ཀླུ་སྨྱོན་ཧེ་རུ་ཀ
སྔ་འགྱུར་གླིང་གི་རྣམ་པ་ལྷན་རྒྱས་ཚང་མར་འཚམ་འདྲི་བཀྲ་ཤིས་བདེ་ལེགས་ཞུ། དེ་རིང་ཡིན་ན་གུ་རུ་རིན་པོ་ཆེ་ཨོ་རྒྱན་སངས་རྒྱས་གཉིས་པའི་ཚེས་བཅུའི་དུས་ཆེན་ཁྱད་པར་ཅན་དེ་འདྲ་ཞིིག་ལ་ཁེལ་ཡོད་པ་རེད། དེ་འདྲ་ཡིན་པས་ས་ཆ་སོ་སོ་དང་རྒྱལ་ཕྱི་ནང་ཀུན། བོད་ཆོལ་ཁ་གསུམ་ན་བོད་མི་སྐྱ་སེར་རྒན་གཞོན་ཕོ་མོ་ཁྱད་མེད་དུ་གུ་རུ་ཨོ་རྒྱན་སངས་རྒྱས་གཉིས་པའི་གསོལ་འདེབས་འདྲ་མིན་དཔེར་ན་ཚིག་བདུན་གསོལ་འདེབས་ལྟ་བུ། བཛྲ་གུ་རུ་འདྲ་བོ་དང་དུས་གསུམ་སངས་རྒྱས་ལྟ་བུ་ཆོ་ག་རྒྱས་བསྡུས་རིང་ཐུང་མང་པོ་ཞིག་གསུང་གི་ཡོད་པ་རེད། འདི་ནི་ཚེ་འདི་དང་བར་དོ་ཕྱི་མ་གསུམ་ལ་མཚོན་ན་ཧ་ལས་པའི་ཕན་ཐོགས་ཆེན་པོ་ཡོད་པའི་རྣམ་དཀར་གྱི་བྱ་བ་རྒྱ་ཆེ་ཤོས་དེ་རེད་བསམ་གི་ཡོད། རྒྱུ་མཚན་ཅིའི་ཕྱིར་ཡིན་ཟེར་ན། ད་ཐེངས་ཀྱི་བསྐལ་པ་འདི་ལ་བསྐལ་བཟང་གི་སངས་རྒྱས་སྟོང་གི་ནང་ནས་སངས་རྒྱས་བཅོམ་ལྡན་འདས་རྒྱལ་བ་ཤྰཀྱ་ཐུབ་པ་རྒྱ་གར་རྡོ་རྗེ་གདན་དུ་མངོན་པར་རྫོགས་པར་སངས་རྒྱས་ནས། སེམས་ཅན་གྱི་བློ་ཁའམ་སྐལ་བ་དང་འཚམ་པར་སངས་རྒྱས་ཀྱིས་ལོ་ཉིས་སྟོང་དྲུག་བརྒྱའི་ཡར་སྔོན་དུ་ཆོས་མང་པོ་ཞིག་གསུངས་པ་རེད། ཆོས་ཀྱི་འཁོར་ལོ་རིམ་པ་གསུམ་ཟེར་ན་རེད། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གིས་གཙོ་བྱས་པའི་མདོ་དང་སྔགས་ཀྱི་ཆོས་འཁོར་རིམ་པ་མང་པོ་ཞིག་བསྐོར་པ་རེད།
དེ་ནང་བཞིན་སངས་རྒྱས་བཅོམ་ལྡན་འདས་ཁོང་རང་ཉིད་ཀྱང་རྒྱ་གར་གྱི་ཤར་ལྷོ་ནུབ་བྱང་དང་ཁ་སང་དེ་རིང་ཤྲྰི་ལིངྐར་འབོད་པའི་ཡུལ་གྲུ་དེར་ཡང་ཕེབས་པ་རེད། ཐུན་མོང་ཡོངས་གྲགས་སུ་སྟོན་པ་སངས་རྒྱས་ཁོང་སྐབས་དེའི་རྒྱ་གར་གྱི་རྒྱལ་ཕྲན་མི་འདྲ་བཅུ་དྲུག་གི་ས་ཆ་སོ་སོ་དང་ཤྲྰི་ལིངྐ་དང་བལ་ཡུལ་ཙམ་ཞིག་ལ་ཕེབས་པ་རེད། དེ་མ་གཏོགས་རྒྱལ་ཁབ་དང་ཡུལ་གྲུ་གཞན་པར་ཡོངས་གྲགས་སུ་ཕེབས་མེད་པ་རེད། དེ་བཞིན་ཐུན་མོང་གི་འགྲོ་བ་མིའི་སྣང་ངོ་ལ་ཁོང་གིས་ཧི་མ་ལ་ཡ་བརྒལ་ནས་བོད་གངས་ཅན་པའི་ཡུལ་དུ་ཕེབས་ཡོད་པ་མ་རེད། རྒྱ་ནག་ལ་ཡང་ཕེབས་མེད་པ་རེད། ཡོ་རོབ་དང་གླིང་ཆེན་ཨ་མེ་རི་ཀའི་ས་ཆར་ཡང་ཕེབས་པའི་སྐད་ཆ་དང་ལོ་རྒྱུས་ཡོད་པ་མ་རེད། དེ་བཞིན་དཀྱིལ་ཤར་ཡུལ་གྲུ་རྒྱ་སྐད་དུ་ཀྲུང་ཏུང་དང་དབྱིན་སྐད་ནང་Middle East ཟེར་བ་ཁ་སང་དེ་རིང་ཨེ་རག་དང་ཨེ་རན། སི་རི་ཡ་དང་ལི་བྷི་ཡ་ཟེར་བ་འདི་ཚོར་ཡང་ཕེབས་ཡོད་པ་མ་རེད། ཁོང་དགུང་ལོ་སུམ་ཅུ་སོ་སྔའི་སྟེང་སངས་རྒྱས་ཏེ་དགུང་ལོ་བརྒྱད་ཅུ་ཐམ་པ་བར་དུ་མི་ལོ་བཞི་བཅུ་ཞེ་ལྔའི་རིང་ལ་ཆོས་ཀྱི་འཁོར་ལོ་བསྐོར་པའི་སྐབས་དེར། དངོས་ཡོད་ལོ་རྒྱུས་སྟེང་སྐུ་ཚེའི་དུས་ཚོད་ཕལ་མོ་ཆེ་རྒྱ་གར་རང་དུ་བཞུགས་པ་རེད།
དེ་ལྟར་ད་རེས་ཀྱི་བསྐལ་པ་བཟང་པོ་འདིའི་སངས་རྒྱས་སྟོང་གི་ཁྲོད་ནས་སངས་རྒྱས་ཤྰཀྱ་ཐུབ་པ་ཁོང་རང་རེ་བོད་གངས་ཅན་གྱི་ལྗོངས་འདིར་ཐུན་མོང་ཡོངས་གྲགས་སུ་མ་ཕེབས་པ་རེད། དེ་ནང་བཞིན་རྒྱན་དྲུག་མཆོག་གཉིས་དང་གྲུབ་ཆེན་བརྒྱད་ཅུའི་ཁྲོད་ནས་གཅིག་ཙམ་ཞིག་བོད་གངས་ཅན་གྱི་ལྗོངས་སུ་ཕེབས་པ་རེད། དེ་ནི་ཆོས་རྒྱལ་མེས་དབོན་རྣམ་གསུམ་གྱི་ཡ་གྱལ་ཆོས་རྒྱལ་ཁྲི་སྲོང་ལྡེའུ་བཙན་གྱི་བཀའ་དྲིན་ལ་བརྟེན་ནས། ཨོ་རྒྱན་སངས་རྒྱས་གཉིས་པ་དེ་བོད་ཁ་བ་གངས་རིའི་ལྗོངས་སུ་གདན་འདྲེན་ཞུས་པ་རེད། ཁོང་བོད་ལ་ཕེབས་ནས་སྐབས་དེའི་འཛམ་གླིང་ན་འགྲན་ཟླ་བྲལ་བའི་ནང་བསྟན་གྱི་གཙུག་ལག་ཁང་ངམ་བཤད་སྒྲུབ་སྒྱུར་སྒོམ་བཞིའི་མཐོ་སློབ་ཆེན་མོ་བསམ་ཡས་གཙུག་ལག་ཁང་བཞེངས་སྐྲུན་མཛད་དེ། དམ་པའི་ཆོས་ཀྱི་སྲོལ་ཆེན་པོ་ཞིག་སྔར་མེད་གསར་དུ་བཏོད་པ་དང་། དེ་ཙམ་དུ་མ་ཟད་དམ་པའི་ཆོས་ཟབ་ས་ན་བདུད་ཟབ་ཟེར་བའི་དཔེ་བཞིན་དུ། སྔོན་མར་བོད་ཀྱི་ཡུལ་འདི་ལ་བོན་ཆོས་ལ་སོགས་པའི་གདོད་མའི་ཆོས་ལུགས་མང་པོ་ཞིག་ཡོད་པ་དང་། རྒྱུ་མཚན་ནི་བོད་ཀྱི་གདོད་མའི་དུས་སུ་རིགས་རྒྱུད་དང་ཚོ་ཁག་སྟོང་ཕྲག་ནས་ཁྲི་ཕྲག་འདྲ་མིན་ས་ཆ་འདྲ་མིན་ན་འཚོ་སྡོད་བྱེད་བཞིན་ཡོད་པ་དང་། ཚོ་ཁག་དང་རིགས་རྒྱུད་མི་འདྲ་བར་སོ་སོར་མཆོད་ཡུལ་དང་དད་མོས་བྱེད་སའི་འབྱུང་བ་ལྔའི་ལྷ་དང་མི་རབས་ཀྱི་ལྷ་སོགས་ལྷ་འདྲ་མིན་སྟོང་ཕྲག་མང་པོ་ཞིག་ཡོད་པ་དང་། ལྷ་དེ་དང་དེ་ཚོར་མཆོད་བཀུར་བསྟོད་གསུམ་བྱེད་པའི་ཆོས་ལུགས་ཀྱང་འདྲ་མིན་སྟོང་ཕྲག་ཡོད་པ་རྗེས་དཔག་རིགས་པས་ཁ་ཚོན་བཅད་ནས་བཤད་ཐུབ་པ་ཞིག་ཡིན་པས། ཆོས་ལུགས་འདྲ་མིན་སྟོང་ཕྲག་དེ་ཚོ་བོན་ཆོས་ཞེས་པའི་ཆོས་ལུགས་བྱེ་བྲག་པ་གཅིག་གི་ཁོངས་སུ་བསྡུ་ཐབས་རྩ་བ་ཉིད་ནས་ཡོད་པ་མ་རེད། དེ་བཞིན་དུ་བོད་བཙན་པོའི་རྒྱལ་ཁབ་དབུ་མ་ཚུགས་པའི་ཡར་སྔོན་ལ་བོད་དུ་གདོད་མའི་མི་རིགས་འདྲ་མིན་དང་ཚོ་ཁག་འདྲ་མིན་སྟོང་ཕྲག་དུ་མ་ཞིག་ཡོད་པས། མི་རིགས་དང་ཚོ་ཁག་དེ་ཚོས་བཅད་བཟུང་བྱས་པའི་ས་ཆའི་མིང་ཡང་སྟོང་ཕྲག་དུ་མ་ཞིག་ཡོད་དགོས་པ་ལོ་རྒྱུས་ཀྱི་ཆོས་ཉིད་ཡིན་པས། ས་ཆ་དེ་ཚོ་ཚང་མ་ཡང་ཞང་ཞུང་ཞེས་པའི་ས་མིང་གཅིག་གི་ཁོངས་སུ་ཡང་རྩ་བ་ཉིད་ནས་བསྡུ་ཐབས་ཡོད་པ་མ་རེད།
གང་ལྟར་ཡང་བོད་ཀྱི་གདོད་མའི་ཆོས་ལུགས་འདྲ་མིན་དང་རྒྱལ་ཁག་འདྲ་མིན་གྱི་སྐབས་སུ་སྲུང་མ་འདྲ་མིན་ཞིག་ཡོད་པ་རེད། བོད་ལ་ཆོས་ལུགས་གསར་པ་ཞིག་སྟེ་ནང་བསྟན་ནམ་སངས་རྒྱས་ཆོས་ལུགས་འདི་དར་ཡོང་བའི་སྐབས་སུ། སྲུང་མ་དེ་ཚོའི་ཁྲོད་ནས་དགའ་མཁན་དང་མི་དགའ་མཁན་གཉིས་ཀ་ཡོད་པ་རེད། མི་དགའ་མཁན་མང་པོ་ཞིག་གིས་བསམ་ཡས་གཙུག་ལག་ཁང་བཞེང་རྒྱུས་མཚོན་པའི་ཆོས་ཀྱི་བྱ་བ་མང་པོ་ཞིག་ལ་བར་ཆད་བྱས་པ་རེད། དེ་ཚོ་ཚང་མ་ཨོ་རྒྱན་སངས་རྒྱས་གཉིས་པས་དམ་ལ་བཏགས་ནས་དཀར་ཕྱོགས་སྐྱོང་བའི་སྲུང་མར་བཀོད་པ་རེད། དེ་ཚོ་ནི་ཁ་སང་དེ་རིང་སྲིད་པ་ཆགས་པའི་ལྷ་དགུ་དང་རྗེ་ཡི་མགུར་ལྷ་བཅུ་གསུམ། བོད་སྐྱོང་བརྟན་མ་བཅུ་གཉིས་དང་མཁའ་འགྲོ་ཚེ་རིང་མཆེད་ལྔ་ལ་སོགས་པ་འདི་ཚོ་རེད། འདི་ཚོ་ཨོ་རྒྱན་སངས་རྒྱས་གཉིས་པས་ཚར་བཅད་ཚུར་བསྡུས་ནས་ནང་བསྟན་དང་བོད་གངས་ཅན་པའི་སྣོད་བཅུད་གཉིས་ཀའི་སྲུང་མར་བཞག་པ་ཡིན་པས། ལོ་གཅིག་སྟོང་ཉིས་བརྒྱའི་སྔོན་ནས་དུས་དེ་རིང་གི་བར་དུ་ང་ཚོར་སྲུང་སྐྱོབ་དང་ཁ་འཛིན་སྡོང་གྲོགས་མཛད་དང་མཛད་བཞིན་པ་འདི་རེད། བསམ་བློ་གཏོང་ཤེས་ན་འདི་ཡང་ཨོ་རྒྱན་ཐུགས་རྗེ་ཅན་གྱི་བཀའ་དྲིན་ཐུགས་རྗེ་ཁོ་ན་རེད། ཁྱད་པར་དུ་གསང་སྔགས་སྔ་འགྱུར་བ་རྣམས་ལ་མཚོན་ན་ཨོ་རྒྱན་སངས་རྒྱས་གཉིས་པའི་བཀའ་དྲིན་གྱིས་མ་ཁྱབ་པ་ཞིག་ཡོད་པ་མ་རེད་ལ། གཞི་རྩའི་ཆ་ནས་བོད་ཁ་བ་ཅན་ལ་ཁོང་གི་བཀའ་དྲིན་གྱིས་ཁྱབ་ཡོད་པ་རེད།
ཁ་སང་དེ་རིང་ང་ཚོས་བཀའ་འགྱུར་དང་བསྟན་འགྱུར་ཟེར་ནས་རྩ་ཆེན་པོ་ཞིག་ལ་བརྩི་བ་འདི་ཚོར་མཚོན་ན་ཡང་། འདིའི་ཁྲོད་ཀྱི་གླེགས་བམ་ཕལ་མོ་ཆེ་ཞིག་ཨོ་རྒྱན་སངས་རྒྱས་གཉིས་པ་དང་ཆོས་རྒྱལ་ཁྲི་སྲོང་ལྡེའུ་བཙན་གཉིས་ཀའི་སྐུ་རིང་ལ། ཨོ་རྒྱན་རིན་པོ་ཆེའིི་ཞལ་སློབ་ལོ་ཆེན་བེ་རོ་ཙ་ན་དང་སྐ་ཅོག་ཞང་གསུམ་སོགས་ཀྱིས་བསྒྱུར་པ་རེད། དེའི་རྐྱེན་གྱིས་བཀའ་འགྱུར་དང་བསྟན་འགྱུར་འདི་ཚོ་རྒྱ་གར་གྱི་ཡིག་རིགས་པ་ལི་དང་ལེགས་སྦྱར་ནས་བོད་ཡིག་ཏུ་བསྒྱུར་མཁན་གྱི་མགོ་ཁུངས་ཐོག་མ་དེ་སྔ་འགྱུར་རྙིང་མ་པར་ཐུག་ཡོད་པ་རེད། ཆོས་རྒྱལ་ཁྲི་སྲོང་ལྡེའུ་བཙན་ནས་བཟུང་སྟེ་གླང་དར་མའི་བར་དུ་བྱོན་པའི་བོད་ཀྱི་ལོ་ཙྰ་པ་ཚང་མ་སྔ་འགྱུར་རྙིང་མ་པ་ཤ་སྟག་རེད། དེ་བཞིན་དུ་རྒྱལ་རབས་དེ་ཚོའི་སྐབས་ཀྱི་གོས་དཀར་ལྕང་ལོ་འཆང་བ་དང་རབ་བྱུང་ངུར་སྨྲིག་གི་སྡེ་གཉིས་ཀ་སྔ་འགྱུར་རྙིང་མ་པ་རེད། དུས་རབས་དེ་ཚོའི་རིང་ལ་བརྩམས་ཚད་དང་བསྒྱུར་ཚད་ཚང་མར་སྔ་འགྱུར་རྙིང་མའི་ཆོས་ཞེས་བརྗོད་པ་རེད། ལོ་རྒྱུས་ཀྱི་དངོས་ཡོད་གནས་ཚུལ་ལ་སྦྱར་ན་བཀའ་འགྱུར་དང་བསྟན་འགྱུར་གཉིས་ཀ་སྔ་འགྱུར་རྙིང་མའི་ཆོས་ཁུངས་སུ་བསྡུ་ཆོག་གི་ཡོད་པ་རེད།
རྗེས་སུ་བསྟན་པ་ཕྱི་དར་སྐབས་སུ་ལོ་ཆེན་རིན་ཆེན་བཟང་པོ་ལ་སོགས་པའི་ལོ་ཙྰ་པ་མང་པོ་ཞིག་བྱོན་ནས། བསྟན་པ་སྔ་དར་སྐབས་སུ་བསྒྱུར་ཟིན་པའི་བཀའ་འགྱུར་དང་བསྟན་འགྱུར་གྱི་ཆོས་ཚན་གང་ལ་གང་འཚམ་ཞིིག་ལ་འགྱུར་བཅོས་བྱས་པ་རེད། དེ་མ་གཏོགས་བཀའ་འགྱུར་དང་བསྟན་འགྱུར་གྱི་བསྒྱུར་དཔེ་ངོ་མ་ཕལ་མོ་ཆེ་དེ་ཚོ་ནི་བསྟན་པ་སྔ་དར་སྐབས་སུ་བསྒྱུར་པ་དེ་ཚོ་རང་རེད། དེའི་རྐྱེན་གྱིས་ཁ་སང་དེ་རིང་གི་བཤད་སྟངས་དང་ལུགས་སྲོལ་བཞིན་པར་སྐྲུན་བདག་དབང་ཞེས་པ་དེའི་ཕྱོགས་ནས་བརྗོད་ན། བོད་ཀྱི་བཀའ་འགྱུར་དང་བསྟན་འགྱུར་གཉིས་ཀའི་པར་སྐྲུན་བདག་དབང་ཕལ་མོ་ཆེ་དེ་བོད་ཀྱི་ཆོས་བརྒྱུད་ཁག་གི་ནང་ནས་སྔ་འགྱུར་རྙིང་མ་པ་ལ་ཡོད་པ་རེད། འདི་ནི་ལོ་རྒྱུས་ཀྱི་དོན་དངོས་ཡིན་པས་ཁང་ལེན་ན་འདོད་ན་རེད་མི་འདོད་ན་ཡང་བདེན་པ་ནི་བདེན་པ་རང་རེད།
དེ་ནས་ཁ་སང་དེ་རིང་དུས་སྙིགས་མར་གྱུར་པས་ལྟ་བ་སྙིགས་མ་དང་ཚེ་སྙིགས་མ། སེམས་ཅན་གྱི་བསམ་བློ་སྙིགས་མ་སྟེ་ཉོན་མོངས་པ་ཐམས་ཅད་ལྷང་ལ་བུད་དེ། སྙིགས་མ་ལྔ་བདོ་ཞེས་པ་དེ་ཁ་དར་བའི་དུས་སྐབས་འདིར། ཨོ་རྒྱན་སངས་རྒྱས་གཉིས་པ་ལ་གསོལ་བ་འདེབས་བཞིན་བཛྲ་གུ་རུ་དང་ཚིག་བདུན་གསོལ་འདེབས། དུས་གསུམ་སངས་རྒྱས་དང་བར་ཆད་ལམ་སེལ་སོགས་བཏོན་པ་ཡིན་ན་བྱིན་རླབས་གཞན་ལས་ཀྱང་ཁྱད་པར་དུ་མྱུར་བ་རེད། དེ་མྱུར་དགོས་པའི་རྒྱུ་མཚན་ཅི་རེད་ཟེར་ན། བོད་གངས་ཅན་གྱི་ཡུལ་གྲུ་འདིར་སངས་རྒྱས་བཅོམ་ལྡན་འདས་དངོས་སུ་མ་བྱོན་ན་ཡང་། སངས་རྒྱས་བཅོམ་ལྡན་འདས་ལས་ལྷག་པའི་སྐྱེས་བུ་ཞིག་སྟེ། སངས་རྒྱས་རང་ཉིད་ཀྱིས། ང་ལས་ལྷག་པའི་སྐྱེས་བུ་ཞིག་འབྱུང་བར་འགྱུར་ཞེས་ལུང་བསྟན་གནང་ཡོད་པ་དེ་གུ་རུ་རིན་པོ་ཆེ་རེད་ལ། དོན་དངོས་སུ་ཡང་སངས་རྒྱས་ཁོང་རང་ཉིད་ལས་ཀྱང་ལྷག་པའི་སྐྱེས་བུ་ཞིག་རེད། དེ་ལྟ་བུའི་སངས་རྒྱས་བཅོམ་ལྡན་འདས་ཀྱིས་ཀྱང་ཁོང་ལས་ཀྱང་ལྷག་པར་ལུང་བསྟན་པའི་སྐྱེས་བུ་དམ་པ་དེ་འདྲ་ཞིག་བོད་གངས་ཅན་པའི་ལྗོངས་འདིར་ཕེབས་པ་རེད་ལ། དེ་ནི་ང་ཚོ་ཁ་བ་གངས་ཅན་ཚོའི་བསོད་ནམས་ཀྱི་སྐལ་བ་རེད།
དཔེ་ཞིག་བཞག་ན། སངས་རྒྱས་བཅོམ་ལྡན་འདས་ལོ་ཉིས་སྟོང་དྲུག་བརྒྱའི་སྔོན་དུ་རྒྱ་གར་དུ་བྱོན་ཏེ་ལོ་བཞི་བཅུའི་རིང་ཆོས་ཀྱི་འཁོར་ལོ་བསྐོར་པའི་རྗེས་སུ། ཉན་ཐོས་ཐེག་དམན་པ་ཚོའི་ལུགས་ལ་ལྷག་མེད་དུ་མྱ་ངན་ལས་འདས་པ་སྟེ་ཁོང་གི་སྐུ་གཟུགས་དང་རྣམ་ཤེས་གཉིས་ཀའི་རྒྱུན་ཆད་ཟིན་པ་རེད། ཐེག་ཆེན་པ་ཚོའི་ལུགས་ལ་ཁོང་དག་པའི་ཞིང་ཁམས་གཞན་དུ་ཕེབས་པ་རེད་ལ། གལ་སྲིད་ཁོང་ཡང་སྐྱར་འཇིག་རྟེན་འདིར་མ་ཕེབས་ན་ཕྱི་རབས་གདུལ་བྱ་རྣམས་ཀྱི་མགོན་དང་སྐྱབས་སུ་ཚར་གཉིས་པ་ཞིག་མ་གྱུར་པ་ལྟ་བུ་རེད། ཡིན་ན་ཡང་གུ་རུ་རིན་པོ་ཆེ་དེ་ལྟར་མ་ཡིན་པ་དེ་ང་ཚོས་ཤེས་དགོས་པ་ཞིག་རེད། འདི་ནས་ཡར་བརྩིས་པའི་ལོ་གཅིག་སྟོང་ཉིས་བརྒྱ་ཙམ་གྱི་སྔོན་དུ་གུ་རུ་རིན་པོ་ཆེ་མཆོག་བོད་དུ་ཕེབས་ཏེ། ཁྱོན་བསྡོམས་བོད་དུ་ལོ་གྲངས་ཅི་ཙམ་ཞིག་བཞུགས་ཡོད་མིན་གྱི་ཐད་ལ་མཁས་པ་དག་གི་བཞེད་སྲོལ་མི་འདྲ་བ་ཞིག་འདུག ལ་ལས་བཞི་བཅུ་དང་ལ་ལས་ཉི་ཤུ་རྩ་གྲངས་སོགས་བཞེད་ཚུལ་མི་མཐུན་པ་ཞིག་ཡོད་པ་རེད། གང་ལྟར་ལོ་གྲངས་གང་འཚམ་ཞིག་ལ་བཞུགས་པའི་རྗེས་སུ་ཞལ་ཆེམས་ལུང་བསྟན་སོགས་བསྩལ་ནས་གུང་ཐང་ལ་ཁར་ལྷོ་ནུབ་སྲིན་པོའི་གླིང་གི་ཟངས་མདོག་དཔལ་གྱི་རི་བོར་ཕེབས་ཟིན་པ་རེད་དེ། ཡིན་ན་ཡང་། ནངས་རེ་དགོང་རེར་བོད་ཀྱི་དོན་ལ་འབྱོན༔ ཉི་ཟེར་འཆར་སྡུད་མདངས་ལ་ཆིབས་ཏེ་བྱོན༔ ཡར་ངོ་ཚེས་བཅུའི་དུས་སུ་དངོས་སུ་བྱོན༔ ཞེས་པ་ལྟར། ཁོང་གི་སྐུ་དངོས་དང་སྤྲུལ་པ་ཡང་སྤྲུལ་གྱི་གཏེར་སྟོན་མང་པོ་ཞིག་བྱོན་དང་འབྱོན་བཞིན་པ་རེད། དེ་ཚོའི་སྐོར་ནི་བོད་ཀྱི་གཏེར་སྟོན་ཆེན་པོ་ཁོང་རྣམ་པའི་རྣམ་ཐར་ལོ་རྒྱུས་ལ་མཇལ་ན་མངོན་སུམ་ཚད་མར་གྲུབ་བསྡད་ཡོད་པ་རེད།
སྤྱིར་བཏང་གི་ཆ་ནས་ནངས་རེ་དགོང་རེར་བོད་ཀྱི་དོན་ལ་བྱོན༔ ནངས་རེ་དགོང་རེར་བོད་ཀྱི་དོན་ལ་འབྱོན༔ ཉི་ཟེར་འཆར་སྡུད་མདངས་ལ་ཆིབས་ཏེ་བྱོན༔ ཡར་ངོ་ཚེས་བཅུའི་དུས་སུ་དངོས་སུ་བྱོན༔ ཞེས་པའི་དེ་རིང་ལྟ་བུར་མཚོན་ན་ཚེས་བཅུ་ཡིན་པས། ཨོ་རྒྱན་སངས་རྒྱས་གཉིས་པ་ཁོང་དེ་རིང་བོད་གངས་ཅན་གྱི་ཡུལ་དུ་དངོས་སུ་བྱོན་བསྡད་ཡོད་པ་རེད། བྱོན་པས་མི་ཚད་གལ་སྲིད་ཁྱོད་རང་ཁོང་ལ་དད་པ་ཅན་ཞིག་ཡིན་ན། དད་པ་ཅན་ལ་པད་འབྱུང་སྒོ་ཉལ་ཡོད༔ ཅེས་གསུངས་པ་བཞིན། ཁྱོད་རང་གི་མདུན་དེ་རང་དུ་བཞུགས་ཡོད་པ་རེད་ལ། ཁྱོད་རང་གི་མཆོད་ཁང་གི་ནང་དུ་གུ་རུ་རིན་པོ་ཆེའི་སྐུ་བརྙན་ནམ་སྐུ་ཐང་སོགས་གུ་རུ་རིན་པོ་ཆེའི་སྐུ་གསུང་ཐུགས་རྟེན་གང་ཞིག་ཡོད་ཀྱང་དེ་ཚོའི་ནང་དུ་བཞུགས་བསྡད་ཡོད་པ་རེད། གལ་སྲིད་ཁྱོད་ཀྱིས་དད་པས་གསོལ་བ་འདེབས་ཤེས་ན་བརྒྱ་ཆ་བརྒྱ་དེར་བཞུགས་བསྡད་ཡོད་པ་རེད། དེ་རིང་ཁོང་ཁྱོད་ཀྱི་ཁྱིམ་ཚང་ནང་དང་ཁྱོད་ཀྱི་ལྷ་ཁང་ནང་། ཁྱོད་ཀྱི་མཆོད་ཁང་ནང་དུ་གུ་རུ་རིན་པོ་ཆེ་སྐུ་བྱེ་བ་ཕྲག་བརྒྱའི་བཀོད་པ་དང་བཅས་ཏེ་ཕེབས་བསྡད་ཡོད་པ་རེད། འདི་ལ་བསམ་བློ་ཞིག་བཏང་བ་ཡིན་ན། ཨོ་རྒྱན་སངས་རྒྱས་གཉིས་པ་བསམ་གྱིས་མི་ཁྱབ་པ་ཞིག་ཡིན་པ་རེད།
བོད་གངས་ཅན་པར་གཞི་རྩའི་ཆ་ནས་བཀའ་བརྒྱུད་པར་མར་མི་དྭགས་གསུམ་དང་། ས་སྐྱ་པར་གོང་མ་རྣམ་ལྔ། ཇོ་ནང་པར་ཀུན་མཁྱེན་ཡབ་སྲས། དགེ་ལུགས་པར་རྗེ་ཡབ་སྲས་གསུམ་སོགས་ལོ་རྒྱུས་སྟེང་དུ་བྱོན་པ་དངོས་ཡོད་རེད། བྱོན་ནས་བསྟན་འགྲོའི་མཛད་འཕྲིན་བསྐྱངས། རྗེས་སུ་སྐུ་ཚེ་འདིའི་གདུལ་བྱ་རྫོགས་པའི་སྐབས་སུ་རང་རང་སོ་སོའི་དག་པའི་ཞིང་ཁམས་དེ་ཚོར་ཕེབས་ཟིན་པ་རེད། ཁོང་རྣམ་པ་དག་པའི་ཞིང་དུ་ཕེབས་ཁར། གུ་རུ་རིན་པོ་ཆེ་ནང་བཞིན་མ་འོངས་ལུང་བསྟན་གནང་སྟེ། ནངས་རེ་དགོང་རེ་བོད་ཀྱི་དོན་ལ་འབྱོན་གྱི་ཡིན། ཡར་ངོའི་ཚེས་བཅུའི་དུས་སུ་དངོས་སུ་འབྱོན་གྱི་ཡིན་ཞེས་གསུངས་མཁན་ཧ་ལམ་མེད་པ་རེད། མཚམས་རེར་ཁོང་རྣམ་པའི་སྤྲུལ་པ་ཡང་སྤྲུལ་རེ་བྱོན་པ་ནི་སྲིད་མཐའ་མ་བཀག་པ་ཙམ་ཞིག་རེད། དེ་ལྟ་བུའི་ལུང་བསྟན་གསུང་མཁན་དེ་གུ་རུ་རིན་པོ་ཆེ་གཅིག་བུ་རེད་འདུག དེའི་རྐྱེན་གྱིས་ཨོ་རྒྱན་སངས་རྒྱས་གཉིས་པ་དེ་བོད་ཁ་བ་ཅན་པ་རྣམས་ལ་དངོས་གནས་བཀའ་དྲིན་ཆེན་པོ་བསམ་གྱིས་མི་ཁྱབ་པ་ཞིག་ཡིན་པ་རེད། དེའི་ཕྱིར། ཁ་སང་དེ་རིང་བར་དུ་བྱོན་པའི་གཏེར་སྟོན་རྣམ་པ་ནི་གུ་རུ་རིན་པོ་ཆེའི་སྐུ་ཚབ་གསུང་ཚབ་ཐུགས་ཚབ་ཡོན་ཏན་དང་འཕྲིན་ལས་ཀྱི་སྐུ་ཚབ་ཉག་གཅིག་རེད། དེའི་ཕྱིར་རང་རང་གི་ས་ཆ་ན་གུ་རུའི་རྒྱལ་ཚབ་གཏེར་སྟོན་རེ་བཞུགས་ན་རེད། མཁའ་འགྲོ་ཡེ་ཤེས་མཚོ་རྒྱལ་གྱི་སྐུ་ཚབ་མཁའ་འགྲོ་མ་རེ་བཞུགས་ཡོད་ན་དད་པ་དང་དག་སྣང་བསྐྱེད་དགོས་པ་རེད།
ཁ་སང་དེ་རིང་ལྟ་བ་སྙིགས་མ་དང་ཉོན་མོངས་སྙིགས་མའི་དུས་ཚོད་ལ་བསླེབས་ཟིན་པས་སེམས་ཅན་གྱི་བསོད་ནམས་དམན་པས། གུ་རུ་རིན་པོ་ཆེའི་དམ་འོག་ནས་ཤོར་ཟིན་པའི་འབྱུང་བོ་སྤུན་དགུ་སོགས་དམ་ཉམས་ཀྱི་དམ་སྲི་མང་པོ་ཞིག་བོད་གངས་ཅན་པའི་ལྗོངས་སུ་མི་རུ་སྐྱེས་ནས། གཏེར་སྟོན་རིག་ན་ངན་སྨྲོས་བྱེད་པ་དང་མཁའ་འགྲོ་མཐོང་ན་གདོང་པ་གཟེར་བའི་མི་ངན་མང་པོ་ཞིག་ཡོད་པ་རེད། ཁོ་རང་ཚོས་མི་དང་གདོན་འདྲེའི་སྐྱེ་བ་ཅི་འདྲ་ཞིག་བླངས་ན་ཡང་། གུ་རུ་ཨོ་རྒྱན་རིན་པོ་ཆེ་དང་མཁའ་འགྲོ་ཡེ་ཤེས་མཚོ་རྒྱལ་ལ་མི་དད་པ་དང་། གུ་རུའི་སྐུ་གསུང་ཐུགས་ཚབ་གཏེར་སྟོན་དང་གུ་རུའི་གཟུངས་མ་དེ་ཚོའི་སྐྱེ་བརྒྱུད་མཁའ་འགྲོ་མ་དེ་ཚོར་མི་དད་པ་དེ་འདྲ་ཡིན་པ་རེད། རྒྱུ་མཚན་ནི་སྔོན་ཆད་གུ་རུ་རིན་པོ་ཆེས་དམ་སྲི་དེ་ཚོ་དམ་ལ་འདོགས་པའི་དུས་ནས་བཟུང་སྟེ་ཕན་ཚུན་མི་དགའ་བ་ཆགས་ཟིན་པས་རེད། མི་དེ་ཚོ་ནི་དམ་སྲི་འབྱུང་བོ་ངན་པ་དེ་ཚོའི་སྐྱེ་བརྒྱུད་ཡིན་པས། ཁ་སང་དེ་རིང་དམ་སྲིའི་སྐྱེ་བརྒྱུད་མང་པོ་ཞིག་གིས་ལྟ་བ་སྙིགས་མའི་གོ་སྐབས་འདི་བཟུང་སྟེ་ལན་རེར་སྤྲུལ་སྐུ་འམ་དགེ་བཤེས་དང་མཁན་པོའི་ཚུལ་བཟུང་བ་དང་། སྐབས་རེར་སློབ་གྲྭ་ཆེ་འབྲིང་གི་དགེ་རྒན་དང་སློབ་མའི་ཚུལ་དུ་ཡོད་པ་དང་། ཡང་ལན་རེར་གྲྭ་པ་དཀྱུས་མ་དང་ཞིང་འབྲོག་མང་པོ་སོགས་ཀྱི་ཚུལ་དུ་ཡོད་པས། དེ་ཚོས་ཅི་བཤད་ཀྱི་ཁ་ལ་ཉན་མི་རུང་བ་ཡིན། ཁྱད་པར་དུ་སྔ་འགྱུར་རྙིང་མ་བ་ཞིག་ཡིན་ན་དེ་ཚོའི་ཁ་ལ་ཉན་ནས་སྤྲུལ་པའི་གཏེར་སྟོན་དང་མཁའ་འགྲོ་མ་དེ་ཚོར་སྐུར་འདེབས་ལོག་ལྟ་བྱས་ན་རང་ཉིད་དམྱལ་བར་འགྲོ་བའི་ལས་ངན་ཚབས་ཆེན་བསགས་པ་རེད། དེ་འདྲ་རྩ་བ་ཉིད་ནས་བྱེད་མི་རུང་།
སྤྲུལ་པའི་གཏེར་སྟོན་དེ་ཚོའི་ཁྲོད་དུ་སྤྱོད་པ་ཡག་པོ་སྐྱོང་མཁན་དང་སྡུག་ཅག་སྐྱོང་མཁན། ཡག་སྡུག་འདྲེས་མ་སྐྱོང་མཁན་སྣ་ཚོགས་ཤིག་འབྱུང་གི་ཡོད་པ་ནི། གུ་རུ་རིན་པོ་ཆེའི་ལུང་བསྟན་ཚད་མ་དག་ལས། སྤྱོད་པ་མ་ངེས་སྣ་ཚོགས་འབྱུང༔ ཞེས་གསུངས་ཡོད་པས། ཁ་སང་དེ་རིང་ཞལ་བཞུགས་བཞིན་པའི་སྤྲུལ་པའི་གཏེར་སྟོན་རྣམ་པ་དང་མཁའ་འགྲོ་མ་རྣམ་པར་ལུས་ངག་ཡིད་གསུམ་གྱིས་དད་པ་བྱོས་དག་སྣང་སྦྱོངས། རྗེས་སུ་ཡི་རང་བྱོས། དེ་མ་གཏོགས་དམ་སྲི་འབྱུང་བོའི་སྐྱེ་བརྒྱུད་དེ་ཚོའི་ཁ་ལ་ཉན་ནས་ཁ་གཏོང་མི་ཉན། སྔགས་པ་སྔགས་མ་ཞིག་མཐོང་ན་ཡང་དེ་ཚོར་གུས་ཞབས་བྱོས། སྔོན་བྱོན་ཆོས་རྒྱལ་བཀའ་དྲིན་ཅན་དེ་ཚོའི་སྐབས་སུ་དགེ་འདུན་གྱི་སྡེ་གཉིས་ཞེས་པ། གོས་དཀར་ལྕང་ལོ་ཅན་གྱི་སྡེ་དང་རབ་བྱུང་ངུར་སྨྲིག་གི་སྡེ་གཉིས་ཡོད་པའི་ཐོབ་ཐང་འདྲ་མཉམ་རེད། དཔེར་ན་ཆོས་རྒྱལ་ཁྲི་རལ་བ་ཅན་གྱིས་ཁོང་གི་རལ་བའི་སྣེ་གཉིས་སུ་དར་ཡུག་སྲིད་དུ་རིང་བ་དེ་འདྲ་གཉིས་བཏགས་ཏེ། དར་ཡུག་གཅིག་གི་སྟེང་དུ་གོས་དཀར་ལྕང་ལོ་ཅན་གྱི་སྡེ་སྔགས་པ་སྔགས་མ་བཞུགས་སུ་བཅུག དར་ཡུག་གཅིག་གི་སྟེང་དུ་རབ་བྱུང་ངུར་སྨྲིག་གི་སྡེ་གྲྭ་པ་ཨ་ནེ་ཚོ་བཞུགས་སུ་བཅུག་ནས། དགེ་འདུན་གྱི་སྡེ་འདི་གཉིས་ལ་གུས་ཞབས་དང་བསྙེན་བཀུར་འདྲ་མཉམ་ཞུས་པ་རེད། ཆོས་རྒྱལ་ཆེན་པོ་དེ་འདྲ་ཞིག་གིས་བོད་ཀྱི་དགེ་འདུན་གྱི་སྡེ་འདི་གཉིས་ལ་གུས་ཞབས་དང་དད་བཀུར་འདྲ་མཉམ་བྱེད་དགོས་ན། ང་ཚོ་ཆོས་རྒྱལ་མེས་དབོན་རྣམ་གསུམ་གྱི་འབངས་མི་སེར་ཚོས་དེ་ལྟར་བྱེད་དགོས་དང་དགོས། ཆོས་རྒྱལ་ཚོས་དེ་ལྟར་གནང་བ་དེ་ང་ཚོ་དམངས་ཕལ་བ་རྣམས་ལ་མིག་དཔེ་དང་སྲོལ་བཟང་པོ་དཔེ་སྟོན་གནང་བ་རེད། ཤེས་སོང་ངམ། ཆོས་རྒྱལ་ཁྲི་རལ་བ་ཅན་གྱིས་དེ་ལྟར་རབ་བྱུང་ངུར་སྨྲིག་གི་སྡེ་དང་གོས་དཀར་ལྕང་ལོའི་སྡེ་གཉིས་ལ་གུས་ཞབས་འདྲ་མཉམ་དུ་གནང་བའི་ལོ་རྒྱུས་གསོན་པོ་དེ་ཚོ་ཕོ་བྲང་པོ་ཏ་ལའི་ལྡེབས་རིས་དེ་ཚོའི་ངོས་སུ་བྲིས་ཡོད་པ་རེད།
ཡིན་ན་ཡང་ཡིད་སྐྱོ་དགོས་པ་ཞིག་ལ། རྗེས་སུ་ལོ་རྒྱུས་སྟེང་ནས་སྔ་འགྱུར་རྙིང་མ་པའི་དབུ་འཕང་དེ་ཇེ་དམའ་ཇེ་དམར་གྱུར་པའི་དབང་གིས། རབ་བྱུང་བའི་སྡེ་དེ་ཡ་མཚན་ཞིག་ཡིན་ལུགས་སྒྲོག་པ་མ་གཏོགས་སྔགས་པ་སྔགས་མའི་སྡེ་ལ་གུས་ཞབས་དང་མཆོད་བཀུར་བྱེད་མཁན་གྱི་གྲངས་འབོར་དེ་ཧ་ཅང་ཉུང་ངུ་ཞིག་ལས་མ་བྱུང་བ་རེད། དེ་ཡང་ཆོས་བརྒྱུད་གཞན་པའི་ཁྲོད་དུ་དེ་འདྲ་ཡིན་པ་བརྗོད་མི་དགོས་ཀྱང་། ཐ་ན་སྔ་འགྱུར་རྙིང་མ་པའི་ཆོས་བརྒྱུད་རང་གི་ནང་དུ་ཡང་སྔགས་པ་སྔགས་མ་ཚོར་གུས་ཞབས་དང་མཆོད་བཀུར་དེ་ཙམ་མི་བྱེད་པའི་ལུགས་སྲོལ་ཧ་ལས་པའི་ངན་པ་ཞིག་དར་དང་དར་བཞིན་ཡོད་པ་རེད། དེ་ནི་ཆེ་ས་ནས་བོད་རང་གི་ཡབ་མེས་གོང་མ་ཆོས་རྒྱལ་མེས་དབོན་རྣམ་པའི་མཛད་རྗེས་ལ་ཤེས་རྟོགས་མེད་པ་དང་། བྱེ་བྲག་སྔ་འགྱུར་རྙིང་མ་པའི་འབྱུང་ཁུངས་ངོ་མ་དེ་གང་ཡིན་མ་ཤེས་པའམ་ཤེས་ཀྱང་ནག་བསུབ་གཏོང་འདོད་ཀྱི་ཀུན་སློང་ཐ་ཆད་པ་དེ་ཚོས་བྱས་པ་ཞིག་རེད། བོད་བརྒྱུད་ནང་བསྟན་པ་ཞིག་དང་ཁྱད་པར་དུ་སྔ་འགྱུར་རྙིང་མ་པ་ཞིག་ཡིན་ན་སྔགས་པ་སྔགས་མར་སྡང་པོ་རྩ་བ་ཉིད་ནས་བྱེད་མི་རུང་། དགེ་འདུན་གྱི་སྡེ་གཉིས་ལ་དད་པ་དག་སྣང་འདྲ་མཉམ་བྱེད་དགོས།
རང་གི་མཆོད་ཡུལ་གྱི་དགེ་འདུན་གྱི་སྡེ་དེ་ལ་གཉིས་ཡོད་པ་དེ་མ་ཤེས་པའི་དབང་གིས། རང་བྱུང་གི་སྡེ་ཞིག་མཐོང་ན་མགོ་འབུལ་ལུས་འབུལ་བྱེད་པ་དང་། སྔགས་པ་སྔགས་མའི་སྡེ་ཞིག་མཐོང་ན་དེ་ཚོར་དད་པ་དག་སྣང་བྱེད་རྒྱུའི་ཚབ་ཏུ། དེ་ཚོར་དད་ལོག་བྱས་ཏེ་གན་སྔགས་རྒན་ཞིག་རེད། ཅིག་སྔགས་མ་ཞིག་རེད་ཟེར་བ་དེ་ཚོའི་ལད་ཟློས་རྩ་བ་ཉིད་ནས་བྱེད་རྒྱུ་མེད། དེ་ནི་གནད་འགག་ཡིན་ལ་དེ་ནི་འགག་རྩ་ཞིག་ཀྱང་ཡིན། དེའི་རྐྱེན་གྱིས་སྔགས་པ་སྔགས་མ་ཚོར་དད་པ་དག་སྣང་ཅི་ཙམ་ཞིག་བྱས་པ་དེ་ནི་གུ་རུ་རིན་པོ་ཆེའི་བསྟན་པ་འདི་ལ་ཕན་ཐོགས་ཆེན་པོ་ཡོད་པ་ཞིག་རེད། དེ་ལྟར་བྱས་ན་གུ་རུ་རིན་པོ་ཆེ་ཐུགས་དགྱེས་ཀི་རེད་ལ། མཁའ་འགྲོ་ཡེ་ཤེས་མཚོ་རྒྱལ་ཡང་ཐུགས་མཉེས་ཀི་རེད། སྔགས་པ་ཟེར་བ་འདིའི་ཁུངས་ཡར་དེད་ན་གུ་རུ་རིན་པོ་ཆེ་ལ་ཐུག་བསྡད་ཡོད་པ་རེད་ལ། སྔགས་མ་ཟེར་བ་འདིའི་ཁུངས་ཡར་དེད་ན་མཁའ་འགྲོ་ཡེ་ཤེས་མཚོ་རྒྱལ་ལ་ཐུག་བསྡད་ཡོད་པ་རེད། ཤེས་སོང་ངམ། དཔེར་ན་བོད་ཀྱི་རབ་བྱུང་བའི་སྡེ་ཟེར་བ་འདིའི་མགོ་ཁུངས་ཡར་དེད་ན་མཁན་ཆེན་བོ་དྷི་སཏྭ་ལ་ཐུག་ཡོད་པ་དང་། དེ་ནས་ཡར་དེད་ན་སྟོན་པ་སངས་རྒྱས་བཅོམ་ལྡན་འདས་ལ་ཐུག་བསྡད་ཡོད་པ་ཅི་བཞིན་དུ། བོད་ཀྱི་སྔགས་པ་སྔགས་མ་ཚོའི་མགོ་ཡང་དེ་ལྟར་གུ་རུ་རིན་པོ་ཆེ་དང་མཁའ་འགྲོ་ཡེ་ཤེས་མཚོ་རྒྱལ་ནས་ཡར་དེད་ན་ཆོས་སྐུ་ཀུན་ཏུ་བཟང་པོ་དང་ཀུན་ཏུ་བཟང་མོ་ཡབ་ཡུམ་གཉིས་ལ་ཐུག་བསྡད་ཡོད་པ་རེད། དེ་ལྟར་བོད་ཀྱི་རབ་བྱུང་ངུར་སྨྲིག་གི་སྡེ་འདི་ལ་ཁུངས་འདེད་རྒྱུ་ཡོད་པ་ཅི་བཞིན་དུ་གོས་དཀར་ལྕང་ལོའི་སྡེ་ལ་ཡང་དེ་བཞིན་དུ་ཁུངས་འདེད་རྒྱུ་ཡོད་པ་རེད། ཁུངས་འདེད་རྒྱུ་ཡོད་པ་ཙམ་ཞིག་མ་ཡིན་པར་ཁུངས་དེ་ཡང་གཙང་མ་གཙང་རྐྱང་ཞིག་འདེད་རྒྱུ་ཡོད་པ་རེད། འདི་ནི་ངས་དེ་རིང་འདི་ནས་བཤད་ན་འདོད་པ་ཞིག་ཡིན། ཁྱེད་རྣམ་པས་ཀྱང་དེི་རིང་ཡར་ངོའི་ཚེས་བཅུའི་དུས་བཟང་འདི་ལ། ཨོ་རྒྱན་སངས་རྒྱས་གཉིས་ཀའི་སྐུ་གསུང་ཐུགས་ཡོན་ཏན་གྱི་བྱིན་རླབས་ཐམས་ཅད་བསྡུས་པའི་གཟུངས་སྔགས་བཛྲ་གུ་རུ་དང་ཚིག་བདུན་གསོལ་འདེབས། དུས་གསུམ་སངས་རྒྱས་དང་བསམ་པ་མྱུར་འགྲུབ། བཀའ་ཐང་རྒྱས་བསྡུས་ལ་སོགས་པ་གསུང་བཞིན། གུ་རུ་རིན་པོ་ཆེ་དེ་རིང་རང་ཉིད་ས་གནས་གང་དུ་ཡོད་པ་དེར་དངོས་སུ་བྱོན་ཡོད་སྙམ་པའི་དད་པ་དག་སྣང་བྱེད་དགོས། ཁྱེད་རང་གི་མཆོད་ཁང་དུ་གུ་རུ་རིན་པོ་ཆེ་དང་མཁའ་འགྲོ་ཡེ་ཤེས་མཚོ་རྒྱལ། རྗེ་འབངས་ཉེར་ལྔ་དང་སྤྲུལ་པའི་གཏེར་སྟོན་དང་མཁའ་འགྲོ་མ་དེ་ཚོའི་སྐུ་བརྙན་བྲིས་འབུར་གང་ཞིག་ཡོད་ཀྱང་། དེ་ལ་དད་པའི་མིག་གིས་ལྟོས། དང་བའི་སེམས་ཀྱིས་གསོལ་བ་ཐོབས། ཁྱེད་རྣམ་པ་དེ་རིང་ངའི་མཆོད་ཁང་འདིར་དངོས་སུ་བཞུགས་ཡོད་སྙམ་པའི་དད་བ་བྱོས་དང་ཁོང་རྣམ་པ་བརྒྱ་ཆའི་བརྒྱ་བཞུགས་བསྡད་ཡོད་པ་རེད། དེའི་རྐྱེན་གྱིས། དད་པ་ཅན་ལ་པད་འབྱུང་སྒོ་ཉལ་ཡོདཿ དད་ལྡན་མི་རེའི་མདུན་ན་པད་འབྱུང་རེ༔ གསུངས་ཡོད་པ་རེད། དེ་ལ་བསམས་ནས་གོང་གི་གསོལ་འདེབས་དེ་ཚོ་དང་། ཨོ་རྒྱན་རིན་པོ་ཆེ་ལ་གསོལ་བ་འདེབས༔ འགལ་རྐྱེན་བར་ཆད་མི་འབྱུང་ཞིང་༔ མཐུན་རྐྱེན་བསམ་པ་འགྲུབ་པ་དང་༔ མཆོག་དང་ཐུན་མོང་དངོས་གྲུབ་སྩོལ༔ ཞེས་པ་ལ་སོགས་པ་གསུང་དགོས་ཀྱི་ཡོད་པ་རེད། གསོལ་བ་འདེབ་པ་དང་མཉམ་དུ་ཚོགས་འཁོར་ཡང་རང་གི་ནུས་ཚོད་རེ་ཕུལ། དམ་ཚིག་ཉམས་ཆག་ལ་བསྐོང་བཤད་འདོན་དགོས། ཚོགས་ཤིག་འབུལ་ན་ཡང་དེ་ལ་སེར་སྣ་མ་ཤོར་བའི་སྒོ་ནས་དེ་ལ་མང་ཉུང་ག་ཚོད་ཅིག་ཡོད་ཀྱང་སྤུས་གཙང་བ་ཞིག་འབུལ་རྒྱུ་གལ་ཆེ། ཚོགས་རྫས་དེ་དག་ཀྱང་དག་པའི་སྣང་བ་སྦྱར་ནས། ཚོགས་རྫས་འདོན་ཡོན་ཡེ་ཤེས་རོལ་བའི་རྒྱན༔ སོགས་ཀྱིས་སྤྱན་འདྲེན་བྱིན་རླབས་ཀྱིས་ཡར་དཀོན་མཆོག་ལ་མཆོད་པ་དང་། རང་ཉིད་ཀྱིས་ཚོགས་རྫས་དེ་དག་ལ་རབ་ཡིན་ན་ཚིམ་པ་དྲུག་ལྡན་གྱི་ལྟ་བས་རོལ་དགོས། དེ་ལྟར་མ་བྱུང་ན་ཡང་ཁུ་སིམ་མེར་ཨོ་རྒྱན་རིན་པོ་ཆེ་ཡབ་ཡུམ་དང་དཔའ་བོ་མཁའ་འགྲོ་བྱེ་བ་འབུམ་ཕྲག་གིས་བྱིན་པའི་བརླབས་པའི་དམ་རྫས་ཡིན་བསམ་སྟེ་བདུད་རྩི་རིལ་བུ་དང་ཚེ་ཆང་ལ་རོལ་བ་ལྟ་བུའི་དད་པ་དག་སྣང་གི་ངང་ནས་ལོངས་སུ་སྤྱོད་དགོས། དེ་ལྟར་དད་པ་དག་སྣང་གི་ངང་ནས་ཟོས་ན་ཚོགས་རྫས་ཟེར་བ་དེ་སྤྱིར་བཏང་གི་ཟ་མ་ལྟ་བུ་ཞིག་གི་རྩ་བ་ཉིད་ནས་མ་ཡིན་པར་བླ་མས་དབང་སྐུར་བའི་སྐབས་ཀྱི་དབང་རྫས་ལྟ་བུ་ཞིག་རེད། དག་པའི་སྣང་བའི་སྒོ་ནས་ཚོགས་རྫས་དེ་ཚོའི་བྲོ་བ་མྱོང་བ་ལ་ཕན་ཡོན་བསམ་གྱིས་མི་ཁྱབ་པ་ཞིག་ཡོད་པ་རེད། དེ་ལ་མྱོང་གྲོལ་དམ་རྫས་ཀྱང་ཟེར་བ་རེད། དེ་ཁྱེད་རྣམ་པ་ཚང་མས་ཐུགས་ལ་འཛིན་རོགས་གནོངས།།།
རི་བོང་གནམ་རྡིབ་ཀྱི་སེངས་འཕྲེང་འཁུར་ནས་རྩོམ་ཡང་དེ་ལྟར་དུ་རང་མ་གཏོགས་མི་འདུག རྙིང་མའི་ཞེན་ཁོག་བྱེད་སྟངས་ལ་བླུན་པོས་བསྟོད་པ་འདྲ་པོ་ཆགས་འདུག ཨོ་རྒྱན་སངས་རྒྱས་གཉིས་པ་བོད་ཀྱི་ནང་བསྟན་ཀུན་ལ་ཕན་པའི་ཐུགས་ཀྱི་དགོངས་པ་བླ་ན་མེད་པ་བསམ་གྱིས་མི་ཁྱབ་པ་དེ་འདྲ་ང་ཚོས་རྟོགས་ག་ལ་ནུས། དགོངས་པ་དེ་ཡག་པོ་མཁྱེན་པ་དགོས་གལ་དང་། བསྟན་པ་དག་ཐེར་དུ་འགྲོ་བ་མ་མཁྱེན་པ་གང་བྱུང་དུ་བརྗོད་ན་སྐྱོན་བརྗོད་དུ་འགྲོ་བའི་རྩ་ལྟུང་འགོས་པ་དང་སྤྱིར་བྱིན་རླབས་ཆེ་ཆུང་དང་ཐར་པ་ཟེར་བ་དེ་ཉམས་ལེན་པར་རག་ལུས་པས་ཐར་པ་རང་ལ་རག་ལས་ཤེས་པར་གྱིས་ཞེས་གསུངས་སོ།