ཨ་རིའི་སྲིད་འཛིན་ཞིག་གི་མི་ཚེ་གླེང་བ། 

བསྟན་འཛིན་ཕུར་བུ། དུས་བབ།

བྷའེ་ཌིན་ཞེས་པའི་ཁྱིམ་རྒྱུད་དེ་ནི་ཕྱི་ལོ་ ༡༨༢༢ ཙམ་ལ་དབྱིན་ཡུལ་ནས་ཨ་རིའི་མཱ་རི་ལན་ཌི་མངའ་སྡེའི་ནང་དུ་གཞིས་སྤོ་བྱས་པ་ཞིག་ཡིན་འདུག་ལ། ཨ་རིའི་སྲིད་འཛིན་ཞེ་དྲུག་པ་ཇོ་བྷའེ་ཌིན་ལགས་ཀྱི་པཱ་ལགས་ཇོ་སི་ཧྥི་རོ་བྷི་ནི་བྷའེ་ཌིན་ (Joseph Robinett Biden Sr.) དང་། ཨ་མ་ལགས་ཁཱ་ཊི་རིན་ཧྥིན་གྷན་བྷའེ་ཌིན་(Catherine Finnegan Biden) གཉིས་ཀྱིས་ཨ་རིའི་སྣུམ་གྱི་ཚོང་གཉེར་ཁང་ཞིག་ཏུ་ལས་ཀ་བྱས་ཏེ་དཔལ་འབྱོར་གྱི་གནས་སྟངས་ཡག་པོ་ཡོད་ཀྱང་། ཕྱི་ལོ་ ༡༩༤༢ ལོར་ཇོ་བྷའེ་ཌིན་སྐྱེས་པ་དང་། དེ་ནས་བུ་ཧྥན་ཁི་བྷའེ་ཌིན་ Francis William “Frank” Biden  དང་ ཇེམ་བྷའེ་ཌིན་(James Brian “Jim” Biden)། བུ་མོ་ཝེ་ལི་རི་བྷའེ་ཌིན་(Valerie Biden Owens) བཅས་བྱིས་པ་བཞི་རིམ་པར་སྐྱེས་ཡོད་པ་དང་། པཱ་ལགས་ལས་མེད་དུ་ཡུན་རིང་ལྷག་པ་སོགས་ཀྱིས་ཁྱིམ་ཚང་གི་དཔལ་འབྱོར་གནས་སྟངས་ཡང་ཅུང་ཉམས་ཞན་དུ་གྱུར་ཏེ། བཟའ་མི་དྲུག་གི་འཚོ་བའི་ཐད་དཀའ་ངལ་མང་པོ་འཕྲད་པར་བརྟེན།  ཁཱ་ཊི་རིན་ཧྥིན་གྱི་ཕ་མ་གཉིས་ཀྱི་ཁྱིམ་དུ་གནས་སྐབས་རིང་གནས་ཚང་གཡར་ཏེ་སྡོད་དགོས་བྱུང་།

སྡུག་རུས་ཅན་གྱི་གཞོན་ནུ།  

ཇོ་བྷའེ་ཌིན་ཆུང་བའི་དུས་སུ་ཁ་དིག་ཐོ་ཞིག་ཡོད་པས་དུས་རྒྱུན་བྱིས་པ་ཚོས་འཕྱ་ལས་རྒྱག་པ་དང་བརྙས་བཅོས་མང་པོ་བཏང་ཡོད་སྟབས། ཨ་མ་ལགས་ཀྱིས་ཁོང་ལ་སེམས་ཤུགས་སྐྱེད་པའི་སློབ་གསོ་མང་དུ་བཏང་བ་མ་ཟད། ཁོང་གི་སྨྲ་བརྗོད་ཀྱི་ནུས་པ་གོང་འཕེལ་དུ་གཏོང་ཆེད་ཉིན་ལྟར་ཆུ་ཚོད་ ༡ རེར་སྙན་ངག་ཀློག་འདོན་བྱེད་དུ་བཅུག་པ་དེས་ཁོང་གི་ངག་རྩལ་ལ་ཕན་ཐོགས་ཆེན་པོ་བྱུང་།

ཇོ་བྷའེ་ཌིན་ལགས་ཀྱི་སྦྱང་འབྲས་དེ་ཙམ་ཡག་པོ་མེད་ཀྱང་སྡུག་རུས་ཅན་དང་རེ་སྙེག་ལ་ཞུམ་པ་མེད་པའི་གཞོན་ནུ་ཞིག་ཡིན་འདུག ཁོང་ཌི་ལ་ཝར་དུ་ཡོད་པའི་ (Archmere Academy) མཐོ་སློབ་ཏུ་སློབ་གཉེར་གནང་སྐབས་ཁོང་འཛིན་གྲྭའི་རྒན་བདག་ཏུ་བདམས་ཡོད་འདུག ཕྱི་ལོ་ ༡༩༦༥ ལོར་ཨ་རིའི་སྒེར་གཉེར་མཐོ་སློབ་(University of Delaware, Newark) ནས་རབ་འབྱམས་པའི་བསླབ་པ་མཐར་སོན། དེ་ནས་ཁྲིམས་ལུགས་མཐོ་སློབ་ (Syracuse University) ཏུ་ཞུགས་ཏེ་ ༡༩༦༨ ལོར་ཁྲིམས་ལུགས་རིག་པའི་འབུམ་རམས་པ་ཐོན་ཡོད་འདུག

ཕྱི་ལོ་ ༡༩༦༩ ལོར་ཁོང་ཌི་ལ་ཝར་(Delaware) མངའ་སྡེའི་དྭང་བླངས་ཀྱི་ཁྲིམས་རྩོད་ཆེད་ལས་པའི་ཚོགས་པ (Delaware State Bar Association) ནང་འཛུལ་ཞུགས་བྱས་ཏེ་ཁྲིམས་རྩོད་པའི་ཆེད་ལས་སྦྱོང་བརྡར་བྱས་པའི་ཞོར་དུ། ས་གནས་དམངས་གཙོ་ཚོགས་པའི་སྣེ་འཁྲིད་འོག་ཁོང་གིས་སྤྱི་དམངས་ཀྱི་ཐོབ་ཐང་སྲུང་སྐྱོབ་དང་འབྲེལ་བའི་ཁྲིམས་ཀྱི་ཕྱག་ལས་གནང་ཡོད་པ་མ་ཟད། ཁྲིམས་རྩོད་པ་གཞན་དང་མཉམ་དུ་ཁྲིམས་རྩོད་པའི་ལས་གཉེར་ཁང་དུ་ (law firm) (corporate law) བཙུགས་ནས་གཙོ་གཉེར་བའི་འགན་འཁུར། འོན་ཀྱང་། ཚོགས་པའི་ཟླ་ཕོགས་ཞན་རྐྱེན་ཞོར་དུ་ཁོང་གིས་ས་ཁང་ཚོང་བསྒྱུར་གྱི་ལས་ཀ་བྱས་ཏེ་ལས་དོན་དང་འཚོ་བའི་མཐུན་རྐྱེན་དོ་མཉམ་པ་ཞིག་ཡོང་ཐབས་སུ་འབད་བརྩོན་བྱས།

ཕྱི་ལོ་ ༡༩༦༩ ལོའི་ལོ་མཇུག་ཏུ་ཁོང་ས་གནས་ཀྱི་སྤྱི་མཐུན་ཚོགས་པའི་རྫོང་ཁོངས་ཀྱི་ (New Castle County) ཡི་ས་འཐུས་སུ་བདམས་ཡོད་པ་དང་། ཁོང་གིས་ཕྱི་ལོ་ ༡༩༧༠ ལོར་ཉེ་བའི་གྲོང་སྡེར་མི་མང་གི་སྡོད་ཁང་དགོས་པར་རྒྱབ་སྐྱོར་བྱས། ཕྱི་ལོ་ ༡༩༧༢ བར་དུ་ས་ཁུལ་གྱི་འཐུས་མིའི་ལས་འགན་འཁུར་བ་དང་དུས་མཚུངས་སུ་སྔར་བཞིན་ཁྲིམས་དོན་ཞབས་ཕྱི་ཞུས། ཕྱི་ལོ་ ༡༩༧༢ ལོར། ཌི་ལ་ཝར་ (Delaware) གྱི་ཨ་རིའི་གྲོས་ཚོགས་གོང་མའི་འཐུས་མིའི་འདེམས་སྒྲུག་ཁྲོད།  ཇོ་བྷའེ་ཌན་ལགས་སུ་འོས་ཤོག་གི་བརྒྱ་ཆ་ ༥༠.༥ ཐོབ་སྟེ། སྤྱི་མཐུན་ཚོགས་པའི་འོས་མི་ཇེམ་སི་ཁ་ལེབ་བྷོག་སི་ (James Caleb Boggs) ཕམ་ཉེས་སུ་བཏང་ནས་གྲོས་ཚོགས་གོང་མའི་འཐུས་མིར་བདམས་ཐོན་བྱུང་ཡོད་པ་དང་། སྐབས་དེར་རང་ལོ་ ༣༠ ལ་སོན་ཙམ་གྱི་ཇོ་བྷའེ་ཌིན་ལགས་ནི་ཨ་རིའི་གྲོས་ཚོགས་གོང་མའི་ལོ་རྒྱུས་ནང་གི་འཐུས་མི་གཞོན་ཤོས་དྲུག་པ་དེ་ཆགས།

བྷའེ་ཌིན་གྱི་གཉེན་སྒྲིག་དང་པོ།

བྷའེ་ཌིན་རང་ལོ་ ༢༠ ཡས་མས་ལ་སོན་པའི་དཔྱིད་ཀའི་སྤྲོ་སེང་ཞིག་གི་སྐབས་སུ། འཚོལ་སྙེག་གི་ལམ་དུ་ཞུགས་པའི་གཞོན་ནུ་ཁོང་དང་། གཞོན་ནུ་མ་ནེ་ལཱ་ཧཱན་ཊར་ (Neilia Hunter) གཉིས་ཐོག་མར་ཆུ་རྐྱལ་ཁང་ཞིག་ཏུ་ངོ་ཐུག་སྟེ་དགའ་རོགས་སུ་གྱུར།  འོན་ཀྱང་། ཧཱན་ཊར་གྱི་ཁྱིམ་ཚང་ནི་རོ་མན་ཁའེ་ཐཱོ་ལིག་གི་རྗེས་འབྲང་བ་ཞིག་ཡིན་པས་ཁོང་གཉིས་གཉེན་སྒྲིག་བྱེད་པར་ཕ་མ་གཉིས་ཀྱིས་མོས་མཐུན་བྱས་མེད་ཀྱང་། ཕྱིས་སུ་གཞོན་ནུ་ཕོ་མོ་གཉིས་ཀྱི་རེ་འདོད་དུ་བཞག་སྟེ་ཕྱི་ལོ་ ༡༩༦༦ ཟླ་ ༨ ཚེས་ ༢༧ ཉིན་ཁོང་གཉིས་ཀྱིས་གཉེན་སྒྲིག་བྱས། ཁོང་གཉིས་ལ་བུ་བྷོ་བྷའེ་ཌིན་(Joseph Robinette “Beau” Biden) དང། ཧཱན་ཊར་བྷའེ་ཌིན་ (Robert Hunter Biden) ། བུ་མོ་ཨེ་མི་བྷའེ་ཌིན་བཅས་ (Naomi Christina “Amy”) བཅས་སྔ་གཞུག་ཏུ་བུ་གཉིས་དང་བུ་མོ་ཞིག་སྐྱེས་ཏེ་ཁྱིམ་ཚང་དྲོ་སོབ་སོབ་ཞིག་ཏུ་གྱུར།

ཕྱི་ལོ་ ༡༩༧༢ ལོར་བྷའེ་ཌིན་ཨ་རིའི་གྲོས་ཚོགས་གོང་མའི་འཐུས་མིར་འོས་འདེམས་བྱུང་སྟེ་ཟླ་གཅིག་ཙམ་ལས་མ་འགོར་བའི་སྐབས་དེར། ཁོང་ལ་བསམ་ཡུལ་ལས་འདས་ཞིང་བཟོད་པར་དཀའ་བའི་རྐྱེན་ངན་ཞིག་བྱུང་། ལོ་དེའི་ཕྱི་ཟླ་ ༡༢ ཚེས་ ༡༨ ཉིན་ཁོང་གི་ལྕམ་ཧཱན་ཊར་གྱིས་བྱིས་པ་གསུམ་འཁྲིད་དེ་སྒེར་འཁོར་བཏང་ནས་ཡེ་ཤུའི་འཁྲུངས་སྐར་དུས་ཆེན་གྱི་ཉོ་ཆ་རྒྱག་ཏུ་ཕྱིན་པའི་ལམ་བར་དུ།  སྟབས་མ་ལེགས་པར་རླངས་འཁོར་ཆེན་པོ་ཞིག་ལ་གདོང་ཐུག་བརྒྱབ་སྟེ། ཨ་མ་དང་ལོ་གཅིག་ཙམ་ལོན་པའི་བུ་མོ་གཉིས་ཝིལ་མིན་ཊོན་སྨན་ཁང་ (Wilmington General Hospital) དུ་བསླེབས་པ་དང་འདས་གྲོངས་སུ་ཕྱིན་ཡོད་པ་དང་། རང་ལོ་༣ དང་ ༤ ཙམ་ཡིན་པའི་བུ་གཉིས་ལའང་རྨས་སྐྱོན་ཚབས་ཆེན་ཕོག་ཡོད་སྟབས། ཁོང་གིས་གྲོས་ཚོགས་གོང་མའི་འཐུས་མི་ནས་རྩ་དགོངས་ཞུས་ཏེ་བུ་གཉིས་ལ་ལྟ་སྐྱོང་གནང་རྒྱུའི་སེམས་ཐག་བཅད་ཡོད་ཀྱང་། སྐབས་དེའི་གྲོས་ཚོགས་གོང་མའི་དམངས་གཙོ་ཚོགས་པའི་དབུ་འཁྲིད་མེག་མན་སི་ཧྥིལ་ (Mike Mansfield) ལགས་ནས་བྷའེ་ཌིན་གྱིས་འཐུས་མི་ནས་རྩ་དགོངས་མི་ཞུ་བའི་རེ་སྐུལ་གནང་བ་ལྟར། ཕྱི་ལོ་ ༡༩༧༣ ཟླ་ ༡ ཚེས་ ༥ ཉིན་ཇོ་བྷའེ་ཌིན་གྱིས་བུ་གཉིས་ཀྱི་ནད་གསོ་ཁང་ (Delaware Division of the Wilmington Medical Center) དུ། གྲོས་ཚོགས་གོང་མའི་དྲུང་ཡིག་ཆེན་མོ་ཧྥན་སེ་སི་ཨར་ཝལ་ལོ་ (Francis R. Valeo) ཡི་མདུན་དུ་འཐུས་མིའི་དམ་བཅའ་ཕུལ། དེ་ནས་བཟུང་ཁོང་གིས་ཌི་ལ་ཝར་གྱི་རང་ཁྱིམ་ནས་མེ་འཁོར་གྱིས་ཕར་ཚུར་ཆུ་ཚོད་ ༨ ལྷག་དགོས་པའི་རྒྱལ་ས་ཝ་ཤིང་ཊོན་བར་འགྲུལ་བཞུད་བྱས་ཏེ། རྨས་སྐྱོན་ཕོག་པའི་བུ་གཉིས་ལ་ལྟ་སྐྱོང་དང་གྲོས་ཚོགས་གོང་མའི་འཐུས་མི་ཞིག་གི་འོས་འགན་ཕྲག་ཏུ་བླངས།

ཕ་རྒན་གྱིས་དཀའ་བ་བརྒྱ་ཕྲག་དྭང་དུ་བླངས་ཏེ་ཡུན་རིང་བུ་གཉིས་ལ་སྨན་བཅོས་དང་ལྟ་སྐྱོང་ལྷོད་མེད་བྱས་མཐར་དྲག་སྐྱེད་བྱུང་བ་དང་། བུ་རྒན་པ་བྷོ་བྷའེ་ཌིན་གྱིས་ཕ་ཡི་རེ་བ་ལྟར་ཁྲིམས་ལུགས་སློབ་སྦྱོང་བྱས་ཏེ། ཨ་རིའི་ས་ཐོག་དམག་དཔུང་ཁྲིམས་འཛིན་སྡེ་ཁག་གི་མགོ་འཁྲིད་ཅིག་ཏུ་གྱུར། འོན་ཀྱང་། ཕྱི་ལོ་ ༢༠༡༥ ཟླ་ ༥ ཚེས་ ༣༠ ཉིན་ཀླད་པའི་འབྲས་ནད་ཀྱིས་བུ་བྷོ་བྷའེ་ཌིན་རང་ལོ་ ༤༦ ཐོག་འདས་གྲོངས་སུ་ཕྱིན་ཡོད་འདུག    ཕྱི་ལོ་ ༡༩༨༨ ལོར་ཇོ་བྷའེ་ཌིན་ལའང་ཀླད་པའི་ནད་གཞི་ཞིག་བྱུང་སྟེ་གཤག་བཅོས་བྱས་ཡོད་པ་མ་ཟད། ཟླ་བདུན་ཙམ་རིང་གྲོས་ཚོགས་གོང་མའི་ལས་གནས་སུ་ཞུགས་ཐུབ་མེད་པ་རེད།

བྷའེ་ཌིན་གྱི་གཉེན་སྒྲིག་གཉིས་པ།

ཕྱི་ལོ་ ༡༩༧༥ ལོར་བྷའེ་ཌན་དང་བྱང་ཝིར་ཇི་ནི་ཡ་མཐོ་སློབ་ (Northern Virginia Community College) ཀྱི་སློབ་དཔོན་ཆེན་མོ་ལྕམ་ཇིལ་ཊི་རེ་སའེ་ཇཱ་ཀོབ་ (Jill Tracy Jacobs) གཉིས་ངོ་ཐུག་པ་དང་། བུ་གཉིས་ཀྱི་རེ་སྐུལ་དང་བྷའེ་ཌིན་གྱི་ཕུ་བོའི་གོ་སྒྲིག་ལྟར། ཕྱི ལོ་ ༡༩༧༧ ལོའི་ཟླ་ ༦ ཚེས་ ༡༧ ཉིན་ཨ་རིའི་གྲོང་ཁྱེར་ནེའུ་ཡོག་ཏུ་ཁོང་གཉིས་ཀྱིས་གཉེན་སྒྲིག་བྱས་ཡོད་པ་དང་། ཕྱི་ལོ་ ༡༩༨༡ ལོར་ཨེ་ཤི་ལེ་བྷ་ཛིར་བྷའེ་ཌིན་ (Ashley Blazer Biden) ཞེས་པའི་བུ་མོ་གཅིག་སྐྱེས། བུ་མོ་ཨེ་ཤི་ལེ་ནི་ཕ་རྒན་ལ་དཀོན་མཆོག་གིས་གནང་བའི་ནོར་བུ་བཞིན་དུ་ཕན་ཚུན་ལ་བརྩེ་ཞིང་གུས་པར་གྲགས་ལ། ཁོང་མོ་ནི་སྤྱི་ཚོགས་ཞབས་ཕྱི་བ་ཞིག་དང་དཔེ་གསར་འཆར་འགོད་པ་ཞིག་ཡིན་འདུག

སྲིད་འཛིན་འོས་ལངས་དང་པོ།

ཕྱི་ལོ་ ༡༩༨༨ ལོར་ཨ་རིའི་སྲིད་འཛིན་ཞེ་གཅིག་པ་འོས་འདེམས་བྱེད་སྐབས།  གྲོས་ཚོགས་གོང་མའི་འཐུས་མི་སྐུ་ཞབས་ཇོ་བྷའེ་ཌིན་ལགས་དམངས་གཙོ་ཚོགས་པའི་སྲིད་འཛིན་འོས་མིའི་ཁོངས་སུ་ལངས་ཡོད་པ་མ་ཟད།  འོས་མི་ཤུགས་རྐྱེན་ཆེ་ཤོས་ཤིག་ཏུ་ངོས་འཛིན་བྱས་ཡོད་ལ། སྐབས་དེར་ཁོང་སྲིད་འཛིན་དུ་བདམས་ཐོན་བྱུང་ཡོད་ཚེ།  ཨ་རིའི་ལོ་རྒྱུས་ནང་གི་སྲིད་འཛིན་དགུང་ལོ་གཞོན་ཤོས་ཇོན་ཨེ་ཧྥི་ཁན་ནི་ཌི་ (John F. Kennedy) རྗེས་ཀྱི་དགུང་ལོ་གཞོན་ཤོས་གཉིས་པ་དེ་ཆགས་ཡོད་པ་རེད། ཡིན་ནའང་། ཕྱི་ལོ་ ༡༩༨༧ ལོའི་ལོ་མཇུག་ཙམ་ནས་གསར་འགྱུར་བརྒྱུད་ལམ་དུ་ཁོང་གིས་དབྱིན་ཡུལ་གྱི་ངལ་རྩོལ་སྲིད་དོན་ཚོགས་པའི་མགོ་ཁྲིད་ནིལ་ཁིན་ནོག་ (Neil Kinnock) གཙོ་བོར་གྱུར་བའི་ཆབ་སྲིད་པ་གཞན་གྱི་གཏམ་བཤད་དཔེ་བཤུས་བྱས་ལུགས་དང་།  ཁོང་ཁྲིམས་ལུགས་མཐོ་སློབ་ཏུ་ཡོད་སྐབས་ཁོང་གིས་སྦྱང་འབྲས་རྩེར་སོན་པའི་སྐོར་གྱི་གཏམ་བཤད་དེ་ཚོ་དངོས་བདེན་མིན་ལུགས་ཀྱི་གནས་ཚུལ་བཀྲམ་སྟེ་གླེང་རྙོག་བཟོས་པར་བརྟེན།  ལོ་དེའི་ཕྱི་ཟླ་ ༩ ཚེས་ ༢༣ ཉིན་བྷའེ་ཌིན་གྱིས་དམངས་གཙོ་ཚོགས་པའི་འོས་མིའི་ཁོངས་ནས་རྩ་དགོངས་ཞུ་དགོས་བྱུང་། ཡིན་ནའང་། ཁོང་གིས་ཁོང་གི་འོས་མིའི་ཐོབ་ཐང་དེ་འདས་པའི་གནས་ཚུལ་དྲང་བདེན་མ་ཡིན་པ་དེ་ཚོས་ནག་གསུབ་བཏང་ཡོད་སྐོར་བརྗོད་དེ་ཁོང་རང་གི་རེ་ཞུ་ལྟར།  ཌི་ལ་ཝར་མངའ་སྡེའི་ཆེས་མཐོའི་ཁྲིམས་ཁང་གི་ཆེད་ལས་མི་སྣའི་ཚོགས་ཆུང་ཞིག་གིས།  བྷའེ་ཌིན་གྱི་གླེང་རྙོག་དེར་ཞིབ་བཤེར་བྱས་པ་བརྒྱུད་ཁོང་ནས་ཁྲིམས་འགལ་བྱས་མེད་པའི་བཅད་ཁྲ་བཏང་ཡོད་པ་རེད།

སྲིད་འཛིན་འོས་ལངས་གཉིས་པ།

ཕྱི་ལོ་ ༢༠༠༧ ཟླ་དང་པོའི་ནང་ཁོང་གིས་ ༢༠༠༨ ལོའི་ཨ་རིིའི་སྲིད་འཛིན་ཞེ་བཞི་པའི་འོས་མིའི་ཁོངས་སུ་ལངས་བའི་ཡོངས་ཁྱབ་གསལ་བསྒྲགས་བྱས་ཏེ།  དྲིལ་བསྒྲགས་ཀྱི་གཏམ་བཤད་སོགས་བྱས་ནས་ལས་འགུལ་གང་མང་སྤེལ་ཡོད་ཀྱང་དཔལ་འབྱོར་གྱི་དཀའ་ངལ་བྱུང་བའི་ཁར།   མི་མང་གིས་ཨ་ཧྤེ་རི་ཁའི་མི་རྒྱུད་ཨ་རི་བ་ཨོ་བྷ་མ་དང་།  གྲོས་ཚོགས་གོང་མའི་འཐུས་མི་ཇོན་མག་ཁན་ (John McCain) གཉིས་ལ་དོ་དབྱིངས་ཆེན་པོ་བྱས་ཏེ་བྷའེ་ཌིན་ལ་དོ་སྣང་བྱེད་མཁན་དེ་ཙམ་བྱུང་མེད།  ཕྱི་ལོ་ ༢༠༠༨ ལོའི་ཟླ་ ༡ ཚེས་ ༣ ཉིན་གྱི་འོས་འགྲན་དང་པོའི་ནང་བྷའེ་ཌན་ཨང་རིམ་ལྔ་པ་ཆགས་ཡོད་སྟབས།  ཉིན་དེའི་དགོང་མོར་ཁོང་གིས་སྲིད་འཛིན་གྱི་འོས་མིའི་ཁྲོད་ནས་ཕྱིར་འཐེན་བྱས།   སྲིད་འཛིན་གྱི་འོས་འགྲན་ཁྲོད།   བྷའེ་ཌིན་གྱིས་སྲིད་འཛིན་འོས་མི་ཨོ་བྷ་མ་ཡི་ཕྱི་འབྲེལ་སྲིད་ཇུས་རྣམས་ཁོང་རང་གི་ཐབས་ཇུས་ཡིན་སྐོར་སོགས་ཀྱི་སྐྱོན་བརྗོད་གཏམ་བཤད་སྤེལ་ཡོད་མིན་ལ་མ་ལྟོས་པར།  ཁོང་གཉིས་ཀྱི་འབྲེལ་བར་འགྱུར་ལྡོག་ཆེན་པོ་ཞིག་བྱུང་བའི་མགོ་བརྩམས།   ཨོ་བྷ་མས་སྒེར་འབྲེལ་གྱི་ཐོག་ནས་བྷའེ་ཌིན་སྲིད་འཛིན་གཞོན་པའི་འོས་མིར་མཚན་འདོན་བྱ་འདོད་ཡོད་པའི་བསམ་ཚུལ་བཏོན་པ་དང་།  བྷའེ་ཌིན་གྱིས་ཀྱང་རེ་བ་དེ་དྭང་དུ་བླངས་ཏེ།   ཕྱི་ལོ་ ༢༠༠༩ ནས་ ༢༠༡༧ བར་དུ་སྲིད་འཛིན་གཞོན་པའི་ལས་གནས་སུ་ཧུར་ཐག་འབད་ཐག་གིས་ཞུགས་པ་མ་ཟད། ཨོ་བྷ་མའི་ཕྱི་འབྲེལ་སྲིད་ཇུས་དང་དཔལ་འབྱོར་སྲ་བརྟན། དམག་དོན་སོགས་ཀྱི་ཐོག་གྲུབ་འབྲས་གང་ལེགས་ཐོན་ཡོད་པར་ངོས་འཛིན་བྱེད་ཀྱི་ཡོད་པ་རེད།

སྲིད་འཛིན་འོས་ལངས་གསུམ་པ། ཕྱི་ལོ་ ༢༠༡༦ ནས་བཟུང་གསར་འགྱུར་བརྒྱུད་ལམ་སོགས་ནས་བྷའེ་ཌིན་ཕྱི་ལོ་ ༢༠༢༠ ལོའི་སྲིད་འཛིན་འོས་མིར་ལངས་རྒྱུ་ཡིན་པའི་ཚོད་དཔག་མང་དུ་བྱས་པ་དང་།   ཕྱི་ལོ་༢༠༡༨ ལོར་བྷའེ་ཌིན་གྱིས་གལ་སྲིད་ང་འགྲོ་ཐུབ་པ་ཡིན་ན།   ང་རྒྱུག་ངེས་ཡིན་ཞེས་བརྗོད་དེ་འོས་མི་ཞིག་ཏུ་ངེས་གཏན་ལྟ་བུ་ཆགས་ཡོད་པ་ལྟར།   ཕྱི་ལོ་ ༢༠༡༩ ཟླ་ ༤ ཚེས་ ༢༥ ཉིན་ཁོང་གིས་སྲིད་འཛིན་འོས་མིའི་དྲིལ་བསྒྲགས་དངོས་སུ་མགོ་བཙུགས་ཡོད་པ་དང་།   ཕྱི་ལོ་ ༢༠༢༠ ཟླ་ ༨ ཚེས་ ༡༨ ཉིན་ཨ་རིའི་དམངས་གཙོ་ཚོགས་པས་ཁོང་སྲིད་འཛིན་འོས་མིར་གཏན་འཁེལ་བྱུང་བ་ཡོངས་ཁྱབ་བྱས།

ཁོང་གི་ཁ་གཏད་དུ་ལངས་བའི་དམངས་གཙོ་ཚོགས་པའི་སྲིད་འཛིན་འོས་མི་དང་།  གྲོས་ཚོགས་གོང་མའི་འཐུས་མི་ལྕམ་ཀ་མ་ལ་ཧེ་རི་སི་ (Kamala Devi Harris) ཡིས།   བྷའེ་ཌིན་གྱི་འཛིན་སྐྱོང་ནུས་པར་ལྷོད་གཡེང་ཆེ་བ་སོགས་ཀྱི་སྐྱོན་འཛུགས་བྱས་ཏེ་འགྲན་རྩོད་བྱས་ཡོད་ཀྱང་།  ཕྱི་ལོ་ ༢༠༡༩ ཟླ་ ༡༢ ཚེས་ ༣ ཉིན་ཁོང་མོས་སྲིད་འཛིན་འོས་མི་ནས་ཕྱིར་འཐེན་བྱས་ཡོད་པ་དང་།   བྷའེ་ཌིན་གྱིས་ཁོང་མོ་ཨ་རིའི་ལོ་རྒྱུས་ཁྲོད་ཀྱི་བུད་མེད་སྲིད་འཛིན་གཞོན་པ་ཐོག་མ་དེར་མཚན་འདོན་བྱས།  བྷའེ་ཌིན་དང་ཀ་མ་ལ་ཧེ་རི་སིས་སྤྱི་མཐུན་ཚོགས་པའི་སྲིད་འཛིན་འོས་མི་དང་ལས་ཐོག་སྲིད་འཛིན་ཊོམ་ཕུ་དང་།  ཁོང་གི་སྲིད་འཛིན་གཞོན་པའི་འོས་མི་དང་ལས་ཐོག་མེག་པན་སི་(Michael Richard Pence) གཉིས་ཀྱི་ཁ་གཏད་དུ་ལངས་ཏེ།  སྲིད་འཛིན་ཊོམ་ཕུའི་ལས་ཡུན་ནང་ཨ་རིའི་ཕྱི་འབྲེལ་སྲིད་ཇུས་ཉམས་དམས་སུ་ཕྱིན་ཏེ་མཐུན་ཕྱོགས་རྒྱལ་ཁབ་མང་པོར་དགྲ་བསགས་ཡོད་པ་དང་།  ཏོག་དབྱིབས་གཉན་རིམས་འགོས་ཁྱབ་ལྷོད་གཡེང་དུ་ཤོར་ནས་མི་གྲངས་འབུམ་ ༣ ལྷག་གིས་ཚེ་སྲོག་ཤོར་བ་དང་།  མི་གྲངས་ས་ཡ་ ༢༠ ལྷག་ལ་ནད་མནར་གནོད་འཚེ་ཐེབས་པ་སོགས་སྤྱི་མང་འཕྲོད་བསྟེན་ཐོག་འཐུས་ཤོར་ཚབས་ཆེན་བྱུང་བ་སོགས་ཀྱི་སྐྱོན་འཛུགས་དྲག་པོ་བྱས་ཡོད་པ་དང་།  སྲིད་འཛིན་འོས་མི་རྣམ་གཉིས་ཀྱི་བགྲོ་གླེང་དང་པོ་དེ་ཨ་རིའི་ལོ་རྒྱུས་ནང་གི་སྲིད་འཛིན་འོས་མིའི་བགྲོ་གླེང་སྤུས་ཚད་ཞན་ཤོས་ཤིག་ཡིན་པའི་གླེང་སློང་བྱུང་ཡོད་པ་མ་ཟད། སྲིད་འཛིན་ཊོམ་ཕུ་ཡིས་ཇོ་བྷའེ་ཌིན་ལ་འོས་བསྡུའི་རྒྱལ་ཁ་ཐོབ་པ་གཏན་ནས་ཁས་ལེན་བྱས་མེད་པ་ལྟར། བྷའེ་ཌིན་དང་ཁོང་གི་ཕྱག་རོགས་སྲིད་འཛིན་གཞོན་པ་ལྕམ་ཀ་མ་ལ་ཧེ་རི་སིའི་དམ་འབུལ་མཛད་སྒོའི་ཐོག་ཏུའང་ཊོམ་ཕུ་མཉམ་ཞུགས་བྱས་མེད་པ་རེད།   བྷའེ་ཌིན་གྱི་རེ་བའི་རྨི་ལམ།

བྷའེ་ཌིན་བལྟས་ཚོད་ལ་ཉོབ་ཐོ་ཞིག་ཡོད་ཀྱང་། རུས་པ་མཁྲེགས་པའི་སྲིད་དོན་པ་ཞིག་ཏུ་གཅིག་གྱུར་གྱིས་ངོས་འཛིན་བྱེད་ཀྱི་ཡོད་པ་རེད། ཁོང་གི་ཕྱི་ཟླ་དང་པོའི་ཚེས་ ༢༠ ཉིན་ཨ་རི་བསྐྱར་གསོ་བྱུང་ཞེས་པའི་འབོད་ཚིག་དེས་འཛམ་གླིང་མི་མང་ལ་རེ་བ་གཞན་ཞིག་གི་ས་བོན་བཏབ་ཡོད། ཁོང་གིས་ད་དུང་(Our best days still lies ahead) ང་ཚོའི་ཉིན་མོ་ལེགས་ཤོས་དེ་ཚོ་བསླེབ་རྒྱུ་བསྡད་ཡོད་ཅེས་བརྗོད་དེ། འཛམ་གླིང་ཧྲིལ་པོས་གུས་བརྩི་དང་ཆེ་མཐོང་བྱེད་སའི་ཨ་རི་རྒྱལ་ཁབ་ཀྱི་ཁ་རྗེ་དབང་ཐང་སླར་གསོ་དང་། དམངས་གཙོའི་རིན་ཐང་གི་ལོངས་སྤྱོད་དེ་རྒྱལ་ཡོངས་མི་མང་ལ་ཁྱབ་པར་བྱས་ཏེ། གང་མགྱོགས་ནད་ངན་ལས་གྲོལ་ཞིང་ལས་ཀྱི་སྒོ་མོ་ཐམས་ཅད་ཕྱེས། དཔལ་འབྱོར་གྱི་མྱུ་གུ་འབུས། འཆམ་མཐུན་གྱི་སྟོབས་ཤུགས་སྤུངས། བཀག་སྡོམ་གྱི་སྒོ་རྒྱ་ཕྱེས་ནས་ཕ་མ་བུ་ཕྲུག་ལྷན་དུ་འཛོམས་ཞིང་། ལོ་ངོ་བརྒྱ་ཕྲག་གི་མི་རིགས་དཀར་ནག་བར་གྱི་ནད་རྙིང་གསོ་བཅོས་བྱེད་པར་སྣེ་འཁྲིད་རྒྱུ་ཡིན་པའི་དམ་བཅའ་བཞག་ཡོད་ལ། དམ་བཅའ་དེ་འགྲུབ་ཐུབ་པར་ཨ་རིའི་ལོ་རྒྱུས་ཀྱིས་བདེན་དཔང་བྱས་ཡོད་པར་བཤད་དོ།།