སིམ་ལར་རྟེན་གཞི་བྱས་པའི་རྒྱ་གར་གྱི་དམག་སྦྱོང་ལྟེ་གནས་ཁང་གིས་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དང་ཏཱ་ལའི་བླ་མ་མཐོ་རིམ་སློབ་གཉེར་ཁང་སོགས་རྒྱ་གར་གྱི་དམག་མིས་བོད་ཀྱི་ལོ་རྒྱུས་དང་སྐད་ཡིག་རིག་གནས་སློབ་སྦྱོང་བྱེད་སའི་ཁོངས་སུ་མཚམས་སྦྱོར་བྱས་འདུག
དེ་རིང་རྒྱ་གར་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་བའི་ཆར་ལ་དྭགས་དང་འབྲས་ལྗོངས་སུ་འཁེལ་བའི་བོད་ཧིན་ས་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུག་འབྱུང་བཞིན་པའི་གནས་སྟངས་དང་། རྒྱ་ནག་གི་དྲིལ་བསྒྲགས་དང་ཤུགས་རྐྱེན་ལ་ཁ་གཏད་གཅོག་ཆེད་རྒྱ་གར་གྱི་དམག་མི་ཚོས་བོད་ཀྱི་ལོ་རྒྱུས་དང་། རིག་གནས། སྐད་ཡིག་བཅས་སྦྱོང་རྒྱུའི་ལས་གཞི་གསར་པ་ཞིག་སྤེལ་འཆར་ཡོད་འདུག
རྒྱ་གར་གྱི་དམག་སྡེའི་མགོ་འཁྲིད་ཅིག་གིས་གསར་ཁང་དེར། རྒྱ་གར་གྱི་དམག་མི་རྣམས་པཱ་ཀི་སི་ཐན་ཀྱི་སྐོར་ལ་རྒྱུས་ལོན་ཟབ་པོ་ཡོད་ཀྱང་། རྒྱ་ནག་དང་རྒྱ་ནག་གི་བསམ་བློ་གཏོང་སྟངས་བཅས་པར་ཤེས་རྟོགས་འདང་ངེས་མེད་ལ། བོད་སྐོར་ལ་དེ་བས་ཉུང་ཉུང་རེད། དེར་བརྟེན་སྟོང་ཆ་དེ་བསྐོང་དགོས་པ་རེད། ཅེས་དང་། རྒྱ་གར་གྱི་ཕྱོགས་ནས་རྒྱ་ནག་དང་བོད་གཉིས་ཀྱི་སྐད་ཡིག་དང་། རིག་གནས། གོམས་གཤིས་བཅས་ཀྱི་ཐོག་ལ་མཁས་པ་བྱེད་དགོས་པ་དང་། དམག་མི་སྐོར་ཞིག་འདེམས་སྒྲུག་བྱས་ཏེ་རྩོད་རྙོག་བྱུང་སའི་བོད་ཧིན་ས་མཚམས་ (LAC) ཁག་ཏུ་དུས་ཡུན་རིང་པོར་འཇོག་དགོས་སྐོར་ཡང་བཤད་འདུག
རྒྱ་གར་དུས་བབ་གསར་ཁང་གི་གནས་ཚུལ་དེའི་ནང་། སྤྱིར་དམག་གི་མགོ་འཁྲིད་རྣམས་ཀྱི་བོད་ཀྱི་ལོ་རྒྱུས་དང་། རིག་གནས། སྐད་ཡིག་བཅས་སྦྱང་རྒྱུའི་ལས་གཞི་དེ། འདས་ལོའི་ཕྱི་ཟླ་ ༡༠ པའི་ནང་ཚོགས་པའི་དམག་སྤྱི་ལྷན་ཚོགས་ཀྱི་ཚོགས་འདུའི་ཐོག་བཏོན་པ་ཞིག་ཡིན་འདུག་ཀྱང་། ད་ལྟ་སིམ་ལར་རྟེན་གཞི་བྱས་པའི་དམག་སྦྱོང་ལྟེ་གནས་ཁང་ (Army Training Command) གིས་ལས་གཞིའི་ངོ་བོ་དང་ལག་བསྟར་བཅས་ཀྱི་གནས་སྟངས་ལ་ཞིབ་འཇུག་བྱེད་མགོ་བརྩམས་ཡོད་འདུག
དེ་བཞིན་དམག་སྦྱོང་ལྟེ་གནས་ཁང་དེས་རྒྱ་གར་ནང་བོད་ཀྱི་ལོ་རྒྱུས་སོགས་སྦྱོང་སའི་སློབ་གྲྭ་ཡང་མཚམས་སྦྱོར་བྱས་པའི་ཁྲོད། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དང་། ཏཱ་ལའི་བླ་མ་མཐོ་རིམ་སློབ་གཉེར་ཁང། འབྲས་ལྗོངས་ཀྱི་རྣམ་རྒྱལ་བོད་ཀྱི་ཤེས་རིག་ཉམས་ཞིབ་ཁང་(Namgyal Institute of Tibetology)། ཨ་རུ་ན་ཅལ་གྱི་དབུས་ཧི་མ་ལ་ཡའི་ལེགས་བྱང་མཐོ་རིམ་སློབ་གཉེར་ཁང་ (Central Institute of Himalayan Culture Studies) བཅས་དང་། གཞན་ཡང་ལྡི་ལི་གཙུག་ལག་སློབ་གྲྭ་ཆེན་མོའི་ནང་བསྟན་རིག་གནས་ཚན་པ་དང་། ནུབ་བྷེང་གྷལ་དུ་རྟེན་གཞི་བྱས་པའི་ཝིས་ཝ་བྷ་ར་ཏི་གཙུག་ལག་སློབ་ཆེན (Visva Bharati University)། ཤར་ཕྱོགས་བྷི་ཧར་མངའ་སྡེར་ཆགས་པའི་ན་ཝ་ན་ལནྜ་མ་ཧཱ་ཝི་ཧ་ར་ (Nava Nalanda Mahavihara)། བཅས་ཡོད་འདུག
སྤྱིར་འདས་པའི་དུས་ཡུན་ནང་རྒྱ་གར་གཞུང་གིས་བོད་ཀྱི་གནད་དོན་ཐོག་ནས་རྒྱ་ནག་ལ་གདོང་ལེན་དང་ཁ་གཏད་གཅོག་ཐབས་བྱས་པ་ཧ་ཅང་དཀོན་པོ་ཡིན་ནའང་། ཁེ་ཉིན་ཕྱི་ཚེས་ ༢༦ ཉིན་རྒྱ་གར་གྱི་དམངས་གཙོའི་ཉིན་མོ་དང་བསྟུན། རྒྱ་གར་གཞུང་གིས་རང་གི་རྒྱལ་ཁབ་དང་མི་རིགས་ཀྱི་ཆེད་དུ་རང་སྲོག་ཀྱང་དོར་དང་འདོར་བཞིན་པའི་བྱས་རྗེས་ཅན་གྱི་མི་སྣ་ ༥༤ ལ་ཆེ་བསྟོད་གཟེངས་རྟགས་ཕུལ་བའི་ཁྲོད། ལ་དྭགས་ཀྱི་བོད་ཧིན་ས་མཚམས་སུ་རྒྱ་གར་གྱི་གངས་གཟིག་འཐབ་རྒོལ་ནང་ཞུགས་པའི་བོད་མིའི་དྭང་ཞབས་དམག་མི་ཚེ་རིང་ནོར་བུ་ལགས་ཀྱང་ཚུད་ཡོད་པ་རེད།
གསར་འགོད་པ། པ་སངས་ཚེ་རིང་།
