སྒང་པ་དགེ་ལེགས།
ད་ནི་བོད་པ་སྤར་མོ་གང་འདི་རྡོ་ཚ་བོའི་ཐོག་གི་གྲོག་མ་བཞིན་བྲེལ་འཚུབ་དང་ཟང་ཟིང་ལང་ལོང་དུ་གྱུར་འདུག ཅི་ཁག་སྟེ་ལོ་ལྔའི་ནང་དུ་ཐེངས་གཅིག་ཡོང་ངེས་པའི་ས་ཡོམ་ཆེན་པོ་དེ་རྒྱག་བཞིན་འདུག དོན་དུ་ས་གཞི་ཆེན་པོ་འདི་རང་བྱུང་གིས་འགུལ་བ་མ་ཡིན་པར་སྤྱི་ཚོགས་ཆུང་ཆུང་འདིས་སྒུལ་བ་རེད། འོན་ཀྱང་ཁོ་ཚོའི་ཆག་འཇིག་འདི་རང་ཉིད་ལས་བྱུང་བ་ཡིན་མིན་ལ་བསམ་བློ་གཏོང་གི་མེད་ལ་དེ་ལྟར་ཡིན་པ་ངོས་ལེན་ཀྱང་བྱེད་མི་ཐུབ། ཁོ་ཚོ་ལ་ས་གཞི་འདི་གས་ཁ་ཆུང་ངུ་ཙམ་ཡང་གསོ་བའི་འདུན་པ་མེད། ཡང་ཅིག་བཤད་ན་ཁོ་ཚོས་རང་གི་རྐང་འོག་ཏུ་གས་ཁ་ཆེན་པོ་ཞིག་ཡོད་པ་མཐོང་གི་མེད་ལ་རང་ཉིད་དེའི་ནང་དུ་ཟག་སྟེ་ཤ་ཉོག་རུས་ཉོག་ཏུ་འགྱུར་སྲིད་པའི་ཉེན་ཁ་དེ་བས་ཀྱང་ཚོར་གྱི་མེད། དེའི་དབང་གིས་ཁོ་ཚོས་ནུས་ཤུགས་ཡོད་རྒུ་རྩལ་དུ་སྤྲུག་སྟེ་འཕག་མཆོང་རྒྱག་བཞིན་ཡོད། འཕག་མཆོང་རྒྱག་མཁན་མང་དྲགས་པའི་དབང་གིས་ཁུ་སིམ་མེར་ཉལ་ནས་འདུག་མཁན་རྣམས་ལ་གཉིད་སྐྱིད་པོ་ཞིག་ཁུག་རྒྱུའི་གོ་སྐབས་མེད།
ད་དུང་ཁོ་ཚོས་རང་གི་སྤྱི་ཚོགས་འདི་གཞན་ཞིག་གིས་གཏོར་འགྲོ་བའི་དོག་པ་དང་འཇིགས་སྣང་ཆེན་པོ་བྱེད་བཞིན་ཡོད་མོད། གཞན་དག་གིས་བོད་པ་ཚོས་རང་གིས་རང་གཏུབ་ཅིང་གཞོག་པའི་བླུན་རྟགས་ལ་ཧབ་ཆ་རྒྱག་བཞིན་ཇ་བཏུང་སྟེ་ལྟད་མོར་བལྟས་ནས་བསྡད་ཡོད། སྐབས་དང་སྐབས་སུ་ཕྱི་ལོག་ནས་གཡུག་ཡོང་བའི་དུག་རྫས་ལ་བདུད་རྩི་རུ་སྒོམ་སྟེ་ཧབ་ཐོབ་རྒྱག་ཅིང་ཚམ་ཚོམ་དང་ནེམ་ནུར་མེད་པར་ཁ་ལ་འཇུག་རྐྱང་དང་ཁོག་ཏུ་མིད་རྐྱང་བྱེད།
ཁོ་ཚོས་བཤད་ན་ཁོ་ཚོའི་ཡབ་མེས་ཚོ་ནི་འཇིག་རྟེན་འདིའི་དཔའ་མཛངས་རྟུལ་ཕོད་ཀྱི་བསྡུས་གཟིགས་ཡིན་ཟེར། ལ་རྒྱ་དང་སྒལ་ཚིགས་ཀྱི་མཚོན་རྟགས་ཡིན་ཟེར། ཡིན་ན་ཡང་ཁོ་ཚོའི་ལུས་སྟེང་དུ་དཔའ་མཛངས་རྟུལ་ཕོད་ཀྱི་ཞག་རྩི་མེད་ལ། ལ་རྒྱ་དང་སྐལ་ཚིགས་ཀྱི་དྲི་མའང་མེད། ཁོ་ཚོས་བཤད་ན་ཁོ་ཚོའི་ཡབ་མེས་ཚོས་སུམ་གཉིས་ས་ལ་དབང་བསྒྱུར་བྱེད་མྱོང་ལ་མཐའ་བཞིའི་རྒྱལ་ཕྲན་ལ་དཔྱ་ཕབས་མྱོང་ཟེར། འོན་ཀྱང་དེང་སྐབས་ཁོ་ཚོ་ནང་འཁྲུག་གིས་སྐྱོམ་བཞིན་ཡོད་ལ་མཐའ་བཞིའི་རྒྱལ་ཕྲན་ལ་ལྟོ་གོས་བསླང་ནས་བྲེལ་བཞིན་ཡོད། མདོར་ན་ཕྱི་རོལ་གྱི་སྦྱོར་ངན་ཡོད་ཚད་ནང་ཁུལ་གྱི་འཁྲུག་རྐྱེན་དུ་བསྒྱུར་བཞིན་ཡོད། དེ་ལྟ་ནའང་ཁོ་ཚོས་ད་དུང་རང་ཉིད་ཡ་རབས་ཚུལ་མཐུན་དང་ཤེས་འཇོན་གཞུང་དྲང་ཞིག་ཏུ་རློམ་བཞིན་འདུག ལོས་ཡིན་ཏེ། དེ་ལྟར་ཡིན་པའི་དབང་གིས་ཁོ་ཚོ་ཆེས་མཐོ་ས་ནས་ཆེས་དམའ་སར་ཟག་པ་རེད།
ཁོ་ཚོའི་ཆབ་སྲིད་པ་དག་གིས་ཆོས་མ་གཏོགས་སྲིད་དོན་མི་ཤེས་པས་སྲིད་གཞུང་གི་སྲོག་ཤིང་དང་སྐེ་རགས་ལྟ་བུའི་རྩ་ཁྲིམས་དང་ཁྲིམས་ཁང་ཡང་མིག་ནང་དུ་མི་འཇོག ཁོ་ཚོའི་ཆོས་པ་དག་གིས་སྲིད་དོན་མ་གཏོགས་ཆོས་གཞུང་ལ་ཉམས་ལེན་མི་བྱེད་པས་གྲྭ་བཙུན་གྱི་མཚོན་རྟགས་སུ་གྱུར་བའི་འདུལ་བའི་བཅས་མཚམས་དང་དགོན་པའི་བཅའ་ཡིག་ལ་ཁ་ཡ་མི་བྱེད། ཆབ་སྲིད་པ་ཚོ་ཆོས་ཀྱིས་བཟི་ནས་བསྡད་ཡོད་ལ་ཆོས་ལུགས་པ་ཚོ་སྲིད་ཀྱིས་སྨྱོས་བསྡད་ཡོད། གང་ལྟར་ཁོ་ཚོའི་གནས་བབས་ནི་འདི་འདྲའི་ཡ་ང་ཞིང་ཡི་མུག་པ་ཞིག་རེད། རེད་དེ། ཁོ་ཚོ་ལ་ཁོ་ཚོས་ཚེ་ནོམ་དུ་རློམ་ཆོག་པ་གཅིག་རང་ཅིག་ཡོད་པ་ནི་དགོང་ན་བརྒྱད་ཅུ་བརྒལ་ནས་དགུ་བཅུར་ཉེ་བའི་ཕ་རྒན་ཞིག་ཡོད་པ་དེ་རེད། ནམ་ཞིག་ཁོང་མ་བཞུགས་ཚེ་ཁོ་ཚོ་ཅི་འདྲ་ཞིག་ཏུ་འགྱུར་སྲིད་དམ། ཁོ་ཚོས་རང་ཉིད་ཕ་ཡུལ་དུ་ལོག་རྒྱུའི་ཕུག་འདུན་ཅི་ལྟར་སྒྲུབ་སྲིད་དམ། དྲི་བ་འདི་དག་ནི་ཁོ་ཚོ་རེ་རེའི་ཕྲག་ཏུ་འབབ་ངེས་པའི་ཁུར་བོ་ཆེན་པོ་ཞིག་ཡིན་མོད། འོན་ཀྱང་ཁོ་ཚོ་ད་ལྟའི་ནང་འཁྲུག་གི་འུར་ཟིང་ལ་བྲེལ་འཚུབ་ཆེ་དྲགས་པས་འབྱུང་འགྱུར་ལ་ཁ་གཏོད་པའི་ཁོམ་ལོང་མེད་ལ་ཡི་གའང་མེད་པ་འདྲ།
ཁོ་ཚོའི་ཞེ་ཕུགས་སུ་ནམ་ཞིག་གཞན་ཞིག་གིས་ཁོ་ཚོའི་ཆེད་དུ་དགྲ་བོ་ལ་དམག་སྣ་དྲངས་སྟེ་འཐོབ་འོས་པ་ཡོད་ཚད་འཐོབ་ངེས་པའི་ཡིད་ཆེས་ཤིག་བཅང་ཡོད། ཁོ་ཚོས་ཚོགས་པ་སྒྲིག་འཛུགས་ག་གེ་མོས་བདེན་པའི་གཟུ་དཔང་བྱས་ཏེ་རྒྱུ་འབྲས་ཀྱི་ཁྲུན་ཐག་གཅོད་པའི་རེ་བ་བཅང་ཡོད། འོན་ཀྱང་ཡིད་ཆེས་དང་རེ་བས་ཁོ་ཚོ་ཤ་ཉོག་རུས་ཉོག་ཏུ་བཏང་བའི་ལོ་རྒྱུས་དེ་དག་ད་དུང་ཡལ་མེད། རེད་དེ་ཁོ་ཚོས་ལོ་རྒྱུས་ལས་བསླབ་བྱ་ལེན་མི་ཤེས་ལ་ལེན་འདོད་ཀྱང་མེད། ཁོ་ཚོའི་མིག་ནང་དུ་ལོ་རྒྱུས་ཟེར་བ་ནི་ཤོག་བུ་དང་སྣག་ཚ་ཙམ་དང་སྐད་ཆ་དང་རླངས་པ་ཙམ་རེད།
ཁོ་ཚོ་ལ་ཐུན་མོང་གི་གཤིས་ཀ་ཞིག་ཡོད་པ་ནི་ལྟ་བ་མི་མཐུན་པ་ཡོད་ཚད་དགྲ་རུ་ལྟ་བ་དེ་རེད། གཤིས་ཀ་དེའི་དབང་གིས་ཁོ་ཚོའི་སྤྱི་ཚོགས་འདི་མ་གཞི་ནས་ཆུང་ཆུང་ཞིག་ལས་མེད་བཞིན་དུ་ཆུང་ཆུང་དེ་ཡང་ཁ་འཐོར་ཡ་འཐོར་དུ་འགྱུར་བཞིན་ཡོད། གལ་སྲིད་ཁྱོད་ཀྱིས་ཁོ་ཚོ་གང་རུང་གི་ལྟ་བ་དང་བྱ་སྤྱོད་ལ་དགག་རྒྱག་བྱས་ཚེ་ཁྱོད་དགྲ་བོའི་ཉུག་མ་དང་ཕོག་ཟན་རེད་ཅེས་སྤྱི་ཚོགས་དེ་ནས་ཕྱིར་འབུད་བྱེད་ངེས། རེད་དེ་དགྲ་བོའི་དམིགས་ཡུལ་སྒྲུབ་མཁན་ནི་ཕྱིར་འབུད་གཏོང་མཁན་དེ་ཡིན་པ་ལས་ཕྱིར་འབུད་གཏོང་རྒྱུ་དེ་མིན་པའི་གནས་ལུགས་ཁོ་ཚོས་ནམ་ཡང་ཤེས་མེད།
ཁོ་ཚོ་ནི་དེ་འདྲ་ཞིག་ཡིན་པས་སུ་ཞིག་ཁོ་ཚོ་དང་དགྲ་རུ་ལང་ན་དེ་ནི་དགྲ་ཡི་བསོད་ནམས་ཡིན་ཏེ། དགྲ་ཡིས་ཁོ་ཚོ་མ་བཏུལ་སྔོན་ནས་ཁོ་ཚོས་ཁོ་ཚོ་བཏུལ་ཚར་ཡོད། དེའི་རྐྱེན་གྱིས་དེང་སང་བོད་ཀྱི་ཁྱིམ་མཚེས་ཚོ་ལས་སྐྱིད་པའི་རྒྱལ་ཁབ་ཅིག་མེད་ལ་བོད་ཀྱི་དགྲ་བོ་ཚོ་ལས་དལ་བའི་དམག་དཔུང་ཞིག་མེད། དེ་བས་ཁྱོད་ཚོས་ཀྱང་སྐྱེ་བ་ཕྱི་མར་བོད་ཀྱི་ཁྱིམ་མཚེས་དང་དགྲ་བོ་ཞིག་ཏུ་སྐྱེ་བའི་འདུན་པ་ཐོངས་ཤིག
