རྒྱ་ནག་གཞུང་གིས་བོད་མཛོད་དགེ་ཕྱོགས་ཀྱི་དགོན་སྡེ་ཁག་ནང་བོད་བརྒྱུད་ནང་བསྟན་རྒྱ་ནག་ཅན་ཏུ་སྒྱུར་ཐབས་ཀྱི་ལས་འགུལ་སྤེལ་ཏེ་ཚོགས་འདུ་རིམ་པར་ཚོགས་བཞིན་ཡོད་འདུག
དེ་རིང་འདི་གར་འབྲེལ་ཡོད་ཅིག་གིས་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་བོད་རྔ་བ་དང་མཛོད་དགེ་ཕྱོགས་ཀྱི་དགོན་སྡེ་ཁག་ནང་། འདི་ལོའི་ཕྱི་ཟླ་ ༨ ནང་རྒྱ་ནག་མགོ་ཁྲིད་ཞི་ཅིན་ཕིན་ནས་བོད་སྐོར་གྱི་ལས་དོན་ཚོགས་འདུ་ཟེར་བའི་སྟེང་། བོད་བརྒྱུད་ནང་བསྟན་གྱི་ཆོས་ལུགས་མཐའ་གཅིག་ཏུ་རྒྱ་ནག་ཅན་དང་སྤྱི་ཚོགས་རིང་ལུགས་ཅན་དུ་བསྒྱུར་དགོས་སྐོར་བརྗོད་པ་དེར། དགོན་སྡེ་ཁག་གི་གྲྭ་བཙུན་ཚོས་སློབ་སྦྱོང་ནན་ཏན་དགོས་སྐོར་བརྗོད་ནས་རྒྱ་ནག་གི་ཆབ་སྲིད་ལངས་ཕྱོགས་དང་། ཆོས་ལུགས་རྒྱ་ནག་ཅན་དུ་བསྒྱུར་དགོས་པའི་དྲིལ་བསྒྲགས་ལས་འགུལ་ཤུགས་ཆེར་སྤེལ་བཞིན་ཡོད་འདུག
གནས་ཚུལ་མཁོ་སྤྲོད་པས་སྤྱིར་ན་ནམ་རྒྱུན་སྲིད་གཞུང་གི་ཆབ་སྲིད་དྲིལ་བསྒྲགས་ལྟ་བུ་རྒྱུན་ལྡན་དུ་ཡོད་ན་ཡང་། འདི་ལོ་ནས་དགོན་པ་ཁག་གི་ནང་ཞི་ཅིན་ཕིན་གྱི་བོད་སྐོར་ཚོགས་འདུ་དང་འབྲེལ་བའི་གཏམ་བཤད་ལ་སློབ་སྦྱོང་དགོས་སྐོར་བརྗོད་ནས་ལས་འགུལ་སྣ་ཚོགས་ཤིག་སྤེལ་ཡོང་གི་ཡོད་པ་དང་། ཉིན་ཤས་སྔོན་མཛོད་དགེ་རྫོང་གི་ནང་བསྟན་ཐུན་ཚོགས་ཀྱི་ཚོགས་འདུ་ཟེར་བ་ཞིག་བསྡུས་ཏེ། ཚོགས་འདུའི་སྟེང་དགོན་སྡེ་ཁག་གིས་ཆོས་ལུགས་བྱེད་སྒོའི་ཁྲོད་རྒྱ་ནག་གི་རྩ་ཁྲིམས་དང་ཆབ་སྲིད་ལ་སློབ་སྦྱོང་བྱ་དགོས་སྐོར་དང་། གྲྭ་བཙུན་ཚོས་འགན་ཁུར་ནས་སྤྱི་ཚོགས་ནང་རྒྱ་ནག་གཞུང་ལ་ངོ་རྒོལ་རིགས་མི་ཡོང་བར་ཡུན་རིང་བརྟན་བརླིང་དགོས་སྐོར་བཤད་ཡོད་སྐོར་བརྗོད་བྱུང་།
ཡང་ཁོས་མུ་མཐུད། ཕྱི་ཚེས་ ༢༤ ཉིན་མཛོད་དགེ་རྫོང་གི་དམར་ཤོག་མགོ་ཁྲིད་ལུའུ་ཕང་ཟེར་བ་སྟག་ཚང་ལྷ་མོ་ཀིརྟི་དགོན་དུ་ཡོང་སྟེ། རྒྱ་ནག་གཞུང་གིས་ཆེད་འཛུགས་བྱས་པའི་དགོན་པ་དོ་དམ་ཁང་ཟེར་བའི་ནང་ཚོགས་འདུ་ཚོགས་ཏེ། གྲྭ་བཙུན་ཚོས་དུས་རབས་དང་བསྟུན་ནས་ལམ་ལུགས་སྲོལ་གསར་པ་ལ་སློབ་གཉེར་བྱས་ཏེ། ལངས་ཕྱོགས་བརྟན་པོའི་ངང་ཆོས་ལུགས་རྒྱ་ནག་ཅན་དུ་བསྒྱུར་བར་རྒྱུན་འཁྱོངས་དགོས་པ་དང་། རྒྱ་ནག་གཞུང་གིས་བོད་ཀྱི་ལས་དོན་དང་འབྲེལ་བའི་ཚོགས་འདུ་དེ་ནི། ད་བར་བོད་དང་འབྲེལ་བའི་ལོ་རྒྱུས་རང་བཞིན་གྱི་རྒྱལ་ཁ་ཞིག་ཡིན་པ་མ་ཟད། བོད་རང་སྐྱོང་ལྗོངས་དང་ཞིང་ཆེན་བཞིའི་བོད་འབྲེལ་ལས་དོན་གལ་ཆེན་ཞིག་ཆགས་ཡོད་པས། ཞི་ཅིན་ཕིན་གྱི་གཏམ་བཤད་དེ་མ་འོངས་པར་བོད་དང་འབྲེལ་བའི་ཁ་ཕྱོགས་གསལ་སྟོན་བྱེད་ཐབས་ཤིག་དང་། ཆོས་ལུགས་ལས་དོན་གྱི་རིག་པའི་གཞུང་ལུགས་གསར་པ་ཞིག་ཏུ་འགྱུར་རྒྱུ་ཡིན་སྐོར་བཤད་སོང་ཞེས་བརྗོད་བྱུང་།
འདི་ལོར་ཞི་ཅིན་ཕིན་གྱིས་བོད་ཀྱི་ལས་དོན་སྟེང་དཔལ་འབྱོར་ཡར་རྒྱས་ཤུགས་ཆེར་བཏང་སྟེ། ཆོས་ལུགས་རྒྱ་ནག་ཅན་དུ་བསྒྱུར་དགོས་སྐོར་བརྗོད་པ་ནས་བཟུང་། བོད་ཀྱི་རྒྱལ་ས་ལྷ་ས་གཙོའི་བོད་ཁུལ་ཡོངས་སུ་ཆོས་ལུགས་སྐོར་གྱི་ཆབ་སྲིད་དྲིལ་སྒྲོག་ཤུགས་ཆེ་རུ་འགྲོ་བཞིན་ཡོད་པ་མ་ཟད། དགོན་སྡེ་ཁག་རེ་རེ་བྱས་ཏེ་ཞི་ཅིན་ཕིན་གྱི་ཆོས་ལུགས་སྐོར་གྱི་གཏམ་བཤད་དེར་སློབ་སྦྱོང་དགོས་སྐོར་གྱི་ཚོགས་འདུ་སྣ་བསྡུ་བཞིན་ཡོད་པ་དང་། འདི་ལོའི་ཕྱི་ཟླ་ ༡༡ ཚེས་ ༡༢ ཉིན་རྒྱ་ནག་བོད་རིག་པའི་ཞིབ་འཇུག་ལྟེ་གནས་ཁང་དང་། རྒྱ་ནག་བོད་བརྒྱུད་ནང་བསྟན་ཐུན་ཚོགས་ཟེར་བ་གཉིས་མཉམ་འབྲེལ་ཐོག་བོད་བརྒྱུད་ནང་བསྟན་གྱི་དགོངས་འགྲེལ་དཔྱད་གླེང་ཚོགས་འདུ་ཟེར་བ་ཞིག་ཚོགས་ཏེ། ཚོགས་འདུའི་སྟེང་བོད་བརྒྱུད་ནང་བསྟན་ཆོས་ལུགས་རྒྱ་ནག་ཅན་དུ་སྒྱུར་ཐབས་རྐྱང་གི་སྒང་ལ་བགྲོ་གླེང་བྱས་ཡོད་པ་རེད། དེ་བཞིན་བོད་ཕྱི་ཟླ་ ༡༠ ནང་བོད་ལྷོ་ཁ་སོགས་ཀྱི་དགོན་སྡེ་མང་པོའི་ནང་ཆོས་ལུགས་རྒྱ་ནག་ཅན་དུ་སྒྱུར་ཐབས་ཀྱི་ལས་འགུལ་བསྟུན་མར་སྤེལ་ཡོད་འདུག
རྒྱ་ནག་གཞུང་གིས་འདས་པའི་ལོ་ཤས་ནས་བཟུང་བོད་ཀྱི་དགོན་སྡེ་ཁག་ནང་མིང་དང་ཐ་སྙད་འདྲ་མིན་འོག་ཆོས་ལུགས་བྱེད་སྒོ་དང་། གྲྭ་བཙུན་ཚོའི་འགྲོ་འདུག་སྤྱོད་གསུམ་དང་བསམ་བློའི་འཁྱེར་ཕྱོགས་སོགས་ནས་རྒྱ་ནག་གི་ཆབ་སྲིད་དྲིལ་བསྒྲགས་ལ་སྒྱུར་ཐབས་སྣ་ཚོགས་བྱེད་ཀྱི་ཡོད་པ་དང་། ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་ས་བྱི་ཞི་བའི་རྒྱ་རྒོལ་ལས་འགུལ་བྱུང་བ་ནས། བོད་ཀྱི་དགོན་སྡེ་ཁག་ཚང་མའི་ནང་རྒྱལ་གཅེས་ཆོས་གཅེས་དང་། གྲྭ་བཙུན་རྣམ་དག་མེས་རྒྱལ་བརྟན་བརླིང་སྲུང་སྐྱོབ་སོགས་ཀྱི་ལས་འགུལ་འདྲ་མིན་སྤེལ་བཞིན་ཡོད་པ་དང་། རྒྱལ་སྤྱིའི་སྟེང་རྒྱ་ནག་གི་བྱེད་སྤྱོད་དེ་དག་ནི་མི་རིགས་དང་རིག་གཞུང་རྩ་གཏོར་ལ་དམིགས་པའི་སྲིད་བྱུས་ལག་བསྟར་གྱི་བྱེད་ཐབས་ཤིག་ཡིན་པ་ཤེས་རྟོགས་བྱུང་སྟེ། རྒྱལ་ཚོགས་ཀྱི་ཚོགས་འདུ་གཙོའི་རྒྱལ་སྤྱིའི་སྲིད་གཞུང་ཁག་གིས་རྒྱ་ནག་ལ་སྐྱོན་བརྗོད་ཤུགས་ཆེར་བྱེད་བཞིན་ཡོད་པ་རེད།
