རྒྱ་ནག་གཞུང་གིས་ཡ་ཆེན་སྒར་གྱི་ཉེ་འཁྲིས་སུ་ཡོད་པའི་དུད་ཁྱིམ་རྣམས་བཙན་གྱིས་གནས་སྤོར་དུ་བཅུག་སྟེ་རྒན་གསོ་ཁང་སོགས་ཡིན་ལུགས་བརྗོད་དེ་འཛུགས་སྐྲུན་རྒྱ་ཆེན་པོ་ཞིག་བྱེད་ཀྱི་ཡོད་འདུག
འདི་གའི་གསར་འགོད་པར་བོད་ནང་གི་མིང་བརྗོད་འདོད་མེད་པའི་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་དབྱར་ཁ་ནས་རྒྱ་ནག་གཞུང་གིས་ཡ་ཆེན་ཆོས་སྒར་གྱི་ཉེ་འཁྲིས་ཀྱི་ཁྲོམ་ཐོག་ས་ཆའི་དུད་ཁྱིམ་ཁག་ཅིག་བཙན་གྱིས་གནས་སྤོར་དུ་བཅུག་སྟེ། གནས་དེར་རྒན་གསོ་ཁང་ཞིག་ཡིན་སྐོར་བརྗོད་དེ་འཛུགས་སྐྲུན་གྱི་ལས་གཞི་རྒྱ་ཆེན་པོ་ཞིག་འགྲོ་བཞིན་ཡོད་འདུག
གནས་ཚུལ་མཁོ་སྤྲོད་པས། ས་གནས་དེར་ཡོད་པའི་དུད་ཁྱིམ་ ༧ ཙམ་བཙན་གྱིས་གནས་སྤོར་དུ་བཅུག་རྗེས་འཆར་གཞི་ལྡན་པའི་སྒོ་ནས་ཁང་པ་མང་པོ་ཞིག་རྒྱག་བཞིན་འདུག ཕར་བལྟས་ཚོད་ལ་རྒན་གསོ་ཁང་གཅིག་པུ་ཙམ་མ་རེད། མང་ཚོགས་ཁྲོད་ལས་འཆར་དེ་ནི་རྒྱ་ནག་གིས་ཆོས་སྒར་འདིར་སྟངས་འཛིན་དོ་དམ་ནན་མོ་དང་ལྷག་པར་དུ་ཉེན་རྟོག་པ་དང་མེ་གསོད་རུ་ཁག་སོགས་ཀྱི་སྡོད་གནས་ཡིན་པའི་གླེང་སློང་བྱེད་བཞིན་འདུག ཅེས་དང་། གནས་སྤོར་དུ་བཅུག་པའི་དུད་ཁྱིམ་དེ་དག་ལ་གུན་གསབ་སྤྲོད་རྒྱུ་ཡིན་ཚུལ་བརྗོད་ཡོད་ཀྱང་དངོས་སུ་རག་ཁག་པོ་ཆགས་ཡོད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པས། ཡ་ཆེན་སྒར་ནས་རྒྱང་ཐག་སྤྱི་ལེ་བདུན་ཙམ་གྱི་སར་ཡོད་པའི་རི་སྒར་མུར་རྣ་བར་དུ་གཞུང་ལམ་དང་ཟམ་ཆེན་ཞིག་རྒྱག་བཞིན་ཡོད་པ་དང་། རྒྱ་ནག་གི་འཆར་གཞི་ལྡན་པའི་འཛུགས་སྐྲུན་དེར་མི་འདོད་པའི་རྣམ་འགྱུར་སྟོན་མཁན་དང་། ཡང་ན་མང་ཚོགས་ཁྲོད་འཛུགས་སྐྲུན་བཀག་འགོག་བྱེད་མཁན་རིགས་བྱུང་ཚེ་ཁྲིམས་ཁང་ལ་འགྲོ་དགོས་ཞེས་དང་ཐོག་ནས་བཀའ་རྒྱ་བཏང་ཡོད་སྟབས། མང་ཚོགས་གནས་སྤོར་དང་དེའི་ཤུལ་དུ་འཛུགས་སྐྲུན་མང་པོ་ཞིག་བྱས་དང་བྱེད་མུས་ཡིན་སྐོར་བརྗོད་བྱུང་།
ཕྱི་ལོ་ ༢༠༡༩ ལོར་ཡ་ཆེན་ཨྱོན་བསམ་གཏན་གླིང་ཆོས་སྒར་ནས་ས་གནས་གཞན་ནས་ཡོང་བའི་སློབ་གཉེར་བ་གྲྭ་བཙུན་རྣམས་ཕྱིར་འབུད་གཏོང་བའི་མགོ་བཙུགས་ཡོད་པ་དང་། ཕྱི་ལོ་ ༢༠༡༩ ལོའི་ཟླ་ ༨ ནང་འདི་ག་བོད་ཀྱི་དུས་བབ་གསར་ཁང་ལ་ཡ་ཆེན་སྒར་གྱི་པར་ཞིག་ཐོག་མར་མཁོ་སྤྲོད་བྱུང་བའི་ནང་། ཆོས་སྒར་ཆེན་མོ་དེའི་ཕྱེད་ཀ་རྩ་མེད་བཟོས་ཟིན་འདུག ད་ལྟ་བར་དུ་ཆོས་སྒར་དེ་ནས་ཉུང་མཐར་གྲྭ་བཙུན་ ༣༠༠༠ ཙམ་ཕྱིར་འབུད་བཏང་ཡོད་པ་མ་ཟད། གྲྭ་བཙུན་རྣམས་རང་ཡུལ་དུ་འབྱོར་རྗེས་རྒྱལ་གཅེས་ཆོས་གཅེས་ཟེར་བ་སོགས་ཀྱི་ཆབ་སྲིད་སློབ་གསོ་སྤྲད་དེ་དུས་ཡུན་ངེས་ཅན་བར་བཀག་ཉར་སྦྱོང་བརྡར་སྤྲད་ཡོད་པའི་གནས་ཚུལ་རིམ་པར་ཐོན་ཡོད་པ་རེད།
སྤྱིར་རྒྱ་ནག་གཞུང་གིས་ཕྱི་ལོ་ ༡༩༩༦ ཙམ་ནས་གསེར་རྟ་བླ་རུང་ཆོས་སྒར་ལ་དམ་དྲག་བྱེད་མགོ་བཙུགས་ཤིང་། ཕྱི་ལོ་ ༢༠༠༡ ལོར་དམག་མི་ ༢༠༠༠ ལྷག་ཆེད་གཏོང་གིས། གྲྭ་བཙུན་གྱི་སྡོད་ཤག་ ༢༢༠༠ ལྷག་གཏོར་བཤིག་དང་དགོན་པར་གྲྭ་བཙུན་གྱི་གྲངས་འབོར་ཁྱོན་ ༡༤༠༠ ལས་སྡོད་མི་ཆོག་པའི་བཙན་བཀའ་བཏང་ཡོད་པ་དང་། དེ་རྗེས་ཕྱི་ལོ་ ༢༠༡༥ ལོར་རྒྱ་ནག་གཞུང་གིས་གསེར་རྟ་བླ་རུང་སྒར་ལ་དོ་དམ་གྱི་ལས་གཞི་སླར་ཡང་མགོ་འཛུགས་བྱས་ཏེ། ཕྱི་ལོ་ ༢༠༡༦ དང་ ༢༠༡༧ བསྟུད་མར་བླ་རུང་ཆོས་སྒར་ལ་གྲྭ་བཙུན་གྱི་གྲངས་འབོར་མང་དྲགས་པ་དང་གྲངས་འབོར་སྙོམས་དགོས་སྐོར་སོགས་བརྗོད་ནས། བོད་མདོ་དབུས་ཁམས་གསུམ་གཙོ་བོར་གྱུར་བའི་རྒྱ་རིགས་ནང་པའི་གྲྭ་བཙུན་མང་པོ་ཕྱིར་འབུད་བཏང་སྟེ། ད་ལྟ་བླ་རུང་ཆོས་སྒར་ལ་གྲྭ་བཙུན་ཁྱོན་ ༡༤༠༠ མ་གཏོགས་བཞུགས་མི་ཆོག་པ་བཟོས་ཡོད་འདུག
དེ་བཞིན། ཕྱི་ལོ་ ༢༠༡༧ ལོར་གསེར་རྟ་བླ་རུང་དགོན་དང་ལྔ་རིག་སློབ་གླིང་གཉིས་བར་ལྕགས་ར་བརྒྱབ་སྟེ་ལོགས་ཁ་བཟོས་པ་མ་ཟད། དགོན་པ་དང་སློབ་གླིང་གཉིས་ལ་དོ་དམ་ལས་ཁུངས་བཙུགས་ཏེ། དེའི་འགན་འཛིན་དང་དྲུང་ཡིག་བཅས་ལ་དམར་ཤོག་ཚོགས་མི་ ༦ བསྐོ་བཞག་བྱས་ཏེ་བླ་རུང་སྒར་གྱི་འཛིན་སྐྱོང་དང་ཉིན་རེའི་བྱེད་སྒོ་ཡོངས་ལ་སྟངས་འཛིན་ནན་མོ་བྱེད་ཀྱི་ཡོད་པ་དང་། འདི་གའི་གསར་འགོད་པས་བོད་ནང་གཉེན་ཉེ་ཐུག་འཕྲད་དུ་ཕྱིན་པའི་བོད་མི་ཞིག་ལ་གསེར་རྟ་བླ་རུང་སྒར་གྱི་སྐོར་ནས་ཁ་བརྡ་བྱེད་སྐབས། ཕྱི་ལོ་ ༢༠༡༥ ལོ་ནས་རྒྱ་ནག་གིས་བླ་རུང་སྒར་གྱི་སུམ་མདོ་རུ་ཐོག་རྩེག་ཅན་གྱི་ཁང་པ་མང་པོ་འཛུགས་སྐྲུན་གྱིས་ཞིབ་བཤེར་ལས་ཁུངས་བཙུགས་ཡོད་པ་དང་། བླ་རུང་དགོན་གྱི་གྲྭ་བཙུན་ཚོ་ཡར་འགྲོ་མར་འོང་བྱེད་དུས་ངེས་པར་དུ་ཞིབ་བཤེར་ལས་ཁུངས་ལ་ཐོ་འགོད་བྱེད་དགོས་ཀྱི་ཡོད་སྐོར་བརྗོད་བྱུང་།
གནས་ཚུལ་མཁོ་སྤྲོད་པ་གཞན་ཞིག་ལྟར་ན། རྒྱ་ནག་གཞུང་གིས་གསེར་རྟ་བླ་རུང་སྒར་གཏོར་བཤིག་གཏོང་མགོ་བརྩམས་པ་ནས་ད་ལྟ་བར་དགོན་པའི་གཡས་གཡོན་དང་རྒྱབ་མདུན་གང་སར་ཤིང་ནགས་འདེབས་འཛུགས་བྱས་ཏེ། དགོན་པའི་ས་ཁྱོན་ཇེ་ཆུང་དུ་གཏོང་ཐབས་དང་། དེ་བཞིན་བླ་རུང་སྒར་གྱི་ལམ་གཞུང་གཡས་གཡོན་གྱི་གྲྭ་ཤག་དང་ཁང་པ་རྣམས་གཏོར་ཏེ། རླངས་འཁོར་ལྔ་དྲུག་རེ་མཉམ་གཤིབ་ཀྱིས་འགྲོ་ཐུབ་སའི་གཞུང་ལམ་རྒྱ་སྐྱེད་དང་འཛུགས་སྐྲུན་ཇེ་ཆེར་གཏོང་གི་ཡོད་སྐོར་སོགས་བརྗོད་བྱུང་།
གསར་འགོད་པ། སྐལ་བཟང་སྦྱིན་པ།
