་ས་དང་པེ་ཅིང་བར་གྱི་གྲོས་མོལ་དེ་གསལ་སྟོན་བྱས་ཡོད་རེད། དེབ་དེ་ཡག་པོ་བཀླག་རྒྱུ་ཨ་བྱུང་།

ལན།     དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་བྱེད་མཁན་རྒྱ་རིགས་ཤེས་ཡོན་ཅན་ནོ་སྦེལ་ཞི་བདེའི་གཟེངས་རྟགས་བཞེས་མཁན་ལིའུ་ཞའོ་པོ་དང།   ཤེས་ཡོན་ཅན་ཝང་ལི་ཞོང་། ཀྲང་ཙུང་ཧ། དགེ་རྒན་ཆེན་མོ་ལྕམ་ཏིང་ཙི་ལིན། ཁྲིམས་ལུགས་མཁས་དབང་ཡུའི་ ཧའོ་ཁྲེན། ཁྲིམས་རྩོད་པ་ཀྲུའུ་ཅིའུ་ཧུ་ཡི་སོགས་གྲགས་ཅན་མི་སྣ་སྟོང་ཕྲག་བརྒལ་པས་ཆེད་རྩོམ་ཡོངས་གྲགས་སུ་སྤེལ་ཡོད་པ་རྣམས་སྣང་མེད་དུ་བཞག་ནས།  རྒྱ་གཞུང་གིས་ཆེད་གླས་རེ་ཟུང་གི་རྩོམ་བྲིས་དམིགས་སུ་བཀར་ནས་བརྒྱུད་བསྒྲགས་བྱེད་པ་ནི་རྒྱ་དམར་གྱི་རྒྱུག་ཁྱི་ཚོའི་ལས་འགན་ཡིན་པ་ཤེས་ཀྱི་ཡོད།

༡༦༽  མང་གཙོ་ལ་དགའ། བོད་ཀྱི་མང་གཙོ་དེ་རྒྱལ་བ་རིན་པོ་ཆེའི་དགོངས་པ་རྩ་ཆེན་པོ་ཞིག་རེད། དབུ་མའི་ལམ་གྱི་མི་རིགས་ས་ཁོངས་རང་སྐྱོང་ཟེར་བ་དེའི་ནང་གུང་ཕྲན་གྱི་འདོད་པ་དང་བསྟུན་ནས་མང་གཙོ་མེད་པ་བཟོས་ཡོད་རེད། དབུ་མའི་ལམ་འདེམས་ཀྱི་ཡིན་དང་། བོད་ཀྱི་མང་གཙོ་འདེམས་ཀྱི་ཡིན།   གཅིག་གསུངས་དང་།

ལན།     དབུ་མའི་ལམ་གྱི་སྲིད་བྱུས་ཐོག་ནས་བོད་ཀྱི་ཆོས་དང་སྐད་ཡིག་རིག་གཞུང་མི་རིགས་རང་དབང་སྲུང་སྐྱོབ་ཐུབ་པ་བྱ་རྒྱུ་ནི་ནད་ཐོག་སྨན་འཁེལ་གྱི་ཐབས་ལམ་ཞིག་ཆགས་ཡོད།   བོད་ནང་གི་ཛ་དྲག་གནས་སྟངས་ལ་བསམ་ཤེས་ཡེ་ནས་མ་བྱས་པར་རང་དབང་ལུང་པར་རང་མགོ་གང་ཐོན་གྱིས་རྒྱགས་གཏམ་བཤད་ནས་བསྡད་པ་ཡིན་ན་ནམ་ཞིག་བོད་ཡུལ་ཡོངས་རྫོགས་རྒྱ་ཡུལ་དུ་བསྒྱུར།  བོད་མི་རིགས་སྐད་ཡིག་རིག་གཞུང་དང་བཅས་པ་རྩ་མེད་གཏོང་རྒྱུའི་རྒྱ་དམར་གྱི་བྱུས་ངན་དེ་འགྲུབ་རྒྱུ་ལས་མ་འདས།

༡༧༽  མི་རང་རང་སོ་སོས་དགའ་མོས་ཆེན་པོ་བྱེད་སའི་མི་རེ་རེ་ཡོད་རེད།  ཁྱོད་རང་བོད་ཀྱི་མི་རིགས་དང་། བོད་ཀྱི་མང་གཙོ། བོད་རྒྱལ་ཁབ་བཅས་ལ་དགའ་ཞེན་ཡོད་རེད།   ཁྱོད་རང་གིས་མི་གཅིག་དེ་འདེམས་ཀྱི་ཡིན་པ།  རྒྱལ་ཁབ་དེ་འདེམས་ཀྱི་ཡིན། མི་གཅིག་དེ་རྩ་ཆེན་པོ་བརྩི་ཡི་ཡིན་པ།  མི་རིགས་དེ་རྩ་ཆེན་པོ་བརྩི་ཡི་ཡིན།  མི་གཅིག་པོ་དེ་མེད་པ་ཆགས་སོང་ན་བོད་ལ་སྙིོང་པོ་མེད་པ་མཐོང་གི་ཡོད་དང་།  བོད་ཀྱི་མང་གཙོ་དེ་མེད་པ་ཆགས་ན་བོད་ལ་སྙིང་པོ་མེད་པ་ མཐོང་གི་ཡོད།

ལན།     བཙན་བྱོལ་བོད་མིའི་བཅའ་ཁྲིམས་དོན་ཚན་དང་པོ། བོད་དང་བོད་མིའི་མགོན་སྐྱབས་དང་མཚོན་རྟགས། ཞེས་༸གོང་ས་ ༸སྐྱབས་ མགོན་ཆེན་པོ་མཆོག་དང་འབྲེལ་བའི་དོན་ཚན་གསུམ་བཀོད་པ་དེ་ཁྲིམས་བཟོ་ལྷན་ཚོགས་ཀྱིས་རྒྱུ་མཚན་ཡང་དག་གི་སྒོ་ནས་གཏན་ལ་ཕབ་པ་ཞིག་རེད།  གཞིས་བྱེས་བོད་མི་ས་ཡ་དྲུག་གི་ནང་ནས་བསོད་སྐམ་པ་རེ་ཟུང་ཞིག་མ་གཏོགས་དེ་མིན་༸གོང་ས་ ༸སྐྱབས་མགོན་རྒྱལ་བ་རིན་པོ་ཆེར་བླ་ན་མེད་པའི་དགའ་དད་གུས་གསུམ་ཞུ་བཞིན་ཡོད་པ་དེར་སུས་ཀྱང་འགོག་རྐྱེན་བཟོ་མི་ཐུབ།  གང་ལགས་ཤེ་ན།  དེ་ནི་ཆོས་ཕྱོགས་ཁོ་ན་མ་ཡིན་པར་བོད་འཆི་གསོན་གྱི་མཚམས་སུ་གནས་པའི་ཛ་དྲག་གནས་སྟངས་འདིའི་སྐབས་སུ་བོད་མི་རིགས་དང་། བོད་ཀྱི་ཆོས་དང་རིགས་གཞུང་འཛམ་གླིང་ཐོག་མིང་མ་ཡལ་བར་གསོན་གནས་དང་དར་རྒྱས་ཐུབ་ པ་མ་ཟད།  བཙན་ བྱོལ་ནང་མང་གཙོ་ཟེར་ནས་རང་སྣང་གང་དྲན་རྐང་བརྐྱངས་ལག་བསྣར་བྱེད་ས་ཡོད་པ་འདི་རྒྱལ་བ་རིན་པོ་ ཆེའི་ཐུགས་རྗེ་བཀའ་དྲིན་ཉག་གཅིག་ཡིན་པ་ལོང་བས་བལྟས་ཀྱང་ཁམས་གསུམ་གྱི་དཔེ་ལྟར་རེད།    ༸གོང་ས་ ༸སྐྱབས་མགོན་ རྒྱལ་བའི་དབང་པོ་མཆོག་དང་བོད་མི་མང་དབར་མགོ་དང་འཇིང་པ་ཡ་བྲལ་ཐབས་མེད་པ་དེས་རྒྱ་ནག་དམར་པོའི་འགོ་འཁྲིད་ཚོའི་སྙིང་ལ་ཚེར་མའི་རང་བཞིན་དུ་གྱུར་ཏེ་རྒྱལ་ཚོང་རྒྱུག་ཁྱི་ཚོར་དཀྲོག་གཏམ་དཀྲུག་ཤིང་བཟོ་རྒྱུར་ཐབས་ཤེས་སྣ་ཚོགས་ཀྱིས་ལས་འགུལ་སྤེལ་བཞིན་ཡོད་པ་རེད།   དེ་ཡང་ཆེ་ས་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ལ་བར་ཆད་བཟོ་ཐུབ་ ཐབས་དང་། བོད་མིའི་སྒྲིག་འཛུགས་གཏོར་བཤིག་གཏོང་ཐབས།  བཙན་བྱོལ་སྤྱི་ཚོགས་ནང་རྫུན་གཏམ་སྣ་ཚོགས་དྲིལ་བསྒྲགས་ ཀྱིས་ཆིག་བསྒྲིལ་མེད་པ་བཟོས་ནས་གཞིས་བཞུགས་མི་མང་སེམས་ཤུགས་གཅོག་ཐབས་སོགས་ལ་འབད་རྩོལ་ལུ་གུ་རྒྱུད་དུ་བྱེད་ བཞིན་པ་བཅས་གསལ་པོ་རེད།   འོན་ཀྱང་དེ་ལ་གྲུབ་འབྲས་སྣ་གཅིག་ཐོབ་རྒྱུ་མེད་པ་མ་ཟད་རྒྱུག་ཁྱི་ཚོའི་རང་མདོག་དམར་རྗེན་དུ་གསལ་བཞིན་པ་རེད།

མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དོན་ མཐའ་དག་ལྷུན་གྱིས་འགྲུབ་པ་དང་།   གཉིས་ཕན་དབུ་མའི་ལམ་གྱི་ཐོག་ནས་བོད་དོན་བདེན་མཐའ་མྱུར་དུ་གསལ་བའི་ སྨོན་ལམ་བཅས།།    བདེན་པ་ཉིད་རྣམ་པར་རྒྱལ་གྱུར་ཅིག། །།

མཆན། གོང་གསལ་བསམ་ཚུལ་རྩོམ་ཡིག་དེ་ནི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ལངས་ཕྱོགས་ཡིན་པས་མ་ཁྱབ།