བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ལྡི་ལིར་འབྱོར།

བསྟན་འཛིན་བརྩོན་འགྲུས་ལགས་ནས་རྒྱ་ནག་གཞུང་གིས་རྒྱ་གར་ལ་ཞེད་སྣང་བྱེད་དགོས་ས་དེ་ནི་བོད་ཀྱི་གནད་དོན་དེ་གཅིག་པུ་ཆགས་བསྡད་ཡོད་སྐོར་བརྗོད་སོང་།དེ་རིང་སྔ་དྲོར་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་དང་ཁོང་གི་རོགས་པ་རྣམས་རྒྱ་གར་གྱི་རྒྱལ་ས་ལྡི་ལིར་འབྱོར་ཞིང་། ཉིན་རྒྱབ་ཆུ་ཚོད་ ༣ ཡོལ་རྗེས་ལྡི་ལིའི་གཞུང་ལམ་བཱ་ཡི་པཱ་སི་(Bypass)ལ་བསླེབས་སྐབས། རྒྱ་གར་བོད་དོན་རྒྱབ་སྐྱོར་ཚོགས་པ་(BTSM) དང་ལྡི་ལིའི་བོད་སྒར་བསམ་ཡས་གླིང་གི་བརྒྱ་འཐུས་རྣམ་པ། བོད་ཀྱི་གཞོན་ནུ་དང་བུད་མེད་ལྷན་ཚོགས། ངག་མེད་ཀྱི་མགྲིན་ཚབ་ལས་འགུལ་དྭང་བླངས་བ་སོགས་ནས་ཕེབས་བསུ་ཞུས་སོང་།

ཕྱི་དྲོའི་ཆུ་ཚོད་ ༥ ཐོག་ལྡི་ལི་བོད་སྒར་བསམ་ཡས་གླིང་དུ་འབྱོར་ཏེ་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་ཕེབས་བསུའི་མཛད་སྒོ་ཞིག་ཚོགས་སོང་བ་དང་། མཛད་སྒོའི་ཐོག་ལྡི་ལི་དང་དེའི་ཉེ་འཁོར་གྱི་བོད་རིགས་བརྒྱ་ཕྲག་བརྒལ་བ་འཛོམས་འདུག་ལ། སྐབས་དེར་བསྟན་འཛིན་བརྩོན་འགྲུས་ལགས་ཀྱིས་ཁོང་རྡ་རམ་ས་ལ་ནས་ལྡི་ལི་བར་དུ་གོམ་བགྲོས་མགོ་བཙུགས་པ་ནས་དེ་རིང་བར་བོད་མིའི་སྤྱི་ཚོགས་ཙམ་མ་ཡིན་པར། ཕྱི་རྒྱལ་སོགས་ཕྱོགས་ཡོངས་ནས་རྒྱབ་སྐྱོར་གནང་སོང་བ་དང་། ལྷག་པར་དུ་རྒྱ་གར་གསར་འགྱུར་བརྒྱུད་ལམ་ཁག་གིས་དོ་སྣང་བྱས་ཏེ་ཁྱབ་བསྒྲགས་ཀྱི་རོགས་པ་བྱས་ཡོད་པས་དང་། རྒྱབ་སྐྱོར་གནང་ས་དེ་བསྟན་འཛིན་བརྩོན་འགྲུས་མ་ཡིན་པར་བོད་ཀྱི་རྩ་དོན་ཡིན་པ་དེ་ཤེས་དགོས་ལ། དེ་རིང་གི་གནད་དོན་འདི་ནི་ལས་འགུལ་ཞིག་ཡིན་པ་ལས་གོམ་བགྲོད་ཀྱི་ལས་འགུལ་ཞིག་ཆགས་བསྡད་ཡོད་པ་མ་རེད། གོམ་བགྲོད་དེ་ས་ཆ་གཅིག་ནས་གཅིག་ལ་མཇུག་སྒྲིལ་འགྲོ་གི་ཡོད་པ་རེད། ལས་འགུལ་གཙོ་བོ་དེ་རྒྱ་ནག་གཅིག་ལ་འཛིན་པའི་སྲིད་ཇུས་ཞེས་པ་དེར་བསྒྱུར་བཅོས་གཏང་དགོས་འདུག་ཟེར་བ་དེ་ཡིན། ལམ་སང་འགྱུར་བ་འགྲོ་རྒྱུ་ཁག་པོ་ཞིག་རེད་དེ། འོན་ཀྱང་འགྱུར་བ་གཏོང་རྒྱུ་མེད་པ་ཞིག་མིན་ཚུལ་བརྗོད་སོང་།

ཡང་ཁོང་གིས་ད་རེས་གོམ་བགྲོད་ཀྱི་ལས་འགུལ་དེ་སྤེལ་བའི་དམིགས་ཡུལ་འགྲེལ་བརྗོད་གནང་བ་དང་འབྲེལ། བོད་ཀྱི་འཐབ་རྩོད་དེ་རྒྱ་གར་གྱི་ངོས་ནས་རྒྱ་ནག་ལ་ལན་འདེབས་བྱ་རྒྱུའི་ཕན་ཐོགས་ཆེ་ཤོས་དེ་ཆགས་ཡོད་པ་དང་། རྒྱ་ནག་ཡིན་ན་ཡང་རྒྱ་གར་ལ་ཞེད་སྣང་བྱེད་དགོས་ས་དེ་ནི་བོད་ཀྱི་གནད་དོན་དེ་གཅིག་པུུ་ཆགས་བསྡད་ཡོད་པ་རེད། དེ་ཡང་། བཙན་བྱོལ་བ་འབུམ་གཅིག་ལྷག་རྒྱ་གར་ནང་ཡོད་པ་དང་། བོད་ཀྱི་རིག་གཞུང་ངོ་བོ་དང་འཐབ་རྩོད་མ་བརླག་པར་ཉིན་ཞིག་བོད་ལ་ལོག་འགྲོ་གི་ཡིན་ཞེས་སྡོད་ཡོད་པ་མ་ཟད། དེའི་ཐོག་ནས་བོད་ནང་གི་བོད་པ་རྣམས་སེམས་ཤུགས་འཕར་གྱི་ཡོད་པས་རྒྱ་ནག་ཞེད་སྣང་ས་ཆེ་ཤོས་དེ་ཆགས་བསྡད་ཡོད་ཅེས་བརྗོད་སོང་།

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་འགྲུབ་ལགས་ཀྱིས། ང་ཚོའི་བོད་དོན་འཐབ་རྩོད་ཀྱི་ལས་འགུལ་དེ་ནི་གང་ཟག་གཅིག་གཉིས་དང་མི་ཐོག་གཅིག་གཉིས་ཀྱི་འཐབ་རྩོད་ཅིག་མ་ཡིན་པར། བོད་རང་བཙན་ཐོབ་ནས་རང་དབང་གི་བདེན་མཐའ་མ་གསལ་བར་དུ་མི་རེ་ངོ་རེ་ལ་འགན་ཡོད་བསམ་པའི་ཐོག་ལས་འགན་འཁུར་དགོས་པ་ཞིག་ཆགས་བསྡད་ཡོད། དེར་བརྟེན་བསྟན་འཛིན་བརྩོན་འགྲུས་ལགས་ཀྱིས་རྒྱ་གར་མི་མང་གི་ནང་བོད་དོན་ཐོག་གོ་རྟོགས་སྤེལ་ཐུབ་པ་དང་། བོད་མི་མི་རེ་ངོ་རེའི་སེམས་ནང་ཚོར་བ་སྤྲད་ཐུབ་པ་བྱུང་ཡོད་པ་མ་ཟད། བོད་ནང་ལོག་ལ་བརྡ་ལན་དང་དགྲ་བོ་རྒྱ་དམར་གྱི་གཞུང་ལ་གནས་ཚུལ་བཏང་ཐུབ་པ་བྱུང་ཡོད། ལས་འགུལ་དེ་སྤྱི་ཡོངས་ནས་གྲུབ་འབྲས་རང་བཞིན་དང་། ལས་འགུལ་དེ་མུ་མཐུད་རྒྱུན་སྐྱོང་དགོས་པ་དེ་ང་ཚོ་ཚང་མའི་སྟེང་ལ་འགན་ཡོད་པ་རེད། ཅེས་བརྗོད་སོང་།

མཇུག་ཏུ་བོད་ཀྱི་ཡུན་རིང་བློས་ཐུབ་གྲོགས་པོ་གསར་འགོད་པ་ཟུར་པ་ཝི་ཇེ་ཀ་རན་ཏི་ལགས་ཀྱིས། ངས་རྒྱུན་དུ་བོད་ཀྱི་མི་རབས་གསར་པ་རྣམས་ནི་བསོད་ནམས་ཅན་ཞིག་ཡིན་དྲན་གྱི་ཡོད། གང་ཡིན་ཟེར་ན། ཁྱོད་ཚོ་ལ་རང་བཞིན་གྱིས་གཞན་ལ་མེད་པའི་འགན་དང་དམིགས་ཡུལ་ཆེན་པོ་ཞིག་ཡོད་པ་རེད། དེ་ནི་བོད་ལ་རང་དབང་རང་བཙན་སླར་གསོ་བྱས་ཏེ་སླར་ཡང་སོ་སོའི་རྒྱལ་ཁབ་རང་བཙན་གཙང་མ་བཟོ་རྒྱུ་དེ་ཡིན། ང་རང་རྒྱ་གར་ལ་སྐྱེས་པ་བསོད་ནམས་ཅན་ཞིག་ཡིན་ན་ཡང་། དུད་འགྲོ་དང་གཅིག་མཚུངས་ཀྱིས་སོ་སོའི་མི་ཚེ་གོ་ཆོད་པ་བྱེད་རྒྱུ། དངུལ་གསོག་རྒྱུ་ལས་གཞན་དམིགས་ཡུལ་ཆེན་པོ་དེ་འདྲ་ཡོད་མ་རེད། ཅེས་བརྗོད་སོང་།

བསྟན་འཛིན་བརྩོན་འགྲུས་ལགས་ཀྱིས་འདི་ལོའི་ཕྱི་ཟླ་ ༢ ཚེས་ ༡༢ ཏེ་བོད་ཀྱི་ལོ་གསར་ཚེས་གཅིག་ཉིན་རྒྱ་གར་མང་ཚོགས་ལ་བོད་ཀྱི་གནད་དོན་ཐད་གོ་རྟོགས་སྤེལ་ཐབས་དང་། རྒྱ་གར་གྱི་སྲིད་བློན་མོ་དྷི་མཆོག་ལ་དོན་ཚན་ལྔ་ཅན་གྱི་ཞུ་ཡིག་ཅིག་འབུལ་ཆེད་དྷ་རམ་ས་ལ་ནས་ལྡི་ལི་བར་གོམ་བགྲོད་ཀྱི་ལས་འགུལ་མགོ་བརྩམས་ཏེ་དེ་རིིང་ཕྱི་ཚེས་དགུ་པར་ཉིན་གྲངས་ཉེར་དྲུག་ཕྱིན་ཡོད་པ་རེད།

རྒྱལ་ས་ལྡི་ལིའི་གསར་འགོད་པ། ཉི་མ་ཚེ་རིང་།