འདི་ལོར་བོད་ནང་དུ་ནག་སེལ་གཤེད་བཅོ
བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བ།
ཕྱི་ལོ་ ༢༠༡༥ ལོར་ཐོག་མར་ཞི་ཅིན་ཕིང་གིས་ཆོས་ལུགས་རྣམས་རྒྱ་ནག་ཅན་དུ་བསྒྱུར་དགོས་པའི་གཏམ་བཤད་སྤེལ་བ་ནས་བཟུང་། བོད་ཁུལ་དུ་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་རྒྱུའི་སྲིད་བྱུས་དང་ལས་འགུལ་མང་པོ་སྤེལ་ཡོད་ཅིང་། འདི་ལོར་མཚོན་ན་ཕྱི་ཟླ་ ༨ པའི་ནང་པེ་ཅིན་དུ་ཚོགས་པའི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་ཆེན་ཐེངས་ ༧ པ་ཟེར་བའི་ཐོག ཞི་ཅིན་ཕིང་གིས་བོད་བརྒྱུད་ནང་བསྟན་ད་དུང་རྒྱ་ནག་ཅན་དུ་གྱུར་མེད་པ་དེར་ཤུགས་སྣོན་རྒྱག་དགོས་སྐོར་གྱི་གཏམ་བཤད་སྤེལ་ཏེ། བོད་ཁུལ་གང་སར་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་དགོས་པའི་སྐུལ་འདེད་ཀྱི་བྱ་འགུལ་རབ་དང་རིམ་པར་སྤེལ་མུས་ཡིན་པ་དང་། ཕྱི་ཟླ་ ༡༡ ཚེས་ ༡༢ ཉིན་ལྷ་སར་བོད་བརྒྱུད་ནང་བསྟན་དགོངས་འགྲེལ་ལས་དོན་དཔྱད་གླེང་གྲོས་ཚོགས་ཟེར་བ་བསྡུས་ཏེ། བོད་བརྒྱུད་ནང་བསྟན་ཀྲུང་གོ་ཅན་གྱི་ཁ་ཕྱོགས་རྒྱུན་འཁྱོངས་བྱས་ཏེ་དུས་རབས་ཀྱི་འཕེལ་རྒྱས་དང་མཉམ་འདྲེས་ཧུར་ཐག་དགོས་སྐོར་གྱི་གཏམ་བཤད་སྤེལ། ཕྱི་ཟླ་ ༤ པའི་ནང་རྒྱ་ནག་གཞུང་གིས་བོད་ཀྱི་ལྷ་ལྡན་གཙུག་ལག་ཁང་གཙོའི་དགོན་སྡེ་ཁག་གི་འཛུགས་སྐྲུན་བཟོ་བཀོད་དང་ཐ་ན་ཆོས་ལུགས་ཀྱི་ཅ་དངོས་རྣམས་ཀྱང་རྒྱ་ནག་གི་ཁྱད་ཆོས་ཅན་དུ་བསྒྱུར་དགོས་སྐོར་ནན་བརྗོད་བྱས། གཞན་ཡང་། ཕྱི་ཟླ་དང་པོའི་ཚེས་ ༡༡ ཉིན་བོད་རང་སྐྱོང་ལྗོངས་མི་དམངས་འཐུས་ཚོགས་སྐབས་ ༡༡ པའི་ཚོགས་འདུ་གསུམ་པའི་ཚང་འཛོམས་གྲོས་ཚོགས་ཐེངས་ལྔ་པ་ཟེར་བའི་ཐོག བོད་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་སྐྲུན་སྲོལ་ཡིག་ཅེས་པའི་ཁྲིམས་སྒྲིག་གསར་པ་ཞིག་གཏན་འབེབ་བྱས་ཏེ། འདི་ལོའི་ཕྱི་ཟླ་ ༥ ཚེས་ ༡ ཉིན་ནས་དངོས་སུ་ལག་བསྟར་བྱེད་པའི་མགོ་བརྩམས་ཡོད་པ་རེད།
ཆབ་སྲིད་བཙོན་ཟུར་འགའ་འདས་གྲོངས་སུ་ཕྱིན།
འདི་ལོའི་ཕྱི་ཟླ་ ༢ ཚེས་ ༡༧ ཉིན་རྒྱ་ནག་གཞུང་ལ་ཞི་རྒོལ་བྱས་རྐྱེན་ལོ་ངོ་ ༧ ལྷག་བཙོན་འཇུག་མནར་གཅོད་མྱངས་པའི་བོད་ཀྱི་ཆབ་སྲིད་བཙོན་ཟུར་བསམ་གྲུབ་ལགས་ནད་གཞིའི་རྐྱེན་པས་འདས་གྲོངས་སུ་ཕྱིན་ཡོད་པ་དང་། དེ་བཞིན་ཕྱི་ཟླ་ ༣ ཚེས་ ༡༧ ཉིན་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་མ་ཉེས་ཁག་གཡོགས་ཀྱིས་འབར་རྫས་གས་གཏོར་དང་འབྲེལ་ནས་འཛིན་བཟུང་བྱེད་སྐབས། དོན་རྐྱེན་དེ་དང་འབྲེལ་བ་ཡོད་པར་བསྙད་དེ་རྒྱ་ནག་ཉེན་རྟོག་པས་འཛིན་བཟུང་བྱས་པའི་བོད་ཀྱི་ཆབ་སྲིད་བཙོན་ཟུར་བཀྲ་ཤིས་ཕུན་ཚོགས་ལགས་ཡུན་རིང་ནད་ཀྱིས་མནར་རྗེས། ཁོང་གི་ཕ་ཡུལ་བོད་ལི་ཐང་དུ་འདས་གྲོངས་སུ་ཕྱིན། གཞན་ཡང་ཕྱི་ཟླ་ ༤ ཚེས་ ༡༨ ཉིན་རྒྱ་ནག་གི་ཉེན་རྟོག་པས་ཟླ་བ་ ༣ རིང་འཛིན་བཟུང་བཀག་ཉར་འོག་སྡུག་སྦྱོར་མནར་གཅོད་མྱངས་པའི་ཆབ་སྲིད་བཙོན་ཟུར་རོང་པོ་རབ་བརྟན་དགོན་པའི་གྲྭ་དགེ་འདུན་ཤེས་རབ་ལགས་དང་། ཕྱི་ཟླ་ ༤ ཚེས་ ༢༦ ཉིན་ལོ་ངོ་ ༨ རིང་བཙོན་འཇུག་མནར་གཅོད་མྱངས་པའི་བོད་ཀྱི་ཆབ་སྲིད་བཙོན་ཟུར་ཚེ་རིང་བག་གྲོ་ལགས་མལ་གྲོ་གུང་དཀར་རྫོང་གི་རང་ཁྱིམ་ནས་འདས་གྲོངས་སུ་ཕྱིན། ཕྱི་ཟླ་ ༥ ཚེས་ ༧ ཉིན་རྒྱལ་ཁབ་ཁ་བྲལ་གྱི་ཉེས་མིང་འོག་ལོ་ ༤ བཙོན་འཇུག་ཁྲིམས་ཆད་མྱངས་པའི་བོད་གསེར་རྟ་རྫོང་སྙི་སྟོད་ཡུལ་ཚོ་ཕུ་གུ་དགོན་གྱི་དགེ་འདུན་པ་ཆོས་ཀྱིས་ལགས་ཡུན་རིང་ནད་མནར་གྱི་རྐྱེན་པས་འདས་གྲོངས་སུ་ཕྱིན་ཡོད་པ་རེད།
སློབ་གསོ་བ་ཆེན་མོ་རྡོ་དགོན་གསང་བདག་རྡོ་རྗེ་སྐུ་གྲོངས།
ཕྱི་ཟླ་ ༩ ཚེས་ ༢༡ ཉིན་དེ་སྔ་བོད་གཞུང་དགའ་ལྡན་ཕོ་བྲང་གི་རྩིས་ཁང་དུ་ཕྱག་ལས་གནང་མྱོང་ཞིང་། ཕྱིས་སུ་བོད་ནང་གི་སློབ་གསོའི་བྱ་བཞག་ཐོག་མཛད་རྗེས་ཆེན་པོ་བཞག་ཡོད་པའི་བོད་ལྗོངས་སློབ་གྲྭ་ཆེན་མོའི་དགེ་རྒན་ཆེན་མོ་དང་། བོད་ཀྱི་ཡིག་མཁན་ཆེན་མོ་རྡོ་དགོན་གསང་བདག་རྡོ་རྗེ་ལགས་དགུང་གྲངས་ ༧༥ སྟེང་སྐུ་གྲོངས་ཡོད་འདུག རྡོ་དགོན་གསང་བདག་རྡོ་རྗེ་ལགས་ནི་ཕྱི་ལོ་ ༡༩༤༥ ལོར་ལྷ་ས་གྲོང་ཁྱེར་སྙེ་མོ་རྫོང་ཁོངས་སུ་སྐུ་འཁྲུངས་ཤིང་། འདས་པའི་ལོ་ངོ་ ༥༠ ཙམ་གྱི་རིང་བོད་ཀྱི་སློབ་གསོའི་བྱ་གཞག་ནང་ཞུགས་ཏེ། ད་བར་སྙན་ངག་གི་སློབ་དེབ་《མིག་ཡིད་རྣ་བའི་དགའ་སྟོན》དང་།《བོད་ཀྱི་སྤྱི་སྐད་སློབ་དེབ》 བོད་རྒྱ་དབྱིན་གསུམ་ཤན་སྦྱར་གྱི《ཞེ་སའི་ལག་དེབ་བློ་གསར་དགའ་སྟོན》 《བོད་ཀྱི་ཡུལ་སྲོལ་རྣམ་བཤད》བཅས་དང་། 《བྱིས་སྒྲུང་གྲགས་ཅན་ལྔ》ཞེས་པའི་བསྒྱུར་རྩོམ་གནང་ཡོད་ལ། ཁོང་གི་ཉེ་བའི་བརྩམས་ཆོས་གསར་ཤོས་ནི་《མཛའ་བཅུགས་ཀྱི་མི་ཚེ་》ཞེས་པ་དེ་ཡིན་འདུག ཁོང་གིས་ཕྱི་ལོ་ ༢༠༠༠ ལོར་བོད་ལྗོངས་སློབ་གྲྭ་ཆེན་མོའི་རིག་གཞུང་སློབ་གླིང་གི་དགེ་རྒན་ཆེན་མོ་དང་། ཕྱི་ལོ་ ༢༠༠༦ ལོར་རྒྱལ་ཁབ་དང་ཞིང་ཆེན་རིམ་པའི་གྲགས་ཅན་དགེ་རྒན། ད་དུང་བོད་ལྗོངས་རིག་རྩལ་ལྷན་ཚོགས་ཀྱི་གདན་ཞུས་ཞིབ་འཇུག་པ་བཅས་ཀྱི་མཚན་གནས་བཞེས་ཡོད་པ་རེད།
བོད་རིགས་ལུས་རྩལ་བ་འགར་རྒྱལ་ཡོངས་རྟགས་མ་ཐོབ།
འདས་པའི་ལོ་ཤས་ནང་རྒྱ་ནག་རྒྱལ་ཡོངས་ཀྱི་གླུ་གཞས་དང་རིག་རྩལ་འགྲན་སྡུར་མང་པོའི་ཁྲོད་བོད་རིགས་གཞོན་སྐྱེས་ཚོས་གསེར་དངུལ་གྱི་རྟགས་མ་གང་མང་བླངས་ཡོད་པ་ལྟར། འདི་ལོའི་ཕྱི་ཟླ་ ༩ ཚེས་ ༢༠ ཉིན་རྒྱ་ནག་རྒྱལ་ཡོངས་ཀྱི་སྐྱེས་པའི་སྤྱི་ལེ་ ༥༠ ཡི་རྟིང་རྩོད་འགྲན་བསྡུར་ཁྲོད། བོད་མཚོ་སྔོན་ཞིང་ཆེན་རྐང་ཚ་ནས་ཡིན་པའི་བོད་རིགས་རྒྱུག་རྩལ་བ་བཀྲ་ཤིས་གཡང་འབུམ་ལགས་ཀྱིས་རྒྱལ་ཡོངས་ཀྱི་ཨང་དང་པོ་བླངས་ཡོད་པ་དང་། དེ་བཞིན་བུད་མེད་ཀྱི་སྤྱི་ལེ་ ༡༠ ཡི་འདུར་རྒྱུག་འགྲན་སྡུར་ཁྲོད། མཚོ་སྔོན་གྱི་འགྲན་ཞུགས་པ་ཉིག་སྒྲོལ་མ་གཡང་སྐྱིད་ཨང་དང་པོ་དང་། ཤེས་རབ་མཚོ་ལ་ཨང་གཉིས་པ་ཐོབ། གཞན་ཡང་། སྐྱེས་པའི་སྨི་ ༡༠༠༠༠ གི་རྒྱང་རྒྱུག་འགྲན་སྡུར་ཁྲོད་བོད་དབུས་གཙང་ཕྱོགས་ནས་ཡིན་པའི་རྒྱང་རྒྱུག་པ་སྟོབས་རྒྱལ་ལགས་ཀྱིས་རྒྱ་ནག་རྒྱལ་ཡོངས་ཀྱི་ཨང་གསུམ་པ་བླངས་ཡོད་འདུག
རྒྱ་བསྒྱུར་སློབ་གསོས་ཟིང་ཆ་བསླངས་བ།
འདི་ལོའི་བོད་རྔ་བ་ཁུལ་གྱི་སློབ་མགོ་གསར་པ་ཚུགས་པ་དང་བསྟུན། སློབ་གྲྭ་ཆུང་འབྲིང་ཁག་ནང་སློབ་འཁྲིད་ཐབས་ལམ་གཉིས་པ་ཞེས་པའི་མིང་འོག་ནས་རྒྱའི་སྐད་ཡིག་གཙོ་གཉེར་གྱི་རྒྱ་བསྒྱུར་སྲིད་ཇུས་ལག་བསྟར་བྱ་འཆར་ཡོད་པའི་གནས་ཚུལ་ཐོན་པར་བརྟེན། རྔ་བ་ཁུལ་གཙོ་བོར་གྱུར་བའི་བོད་ཁུལ་གྱི་དགེ་རྒན་དང་རྩོམ་པ་པོ། མི་མང་འཐུས་མི་སོགས་ཀྱིས་ཡིག་ངག་གཉིས་ཀྱི་ལམ་ནས་སྲིད་ཇུས་དེས་བོད་ཀྱི་སྐད་ཡིག་རིག་གཞུང་མི་རིགས་དང་བཅས་པ་རྩ་བརླག་ཏུ་གཏོང་ཉེན་ཆེ་བའི་བསམ་འཆར་ཤུགས་ཆེན་བཏོན་ཡོད་པ་དང་། སྐབས་དེར་རྒྱ་ནག་གཞུང་གིས་བསམ་ཚུལ་རིགས་ཐད་ཀར་མགོ་འཁྲིད་ལ་ཞུ་རྒྱུ་ལས་དྲ་ལམ་ཁག་ཏུ་བརྒྱུད་སྤེལ་མི་ཆོག་པའི་བཙན་བཀའ་བཏང་། དེ་བཞིན་ལོ་འདིའི་སློབ་མགོ་ཚུགས་པ་དང་བསྟུན་བོད་གཙང་ཁུལ་གྱི་སློབ་གྲྭ་ཆུང་འབྲིང་ནང་ཨང་རྩིས་དང་དངོས་ཁམས་སོགས་རྒྱ་ཡིག་ནང་སློབ་འཁྲིད་བྱེད་མགོ་བརྩམས་ཡོད་འདུག ཕྱི་ལོ་ ༢༠༡༠ ལོར་མཚོ་སྔོན་ཞིང་ཆེན་སྲིད་གཞུང་གིས་རྒྱ་བསྒྱུར་སློབ་གསོའི་སྲིད་ཇུས་ལག་བསྟར་གྱི་ཡིག་ཆ་བསྒྲགས་རྗེས། སློབ་གྲྭ་ཆེ་འབྲིང་ཆུང་གསུམ་གྱི་དགེ་སློབ་སྟོང་ཕྲག་མང་པོས། མི་རིགས་འདྲ་མཉམ་དང་། སྐད་རིག་རང་དབང་། ཞེས་པའི་འབོད་ཚིག་འོག་ངོ་རྒོལ་ཤུགས་ཆེན་བྱས་རྐྱེན་སྲིད་ཇུས་ཇི་བཞིན་ལག་བསྟར་ཐུབ་མེད་ཀྱང་། ཕྱི་ལོ་ ༢༠༡༡ ལོའི་སློབ་མགོ་ཚུགས་པ་དང་བསྟུན་ས་ཁུལ་ཁག་ཅིག་ནང་སྲིད་ཇུས་དེ་དངོས་སུ་ལག་བསྟར་བྱེད་པའི་མགོ་བརྩམས་ཡོད་འདུག
བོད་ནང་ངལ་རྩོལ་ར་བ་བཙུགས།
ཕྱི་ཟླ་ ༡༠ ཚེས་ ༡ ཉིན་ནས་བཟུང་རྒྱ་ནག་གཞུང་གིས་མཉམ་ལས་ཀྱི་མིང་ཐོག་ནས་མཚོ་སྔོན་ཞིང་ཆེན་མགོ་ལོག་ཁུལ་དང་ཡུལ་ཤུལ་ཁུལ་དུ་ཞིང་འབྲོག་མི་མང་ལས་མི་ ༧༠༩༢༠ ལྷག་བཙན་གྱིས་བསྡུས་ཏེ་ངལ་རྩོལ་བྱེད་དུ་བཅུག་ཡོད་ཅིང་། སྐྱེ་རྒུ་མདོ་ཁྲི་འདུ་རྫོང་སྡོམ་མདའ་ཡུལ་ཚོ་ནས་སྤྱི་ལེ་ ༢༥ ཡས་མས་ཀྱི་མཚམས་སུ་ཡོད་པའི་རྫ་དམར་ཞེས་པར་ངལ་རྩོལ་ར་བ་གཅིག་དང་། མགོ་ལོག་ཁུལ་རྨ་སྟོད་རྫོང་མཚོ་སྐྱ་རིང་གི་མཚོ་མགོ་ནས་སྤྱི་ལེ་ ༡༨ མཚམས་སུ་ཡོད་པའི་རྡོ་ཁ་ཟེར་བའི་ས་གནས་སུ་ངལ་རྩོལ་བ་ར་བ་གཞན་ཞིག་བཅས་ངལ་རྩོལ་ར་བ་གཉིས་ཆེད་འཛུགས་བྱས་ཡོད་པ་དང་། ངལ་རྩོལ་ར་བ་དེ་གཉིས་ནང་གདན་འཐག་པ་དང་། སྔོ་ཚལ་འདེབས་ལས། གཞུང་ལམ་འཛུགས་སྐྲུན་སོགས་སྡེ་ཚན་སོ་སོར་ཆ་བགོས་བྱས་ཡོད་པ་དང་། ངལ་རྩོལ་ནང་ཞུགས་པའི་སྐྱེད་མ་གཅིག་ལ་ཟླ་རེར་རྒྱ་སྒོར་ ༩༠༠ དང་སྐྱེས་པར་རྒྱ་སྒོར་ ༡༢༠༠ མ་གཏོགས་སྤྲོད་ཀྱི་མེད་པ་རེད་འདུག འདི་ལོའི་ཕྱི་ཟླ་ ༩ པའི་ནང་འཇར་མན་གྱི་མི་རིགས་རིག་པ་བ་དང་ཤིན་ཅང་གི་གནད་དོན་དབྱེ་ཞིབ་པ་སྐུ་ཞབས་ཨེ་ཌི་རེན་རྫན་ (Adrian Zenz) ལགས་ཀྱིས་དེའི་སྐོར་ལ་ཞིབ་འཇུག་སྙན་ཐོ་ཞིག་བཏོན་ཏེ། རྒྱ་ནག་གཞུང་གིས་ཞི་ཅིན་ཕིན་གྱི་དབུལ་གྲོལ་དགག་སྒྲོལ་གྱི་སྲིད་ཇུས་ཟེར་བའི་འོག བོད་ནང་བཙན་བཀོལ་ངལ་རྩོལ་ར་བ་ཆེད་འཛུགས་ཀྱིས་འདི་ལོའི་ལོ་མགོ་ནས་ཕྱི་ཟླ་ ༧ པ་བར་ཁྱོན་བོད་མི་འབུམ་ ༥ ལྷག་ངལ་རྩོལ་ར་བར་བཅུག་ཡོད་པའི་གནས་ཚུལ་བསྒྲགས་ཡོད་ཅིང་། སྙན་ཐོ་དེ་དང་བསྟུན་རྒྱ་ནག་དང་འབྲེལ་བའི་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པས་རྒྱ་ནག་གཞུང་ལ་སྐྱོན་བརྗོད་ཀྱི་བསྒྲགས་གཏམ་སྤེལ་ཡོད་པ་རེད།
ཡར་ཀླུང་གཙང་པོའི་གློག་ཁང་འཛུགས་སྐྲུན།
འདི་ལོའི་ཕྱི་ཟླ་ ༡༠ པའི་ནང་རྒྱ་ནག་གཞུང་གིས་ཕྱི་ལོ་ ༢༠༢༡ ནས་ ༢༠༢༥ བར་གྱི་ལྔ་ཚན་ ༡༤ པའི་ལས་གཞིའི་འོག རྒྱ་གར་གྱི་བྱང་ཤར་མངའ་སྡེ་ཨ་རུ་ན་ཅལ་ལ་ཉེ་འབྲེལ་ཡིན་པའི་མེ་ཏོག་རྫོང་ཁོངས་སུ་ཁེལ་བའི་ཡར་ཀླུང་གཙང་པོའི་རྒྱུད་དུ། ཕྱི་ལོ་ ༢༠༢༡ ལོའི་ལོ་མགོ་ནས་གཞི་རྒྱ་ཆེ་བའི་ཆུ་མཛོད་འཛུགས་སྐྲུན་གྱི་ལས་གཞི་ཞིག་མགོ་བརྩམ་རྒྱུ་ཡིན་སྟབས། ཆུ་མཛོད་དེས་ཡར་ཀླུང་གཙང་པོའི་སྨད་རྒྱུད་དུ་ཆགས་པའི་རྒྱ་གར་དང་བྷང་གྷ་ལའི་མི་མང་ལ་འཐུང་ཆུ་དང་ཡུར་ཆུ་སོགས་ཀྱིས་བློ་འཚབ་དང་གླེང་གཞི་གསར་པ་བཟོས་ཡོད་པ་རེད། འདས་པའི་ལོ་ངོ་ ༡༠ ལྷག་རིང་རྒྱ་ནག་གཞུང་གིས་ས་ཁུལ་དེའི་སྤྱི་ལེ་ ༢༤ ཙམ་གྱི་ནང་ཆུ་མཛོད་གསུམ་གསར་རྒྱག་བྱས་ཡོད་འདུག
བཙོན་ཁང་དུ་བཅུག་པའི་བོད་མི།
འདི་ལོའི་ཕྱི་ཟླ་ ༡ ཚེས་ ༧ ཉིན་རྒྱ་ནག་གཞུང་གིས་བོད་ནག་ཆུ་སོག་རྫོང་ནས་ཆོས་ཀྱི་བྱེད་སྒོ་སྤེལ་ནས་མི་མང་ལ་མགོ་སྐོར་བསླུ་བྲིད་དང་མང་ཚོགས་ལ་མངོན་ལྐོག་གཉིས་ནས་རྨོངས་དད་ཀྱི་བསམ་བློ་དྲིལ་སྒྲོག་བྱས་པའི་ཉེས་འཛུགས་འོག བོད་མི་ ༡༢ ལ་ལོ་གཅིག་ནས་ཟླ་ ༩ ཡན་གྱི་བཙོན་འཇུག་ཁྲིམས་ཐག་བཅད། དེ་བཞིན་འདི་ལོའི་ཕྱི་ཟླ་ ༧ པའི་ཚེས་མགོར་༧གོང་ས་མཆོག་ལ་ཆེ་བསྟོད་གླུ་ཚིག་འབྲི་གྱེར་བྱས་ཏེ། རྒྱལ་ཁབ་མགོ་རྟིང་སློག་ཐབས་བྱས་པའི་ཉེས་མིང་འོག་བོད་མི་མཁའ་འགྲོ་ཚེ་བརྟན་ལ་ལོ་ ༧ དང་། གླུ་བ་ཚེ་རྒོ་ལ་ལོ་ ༣ གྱི་བཙོན་འཇུག་ཁྲིམས་ཐག་བཅད། གཞན་ཡང་། འདི་ལོའི་ཕྱི་ཟླ་ ༦ པ་ནས་བཟུང་བོད་དཀར་མཛེས་ཁུལ་གྱི་བོད་མི་ ༩ ལ་རྒྱལ་ཁབ་ཁ་བྲལ་གྱི་སྐུལ་སློང་བྱས་པའི་ཉེས་མིང་འོག་ཁྲིམས་ཐག་བཅད་ཡོད་ཀྱང་། ཁྲིམས་ཆད་ལོ་ག་ཚོད་བཅད་ཡོད་མེད་སོགས་ཁ་གསལ་བྱུང་མེད། དེ་བཞིན་འདི་ལོའི་ཕྱི་ཟླ་ ༦ ཚེས་ ༢༨ ཉིན་བོད་ཀན་ལྷོ་བསང་ཆུ་རྫོང་མི་དམངས་ཁྲིམས་ཁང་ཟེར་བས་རྒྱ་ནག་གི་རོགས་སྐྱོར་འཛུགས་སྐྲུན་ལས་གཞི་འགོག་ཐབས་བྱས་པ་དང་། མི་མང་དཔུང་སྡེབ་ཀྱིས་ཟིང་ཆ་སློང་བ་སོགས་ཀྱི་ནག་ཉེས་བཙུགས་ཏེ། གནམ་ལྷ་དགོན་པའི་དགེ་འདུན་པ་བཀྲ་ཤིས་རྒྱ་མཚོ་ལ་ལོ་ ༡༤ དང་དངུལ་ཆད་རྒྱ་སྒོར་ཁྲི་༧། སྙིང་ལྕགས་དང་རྒྱལ་ལོ། བསོད་ནམས་རྒྱལ་དང་སྟག་ཐར་རྒྱལ་བཅས་ལ་མི་ལོ་ ༡༠ རེ་ཡི་བཙོན་འཇུག་དང་དངུལ་ཆད་རྒྱ་སྒོར་ཁྲི་ ༥ རེ། གཞན་བསྟན་པ་རྒྱ་མཚོ་དང་རྟ་མགྲིན་རྡོ་རྗེ། རྟ་མགྲིན་ཚེ་རིང་དང་གཅོད་པ་ཚེ་རིང་བཅས་ལ་མི་ལོ་ ༩ དང་དངུལ་ཆད་རྒྱ་སྒོར་ཁྲི་ ༥ རེ། དེ་བཞིན་ཚེ་དབང་ཞེས་པ་ལ་མི་ལོ་ ༩ དང་ཕྱེད་ཀའི་རིང་བཙོན་འཇུག་དང་རྒྱ་སྒོར་ཁྲི་ ༥ བཅས་ཁྱོན་བོད་མི་ ༡༠ ལ་ཁྲིམས་ཐག་བཅད་ཡོད་པ་རེད། གཞན་ཡང་འདི་ལོའི་ཕྱི་ཟླ་ ༦ པའི་ནང་བོད་འབྲི་རུ་རྫོང་ནས་ཡིན་པའི་གླུ་བ་ལྷུན་གྲུབ་ལགས་ཀྱིས་ཞྭ་མོ་ནག་པོ་ཞེས་པའི་གླུ་གཞས་བླངས་པའི་རྒྱུ་མཚན་གྱིས་ལོ་ ༦ གི་བཙོན་འཇུག་ཁྲིམས་ཐད་བཅད། ཡང་ཕྱི་ཟླ་ ༡༢ ཚེས་ ༡༤ ཉིན་བོད་མི་ལྷུན་གྲུབ་རྡོ་རྗེ་ཡིས་༧གོང་ས་མཆོག་གི་སྐུ་པར་དང་བོད་དོན་གྱི་པར་རིས་བརྒྱུད་སྤེལ་བྱས་པར་རྒྱལ་ཁབ་ཁ་བྲལ་གཏོང་ཐབས་བྱས་པའི་ཉེས་མིང་གཡོགས་ཏེ། འོག་ལོ་ ༡ གི་བཙོན་འཇུག་ཁྲིམས་ཐག་བཅད་ཡོད་པ་རེད། ཕྱི་ཟླ་ ༡༢ ཚེས་ ༢༩ ཉིན་རྒྱ་གཞུང་གིས་བསྒྲགས་པ་ལྟར་ན། འདས་ལོའི་ཕྱི་ཟླ་ ༩ ཚེས་ ༢༥ ཉིན་ལྷ་ས་གྲོང་ཁྱེར་མི་མང་ཁྲིམས་ཁང་ནས་བོད་མི་ཚུད་པའི་མི་ ༦ ལ་བརྐུ་འཕྲོག་དང་བསྙད་བརྐོ་ཟིང་སློང་སོགས་ཀྱི་ཉེས་མིང་འོག་ལོ་ ༢ ནས་ ༡༧ བར་གྱི་བཙོན་འཇུག་ཁྲིམས་ཆད་དང་དངུལ་ཆད་བཅད་ཡོད་འདུག
འཛིན་བཟུང་བཀག་ཉར་བྱས་པའི་བོད་མི།
ཕྱི་ལོ་ ༢༠༢༠ ལོར་ཡང་རྒྱ་ནག་གཞུང་གིས་བོད་ཁུལ་དུ་ཉེས་མིང་སྣ་ཚོགས་ཀྱི་ཐོག་ནས་བོད་མི་མང་པོ་འཛིན་བཟུང་བཀག་ཉར་བྱས་འདུག དེ་ཡང་ཕྱི་ཟླ་ ༢ ཚེས་ ༡༣ ཡས་མས་ལ་ཁྱུང་མཆུ་རྫོང་སྦྲ་ཆེན་གྱི་བོད་མི་ཚེ་མིང་ཅན་ཞིག་གིས་སྦྲ་ཆེན་ཡུལ་ཚོའི་རི་རྒན་ན་གཞོང་ལ་མེ་སྐྱོན་བཏང་བའི་དོགས་གཞིའི་འོག་འཛིན་བཟུང་བཀག་སྐྱིལ་བྱས་རྗེས། དངུལ་ཆད་བཅད་དེ་ཀློད་གྲོལ་བཏང་། ཕྱི་ཟླ་ ༢ ཚེས་ ༢༠ ཉིན་བོད་དིང་རི་རྫོང་བཀྲ་ཤིས་འཛོམས་ཡུལ་ཚོའི་དཔེ་ལེབ་གྲོང་སྡེ་ནས་ཡིན་པའི་ཚེ་རིང་རྡོ་རྗེ་འཛིན་བཟུང་བྱས་རྗེས་གནས་ཚུལ་གང་ཡང་གོ་ཐོས་མེད་པར་གྱུར། ཕྱི་ཟླ་ ༦ པའི་ནང་བོད་འབྲི་རུ་ཆགས་རྩེ་ནས་ཡིན་པའི་བུད་མེད་ལྷ་མོ་དང་། བསྟན་འཛིན་ཐར་པ་གཉིས་འཛིན་བཟུང་བཙན་འཁྲིད་བྱས་ཏེ། ལྷ་མོ་ལགས་བཀག་ཉར་འོག་འདས་གྲོངས་སུ་ཕྱིན། ཕྱི་ཟླ་ ༨ ཚེས་ ༡༧ ཉིན་གསེར་ཆེན་རྫོང་གི་སྐྱེས་ཕོ་མོ་གཉིས་འཛིན་བཟུང་བྱས་ཏེ་ཉིན་གྲངས་ ༡༣ རིང་བཀག་ཉར་བྱས་རྗེས་ཀློད་འདུག དེ་བཞིན་ཕྱི་ཟླ་ ༦ པའི་ནང་མཚོ་ལྷོ་ཁུལ་མང་ར་རྫོང་མགོ་མང་གྲོང་རྡལ་འབྲོག་རུ་སྡེ་བའི་བོད་རིགས་མཐོ་རིམ་སློབ་མ་ཀུན་བཟང་རྒྱལ་མཚན་རྒྱལ་ས་ལྷ་ས་ནས་འཛིན་བཟུང་བྱས་ཏེ་ད་རུང་ཀློད་མི་འདུག་ཀྱང་། ཁོང་གི་ཁྱིམ་མི་ཉེ་འབྲེལ་ཚོས་ཁོང་བཀག་ཉར་ཁང་གང་ཞིག་ཏུ་ཡོད་མེད་ཙམ་ཡང་ཤེས་རྟོགས་མ་ཐུབ་པར་ལྷག་འདུག འཛིན་བཟུང་བྱས་རྗེས་གནས་ཚུལ་ཅི་བྱུང་གོ་ཐོས་མེད་པའི་བོད་མི་ཁག་ཅིག་ནི། ཕྱི་ཟླ་ ༨ ཚེས་ ༢༡ ཉིན་སྐྱེ་རྒུ་མདོ་འཁྲི་འདུ་རྫོང་ཐོག་ནས་འཛིན་བཟུང་བྱས་པའི་བོད་མི་རྡོ་སྐྱབས་དང་རྒྱལ་མཚན། ཕྱི་ཟླ་ ༡༠ ཚེས་ ༡༢ ཉིན་འཛིན་བཟུང་བྱས་པའི་སྐྱེ་རྒུ་མདོ་སྡམ་འདའ་ཡུལ་ཚོའི་བོད་མི་རྡོ་སྐྱབས་དང་གུ་རུ་གྲགས་པ། གཞན་ཕྱི་ཟླ་ ༡༢ པའི་ནང་འཛིན་བཟུང་བྱས་པའི་རྩོམ་པ་པོ་དང་སྙན་ངག་པ་གྲགས་ཅན་རོང་བོ་དགེ་འདུན་ལྷུན་གྲུབ་ལགས། ཕྱི་ལོ་ ༢༠༡༩ ཟླ་ ༨ ཚེས་ ༡ ཉིན་འཛིན་བཟུང་བྱས་པའི་རྔ་བ་རྫོང་ཁཱ་ཤུལ་སྡེ་བ་ནས་ཡིན་པའི་གྲྭ་རིན་ཆེན་ཚུལ་ཁྲིམས་ལགས་བཅས་རེད་འདུག
བོད་དུ་ཁྱབ་པའི་ཏོག་དབྱིབས་གཉན་རིམས།
རྒྱ་ནག་ཝུ་ཧན་ནས་ཏོག་དབྱིབས་གཉན་རིམས་འགོས་ཁྱབ་སོང་ནས་ཟླ་གཅིག་མ་ཟིན་ཙམ་ཕྱིན་རྗེས། རྒྱ་ནག་ནས་བོད་ཁུལ་དུ་ཤར་སྐྱོད་ཀྱི་གནམ་གྲུ་དང་མེ་འཁོར་བཀག་སྡོམ་བྱེད་པའི་མགོ་བཙུགས་ཡོད་ཀྱང་། ཕྱི་ཟླ་ ༡ ཚེས་ ༢༤ ཉིན་ཝུ་ཧན་ནས་ཡིན་པའི་རྒྱ་རིགས་སྐྱེས་པ་ཞིག་བོད་རང་སྐྱོང་ལྗོངས་ཟེར་བའི་ནང་བསླེབས་ཏེ་ཏོག་དབྱིབས་ནད་རྟགས་ཐོན་པ་དང་། བོད་རྟའུ་རྫོང་ནས་བོད་མི་མང་པོར་ཏོག་དབྱིབས་ནད་རྟགས་ཐོན་པའི་གནས་ཚུལ་བྱུང་བར་བརྟེན། བོད་ཕྱི་ནང་གི་བོད་མི་མང་པོར་བློ་འཚབ་ཆེན་པོ་བྱུང་ཡོད་པ་རེད། བོད་ཀྱི་སྲིད་བྱུས་ཉམས་ཞིབ་ཁང་གི་གནས་ཚུལ་ལྟར་ན། ཕྱི་ཟླ་ ༢ པའི་ནང་རྟའ་རྫོང་ནས་ནད་པ་ ༧༣ དང་། འདབ་པ་རྫོང་ནས་མི་ ༡། གསེར་རྟ་ནས་མི་ ༢། དར་རྩེ་མདོ་ནས་ནད་པ་ ༢ བཅས་ཁྱོན་དཀར་མཛེས་བོད་རིགས་རང་སྐྱོང་ཁུལ་གཅིག་པུ་ནས་ནད་པ་ ༧༨ ཐོན་པ་དང་། དེ་བཞིན་མཚོ་བྱང་བོད་རིགས་རང་སྐྱོང་ཁུལ་ནས་ནད་པ་ ༣ དང་། ཀན་ལྷོ་བོད་རིགས་རང་སྐྱོང་ཁུལ་གཙོད་གྲོང་ཁྱེར་ནས་ནད་པ་ ༨ བཅས་ཁྱོན་བོད་ཁུལ་ནས་ཁྱོན་ཏོག་དབྱིབས་ནད་པ་ ༨༠ ཐོན་པའི་ཁྲོད་ནས་གཉིས་མ་གཏོགས་གཞན་རྣམས་བོད་པ་ཡིན་འདུག ཡང་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གྲངས་ཐོ་ལྟར་ན། ད་བར་བོད་ནང་བོད་མི་ ༦༨ ལ་ཏོག་དབྱིབས་གཉན་རིམས་འགོས་ཡོད་པ་དང་། རྒྱ་ནག་གི་དབུས་སའི་གཞུང་གིས་ཏོག་དབྱིབས་གཉན་རིམས་དང་འབྲེལ་བའི་གནས་ཚུལ་བརྒྱུད་སྤེལ་བྱེད་པར་བཀག་སྡོམ་ཤུགས་ཆེན་བྱས་ཡོད་པ་ལྟར། དཀར་མཛེས་ཁུལ་དྲ་རྒྱའི་བདེ་འཇགས་ཉེན་རྟོག་པས་ཕྱི་ཟླ་དང་པོའི་ནང་དཀྲོག་གཏམ་སྤེལ་བའི་དོགས་གཞིའི་འོག་བོད་མི་ ༢༤ ལ་བཀག་ཉར་དང་ཉེན་བརྡ་བཏང་ཡོད་འདུག
གསར་འགྱུར་ཕྱོགས་སྒྲིག་པ་པ་སངས་ཚེ་རིང་།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
