༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་ལ་རྒྱལ་སྤྱིའི་འཐུས་ཚབ་ཀྱིས་མཇལ་འཕྲད་ཞུ་རུ་འཇུག་དགོས།

ཨ་རིའི་གྲོས་ཚོགས་ཀྱིས་རྒྱ་ནག་སྐོར་གྱི་སྙན་ཐོ་ཤོག་གྲངས་ ༣༧༠ ལྷག་ཅན་ཞིག་བཏོན་ཏེ་རྒྱ་ནག་གཞུང་གིས་དེ་སྔ་ལྟར་འདས་ལོར་ཡང་བོད་རྒྱ་འབྲེལ་མོལ་ཡོང་ཐབས་ཐད་འབད་བརྩོན་བྱས་མེད་པ་མ་ཟད་མུ་མཐུད་ནས་བོད་ནང་གི་བོད་མི་ཚོའི་ཆོད་དད་རང་དབང་སྨྲ་བརྗོད་རང་དབང་བཅས་པར་དམ་དྲག་བྱེད་བཞིན་ཡོད་སྐོར་བརྗོད་འདུགཁ་སང་ཨ་རིའི་གྲོས་ཚོགས་ཀྱི་རྒྱ་ནག་སྐོར་གྱི་ཚོགས་ཆུང་ (Congressional-Executive Commission on China) གིས། ཕྱི་ལོ་ ༢༠༢༠ ལོའི་རྒྱ་ནག་ནང་གི་འགྲོ་བ་མིའི་ཐོབ་ཐང་དང་ཁྲིམས་ཀྱི་དབང་བསྒྱུར་སྐོར་གྱི་ལོ་འཁོར་སྙན་ཐོ་བཏོན་པའི་ནང་བོད་དང་འབྲེལ་ཏེ། རྒྱ་ནག་གཞུང་གིས་དེ་སྔ་ལྟར་འདས་ལོ་ཡང་བོད་རྒྱ་འབྲེལ་མོལ་ཡོང་ཐབས་ཐད་འབད་བརྩོན་བྱས་མེད་པ་དང་། རྒྱ་ནག་གཞུང་གིས་མུ་མཐུད་ནས་བོད་ནང་གི་བོད་མི་ཚོའི་ཆོད་དད་རང་དབང་། སྨྲ་བརྗོད་རང་དབང་བཅས་པར་དམ་དྲག་བྱེད་བཞིན་ཡོད་སྐོར་དང་། ༧པཎ་ཆེན་རིན་པོ་ཆེ་མཆོག་དང་འབྲེལ་ཨ་རིའི་གཞུང་ངོས་ནས་རྒྱ་ནག་གཞུང་ལ་རྒྱལ་སྤྱིའི་སྒྲིག་འཛུགས་གཅིག་གི་འཐུས་ཚབ་ཅིག་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་ལ་མཇལ་འཕྲད་ཞུ་རྒྱུར་མགྲོན་འབོད་དགོས་པའི་འབོད་སྐུལ་ཞུ་དགོས་སྐོར་བཀོད་ཡོད་འདུག

འདི་ལོའི་སྙན་ཐོ་དང་འབྲེལ་གྲོས་ཚོགས་ཀྱི་ཚོགས་ཆུང་དེའི་ཚོགས་གཙོ་བོད་དོན་རྒྱབ་སྐྱོར་བ་སྐུ་ཞབས་ཇིམ་མེག་གྷོ་ཝན་ (Jim McGovern) ལགས་ཀྱིས། འདས་པའི་ལོའི་ནང་རྒྱ་ནག་གཞུང་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་དང་ཁྲིམས་ཀྱི་དབང་བསྒྱུར་ལ་སྔར་མེད་ཀྱི་དམ་དྲག་ཤུགས་ཆེན་པོ་བྱས་ཡོད། ཨ་རིའི་གཞུང་ངོས་ནས་རྒྱ་ནག་གི་མི་མང་ཚོའི་འཐབ་རྩོད་ལ་རྒྱབ་སྐྱོར་དང་། རྒྱལ་སྤྱིའི་ཐོག་རྒྱ་ནག་གཞུང་གི་བྱ་སྤྱོད་ལ་གདོང་ལེན་བྱ་རྒྱུའི་མཉམ་འབྲེལ་ནུས་པ་མཐོར་འདེགས་དང་སྣེ་ཁྲིད་བྱེད་དགོས་པ་མ་ཟད། ཨ་རིའི་གྲོས་ཚོགས་དང་བདམས་ཐོན་སྲིད་འཛིན་བྷའེ་ཌིན་གྱི་སྲིད་གཞུང་གསར་པས་སྙན་ཐོ་འདིའི་ནང་མཚམས་སྦྱོར་བྱས་པའི་ཐབས་ཇུས་དག་ལག་བསྟར་བྱ་དགོས་ཤིང་། ཨ་རྒྱའི་འབྲེལ་ལམ་ནང་རྒྱལ་སྤྱིའི་འགྲོ་བ་མིའི་ཐོབ་ཐང་དང་ཁྲིམས་ཀྱི་དབང་བསྒྱུར་གཉིས་གཙིགས་ཆེར་འཛིན་དགོས་པ་ཡིན། ཞེས་གསུངས་འདུག་ལ། དེ་བཞིན་ཚོགས་གཙོ་རུ་བྷིའོ་ (Marco Rubio) ལགས་ཀྱིས་ཀྱང་། ཨ་རིའི་གྲོས་ཚོགས་ཀྱིས་བཞག་པའི་ཧོང་ཀོང་དང་། བོད། ཤིན་ཅང་བཅས་དང་འབྲེལ་བའི་ཁྲིམས་ཡིག་དེ་དག་གིས་ཨ་རིའི་སྲིད་ཇུས་དེ་བཟང་ཕྱོགས་སུ་བསྒྱུར་ཡོད་ཀྱང་། འབྱུང་འགྱུར་ཨ་རིའི་ངོས་ནས་རྒྱ་ནག་གཞུང་གིས་རྒྱ་ནག་དེ་དོགས་ཟོན་ལྟ་རྟོག་འོག་གི་རྒྱལ་ཁབ་ཅིག་ཏུ་བསྒྱུར་བཞིན་པའི་གནད་དོན་དེ་གླེང་སློང་བྱ་དགོས་སྐོར་གསུངས་ཡོད་འདུག

སྙན་ཐོ་འདི་ནི་ཕྱི་ལོ་ ༢༠༡༩ ལོའི་ཟླ་ ༧ ཚེས་ ༡ ནས་འདས་ལོའི་ཕྱི་ཟླ་ ༧ ཚེས་ ༡ བར་གྱི་གནས་ཚུལ་ལ་གཞིར་བཟུང་པ་ཞིག་དང་། ཁྱོན་ཤོག་གྲངས་ ༣༧༠ ལྷག་ཡོད་པའི་ཁྲོད་བོད་དང་འབྲེལ་ནས། འདས་ལོར་རྒྱ་ནག་གཞུང་གི་བོད་བརྒྱུད་ནང་བསྟན་ལྷན་ཚོགས་ཀྱིས་བོད་བརྒྱུད་ནང་བསྟན་གྱི་ཆོས་ལུགས་དབུ་འཁྲིད་ངོས་འཛིན་བྱེད་ཕྱོགས་དང་། བོད་བརྒྱུད་ནང་བསྟན་གྱི་ལྟེ་གནས་ཁག་ཏུ་མགོ་འཁྲིད་འདེམས་ཕྱོགས་ཀྱི་ཁྲིམས་སྒྲིག་བསྐྱར་བཅོས་བྱས་པ་དང་། བོད་མི་སྒེར་ལ་ཆོས་ལུགས་ཀྱི་དུས་ཆེན་སྲུང་གཙི་བྱ་རྒྱུར་བཀག་འགོག་བྱས་པ་སོགས་བོད་མིའི་ཆོས་དད་ལ་སྟངས་འཛིན་བཀག་སྡོམ་བྱས་པའི་གནས་ཚུལ་སྐོར་དང་། དེ་བཞིན་རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་དབུས་པའི་བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་གྱི་ལམ་ལུགས་ནང་ཐེ་གཏོགས་བྱས་ཡོད་པ་དང་། བོད་རང་སྐྱོང་ལྗོངས་ཟེར་བས་མི་རིགས་མཐུན་སྒྲིལ་སྲོལ་ཡིག་ཅེས་པ་ལག་བསྟར་བྱས་ཏེ། བོད་མིའི་སྤྱི་ཚོགས་ཁྱོན་ཡོངས་ནང་དམར་ཤོག་ཚོགས་པའི་ལྟ་བ་ལངས་ཕྱོགས་སྲ་བརྟན་གོང་འཕེལ་གཏོང་ཐབས་བྱས་ཡོད་པ་དང་། སྤྱིར་བོད་ནང་དེ་སྔ་དང་བསྡུར་ན་རང་ལུས་མེར་སྲེག་གཏོང་མཁན་ཇེ་ཉུང་དུ་སོང་ཡོད་ཀྱང་། ཕྱི་ལོ་ ༢༠༡༩ ལོའི་ཕྱི་ཟླ་ ༡༡ པའི་ནང་རང་ལོ་ ༢༤ ལ་སོན་པའི་བོད་མི་ཡོན་ཏན་ལགས་ཀྱིས་རང་ལུས་མེར་བསྲེགས་གནང་སྟེ། ཕྱི་ལོ་ ༢༠༠༩ ནས་ད་བར་ཁྱོན་བོད་མི་ ༡༥༠ ལྷག་གིས་རང་ལུས་མེར་བསྲེགས་ཡོད་པ་དང་། ཕྱོགས་ཡོངས་ནས་རྒྱ་ནག་གཞུང་གིས་བོད་ནང་ཆོས་དད་རང་དབང་དང་། གཞུང་ལ་སྐྱོན་བརྗོད་བྱ་རྒྱུས་མཚོན་པའི་སྨྲ་བརྗོད་རང་དབང་ལོངས་སུ་སྤྱོད་མཁན་ཚོར་ཁྲིམས་ཆད་བཅད་ཡོད་སྐོར་སོགས་བཀོད་ཡོད་འདུག

གཞན་ཡང་། ཚོགས་ཆུང་གིས་བོད་དང་འབྲེལ་ནས་ཨ་རིའི་གཞུང་དང་གྲོས་ཚོགས་ཀྱིས་ལག་བསྟར་བྱ་དགོས་པའི་སྲིད་བྱུས་མཚམས་སྦྱོར་ནང་། བོད་ཀྱི་སྲིད་བྱུས་དང་རྒྱབ་སྐྱོར་ཁྲིམས་འཆར་གཏན་འབེབ་བྱས་ཏེ། ཨ་རིས་བོད་ནང་གི་ཆོད་དད་རང་དབང་དང་བོད་མིའི་ཐུན་མིན་ངོ་བོ་སྲུང་སྐྱོང་སོགས་ལ་མུ་མཐུད་རྒྱབ་སྐྱོར་བྱེད་ཀྱི་ཡོད་པ་དང་། ལྷག་པར་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་དེ་༧གོང་ས་མཆོག་སྐུ་ཉིད་དང་བོད་བརྒྱུད་ནང་བསྟན་གྱི་མགོ་འཁྲིད། བོད་མི་ཁོ་ནས་ཐག་གཅོད་བྱ་རྒྱུའི་གནད་དོན་ཞིག་ཡིན་པ་ཨ་རིའི་སྲིད་ཇུས་སུ་འགོད་དགོས་པ་དང་། ཨ་རིའི་འཛིན་སྐྱོང་ངོས་ནས་བོད་དོན་དམིགས་བསལ་འབྲེལ་མཐུད་པ་དེ་དྲུང་ལས་ (under secretary) དང་དེའི་ཡན་གྱི་གནས་རིམ་ཅན་ཞིག་བསྐོ་དགོས་པ། རྒྱ་ནག་གཞུང་ལ་༧གོང་ས་མཆོག་བདེ་འཇགས་ཀྱི་ཉེན་ཁ་ཞིག་ཏུ་ངོས་འཛིན་བྱེད་བཞིན་པ་མཚམས་འཇོག་བྱས་ཏེ། ཕྱོགས་གཉིས་བར་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་མིང་དོན་མཚུངས་པའི་གྲོས་མོལ་བསྐྱར་གསོ་དགོས་པའི་སྐུལ་འདེད་བྱེད་ཐབས་དང་། ཨ་རིའི་གཞུང་འབྲེལ་དཔོན་རིགས་དང་མི་སྣ་ཚོས་རྒྱ་ནག་གཞུང་གི་མི་སྣ་དང་ཐུག་འཕྲད་བྱེད་སྐབས། བོད་ཀྱི་ཆབ་སྲིད་བཙོན་པ་རྣམས་ཀློད་གྲོལ་དགོས་པ་དང་། རྒྱ་ནག་གཞུང་གིས་བོད་མི་གང་བྱུང་བཙོན་འཇུག་དང་གཅར་རྡུང་། གར་སོང་ཆ་མེད་དུ་གཏོང་ཐབས་ཀྱི་དྲག་གནོན་རིགས་མཚམས་འཇོག་དགོས་པའི་སྐུལ་འདེད་བྱ་དགོས་སྐོར་བཀོད་ཡོད་འདུག

དེ་བཞིན་ཐེངས་འདིའི་སྙན་ཐོའི་ནང་། འདས་ལོར་རྒྱལ་སྤྱིའི་སྟེང་རྒྱ་ནག་གཞུང་གིས་ཡུ་གུར་མི་རིགས་ཐོག་དྲག་གནོན་བྱེད་བཞིན་པའི་བདེན་དཔང་གསར་པ་མི་ཉུང་བ་ཞིག་ཐོན་པ་གཞིར་བཟུང་ན། རྒྱ་ནག་གཞུང་གིས་ཤར་ཊུར་ཀི་སི་ཐན་(ཤིན་ཅང་)ཁུལ་གྱི་ཡུ་གུར་གཙོས་པའི་ཁ་ཆེ་གྲངས་ཉུང་མི་རིགས་རྩ་མེད་ (genocide) གཏོང་བཞིན་ཡོད་སྲིད་སྐོར་བརྗོད་འདུག་པ་མ་ཟད། ཨ་རིའི་གཞུང་ངོས་ནས་གཞུང་འབྲེལ་གྱི་ཐོག་ནས་ཤིན་ཅང་ཁུལ་དུ་གཏུམ་སྤྱོད་སྤེལ་ཡོད་མེད་ཐག་གཅོད་བྱེད་སྐོར་རེ་སྐུལ་ཞུས་ཡོད་འདུག ཉེ་ལམ་རྒྱལ་སྤྱིའི་སྟེང་རྒྱ་ནག་གཞུང་གིས་ཡུ་གུར་མི་རིགས་རྣམས་བཀག་སྐྱིལ་ཁང་དུ་བཅུག་སྟེ། རྒྱའི་བཟོ་གྲྭ་ཁག་ཏུ་བཙན་གྱིས་ངལ་རྩོལ་བྱེད་དུ་འཇུག་གི་ཡོད་པ་མ་ཟད། ཡུ་གུར་གྱི་བུད་མེད་རྣམས་ཀྱི་སྐྱེ་སྒོ་འགོག་གི་ཡོད་པའི་གནས་ཚུལ་ཐོན་བཞིན་པར་བརྟེན། ཨ་རི་གཙོས་པའི་དབྱིན་ཡུལ་དང་། ཁ་ན་ཌ་བཅས་ནས་ཤིན་ཅང་ནས་ཐོན་སྐྱེད་བྱས་པའི་སྲིན་བལ་སོགས་དངོས་ཟོག་རྣམས་བཀག་འགོག་བྱ་རྒྱུའི་ཐག་གཅོད་བྱས་ཡོད་པ་རེད་འདུག

གསར་འགོད་པ། པ་སངས་ཚེ་རིང་།