ཧི་མ་ཅལ་མངའ་སྡེའི་ཡུལ་སྐོར་སྤྲོ་འཆམ་པ་མང་བའི་རྫོང་ཁག་ཀང་ར་རྫོང་དང་མན་ཌི་རྫོང་། སིམ་ལ། ཀུ་ལུ་རྫོང་བཅས་ཀྱི་ནང་མཚན་མོ་ཆུ་ཚོད་ ༨ ནས་ཞོགས་པ་ཆུ་ཚོད་ ༦ པ་བར་འགྲོ་སྐྱོད་མི་ཆོག་པ་བཟོས་འདུག
དེ་རིང་ཕྱི་ཚེས་ ༢༣ ཉིན་རྒྱ་གར་ཊི་བྷོན་ (tribune) གསར་ཁང་གི་གནས་ཚུལ་ལྟར་ན། རྒྱ་གར་ཧི་མ་ཅལ་མངའ་སྡེ་གཞུང་གིས་ཀང་རཱ་རྫོང་དང་མན་ཌི་ (Mandi) རྫོང་། སིམ་ལ་རྫོང་དང་ཀུ་ལུ་རྫོང་བཅས་མངའ་སྡེའི་རྫོང་ཁག་བཞིའི་ནང་ཏོག་དབྱིབས་ནད་པའི་གྲངས་འབོར་ཆེན་པོ་འཕར་བཞིན་ཡོད་པར་བརྟེན། འདི་ལོའི་ཕྱི་ཟླ་ ༡༢ ཚེས་ ༡༥ བར་དུ་མཚན་གྱི་ཆུ་ཚོད་ ༨ ནས་ཞོགས་པའི་ཆུ་ཚོད་ ༦ བར་དུ་ཕྱི་རུ་འགྲོ་སྐྱོད་མི་ཆོག་པའི་ཐག་གཅོད་གནང་འདུག་ལ། ཁ་རས་མ་གྱོན་ཚེ་ཉེས་ཆད་ཧིན་སྒོར་ ༥༠༠ ནས་ ༡༠༠༠ ལ་སྤར་ཡོད་འདུག
དེ་བཞིན་རྒྱལ་ཡོངས་ཡིག་རྒྱུགས་ནང་ཞུགས་མཁན་འཛིན་རིམ་ ༩ པ་ནས་ ༡༢ བར་གྱི་སློབ་མ་རྣམས་ཕུད། ཤེས་ཡོན་གྱི་ལྟེ་གནས་ཁག་ཀྱང་འདི་ལོའི་ཕྱི་ཟླ་ ༡༢ ཚེས་ ༣༡ བར་དུ་སྒོ་རྒྱག་རྒྱུ་ཡིན་ཡང་། ཐག་གཅོད་དེར་བསྐྱར་ཞིབ་བྱས་རྗེས་གཞི་ནས་ལག་བསྟར་གནང་རྒྱུ་ཡིན་འདུག
འདིའི་ཕྱི་ཟླ་ ༣ ཚེས་ ༢༠ རྩ་གྲངས་ནས་བཟུང་རྒྱ་གར་རྒྱལ་ཡོངས་ནང་འགྲོ་སྐྱོད་དང་འདུ་འཛོམས་བཀག་སྡོམ་བྱས་ཏེ་ཁྱིམ་སྡོད་བཀའ་རྒྱ་བསྒྲགས་ཡོད་ཀྱང་། འདི་ལོའི་ཕྱི་ཟླ་ ༩ ཚེས་ ༣༠ ཉིན། རྒྱ་གར་དབུས་ནང་སྲིད་ལས་ཁུངས་ནས་ཏོག་དབྱིབས་གཉན་རིམས་དང་འབྲེལ་བའི་རྒྱལ་ཡོངས་སྒོ་འབྱེད་ཐེངས་ ༥ པ་དེ་ཡོངས་བསྒྲགས་གནང་སྟེ། ཕྱི་ཟླ་ ༡༠ ཚེས་ ༡༥་ནས་བཟུང་། རྒྱ་གར་རྒྱལ་ཡོངས་སུ་དམར་རྟགས་ནང་ཡོད་པའི་ས་ཁུལ་ཕུད་པའི་ས་ཁུལ་ཚང་མར་སློབ་གྲྭ་ཁག་དང་མཐོ་སློབ་ཁང་། ཤེས་ཡོན་གྱི་ལྟེ་གནས་ཁག་སྒོ་འབྱེད་ཆོག་སྐོར་གསུངས་ཡོད་ཀྱང་། མངའ་སྡེ་སོ་སོའི་གནས་སྟངས་ལ་དཔག་པའི་ཐོག་ནས་བཀག་སྡོམ་དང་སྒོ་འབྱེད་ཐད་སྲིད་བྱུས་མ་འདྲ་བ་ཡོང་གི་ཡོད་པ་རེད།
ཧི་མ་ཅལ་ནང་ད་སྔ་བར་ཏོག་ནད་འགོས་ཁྱབ་བྱུང་བའི་མི་གྲངས་ཁྱོན་༣༤༣༢༧ བྱུང་ཡོད་པ་དང་། དེའི་ཁྲོད་ཀྱི་མི་གྲངས་ ༢༦༧༥༦ དྲག་སྐྱེད་བྱུང་། དེ་བཞིན་མི་གྲངས་ ༥༣༧ རྐྱེན་འདས་སུ་ཕྱིན་ཡོད་འདུག
གསར་འགོད་པ། ཀླུ་མགོན་ཐར། སྐལ་བཟང་སྦྱིན་པ།
