གསང་མྱུལ་བའི་དོགས་གཞི་ཅན་དེ་ཀློད་ཉེན་ཡོད་འདུག

ཨ་རིའི་ནེའུ་ཡོག་བོད་མི་སོགས་ཀྱི་སྐོར་ལ་གསང་བའི་མྱུལ་ཞིབ་བྱས་ཡོད་པའི་དོགས་གཞི་ཅན་པདྨ་དར་རྒྱས་ངག་དབང་ཟེར་བ་དེ་ཨ་སྒོར་ས་ཡ་ ༡ གཏའ་དངུལ་དུ་བཞག་སྟེ་ཀློད་དགོས་པའི་ཞུ་ཡིག་ཕུལ་ཡོད་འདུགཉེ་སྔོན་གསང་མྱུལ་བའི་དོགས་གཞིའི་འོག་འཛིན་བཟུང་བྱས་པའི་ནེའུ་ཡོག་ཉེན་རྟོག་པ་པདྨ་དར་རྒྱས་ངག་དབང་ཟེར་བ་དེའི་བཟའ་ཟླ་སོགས་མི་དགུ་ཡིས། ཨ་སྒོར་ས་ཡ་ ༡ གཏའ་དངུལ་དུ་བཞག་སྟེ་ཁོ་གློད་གྲོལ་ཡོང་བའི་ཞུ་ཡིག་ཕུལ་ཡོད་པ་ལྟར། ཨ་རིའི་ཁྲིམས་དཔོན་ལཱོ་སི་བྷི་ལོམ་ (Lois Bloom)ལགས་ཀྱིས་ངག་དབང་ཀློད་རྩིས་བྱས་ཡོད་ཀྱང་། ཁྲིམས་དཔོན་ལས་རོགས་མཱེ་གཱེལ་(Michael Keilty)ལགས་ཀྱིས་དེ་ནི་ཧ་ཅང་ཉེན་ཁ་ཅན་ཞིག་ཡིན་པའི་དགོངས་ཚུལ་ཞུས་ཏེ་མུ་མཐུད་བཀག་ཉར་འོག་བཞག་ཡོད་འདུག

ཉེ་སྔོན་ཨ་རིའི་ནེའུ་ཡོག་གྲོང་ཁྱེར་གྱི་ཉེན་རྟོག་པ་པདྨ་དར་རྒྱས་ངག་དབང་ཟེར་བ་དེའི་བཟའ་ཟླ་གཙོས་པའི་ནང་མི་གཉེན་འབྲེལ་དང་ལས་རོགས་མི་དགུ་ཡིས། ཨ་སྒོར་ས་ཡ་ ༡ གཏའ་དངུལ་དུ་བཞག་སྟེ་ཁོ་ཀློད་གྲོལ་དགོས་པའི་ཞུ་གཏུགས་བྱས་ཡོད་པ་དང་། ཟླ་འདིའི་ཕྱི་ཚེས་ ༢ ཉིན། ཨ་རིའི་ནེའུ་ཡོག་ས་གནས་(Brooklyn)ཁྲིམས་དཔོན་ལཱོ་སི་བྷི་ལོམ་ (Lois Bloom)ལགས་ཀྱིས་ཁོ་ཀློད་དགོས་སྐོར་བརྗོད་ཡོད་ཀྱང་། ཁྲིམས་དཔོན་ལས་རོགས་མཱེ་གཱེལ་(Michael Keilty)ལགས་ཀྱིས། ངག་དབང་གློད་གྲོལ་གཏོང་རྒྱུ་དེ་ནི་ཧ་ཅང་ཉེན་ཁ་ཆེ་བས་ཀློད་མི་རུང་བའི་དགོངས་ཚུལ་ཞུས་ཡོད་འདུག་ལ། བདུན་ཕྲག་རྗེས་མའི་ནང་རྫོང་རིམ་པའི་ཁྲིམས་དཔོན་ཨེ་རེག་ཁོ་མི་ཊི་(Eric Komitee)ལགས་ཀྱིས་ངག་དབང་ཀློད་གྲོལ་གཏོང་མིན་གྱི་ཐག་གཅོད་གནང་འཆར་ཡོད་འདུག

ཁྲིམས་དཔོན་ལས་རོགས་མཱེ་གཱེལ་ལགས་ཀྱིས། པདྨ་དར་རྒྱས་ཀློད་གྲོལ་བཏང་ཚེ། ཁོ་ཉེས་ཅན་པ་གཞན་དང་མི་མཚུངས་པར་ནེའུ་ཡོག་གི་མཱན་ཧཱ་ཊན་གྱི་རྒྱ་ནག་གཞུང་ཚབ་ཁང་དུ་བྲོས་འགྲོ་རྒྱུ་ལས་སླ་པོ་ཆགས་ཡོད། གལ་སྲིད་ཁོ་རྒྱ་ནག་གཞུང་ཚབ་ཁང་དུ་བྲོས་པ་ཡིན་ན། ང་ཚོས་ཁོ་བསྐྱར་དུ་འཛིན་བཟུང་བྱེད་ཐུབ་ཀྱི་མེད། ཅེས་བརྗོད་ཡོད་པ་དང་།  པདྨ་དར་རྒྱས་ཀྱི་ཁྲིམས་རྩོད་པ་ཇོན་ཁར་མན་ (John Carman)ལགས་ཀྱིས།  པདྨ་དར་རྒྱས་ཟེར་བ་བོད་མི་ཞིག་ལས་གསང་ཉུལ་བ་ཞིག་མིན་ཚུལ་དང་། ཁོས་ཁོ་རང་ཕ་ཡུལ་དུ་ལོག་སྟེ་ནང་མི་གཉེན་ཉེ་སོགས་དང་ཐུག་འཕྲད་ཡོང་སླད། རྒྱ་ནག་གི་གཞུང་འབྲེལ་ལས་བྱེད་ཅིག་ལ་འབྲེལ་འདྲིས་ཀྱིས། རྒྱ་ནག་ཏུ་ལོག་ཆོག་པའི་ལོ་ ༡༠ ཐོངས་མཆན་རག་ཐབས་བྱས་ཡོད་པ་རེད། ཅེས་བརྗོད་འདུག

པདྨ་དར་རྒྱས་ངག་དབང་ཟེར་བ་དེ་ཟླ་སྔོན་མའི་ཕྱི་ཚེས་ ༢༡ ཉིན་འཛིན་བཟུང་བྱས་ཏེ་ད་བར་ནེའུ་ཡོག་ཉེན་རྟོག་ཁང་གི་བཀག་སྐྱིལ་ཁང་དུ་བཞག་ཡོད་པ་དང་། སྐབས་དེར་ཨ་རིའི་གཞུང་གིས་པདྨ་དར་རྒྱས་ཀྱིས་ཕྱི་ལོ་ ༢༠༡༤ ནས་ད་བར་རྒྱ་ནག་གཞུང་ལ་གསང་བའི་གནས་ཚུལ་མཁོ་སྤྲོད་དང་། ལྷག་པར་དུ་རྒྱ་ནག་གཞུང་ཚབ་ཁང་གི་བཀོད་མངགས་བཞིན་ཨ་རིར་གནས་སྡོད་བོད་མི་ཚོའི་འགྲོ་འདུག་སྤྱོད་གསུམ་ལ་གསང་བའི་མྱུལ་ཞིབ་བྱས་ཏེ། རྒྱ་ནག་གཞུང་ལ་བོད་དོན་དང་འབྲེལ་བའི་གསང་བའི་གནས་ཚུལ་རིགས་མཁོ་སྤྲོད་དང་ལམ་སྟོན་རིགས་བྱས་ཡོད་པའི་ཞིབ་འཇུག་ཉེས་དོན་ཤོག་ངོས་ ༢༤ ཅན་ཞིག་ཡོངས་བསྒྲགས་གནང་ཡོད་པ་རེད། རང་ལོ་ ༣༣ ཡིན་པའི་པདྨ་དར་རྒྱས་ངག་དབང་ཟེར་བ་དེས་ཁོ་རང་བོད་མི་ཞིག་ཡིན་ཚུལ་བརྗོད་ཡོད་ཀྱང་། ཁོ་དང་འབྲེལ་འདྲིས་བྱུང་བའི་བོད་མི་མང་པོས་ཁོས་ཧ་ལམ་བོད་སྐད་ཚིག་གཅིག་ཀྱང་དག་པོ་ཞིག་བཤད་མི་ཤེས་བ་དང་། བོད་མིའི་གཤིས་ཀ་དང་བསམ་བློ་གཏོང་སྟངས་གཏན་ནས་མེད་ལ། ཁོ་རང་གི་འགྲོ་འདུག་སྤྱོད་གསུམ་དང་ཕ་ཡུལ་གང་ནས་ཡིན་སོགས་ངེས་གཏན་མེད་པར་སྦེད་གསང་ཆེན་པོ་བྱས་ཡོད་སྐོར་བརྗོད་ཀྱི་འདུག

གསར་འགོད་པ། སྐལ་བཟང་སྦྱིན་པ།