བོད་ཀྱི་འབྲས་ནད་ཚོགས་པས་བཞུགས་སྒར་ཁུལ་གྱི་མི་མང་གི་ཕོ་བའི་ནང་ནད་འབུ་ཡོད་མེད་བརྟག་དཔྱད་དང་འབྲེལ་མི་མང་གི་མཚན་རྟགས་བསྡུ་རུབ་ཀྱི་ལམ་ནས་འབྲས་ནད་སྐོར་ལ་གོ་རྟོགས་དང་རྒྱལ་སྤྱིའི་འབྲས་ནད་ཉིན་མོ་སྲུང་གཙི་གནང་གི་འདུག
དེ་རིང་རྒྱལ་སྤྱིའི་འབྲས་ནད་ཉིན་མོ་དང་བསྟུན། ལྡི་ལིར་རྟེན་གཞི་བྱས་པའི་བོད་ཀྱི་འབྲས་ནད་ཚོགས་པའི་ངོས་ནས་བཞུགས་སྒར་དྷ་སའི་མེ་གྷན་ཁྲོམ་གཞུང་དུ། བཞུགས་སྒར་ཁུལ་གྱི་བོད་མིའི་ཁྲོད་ཕོ་བའི་འབྲས་ནད་སྔོན་འགོག་གི་ཆེད་དུ་ཕོ་བའི་ནང་ནད་འབུ་ཡོད་མེད་བརྟག་དཔྱད་ (H-Pylori stool test) གཏོང་གི་ཡོད་པ་དང་འབྲེལ། འབྲས་ནད་སྐོར་གྱི་གོ་རྟོགས་ལས་འགུལ་ཞིག་སྤེལ་གནང་སོང་།
དེ་རིང་གི་ལས་འགུལ་སྟེང་ཀང་ར་རྫོང་གི་སྤྱི་ཁྱབ་འཕྲོད་བསྟེན་སྨན་པ་ཇེ་ཌི་གྷུབ་ཏ་ (Dr. G.D. Gupta) ལགས་དང་། བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག བོད་མི་མང་སྤྱི་འཐུས་ཚོགས་གཞོན་ཨཅརྱ་ཡེ་ཤེས་ཕུན་ཚོགས་བཅས་ཕེབས་ཡོད་པ་དང་། སྐབས་དེར་སྐུ་ཞབས་གྷུབ་ཏ་ལགས་ཀྱིས། འཛམ་གླིང་ཁྱོན་ཡོངས་ནང་འབྲས་ནད་དེ་མིའི་འཆི་རྐྱེན་ཆེ་ཤོས་གཉིས་པ་དེ་ཡིན་པ་མ་ཟད། ལོ་རེར་འཛམ་གླིང་ནང་ཁྱོན་མི་གྲངས་ས་ཡ་ ༡༠ ལྷག་འབྲས་ནད་ཀྱི་རྐྱེན་པས་འདས་གྲོངས་སུ་འགྲོ་ཡི་ཡོད། གལ་ཏེ་མི་རྣམས་ཀྱིས་བརྟག་དཔྱད་བྱས་ཏེ་རང་ལ་འབྲས་ནད་ཡོད་པ་སྔོན་ཚུད་ནས་ཤེས་རྟོགས་བྱུང་ཚེ། ལོ་རེར་རྐྱེན་འདས་སུ་འགྲོ་བཞིན་པའི་ཁྲོད་ནས་གསུམ་ཆ་གཅིག་སྐྱོབ་ཐུབ་ཀྱི་ཡོད་སྐོར་དང་། ཧི་མ་ཅལ་གཞུང་ངོས་ནས་ཀྱང་འབྲས་ནད་དེ་ཚབས་ཆེར་བརྩིས་ཏེ་ས་གནས་རིམ་པར་གོ་རྟོགས་དང་བརྟག་དཔྱད་ཀྱི་ལས་གཞི་སྤེལ་མུས་ཡིན་པ་མ་ཟད། འབྲས་ནད་ཀྱིས་མནར་བཞིན་པའི་མི་རྣམས་ལ་སྨན་གྲོན་སོགས་ཀྱི་ཆེད་དུ་ཐད་ཀར་འགྲོ་གྲོན་ཡང་གནང་གི་ཡོད་སྐོར་སོགས་བརྗོད་གནང་སོང་།
དེ་བཞིན། འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་ནས། ཕྱི་ལོ་ ༢༠༡༩ ཡི་གྲངས་ཐོ་ལྟར་ན་རང་རེའི་བོད་མིའི་སྤྱི་ཚོགས་ནང་། བོད་མི་ ༢༧ ཙམ་འབྲས་ནད་ཀྱི་རྐྱེན་པས་འདས་གྲོངས་སུ་ཕྱིན་ཡོད་འདུག ལྷག་པར་དུ་ང་ཚོའི་སྨན་བཅོས་ལྟ་སྐྱོང་གི་ལས་གཞིའི་ཁོངས་སུའང་ཕྱི་ལོ་ ༢༠༡༩ ལོར་མི་གྲངས་ ༦༢ ལྷག་ལ་འབྲས་ནད་ཀྱི་ཆེད་དུ་སྨན་གྲོན་བཏང་ཡོད་འདུག ནད་པའི་ཁྲོད་དུ་ཕོ་བ་དང་མཆིིན་པ། གློ་བ་བཅས་ཀྱི་འབྲས་ནད་ཡོང་གི་ཡོད། དེ་དག་ཡོང་དོན་ཡང་གཙོ་བོ་ང་ཚོས་དུས་རྒྱུན་དུ་རང་གི་འཕྲོད་བསྟེན་ལ་དོ་སྣང་བྱེད་ཀྱི་མེད་པའི་རྐྱེན་གྱི་ཡིན་སྟབས། དུས་རྒྱུན་དུ་ཞལ་ལག་ནང་སྔོ་ཚལ་རིགས་མང་ཙམ་མཆོད་རྒྱུ་དང་གཟུགས་པོར་འགུལ་སྐྱོད་དང་ལུས་རྩལ་མང་ཙམ་དགོས་རྒྱུ་གལ་ཆེན་ཡིན། ཞེས་དང་། གལ་ཏེ་རང་ཉིད་ལོ་ ༤༠ ཡན་ཡིན་ན་ལོ་རེར་གཟུགས་པོ་བརྟག་དཔྱད་བྱ་རྒྱུ་གལ་འགངས་ཆེན་པོ་ཡིན་ཞིང་། དྷ་ས་ལྟ་བུར་མཚོན་ན་བདེ་ལེགས་སྨན་ཁང་ལ་བསྟན་ན་འགྲོ་སོང་སོགས་ཀྱི་ཆ་ནས་དཀའ་ངལ་དེ་ཙམ་མེད་སྐོར་གསུངས་སོང་།
འདི་ལོར་རྒྱལ་སྤྱིའི་འབྲས་ནད་ཉིན་མོ་དེ་ (ང་ཡིན། ངས་བྱ་རྒྱུ་ཡིན། I am, I will) ཞེས་པའི་འབོད་ཚིག་འོག་འཛམ་གླིང་ཡོངས་ནང་སྲུང་གཙི་བྱེད་ཀྱི་ཡོད་ཅིང་། བོད་ཀྱི་འབྲས་ནད་ཚོགས་པའི་ལས་འགུལ་ནང་མི་མང་ལ་འབྲས་ནད་སྐོར་གོ་རྟོགས་ཡོང་ཆེད་མཚན་རྟགས་བསྡུ་རུབ་ཀྱི་ལས་འགུལ་ཞིག་དང་། བོད་པའི་སྤྱི་ཚོགས་ནང་ཕོ་བའི་འབྲས་ནད་དེ་ཤུགས་ཆེ་ཤོས་ཡིན་སྟབས། དེ་སྔོན་འགོག་གི་ཆེད་དུ་ཕོ་བའི་ནང་ནད་འབུ་ཡོད་མེད་ཀྱི་བརྟག་དཔྱད་ལས་གཞི་སྤེལ་གྱི་འདུག
གསར་འགོད་པ། པ་སངས་ཚེ་རིང་།
