རྩོམ་པ་པོ། ཨ་མའི་བུ་བསྟན་འཛིན་ཚེ་རིང་།
ལྷུང་ལྷུང་དུ་རྒྱུག་པའི་དབྱར་གྱི་ཆུ་མོ་བཞིན་ཁ་སང་ཉིས་སྟོང་ཉི་ཤུ་ཞེས་པའི་ལོ་ནག་འདི་ཡང་མཚམས་སྤྲིན་སྟུག་པོ་དང་ལྷན་དུ་ཤར་ཤར་དུ་བཞུད་སོང་བས། ཕེབས་བསུའི་རྟེན་འབྲེལ་དང་འཛུམ་དམུལ་དམུལ་ངང་རེ་སྒུག་གིས་ཁེངས་པའི་ལོ་གསར་ཞིག་གི་སྐྱ་རེངས་ཀྱི་ཉི་འོད་ཅིག་ཀྱང་གངས་རིའི་ལ་རྩེར་འོད་ཆེམ་ཆེམ་དུ་ཤར་སོང་། དེ་ཡང་ཁོ་བོས་དེ་རིང་སྔ་ཞོགས་དགའ་སྐྱོ་ཟུང་སྦྲེལ་གྱི་ཚོར་བ་ཞིག་སྐྱེས་ཏེ་སྲིད་སྤྱིའི་འོས་བསྡུ་ཆེན་མོའི་ནང་དུ་མཉམ་ཞུགས་བྱས་ཏེ་འོས་ཤོག་འཕངས་ཟིན། མུན་ནག་ནང་ལག་སྙོབ་བྱས་མེད་ལ། བླུན་པོ་ཆུ་སྣེ་གར་ཁྲིད་ལྟར་དེ་བས་ཕྱིན་མེད། དྲང་པོའི་གཞུང་ལམ་དུ་གོམ་པ་སྤོས་ཤིང་། རང་ཉིད་ཀྱི་ཀླད་པ་རང་ཉིད་ཀྱིས་བཀོལ་སྤྱོད་བྱས་ཤིང་། ཀླད་པས་དཔྱོད་ཤེས་དང་ཞིབ་འཇུག་ནན་པོ་བྱས་ཏེ་རང་གི་ལག་པས་འོས་ཤོག་འཕངས་པ་ཡིན།
འོས་ཤོག་འཕངས་ཚར་རྗེས་ས་འོག་ལྕགས་ལམ་སྟེང་མེ་འཁོར་གྱི་དུང་སྒྲ་འུར་འུར་སྒྲོག་བཞིན་རང་ཁྱིམ་དུ་ཕྱིར་ལོག་བྱེད་དུས་ཁོ་བོའི་སེམས་ནང་དུ་དགའ་སྐྱོ་གཉིས་ལྡན་གྱི་ཚོར་སྣང་ཞིག་ཤར། དགའ་འོས་པའི་ཚོར་བ་ནི། རི་ཆུ་ལུང་བརྒལ་གྱི་ཧི་མ་ལ་ཡ་རྒྱབ་ཏུ་བསྐྱུར་ཏེ་བཙན་བྱོལ་དུ་ཁྲི་གདུགས་ཉི་མ་མཇལ་བ་མ་ཟད། ན་གཞོན་བདག་ལྟ་བུའི་གངས་ཕྲུག་ཁྲི་ཕྲག་ལའང་མིའི་བསམ་བློའི་རང་དབང་གི་བློ་ཁ་འབྱེད་དེ། བཤུ་གཞོག་དང་གཉའ་གནོན་གྱི་དྲི་མ་མེད་པའི་ཐོག་རང་དབང་དང་འདྲ་མཉམ་གྱི་ཐོག་ནས་འོས་ཤོག་བླུག་རྒྱུའི་གོ་སྐབས་རག་པ་དེ་དགའ་བ་ཁོག་ཏུ་མི་ཤོང་བའི་ཚོར་སྣང་སྟེར། སྐྱོ་འོས་པའི་ཚོར་བ་ནི། བཙན་བྱོལ་བའི་མི་གྲངས་འབུམ་གཅིག་དང་ཕྱེད་ཀ་ཙམ་མ་གཏོགས་བོད་ནང་གི་བརྩེ་ལྡན་གྱི་གཞིས་ལུས་རྒྱ་ཆེའི་མི་དམངས་ས་ཡ་ལྔ་ལྷག་ཙམ་ལ་མང་གཙོའི་ཁེ་དབང་ལོངས་སུ་སྤྱོད་རྒྱུའི་རང་དབང་མེད་པ་དེ་ཡིན། གང་ཞིག་གི་ཆེད་དུ་གཅེས་པའི་ཚེ་སྲོག་ཀྱང་དམར་ལྷབ་ལྷབ་ཀྱི་མེ་ལྕེ་རུ་བསྒྲོན་པ་རེད་དམ། སུ་ཞིག་གི་སླད་དུ་རང་གི་ལུས་པོ་དེ་བཙོན་ཁང་དུ་བརྫངས་བ་ཞིག་ཡིན་ནམ། བྱས་ཙང་། སྐྱབས་བྱོལ་བའི་སྤྱི་ཚོགས་སུ་རང་དབང་ཡོད་དུས། མི་རིགས་དེ་འགྱེལ་ས་ནས་ལངས་དགོས་ཚེ། མིག་ཡར་ལྟ། གོམ་ཡར་སྤོས་ཞེས་པའི་དཔེ་བཞིན་ཆོལ་ཞེན་དང་ཆོས་ཞེན་དོར་ཏེ་ཆིག་སྒྲིལ་ལམ་ནས་མི་རིགས་ཀྱི་བདེན་དོན་འཐབ་རྩོད་བྱེད་རན། སྐྱབས་བཅོལ་བ་ཚོ།
དེ་རིང་འུ་ཚོ་ལ་གང་ཡོད་པ་ནི། ཡོད་ཚད་༧རྒྱལ་བའི་བཀའ་དྲིན་ཉག་ཅིག་ཡིན་པས། ཐེ་ཚོམ་སྤུ་ཙམ་མེད་པའི་ཐོག་ཁོང་གི་བཀའ་དགོངས་འོག་ཐད་ཀར་ཤར་བསྐྱོད་གནང་དགོས། འུ་ཚོའི་སྤྱི་ཚོགས་སུ་མི་དགོས་པའི་གད་སྙིགས་ལྟ་བུ་ནི། ལྟ་ལོག བསྟན་བཤིག ནང་རུལ། ཆོལ་ཞེན། ཕྲག་དོག ཚིག་རྩུབ། ནང་འཁྲུག གཡོ་ཁྲམ། དཀྲུག་ཤིང་། སྡིགས་ར། ངོ་གཉིས། དབྱེ་འབྱེད། ཧོལ་རྒྱུགས་བཅས་ཡིན་པས། ཀླད་རྙིང་མཁྲེགས་འཛིན་དང་གཏོར་བཤིག་གྱི་ལྟ་བ་མཚམས་འཇོག་བྱས་ཏེ་གུ་ཡངས་ཀྱི་བསམ་གཞིག་དང་དྲང་བདེན་གྱི་ལམ་བུ་ཞིག་ཏུ་ཁ་ལོ་བསྒྱུར་འོས། རང་ལྟ་ལ་ཕྱོགས་འཛིན་དང་གཞན་ལྟ་ལ་སྡང་སེམས་ཞེས་པའི་བྱེད་སྟངས་ངན་པ་བསྐྱུར། རྟོག་པ་ལྷ་དང་མཉམ་ཡང་སྤྱོད་པ་མི་དང་བསྟུན་དགོས་ཞེས་པའི་དཔེ་ལྟར་མཁས་རློམ་དང་རྟོག་བཟོ་བྱས་ཏེ་ཁོང་གི་བཀའ་དགོངས་དཀྲུག་མི་ཉན། ནང་འཁྲུག་ནི་ཁྲོན་པའི་ནང་གི་ཟླ་བའི་གཟུགས་དབྱིབས་ལ་ཟླ་བ་དངོས་གནས་སུ་འཛིན་ཏེ་ཞེན་ཆགས་འཁྲེང་བའི་སྤྲེའུ་གླེན་པ་དང་མཚུངས། སྐྱུག་བྲོ་བའི་རང་གཞན་སུའང་ཕན་མེད་ཆོལ་ནད་ཀྱི་སྣང་ཚུལ་ནི་མཁས་པའི་བཞད་གད་ཀྱི་རྒྱུ་རུ་གྱུར། རང་གི་གཉེན་གྱི་མགོ་ལ་རང་གིས་སྟ་རེ་ཞུས་ཚེ། མཇུག་འབྲས་ནི་རང་ཉིད་ཀྱང་ཕམ་ཁའི་ན་ཟུག་ཏུ་ལྷུང་ངོ་། །བཙན་བྱོལ་བ་ཚོ།
མང་གཙོ་ཞེས་པ་ནི་ཤེས་རབ་ཀྱི་མེ་ལྕེ་འབར་ཏེ་སྨག་རུམ་གྱི་སྤྱི་ཚོགས་ལ་སྒྲོན་མེ་བཏེགས་ཏེ་འོད་དཀར་འཕྲོ་ཞིང་རང་དབང་གི་བདེ་སྐྱིད་ཡོང་བ་དང་གཅིག་མཚུངས་བཞེད། འདས་པའི་ཚེར་མས་ཁེངས་བའི་ལོ་རྒྱུས་ཀྱི་རྟ་ལམ་རིང་པོའི་ནང་ཕྱིར་བལྟས་ཤིག་བྱས་ན། འཇིག་རྟེན་ཁམས་ཀྱི་འགྲོ་བའི་སྤྱི་ཚོགས་སུ་རླབས་ཤིང་འཕྱོ་བའི་ཆབ་སྲིད་ཀྱི་ལམ་ལུགས་ལ་འཕོ་འགྱུར་མང་པོ་བྱུང་སྟེ། མི་སྡེ་སོ་སོའི་སྲིད་དབང་གི་ལམ་ལུགས་ཀྱང་མི་རབས་ནས་མི་རབས་བར་ལ་འགྱུར་ལྡོག་སྣ་ཚོགས་སུ་གྱུར། དཔེར་ན། གོང་མའི་རིང་ལུགས། རྒྱལ་པོའི་རིང་ལུགས། བཀས་བཀོད་རྒྱུན་འཛིན། མ་རྩ་རིང་ལུགས། བཙན་རྒྱལ་རིང་ལུགས། སྒེར་སྤྱོད་རིང་ལུགས། དམར་ཤོག་རིང་ལུགས། བྲན་གཡོག་གི་ལམ་ལུགས། མང་གཙོ་རིང་ལུགས་བཅས་རིམ་བཞིན་འགྱུར་བའི་སྣང་ཚུལ་མང་། གནས་ལུགས་དེ་དག་ལ་དཔྱད་ཞིབ་རེ་བྱས་རྗེས། མང་གཙོའི་སྲིད་ལུགས་ནི་འཛིན་སྐྱོང་བྱེད་པའི་ཐབས་ལམ་ཡག་ཤོས་ཤིག་དང་དགེ་མཚན་ཆེ་ཤོས་ཤིག་ཏུ་ངེས་ཤེས་རྙེད། དྲོད་སྐྱིད་ལྡན་ཞིང་ཡང་དག་གི་མང་གཙོའི་སྤྱི་ཚོགས་སུ་སྐྱིད་པོ་ཡིན་པར་ཤེས་དགོས། བཙན་བྱོལ་བ་ཚོ། མཚོ་དེ་འོ་མའི་མཚོ་ལ། ཁྲག་གིས་ཐིགས་པ་མ་རྒྱག་ཅེས་པའི་ཚིག་དོན་ལྟར་ནང་དཀྲུག་གི་འཕག་འཚག་དེ་མྱུར་དུ་སྤོངས། ཁྲེལ་དང་ངོ་ཚ་ཡོད་པ་དང་ཡ་རབས་བཟང་སྤྱོད་ལྡན་པའི་བོད་མི་རིགས་ཞེ་ན་མིང་དོན་མཚུངས་ངམ། སྔོན་བྱོན་གྱི་དཔའ་མཛངས་ཆེ་བའི་མེས་པོ་དམ་པ་ཚོའི་ཞབས་མི་འདྲེན་པ་ཞིག་དང་། རྗེས་མའི་མི་རབས་གསར་པ་ཚོའི་མདུན་ལ་ངོ་མི་གནོང་བ་ཞིག་བྱ་རྒྱུ་ནི་ད་ཡོད་ཀྱི་མི་རབས་ཚོའི་བྱ་བྱེད་ལས་གསུམ་ཤིན་ཏུ་གལ་འགངས་ཆེ། བཟོད་བསྲན་དང་གུས་བརྩི་ལྡན་པའི་ཐོག་རྩོད་བཞིན་རྩོད་བཞིན་མི་རིགས་ལ་ཕན་ཐོགས་ཡོད་པའི་འཐབ་རྩོད་དེ་གནང་དང་། ང་རྒྱལ་དང་རང་ཁེ་ཡི་ཆེད་དུ་སྐབས་འཚོལ་རིང་ལུགས་པའི་སྤྲེའུ་ལད་དང་ལྐོག་འགྱུར་གྱི་ངན་སྤྱོད་དེ་དག་མ་གནང་ཨང་། བཙན་བྱོལ་བ།
རྒྱ་ནག་གི་མཁས་དབང་ཡུས་ཏ་ཧྥུ་ཡིས་གསུངས་པ་ལྟར། “རླབས་ཆེན་གྱི་མི་སྣ་བྱུང་མ་མྱོང་བའི་མི་རིགས་ནི་འཛམ་གླིང་སྟེང་ཆེས་སྙིང་རྗེ་བའི་སྐྱེ་འགྲོའི་ཚོགས་ཤིག་རེད་ལ། རླབས་ཆེན་གྱི་མི་སྣ་བྱུང་ཡང་དེ་དག་ལ་བརྩི་བཀུར་དང་དགའ་ཞེན། ཡིད་སྨོན་བཅས་མི་བྱེད་པའི་མི་རིགས་ནི། འབྱུང་འགྱུར་རེ་བ་མེད་པའི་བྲན་གཡོག་གི་རྒྱལ་ཁབ་ཅིག་རེད།” ལེགས་བཤད་རྣལ་མ་འདིའི་བསླབ་བྱ་ཐོབ་པ་ཞིག་བྱོས། བྱང་ཐང་ལ་སྦྲང་ཆར་གྱི་བདུད་རྩི་འཇོ་ཞིང་རྩྭ་ལྗང་གི་དཔྱིད་དཔལ་བཞད་པ་ལྟར། མང་གཙོའི་སྤྱི་ཚོགས་སུ་མི་རེ་ངོ་རེ་ནས་འགན་འཁྲི་ཕྲག་ཏུ་ཁུར་ཏེ་ཐབས་ཇུས་བཟང་པོའི་ངང་ནས་བསམ་བློ་བཟང་ཕྱོགས་སུ་གཏོང་དགོས་པ་ནི་དུས་ལ་བབ་པའི་དགོས་མཁོ་ཞིག་ཡིན། རྒྱུ་མཚན་དེ་གོང་དུ་བསུས་པའི་ཐོག མི་མང་ཚོས་སྔོན་འགྲོ་དང་དངོས་གཞིའི་འོས་ཤོག་གི་ལས་འགུལ་འགྲོ་བཞིན་པས། སླད་སྲིད་སྐྱོང་གི་འོས་མི་སུ་ཞིག་ལ་ཐོབ་ཀྱང་རུང་། སྤྱི་འཐུས་འོས་མི་སུ་ལའང་ཐོབ་ཀྱང་ཆོག ཐོབ་མཁན་ལ་རྒྱབ་སྐྱོར་དང་བརྩི་བཀུར་ཞུ་དགོས། ད་དུང་། འོས་མི་སུ་ཞིག་ཕམ་ཡང་། ཕམ་ཀ་འདི་ཡང་ངོས་ལེན་ཞུ་དགོས་པ་དེ་དག་ནི་ཡར་ཐོན་ཅན་གྱི་རྒྱལ་ཁབ་ཀྱི་མང་གཙོའི་འགྲོ་ལུགས་བཟང་པོ་ཞིག་ཏུ་ལྟ་དགོས། ཆོལ་གསུམ་བོད་མི་སྐྱིད་སྡུག་མཉམ་མྱོང་ཞེས་པའི་གོ་བ་རྙེད་པའི་ཐོག་ཕན་ཚུན་བློ་གཟུ་བོར་གནས་པའི་ངང་ནས་མཛའ་འབྲེལ་དང་འཆམ་མཐུན་བྱེད་དགོས་པ་ནི་མི་རིགས་གཅིག་གི་འཐབ་རྩོད་གཡུལ་ལས་རྒྱལ་བའི་གཞི་མ་ཡིན། འབྲོག་པས་པགས་པ་མཉེད་མཉེད་དང་རོང་པས་རུས་པ་དམུལ་དམུལ་བྱེད་པ་ལྟ་བུའི་དཔེ་བཞིན། བདག་ཅག་བཙན་བྱོལ་བ་ཚོས་བོད་དང་བོད་མི་རིགས་ཞེས་པའི་མིང་བྱང་དེ་ཡག་ཐོག་ཡག་རྩེག་བསྐྲུན་དགོས་པ་མ་གཏོགས་བོད་དོན་ཁ་རུ་འཁྱེར་ཏེ་ཕུ་དཀྲོག་མདའ་དཀྲོག་བྱེད་མི་ཉན། མུ་མཐུད་ནས་ནང་འཛིན་དང་ནང་འཁྲུག་རྒྱབ་ན། ད་ལྟའི་ནུས་པ་ཅན་གྱི་གཞུང་ཞབས་པ་དང་སྲི་ཞུ་བ་མང་པོ་སེམས་ཤུགས་ཆགས་པའི་ཉེན་ཁ་ཆེ། སྐྱབས་བཅོལ་ཚོ།
འཛམ་གླིང་ཤར་ནུབ་གང་དུའང་ད་ལྟའི་མང་གཙོའི་ལམ་ལུགས་མ་གཏོགས། དེ་མིན་སྔར་བྱུང་བའི་ཆབ་སྲིད་ཀྱི་ལམ་ལུགས་གཞན་ནི་བཙོན་རའི་ནང་གི་བཙོན་ཁྱུ་ལྟར་འོས་ཤོག་བླུག་རྒྱུའི་ཐོབ་ཐང་ཕར་ཞོག རང་གི་རྒྱལ་ཁབ་ལ་སྨན་པའི་བསམ་ཚུལ་ཡང་བཤད་རྒྱུའི་སྨྲ་བརྗོད་རང་དབང་མེད་ལ། བཤས་རའི་ནང་གི་སེམས་ཅན་བཞིན་ཉེས་མེད་ཀྱི་སྐྱེ་བོ་ཁྲི་སྟོང་མང་པོ་དམར་གསོད་ཀྱང་བཏང་། ད་དུང་། དེ་བས་ག་ལ་ཚད། འདས་ཟིན་པའི་སྐྱུག་བྲོ་བའི་ལོ་རྒྱུས་སུ་ཧམ་སེམས་ཆེ་ཞིང་ཁྲེལ་གཞུང་མེད་པའི་དཔོན་ངན་ཚོགས་ཀྱིས་མི་རྒྱུ་སེམས་མེད་ཅེས་པའི་དཔེ་བཞིན། ཉམ་ཆུང་མི་མང་གི་རྒྱུ་ནོར་དང་འབྲུ་རིགས། ཕྱུགས་རིགས། ས་ཞིང་། བུད་མེད་སོགས་འཕྲོག་བཅོམ་བྱས་ཏེ་སྐྱེ་འགྲོ་དུ་མ་བཀྲེས་སྐོམ་གྱི་སྡུག་གིས་གཟེར་ཏེ་ཚེ་སྲོག་ཤོར་བའི་ཡིད་སྐྱོ་བའི་ལོ་རྒྱུས་མངའ། དུས་ད་ལྟ་འུ་ཚོ་ལ་ཅི་ཡོད་པ་དེ། ཡོད་ཚད་ཁོང་གི་བཀའ་དྲིན་ཡིན་པས། ཆོག་ཤེས་དང་མཛའ་སེམས་ཀྱི་བསམ་བློ་འཁྱེར་ཏེ་དྲིན་ལན་འཇལ་དཀའ་ནའང་། བསྟན་པ་བཤིག་པའི་གནོང་འགྱོད་མེད་པ་ཞིག་ངེས་པར་དུ་བྱེད་རན། སྐྱབས་བཅོལ་བ།
ཆར་པ་ཆུ་གྲོགས་དང་ཉི་མ་མེ་གྲོགས་ཞེས་པའི་དཔེ་བཞིན་ཕན་ཚུན་འདུ་ཤེས་གཅིག་ཏུ་འཛིན་ཏེ་ཆ་རྒྱུས་མེད་པའི་མི་ཡུལ་དུ་བོད་པ་ཡོད་དོ་ཅོག་ཆིག་སྒྲིག་གནོངས། རང་ཅག་གངས་ཅན་པ་ཚོས་ངེས་པར་དུ་མཁྱེན་དགོས་པ་ཞིག་ནི། ཅི་ཡང་མི་ཤེས་པའི་སྐྱབས་བྱོལ་བ་བདག་གི་འཕར་ལྡིང་བྱེད་པའི་སྙིང་དམར་གྱི་མྱོང་ཚོར་ལ་མཚོན་ན། བཙན་བྱོལ་བོད་མི་ཚོས་དགའ་ཞིང་སྤྲོ་བོའི་ངང་ནས་རང་འདོད་བཞིན་འོས་ཤོག་འཕེན་ཆོག་པའི་བསྐལ་བཟང་གི་གོ་སྐབས་གསེར་སྲང་སྟོང་ལས་ལྷག་པའི་མང་གཙོ་ཞེས་པ་དེ་ནི། འུ་ཚོས་མང་གཙོའི་ཆེད་དུ་ཟུངས་ཁྲག་དང་རྔུལ་ཆུ་སོགས་གང་ཡང་མ་བཏང་པར། བོད་མིའི་གཟུགས་སུ་སངས་རྒྱས་སྐུ་བརློན་པར་ཕེབས་པའི་༧སྐྱབས་མགོན་རིན་པོ་ཆེ་མཆོག་གིས་དགོངས་པ་རྒྱ་ཆེར་བཞེས་ཏེ། བདག་ཅག་མགོ་ནག་རྩམ་ཟན་བོད་འབངས་ཀུན་ལ་གསོལ་རས་གནང་བ་ཞིག་ཡིན་པས། དེ་ནི་ཉིན་མཚན་དུས་དྲུག་ཏུ་བརྗེད་པར་དཀའ་བའི་བཀའ་དྲིན་ཞིག་རེད་ལ། རྒྱལ་སྤྱིའི་ཡར་ཐོན་ཅན་གྱི་རྒྱལ་ཁབ་དང་བོད་ཀྱི་གཡས་གཡོན་གྱི་ཁྱིམ་མཚེས་ཀྱི་རྒྱལ་ཁབ་བཅས་ལ་དཔུང་པ་མཉམ་གཤིབ་ཀྱི་ངང་ནས་བསྐྱོད་པའི་སྒོ་མོ་དང་པོ་དེ་ཕྱེ། བཙན་བྱོལ་བ་ཚོ།
མི་རིགས་གཞན་སུ་ལའང་མེད་ཅིང་ཁོ་ཚོས་ཡིད་སྨོན་གནང་ས་དེ། རླབས་ཆེན་གྱི་ལུགས་གཉིས་ཀྱི་དབུ་ཁྲིད། འཛམ་གླིང་ཞི་བདེའི་དེད་དཔོན། འདི་ཕྱི་གཉིས་ཀྱི་སྐྱབས་མགོན། ༧རྒྱལ་དབང་ཡིད་བཞིན་ནོར་བུ་ཁོང་གི་སྐུ་གསུང་ཐུགས་ཀྱི་བྱིན་རླབས་ཡིན་པར་སྨྲ་ཅི་ལ་དགོས། ཁོང་གིས་ཁ་དོག་དང་སྐད་ཡིག་དབྱེ་བ་མེད་པའི་འགྲོ་བ་ཁྲི་ཚོགས་ལ་བྱམས་བརྩེའི་ས་བོན་བཏབ་པ་དང་གཅིག གླིང་ཆེན་བདུན་གྱི་ས་གཞིའི་སྟེང་དུ་གནས་པའི་ཆོས་ལུགས་མཛའ་འབྲེལ་བསྐྲུན་པ་དང་གཉིས། བོད་མི་རིགས་ཀྱི་རྩ་དོན་འཐབ་རྩོད་དང་བོད་ཀྱི་ཁོར་ཡུག་སྲུང་སྐྱོབ་ཀྱི་མཛད་འཕྲིན་སྐྱོང་བ་དང་གསུམ། རྒྱ་གར་འཕགས་པའི་དཔལ་ན་ལེནྜའི་གནའ་བོའི་རིག་གནས་སླར་གསོ་དང་རྒྱུན་འཛིན་གནང་བ་དང་བཞི་བཅས་ཐུགས་བསྐྱེད་དམ་བཅའ་ཆེན་པོ་བཞི་རྨང་གཞིར་བཟུང་སྟེ་སྤྱིར་གོ་ལ་ཧྲིལ་པོ་ཞི་བདེའི་ངངང་གནས་ཐབས་དང་། བྱེ་བྲག་ཏུ་བོད་ཀྱི་བདེན་དོན་འཐབ་རྩོད་གནང་བ་སོགས་ཀྱི་མཛད་འཕྲིན་ནམ་མཁའ་ལས་རྒྱ་ཆེ་བ་དང་རྒྱ་མཚོ་ལས་གཏིང་ཟབ་པའི་སྐུ་ཡོན་མངོན་པས། ས་འོག་གི་འབུ་གྲོག་མ་བདག་གིས་དུས་ཚོད་ཐུང་ཐུང་ཞིག་གི་ནང་དུ་ཡོད་ཚད་བརྗོད་པར་དཀའ། འོན་ཀྱང་། སྐྱབས་བཅོལ་བོད་རིགས་མི་མང་གིས་བཀའ་ཆོས་ཐེངས་མང་གསན་མྱོང་ཡང་། མི་མང་ཚོས་དོན་དངོས་སུ་མུན་འཐོམས་དང་རྨོངས་གཉིད་ཆ་མང་པོ་ཞིག་ལ་འགྱུར་བཅོས་ཐུབ་ན། དེ་ནི་ང་ཚོ་ཡར་རྒྱས་ཀྱི་ཐེམ་སྐས་སུ་འཛེགས་པའི་གྲུབ་འབྲས་རེད་ལ། མ་འོངས་བོད་པའི་གནས་བབ་ལའང་ཡག་ཕྱོགས་སུ་འགྱུར་བ་ཡོང་བའི་སྔོན་རྟགས་ཤིག་ཏུ་ངོས་འཛིན་ཐུབ་སྙམ། འཐབ་གྲོགས་ཚོ།
མདོར་བསྡུས་ན། སྐྱབས་བཅོལ་བ་ཚོས་མང་གཙོའི་ཁེ་དབང་ལོངས་སུ་སྤྱད་དེ་བཀའ་ཤག་སྐབས་བཅུ་དྲུག་དང་སྤྱི་འཐུས་སྐབས་བཅུ་བདུན་པའི་འོས་མི་འོས་ཤོག་འཕེན་རྒྱུའི་ཁྱད་འཕགས་ཀྱི་གོ་སྐབས་ཐོབ་ཡོད་པས། འོས་ཤོག་འཕེན་ཚར་བའི་རྗེས་ནས་མི་རེ་ངོ་རེས་འོས་འགན་འཁུར་ཏེ། འོས་བསྡུ་ལྷན་ཁང་གིས་འོས་བསྡུའི་གྲུབ་འབྲས་ཁྱབ་བསྒྲགས་གནང་དུས། སོ་སོས་རྒྱབ་སྐྱོར་བྱེད་ཡུལ་དེ་འོས་ཤོག་གི་ཁ་གྲངས་ཐོབ་ཤོར་ལ་མི་ལྟོས་པར། སྔོན་འགྲོ་དང་དངོས་གཞི་འོས་བསྡུའི་གྲུབ་འབྲས་གང་ཡིན་པ་དེ་ངེས་པར་དུ་ཁྲིམས་རང་འཁུར་དང་། སྡོམ་པ་རང་སྲུང་བྱས་ཏེ་ཁས་ལེན་ཡོད་པའི་རེ་སྙེག་ཞུ། ཤ་ཚ་བའི་གཏམ་ལ་ཉན་ཆ་མེད། ནད་གསོ་བའི་སྨན་ལ་ཞིམ་པོ་མེད་ཅེས་པའི་གཏམ་དཔེ་ལྟར་གྱུར། ཆོལ་གསུམ་སྤུན་ཟླ་མཐུན་སྒྲིལ་མེད་ན། རང་བཙན་རག་ཀྱང་དགེ་མཚན་མེད། ཆོལ་གསུམ་མི་མང་ཆིག་སྒྲིག་གི་དམ་བཅའ་མ་དོར་བ་ནི། བོད་མི་རིགས་ཀྱི་ཆབ་སྲིད་ཀྱི་སྲོག་རྩ་ཡིན་པར་མི་བརྗེད་ཨང་།
ཧྥ་རན་སི་རུ་སྲིད་སྤྱི་འོས་བསྡུ་ཆེན་མོའི་སྔོན་འགྲོའི་འོས་ཤོག་བླུག་ཚར་རྗེས། གུས་པ་ཨ་མའི་བུ་བསྟན་འཛིན་ཚེ་རིང་གིས་རང་ཉིད་ཀྱི་མྱོང་ཚོར་གསོན་པོ་ཞིག་བཀག་ཀྱང་མི་ཁོགས་ཏེ་ཤར་མར་བྲིས་པར་དགེའོ། །
ཨ་མའི་བུ་བསྟན་འཛིན་ཚེ་རིང་ནས་དཔེ་ཡག་པོ་བྲིས་འདུག་་་་བཀྲིས་བདེ་ལེགས་ཡོད།
དཔེ་ཡག་པོ་རྗེས་སུ་ཡིད་རང་ཞུ།