༧གོང་ས་མཆོག་ནས་ཆོས་དཔོན་ཊུ་ཊུ་མཆོག་ལ་འཚམས་འདྲི་མཛད།

དེ་རིང་ཕྱི་ཚེས་ ༡༡ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཡེ་ཤུའི་ཆོས་དཔོན་ཌེ་སི་མུན་ཊུ་ཊུ་(Archbishop Desmund Tutu) མཆོག་ལ་རྒྱལ་སྤྱིའི་འགྲོ་བ་མིའི་ཐོབ་ཐང་གི་གོ་ལའི་རིན་བྲལ་གྱི་གཟེངས་རྟགས་ཐོབ་པར་བརྙན་ལམ་བརྒྱུད་འཚམས་འདྲིའི་གསུང་འཕྲིན་སྩལ་འདུགགསུང་འཕྲིན་དེའི་ནང་༧གོང་ས་རྒྱལ་བ་རིན་པོ་ཆེ་མཆོག་གིས། བློས་ཐུབ་དང་གུས་བཀུར་ངོས་ཀྱི་གྲོགས་པོ་ཡེ་ཤུའི་ཆོས་དཔོན་ཌེ་སི་མུན་ཊུ་ཊུ་ (Archbishop Desmund Tutu) མཆོག་ལ་གཟེངས་རྟགས་དེ་ཐོབ་པར་ཐོག་མར་འཚམས་འདྲི་མཛད་རྗེས། ཡེ་ཤུའི་ཆོས་དཔོན་ཌེ་སི་མུན་ཊུ་ཊུ་མཆོག་གི་རྩེད་མཚར་ཅན་གྱི་རང་གཤིས་ལ་བརྟེན་ནས་ཕན་ཚུན་གྲོགས་མཆོག་ཏུ་གྱུར་སྐོར་དང་། ཁོང་ལ་འགྲོ་བ་མིའི་ཐོབ་ཐང་གི་གོ་ལའི་རིན་བྲལ་གྱི་གཟེངས་རྟགས་ (Human Rights Global Treasure Award) ཐོབ་པ་དང་། ཕྱི་ཟླ་ ༡༠ པའི་ནང་དགུང་གྲངས་ ༩༠ ཕེབས་ཀྱི་ཡོད་པ། འདས་པའི་ལོ་ངོ་ ༩༠ རིང་ཁོང་གིས་འགྲོ་བ་མིའི་རིགས་ལ་ཞབས་འདེགས་སྒྲུབ་རྒྱུའི་ཆོད་སེམས་བརྟན་པོ་བཟུང་སྟེ། ཧུར་ཐག་གནང་པར་བསྔགས་བརྗོད་དང་། མུ་མཐུད་ཞབས་འདེགས་ཞུས་ཏེ་དགུང་གྲངས་ ༡༠༠ བར་སྐུ་འཚོ་བཞུགས་ཡོང་བའི་ཐུགས་སྨོན་ཡོད་པ། དེ་བཞིན་དབུ་འཁྲིད་རྣམ་གཉིས་སྐུ་ན་བགྲེས་རུ་ཕེབས་པར་བརྟེན། ཕན་ཚུན་ལ་འགྲུལ་བཞུད་གནང་རྒྱུར་དཀའ་ཁག་ཡོད་སྟབས་དངོས་སུ་མཇལ་འཕྲད་གནང་ཐུབ་ཀྱི་མེད་ནའང་། ནང་བསམ་བློའི་ཐོག་ནས་ཁ་འབྲལ་ཐབས་མེད་པར་མཉམ་དུ་གནས་ཡོད་སྐོར་གསུངས་འདུག

ཁ་སང་ཕྱི་ཚེས་ ༡༠ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་བསྟུན། (Article3.org) ཚོགས་པས། ཡེ་ཤུའི་ཆོས་དཔོན་ཌེ་སི་མུན་ཊུ་ཊུ་མཆོག་གིས་སྐུ་ཚེ་ཧྲིལ་བོ་ཞི་བདེ་དང་འདྲ་མཉམ། འགྲོ་བ་མིའི་ཐོབ་ཐང་སོགས་ཀྱི་ཐད་བཏང་གནང་བར་ངོས་འཛིན་གནང་ཆེད་རྒྱལ་སྤྱིའི་འགྲོ་བ་མིའི་ཐོབ་ཐང་གི་གོ་ལའི་རིན་བྲལ་གྱི་གཟེངས་རྟགས་དེ་ཕུལ་བ་ཡིན་སྐོར་དང་། ཁོང་ནི་འཛམ་གླིང་གི་བྱམས་བརྩེ་ཆེ་ཤོས་གྲས་ཀྱི་དབུ་ཁྲིད་ཅིག་དང་འགྲོ་བ་མིའི་ཐོབ་ཐང་འཐབ་རྩོད་ཆེད་བློ་སེམས་གཡོ་བ་མེད་པ་ཞིག་ཡིན་སྐོར་བསྒྲགས་ཡོད་པ་རེད།༧གོང་ས་རྒྱལ་བ་རིན་པོ་ཆེ་མཆོག་དང་ཡེ་ཤུའི་ཆོས་དཔོན་ཌེ་སི་མུན་ཊུ་ཊུ་མཆོག་རྣམ་གཉིས་ནི་འཛམ་གླིང་ནང་གྲགས་ཆེ་བའི་ཆོས་ལུགས་ཀྱི་དབུ་ཁྲིད་གཉིས་ཡིན་པ་མ་ཟད། ཁོང་གཉིས་ལ་ནོ་སྦེལ་ཞི་བདེ་གཟེངས་རྟགས་ཕུལ་ཡོད་པ་རེད། ཁོང་རྣམ་གཉིས་ནས་ཕྱི་ལོ་ ༢༠༡༦ ལོར་ (The Book of Joy) ཞེས་པའི་ཕྱག་དེབ་ཅིག་བརྩམས་གནང་སྟེ་ཉེའུ་ཡོག་དུས་བབ་ཀྱི་དཔེ་དེབ་བྲིན་ཤོས་ཀྱི་གྲས་སུ་ཚུད་ཡོད་ལ། ཕྱག་དེབ་དེ་རྩོམ་སྒྲིག་གནང་ཕྱོགས་དང་འབྲེལ་ནས་ཕྱི་ལོ་ ༢༠༡༥ ལོར་ཡེ་ཤུའི་ཆོས་དཔོན་ཌེ་སི་མུན་ཊུ་ཊུ་མཆོག་བཞུགས་སྒར་དྷ་སར་ཕེབས་ཏེ་རྒྱལ་བའི་ཕོ་བྲང་དུ་ཉིན་གྲངས་ ༥ རིང་བཞུགས་ཡོད་པ་རེད།

ཕྱི་ལོ་ ༢༠༡༢ ལོར་ཡེ་ཤུའི་ཆོས་དཔོན་ཌེ་སི་མུན་ཊུ་ཊུ་མཆོག་བཞུགས་སྒར་དྷ་སར་ཕེབས་ཡོད་པ་དང་། ཕྱི་ལོ་ ༢༠༡༥ ལོར་བཞུགས་སྒར་དུ་ཕེབས་སྐབས་ཁོང་གིས། ད་རེབ་ངའི་བརྩེ་བའི་ཆོས་གྲོགས་དང་ལྷན་དུ་མཉམ་འཛོམས་བྱུང་བར་དགའ་ཚོར་ཆེན་པོ་ཞེ་དྲགས་བྱུང་། མི་འགའ་ཤས་ཀྱི་བྱ་སྤྱོད་དང་ཕྱིའི་གནོན་ཤུགས་དབང་གིས་ཆོས་གྲོགས་ངེད་གཉིས་ཁ་བྲལ་གཏོང་ཐབས་བྱེད་བཞིན་ཡོད་ཀྱང་། ངེད་གཉིས་བར་ཕན་ཚུན་བརྩེ་བ་ཟབ་མོ་ཡོད་པ་མ་ཟད། འཛམ་གླིང་ཀུན་ཁྱབ་ལ་མཁོ་བའི་རྒྱུ་རྐྱེན་མང་པོ་ཞིག་གི་དབང་གིས་ད་ལྟ་དང་མ་འོངས་པར་མཇལ་རྒྱུའི་གོ་སྐབས་ཡོང་གི་རེད། ཅེས་གསུངས་ཡོད་པ་རེད།

གསར་འགོད་པ། ཀླུ་མགོན་ཐར།