གཞུང་གི་ས་ཁང་ཚོང་སྒྱུར་བྱེད་མཁན་བོད་མི་ ༡༩ ཡིས་ཉེས་ཆད་གཅིག་ཀྱང་ཕུལ་མི་འདུག

རྒྱ་གར་བྱང་ཕྱོགས་ལྡེ་ར་རྡུན་ཚེ་རིང་དོན་ལྡན་གཞིས་གྲོང་དང་རཱཇ་པུར་མཉམ་ལས་བཟོ་གྲྭའི་བོད་མི་ ༡༩ ཡིས་བོད་མིའི་སྒྲིག་འཛུགས་ཀྱི་ས་ཁང་སྒྲིག་གཞི་དང་འགལ་ཏེ་ས་ཁང་ཚོང་སྒྱུར་བྱས་ཡོད་ཀྱང་དུས་བཅད་ནང་ཉེས་ཆད་འབུལ་མཁན་གཅིག་ཀྱང་བྱུང་མེད་སྟབས་ནང་སྲིད་ལས་ཁུངས་ལ་དེ་བཞིན་སྙན་གསེང་ཞུ་འཆར་འདུག

ཕྱི་ལོ་ ༢༠༡༧ ལོར་ལྡེ་ར་རྡུན་ཚེ་རིང་དོན་ལྡན་གཞིས་གྲོང་རྩིས་བཞེས་སྐབས། བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་དང་འགལ་ཏེ། རཱཇ་པུར་མཉམ་ལས་བཟོ་གྲྭའི་མི་ ༨ དང་ཚེ་རིང་དོན་ལྡན་གཞིས་གྲོང་གི་མི་ ༡༡ གིས། གཞུང་གི་ས་ཁང་ཚོང་སྒྱུར་བྱས་པའི་ཉེས་ཆད་འབུལ་བའི་ཉིན་མཐའ་མ་དེ་ཕྱི་ཟླ་ ༡ ཚེས་ ༣༡ ཡིན་སྟབས། དེ་རིང་ཕྱི་ཟླ་ ༢ ཚེས་ ༡ ཉིན་འདི་གའི་གསར་འགོད་པས་ཁ་པར་བརྒྱུད་བདེ་སྐྱིད་གླིང་ས་གནས་གཞིས་མགོ་ནོར་བུ་ལགས་སུ་ཉེས་ཆད་འབུལ་མཁན་བྱུང་ཡོད་མེད་དྲིས་པར་ཁོང་གིས། ད་ལྟ་བར་མི་གཅིག་ཀྱང་བྱུང་མ་སོང་། ཕྱི་ཚེས་ ༣༡ ཉིན་དུས་བཀག་གི་ཉིན་མཐའ་མ་དེ་རེད།  དེ་རིང་ང་ཚོས་སྒུག་གི་ཡིན། སང་ཉིན་ནས་ང་ཚོས་ནང་སྲིད་ལས་ཁུངས་ལ་སྙན་གསེང་ཞུས་ཏེ། མི་ ༡༩ ཡིས་དུས་བཀག་ནང་ཉེས་ཆད་སྤྲད་མ་བྱུང་ཞེས་ཞུ་རྒྱུ་ཡིན། ཞེས་བརྗོད་བྱུང་།

ཕྱི་ཟླ་ ༡ ཚེས་ ༧  དང་ ༨ བཅས་ཉིན་གྲངས་ ༢ རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ལས་བྱེད་གཉིས་ལས་གྲུབ་པའི་ཞིབ་འཇུག་ཚོགས་ཆུང་ཞིག་ས་གནས་སུ་ཞིབ་འཇུག་ཆེད་ཕྱིན་པ་བཅས། ད་བར་བོད་མིའི་སྒྲིག་འཛུགས་ཀྱི་ནང་སྲིད་དང་ས་གནས་མགོ་འཛིན་ལས་ཁུངས་བཅས་དབུས་ས་གཉིས་ནས་གནད་དོན་དེར་ཞིབ་འཇུག་ཐེངས་གཉིས་བྱས་ཡོད་ཀྱང་། གཞིས་མགོ་ནོར་བུ་ལགས་ཀྱིས་བརྗོད་པ་ལྟར་ན། ཁང་པ་ཚོང་སྒྱུར་བྱེད་མཁན་ ༡༩ ནང་ནས་མི་ ༡༡ མ་གཏོགས་གཞན་༨ སུ་ཡིན་མིན་དང་གང་དུ་ཡོད་མེད་སོགས་ཤེས་རྟོགས་ཐུབ་ཀྱི་མེད་པ་དང་། ཁང་པ་ཉོ་མཁན་རྣམས་བརྒྱུད་ཁོ་ཚོར་བརྡ་ལན་སྤྲོད་རོགས་ཞུས་ཡོད་འདུག  ས་ཁང་ཚོང་སྒྱུར་བྱེད་མཁན་ཚོས་ས་ཁང་ལ་ཧིན་སྒོར་འབུམ་གཅིག་དང་ཕྱེད་ཀ་ནས་འབུམ་ ༡༣  བར་བྱས་ཏེ་བཙོང་ཡོད་འདུག

བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་དོན་ཚན་ ༦ ནང་གསེས་དང་པོའི་ནང་། སྤྱིའི་བདེ་རྩའི་ཆེད་གཞུང་འབུལ་རིགས་ཕུད། དེ་མིན་གཞིས་མི་སུས་ཀྱང་ས་ཁང་མི་གཞན་ལ་ཕུལ་སྦྱིན་དང༌། ཚོང་བསྒྱུར། ཕྱི་མི་ལ་ཁང་གླ་གཏོང་བའི་རིགས་གཏན་ནས་མི་ཆོག ཅེས་འཁོད་ཡོད་པ་ལྟར། ནང་སྲིད་ལས་ཁུངས་ངོས་ནས་མི་དེ་དག་གིས་ས་ཁང་ཚོང་སྒྱུར་སྐབས་ཀྱི་དངུལ་འབབ་གཞིར་བཟུང་ཉེས་ཆད་དུ་ཧིན་སྒོར་འབུམ་ ༡ ནས་ ༡༣ བར་ཡས་མས་ཀྱི་ཉེས་ཆད་བཅད་ཡོད་འདུག

ཕྱི་ཟླ་ ༡ ཚེས་ ༡༤ ཉིན་འདི་གའི་གསར་འགོད་པས་ཁ་པར་བརྒྱུད་རྡེ་ར་ལྡུན་བདེ་སྐྱིད་གླིང་གི་གཞིས་མགོ་ནོར་བུ་ལགས་སུ་དེ་འབྲེལ་གྱི་གནད་དོན་ཐད་སྐད་ཆ་དྲིས་པར་ཁོང་གིས། རྡེ་ར་ལྡུན་ཚེ་རིང་དོན་ལྡན་གཞིས་གྲོང་དེ་ནང་སྲིད་ལས་ཁུངས་ཀྱི་ཁོངས་སུ་རྩིས་བཞེས་བྱས་ཟིན་པ་རེད།  དེའི་ཁོངས་ཀྱི་མི་གྲངས་  ༡༩ ཡིས་ས་ཁང་ཚོང་སྒྱུར་བྱས་འདུག ང་ཚོའི་ས་ཁང་སྒྲིག་གཞི་ལྟར་ན་ས་ཁང་ཉོ་ཚོང་བྱས་མི་ཆོག་པ་རེད། བོད་མིའི་སྒྲིག་འཛུགས་ངོས་ནས་དགོངས་པ་ཆེར་བཞེས་ཀྱིས། ཁང་པ་ཉོ་མཁན་རྣམས་ལ་ཉེས་པ་གང་ཡང་བཏང་ཡོད་པ་མ་རེད། འོན་ཀྱང་། ཕྱི་ལོ་ ༢༠༡༧ ནས་ས་ཁང་བཙོང་མཁན་རྣམས་ལ་སོ་སོའི་ཁང་པ་བཙོང་སྐབས་ཁང་རིན་གྱི་བརྒྱ་ཆ་གཞིར་བཟུང་གིས་ཉེས་ཆད་བཏང་ཡོད། ཁོ་ཚོས་ ༢༠༡༧ ནས་ད་བར་ཉེས་ཆད་ཀྱི་དངུལ་ཕུལ་མེད་པ་རེད། ཅེས་བརྗོད་བྱུང་།

གྲོང་མི་ཁག་ཅིག་གིས་རྐང་པ་གཉིས་འཛུགས་བྱས་ཡོད་སྐོར་ལ་གཞིས་མགོ་ནོར་བུ་ལགས་ཀྱིས། ཕྱོགས་གཅིག་ནས་མི་མང་གིས་ཁང་པ་མི་འདུག་ཟེར་གྱི་ཡོད་པ་དང་རོགས་ཚོགས་བརྒྱུད་ཁང་པ་རག་རྗེས་ས་ཁང་བཙོང་གི་ཡོད་པ་དང་།  ཁོ་ཚོའི་གྲས་སུ་རཱཇ་པུར་བུད་མེད་མཉམ་ལས་བཟོ་གྲྭའི་ནང་ཁང་པ་ཡོད་པ་དང་ཚེ་རིང་དོན་ལྡན་གཞིས་ཆགས་ནང་ཁང་པ་ཡོད་པའི་རིགས་ཀྱང་ཡོད་སྟབས། མི་གཅིག་གིས་ས་ཁང་གཉིས་བདག་བཟུང་གིས། རྐང་པ་གཉིས་འཛུགས་མཁན་ཀྱང་བྱུང་ཡོད་སྐོར་བརྗོད་བྱུང་།

རཱཇ་པུར་མཉམ་ལས་བཟོ་གྲྭ་ནི་ཕྱི་ལོ་ ༡༩༦༥ ལོ་གསར་འཛུགས་གནང་ཡོད་པ་དང་། མི་ཡིས་མ་འདང་བ་སོགས་ཀྱིས་ཕྱི་ལོ་ ༢༠༡༤ ལོ་ནས་སྲ་བརྟན་མ་ཐུབ་པའི་གནས་སྟངས་གང་མང་ཞིག་གི་འོག ནང་སྲིད་ལས་ཁུངས་ལ་སྙན་ཞུ་རབ་དང་རིམ་པ་ཕུལ་ཏེ། ནང་སྲིད་ནས་བཀའ་ཤག་ལ་སྙན་གསེང་ཞུས་པ་བརྒྱུད། ཕྱི་ལོ་ ༢༠༢༠ ཟླ་ ༡ ཚེས་ ༡ ཉིན་ནས་བཟོ་བཞེས་ཀྱི་ངོ་བོར་བསྒྱུར་ཡོད་པ་དང་། མཉམ་ལས་བཟོ་གྲྭའི་ལས་བྱེད་ཚོར་རྒས་ཡོལ་མ་ཕྱིན་བར་དང་ཡང་ན་ལས་མཚམས་མ་བཞག་བར་དུ་ཁང་པའི་ཐོབ་ཐང་ཡོད་འདུག

སྤྱིར་བཏང་རྡེ་ར་ལྡུན་བདེ་སྐྱིད་གླིང་ས་གནས་གཞིས་མགོའི་ཁྱབ་ཁོངས་ཀྱི་གཞིས་གྲོང་གསར་པ་ཚེ་རིང་དོན་ལྡན་ནི་ཕྱི་ལོ་ ༢༠༠༥  ལོར་གསར་འཛུགས་གནང་ཞིང་། ཕྱི་ལོ་ ༢༠༡༧ ཟླ་ ༢ ཚེས་ ༡ ཉིན་བོད་མིའི་སྒྲིག་འཛུགས་ནང་སྲིད་ཀྱི་ཁྱབ་ཁོངས་སུ་རྩིས་བཞེས་གནང་ཡོད་པ་རེད།

གསར་འགོད་པ། སྐལ་བཟང་སྦྱིན་པ།