སྐྱབས་འགྲོའི་ཚིག་འདོན་པ་ཙམ་མིན་པར་དཀོན་མཆོག་གསུམ་གང་འདྲ་ཡིན་ཤེས་དགོས།

༧གོང་ས་རྒྱལ་བ་རིན་པོ་ཆེ་མཆོག་ནས་ཐེག་པ་ཆེན་པོ་དང་ཐེག་པ་ཆུང་ངུ་ཞེས་པའི་ཚིག་དེ་ཡག་པོ་མི་འདུག་པས་ཁོང་ནས་དུས་རྒྱུན་ལེགས་སྦྱར་གྱི་ཆོས་བརྒྱུད་དང་པཱ་ལིའི་ཆོས་བརྒྱུད་ཅེས་སྐད་ཡིག་ཐོག་ནས་དབྱེ་བ་འབྱེད་ཀྱི་ཡོད་ཅེས་གསུངས་འདུག

དེ་རིང་སིང་གྷ་པུར་དུ་རྟེན་གཞི་བྱས་པའི་སིང་གྷ་པོར་བོད་ཀྱི་རིག་གཞུང་ཚོགས་པ་གཙོས་པའི་ནང་བསྟན་ཆོས་ཚོགས་ཁག་མཉམ་འབྲེལ་གྱིས་གོ་སྒྲིག་ཞུས་པའི་ཉིན་གྲངས་གསུམ་རིང་གི་བསླབ་པ་གསུམ་སྐོར་གྱི་རྒྱལ་སྤྱིའི་ཚོགས་ཆེན་དྲ་ལམ་ནས་དབུ་འབྱེད་གནང་ཡོད་པ་དང་། ༧གོང་ས་རྒྱལ་བ་རིན་པོ་ཆེ་མཆོག་ནས་དབུ་འབྱེད་ཀྱི་གསུང་བཤད་གནང་སྐབས། སངས་རྒྱས་ཀྱི་ཆོས་དེ་ལོ་ ༢༥༠༠ ལྷག་ཕྱིན་པའི་ཆོས་བརྒྱུད་ཅིག་ཆགས་ཡོད་པ་རེད། དེང་སྐབས་འཛམ་གླིང་འདིར་དེ་སྔ་ནང་པ་མིན་མཁན་ཚོས་སངས་རྒྱས་པའི་ཆོས་ལ་བརྟག་དཔྱད་བྱས་ཏེ་དམིགས་བསལ་ཞིག་ཡོད་པ་དང་། དེ་བཞིན་ཚན་རིག་པའི་ནང་ལའང་དོ་སྣང་ཡོང་གི་འདུག དེར་བརྟེན་ང་ཚོས་དུས་རྒྱུན་ཐེག་པ་ཆེན་པོ་དང་ཐེག་པ་ཆུང་ངུ་ཞེས་བཤད་ཀྱི་ཡོད་པ་རེད། ཚིག་དེ་ཡག་པོ་མི་འདུག ངས་དུས་རྒྱུན་དེར་ལེགས་སྦྱར་གྱི་ཆོས་བརྒྱུད་དང་པཱ་ལིའི་ཆོས་བརྒྱུད་ཅེས་སྐད་ཡིག་ཐོག་ནས་ཆོས་དབྱེ་བ་འབྱེད་ཀྱི་ཡོད། པཱ་ལིའི་ཆོས་བརྒྱུད་ནང་འདུལ་བ་དང་བསླབ་པ་གསུམ་གྱི་ཉམས་བཞེས་དེ་དག་གཞི་རྩ་བྱས་ནས་ཡོད་པ་རེད། དེ་བཞིན་ན་ལེནྜའི་ལེགས་སྦྱར་གྱི་ཆོས་བརྒྱུད་ལ་ཆ་བཞན་ནའང་བསླབ་པ་གསུམ་གྱི་ཉམས་ལེན་དེ་གཙོ་བོ་རེད། སློབ་དཔོན་ཀླུ་སྒྲུབ་ཡབ་སྲས་ལ་སོགས་པ་ཚང་མ་དགེ་སློང་འདུལ་བ་འཛིན་པ་ཤ་སྟག་རེད། གང་ལྟར་ང་རང་ཚོས་མིག་དཔེ་ལྟ་ས་དེ་བཅོམ་ལྡན་འདས་རེད། བཅོམ་ལྡན་འདས་ཁོང་རང་ཡང་ཁྱིམ་ནས་ཁྱིམ་མེད་པར་རབ་ཏུ་བྱུང་། དེ་ནས་རབ་བྱུང་གི་སྒོ་ནས་བསྙེན་པར་རྫོགས། དེ་ལྟར་བཅོམ་ལྡན་འདས་ཀྱིས་ཆོས་སྟོན་སྐབས་འདུལ་བའི་ཉམས་ལེན་དེ་དག་གཞི་མར་བཞག་ནས། དེ་ཚུལ་ཁྲིམས་ཀྱི་བསླབ་པ་བྱས་པ་དང་། དེ་ནས་གཞི་རྩ་དགེ་ཚུལ་དང་དགེ་གཉེན་དེ་འདྲ་ཡོད་པ་རེད་དེ། གཙོ་བོ་ཡོངས་སུ་རྫོགས་པ་དགེ་སློང་གི་སྡོམ་པ་དེ་མཆོག་ཏུ་རྩི་ཡི་ཡོད་པ་རེད། པཱ་ལིའི་གཞུང་ནང་ཆ་བཞག་ནའང་འདུལ་བའི་ཉམས་ལེན་དེ་རྨང་གཞི་ཆགས་ཡོད་པ་རེད། ལེགས་སྦྱར་གྱི་ཆོས་བརྒྱུད་ནང་དུའང་འདུལ་བ་དེ་གཙོ་བོ་ཆགས་ཡོད་པ་རེད། ཅེས་གསུངས་འདུག

ཡང་ཁོང་གིས། ང་རང་མི་ཞིག་ཡིན་པའི་ཆ་ནས་འཛམ་གླིང་འདིར་བྱམས་བརྩེ་གོང་མཐོར་སྤེལ་གྱི་ཡོད། སྐྱེ་བ་སྔ་ཕྱི་དང་ཆོས་ལུགས་ཀྱི་སྐད་ཆ་མེད་པར་མི་བཟང་པོ་ཞིག་བྱ་རྒྱུ་དང་། ང་མི་ཞིག་ཡིན་པའི་ཆ་ནས་དེ་རིམ་པ་དང་པོར་རྩི་ཡི་ཡོད། རིམ་པ་གཉིས་པ་དེ་ང་ཆོས་པ་ཞིག་རེེད། ཆོས་པ་ཞིག་ཡིན་པའི་ངོས་ནས་འཛམ་བུ་གླིང་འདིའི་སྒང་གི་ཆོས་ལུགས་ཚང་མར་ལྟ་གྲུབ་མི་འདྲ་བ་རེ་ཡོད་རེད་དེ། ཡིན་ནའང་སེམས་པ་བཟང་པོ་དང་བྱམས་བརྩེ་དགོས་པ་ཆོས་ལུགས་ཚང་མས་གསུང་གི་ཡོད། དེར་བརྟེན་ལྟ་གྲུབ་མི་འདྲ་བ་ནང་པ་རང་གི་ནང་ལའང་ཡོད་རེད། དཔེར་ན་ན་ལེནྜའི་ཆོས་བརྒྱུད་རང་གི་ནང་དུའང་ལྟ་གྲུབ་མི་འདྲ་བ་ཡོད་རེད། ལྟ་གྲུབ་མི་འདྲ་བ་དེ་དག་ཁམས་དང་མོས་པའི་ཁྱད་པར་ལ་བརྟེན་ནས་ཡོང་གི་ཡོད་པ་རེད། འོན་ཀྱང་དེ་ཐམས་ཅད་ཀྱིས་སེམས་པ་བཟང་པོ་དང་གཞན་ཕན་གྱི་ལྷག་བསམ་ཡོད་དགོས་པའི་གཅིག་གྱུར་བསླབ་བྱ་གསུང་གི་ཡོད་པ་རེད། དེ་བཞིན་འཛམ་གླིང་སྟེང་གི་ཆོས་ལུགས་རྣམས་དུམ་བུ་ལྟ་བུ་གཉིས་ལ་ཕྱེས་ན། འཇིག་རྟེན་བཀོད་པ་པོ་འདོད་མཁན་ཞིག་དང་མི་འདོད་མཁན་གཅིག་ཅེས་ཡོད་པ་རེད། དེ་གཉིས་ཀར་ལྟ་གྲུབ་མི་འདྲ་བ་ཡོད་ནའང་། འཇིག་རྟེན་བཀོད་པ་པོ་འདོད་མཁན་ཚོས་འཇིག་རྟེན་བཀོད་པ་པོ་བྱམས་བརྩེའི་བདག་ཉིད་རེད། ང་ཚོ་ཚང་མས་འཇིག་བརྟེན་བཀོད་པ་པོ་བྱམས་བརྩེའི་བདག་ཉིད་དེས་བཀོད་པ་རེད། ཅེས་ཟེར་གྱི་ཡོད། དེ་བཞིན་ང་ཚོའི་ཕ་ཡི་ཚོད་ལྟ་བུ་འཇིག་རྟེན་བཀོད་པ་པོ་དཀོན་མཆོག་དེ་བྱམས་བརྩེའི་བདག་ཉིད་ཡིན་དུས། ང་ཚོ་དཀོན་མཆོག་དེའི་སྲས་ལྟ་བུ་ཆགས་བསྡད་ཡོད་པ་རེད། དེར་བརྟེན་ང་ཚོ་ཚང་མས་བྱམས་བརྩེ་ལྡན་པ་ཞིག་བྱ་དགོས་ཀྱི་འདུག་ཟེར་རྒྱུ་དེ་ཆོས་ལུགས་ཚང་མས་གསུང་གི་འདུག དེ་ནས་ང་ཚོ་སངས་རྒྱས་པའི་ཆོས་ལུགས་ནང་དུ་ན་ལེནྜའི་ཆོས་བརྒྱུད་དང་པཱ་ལིའི་ཆོས་བརྒྱུད་ཅེས་མི་འདྲ་བ་གཉིས་ཡོད་པ་རེད། གང་ལྟར་པཱ་ལིིའི་གཞུང་དེ་དག་སངས་རྒྱས་པའི་ཆོས་ཀྱི་རྨང་གཞི་ལྟ་བུ་ཆགས་བསྡད་ཡོད་པ་རེད། ལེགས་སྦྱར་གྱི་ཆོས་བརྒྱུད་ནང་དུའང་འདུལ་བའི་ཉམས་ལེན་རྨང་གཞི་རེད། དེ་ལ་གཞི་ཐམས་ཅད་ཡོད་པར་སྨྲ་བའི་སྡེ་བ་དང་། ཕལ་ཆེན་སྡེ་བ། མང་བཀུར་བའི་སྡེ་བ་ཞེས་མང་པོ་ཡོད་རེད། ང་ཚོ་བོད་ལ་ཕལ་ཆེར་གཞི་ཐམས་ཅད་ཡོད་པར་སྨྲ་བའི་སྡེ་བ་རེད་འདུག དེ་ནས་རྒྱ་ནག་ལ་ཆོས་སྲུང་གི་སྡེ་བ་རེད། གང་ལྟར་སྡེ་བ་མི་འདྲ་བ་ཡོད་རེད་དེ། ཚང་མར་སོ་སོར་ཐར་པ་གཅིག་པ་རེད་འདུག ཅེས་སོགས་བཀའ་སློབ་བསྩལ།

བཀའ་སློབ་བསྩལ་གནང་གྲུབ་རྗེས། ཚོགས་ཆེན་ལ་མཉམ་ཞུགས་གནང་མཁན་བཙུན་མ་ཞིག་གིས་ལེགས་སྦྱར་དང་པཱ་ལིའི་ཆོས་བརྒྱུད་གཉིས་བར་ལ་འབྲེལ་ལམ་སྐྲུན་ཐབས་སྐོར་བཀའ་སློབ་གནང་རྒྱུའི་རེ་སྐུལ་ཞུས་པ་བཞིན་མགོན་པོ་མཆོག་གིས། ད་ཐེངས་ལྟ་བུའི་ཆོས་བརྒྱུད་གཉིས་ཀའི་མཁས་པ་རྣམས་ལྷན་འཛོམས་ཐོག་ནས་བགྲོ་གླེང་བྱེད་ཐུབ་ཚེ། ཆོས་བརྒྱུད་གཉིས་ཀའི་གཞི་རྩ་གཅིག་པ་ཡིན་པ་ཤེས་རྟོགས་ཐུབ་ཀྱི་ཡོད་པས། འདི་ལྟ་བུའི་ཚོགས་འདུ་ནི་གལ་ཆེན་པོ་ཡིན་པ་མ་ཟད་དགོས་གལ་ཡང་ཆེ་སྐོར་བཀའ་སློབ་བསྩལ་འདུག ཡང་ནང་པའི་རྗེས་འཇུག་པ་བཟང་པོ་ཇི་ལྟར་བྱ་དགོས་ཚུལ་གྱི་བཀའ་འདྲིར་བཀའ་ལན་གནང་སྐབས། ང་ཚོས་སྐྱབས་འགྲོའི་ཚིག་འདོན་པ་ཙམ་མིན་པར། སངས་རྒྱས་ཞེས་པ་དང་། ཆོས། དགེ་འདུན་ཞེས་པ་གང་འདྲ་ཞིག་ལ་གོ་དགོས་མིན་ཤེས་དགོས་ལ། དེ་ལྟར་ཤེས་པ་ལ་སློབ་སྦྱོང་བྱ་དགོས་སྐོར་གསུངས་སོང་།

གསར་འགོད་པ། པ་སངས་ཚེ་རིང་།