ཀླུ་སྨྱོན་ཧེ་རུ་ཀ
ཁོ་བོར་མཚོན་ན་རྒྱ་གར་དང་བལ་ཡུལ་དུ་མ་བསླེབས་བར་གཞིས་ཆགས་པའི་སྐོར་ལ་ཆ་རྒྱུས་ཕྲན་བུ་ཙམ་ཡང་མེད། རང་ཉིད་ཀྱི་ཁུ་བོར་གཏོགས་པའི་གྲྭ་པ་ཆོས་མཛད་ཅེས་པ་ཞིག་༡༩༥༩ ལོའི་སྔོན་དུ་ལྷ་སར་བསྐྱོད་འདུག་ཅིང་། དེར་དགེ་འདུན་ཆོས་འཕེལ་གྱི་གྲོགས་པོ་ནང་མ་ཞིག་ཏུ་གྱུར་པ་དང་འབྲེལ་ལྷ་བྲིས་པ་ཞིག་ཏུ་ཡང་གྱུར་འདུག་པ་དང་། དེ་ནས་༡༩༥༩ ལོར་རྒྱ་གར་དུ་སོང་སྟེ་རྡོ་རྗེ་གླིང་དུ་གཞིས་ཆགས་པ་དང་། རྗེས་སུ་སྤྱི་ལོ་ ༡༩༨༢ ཡིན་ནམ་ཞིག་ལ་ཕྱིར་ཁོའི་ཕ་ཡུལ་བོད་མདོ་སྨད་དུ་ནང་མི་གཉེན་འཕྲད་ཀྱི་ཆེད་དུ་བསླེབས་སོང་། སྐབས་དེར་རང་ཉིད་ལོ་ན་ཧ་ཅང་ཆུང་བས་ཁོང་ལ་རྒྱ་གར་གྱི་སྐོར་སྐད་ཆ་འདྲི་རྒྱུའི་གོ་སྐབས་ཅི་ཡང་བྱུང་མ་སོང་ཡང་། ཁོང་གིས་གྱོན་པའི་རྐང་སྣམ་དཀར་པོ་དེ་དང་ཕ་ཡུལ་ཁྲི་ཀ་ནས་ཡིན་པའི་ཁོའི་བུ་མོའི་མག་པ་དེས་རྒྱ་གར་ནས་ཁྱེར་ཡོང་བའི་ཚོང་ཟོག་ཁག་ཅིག་ཚོང་ཁྲོམ་དུ་བཤམས་པ་དེ་རེད།
རྗེས་སུ་སྤྱི་ལོ་ ༡༩༩༤ ལོར་རང་ཉིད་ཧི་མ་ལ་ཡའི་རི་བརྒྱུད་བརྒལ་ནས་བཙན་བྱོལ་ལ་འབྱོར་བའི་སྐབས་སུ། ཆེས་ཐོག་མར་བལ་ཡུལ་སྣེ་ལེན་ཁང་གི་ལས་བྱེད་རྣམ་པ་དང་། དེ་ནས་རྒྱ་གར་གྱི་རྒྱལ་ས་ལྡི་ལིའི་སྣེ་ལེན་ཁང་གི་ལས་བྱེད་དང་བྷོ་དྷི་བྷི་ཡར་གནས་སྡོད་བོད་མི་ཚོའི་ཚོང་ཁྲོམ་དང་ཟ་ཁང་ཉུལ་ཏེ། བཙན་བྱོལ་བོད་མིའི་རིག་གཞུང་དང་འཚོ་བར་རྒྱུས་ལོན་བྱེད་པའི་གོ་སྐབས་ཤིག་ཐོབ་པ་དང་། དེ་ནས་རྒྱ་གར་ལྷོ་ཕྱོགས་སུ་འབྱོར་ཏེ་ལོ་གཅིག་དང་ཟླ་ཤས་རིང་དེར་བསྡད་པའི་རིང་དང་། གོང་ས་མཆོག་གི་གསུང་ཆོས་ཞུ་ཆེད་རྡ་རམ་ས་ལར་ཐེངས་ཁ་ཤས་བསྐྱོད་པའི་སྐབས། དེ་བཞིན་རྡོ་རྗེ་གདན་དང་ཝ་ར་ཎ་སི་སོགས་རྒྱ་གར་གནས་ཆེན་ཁག་ཏུ་གནས་མཇལ་ལ་བསྐྱོད་སྐབས། མཐའ་མར་བལ་ཡུལ་དུ་ལོ་དྲུག་གི་རིང་བསྡད་པའི་སྐབས་སུ་བཙན་བྱོལ་བོད་མིར་འབྲེལ་འདྲིས་བྱས་པའི་སྐབས་བཅས་སུ་རིམ་བཞིན་བཙན་བྱོལ་བོད་མིར་ཆ་རྒྱུས་ཆེ་ཙམ་ལེན་པའི་གོ་སྐབས་ཡག་པོ་ཞིག་བྱུང་།
རྩ་བའི་ཆ་ནས་རང་ཉིད་བོད་གངས་ཅན་པའི་ཆོས་རིག་དཔལ་འབྱོར་གྱི་ལྟེ་བ་མདོ་སྨད་རྟ་ཡི་ཆོལ་ཁ་ནས་འཚར་ལོངས་བྱུང་བ་དང་། ཁྱད་པར་དུ་རིག་གནས་གསར་བརྗེའི་རྗེས་ཀྱི་དུས་རབས་ཧ་ཅང་གལ་གནད་ཆེ་བ་ཞིག་སྟེ། བོད་ཀྱི་ཆོས་སྡེ་ཁག་ནས་ཡིན་པའི་མཁས་པ་སྐོར་ཞིག་ས་གནས་ཀྱི་སློབ་གྲྭ་ཆེ་འབྲིང་ཆུང་གསུམ་གྱི་དགེ་རྒན་གྱི་ལས་གནས་སུ་ཞུགས་ཏེ། བོད་ཀྱི་མི་རབས་གསར་པའི་དཔུང་ཁག་ཅིག་ལ་གངས་ཅན་པའི་ཆོས་དང་རིག་གཞུང་ཤི་མ་གསོན་དེའི་ཚེ་སྲོག་ཕྲ་མོ་ཞིག་བརྒྱུད་སྤྲོད་བྱེད་བཞིན་པའི་དུས་སྐབས་སུ་འཚར་ལོངས་བྱུང་བ་ཞིག་ཡིན་པའི་ཆ་ནས། བོད་ཀྱི་ཆོས་དང་རིག་གཞུང་གི་བྲོ་བ་ཕྲན་བུ་ཞིག་མྱངས་རྗེས་བཙན་བྱོལ་དུ་འབྱོར་བ་དང་། རང་ཡུལ་ལ་མཚོན་ན་བོད་མི་རྒན་དར་གཞོན་གསུམ་གྱི་ཕལ་མོ་ཆེས་བོད་སྐད་བཤད་ཅིང་བོད་ཡིག་འབྲི་བའི་ཁོར་ཡུག་ཅིག་ནས་འཚར་ལོངས་བྱུང་བ་ཞིག་ཡིན་པས། རྒྱ་གར་དང་བལ་ཡུལ་དུ་སྡོད་པའི་བོད་མི་བཙན་བྱོལ་བ་ཚོའི་འཚོ་བ་དང་རིག་གཞུང་དེ་བོད་ནང་གི་བོད་མི་ཚོའི་འཚོ་བ་དང་གཤིབ་བསྡུར་བྱེད་རྒྱུར་སྤྲོ་བ་ཆེ་བའི་བོད་མི་བཙན་བྱོལ་གསར་འབྱོར་བ་གཞན་དག་དང་མཚུངས་པ་ཞིག་ཡིན་ལ། བོད་ཕྱི་ནང་གི་རིག་གཞུང་དང་འཚོ་བ་གཤིབ་བསྡུར་བྱེད་ཐེངས་རེ་རེར། རང་ཉིད་ལ་མཚོན་ན་བོད་མི་གཞིས་ཆགས་པའི་ཕྱོགས་སུ་འདོད་བློ་མ་ཁེངས་པའི་སྐད་ཆ་ཐེངས་མང་བཤད་པ་དང་རྩོམ་ཡིག་རེ་ཟུང་བྲིས་ཡོད་པའི་ཆ་ནས། སྐབས་དེར་རང་ཉིད་ཀྱིས་བཙན་བྱོལ་བོད་མིའི་འཚོ་བའི་རྒྱབ་ལྗོངས་ལ་ཞིབ་འཇུག་བྱས་པ་མི་འདང་ཞིང་། བཙན་བྱོལ་བོད་མིར་འབྲེལ་འདྲིས་བྱས་པ་དེ་བས་ཀྱང་འདང་ངེས་ཤིག་བྱུང་མི་འདུག
རྗེས་སུ་རང་ཉིད་ནུབ་ཕྱོགས་ཨ་རིར་བསླེབས་ཤིང་། རྒྱ་གར་དང་བལ་ཡུལ་ཇི་བཞིན་ཨ་རིར་ཡང་བོད་པ་སྐྱབས་བཅོལ་བའི་སྤྱི་ཚོགས་ཤིག་ལ་འཕྲད་པ་དང་། དེ་ཚོའི་འཚོ་བ་དང་དེ་ཚོའི་བུ་ཕྲུག་ཚོའི་ནུབ་ཕྱོགས་རིག་གཞུང་གིས་བསླུས་ཟིན་པའི་ཉིན་རེའི་འཚོ་བ་དང་སེམས་ཁམས་སོགས་ལ་རྒྱུས་ལོན་ཆེ་ཙམ་བྱུང་རྗེས། གཞི་ནས་གཉིད་ལས་སད་པ་ལྟར་དུ་གྱུར་ཏེ། བོད་ནང་གི་བོད་མིའི་འཚོ་བ་དང་རིག་གཞུང་གི་ཤི་གསོན། རྒྱ་གར་དང་བལ་ཡུལ་གྱི་བོད་མིའི་འཚོ་བ་དང་རིག་གཞུང་གི་སྣང་ཚུལ། ནུབ་ཕྱོགས་སུ་ཡོད་པའི་བོད་མིའི་འཚོ་བ་དང་རིག་གཞུང་གི་འཕེལ་རིམ་གསུམ་གཤིབ་བསྡུར་བྱེད་ཐེངས་རེ་རེར། རང་ཉིད་ཀྱི་སེམས་གཏིང་དུ་འཇིགས་སྐྲག་གི་འདར་ཡོམ་ཆེན་པོ་རེ་རེ་དང་། སེམས་ཁྲལ་གྱི་གདུང་ཚོར་དྲག་པོ་སྐྱེས་པ་ལན་གཅིག་ག་ལ་ཡིན་ཏེ་མ་ཡིན་ནོ།།
ཁྱད་པར་དུ་ཉིན་ཤས་སྔོན་ངོ་དེབ་དང་ཁྲེ་ལི་སྒ་རམ་གཉིས་སུ་རྒྱ་གར་ལྷོ་ཕྱོགས་ཀྱི་བོད་མིའི་གཞིས་ཆགས་སུ་ཆུང་དུས་ནས་བོད་མི་དང་མཉམ་དུ་འཚོ་བ་བསྐྱལ་ཏེ་འཚར་ལོངས་བྱུང་བའི་རྒྱ་གར་བ་མི་ཚང་ཞིག་གི་གཏམ་རྒྱུད་ལ་ལྟ་ཉན་བྱས་རྗེས། ངའི་སེམས་ཁོང་དུ་ཚོར་བ་དྲག་པོ་ཞིག་མེ་ལྕེ་འབར་འབར་བྱས་སོང་། ངའི་ལག་སོར་གྱི་རྩེ་ནས་ཀ་ཁ་སུམ་ཅུ་རྟ་རྒོད་བརྒྱུགས་བརྒྱུགས་བྱས་སོང་། དེ་ནི་ངས་བོད་མི་གཞིས་ཆགས་པར་བཅངས་པའི་སྔོན་ཆད་ཀྱི་ལྟ་ཚུལ་ངན་པ་དེ་ཚོར་སེར་ཀ་ཆེན་པོ་ཞིག་གདངས་ཡོང་བས་རེད་ལ། དེ་ནི་ངས་རང་ཉིད་དང་ཤ་རུས་གདུང་རྒྱུད་གཅིག་པའི་བོད་མིར་བཟུང་བའི་དུང་ཞེན་གྱི་མདུད་པ་དམ་དུ་སོང་བའི་རྟགས་མཚན་ཞིག་ཀྱང་རེད།
དེ་ནི་འདི་ལྟ་སྟེ། ཕུར་པ་ལྷ་མོ་ཟེར་བའི་རྒྱ་གར་བུ་མོ་འདི་དང་མོའི་ཕ་མ་གཉིས། ད་དུང་མོའི་གཅུང་མོ་དེ་བཅས་ཀྱིས་བོད་སྐད་ཆུ་རྒྱུགས་པ་ལྟར་བཤད་པ་དང་། བོད་པའི་ཟ་མ་མོག་མོག་བཟོ་བ། ནང་དུ་བོད་པའི་མཆོད་བཤམ་བསྒྲིགས་ཏེ་བོད་ལུགས་གསོལ་བ་སྨོན་ལམ་འདོན་པ། གོང་ས་མཆོག་དང་བོད་མིར་ལྷག་བསམ་རྣམ་དག་གིས་དགའ་མོས་བྱེད་པ། བོད་ཡུལ་ལ་སྐྱིད་པའི་ཉི་མ་འཆར་བར་རེ་སྒུག་བྱེད་པ། བོད་མིའི་སྤྱི་ཚོགས་ཁྲོད་དུ་ཡང་རྒྱ་གར་མི་ཚང་དེར་ལྟ་སྟངས་ཧ་ཅང་ཡག་པོ་ཞིག་ཡོད་པས། ནང་གི་པ་ལགས་དེར་བོད་མིའི་གཞུང་སྒེར་གཉིས་ཀ་ནས་བསྔག་བརྗོད་བྱས་དང་བྱེད་བཞིན་པ་སོགས་ཏེ། མདོར་ན་བཙན་བྱོལ་བོད་མི་ཚོས་འདས་པའི་ལོ་ངོ་དྲུག་ཅུའི་ནང་། རང་ཉིད་ལས་གྲངས་འབོར་དེ་ལྡབས་ས་ཡ་བརྒྱ་ཕྲག་ལྷག་གིས་ཆེ་བའི་རྒྱ་གར་ཡུལ་མིའི་སྤྱི་ཚོགས་ཁྲོད་དུ། དཀའ་བ་ཁྱད་དུ་བསད་ཅིང་ངལ་བ་དང་དུ་བླངས་ཏེ་རང་ཉིད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་ཇི་ལྟར་བྱས་ཡོད་པའི་སྐོར་དེ་རེད།
སྐབས་འདིར་སྔོན་ཆད་ཁོ་བོ་བལ་ཡུལ་དུ་སྡོད་སྐབས་ཀྱི་གནས་ཚུལ་ཞིག་ཀྱང་དྲན་སོས་ཡོང་བ་སྟེ། ཉིན་ཞིག བདག་གིས་སྐྱེས་ཡུལ་ཁམས་ཕྱོགས་ནས་ཡིན་པ་དང་། གནས་སྐབས་རིང་རྒྱ་གར་ལྷོ་ཕྱོགས་ཀྱི་གྲྭ་ས་ཞིག་ནས་བསྡད་རྗེས་བལ་ཡུལ་དུ་འབྱོར་བའི་ཁམས་པ་དར་མ་ཞིག་གིས་བཟོ་ཁང་ཆུང་ཆུང་ཞིག་གཉེར་ཡོད་པ་མཐོང་ཞིང་། ཁོའི་ཆུང་མ་མི་རིགས་རྒྱ་གར་ལྷོ་ཕྱོགས་པ་ཡིན་པ་དེས་བོད་སྐད་ཆུ་བཞུར་བཞུར་བཤད་ཤེས་པ་དང་། མོའི་ངོ་གདོང་ལ་མ་བལྟས་པར་རྒྱབ་ཕྱོགས་ནས་ཉན་ན་མོའི་བོད་སྐད་དེ་བོད་རིགས་གཙང་མ་གཙང་རྐྱང་ཞིག་གིས་བཤད་པའི་བོད་སྐད་དང་ཁྱད་པར་ཏིལ་འབྲུ་ཙམ་ཡང་མེད་པ་དེའོ།། གཞན་འདས་པའི་ལོ་ཤས་རིང་ངོ་དེབ་ནང་དུ་རྒྱ་གར་བ་གླ་འཁོར་གཏོང་མཁན་དང་ཚོང་ཙག་ཙིག་རྒྱག་མཁན་དེ་འདྲས་བོད་སྐད་ཆུ་བཞུར་བཞུར་བཤད་ཀྱིན་ཡོད་པ་མཐོང་མྱོང་བ་དང་། རྒྱ་གར་བ་དེ་ཚོས་དེ་ལྟར་ཁོ་ཚོ་དང་ཆོས་རིག་རིགས་གསུམ་ཁ་ཁ་ཡིན་པའི་མི་རིགས་ཤིག་གི་སྐད་དེ་ཧ་ཅང་འཁྲུག་ཆ་དོད་པོའི་སྒོ་ནས་བཤད་ཐུབ་པ་དེའི་རྒྱུ་རྐྱེན་གང་ཡིན་ནམ། དེ་ནི་བཙན་བྱོལ་བོད་པ་ཚོས་རང་གི་རླབས་ཆེ་བའི་བོད་སྐད་དེ་བྱེ་མ་ཆུ་སིམ་ལ་འགྲོ་རུ་མ་བཅུག་པར་མི་ཉམས་རྒྱུན་འཛིན་བྱས་པའི་འབྲས་རྟགས་བླ་ན་མེད་ཅིང་གཟེངས་སུ་མཐོ་བ་དེ་ལས་བྱུང་བ་ཞིག་ཡིན་པ་སྨྲོས་ཅི་དགོས།
ཕུར་པ་ལྷ་མོས་བཤད་པའི་བོད་སྐད་དང་མོའི་ཁྱིམ་མིའི་གནས་ཚུལ་དེ་མཐོང་ཐོས་བྱུང་རྗེས། ངའི་སེམས་ནང་རང་དབང་མེད་པར་ཨ་རི་དང་ཡོ་རོབ་ནང་འཚར་ལོངས་བྱུང་དང་འབྱུང་བཞིན་པའི་བོད་རིགས་ཀྱི་མི་རབས་གཉིས་པ་དང་གསུམ་པ་དེ་ཚོ་དྲན་ཡོང་ཞིང་། ཁོ་ཚོའི་ཁྲོད་ཀྱི་བརྒྱ་ཆ་དགུ་བཅུ་གོ་དགུ་དང་གྲངས་ཆུང་དགུ་ཡིས་བོད་ཡིག་ཀློག་མི་ཐུབ་ལ་བོད་སྐད་ཀྱང་བཤད་མི་ཐུབ་པ་མ་ཟད། བོད་ཀྱི་ཆོས་དད་དང་སེམས་ཁམས། ཁྲག་རྒྱུན་དང་ལྟ་སྤྱོད་གང་ཡང་རྒྱུན་འཛིན་བྱེད་རྒྱུའི་རེ་བ་ཡོངས་སུ་བྲལ་བ་ཞིག་རེད། འདི་ནི་ཁོ་བོར་མཚོན་ན་ཉལ་ན་གཉིད་མི་ཡོང་ཞིང་སད་ན་སེམས་མི་སྐྱིད་པའི་དོན་དག་ཛ་དྲག་ལ་ཉེན་ཆེ་བ་ཞིག་ཡིན་ཞིང་། རྩོམ་ཡིག་འདི་ཀློག་པ་པོ་ཁྱེད་ཅག་ལ་མཚོན་ན་ཡང་དེ་ལྟར་ཡིན་པ་ཐག་ཆོད་རེད། མ་རེད་དམ།
ད་འོ་ན་རྒྱ་གར་གཞིས་ཆགས་པ་ཚོ་སྟེ། རྒྱ་གར་གྱི་མི་འབོར་དུང་ཕྱུར་བཅུ་ཕྲག་བརྒལ་བ་དེའི་ནང་གི་བརྒྱ་ཆའི་ཀླད་གོར་ཀླད་གོར་ཀླད་གོར་ཙམ་ཡང་མི་ཟིན་པའི་སྤྱི་ཚོགས་ཧ་ཅང་ཆུང་ཆུང་ཞིག་གིས། ལོ་ངོ་དྲུག་ཅུའི་རིང་ལ་བོད་གངས་ཅན་པའི་སྐད་ཡིག་དེ་མི་རྒྱུན་འཛིན་ཇི་ལྟར་བྱེད་ཐུབ་སོང་བ་ཡིན་ནམ་ཞེ་ན། དེ་ནི་གཞན་གང་ཡང་མ་ཡིན་པར་གོང་ས་མཆོག་གི་རིན་ཐང་བྲལ་བའི་བཀའ་སློབ་ལམ་སྟོན་དང་། བོད་མི་གཞིས་ཆགས་པ་ཚོའི་མ་ཤི་བར་དུ་མི་གཏོང་བའི་དཀའ་སྤྱད་འབད་བརྩོན། བོད་མིའི་རྒྱབ་སྐྱོར་བ་ཚོའི་བླ་ན་མེད་པའི་ལྷག་བསམ་སོགས་དང་ཡོངས་སུ་འབྲེལ་བསྡད་ཡོད་པ་ཞིག་རེད་ལ། རྨང་གཞིའི་རྟེན་ས་ཉག་གཅིག་ནི་བོད་མི་གཞིས་ཆགས་པ་ཚོ་ས་གནས་གཅིག་ཏུ་འཚོ་སྡོད་བྱེད་སའི་གཞིས་ཆགས་གྲོང་སྡེ་མང་པོ་ཞིག་ཡོད་པས་རེད།
གོང་གསལ་རྒྱ་གར་བུ་མོ་ཕུར་པ་ལྷ་མོའི་ནང་མིའི་གཏམ་རྒྱུད་ངོ་མཚར་ལ་ཡིད་དབང་འཕྲོག་པ། སེམས་ཤུགས་བསྐྱེད་ཅིང་མིག་རྒྱ་བསྐྱེད་ཐུབ་པ་འདི་ལས་ང་ཚོས་ཅི་ཞིག་མཐོང་ཐུབ་བམ་ཞེ་ན། ད་ཆ་ཕལ་མོ་ཆེ་ཞིག་འཇིག་རྟེན་ཕྱི་མར་གཤེགས་ཟིན་པའི་བཙན་བྱོལ་བོད་མི་རྒན་རབས་པ་དེ་ཚོའི་དཀའ་སྤྱད་འབད་བརྩོན་གྱི་སྙིང་སྟོབས་ང་ཚོས་ནམ་ཡང་བརྗེད་མི་རུང་ཞིང་། གོང་ས་མཆོག་གི་གསེར་ཞལ་དྲོན་མོའི་མདུན་ས་འདི་ཉིད་དུ། ང་ཚོས་སྲིད་སྤྱིའི་དོན་དག་ཆུང་ཆུང་འདི་ཙམ་ཞིག་གཞི་རྩར་བཞག་ནས་སྤུན་ཟླ་ནང་འཁྲུག་རྒྱག་མི་རུང་ལ། ང་ཚོས་ཆོལ་ཁ་དང་ཆོས་བརྒྱུད་ཀྱི་ཞེན་ཁོག་ཆུང་ཆུང་ཞིག་རྒྱབ་རྩར་དྲངས་ནས་མཐུན་སྒྲིལ་གཏོར་བཤིག་གཏོང་མི་རུང་བ་དེ་ཡང་ཡིན་ནོ།།
ཚང་མ་ལ་བཀྲ་ཤིས་བདེ་ལེགས་ཞུ་ཞུའོ།།
གསར་འགྱུར་ཡག་པོ་འདུག
ཧ་ཅང་བཟང་གི་ཁ་དྲོ་ཁྱེད་ཀྱི་དཔྱད་རྩོམ་མང་པོ་མཇལ་མྱོང་ལ་
དོན་སྙིང་དང་ལྡན་པ་། རོ་བཅུད་དང་ལྡན་པ་། ཞིམ་མངར་དང་ལྡན་པ་ཞིག་འདུག་ན་བཀྲིན་ཆེ་
ཐུགས་རྗེ་ཆེ་།
བཀའ་དྲིན་ཆེ་ཁྱེད་ཀྱིས་བོད་མི་རིགས་སྤྱི་ལ་ལྷག་བསམ་ལྷད་མེད་བཅང་བའི་བསླབ་བྱ་ལ་ནམ་ཡང་གུས། ???/:rose/:rose/:rose