བྱང་ཨར་ལན་ཌིའི་རྒྱལ་ས་རུ་བོད་ཀྱི་རྒྱལ་དར་རྒྱབ་ལྗོངས་བྱས་པའི་༧གོང་ས་རྒྱལ་བ་རིན་པོ་ཆེ་མཆོག་དང་རི་ཆར་ཌི་མུར་ (Richard Moore) རྣམ་གཉིས་ནས་ཕན་ཚུན་དབུ་གཏུགས་པའི་སྐུ་པར་ཆེན་པོ་ཞིག་ལེགས་འགྲུབ་བྱུང་འདུག
ཁ་སང་ཕྱི་ཚེས་ ༢ ཉིན་བྱང་ཨར་ལན་ཌིའི་གསར་ཁང་ (Derry Now) གིས་སྤེལ་པའི་གནས་ཚུལ་ལྟར་ན། བྱང་ཨར་ལན་ཌིའི་རྒྱལ་ས་ཌི་རིའི་ (Derry) ནང་གི་ (Great James) སྲང་ལམ་དུ། ༧གོང་ས་རྒྱལ་བ་རིན་པོ་ཆེ་མཆོག་དང་སྐུ་ཞབས་རི་ཆར་ཌི་མུར་ (Richard Moore)རྣམ་གཉིས་ཀྱི་མཛའ་བརྩེ་མཚོན་པའི་ལྡེབས་རིས་ཆེན་པོ་ཞིག་ལེགས་པར་གྲུབ་ཡོད་འདུག
མཐོ་ཚད་ལ་ཐོག་རྩེག་གཉིས་ལྷག་ཡོད་པའི་ལྡེབས་རིས་དེའི་ངོས་སུ་༧གོང་ས་རྒྱལ་བ་རིན་པོ་ཆེ་མཆོག་དང་རི་ཆར་ཌི་མུར་ (Richard Moore) རྣམ་གཉིས་ཀྱིས་དབུ་གཏུགས་པའི་སྐུ་པར་ཆེན་པོ་ཞིག་བཞག་འདུག་པ་མ་ཟད། རྒྱབ་ལྗོངས་སུ་བོད་ཀྱི་རྒྱལ་དར་ངོས་ཀྱི་ཉི་མ་སེར་པོ་དང་ལྷ་སྲུང་དམར་ནག་གཉིས་ཀྱིས་བསྟན་སྲིད་སྲུང་སྐྱོང་གི་འཕྲིན་ལས་གཡེལ་མེད་དུ་སྒྲུབ་པར་མཚོན་པའི་དམར་ནག་གཉིས་ཕྱོགས་ཡོངས་སུ་འཕྲོ་བ་ཞིག་བཟོས་འདུག ལྡེབས་རིས་དེ་ནི་སྐྱིད་པའི་ཁྱིམ་གཞིས་(Sweet Home)ཞེས་པའི་བརྙན་འཕྲིན་ཟློས་གར་གྱི་འཁྲབ་ཁྲིད་པ་ཇོ་ན་ལུམ་ལེ་ (Joanna Lumley) ཡིས་འཆར་གཞི་བཏོན་ཏེ། ས་གནས་ཀྱི་སྒྱུ་རྩལ་ཁང་ (UV Arts) གི་སྒྱུ་རྩལ་བ་ཀཱལ་པོ་ཊར་ (Karl Porter) གྱིས་བྲིས་པ་ཞིག་ཡིན་འདུག་ལ། ཟླ་འདིའི་ཕྱི་ཚེས་ ༩ ཉིན་བརྙན་འཕྲིན་ཟློས་གར་སྐྱིད་པའི་ཁྱིམ་གཞིས་དང་འབྲེལ་ནས་ལེའུ་ཚན་ཞིག་ (Derry City) ནང་འཁྲབ་ཁྲིད་བྱེད་ཀྱི་ཡོད་འདུག
ལྡེབས་རིས་སྒྱུ་རྩལ་བ་ཀཱལ་པོ་ཊར་གྱིས། ལྡེབས་རིས་དེར་ཞིབ་ལྟ་བྱས་ཚེ་༧གོང་ས་རྒྱལ་བ་རིན་པོ་ཆེ་མཆོག་གི་དབུ་དང་ཕྱག་གི་རྣམ་པ་ནི་སྙིང་དབྱིབས་ཤིག་ཡིན་པ་དང་། དེ་ཡིས་རླབས་ཆེན་གྱི་མི་སྣ་གཉིས་བར་གྱི་མཛའ་བརྩེ་མཚོན་གྱི་ཡོད་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཞབས་རི་ཆར་ཌི་མུར་མཆོག་ལ་གནང་བའི་མཛའ་བརྩེ་དང་ཡི་རང་མཚོན་གྱི་ཡོད་སྐོར་དང་། ལྡེབས་རིས་འབྲི་པའི་གོ་སྐབས་བྱུང་བ་ནི་ཧ་ཅང་དགའ་སྤོབས་སྐྱེས་འོས་པ་ཞིག་ཡིན་སྐོར་བརྗོད་འདུག
ཕྱི་ལོ་ ༢༠༡༠ ལོར་སྐུ་ཞབས་རི་ཆར་ཌི་མུར་ (Richard Moore)ལགས་བཞུགས་སྒར་དྷ་སར་ཕེབས་ཏེ་༧གོང་ས་རྒྱལ་བ་རིན་པོ་ཆེ་མཆོག་དང་མཇལ་ཁ་གནང་སྐབས། ༧གོང་ས་མཆོག་ནས་སྐུ་ཞབས་ཁོང་ནི་སྐུ་སྒེར་གྱི་དཔའ་བོ་ཞིག་ལ་ངོས་འཛིན་གནང་གི་ཡོད་སྐོར་གསུངས་ཡོད་པ་རེད་ལ། ༧གོང་ས་རྒྱལ་བ་རིན་པོ་ཆེ་མཆོག་ཕྱི་ལོ་ ༢༠༠༠ ལོ་དང་ ༢༠༠༥ ལོ། དེ་བཞིན་ ༢༠༡༣ དང་ ༢༠༡༧ ལོ་སོ་སོར་བྱང་ཨར་ལན་ཌིའི་ནང་ཆིབས་བསྒྱུར་བཀའ་དྲིན་བསྐྱངས་ཡོད་པ་དང་། ཕྱི་ལོ་ ༢༠༡༧ ལོར་སྐུ་ཞབས་རི་ཆར་ཌི་མུར་ལགས་ཀྱིས་གསར་འཛུགས་བྱས་པའི་མེ་མཚམས་ཁུལ་གྱི་བྱིས་པའི་ཐེབས་རྩའི་ (Charity Children in Crossfire) མི་ལོ་ ༢༠ འཁོར་བའི་མཛད་སྒོའི་སྐུ་མགྲོན་གཙོ་བོར་གསོལ་འདེབས་ཞུས་པ་ལྟར་ཕེབས་གནང་ཡོད་པ་རེད།
སྐུ་ཞབས་རི་ཆར་ཌི་མུར་ལགས་ནི་ཕྱི་ལོ་ ༡༩༦༢ ལོར་བྱང་ཨར་ལན་ཌིའི་ནང་སྐྱེས་ཤིང་། ཁོང་དགུང་གྲངས་ ༡༠ ཐོག་སློབ་གྲྭ་ནས་ཕྱིར་རང་ཁྱིམ་དུ་ལོག་སྐབས་ལམ་བར་དུ་དབྱིན་དམག་གིས་འགྱིག་མདེལ་གྱིས་གདོང་ལ་ཞུས་ཏེ་ལོང་བར་གྱུར་ཡོད་ནའང་མུ་མཐུད་རོལ་མོ་སྦྱངས་ཡོད་པ་དང་། ཕྱི་ལོ་ ༡༩༩༦ ལོར་འཛམ་གླིང་ཁྱོན་ཡོངས་ཀྱི་དམག་འཁྲུག་ཁྲོད་དུ་ལུས་པའི་བྱིས་པ་རྣམས་ཀྱི་ཆེད་དུ་བྱིས་པའི་ཐེབས་རྩ་ཁང་ཞིག་གསར་འཛུགས་གནང་ཏེ། མ་ལ་ཝི་ (Malawi) དང་ཏཱན་ཛ་ནི་ཡ་ (Tanzania) སོགས་དམག་འཁྲུག་ཆེ་བའི་རྒྱལ་ཁབ་གྲངས་ ༡༠ ཡི་ནང་བྱིས་པ་འབུམ་གཅིག་ལྷག་ལ་ཤེས་ཡོན་དང་འབྲེལ་བའི་རོགས་རམ་དང་། བྱིས་པ་སྟོང་གཉིས་ཙམ་ལ་སྐྲན་ནད་དང་འབྲེལ་ནས་སྨན་བཅོས། དེ་བཞིན་བྱིས་པ་ཁྲི་གཅིག་ཙམ་ལ་ཟས་བཅུད་དང་འབྲེལ་ནས་རོགས་རམ་གནང་དང་གནང་མུས་ཡིན་འདུག
གསར་འགོད་པ། ཀླུ་མགོན་ཐར།
