ཏོག་དབྱིབས་གཉན་རིགས་འགོས་ཁྱབ་འོག་མི་འདས་གྲོངས་སུ་ཕྱིན་པའི་གནས་ཚུལ་བསྒྲགས་པའི་ཉེས་མིང་འོག་བོད་མི་ཞིག་འཛིན་བཟུང་བྱས་ཏེ་བཀག་ཉར་འོག་བཞག་ཡོད་འདུག
ཟླ་འདིའི་ཕྱི་ཚེས་ ༢༥ ཉིན་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་སྲིད་གཞུང་གིས་ཚེ་མིང་ཅན་གྱི་བོད་མི་ཞིག་གིས་ཏོག་དབྱིབས་གཉན་རིམས་སྐོར་གྱི་གནས་ཚུལ་རྫུན་བསྒྲགས་བྱས་ཏེ། སྤྱི་ཚོགས་ཟང་ཟིང་བཟོ་ཡི་ཡོད་པའི་ཉེས་མིང་འོག་འཛིན་བཟུང་བྱས་ཏེ་བཀག་ཉར་འོག་བཞག་ཡོད་སྐོར་བསྒྲགས་འདུག
རྒྱ་ནག་གཞུང་འབྲེལ་མི་དམངས་ཉིན་རེའི་ཚགས་པར་གྱིས་བསྒྲགས་པའི་གནས་ཚུལ་ནང་། ས་གནས་ཉེན་རྟོག་ལས་ཁུངས་ཀྱིས་བདེ་འཇགས་དོ་དམ་གྱི་ཆད་གཅོད་བཅའ་ཁྲིམས་དོན་ཚན་ ༢༥ ཟེར་བའི་ནང་དོན་ལྟར། བོད་མི་ཚེ་མིང་ཅན་ཞིག་ལ་ཉིན་ ༨ ཀྱི་བཀག་ཉར་ཆད་པ་བཅད་པ་དང་ཆབས་ཅིག དཀྲོག་གཏམ་བརྙན་ཐུང་ཁྱབ་སྤེལ་དང་བརྒྱུད་སྐུལ་བྱེད་གྲངས་ཞིབ་བསྡུར་བྱེད་བཞིན་ཡོད་དང་། ཚེ་མིང་ཅན་དེས་དཀྲོག་གཏམ་སྣ་ཚོགས་བཟོས་ཏེ་སྤྱི་ཚོགས་ཟང་ཟིང་བཟོས་པ་ངོས་ལེན་བྱས་ཡོད་སྐོར་སོགས་བརྗོད་འདུག
སྲིད་གཞུང་གི་གནས་ཚུལ་དེའི་ནང་དུ། ཚེ་མིང་ཅན་དེས་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་ཁུལ་གྱི་སྐད་འཕྲིན་ཚོགས་པ་དང་གྲོགས་ཚོམས་ཁ་ཤས་ནང་། ཉེ་ཆར་མགོ་ལོག་དར་ལག་རྫོང་དུ་མཚོ་ལྷོ་ནས་ཡིན་པའི་མི་གཉིས་ཀྱིས་ཁྱེར་ཡོང་བའི་སྐམ་ཤ་ལ་ནད་དུག་འགོས་ཡོད་པར་མ་ཟད། དེ་ཟོས་ནས་མི་འདས་གྲོངས་སུ་ཕྱིན་ཡོད། ཅེས་བརྙན་ལམ་ནས་བརྒྱུད་སྐུལ་བྱས་ཡོད་ཀྱང་། མི་ག་ཚོད་ཅིག་རྐྱེན་འདས་སུ་ཕྱིན་པ་སོགས་གང་ཡང་ཁ་གསལ་བརྗོད་མེད་སྐོར་བྲིས་འདུག
ཟླ་འདིའི་ཕྱི་ཚེས་ ༦ ཉིན་བོད་ནང་གི་མཚོ་སྔོན་ཞིང་ཆེན་གྱི་ས་ཁུལ་དང་དགའ་སྐྱེ་རྒུ་མདོའི་ཁུལ། ཀན་ལྷོ་ཁུལ་གྱི་བླ་བྲང་དང་རྨ་ཆུ། དེ་བཞིན་ཀླུ་ཆུ་སོགས་བོད་ཁུལ་གྱི་ས་ཆ་ཁག་ཅིག་ལ་ཨར་ཇན་ཊའེ་ནཱ་ནས་ནང་འདྲེན་བྱས་པའི་ཏོག་ནད་འགོས་པའི་ནོར་ཤ་ཚོང་འགྲེམས་བྱས་པའི་གནས་ཚུལ་ཞིག་རྒྱ་ནག་གཞུང་ཕྱོགས་ནས་སྤེལ་ཏེ། ས་གནས་དེ་དག་ནང་ནོར་ཤ་ཉོ་ཚོང་མཚམས་འཇོག་བྱས་ཡོད་པ་མ་ཟད། ནང་འདྲེན་བྱས་པའི་ནོར་ཤ་མང་པོ་སྡེབ་གཅིག་ཏུ་མེར་སྲེག་བཏང་ཡོད་འདུག
ད་ལྟ་བོད་མིའི་སྒྲིག་འཛུགས་ཀྱི་ཝུ་ཧན་ཏོག་དབྱིབས་གཉན་རིམས་ཛ་དྲག་ཚོགས་ཆུང་གི་གནས་ཚུལ་ལྟར་ན། ད་སྔ་བར་བོད་ནང་ཏོག་དབྱིབས་ནད་པ་ཁྱོན་ ༡༠༧ བྱུང་བའི་ཁྲོད་མི་ ༡ རྐྱེན་འདས་སུ་ཕྱིན་པ་དང་། མི་ ༡༠༦ དྲག་སྐྱེད་བྱུང་ཡོད་སྐོར་བསྒྲགས་ཡོད་ཀྱང་། ཉམས་ཞིབ་པ་མང་པོས་བོད་ནང་ཏོག་དབྱིབས་ནད་པ་དེ་ལས་མང་བ་བྱུང་ཡོད་ནའང་གསང་བ་བྱས་ཏེ་ཕྱིར་གྱར་དུ་བཅུག་མེད་པའི་ཚོད་དཔག་བྱེད་བཞིན་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
