ཉི་ཧོང་དཔལ་འབྱོར་གསར་ཁང་གི་ཡན་ལག་ལས་ཁུངས་ཀྱི་རྩོམ་སྒྲིག་པས་བྷི་བྷི་སིའི་གསར་འགྱུར་རྒྱ་ནག་ནང་བཀག་འགོག་བྱས་པར་རྒྱ་ནག་དམར་ཤོག་ཚོགས་པ་དང་ཞི་ཅིན་ཕིན་ལ་སྐྱོན་བརྗོད་བྱས་འདུག
ཁ་སང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཉི་ཧོང་གི་དཔལ་འབྱོར་གསར་ཁང་ནེའུ་ཀེ་ཨེ་ཤ་ཡའི་(Nikkei Asia) རྒྱ་ནག་གི་ཡན་ལག་ལས་ཁུངས་ཀྱི་སྤྱི་ཁྱབ་རྩོམ་སྒྲིག་པ་ཊཱ་ཊི་སའོ་ཤི་ (Tetsushi Takahashi) ལགས་ཀྱིས། འཛམ་གླིང་ནང་ཁྱབ་རྒྱ་ཆེ་བའི་བྷི་བྷི་སི་གསར་ཁང་གི་འཛམ་གླིང་གསར་འགྱུར་རིགས་རྒྱ་ནག་ནང་ཤར་གཏོང་བྱེད་རྒྱུ་བཀག་འགོག་བྱས་པ་དང་འབྲེལ། བྷི་བྷི་སི་ནི་རྒྱ་ནག་ནང་རང་དབང་དང་དམངས་གཙོ་གོང་འཕེལ་གཏོང་མཁན་གྱི་ནུབ་ཕྱོགས་པའི་གསར་ཁང་གཅིག་པུ་དེ་ཡིན་པ་དང་། ཞི་ཅིན་ཕིན་གྱི་དབང་སྒྱུར་འོག་རྒྱ་ནག་གི་གསར་འགྱུར་བརྒྱུད་ལམ་ཁག་ཚང་མས་དམར་ཤོག་ཚོགས་པར་བསྟེན་བསྟུན་གྱིས། དམར་ཤོག་ཚོགས་པའི་མགྲིན་པ་དང་ལྕེ་ལྟར་གཞུང་གི་ལས་དོན་སྒྲུབ་ཀྱི་ཡོད་པའི་སྐྱོན་བརྗོད་བྱས་ཡོད་འདུག
རྩོམ་སྒྲིག་པ་ཊཱ་ཊི་སའོ་ཤི་ཡིས། རྒྱ་ནག་གི་གསར་ཁང་གཅིག་ཀྱང་དམར་ཤོག་ཚོགས་པ་ལས་བརྒལ་ཐུབ་ཀྱི་མེད་པ་དང་། རྒྱ་ནག་ནང་གི་ཚགས་ཤོག་ཁག་དང་བརྙན་འཕྲིན་དང་རླུང་འཕྲིན་ཁང་སོགས་གསར་ཁང་ཚང་མར་འདེམས་ཀ་ཆུང་ཆུང་རེ་ཡོད་ཀྱང་། གསར་ཁང་ཚང་མས་དམར་ཤོག་ཚོགས་པའི་མགྲིན་པ་དང་ལྕེ་ལྟ་བུའི་ཞབས་འདེགས་ཞུ་དགོས་ཀྱི་ཡོད་པ་མ་ཟད། ཕྱི་ལོ་ ༢༠༡༢ ལོར་ཞི་ཅིན་ཕིན་རྒྱ་ནག་གི་སྲིད་འཛིན་ཆགས་པ་ནས་བཟུང་། རྒྱ་ནག་ནང་གི་གསར་འགོད་རང་དབང་ལ་དམ་དྲགས་སྔར་ལྷག་བྱེད་མགོ་བརྩམས་ཡོད། ཅེས་བརྗོད་ཡོད་པ་རེད།
ཟླ་འདིའི་ཕྱི་ཚེས་ ༡༢ ཉིན་རྒྱ་ནག་གཞུང་གིས། བྷི་བྷི་སིའི་གསར་ཁང་གིས་ཤིན་ཅང་ཁུལ་གྱི་ཡུ་གུར་མི་མང་དང་ཏོག་དབྱིབས་གཉན་རིམས་སོགས་ཀྱི་སྐོར་ལ་གནས་ཚུལ་རྫུན་བསྒྲགས་བྱེད་ཀྱི་ཡོད་པའི་སྐྱོན་འཛུགས་འོག རྒྱ་ནག་ནང་བྷི་བྷི་སིའི་འཛམ་གླིང་གནས་ཚུལ་ལྟ་ཀློག་བྱེད་མི་ཐུབ་པར་བཟོས་པ་དང་། ཨ་རི་དང་ཡུ་རོབ་མཐུན་ཚོགས་གཙོ་བྱས་པའི་དབྱིན་ཡུལ་སོགས་ནས་རྒྱ་ནག་ལ་སྐྱོན་བརྗོད་བྱས་ཡོད་པ་རེད།
ཨ་རི་དང་ཡུ་རོབ་མཐུན་ཚོགས་ཐུན་མོང་གི་བསྒྲགས་གཏམ་ནང་། རྒྱ་ནག་གཞུང་གིས་རྒྱ་ནག་ནང་བྷི་བྷི་སིའི་འཛམ་གླིང་གནས་ཚུལ་བཀག་འགོག་བྱས་པ་ནི་རྒྱ་ནག་རང་གི་རྩ་ཁྲིམས་དང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་འགལ་གྱི་ཡོད་པས། ཐག་གཅོད་དེ་ཕྱིར་འཐེན་བྱེད་དགོས་ཀྱི་ཡོད། ཅེས་སྐྱོན་བརྗོད་དང་། དབྱིན་ཡུལ་ཕྱི་སྲིད་དྲུང་ཆེ་ཌའོ་མུ་ནེག་རཱབ་ (Dominic Raab) ལགས་ཀྱིས། རྒྱ་ནག་གིས་བྷི་བྷི་སིའི་འཛམ་གླིང་གནས་ཚུལ་བཀག་འགོག་བྱས་པ་ནི་གསར་འགོད་རང་དབང་བཀག་སྡོམ་བྱས་ཡིན་པས་ཐག་གཅོད་དེར་ངོས་ལེན་བྱེད་ཐབས་བྲལ་སོང་ལ། རྒྱ་ནག་ནི་འཛམ་གླིང་གི་གསར་འགོད་རང་དབང་ལ་དམ་དྲགས་བྱེད་མཁན་ཆེ་ཤོས་ཤིག་ཡིན་སྟབས། ད་རེབ་ཀྱི་ཐག་གཅོད་འདིས་འཛམ་གླིང་གི་མིག་མདུན་ནས་རྒྱ་ནག་གི་མཚན་སྙན་ལ་རྨས་སྐྱོན་བཟོ་ཡི་ཡོད་པ་ཁོ་ན་ཡིན། ཞེས་བརྗོད་ཡོད་པ་རེད།
ཡང་བརྒྱུད་ལམ་ཁག་ཏུ། ད་རེས་རྒྱ་ནག་གིས་བྷི་བྷི་སི་གསར་འགྱུར་བཀག་འགོག་བྱེད་དོན་ནི། ཉེ་སྔོན་ཕྱི་ཚེས་ ༤ ཉིན་དབྱིན་ཡུལ་གཞུང་གིས། རྒྱ་ནག་གཞུང་འབྲེལ་གྱི་གསར་ཁང་རྒྱ་ནག་གོ་ལའི་བརྙན་འཕྲིན་ཁང་ (CGTN) ཟེར་བས་ཡུ་རོབ་ནང་ཁྲིམས་འགལ་ཐོག་ལས་དོན་སྒྲུབ་ཀྱི་ངོས་འཛིན་འོག ཡན་ལག་ལས་ཁུངས་དེའི་ཆོག་མཆན་ལག་ཁྱེར་ནུས་མེད་དུ་བཏང་བར་རྒོལ་ལན་སློག་ཡིན་སྐོར་ཡང་བརྗོད་འདུག
གསར་འགོད་པ། སྐལ་བཟང་སྦྱིན་པ།
