རྒྱ་གར་ཉེན་རྟོག་པས་འཚེ་མེད་ཞི་བ་དང་བྱམས་སྙིང་རྗེ་སྲུང་སྐྱོབ་བྱེད་མཁན་སྲུང་སྐྱོབ་བྱེད་བཞིན་པར་ཡི་རངས་ཡོད་ཅེས་གསུངས་འདུག

༧གོང་ས་མཆོག་ནས་རྒྱ་གར་གྱི་ཉེན་རྟོག་པ་ཚོར་དྲ་ལམ་ནས་བཀའ་སློབ་གནང་སྐབས་གཞི་རྩའི་ཐོག་ནས་ཉེན་རྟོག་པ་ཚོ་མིའི་བཟང་སྤྱོད་དང་དམངས་གཙོ། རང་དབང་སྲུང་སྐྱོབ་བྱེད་མཁན་ཆགས་ཀྱི་ཡོད་ཀྱང་སྐབས་རེར་ཏོག་ཙམ་དྲག་རྩུབ་ཀྱི་སྒོ་ནས་རྣམ་འགྱུར་སྟོན་དགོས་པ་དེ་འདྲ་ཡོང་གི་ཡོད་པ་དེ་འགྲིག་གི་ཡོད་པ་རེད་ཅེས་གསུངས་འདུག

རྒྱ་གར་ཉེན་རྟོག་པའི་དགེ་རྩས་ཇི་ལྟར་གསོལ་བ་བཏབ་པ་བཞིན་དེ་རིང་ཕྱི་ཚེས་ ༡༧ ཉིན་གྱི་ཞོགས་པར་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་བརྒྱུད། ༧གོང་ས་རྒྱལ་བ་རིན་པོ་ཆེ་མཆོག་ནས་ཉེན་རྟོག་པས་བྱམས་སྙིང་རྗེ་དང་འབྲེལ་ཏེ་ཉེན་སྲུང་གི་ལས་དོན་བྱེད་དགོས་པའི་སྐོར་ལ་བཀའ་སློབ་ལམ་སྟོན་སྩལ་སྐབས། དེ་རིང་ངོས་རང་ཉེན་རྟོག་པར་སྐད་ཆ་བཤད་རྒྱུ་བྱུང་བར་ཧ་ཅང་དགའ་བོ་བྱུང་། སོ་སོའི་ལྟ་བ་དང་བསམ་ཚུལ་བརྗེ་ལེན་ཡོང་རྒྱུ་དང་། སྤྱིར་རྒྱ་གར་གྱི་གྲོགས་པོ་རྣམ་པ་དང་ལྷག་པར་དུ་ཉེན་རྟོག་པ་ཚོར་བཀའ་མོལ་ཞུ་རྒྱུ་བྱུང་བར་ཞེ་དྲགས་དགའ་པོ་བྱུང་། ངོས་རང་གི་མི་ཚེ་ཆ་ཚང་ཉེན་རྟོག་པས་མཐའ་བསྐོར་ནས་མི་ཚེ་སྐྱེལ་བ་རེད། བོད་ནང་དུའང་ལོ་དགུའི་རིང་རྒྱ་མིའི་ཉེན་རྟོག་པས་བསྐོར་ནས་བསྡད་པ་རེད། ཕྱི་ལོ་ ༡༩༥༩ ནས་རྒྱ་གར་གྱི་ཉེན་རྟོག་པས་སྲུང་སྐྱོབ་གནང་ནས་བཞུགས་པ་རེད། ཕྱོགས་གཉིས་ཀས་ངོས་རང་ལ་སྲུང་སྐྱོབ་གནང་གི་ཡོད་པ་ནི་ངོས་ནས་དོ་སྣང་བྱུང་སོང་། རྒྱ་ནག་དམར་ཤོག་གི་ཉེན་རྟོག་པ་ཚོར་འགན་གཉིས་ཡོད་པ་འདྲ་བོ་འདུག  གཅིག་ངོས་རང་ལ་སྲུང་སྐྱོབ་བྱ་རྒྱུ་དང་གཞན་དེ་སོ་བ་བྱ་རྒྱུའི་ལས་འགན་ཡོད་པ་འདྲ་བོ་འདུག  རྒྱ་གར་གྱི་ཉེན་རྟོག་པ་ཡིན་ན་ལྷག་བསམ་རྣམ་དག་རེད། མི་འབོར་གྱི་ཆ་ནས་རྒྱ་ནག་ནི་འཛམ་གླིང་ནང་མི་འབོར་ཆེ་ཤོས་གྲས་ལ་ཚུད་པ་རེད། ཡིན་ནའང་རང་དབང་ཡོད་མ་རེད། སྔར་གྱི་གནའ་རབས་ཀྱི་རིག་གཞུང་ཕྱུག་པོ་ཡོད་པ་དང་། ལོ་རྒྱུས་ཀྱི་ངོས་ནས་ཆ་བཞག་ནའང་ནང་པའི་རྒྱལ་ཁབ་ཆགས་ཀྱི་ཡོད་པ་རེད། འོན་ཀྱང་འགྱུར་བ་ཆེན་པོ་ཕྱིན་བསྡད་ཡོད་རེད། སྤྱིར་བཏང་དམར་པོའི་རིང་ལུགས་ཀྱིས་རྒྱ་ནག་རྒྱལ་ཁབ་བཟུང་ཡོད་པ་དང་། དེ་ལས་ལྡོག་སྟེ་རྒྱ་གར་ཡིན་ན་རང་དབང་གཙང་མ་ཡོད་རེད་ལ་དམངས་གཙོའི་ལམ་ལུགས་ཚད་ལྡན་ཡོད་རེད། འཛམ་གླིང་ནང་ནས་མི་འབོར་ཆེ་ཤོས་གཉིས་པ་དེ་རྒྱ་གར་ཆགས་ཀྱི་ཡོད་ཀྱང་རང་དབང་ཧ་ཅང་གི་ཆེན་པོ་རེད། ཅེས་གསུངས་འདུག

ཡང་༧གོང་ས་མཆོག་གིས། རྒྱ་གར་ནང་དུ་འཛམ་གླིང་ནང་གི་ཆོས་ལུགས་ཆེ་ཁག་ཆ་ཚང་མཐུན་སྒྲིལ་ངང་ནས་འཆམ་མཐུན་དུ་གནས་ཐུབ་ཀྱི་ཡོད་རེད། ངོས་རང་གིས་དོ་སྣང་བྱུང་བ་ཞིག་ལ། རྒྱ་གར་གྱི་ཁ་ཆེ་པ་ཚོ་ཐུག་དུས་ཁ་ཆེའི་ནང་དུ་སྡེ་ཚན་གཉིས་ཡོད་ཀྱང་ཕན་ཚུན་འཁོན་རེས་ཡོད་པའི་རྣམ་འགྱུར་རྩ་བ་ཉིད་ནས་མཐོང་མ་བྱུང་། དེར་བརྟེན་རྒྱ་གར་ནང་དུ་ལོ་ངོ་སྟོང་ཕྲག་སྔོན་ནས་རྒྱ་གར་རང་གི་བསམ་བློའི་གོམས་གཤིས་འཚེ་མེད་ཞི་བ་དང་བྱམས་སྙིང་རྗེའི་ལྟ་གྲུབ་དེ་དང་འབྲེལ་བའི་ཉམས་ལེན་འདི་སྔར་ནས་དར་ཡོད་པ་རེད། དེ་འདྲའི་སྤྱི་ཚོགས་ནང་དམངས་གཙོ་དེ་ཞེ་དྲགས་རན་པོ་ཡོད་རེད། ཆོས་ལུགས་ཆ་ཚང་ལ་ཕན་ཚུན་གུས་ཞབས་ཡོད་པ། མི་ཆ་ཚང་ལ་གུས་ཞབས་ཡོད་པ། རྒྱ་གར་ལ་ཆ་བཞག་ན། རྒྱ་གར་ལྷོ་བྱང་གཉིས་ལ་སོགས་པའི་རྒྱ་གར་གྱི་ས་གནས་འདྲ་མིན་སྣ་ཚོགས་ལ་སྐད་ཡིག་དང་ཡི་གེ་མི་འདྲ་བ་ཡོད་རེད། འོན་ཀྱང་མི་འདྲ་བའི་ཆ་དེ་འདྲ་ཡོད་ནའང་རྒྱ་གར་དམངས་གཙོའི་རྒྱལ་ཁབ་འདིའི་འོག་ལ་ཚང་མ་སྡོད་རྒྱུ་ཡོད་པར་ཞེ་དྲགས་དགའ་མོས་ཡོང་བ་ཞིག་ཆགས་བསྡད་ཡོད་རེད། དེ་དང་མཚུངས་པ་འཛམ་གླིང་ས་ཕྱོགས་གང་སར་ཡིན་ནའང་སྐད་མི་འདྲ་བ་དང་མི་རིགས་མི་འདྲ་བ། ཆོས་ལུགས་མི་འདྲ་བ་ཡོད་ནའང་མཐུན་སྒྲིལ་ངང་ནས་བསྡད་ཐུབ་རྒྱུ་ཡོད་པ་དེ་རྒྱ་གར་རང་གིས་མིག་དཔེ་སྟོན་ཐུབ་ཀྱི་ཡོད་རེད། དེ་ཡང་འཚེ་མེད་ཞི་བའི་ལྟ་གྲུབ་དང་བྱམས་སྙིང་རྗེ་དང་འབྲེལ་བའི་ཉམས་ལེན་དེ་གཉིས་ཡོད་པའི་སྒོ་ནས་ཕན་ཚུན་འཆམ་མཐུན་ངང་ནས་ཏན་ཏན་འཛམ་གླིང་གོ་ལ་གཅིག་ནང་གནས་ཐུབ་ཀྱི་རེད། དེར་བརྟེན་རྒྱ་གར་གྱི་རིག་གཞུང་འདི་འཚེ་མེད་ཞི་བ་དང་བྱམས་སྙིང་རྗེའི་ཉམས་ལེན་སྲུང་སྐྱོབ་བྱེད་མཁན་ཆགས་བསྡད་ཡོད་རེད། དེ་འདྲ་སོང་ཙང་། རྒྱ་གར་གྱི་ཉེན་རྟོག་པ་དང་ལྷན་དུ་བཀའ་མོལ་ཞུ་རྒྱུར་ཞེ་དྲགས་དགའ་པོ་ཡོད། ག་དུས་ཡིན་རུང་རྒྱ་གར་གྱི་ཉེན་རྟོག་པར་ཐུག་ཡོང་དུས་སེམས་ནང་དུ་དངངས་འཚབ་རྩ་བ་ཉིད་ནས་ཡོང་གི་མེད། ཞོགས་པར་ག་དུས་ཡིན་ནའང་ཁང་པའི་ཐོག་ཁ་ནས་མར་བལྟས་བསྡད་དུས་རྒྱ་གར་གྱི་ཉེན་རྟོག་པ་ཡོད་ཡོད་པ་རེད་ལ། ག་དུས་ཡིན་ཡང་ཁོང་རང་ཚང་མ་ལ་འཚམས་འདྲི་ཞུ་ཡི་ཡོད། དེ་ནས་ཆོབ་སློང་གི་ཡོད། རྒྱ་གར་གྱི་ཉེན་རྟོག་པ་ཉིན་མཚན་དུས་དྲུག་ཏུ་འཚེ་མེད་ཞི་བའི་ལྟ་བ་དང་བྱམས་སྙིང་རྗེའི་ཉམས་ལེན་འདི་གཞི་རྩར་ཡོད་པའི་ཐོག་ནས་ངོས་རང་ལ་སྲུང་སྐྱོབ་བྱེད་ཀྱི་ཡོད་རེད། བྱས་ཙང་རྒྱ་གར་ཉེན་རྟོག་པ་ཚོས་རྒྱ་གར་གྱི་གནའ་རབས་ཀྱི་རིག་གཞུང་འཚེ་མེད་ཞི་བ་དང་བྱམས་སྙིང་རྗེ། ལྷག་པར་དུ་བྱམས་སྙིང་རྗེའི་སྐོར་ལ་དོ་སྣང་བྱ་དགོས་པ་ནི་གལ་ཆེན་པོ་རེད། འདི་རྒྱུན་གཏན་དུ་ངོས་ནས་རྒྱ་གར་གྱི་གྲོགས་པོ་གཞན་ཚོར་ཞུ་ཡི་ཡོད། དེ་རིང་ཡང་ཁྱེད་རང་ཚོར་ཞུ་འདོད་བྱུང་སོང་། ཞེས་གསུངས་འདུག

ཡང་༧གོང་ས་མཆོག་གིས། རྒྱ་གར་འདི་འཛམ་གླིང་ནང་ནས་དམངས་གཙོ་ཆེ་ཤོས་གྲས་ཆགས་བསྡད་ཡོད་རེད། དེར་བརྟེན་ལུང་པ་སྲུང་སྐྱོབ་བྱེད་རྒྱུ་ལབ་ཡོང་དུས་ས་མཚམས་སྲུང་སྐྱོབ་བྱས་པ་ཙམ་མིན་པར་རྒྱ་གར་གྱི་ལོ་ངོ་སྟོང་ཕྲག་ནས་ཡོད་པའི་གནའ་རབས་ཀྱི་རིག་གཞུང་སྲུང་སྐྱོབ་བྱ་རྒྱུ་འདི་རྒྱལ་ཁབ་སྲུང་སྐྱོབ་བྱས་པ་ཆགས་ཀྱི་ཡོད་རེད། རྒྱ་གར་གྱི་གནའ་རབས་ཀྱི་རིག་གཞུང་འདི་འཛམ་གླིང་སྤྱི་ལ་དགོས་མཁོ་ཡོད་པ་ཞིག་རེད། ཡར་ཐོན་ཅན་གྱི་འཛམ་གླིང་འདིའི་ནང་ལ་སྔར་དབྱིན་ཇིའི་རྒྱལ་བརྒྱུད་དང་དབྱིན་ཇིའི་རིང་ལུགས་ཀྱི་སློབ་སྦྱོང་གི་འགྲོ་ལུགས་དར་བའི་ཐོག་ནས། ཚན་རིག་དང་འཕྲུལ་ཆས་ཀྱི་ཡར་ཐོན་ལ་སོགས་པ་ཞེ་དྲགས་བེད་སྤྱོད་ཆེན་པོ་ཡོད་པ་རེད། ཡིན་ནའང་དེ་དང་མཉམ་དུ་ལོ་ངོ་སྟོང་ཕྲག་ནས་ཡོད་པའི་སོ་སོའི་གནའ་རབས་ཀྱི་རིག་གཞུང་ཕྱུག་པོ་དེ་དག་ངེས་པར་དུ་སྲུང་སྐྱོབ་བྱེད་དགོས་རེད། མི་རབས་སྔ་མའི་ནང་རྒྱ་གར་གྱི་དབུ་ཁྲིད་སེམས་དཔའ་ཆེན་པོ་གྷན་དྷིས་འཚེ་མེད་ཞི་བའི་ལྟ་གྲུབ་འཛམ་གླིང་སྤྱི་ཡོངས་ལ་སྤེལ་ཐུབ་པ་བྱུང་ཡོད་རེད། ཐོག་མར་ཁོང་རང་གིས་རྒྱ་གར་གྱི་རང་བཙན་དོན་དུ་འཚེ་མེད་ཞི་བ་དང་འབྲེལ་བའི་ལས་འགུལ་ཤུགས་ཆེན་པོ་སྤེལ་ཡོད་དུས། འདིས་འཛམ་གླིང་སྤྱི་ཡོངས་ལ་འཚེ་མེད་ཞི་བ་དང་འབྲེལ་བའི་སྒོ་ནས་འཐབ་རྩོད་གང་ཡིན་རུང་བྱ་དགོས་པའི་མིག་དཔེ་རྒྱ་ཆེན་པོ་བསྟན་ཡོད་པ་རེད། སེམས་དཔའ་ཆེན་པོ་གྷན་དྷིས་འཚེ་མེད་ཞི་བ་དང་འབྲེལ་བའི་ལྟ་གྲུབ་དང་མི་ཚེ་སྐྱེལ་སྟངས་ལ་བསྔགས་བརྗོད་ཡི་རངས་བྱེད་མཁན་མང་པོ་ཡོད་རེད། འཛམ་གླིང་ག་བར་ཡིན་ནའང་མི་རིགས་འདྲ་མིན་དང་གོམས་གཤིས་མི་འདྲ་བ། རིག་གཞུང་མི་འདྲ་བ་དང་ཆོས་མི་འདྲ་བའི་དབང་གིས་དཀའ་ངལ་ཡོང་གི་ཡོད་རེད། དེར་བརྟེན་རྒྱ་གར་གྱི་སྐད་ཡིག་མི་འདྲ་བ་དང་ཆོས་མི་འདྲ་བ། གོམས་གཤིས་མི་འདྲ་བ། རིག་གཞུང་མི་འདྲ་བ་ཡོད་པ་ཡིན་ནའང་འཆམ་མཐུན་གྱི་སྒོ་ནས་གནས་ཐུབ་ཀྱི་ཡོད་པའི་མིག་དཔེ་འདི་འཛམ་གླིང་ཡོངས་ལ་སྟོན་ཐུབ་པ་དགོས་རྒྱུ་དེ་ཞེ་དྲགས་གལ་ཆེན་པོ་རེད། བྱས་ཙང་དུས་རབས་ཉེར་གཅིག་ནང་ལ་རྒྱ་གར་ཚོས་འཛམ་གླིང་ནང་ལ་ཞི་བདེ་བག་ཕེབས་ཡོང་རྒྱུའི་ཐོག་ལ་ཞབས་འདེགས་ཞུ་ཐུབ་རྒྱུའི་ལས་འགན་ཡོད་རེད། རྒྱུན་ལྡན་ངོས་ནས་འཛམ་གླིང་ནང་ལ་མི་ཐེར་འབུམ་བདུན་ལྷག་ཡོད་པ་འདི་མིའི་རིགས་ཡིན་པ་གཅིག་གྱུར་རེད། རྒྱལ་ཁབ་མི་འདྲ་བ། རིག་གཞུང་མི་འདྲ་བ། མི་རིགས་མི་འདྲ་བ། སྐད་ཡིག་མི་འདྲ་བ། ཆོས་ལུགས་མི་འདྲ་བ་ལ་སོགས་པའི་མི་འདྲ་བའི་ཁྱད་པར་ཡོད་ནའང་ཁྱད་པར་འདི་རིམ་པ་གཉིས་པའི་ཐོག་ནས་ཡོང་གི་ཡོད་རེད། གཞི་རྩའི་ཆ་ནས་ང་ཚོ་མིའི་རིགས་ཡིན་པ་གཅིག་གྱུར་ཆགས་བསྡད་ཡོད་པ་རེད། འདོད་ཀྱང་རུང་། མ་འདོད་ཀྱང་རུང་གོ་ལ་གཅིག་འདིའི་ནང་ལ་མཉམ་རུབ་བྱས་ནས་སྡོད་དགོས་པ་ཆགས་ཡོད་རེད། དེས་ན་གོ་ལ་གཅིག་གྱུར་གྱི་འདུ་ཤེས་དེ་གལ་ཆེན་པོ་རེད། ངོས་རང་ནས་ཀྱང་འཛམ་གླིང་མི་ཚང་མ་གཅིག་གྱུར་གྱི་འདུ་ཤེས་བཅངས་ནས་ས་ཆ་ག་པར་ཕྱིན་ནའང་སོ་སོའི་ནང་ཡིན་པའི་འདུ་ཤེས་བསླེབས་པ་མ་གཏོགས་ཁེར་རྐྱང་དུ་ལུས་པའི་འདུ་ཤེས་རྩ་བ་ཉིད་ནས་བསླེབས་ཀྱི་མི་འདུག  ང་རང་ཚོའི་འཛམ་གླིང་ས་ཕྱོགས་ག་པར་བལྟས་པ་ཡིན་ནའང་རྙོག་དྲ་རེད། རྙོག་དྲ་ཡོང་བའི་གཞི་རྩའི་ཁྱད་པར་ཆུང་ཚགས་འདི་ཚོ་ལ་གཞི་བཅོལ་ནས་ཡོང་གི་ཡོད་པ་རེད། འཛམ་གླིང་ཚ་དྲོད་རྒྱས་པ་དང་འབྲེལ་བའི་དཀའ་ངལ་འདི་འཛམ་གླིང་སྤྱི་ལ་ཁྱབ་པའི་དཀའ་ངལ་རེད། རྒྱ་གར་གྱི་ཉེན་རྟོག་པ་ཚོས་མི་མང་སྲུང་སྐྱོབ་བྱས་པ་ཙམ་མིན་པར་འཚེ་མེད་ཞི་བ་དང་བྱམས་སྙིང་རྗེའི་ལྟ་གྲུབ་འཛིན་སྐྱོང་སྤེལ་གསུམ་བྱེད་མཁན་གྱི་རྒྱལ་ཁབ་འདིའི་མི་རྣམས་སྲུང་སྐྱོབ་བྱེད་ཀྱི་ཡོད་དུས་ཡི་རངས་ཞུ་ཡི་ཡོད། ཅེས་གསུངས་སོང་།

དྲི་བ་དྲིས་ལན་སྐབས་ཉེན་རྟོག་པ་ཞིག་གིས། ཉེན་རྟོག་པ་ནི་དྲག་པོ་དང་རྩུབ་པོ་མེད་པ་བཟོ་མཁན་ཞིག་རེད་དེ། སྐབས་རེར་ཉེན་རྟོག་པའི་བྱེད་སྟངས་ཀྱི་ཐོག་ནས་དྲག་པོའི་སྦྱོར་བ་བརྩམས་དགོས་ཀྱི་ཡོད་དུས་ཉེན་རྟོག་པའི་ངོས་ནས་འཚེ་མེད་ཀྱི་ལྟ་སྟངས་གང་འདྲ་ཡིན་པ་དང་། འཚེ་མེད་ཀྱི་ལམ་ནས་ཉེན་སྲུང་གི་ལས་ལ་འཇུག་སྟངས་གང་འདྲ་ཡིན་བཀའ་འདྲི་ཞུས་པར་༧གོང་ས་མཆོག་གིས། ངོས་ལ་རྒྱ་མིའི་ཉེན་རྟོག་པ་དང་མཉམ་དུ་ལོ་དགུ་ཙམ་བསྡད་པའི་ཉམས་མྱོང་ཡོད་རེད། དེ་ནས་ལོ་དྲུག་ཅུ་ལྷག་ཙམ་རྒྱ་གར་གྱི་ཉེན་རྟོག་པའི་སྲུང་སྐྱོང་འོག་ལ་གནས་བསྡད་ཡོད་པ་རེད། ཡིན་ནའང་སྤྱིར་བཏང་གི་གཞུང་གི་འཛིན་སྐྱོང་དང་འབྲེལ་བའི་ཐོག་ནས་ཁྱད་པར་ཡོང་གི་རེད། རྒྱ་གར་ནི་དམངས་གཙོ་དང་རང་དབང་ཅན་གྱི་རྒྱལ་ཁབ་ཆགས་ཡོང་དུས་ཉེན་རྟོག་པའི་རྣམ་འགྱུར་དེ་དང་མཐུན་པ་ཡོང་གི་རེད། སྦྱོར་བའམ་བྱ་བ་ཙམ་གྱིས་བཟང་ངན་གྱི་དབྱེ་བ་ཕྱེས་ཐུབ་ཀྱི་མ་རེད། གཙོ་བོ་ཀུན་སློང་ལ་ལྟ་དགོས་ཀྱི་ཡོད་རེད། སྤྱིར་བཏང་གཞི་རྩའི་ཐོག་ནས་ཉེན་རྟོག་པ་ཚོ་མིའི་བཟང་སྤྱོད་དང་དམངས་གཙོ། རང་དབང་སྲུང་སྐྱོབ་བྱེད་མཁན་ཆགས་ཀྱི་ཡོད་རེད། འོན་ཀྱང་སྐབས་རེར་མི་འགའ་ཤས་ཤིག་གིས་རྒྱུ་མཚན་དང་སྐད་ཆ་བཤད་ནས་རྩ་བ་ཉིད་ནས་མ་ཉན་པ་ཡིན་ན། ཏོག་ཙམ་དྲག་རྩུབ་ཀྱི་སྒོ་ནས་རྣམ་འགྱུར་སྟོན་དགོས་པ་དེ་འདྲ་ཡོང་གི་ཡོད་རེད། འདི་འགྲིག་གི་ཡོད་པ་རེད། ཅེས་བཀའ་ལན་གནང་འདུག

གསར་འགོད་པ། བསྟན་འཛིན་ཕུར་བུ།