ལ་མོ་ཚུལ་ཁྲིམས།
ཨ་མེ་རི་ཀའི་སྲིད་འཛིན་གསར་བ་སུ་ཡིན་ཕལ་ཆེར་གཏན་འཁེལ་ཡོད། ཁོང་ནི་ཇཱོ་དཔལ་ལྡན་རེད། ཁོང་ལ་མང་མོས་འོས་ཤོག་གི་རྒྱལ་ཁ་ཐོབ་ཡོད། ཐོབ་ས་ནས་ཐོབ། རྒྱལ་ས་རྒྱལ་བ་རེད། ཡིན་ན་ཡང་། ཨ་རི་སྤྱིའི་འགྲོ་ལུགས་ལྟར་འོས་ཤོག་གི་མཐའ་མའི་རྩིས་སྤྲོད་རྩིས་ལེན་དེ་ཟླ་རྗེས་མའི་ཚེས ༨ ཉིན་ལ་མ་གཏོགས་མི་བྱེད་པ་ཡིན། དུས་ཡུན་དེའི་རིང་ལ་འོས་ཤོག་གི་རྩོད་གླེང་གང་འདྲ་ཞིག་ཡོད་ཀྱང་གླེང་སློང་བྱས་ཆོག་པ་ཞིག་ཡིན།
སྲིད་འཛིན་ཁྲོན་གྱིས་གོ་སྐབས་འདི་དམ་འཛིན་བྱས་ཏེ། འོས་ཤོག་རྫུན་བཟོ་བྱས་ཡོད་ལུགས་ཀྱི་ཁྲིམས་གཏུག་བྱེད་བཞིན་ཡོད།སྐབས་འདིར། ཨ་རིར་ཡོད་པའི་བོད་པ་ཚོས་འོས་མི་འདི་གཉིས་ལས་སུ་ཞིག་བོད་ལ་བཟང་མིན་གྱིས་སྐད་ཆ་བཤད་བཞིན་ཡོད། བདག་གིས་བལྟས་ན། སྲིད་འཛིན་འོས་མི་འདི་གཉིས་དང་བོད་པའི་གནས་སྟངས་ལ་ཕྱོགས་ཁ་ཤས་ཤིག་ནས་བལྟ་དགོས་བསམ། དེ་ཡང་ཁོང་རྣམ་གཉིས་ཀྱི་མི་གཤིས་དང་། ཁོང་གཉིས་ཀྱི་རྒྱབ་ལོགས་ཀྱི་ཆབ་སྲིད་ཚོགས་པའི་ལྟ་གྲུབ། བོད་དང་ཨ་རིའི་ཆབ་སྲིད་ཀྱི་དགོས་མཁོ། ༧གོང་ས་མཆོག་གི་དགོངས་དོན་བཅས་གཞི་རྩར་བཞག་ནས་བལྟ་དགོས་བསམ། གནས་སྟངས་འདི་དག་ལ་ཞིབ་བསྡུར་གྱིས་བསམ་བློ་བཏང་ན། གཞི་ནས་འོས་མི་སུ་ཞིག་བོད་པ་ལ་བཟང་མིན་ཅུང་ཟད་ཤེས་རྟོགས་ཐུབ་པ་ཡིན།
ཁོང་རྣམ་གཉིས་ཀྱི་མི་གཤིས།
ཁོང་གཉིས་ཀ་ལ་མཚོན་ན་ཡེ་ཤུའི་ཆོས་ལུགས་ལ་དད་པ་བྱེད་མཁན་དང་། ཡུ་རོབ་མི་རྒྱུད་དཀར་པོའི་རྒྱུད་པ་ཡིན་པའི་རྒད་པོ་གཉིས་ཡིན། ཁྲོན་ཕུ་དགུང་ལོ ༧༤ དང་། ཇཱོ་དཔལ་ལྡན་དགུང་ལོ ༧༨ རེད། སྐུ་ཞབས་ཁྲོན་ལ་མཚོན་ན། ཨ་རིའི་སྲིད་འཛིན་ཕྱུག་ཤོས་དེ་ཡིན། ཁོང་འབྱོར་ལྡན་གྱི་ཁྱིམ་ཚང་ཞིག་ནས་སྐྱེས་ཤིང་། ཕ་མའི་རྒྱུ་ནོར་ལོངས་སུ་སྤྱད་དེ་རྒྱས་སྤྲོས་ཀྱི་འཚོ་བར་རོལ་བཞིན་ཡོད། ཁྲོན་གྱིས་དེ་སྔ་དཔལ་འབྱོར་རིག་པར་སློབ་སྦྱོང་གནང་མྱོང་ཡོད་པ་དང་། ཨ་རིའི་སྲིད་འཛིན་མ་གནང་གོང་ལ་ཁོང་གིས་ཁང་སའི་ཚོང་ལས་དང་། བརྙན་འཕྲིན་ཆེད་སྒྲིག་ལས་ཚན་ཞིག་གཉེར་བཞིན་ཡོད་པ་ལས་སྲིད་གཞུང་གི་ལས་ཁུངས་ནང་བྱ་བ་སྒྲུབ་མྱོང་མེད། སྲིད་འཛིན་ལོ་བཞི་ལ་འཁུར་བ་དེ་ཁོང་གིས་སྲིད་གཞུང་ནང་ལས་ཀ་བྱས་པ་ཐོག་མ་རེད།
བཤད་ཚུལ་ལ། ཁོང་ནི་ཁ་ཆེའི་རིགས་ལ་མི་དགའ་ཞིང་། སྲིད་འཛིན་ལ་བསྡད་མ་ཐག་ཁ་ཆེའི་རྒྱལ་ཁབ་༡༡ནས་ཡིན་པའི་མི་མང་རྣམས་ཨ་རིའི་ནང་ཡོང་མི་ཆོག་པ་བཟོས། དེ་བཞིན་དུ་ཁོང་ཁོར་ཡུག་སྲུང་སྐྱོབ་ལའང་མི་དགའ། ལོ་ཁ་ཤས་ཀྱི་སྔུན་ལ་ཁོང་གིས་ཁོར་ཡུག་སྲུང་སྐྱོབ་ནི་ཐལ་དྲགས་པའི་ཀུ་རེ་ཞིག་རེད་ཅེས་ཀྱང་བཤད་མྱོང་། དེ་བཞིན་དུ་ཁོང་མི་རིགས་ནག་པོ་དང་ཕྱི་མི་ལ་མི་དགའ་མཁན་ཞིག་ཡིན་པར་ཀུན་གྱིས་གླེང་། ཁྲོན་སྲིད་འཛིན་ལ་བསྡད་རྗེས་ཨ་རིའི་མི་རིགས་དཀར་པོ་ཁག་གཅིག་གི་མ་རབས་ཀྱི་སྤྱོད་པ་ལྷང་ལ་བུད། མི་རིགས་དབྱེ་འབྱེད་ཀྱི་སེར་ག་ཆེ་རུ་གས་བ་གསལ་བོ་ཆགས། དེ་བཞིན་ཏུ། ཁྲོན་གྱིས་བུད་མེད་ལ་སྐྱེས་རྒྱུན་གཅོད་པའི་དབང་ཆ་མེད་པར་བཤད་བཞིན་ཡོད།
རྒྱ་ནག་དང་མཉམ་དུ་ཐོག་མར་འབྲེལ་ལམ་བཟང་མོད། ཚོང་འབྲེལ་གྱི་རྙོག་དྲ་དང་ནད་ཡམས་ཀྱི་རྐྱེན་པས་རྒྱ་ནག་གི་འབྲེལ་བ་སྡུག་ཏུ་ཕྱིན་ཡོད། ཁྲོན་ནི་མི་ལ་ཡ་ལན་འཛུགས་རྒྱུར་ཐེ་ཚོམ་མེད་པ་ཞིག་ཡིན། དེ་བས་ཁོང་ལ་མི་དགའ་མཁན་ཡང་མང་པོ་ཡོད། ཁོང་གིས་ཨ་མེ་རི་ཀ་སྔར་ལས་ཀྱང་ཇེ་ལེགས་སུ་གཏོང་རྒྱུ་དང་། རྒྱལ་མཚམས་ཀྱི་གྱང་རྭ་སྐོར་རྒྱུ། ཨ་མེ་རི་ཀ་ཨང་དང་པོར་འཇོག་རྒྱུ་སོགས་ནི་འབོད་ཚིག་དྲག་ཤོས་ཁག་ཡིན།
ཇཱོ་དཔལ་ལྡན་ལ་མཚོན་ན་ཁྱིམ་ཚང་དཀྱུས་མ་ཞིག་གི་ཁྱིམ་ནས་འཚར་ལོངས་བྱུང་། སྐུ་ཞབས་ཇཱོ་ནི་ཁྲིམས་ལུགས་སློབ་སྦྱོང་ཡོད་མཁན་ཞིག་དང་ཁྲིམས་རྩོད་པ་ཞིག་ཡིན། ཁོང་གིས་ལོ་ངོ་སུམ་ཅུའི་རིང་ལ་ཨ་རི་གྲོས་ཚོགས་ཀྱི་ཚོགས་མི་བྱས་མྱོང་ཡོད་པ་དང་། ལོ་ངོ་བརྒྱད་རིང་ཨ་རིའི་སྲིད་འཛིན་གཞོན་པའི་ལས་འགན་འཁུར་མྱོང་ཡོད། ཁོང་གི་མི་ཚེ་ཧྲིལ་བོ་དེ་ཧ་ལམ་ཨ་རིའི་སྲིད་དོན་གྱི་ནང་ནས་བསྐྱལ་ཡོད།
ཇཱོ་ལ་མི་ཡག་པོ་ཞེས་པའི་འབོད་སྲོལ་ཡང་ཡོད། ཁོང་གིས་སུ་ལའང་མཐུན་པོ་བྱེད། རྒྱལ་མཚམས་སུ་གྱང་རྭ་སྐོར་རྒྱུ་མི་བཤད་པར་གཞིས་ཆགས་ནང་འདྲེན་གྱི་ཁྲིམས་སྲོལ་བཏོད་ཡོད། ཨ་མེ་རི་ཀ་གཅིག་པོ་ཨང་དང་པོར་མི་འཇོག་པར་འཛམ་གླིང་ཡོངས་རྫོགས་མཉམ་འབྲེལ་བྱེད་དགོས་པའི་འདུན་པ་ཡོད་མཁན་ཞིག་ཡིན། རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པ་ལ་དོ་སྣང་ཆེན་པོ་བྱེད་པ་དང་། གནད་དོན་དེ་གཙོར་བཟུང་ཐོག་རྒྱ་ནག་ལ་སྐྱོན་ཞིབ་བྱེད། སྐྱེས་རྒྱུན་གཅོད་པའི་སྐོར་ལ་ཇཱོ་ཡིས་བུད་མེད་ལ་དབང་ཆ་ཡོད་པས་སྐྱེས་རྒྱུན་གཅོད་པར་མོས་མཐུན་ཡོད། ཁོང་གི་འབོད་ཚིག་ནི། ང་ཚོས་མཉམ་དུ་ཁྲོན་ཐེངས་གཅིག་ལ་མ་གཏོགས་བསྡད་མ་ཐུབ་པ་བཟོ་དགོས། མི་རིགས་ཤིག་གི་བླ་སྲོག་གི་ཆེད་དུ་འཐབ་འཛིང་བྱེད། ཅེས་པ་སོགས་ཡིན། དེ་བཞིན་དུ་ཨ་རིའི་ཚོང་ལས་ཕྱིར་འདྲེན་དང་ནང་འདྲེན་ལ་ཤུགས་སྣོན་བརྒྱབ་ཏེ་ཨ་རིའི་མི་དམངས་ཀྱི་ལས་ཀ་བཀོད་སྒྲིག་བྱེད་རྒྱུ་ནི་ཁོང་གཉིས་ཀའི་ཐུན་མོང་གི་འདོད་ཚུལ་ཡིན།
ཁོང་གཉིས་ཀྱི་རྒྱབ་ལོགས་ཀྱི་ཆབ་སྲིད་ཚོགས་པ།
དུས་རབས་བཅོ་བརྒྱད་པ་ནས་བཟུང་ཨ་རི་ལ་ཆབ་སྲིད་ཀྱི་ཚོགས་པ་འཛུགས་པའི་རྨང་གཞི་བཏིང་། ཨ་རི་ལ་ཆབ་སྲིད་ཀྱི་ཚོགས་པ་ཁ་ཤས་ཡོད་མོད་དམངས་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ནི། ཨ་རིའི་ནང་གི་ཆབ་སྲིད་ཚོགས་པ་ཆེས་ཤོས་གཉིས་ཡིན། ཆབ་སྲིད་ཚོགས་པ་འདི་གཉིས་ལ་ཨ་རིའི་རྩ་ཁྲིམས་ནང་དམིགས་བསལ་གྱི་མཛུབ་སྟོན་གང་ཡང་མེད་ཀྱང་། ཚོགས་པ་རང་རང་གི་ཁྲིམས་ལུགས་གཏན་འབེབ་ཁ་གསལ་བཟོས་ཡོད།
དམངས་གཙོ་ཚོགས་པ་ནི་གཡོན་གྱི་ཆབ་སྲིད་ཀྱི་ལྟ་བ་འཛིན་མཁན་རྐྱང་བ་ཡིན། དམངས་གཙོ་ཚོགས་པས་ཨ་རིའི་དེ་སྔ་གཏན་ལ་ཕབས་པའི་སྤྱི་ཚོགས་ལམ་ལུགས་གཞིར་བཟུང་སྟེ། མི་སྒེར་དང་སྤྱི་བའི་བར་གྱི་འགལ་བ་བཏང་སྙོམས་སུ་གཏོང་རྒྱུ་དང་། ཕྱུག་པོ་དང་མེད་པོའི་བར་གྱི་འབྲེལ་བ་ཐག་ཇེ་ཉེ་རུ་བཏང་སྟེ། ཚང་མར་འདྲ་མཉམ་གྱི་ཐོབ་ཐང་ཡོང་པར་འབད་བརྩོན་བྱེད། དེ་བཞིན་དུ་མང་ཚོགས་ལ་རོགས་རམ་བྱེད་རྒྱུ་ནི་སྤྱི་ཚོགས་ཤིག་དང་རྒྱལ་ཁབ་ཅིག་གིས་སྒྲུབ་དགོས་བའི་ལས་འགན་ཡིན་པར་བཤད། ཨ་མེ་རི་ཀའི་ས་ཁྱོན་གྱི་མཐའ་གཉིས་སྟེ། ནུབ་ཕྱོགས་ཀྱི་རྒྱ་མཚོ་དང་ཤར་ཕྱོགས་ཀྱི་རྒྱ་མཚོའི་འགྲམ་གཉིས་ན་དམངས་གཙོ་ཚོགས་པའི་མི་སྣ་རྣམས་འདུས་སྡོད་བྱས་ཡོད། ཁོང་ཚོའི་མཚོན་རྟགས་བོང་བུ་ཞིག་དང་། ཁ་དོག་སྔོན་པོ་རེད། ཇོ་དཔལ་ལྡན་ལགས་ནི་ཚོགས་པ་འདིས་རྒྱབ་སྐྱོར་ཐོབ་པའི་སྲིད་འཛིན་གྱི་འོས་མི་ཡིན།
སྤྱི་མཐུན་ཚོགས་པ་ལ་མཚོན་ན།
སྤྱི་མཐུན་ཚོགས་པ་ནི་གཡས་ཀྱི་ཆབ་སྲིད་ཀྱི་ལྟ་བ་ཡོད་མཁན་ཤ་སྟག་ཡིན། ཁོང་ཚོས་ཡེ་ཤུའི་ཆོས་ལུགས་ཀྱི་རིན་ཐང་གཙོ་བོར་འཇོག ཚོང་འབྲེལ་དང་རྒྱལ་སྲུང་ལ་དོ་འཁུར་ཆེར་བྱེད་པ་དང་། ནུབ་བྱང་གི་ལེགས་བྱང་ལ་སྲུང་སྐྱོབ་བྱེད་པའི་ཆེད་དུ་དམར་པོའི་ལྟ་བ་དང་། སྤྱི་ཚོགས་རིང་ལུགས་ལ་ཆེས་ཆེར་སྡང་བ་ཡིན། ཁོང་ཚོ་ཨ་རིའི་ས་ཁྱོན་གྱི་དཀྱིལ་ན་ཡོད་པ་དང་། ཚོགས་པའི་མཚོན་རྟགས་གླང་ཆེན་དང་། ཚོན་མདོག་དམར་པོ་ཡིན། སྲིད་འཛིན་ཁྲོན་ནི་ཚོགས་པ་འདིས་རྒྱབ་སྐྱོར་ཐོབ་པའི་སྲིད་འཛིན་གྱི་འོས་མི་ཡིན། སྲིད་འཛིན་ཁྲོན་གྱིས་སྐྱེས་རྒྱུན་གཅོད་པར་བཀག་འགོག་བྱེད་པ་ཡང་། ཡེ་ཤུའི་ཆོས་ལུགས་དང་ཚོགས་པའི་ལངས་ཕྱོགས་ཤིག་གི་ཆ་ནས་དེ་ལྟར་བྱེད་བཞིན་ཡོད།
བོད་དང་ཨ་རིའི་ཆབ་སྲིད་ཀྱི་དགོས་མཁོ།
སྤྱིར་བོད་ཀྱི་གནད་དོན་ལ་མཚོན་ན་ཨ་རིའི་གཞུང་གི་ཕྱི་འབྲེལ་དང་འབྲེལ་བ་ཆགས་ཡོད་ལ། དེའི་ནང་ནས་ཀྱང་། འགྲོ་བ་མིའི་རང་དབང་དང་། ཁོར་ཡུག་སྲུང་སྐྱོབ། ཆོས་ལུགས་དད་མོས་རང་དབང་སོགས་དང་འབྲེལ་བ་ཆགས་ཡོད། ཨ་རིའི་སྲིད་དོན་པ་ཚོས་ཕྱི་འབྲེལ་གྱི་གནས་བབ་ཡར་རྒྱས་དང་། ཆོས་ལུགས། འགྲོ་བ་མིའི་རང་དབང་སྲུང་སྐྱོབ་བྱས་ཏེ། ཆབ་སྲིད་ཀྱི་སྡིངས་ཆ་ལས་རང་གི་ངོ་སོ་ཞིག་ལེན་བསམ་ན། བོད་ཀྱི་གནད་དོན་ནི་ཁོང་ཚོའི་ལས་དོན་བྱེད་ཡུལ་གྱི་གོ་སྐབས་ཡག་ཤོས་དེ་ཆགས་ཡོད། རྒྱུ་མཚན་ནི་བོད་ཀྱི་གནད་དོན་དེ་དངོས་ཡོད་དང་། དྲང་བདེན། མངོན་སུམ་དོད་པོ་བཅས་ཡིན་པའི་རྐྱེན་གྱིས་ཡིན། དེ་བཞིན་དུ་བོད་ཀྱི་གནད་དོན་ཡར་རྒྱས་སུ་གཏོང་དགོས་ན་རྒྱ་ནག་དང་ཐད་ཀར་འབྲེལ་བ་ཆགས་ཡོད་ཙང་། ཨ་རིའི་གཞུང་ནས་རྒྱ་ནག་ལ་དཀའ་ངལ་སྣོན་མ་ཞིག་ཡོང་གིན་ཡོད་པ་འདི། སྐབས་སྐབས་སུ་བོད་ཀྱི་གནད་དོན་དང་འབྲེལ་ནས་ཡོང་གི་ཡོད་པ་གསལ་བོ་ཡིན། ཡང་གཅིག་བཤད་ན། བོད་ཀྱི་གནད་དོན་འདི་ཨ་རི་རྒྱལ་ཡོངས་ཀྱི་ཕྱི་འབྲེལ་གྱི་གནད་དོན་ཞིག་དང་། ཡང་ན་ཆབ་སྲིད་ཚོགས་པ་ཐུན་མོང་གི་ལྟ་གྲུབ་ཞིག་དང་འབྲེལ་བ་ཆགས་བཞིན་ཡོད་པ་ལས། བྱེ་བྲག་གི་ཆབ་སྲིད་ཚོགས་པ་ཞིག་དང་སྲིད་འཛིན་འོས་མི་སྒེར་བའི་ལས་དོན་བྱེད་ཕྱོགས་ཤིག་དང་འབྲེལ་བ་དེ་ཙམ་ཆགས་བཞིན་ཡོད་པར་མི་སྣང་། དེ་བཞིན་དུ་ད་ལྟའི་བར་བོད་ཀྱི་གནད་དོན་ཐད་བཞག་པའི་ཨ་རིའི་གཞུང་གི་ཁྲིམས་འཆར་དང་། ༧གོང་ས་མཆོག་ལ་མཇལ་འཕྲད་གནང་བའི་ཨ་རིའི་སྲིད་འཛིན་རིམ་བྱུང་ཚང་མ་ཆབ་སྲིད་ཚོགས་པ་འདི་གཉིས་ཀ་ནས་ཡོང་གིན་ཡོད་པ་ཞིག་ཡིན།
༧གོང་ས་མཆོག་གི་དགོངས་དོན།
བོད་ཀྱི་ཆོས་ཕྱོགས་ཀྱི་དབུ་ཁྲིད་༧གོང་ས་སྐྱབས་མགོན་མཆོག་ཡིན་པ་གང་ཞིག་ལ། བོད་པའི་ཆབ་སྲིད་ཀྱི་ཁ་ཕྱོགས་ཀྱང་༧གོང་ས་མཆོག་གི་མཛུབ་སྟོན་ལ་བསྟུན་ནས་བགྲོད་རྒྱུ་ནི་བོད་པ་ཚོའི་བསོད་ནམས་དང་གཟི་བརྗིད་ཡིན། ༧གོང་ས་མཆོག་དང་ཇཱོ་དཔལ་ལྡན་རྣམ་གཉིས་དེ་སྔ་མཇལ་མྱོང་ཡོད་པ་དང་། ཇཱོ་དཔལ་ལྡན་ཨ་རིའི་སྲིད་འཛིན་ལ་མང་མོས་རྒྱལ་ཁ་ཐོབ་མ་ཐག ༧གོང་ས་མཆོག་གིས་འཚམས་འདྲི་བཀྲ་ཤིས་བདེ་ལེགས་ཞུས་གནང་ཡོད།
སྲིད་འཛིན་ཁྲོན་ལ ༧གོང་ས་མཆོག་གིས་ཐུགས་སྣང་དེ་ལྟར་གནང་མྱོང་མེད་པར་མ་ཟད། ཁྲོན་ནི་ཀུན་སྤྱོད་ཀྱི་རྩ་དོན་མི་འདང་བའི་མི་ཞིག་ཡིན་པར་གསུངས་མྱོང་ཡོད། ལོ་རབས་དགུ་བཅུ་བ་ནས་བཟུང་༧གོང་ས་མཆོག་ཨ་རིའི་ཕོ་བྲང་དཀར་པོའི་ནང་ཆིབས་སྒྱུར་བསྐྱངས་ནས། ཨ་རིའི་སྲིད་འཛིན་རིམ་བྱོན་ལ་མཇལ་འཕྲད་གནང་བའི་མཛད་རིམ་ཞིག་ཡོད་མོད། སྲིད་འཛིན་ཁྲོན་ལ་མཇལ་འཕྲལ་གནང་ཡོད་པ་མ་རེད།
མདོར་ན།
ང་ཚོ་བོད་པའི་གནས་སྟངས་ལ་མཚོན་ན་ཤར་ཕྱོགས་རིག་གཞུང་གིས་གྲུབ་ཅིང་། འདྲ་མཉམ་གྱི་ཐོབ་ཐང་དང་རྒྱལ་ཁབ་ཀྱི་བདག་སྐྱོང་དང་འབྲེལ་བ་ཡོད། དེ་བཞིན་ཏུ་ཨ་རིར་གནས་སྡོད་བྱེད་པའི་བོད་པ་མང་ཆེ་བ་ནི་ཨ་རིའི་མཐའ་གཉིས་སུ་སྡོད་པ་ལས། དཀྱིལ་ན་སྡོད་མཁན་མང་པོ་མེད་ཙང་། ཁོང་ཚོ་ཚང་མ་རང་བཞིན་གྱིས་དམངས་གཙོ་ཚོགས་པའི་ཁོངས་སུ་ཚུད་འགྲོ་བ་ཡིན། ཡིན་ནའང་སྲིད་འཛིན་ཁྲོན་ལ་རྒྱབ་སྐྱོར་བྱེད་མཁན་བོད་པའི་ནང་ནའང་གང་ལ་གང་འཚམ་ཡོད་ཀྱང་། མང་སྣེ་ཉུང་གིས་མ་ལྕོག་པར་འོས་ཤོག་དེ་དམངས་གཙོ་ཚོགས་པའི་འོས་མིས་འཕྲོག་འགྲོ་བ་ཡིན།
ཡང་གཅིག་བཤད་ན། བོད་ཀྱི་གནད་དོན་འདི་ཨ་མེ་རི་ཀའི་ཆབ་སྲིད་ཚོགས་པ་གཉིས་ག་ལ་ཐུན་མོང་ཐོག་འབྲེལ་བ་ཡོད་པ་ཞིག་ཡིན་པ་གསལ་བོ་ཡིན་ཞིང་། ཆབ་སྲིད་ཚོགས་པ་གཉིས་ཀྱི་ལྟ་གྲུབ་དང་། སྲིད་འཛིན་འོས་མི་འདི་གཉིས་ཀའི་མི་གཤིས་བཅས་ལ་བལྟས་ན། དམངས་གཙོ་ཚོགས་པ་དང་། འདེམས་ཐོན་བྱུང་བའི་སྲིད་འཛིན་འོས་མི་ཇཱོ་དཔལ་ལྡན་ནི་ང་ཚོ་བོད་པ་དང་། ཅུང་ཐག་ཉེ་ཞིང་ཁོང་གིས་འགྲོ་བ་མིའི་ཐོབ་ཐང་དང་། ཁོར་ཡུག་སྲུང་སྐྱོབ། འཛམ་གླིང་ཡོངས་རྫོགས་མཉམ་འབྲེལ་བྱེད་རྒྱུའི་འདུན་པ་ཡོད་པ་འདི་དག་ཚང་མ་ང་ཚོ་བོད་པའི་གནས་སྟངས་དང་ཐད་ཀར་འབྲེལ་བ་ཆགས་ཡོད། དེ་བས་ཁོང་ནི་ང་ཚོའི་སྐྱིད་སྡུག་ལ་དོ་འཁུར་བྱེད་མཁན་མི་ཐག་ཉེ་ཤོས་དེ་ཡིན་ཞེས་བཤད་ཆོག
དུས་བབ་ཚང་གི་གསར་འགྱུར་དུའང་ཇོ་དཔལ་ལྡན་ཟེར་བ་ལྟ་བུ་མ་འོངས་ལོ་རྒྱུ་ཡིག་ཚགས་སུ་འཁྲུལ་གཞི་ཡོང་བའི་མིང་འདི་འདྲ་མ་བཀོལ་ན་བཟང་། དབྱིན་མིང་ཡིན་ན་མིང་དེ་སྒྲ་དང་དག་ཐོབ་རང་སར་འཇོལ་དགོས་པ་རེད། འདི་རིགས་ལ་གསར་ཁང་ཚད་ལྡན་ཚོས་ཧ་ཅང་གཟབ་ཀྱི་ཡོད་ལ། མང་ཚོགས་ཀྱིས་ཀྱང་གསར་ཁང་ཆེ་གྲས་ཚད་འཛིན་བྱེད་དགོས་པས། གཟབ་པར་འཚལ།
༼ཨ་རིའི་སྲིད་འཛིན་ཇཱོ་དཔལ་ལྡན་དང་ཁྲོན་ཕུ་གཉིས་ལས་བོད་ཀྱི་གནས་སྟངས་ལ་བལྟ་བ།༽ ཁོང་ཚོ་ཡལ་ག་རེད། རྩ་བ་དུག་རེད། རེ་བ་མེད།