ད་ལྟ་རྒྱ་གར་ནང་ཏོག་དབྱིབས་གཉན་རིམས་འགོས་ཁྱབ་ཐད་སྣང་མེད་ཤོར་གྱི་ཡོད་ནའང་བཙན་བྱོལ་བོད་མིའི་སློབ་གྲྭ་ཁག་དང་སེར་སྐྱ་མི་མང་ཡོངས་ནས་རིམས་ནད་སྔོན་འགོག་གི་བྱེད་སྒོའི་རིགས་མུ་མཐུད་སྤེལ་ཏེ་ནད་ཡམས་འགོས་ཁྱབ་མཚམས་འཇོག་ཐབས་གནང་བའི་འབོད་སྐུལ་ཞུ་ཡི་འདུག
དེ་རིང་བོད་མིའི་སྒྲིག་འཛུགས་ཀྱི་ཝུ་ཧན་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་ནས་ཏོག་དབྱིབས་གཉན་རིམས་དང་འབྲེལ་བའི་གསར་འགོད་གསལ་བསྒྲགས་ཐེངས་ ༤༩ སྤེལ་བའི་སྟེང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་གཞོན་ངག་དབང་བསྟན་འཛིན་ལགས་ཀྱིས། ཏོག་དབྱིབས་ནད་རིམས་དང་འབྲེལ་བའི་བོད་མིའི་སྒྲིག་འཛུགས་ཀྱི་གསལ་བསྒྲགས་དང་གསལ་བཤད་གསུམ་གནང་སྐབས། རྒྱ་གར་གཞུང་ནས་སྔོན་ཁབ་ཐེངས་གཉིས་པ་མགོ་འཛུགས་གནང་གི་ཡོད་པའི་ནང་། ལོ་ ༦༠ ཡན་གྱི་མི་མང་དང་། ལོ་ ༤༥ ནས་ ༥༩ བར་ཏོག་དབྱིབས་ནད་ཕོག་པའི་མི་མང་ལ་སྔོན་འགོག་ཁབ་རྒྱག་རྒྱུ་ཡིན་པའི་གསལ་བསྒྲགས་ཐོན་ཡོད་པ་ལྟར། བཙན་བྱོལ་བོད་མིའི་ས་གནས་ཁག་ཅིག་ཐད་ཀར་རྒྱ་གར་གཞུང་གི་སྨན་ཁང་དང་ཁག་ཅིག་གིས་ས་གནས་མགོ་འཛིན་བརྒྱུད་ཐོ་འགོད་བྱེད་དགོས་ཀྱི་ཡོད་སྟབས། འཕྲོད་བསྟེན་ལས་ཁུངས་ནས་ས་གནས་མགོ་འཛིན་རྣམ་པ་དང་སྨན་ཁང་གི་འགན་འཛིན་རྣམས་ལ་ལམ་སྟོན་ཡི་གེ་ཞིག་ཕུལ་ཡོད་པ་དང་། རྒྱ་གར་གཞུང་གིས་གསར་དུ་ནད་གཞི་ཕོག་མཁན་རྣམས་ལ་སྔོན་ཁབ་རྒྱག་གི་ཡོད་པ་ལྟར། བོད་མི་ཚོས་རང་གི་ཉེ་འཁྲིས་ཀྱི་བོད་མིའི་སྨན་ཁང་གི་འགན་འཛིན་དང་ས་གནས་མགོ་འཛིན་རྣམ་པ་བརྒྱུད། རང་ཉིད་རྒྱ་གར་གཞུང་གི་སྔོན་ཁབ་བརྒྱབ་རྒྱུའི་ཐོ་ཁོངས་སུ་ཞུགས་ཐུབ་ཀྱི་ཡོད་མེད་བཀའ་འདྲི་ཞུ་དགོས་པའི་ལམ་སྟོན་གནང་སོང་།
ཡང་རྒྱ་གར་ནང་ཏོག་དབྱིབས་གཉན་རིམས་འགོས་ཁྱབ་ཐད་སྣང་མེད་ཤོར་གྱི་ཡོད་པ་ལྟར། ལོ་གསར་ཚར་བ་དང་བཙན་བྱོལ་བོད་མིའི་ཁྲོད་ཏོག་ནད་འགོས་ཁྱབ་བྱུང་བ་ཁག་ཅིག་འབྱུང་གི་ཡོད་སྟབས། བོད་མི་ཚོས་དུས་རྒྱུན་ལྟར་ཏོག་དབྱིབས་སྔོན་འགོག་གི་ལས་དོན་རྒྱུན་སྐྱོང་གནང་རྒྱུ་དང་དེ་འབྲེལ་ཐད་དོགས་གཞི་དང་སེམས་ཁམས་འཕྲོད་བསྟེན་སོགས་ཀྱི་དཀའ་ངལ་ཡོད་རིགས་ནས་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་དང་སྨན་པ་རྣམས་ལ་འབྲེལ་བ་གནང་རྒྱུ་གལ་ཆེན་ཡིན་སྐོར་དང་། ད་ལྟ་གསུམ་བཅུའི་དུས་དྲན་བསླེབ་གྲབས་ཡོད་པ་དང་བསྟུན་བོད་མིའི་ཚོགས་སྡེ་ཁག་གི་གཞུང་འབྲེལ་མཛད་སྒོ་སོགས་ཀྱི་སྐབས། བོད་མི་ཚོས་ཁ་རས་གྱོན་པ་དང་རྒྱང་ཐག་ཧྥེ་ཊི་དྲུག་འཇོག་རྒྱུ་དང་། དམིགས་བསལ་དུས་ཚིགས་བརྗེ་འགྲོ་ཡི་ཡོད་པའི་སྐབས་འདིར་གོས་ཆས་ཏག་ཏག་གྱོན་ཏེ་ཆམ་ནད་རིགས་ལ་སྣང་མེད་མི་གཏོང་བ་དང་། གལ་སྲིད་ཆམ་ནད་ཀྱི་ནད་རྟགས་ཡོད་མཁན་རིགས་ཡིན་ཚེ། གསུམ་བཅུའི་དུས་དྲན་ལ་མཉམ་ཞུགས་མི་གནང་བ་སོགས་ཀྱི་འབོད་སྐུལ་ཞུས་གནང་སོང་།
ནད་པའི་གནས་སྟངས་སྐོར་ལ་ཏོག་དབྱིབས་ཛ་དྲག་ལས་དོན་ཚོགས་ཆུང་གི་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས། རྒྱ་གར་ནང་འདས་པའི་བདུན་ཕྲག་གཅིག་གི་ནང་བོད་མི་གྲངས་ ༧ ལ་འགོག་ཁབ་བརྒྱབས་ཏེ། ད་བར་ཁྱོན་བོད་མི་གྲངས་ ༤༡༣ འགོག་ཁབ་བརྒྱབས་ཡོད་སྐོར་དང་། འདས་པའི་བདུན་ཕྲག་ནང་བོད་མི་གྲངས་ ༡༨༠༥ ལ་ཏོག་དབྱིབས་གཉན་རིམས་དང་འབྲེལ་ནས་བརྟག་དཔྱད་བྱས་ཡོད་པ་དང་། དྷ་ས་ཁུལ་དུ་བོད་མི་གྲངས་ ༥༥ དང་ས་གནས་གཞན་ཁག་ཅིག་བཅས་ཁྱོན་བོད་མི་གྲངས་ ༦༡ ལ་ཏོག་དབྱིབས་གཉན་རིམས་ཕོག་ཡོད་པའི་ཁྲོད། བགྲེས་ཤོས་དེ་ལོ་ན་ ༨༦ དང་ཆུང་ཤོས་ལོ་ན་ ༡༥ ཡིན་པ་དང་། འདས་གྲོངས་སུ་ཕྱིན་པ་གཅིག་ཀྱང་བྱུང་མེད་སྐོར་འགྲེལ་བརྗོད་གནང་སོང་།
གསར་འགོད་གསལ་བསྒྲགས་སྟེང་སྨན་པ་བསྟན་འཛིན་བརྩོན་འགྲུས་ལགས་ཀྱིས། རང་རེའི་བོད་མིའི་སྤྱི་ཚོགས་ནང་གི་ཚོགས་སྡེ་ཆེ་ཁག་དང་དགོན་སྡེའི་ནང་ཏོག་དབྱིབས་གཉན་རིམས་འགོས་ཁྱབ་འགྲོ་རྒྱུ་མྱུར་པོ་ཡིན་སྟབས། ཚོགས་པ་དང་སློབ་གྲྭ་ཁག་གིས་རང་ཁོངས་ཀྱི་མི་རྣམས་ཕྱི་ལོགས་སུ་གཏོང་གི་མེད་ནའང་། ནང་ལ་སྡོད་སྐབས་ངེས་པར་དུ་ཁ་རས་གྱོན་དགོས་པ་དང་། དེ་བཞིན་རླུང་གི་འགྲོ་རྒྱུག་ལེགས་པ་ཡོང་ཆེད་དགོན་སྡེ་ཁག་གི་ཆོས་ར་རྣམས་ཕྱི་ལ་འཚོག་རྒྱུ་དང་། སློབ་གྲྭ་ཁག་གི་དངོས་སུ་འཛིན་གྲྭ་འཚོག་སྐབས་ཀྱང་འཛིན་གྲྭའི་སྒོ་དང་སྒེའུ་ཁུང་འབྱེད་རྒྱུ་དང་། སློབ་མ་ཡིན་ནའང་ཉུང་ཉུང་བྱས་ཏེ་འཆོག་ཐུབ་ན་ལེགས་པོ་ཡོད་སྐོར་དང་། གཞན་ཡང་སྤྱི་ཐབ་ཡོད་པའི་ཚོགས་སྡེ་ཁག་གིས་མ་བྱན་ཞིག་ཆེད་དུ་བསྐོས་ཏེ་ཞལ་ལག་བགོ་འགྲེམ་བྱ་དགོས་པ། དེ་བཞིན་ཕྱི་ནས་ཕེབས་པའི་མི་རྣམས་ངེས་པར་དུ་འགོག་དབྱེ་ཟུར་འཇོག་ཁང་དུ་བཞག་སྟེ་ན་ཚ་ཡོད་མེད་བརྟག་དཔྱད་བྱ་དགོས་པ་དང་། གལ་ཏེ་དགོན་པ་དང་སློབ་གྲྭ་ཁག་གི་མི་སུ་འདྲ་ཞིག་ལའང་ཆམ་པ་ལྟ་བུ་ཕོག་ཚེ། ཆམ་ནད་རེད་སྙམ་ནས་སྣང་མེད་མི་འཇོག་པར་འཕྲལ་དུ་ཏོག་དབྱིབས་གཉན་རིམས་ཡིན་མིན་བརྟག་དཔྱད་བྱ་དགོས་ཤིང་། དེ་ལྟར་བྱས་ཚེ་གཉན་རིམས་གཞན་ལ་འགོས་ཁྱབ་མི་འགྲོ་བར་ཕན་ཐོགས་ཀྱི་ཡོད་སྐོར་བརྗོད་གནང་སོང་།
དེ་རིང་གི་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་གནས་ཚུལ་ལྟར་ན། རྒྱལ་བལ་གཉིས་ཀྱི་ནང་ད་ལྟ་བར་དུ་ཁྱོན་བོད་མི་ཏོག་དབྱིབས་ནད་པ་གྲངས་ ༡༦༠༡ བྱུང་ཡོད་པའི་ཁྲོད་དྲག་སྐྱེད་བྱུང་བ་གྲངས་ ༡༤༨༥ དང་། རྐྱེན་འདས་སུ་ཕྱིན་པ་གྲངས་ ༤༡། ནད་མནར་འོག་ཡོད་མཁན་གྲངས་ ༧༥ ཙམ་ཡོད་འདུག དེ་བཞིན་ཕྱི་རྒྱལ་ཁག་གི་བོད་མིའི་གྲངས་འབོར་ལ་གསར་སྣོན་བྱས་མེད་ནའང་། ཟླ་འདིའི་ཕྱི་ཚེས་ ༣ ཉིན་འདི་ག་གསར་ཁང་ལ་འབྱོར་བའི་གནས་ཚུལ་ལྟར་ན། འདས་པའི་བདུན་ཕྲག་གཉིས་ཙམ་རིང་སྦེལ་ཇམ་དུ་བོད་རིགས་ཁྱིམ་ཚང་ ༡༦ ལ་ཏོག་དབྱིབས་གཉན་རིམས་ཕོག་ཡོད་པའི་ཁྲོད་རྐྱེན་འདས་སུ་ཕྱིན་པ་གཅིག་ཀྱང་བྱུང་ཡོད་མི་འདུག
གསར་འགོད་པ། པ་སངས་ཚེ་རིང་། ཀླུ་མགོན་ཐར། སྐལ་བཟང་སྦྱིན་པ།
