མདོ་སྟོད་ཆོལ་ཁའི་དངོས་གཞིའི་སྤྱི་འཐུས་འོས་མི་གསར་པ་གསུམ།

ཐུན་མོང་གི་དྲི་བ།

འཛིན་སྐྱོང་བཀའ་ཤག་གི་ལས་དོན་ཆེ་ཕྲ་ཀུན་ལ་སྤྱི་འཐུས་ལྷན་ཚོགས་ནས་གཟིགས་ཞིབ་དང་བྱ་ར་བྱེད་ཀྱི་ཡོད་དུས། ཁྱེད་རང་སྤྱི་འཐུས་ཆགས་པ་ཡིན་ན། རང་འཁྲིའི་འོས་འགན་གང་འདྲ་འཁུར་གནང་རྒྱུ་ཡིན་ནམ།

ངག་དབང་བློ་གྲོས་ལགས།

སྤྱིར་བཏང་སོ་སོ་ལྟ་བུ་ཡིན་ན། གཞིས་ཆགས་ནང་ལ་ད་བར་དུ་མུ་མཐུད་ནས་ས་གནས་གྲོས་ཚོགས་ཀྱི་ཚོགས་གཙོ་སྐབས་གསུམ་གྱི་རིང་ལ་བྱས་ནས་ད་ལྟའང་ཚོགས་གཙོའི་འགན་འཁྱེར་བཞིན་ཡོད། ངས་ས་གནས་འཐུས་མི་བྱེད་པའི་སྐབས་སུ་འཛིན་སྐྱོང་དང་ས་གནས་མགོ་འཛིན་གྱི་ཕྱག་ལས་གནང་སྟངས་ཀྱི་ཐོག་ལ་མི་མང་རེ་རེའི་ནང་དུ་ཕྱིན་ཏེ། ཁོང་ཚོའི་བསམ་ཚུལ་ལ་ཉན་ནས་ས་གནས་ས་ཐོག་གི་དཀའ་ངལ་ག་རེ་ཡོད་རུང་བདེན་པ་དང་ཕྱི་གསལ་ནང་གསལ། དྲང་པོའི་ཐོག་ནས་སེལ་ཐབས་བྱེད་ཀྱི་ཡོད། ང་རང་ལ་གོ་སྐབས་གང་ཡང་རག་རུང་། དུས་རྒྱུན་དུ་ནས་ལས་ཁུངས་ལ་བཅར་བ་དང་གྲོས་ཚོགས་འཚོགས་པ་ཙམ་མིན་པར་མི་མང་ལ་བཀའ་བསྡུར་ཞུ་དགོས་པ་དེ་འདྲའི་ཐོག་ནས་འཛིན་སྐྱོང་གི་ལས་ཀ་བྱེད་ཕྱོགས་ཀྱི་ཐོག་ལ་བསམ་ཚུལ་ཡོད།  དེ་བཞིན་གལ་སྲིད་མ་འོངས་པར་ང་རང་བོད་ཀྱི་གྲོས་ཚོགས་ནང་བསླེབ་པ་ཡིན་ན། སོ་སོའི་ངོས་ནས་དུས་རྟག་ཏུ་འཛིན་སྐྱོང་གི་ཕྱག་ལས་གནང་སྟངས་ཐོག་ལ་ཞིབ་འཇུག་བྱེད་པའི་ཐོག མི་མང་གི་བསམ་ཚུལ་བསྡུ་རུབ་བྱས་ཏེ། གྲོས་ཚོགས་ཀྱི་ནང་ལ་སོ་སོའི་རྣམ་དཔྱོད་བེད་སྤྱོད་བཏང་ནས་བློ་གཟུ་བོར་གནས་པའི་ཐོག་ནས་འཛིན་སྐྱོང་གི་ཕྱག་ལས་གནང་སྟངས་ཀྱི་ཐོག་ལ་སོ་སོའི་ངོས་ནས་བསམ་ཚུལ་ཞུ་འདོད་ཡོད།

ཐུབ་བསྟན་བཀྲ་ཤིས་ལགས།

མ་འོངས་པ་ང་རང་བོད་མི་མང་སྤྱི་འཐུས་ཆགས་པ་ཡིན་ན། འཛིན་སྐྱོང་བཀའ་ཤག་ལ་སྟངས་འཛིན་དང་ལས་དོན་བྱེད་ཕྱོགས་ཐོག་ལ་ཆར་པ་ཆུ་གྲོགས་དང་། ཉི་མ་མེ་གྲོགས་ལྟ་བུའི་ལས་ཀ་བྱ་རྒྱུ་ཡིན། ང་རང་བཙན་བྱོལ་ལ་འབྱོར་ནས་ལོ་ངོ་བཅུ་དྲུག་བཅུ་བདུན་གྱི་བརྒྱུད་རིམ་ནང་། གཞུང་དང་གཞུང་འབྲེལ་མིན་པའི་ཚོགས་སྡེ་ཁག་དང་། མདོ་ཁམས་ཆུ་བཞི་སྒང་དྲུག་ལ་ལོ་ ༡༢ ལྷག་ལས་ཀ་བྱས་ཡིན། དེ་བཞིན་བོད་ཀྱི་རྒྱལ་ཡོངས་མང་གཙོ་ཚོགས་པའི་དབུས་སྤྱི་ཁྱབ་རྒྱུན་ལས་ཁང་དུ་ལས་ཀ་བྱས་ཡིན། ད་དུང་མོན་གྷོ་འདོད་རྒུ་གླིང་དུ་ས་གནས་གྲོས་ཚོགས་ཀྱི་འཐུས་མི་དང་རྒྱུན་ལས་བྱས་ཡིན་ལ། བོད་ཀྱི་བང་ཆེན་གསར་ཁང་གི་གསར་འགོད་པ་དང་ཡན་ལག་ལས་ཁུངས་ཀྱི་འགན་འཛིན་ལ་སོགས་པའི་སྤྱི་ཚོགས་ནང་ལ་གཞུང་དང་གཞུང་འབྲེལ་མིན་པའི་ཚོགས་པ་ཁག་ནང་ལས་ཀ་མང་པོ་བྱས་ཡོད། དེའི་ཉམས་མྱོང་ལ་བརྟེན་ནས་མ་འོངས་པར་སྤྱི་འཐུས་ཆགས་པ་ཡིན་ན། སྤྱི་འཐུས་ཚད་ལྡན་བྱེད་ཐུབ་རྒྱུའི་བློ་ཁོག་དང་སྤོབས་པའི་ཐོག་ནས་ལངས་ཀྱི་ཡོད་ལ། དེ་བཞིན་སྤྱི་འཐུས་ཚད་ལྡན་གྱི་ཐོག་ནས་གཡས་དགའ་གཡོན་ལྷུང་མེད་པར་འཛིན་སྐྱོང་བཀའ་ཤག་གི་ལས་ཀ་བྱེད་ཕྱོགས་ལ་འཛིན་སྐྱོང་སྟངས་འཛིན་བྱེད་ཐུབ་ཀྱི་རེད་བསམ་པའི་གདེང་ཚོད་དང་སྤོབས་པ་ཆ་ཚང་ཡོད།

དབང་འདུས་རྡོ་རྗེ་ལགས།

གལ་སྲིད་ང་རང་གྲོས་ཚོགས་ར་བའི་ནང་བསླེབ་པ་ཡིན་ན། ད་ལྟ་བར་དུ་ངས་ཚོགས་པ་ཁག་ནང་ལོ་ ༡༥ ལྷག་རིང་ཞབས་ཕྱི་ཞུས་པ་དང་ཉམས་མྱོང་ཡོད་པ་དེ་ཚོ་གཞིར་བཟུང་ང་རང་ཚོའི་བོད་མིའི་སྒྲིག་འཛུགས་ཀྱི་གྲོས་ཚོགས་ར་བ་ནང་ལ་སྤྱི་པའི་འཐུས་མི་ཞིག་གི་ངོ་བོ་ཙམ་མིན་པར། ཁ་ཡོད་ལག་ཡོད་ཀྱིས་བོད་ནང་ཡོད་པའི་གཞིས་ལུས་བོད་མིའི་མངོན་འདོད་སྒྲུབ་རྒྱུའི་དམིགས་ཡུལ་དེ་གྲོས་ཚོགས་ནང་འཁྱེར་རྒྱུ་ཡིན་ལ། བཙན་བྱོལ་དུ་ཡོད་པའི་མི་མང་ནང་དཀའ་ངལ་རབ་དང་རིམ་པ་འཕྲད་ཀྱི་ཡོད་རེད། དེ་ཚོའི་དཀའ་ངལ་སེལ་རྒྱུ་དང་དཀའ་ངལ་འཕྲད་པ་རྣམས་གྲོས་ཚོགས་ནང་ཁྱེར་ནས་གླེང་སློང་བྱ་རྒྱུ། དེ་མ་ཟད་ང་རང་ཚོ་སྤྱི་པའི་འཐུས་མིའི་ལས་འགན་འདི་གྲོས་ཚོགས་ཙམ་མིན་པར། གྲོས་ཚོགས་ནང་གླེང་སློང་བྱེད་ས་རེད་དེ། རྒྱ་ཆེ་ས་ལ་བསམ་བློ་བཏང་ན། ང་རང་ཚོ་སྤྱི་པའི་འཐུས་མིའི་ལས་འགན་ནི་གྲོས་ཚོགས་ཀྱི་ཕྱི་ལོག་ལ་རེད་བསམ་གྱི་འདུག  དེ་འདྲ་སོང་ཙང་གྲོས་ཚོགས་ཀྱི་སྤྱི་འཐུས་དང་མི་མང་གི་སྤྱི་པའི་འཐུས་མིའི་འགན་གཙོ་བོ་འཁྱེར་བའི་ཐོག་ནས། གྲོས་ཚོགས་ནང་ལོག་དང་གྲོས་ཚོགས་ཀྱི་ཕྱི་ལོག་ལ་རྒྱ་ཆེའི་སྡིངས་ཆ་ཐོག་ནས་མི་མང་གི་དཀའ་ངལ་སེལ་རྒྱུ་དང་གཞིས་བྱེས་མཉམ་འཛོམས་ཡོང་བའི་ཆེད་དུ། ད་བར་དུ་ངས་སྤྱི་ཚོགས་ནང་ལ་སྤྱི་པའི་དོན་ལ་ལས་ཀ་གང་ལ་གང་འཚམ་ལས་ཡོད་ལ། དེའི་ཉམས་མྱོང་དང་འདས་པའི་གྲུབ་འབྲས་གཞིར་བཟུང་གྲོས་ཚོགས་ནང་ལ་ང་ཚོའི་བཀའ་ཤག་གིས་ལས་ཀ་ཡག་པོ་གང་འདྲ་བྱེད་ཀྱི་ཡོད་མེད། ལས་ཀ་འཐུས་ཤོར་ག་པར་འགྲོ་ཡི་ཡོད་མེད། དེ་ཚོ་ལ་སྟངས་འཛིན་བྱེད་པའི་ཐོག་ནས་བླ་མ་དཀོན་མཆོག་གི་ལས་ཀ་བྱ་རྒྱུ་གཅིག་དང་། གྲོས་ཚོགས་ཀྱི་ཕྱི་ལོག་ལའང་རྐུབ་བཀྱག་རྩ་ཆེན་པོར་འཛིན་པའི་ཐོག་ནས་མུ་མཐུད་ཞབས་ཕྱི་ཞུ་རྒྱུའི་དམ་བཅའ་བརྟན་པོ་དང་ཀུན་སློང་གཙང་མ་ཡོད།

ཐུན་མོང་མིན་པའི་དྲི་བ།

བཙན་བྱོལ་བོད་མིའི་གསར་ཁང་དེ་ཚོས་ལས་དོན་བྱེད་ཕྱོགས་ག་འདྲ་འདུག  ཡར་རྒྱས་གཏོང་དགོས་པ་ག་རེ་གཟིགས་ཀྱི་འདུག

དབང་འདུས་རྡོ་རྗེ་ལགས།

ད་ལྟའི་ཆར་ང་རང་ཚོའི་གསར་ཁང་དེ་ཚོ་ཚང་མ་གཅིག་ལས་གཅིག་ཡག་པོ་དང་ཚད་ལྡན་ཤ་སྟག་རེད་འདུག  ང་རང་ཚོའི་གསར་ཁང་མང་ཆེ་བ་འཐབ་རྩོད་དང་འབྲེལ་བ་ཡོད་པ་ཡིན་ཙང་། མ་འོངས་པ་ལའང་འདི་དང་འདི་འདྲ་བའི་གསར་ཁང་གང་མང་མང་ང་རང་ཚོའི་བཙན་བྱོལ་ནང་དུ་ཙམ་མིན་པར་རྒྱ་ཆེའི་སྡིངས་ཆ་ནང་དུའང་བོད་པའི་གནད་དོན་ཐོག་ལ་དྲིལ་བསྒྲགས་བྱ་རྒྱུ་དང་། ད་ལྟའི་ཆར་གོ་རྟོགས་གང་མང་མང་སྤེལ་དགོས་འདུག  མ་ཟད་བོད་ནང་གི་ད་ལྟའི་དངོས་ཡོད་ཀྱི་ཛ་དྲག་གནས་སྟངས་དེ་ཚོ་རྣམ་པ་ཚོ་བོད་ཀྱི་དུས་བབ་དང་གསར་ཁང་གཞན་གྱིས་ཡག་པོ་སྤེལ་གནང་གི་འདུག  དེ་ལ་རྗེས་སུ་ཡི་རངས་ཞུ་ཡི་ཡོད། མ་འོངས་པར་མུ་མཐུད་ནས་ཡར་རྒྱས་གཏང་རོགས་ཞུ་ཡི་ཡོད།

གཞུང་མང་གཉིས་ཀྱི་ངོས་ནས་མཉམ་རུབ་དགོས་ཞེས་དུས་རྒྱུན་བཤད་ཀྱི་ཡོད་ཀྱང་། རྩ་དོན་འཐབ་རྩོད་ཁྲོད་གཞུང་མང་གཉིས་ངོ་བོ་ལོགས་སུ་ཆགས་ཏེ་མཚམས་རེར་འགལ་ཟླའང་ཡོང་གི་ཡོད་པ་དེ་སེལ་ཐབས་ག་རེ་འདུག་གམ།

ངག་དབང་བློ་གྲོས་ལགས།

  ང་རང་ལྟ་བུ་ཡིན་ན། ད་བར་དུ་ཝ་ར་ཎ་སི་མཐོ་རིམ་སློབ་གྲྭ་ནས་ཨཅརྱ་བསླབ་པ་མཐར་སོན་བྱུང་ནས་བཟུང་ལོ་ངོ་ ༡༠ ལྷག་རིང་ལ་བོད་པ་ཞིག་ཡིན་པའི་ཆ་ནས་འགན་འཁུར་དགོས་བསམ་ནས་མ་སྐུལ་དང་བླངས་ཀྱི་ཐོག་ནས་གཞིས་ཆགས་ནང་བསྡད་དེ། ས་འཐུས་ཚོགས་གཙོའི་འགན་འཁྱེར་བའི་ཐོག་ནས་མི་མང་གི་བདེ་སྡུག་ལ་ལྟ་བ་དང་གཞིས་ཆགས་ཀྱི་དཀའ་ངལ་སེལ་བ། གཞིས་ཆགས་སྲ་བརྟན་ཡོང་ཆེད་ལས་ཀ་བྱས་པ་ཡིན། དེ་བཞིན་གཙོ་ཆེ་ཤོས་ང་ཚོའི་བོད་དེ་མ་འོངས་པར་གནས་དང་མ་གནས་འདི་བོད་ཀྱི་མི་རིགས་དང་། བོད་ཀྱི་སྐད་དང་རིག་གཞུང་ལ་རག་ལས་ཀྱི་ཡོད་པ་དེ་དུས་རྟག་ཏུ་དྲན་གྱི་ཡོད། དེར་བརྟེན་ང་ཚོ་བོད་ཀྱི་ངོ་བོ་རྩ་བརླག་མ་འགྲོ་བའི་ཆེད་དུ་སོ་སོའི་ངོས་ནས་ཁ་ཙམ་མིན་པར་དོན་དངོས་སུ་མ་སྐུལ་དང་བླངས་ཀྱིས་འགན་ལེན་པའི་ཐོག་ནས་སོ་སོ་བོད་པ་གཅིག་ཡིན་པའི་ཆ་ནས་དབྱངས་ཅན་ཤེས་ཡོན་དང་རིག་གཞུང་བདེ་དོན་ཚོགས་པ་རྒྱ་གར་གྱི་ཁྲིམས་ཐོག་ལ་དེབ་སྐྱེལ་ཞུས་པ་དང་ཤེས་ཡོན་གོང་མཐོར་གྱི་ཆེད་དུ་གཞིས་ཆགས་ལ་དམའ་རིམ་སློབ་གྲྭ་མེད་པའི་དཀའ་ངལ་ཆེན་པོ་འཕྲད་ཀྱི་ཡོད་པས། དེའི་དཀའ་ངལ་སེལ་ཆེད་དུ་འགན་འཁྱེར་བའི་ཐོག་ནས་འཛིན་གྲྭ་ལྔ་པ་བར་དུ་རྒྱ་གར་གཞུང་གི་འོག་ལ་དེབ་སྐྱེལ་བྱས་ཏེ་ལོ་ངོ་གསུམ་རིང་ལ་འགན་ཁྱེར་བ་ཡིན། སྤྱིར་བཏང་ང་ཚོས་སློབ་གྲྭ་བཙུགས་པའི་སྐབས་སུ་ང་བོད་གཞུང་གི་ཤེས་རིག་སྡེ་ཚན་ལ་བཅར་པ་དང་ཁོང་རྣམ་པས་ཁྱེད་ཚོས་སྒེར་གྱི་ངོས་ནས་འགན་འཁྱེར་ཐུབ་པ་དང་དཀའ་ངལ་སེལ་ཐུབ་པ་ཡག་པོ་རེད་གསུངས་སོང་། ང་རང་ཡིན་ནའང་དེ་ནང་བཞིན་དཀའ་ལས་བརྒྱབ་ནས་གཞིས་ཆགས་ནང་སློབ་གྲྭ་འཛུགས་སྐྲུན་བྱས་པ་མ་ཟད། རིན་མེད་ཀྱི་ཐོག་ནས་སློབ་གྲྭ་ཕྱིན་དང་འགྲོ་བཞིན་པ་ཆགས་བསྡད་ཀྱི་ཡོད། དེ་བཞིན་སློབ་སྦྱོང་ལ་དོན་གཉེར་ཅན་གྱི་སློབ་ཕྲུག་རྣམ་པས་རིགས་གཅིག་རྐང་འཛིན་གནང་མཁན་ཚོར་དཔལ་འབྱོར་དཀའ་ངལ་ཡོད་པ་རྣམས་ལ་སློབ་ཡོན་ཕྲན་བུ་ཙམ་མིན་པར་སློབ་ཡོན་ཆ་ཚང་ཕུལ་ཐུབ་པའི་འབད་བརྩོན་བྱས་ནས་སློབ་ཕྲུག་ ༣ དང་ ༤ ལ་མ་འོངས་པར་བོད་ཀྱི་རྩ་དོན་ལ་ཕན་ཐོགས་ཆེད་དུ་རོགས་པ་བྱས་ཡོད་ལ། གཞིས་ཆགས་ཀྱི་ནང་ལ་ཆེ་ས་ཆུང་རིགས་དེ་བཞིན་འཕྲོད་བསྟེན་གྱི་ཐོག་ལ་རོགས་པ་མང་པོ་བྱས་དང་བྱེད་བཞིན་ཡོད།

ཐུབ་བསྟན་བཀྲ་ཤིས་ལགས།

ངས་བཙན་བྱོལ་ནང་དུ་གཞུང་མང་གཉིས་རྦད་དེ་ངོ་བོ་ལོགས་སུ་ཕྱེ་བ་རྩ་བ་ཉིད་ནས་ཚོར་གྱི་མེད་པ་དང་། ཧ་ཅང་རྡོག་རྩ་གཅིག་སྒྲིལ་ཚད་མཐོན་པོ་ཡོད་པ་ལ་ངོས་འཛིན་བྱེད་ཀྱི་ཡོད། དེ་ཡོད་པའི་རྒྱུ་མཚན་ནི། ང་ཚོའི་སྤྱི་ཚོགས་ནང་དུ་འཛིན་སྐྱོང་བཀའ་ཤག་དང་སྤྱི་འཐུས་ལྷན་ཚོགས་།
དེ་བཞིན་ཆེས་མཐོའི་ཁྲིམས་ཞིབ་ཁང་།
གཞུང་དང་གཞུང་འབྲེལ་མ་ཡིན་པའི་ཚོགས་པ་སུ་དང་སུ་ཡིན་རུང་དེའི་ལས་དོན་བྱེད་ཕྱོགས་ཐོག་ལ་རེ་ཟུང་གིས་འདོད་པ་མ་ཁེངས་བར་སྤྱི་ཚོགས་ནང་ཆེན་པོ་བཟོ་ཡི་འདུག དེང་སང་སྤྱི་ཚོགས་ཀྱི་དྲ་ལམ་ཧ་ཅང་མང་པོ་དང་མི་ཚང་མ་གསར་འགོད་པ་ཆགས་ཡོད་དུས། དོན་དག་ཆུང་ཚགས་ལ་དགྲ་དགའ་གཉེན་སྡུག་བཟོས་པ་དང་། འཛིན་སྐྱོང་བཀའ་ཤག་ལའང་སྐྱོན་བརྗོད་བྱས་པ་ལ་སོགས་པ་མང་པོ་ཡོང་གི་འདུག  དེ་ཚོ་རེ་ཟུང་གིས་སོ་སོ་འདོད་པ་ཁེངས་དང་མ་ཁེངས་ཀྱི་ཐོག་ནས་དགྲ་དགའ་གཉེན་སྡུག་གི་ལས་ཀ་བཟོས་པ་མ་གཏོགས་སྤྱི་ཡོངས་ཀྱི་ཆ་ནས་རྩ་དོན་འཐབ་རྩོད་དང་འཛིན་སྐྱོང་བཀའ་ཤག་གིས་མི་མང་ལ་གཟིགས་རྟོག་གནང་སྟངས། སྤྱི་འཐུས་ལྷན་ཚོགས་ཀྱིས་དུས་དང་རྣམ་པ་ཀུན་ཏུ་འཛིན་སྐྱོང་བཀའ་ཤག་ལ་སྟངས་འཛིན་བྱེད་ཕྱོགས། དེང་སང་སྤྱི་འཐུས་གྲོས་ཚོགས་འཚོགས་བཞིན་ཡོད་པ་རེད། གནད་དོན་དེ་ཚོའི་ཐོག་ནས་བལྟས་ན། ངའི་ངོས་ནས་ང་ཚོ་སྐྱབས་བཅོལ་བ་གཞན་དང་མི་འདྲ་བའི་ནུས་པ་དང་རྡོག་རྩ་གཅིག་སྒྲིལ་ཚད་མཐོན་པོ་ཡོད་པ་ལ་ངོས་འཛིན་བྱེད་ཀྱི་ཡོད།

ཁྱེད་ཀྱིས་ད་བར་དུ་བོད་དོན་ཆེད་ངས་འདི་བྱས་ཡོད་བསམ་ནས་དགའ་སྤོབས་སྐྱེ་འོས་པ་ག་རེ་ག་རེ་ཡོད་དམ།

ཆེད་དམིགས་དྲི་བ།

ཁྱེད་ཀྱིས་དེ་སྔོན་གསར་འགོད་པའི་ལས་ཀ་གནང་མྱོང་ཡོད་པ་རེད། ང་ཚོའི་བཙན་བྱོལ་སྤྱི་ཚོགས་ནང་བོད་ཀྱི་གསར་ཁང་དེ་ཚོ་དམངས་གཙོའི་ཀ་བ་བཞི་པ་ཡིན་ལ། གསར་འགོད་རང་དབང་ཆ་ཚང་ཡོད་པ་རེད། ཅེས་གོང་འོག་མང་པོས་བཤད་ཀྱི་འདུག  ཁྱེད་ཀྱིས་སོ་སོའི་ཉམས་མྱོང་གཞི་ལ་བཞག་ནས་དངོས་གནས་དེ་འདྲ་ཞིག་རེད་དགོངས་ཀྱི་འདུག་གམ།

ཐུབ་བསྟན་བཀྲ་ཤིས་ལགས།

སོ་སོ་བོད་ཀྱི་བང་ཆེན་ནང་ལོ་བདུན་རིང་ཡན་ལག་འགན་འཛིན་དང་གསར་འགོད་པ་བྱས་པ་ཡིན། དེའི་བརྒྱུད་རིམ་ནང་དང་ད་ལྟའི་ཆར་བོད་ཀྱི་གཞུང་དང་གཞུང་འབྲེལ་མ་ཡིན་པའི་གསར་ཁང་དེ་ཚོས་ཕྱག་ལས་གནང་ཕྱོགས། སྤྱི་ཡོངས་ཀྱི་ཐོག་ནས་ང་ཚོའི་གསར་ཁང་དེ་ཚོར་སྐྱབས་བཅོལ་བའི་གནས་སྟངས་ཀྱི་ཐོག་ནས་བསམ་བློ་བཏང་བ་ཡིན་ན་གང་ལ་གང་འཚམ་འགྲིག་ཐག་ཆོད་རེད་འདུག  གསར་འགོད་པ་དང་གསར་ཁང་། གསར་འགོད་རང་དབང་གི་ཐོག་ནས་འགྲིག་ཡོད་པའི་ཚོར་སྣང་ཡོད། མཚམས་རེར་ང་ཚོའི་གསར་འགོད་པ་དང་གསར་ཁང་དེ་ཚོས་གཡས་དགའ་གཡོན་ལྷུང་གི་ལས་ཀ་བྱེད་བཞིན་པ་དེ་གང་ཟག་སྒེར་གྱི་སྐྱོན་ཆ་རེད་མ་གཏོགས་ངས་སྤྱི་ཚོགས་ཀྱི་སྐྱོན་ཆ་དང་སྤྱི་ཡོངས་ཀྱི་སྐྱོན་ཆ་ལ་ངོས་འཛིན་བྱེད་ཀྱི་མེད། དེ་བཞིན་ལྷག་པར་དུ་གསར་ཁང་གི་ཐད་གཏོང་གི་ཐོག་ནས་འཐབ་རྩོད་པ་དང་སྐྱབས་བཅོལ་བའི་ངོས་ནས་ཆས་གོས་ཚད་དང་ལྡན་པ་གྱོན་དགོས་རེད། ང་ཚོའི་རྒྱལ་ཁབ་དགྲ་ལག་ཏུ་ཤོར་བའི་སྐྱབས་བཅོལ་བར་མཚོན་ན། ཆས་གོས་དང་སྐད་ཡིག་རིག་གཞུང་ཡོངས་སུ་རྫོགས་པ་སྲུང་སྐྱོབ་བྱ་དགོས་པ་ང་ཚོའི་འགན་འཁྲི་ཆགས་ཀྱི་ཡོད་རེད། ང་ཚོ་བོད་ཕྱི་ནང་གཉིས་ཀའི་མགྲིན་ཚབ་པ་ཡིན་ཟེར་གྱི་ཡོད་རེད། དེ་འདྲའི་ཐོག་ནས་མཚམས་རེར་བོད་ནང་དུ་གསར་འགོད་བརྒྱུད་ལམ་རང་དབང་དང་སྨྲ་བརྗོད་རང་དབང་།

འགྲོ་བ་མིའི་ཐོབ་ཐང་ཡོད་པ་མ་རེད། ཡིན་ནའང་ཁོང་ཚོའི་ཆས་གོས་གྱོན་སྟངས་དང་ང་ཚོའི་རང་དབང་ལུང་པར་ཡོད་མཁན་གྱི་ལས་ཀ་བྱེད་སྟངས་དང་ཆས་གོས་གྱོན་སྟངས་ལ་འགྲན་བསྡུར་བྱས་ནས་བསམ་བློ་བཏང་ཡོང་དུས། ང་ཚོའི་ལས་ཀ་བྱེད་སྟངས་དེ་ནོར་འཁྲུལ་ཡིན་པ་མཐོང་ཡོང་གི་འདུག  དེ་མ་གཏོགས་སྤྱི་ཡོངས་ཀྱི་ཐོག་ནས་ང་ཚོའི་གསར་ཁང་དང་གསར་འགོད་པ་གང་ལ་གང་འཚམ་ཡག་པོ་འདུག་ལ། ལྷག་པར་དུ་གསར་འགོད་རང་དབང་ཚད་དང་ལྡན་པ་ཡོད་པ་ཚོར་གྱི་འདུག

ཁྱེད་ཀྱི་ལོ་རྒྱུས་ནང་ལྟ་དུས། བོད་པའི་ཧི་མ་ལ་ཡ་སློབ་གྲྭ་ཞེས་པ་ཞིག་རྒྱ་གར་གཞུང་ལ་དེབ་སྐྱེལ་བྱས་ནས་གཞིས་ཆགས་ཁག་ནང་རིན་མེད་ཐོག་སློབ་སྦྱོང་སྤྲོད་ཀྱི་ཡོད་གསུངས་འདུག  སློབ་གྲྭ་དེའི་བསླབ་གཞི་དང་སློབ་ཕྲུག་གི་གྲངས་འབོར་སོགས་ངོ་སྤྲོད་མདོར་བསྡུས་ཤིག་གནང་རོགས།

ངག་དབང་བློ་གྲོས་ལགས།

ཐོག་མ་དེ་ལ་རང་ཉིད་གཞིས་ཆགས་ཀྱི་མི་དང་བོད་པ་ཞིག་ཡིན་ཙང་། གཞིས་ཆགས་སྲ་བརྟན་ཡོང་རྒྱུ་གལ་ཆེན་པོ་རེད། གཞིས་ཆགས་ཆུང་ཆུང་ཞིག་ཡིན་རུང་སྒང་ལ་དགོན་པ་དང་བར་ལ་སྨན་ཁང་། ཞབས་ལ་གཞི་རིམ་དང་དམའ་རིམ་སློབ་གྲྭ་ཞིག་མེད་ན་མེད་ཐབས་ལྟ་བུ་ཡིན་ཙང་གཞི་རྩའི་ཆ་རྐྱེན་ཚང་དགོས་ཀྱི་ཡོད་རེད། དེ་སྔོན་ང་ཚོའི་གཞིས་ཆགས་ནང་ལ་དམའ་རིམ་སློབ་གྲྭ་མེད་པར་བརྟེན་དཀའ་ངལ་མང་པོ་ཕྲད་ཡོད་པ་དང་། ཕྲུ་གུ་ཆུང་ཆུང་ཞིག་ཡིན་རུང་ལོ་བཞི་ནས་ཕ་མ་དང་ཁ་བྲལ་ཏེ་སློབ་གྲྭར་གཏོང་དགོས་བྱུང་བ་དང་ཁ་ཤས་གཞིས་ཆགས་གཞན་ལ་སྤོས་དགོས་བྱུང་བ་སོགས་ཀྱི་དཀའ་ངལ་རབ་དང་རིམ་པ་མང་པོ་བྱུང་བ་རེད། དེར་བརྟེན་གཞིས་ཆགས་ནང་དམའ་རིམ་སློབ་གྲྭ་དགོས་འདུག་ཟེར་ནས་སྲིད་སྐྱོང་ལ་ཞུས་ཏེ། སྲིད་སྐྱོང་གིས་དགེ་རྒན་གཅིག་གི་གླ་ཆ་གནང་བ་རེད། དགེ་རྒན་གཅིག་གིས་སློབ་ཕྲུག་ཚོར་སློབ་སྦྱོང་སྤྲད་པ་རེད་དེ་སློབ་ཕྲུག་ ༢༠ དང་ ༣༠ མང་དུ་ཕྱིན་ནས་དགེ་རྒན་གཅིག་གིས་ཡོང་ཁག་པོ་ཆགས་ཏེ། དགེ་རྒན་གཉིས་པ་ཞིག་ལ་རོགས་རམ་རག་ཐབས་བྱས་ཏེ་དགེ་རྒན་གཉིས་པ་ཞིག་བསྐོས་པ་རེད། དགེ་རྒན་གཉིས་པ་བསྐོས་པ་ཙམ་གྱིས་འགྲིག་གི་མེད་པ་དང་། ང་ཚོས་དེབ་སྐྱེལ་བྱ་ཐུབ་ན་ཡག་གི་རེད་བསམ་སྟེ། དབྱངས་ཅན་ཤེས་ཡོན་དང་རིག་གཞུང་ཚོགས་པ་དེབ་སྐྱེལ་བྱས་ཏེ་ཚོགས་པའི་འོག་ལ་བོད་པའི་ཧི་མ་ལ་ཡ་སློབ་གྲྭ་རྒྱ་གར་གྱི་ཁྲིམས་ཐོག་ལ་དེབ་སྐྱེལ་བྱས་པ་ཡིན། དེ་བཞིན་བོད་གཞུང་ཤེས་རིག་བཀའ་བློན་དང་དྲུང་ཆེ་ལ་བཅར་ཏེ་ང་ཚོའི་གཞིས་ཆགས་ལ་དཀའ་ངལ་དེ་འདྲ་ཡོད་པ་དང་། རབ་བྱུང་ན་བོད་གཞུང་གིས་འཛུགས་སྐྲུན་གནང་རོགས་ཞུས་པ་ཡིན། ཡིན་ནའང་དེ་ལ་ཆ་རྐྱེན་མང་པོ་ཚང་དགོས་ཀྱི་འདུག་པས་ཚང་མ་ཚང་གི་མི་འདུག  དེར་བརྟེན་ཁོང་རྣམ་པས་དགེ་རྒན་གྱི་ཐོག་ནས་རོགས་རམ་གནང་གི་ཡོད་རེད་ལ། ད་ལྟ་སློབ་ཕྲུག་ ༤༠ ཙམ་དང་དགེ་རྒན་ ༦། ལས་བྱེད་གཅིག་ཡོད། ད་ལྟ་བར་དུ་ལོ་གསུམ་གྱི་རིང་ལ་རིན་མེད་ཀྱི་ཐོག་ནས་སློབ་སྦྱོང་སྤྲད་དང་སྤྲོད་བཞིན་པ་ཆགས་ཀྱི་ཡོད།

ཁྱེད་ཀྱིས་དེ་སྔོན་བོད་མིའི་སྐྱབས་བཅོལ་ལག་དེབ་ (RC) དྲ་ལམ་ནས་འཕར་འགྱངས་དེབ་སྐྱེལ་བྱེད་པར་འབྲེལ་མཐུད་པའི་ལས་ཀ་གནང་ཡོད་ས་རེད། ད་ལྟ་བོད་མིའི་དྭང་བླངས་དཔྱ་དངུལ་དྲ་ཐོག་ནས་འབུལ་བའི་ལས་གཞི་རྩོམ་གྱི་ཡོད་པ་རེད་ལ། འོས་བསྡུའི་དེབ་སྐྱེལ་སོགས་ཀྱང་དྲ་ཐོག་ནས་འགྲོ་ཐུབ་ན་ཡག་པོ་ཡོད་པའི་བསམ་ཚུལ་མང་པོ་ཡོང་གི་འདུག  དེ་ཚོ་དྲ་ཐོག་ནས་ཐད་ཀར་གནང་རྒྱུ་ཡོད་པ་བཟོས་ན། བོད་མི་ཚོར་དཀའ་ངལ་ག་རེ་ག་རེ་འཕྲད་ས་རེད་དགོངས་ཀྱི་འདུག

དབང་འདུས་རྡོ་རྗེ་ལགས།

སྤྱིར་བཏང་ནས་དེང་སང་དྲ་རྒྱའི་དུས་ཚོད་ཡིན་ཙང་ང་ཚོའི་བོད་པའི་སྤྱི་ཚོགས་ཙམ་མིན་པར་རྒྱ་གར་དང་འཛམ་གླིང་ཡོངས་རྫོགས་ལ་དྲ་རྒྱ་བརྒྱུད་ནས་ལས་ཀ་བྱེད་ཀྱི་ཡོད་རེད། ཡིན་ནའང་དངོས་ཡོད་གནས་ཚུལ་དེ་ཕྱི་རྒྱལ་དང་རྒྱ་གར་གཉིས་ལ་ས་དང་གནམ་གྱི་ཁྱད་པར་ཡོད་རེད། དེ་བཞིན་རྒྱ་གར་དང་བོད་པའི་སྤྱི་ཚོགས་ལའང་ཁྱད་པར་ཆེན་པོ་ཡོད་པ་དེ། དྲ་རྒྱའི་ཐོག་ནས་ལས་ཀ་བྱས་ན་དྲ་ཐོག་ཏུ་ལས་ཀ་བྱེད་ཐུབ་མཁན་དང་སློབ་སྦྱོང་ཡོད་མཁན་དགོས་ཀྱི་ཡོད་རེད། ང་རང་གི་འདས་པའི་ཉམས་མྱོང་ལ་བལྟས་ན། ཕྱི་ལོ་ ༢༠༡༨ ལོར་བཙན་བྱོལ་ནང་ཡོད་པའི་སྐྱབས་བཅོལ་ལག་དེབ་དྲ་ཐོག་ཏུ་བསྒྱུར་བ་རྒྱ་གར་དབུས་ནས་བཀའ་རྒྱ་ཕེབས་པ་རེད། ཡིན་ནའང་། ཐོག་མར་དྲ་ཐོག་ལ་སྙན་ཞུ་རྒྱག་དགོས་རེད། སྙན་ཞུ་རྒྱག་པར་ལས་ཁུངས་སུ་བཅར་དགོས་པ་དང་ལས་བྱེད་སློབ་སྦྱོང་ཡོད་མཁན་ཚད་ལྡན་ཡོད་རེད་དེ། མི་མང་གི་མི་འབོར་མང་དྲགས་པ་དང་ལས་བྱེད་ཉུང་དྲགས་པས་དྲ་ཐོག་ནས་བཟོ་བར་དཀའ་ངལ་རབ་དང་རིམ་པ་ཕྲད་སོང་། འབིར་ས་གནས་ས་ཁུངས་ཀྱི་ངོས་ནས་འགན་གནང་བ་ལྟར། རྒྱ་གར་གྱི་ཧི་མ་ཅལ་མངའ་སྡེའི་དཔོན་རིགས་ཁག་དང་ཕྱི་ལོ་ ༢༠༡༨ ཀྱི་ནང་སྲིད་བཀའ་བློན་བརྒྱུད་ནས་དྲ་ཐོག་གི་དུས་ཚོད་ཕྱི་ཟླ་ ༣ པ་ནས་ཕར་འགྱངས་བཏང་བར་སྙན་ཞུ་བརྒྱབ་པ་སོགས་འབིར་ཁུལ་གྱི་མི་མང་རྣམས་དྷ་རམ་ས་ལར་འགྲོ་མི་དགོས་པའི་ཐབས་ལམ་བཏོན་པ་ཡིན། མདོར་ན་དྲ་ཐོག་ཏུ་ལས་ཀ་བྱས་པར་བཙན་བྱོལ་ནང་དུ་སློབ་སྦྱོང་ཡོད་པ་དང་དྲ་ཐོག་གི་ལས་ཀ་བྱེད་མཁན་ཉུང་ཉུང་ཡིན་པས། ད་ལྟའི་ཆར་ང་ཚོས་རིམ་པས་གོ་རྟོགས་སྤེལ་བ་ལས་ལམ་སེང་བྱས་ན་ཁག་པོ་རེད་བསམ་གྱི་འདུག  ཡིན་ནའང་དེང་དུས་དང་མཐུན་པ་དགོས། བོད་མིའི་སྒྲིག་འཛུགས་ཀྱི་ངོས་ནས་ལས་ཀ་ཆེ་ཆུང་གང་འདྲ་ཡིན་རུང་དྲ་ཐོག་ནས་བྱ་རྒྱུའི་ལས་གཞི་རྩོམ་གྱི་ཡོད་པ་དེ་ཡག་པོ་འདུག

ཐུན་མོང་གི་དྲི་བ་གཉིས་པ།

འཐབ་རྩོད་ཀྱི་ལྟ་བ་ལངས་ཕྱོགས་མི་འདྲ་བ་དེ་བོད་མིའི་གཅིག་སྒྲིལ་དང་བོད་དོན་བདེན་མཐའ་གསལ་བའི་འགོག་རྐྱེན་ཞིག་ཏུ་ངོས་འཛིན་གནང་གི་ཡོད་དམ། ཡང་ན་མཐུན་རྐྱེན་ཞིག་ཏུ་ངོས་འཛིན་གནང་གི་ཡོད་དམ།

ངག་དབང་བློ་གྲོས་ལགས།

ཐོག་མར་ཕྱི་ལོ་ ༡༩༥༩ སྐབས་སུ་རྒྱ་དམར་གྱི་དྲག་གནོན་དང་སྡུག་རྩུབ་ཀྱི་འོག་ལ་སྡོད་ཐབས་བྲལ་ནས་འུ་ཐུག་ཐབས་ཟད་ཀྱི་ཐོག་ནས་ང་ཚོ་རྒྱ་གར་བཙན་བྱོལ་ལུང་པར་བསྡད་དགོས་བྱུང་བ་རེད། ང་ཚོའི་འདས་པའི་བོད་ཀྱི་ལོ་རྒྱུས་ནང་བལྟས་པ་ཡིན་ན། བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་པ་བརྒྱ་ཆ་བརྒྱ་ཚང་མས་ངོས་ལེན་གནང་གི་ཡོད་རེད། བོད་ནང་གཞིས་ལུས་བོད་མི་རྣམ་པ་གཞན་དབང་འོག་ལ་གནས་ཡོད་དུས་ཁོང་རྣམ་པར་རང་དབང་མེད་ཙང་། ང་ཚོ་སྐྱབས་བཅོལ་བ་ཡོངས་ལ་འགན་ཆེན་པོ་ཡོད་རེད། ༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་དབུ་འཁྲིད་པའི་འོག ཆོལ་ཁ་གསུམ་གཅིག་སྒྲིལ་གྱི་ཐོག་ནས་བོད་གཞུང་བཙུགས་པ་རེད། དེ་བཞིན་རྒྱ་གར་དུ་བསླེབས་རྗེས་ང་ཚོས་བོད་རང་བཙན་གཙང་མ་ཡིན་པ་དང་རང་བཙན་རྩོད་གླེང་བྱས་པ་རེད། དུས་ཀྱི་འགྱུར་བ་དང་༧གོང་ས་མཆོག་གིས་རྒྱལ་ཁབ་ཁག་གི་དཔོན་རིགས་མང་པོ་དང་མཇལ་ནས་ཉམས་མྱོང་མང་པོ་བསགས་རྗེས། བོད་ཀྱི་བདེན་མཐའ་གསལ་བར་ཐབས་ལམ་ལེགས་ཤོས་དེ་དབུ་མའི་ལམ་ཡིན་པ་མཁྱེན་པ་རེད། དེར་བརྟེན་ང་ཚོའི་བོད་གཞུང་གི་སྲིད་ཇུས་དེ་དབུ་མའི་ལམ་ཆགས་ཀྱི་ཡོད་རེད། ཡིན་ནའང་བོད་རིགས་ཡོངས་རྫོགས་ལ་འགན་གཅིག་པ་དང་ཐོབ་ཐང་འདྲ་མཉམ་ཡོད་རེད། བོད་པ་ཡིན་པའི་ཆ་ནས་སོ་སོའི་ངོས་ནས་བོད་ཀྱི་བདེན་མཐའ་གསལ་བའི་ཆེད་དུ་ཐབས་ལམ་གང་འདྲ་ཡིན་རུང་འབད་བརྩོན་གནང་ཡོད་པ་དེ་ང་ཚོའི་གཟི་བརྗིད་དང་། མ་འོངས་པར་བོད་ཀྱི་བདེན་མཐའ་གསལ་བའི་ཆེད་དུ་ཕན་ཐོགས་པའི་ལས་ཤིག་རེད་བསམ་གྱི་ཡོད། ཐབས་དང་ཤེས་རབ་ཟུང་དུ་འབྲེལ་བ་ལྟར། ང་ཚོ་དབུ་མའི་ལམ་རྩོད་མཁན་དང་རང་བཙན་རྩོད་མཁན་ཡིན་རུང་ཚང་མས་བོད་ནང་གི་དཀའ་ངལ་སེལ་ཐབས་ཀྱི་ཆེད་དུ་འབད་བརྩོན་གནང་གི་ཡོད་རེད། དེར་བརྟེན་བོད་གཞིས་ལུས་མི་མང་གི་མངོན་འདོད་བསྒྲུབ་རྒྱུ་དང་བོད་ནང་གི་དཀའ་ངལ་སེལ་ཐབས་སུ་ཐབས་ཤེས་མང་པོ་དང་ཐབས་ལམ་གང་འདྲ་ཡོད་རུང་ངའི་ངོས་ནས་ཚང་མར་རྗེས་སུ་ཡི་རངས་ཞུ་ཡི་ཡོད།

དབང་འདུས་རྡོ་རྗེ་ལགས།

    ལངས་ཕྱོགས་གང་འདྲ་ཡིན་རུང་གཙོ་བོ་ང་ཚོས་བོད་ཀྱི་བདེན་མཐའ་གསལ་དགོས་པ་དེ་རེད། གཞིས་ལུས་བོད་མིའི་མངོན་འདོད་དང་བསམ་དོན་སྒྲུབ་དགོས་པ་དེ་རེད། བོད་ཀྱི་རྩ་དོན་གྱི་ཆེད་དུ་སྲོག་བློས་གཏོང་མཁན་དཔའ་བོ་དཔའ་མོ་དེ་ཚོའི་མངོན་འདོད་སྒྲུབ་རྒྱུའི་ཆེད་དུ་རེད། དེར་བརྟེན་ངའི་ངོས་ནས་འཐབ་རྩོད་གལ་ཆེན་པོ་རེད་ལ་གཙོ་བོ་ང་རང་ཚོའི་འཐབ་རྩོད་སྒྲུབ་པའི་ཆེད་དུ་ལས་འགུལ་སྤེལ་རྒྱུ་དེ་གལ་ཆེན་པོ་རེད། ད་ལྟའི་གནས་སྟངས་འདིའི་འོག་ལ་ལས་འགུལ་སྤེལ་གྱི་ཡོད་རེད་ལ་ལས་འགུལ་སྤེལ་མཁན་ཚོར་ང་ཚོའི་ངོས་ནས་རྒྱབ་སྐྱོར་བྱེད་དགོས་པ་དེ་གལ་ཆེན་པོ་རེད་འདུག  བོད་མིའི་སྒྲིག་འཛུགས་དང་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་མང་པོ་ཞིག་གིས་ལས་འགུལ་སྤེལ་པ་དང་བོད་ཀྱི་རྩ་དོན་དང་བོད་དོན་འཐབ་རྩོད་དང་འབྲེལ་བ། རང་བཙན་གྱི་ལངས་ཕྱོགས་དང་དབུ་མའི་ལངས་ཕྱོགས་གང་ཡིན་རུང་གཙོ་བོ་དེ་བོད་དང་བོད་དོན་གྱི་ཆེད་དུ་རེད། དེར་བརྟེན་འཐབ་རྩོད་ཀྱི་ཆེད་དུ་བོད་མིའི་སྒྲིག་འཛུགས་ཀྱིས་དབུ་འཁྲིད་པའི་འོག་ནས་ང་རང་ཚོའི་བདེན་མཐའ་གསལ་བའི་ཆེད་དུ་ལས་འགུལ་གང་མང་སྤེལ་དགོས་འདུག་ལ། ལས་འགུལ་བ་ཁ་ཤས་མི་ཚེ་གཅིག་རང་བཙན་འཐབ་རྩོད་པ་ཡིན་པ་དེ་ཚོར་ང་ཚོས་ཆེ་མཐོང་སྤྲོད་དགོས་འདུག  རྒྱ་གར་དང་ཕྱི་རྒྱལ་དུ་དཔའ་བོ་མང་པོ་ཡོད་རེད་དེ་དཔའ་བོ་གྲོངས་ཚར་བའི་རྗེས་སུ་དྲན་གསོ་ཞུ་རྒྱུའི་ལུགས་སྲོལ་ཡོད་རེད། ད་ལྟ་དངོས་སུ་ཡོད་མཁན་མི་ཚེ་ཡོངས་རྫོགས་རྩ་དོན་དང་མི་རིགས་ཀྱི་ཆེད་དུ་གཏོང་མཁན། རང་བཙན་གྱི་ཐོག་ལ་དཀའ་ལས་རྒྱག་མཁན་མང་པོ་ཡོད་རེད། དེ་ཚོ་ལ་གུས་འདུད་དང་རྗེས་སུ་ཡི་རངས་ཞུ་དགོས་ཀྱི་ཡོད་རེད།

ཐུབ་བསྟན་བཀྲ་ཤིས་ལགས།

ང་ཚོའི་འཐབ་རྩོད་ཀྱི་བརྒྱུད་རིམ་ནང་དུ་ལྟ་གྲུབ་དང་ལངས་ཕྱོགས་ཀྱི་ཐོག་ནས་མཐུན་དང་མི་མཐུན་པ་དེ་དངོས་པོའི་ཆོས་ཉིད་ལྟ་བུ་རེད། ང་རང་གི་ངོས་ནས་འདི་ངེས་པར་དུ་ཡོད་དགོས་པ་ཞིག་ལ་ངོས་འཛིན་གྱི་ཡོད། ལྷག་པར་དུ་ད་ལྟའི་ཆར་༧གོང་ས་མཆོག་གི་ལམ་སྟོན་དང་འཛིན་སྐྱོང་བཀའ་ཤག་ལ་བདག་དབང་ཡོད་པའི་ལམ་དབུ་མ། བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་གཏན་འབེབས་བྱས་པའི་ལམ་དབུ་མ་དེའི་སྒང་ལ་བཙན་བྱོལ་བོད་མིའི་སྒྲིག་འཛུགས་འགྲོ་ཡི་ཡོད་རེད། སྐབས་དེ་དུས་བོད་རང་བཙན་འཐབ་རྩོད་བྱེད་མཁན་ངེས་པར་དུ་དགོས་ཀྱི་ཡོད་རེད། ལམ་དབུ་མ་ལམ་ལྷོངས་ལེགས་འགྲུབ་འབྱུང་དགོས་ན། བོད་རང་བཙན་འཐབ་རྩོད་བྱེད་མཁན་མེད་ན་ལེགས་འགྲུབ་འབྱུང་གི་མེད་པ་དང་། སྤྱིར་བཏང་ང་རང་གི་ངོས་ནས་རྒྱ་ནག་ལ་རེ་བ་དང་ཡིད་ཆེས། བློ་གཏད་གཅིག་ཀྱང་མེད། རྒྱ་ནག་ལ་ཡིད་ཆེས་བྱས་ནས་འགྲོ་དགོས་ན་ང་ཚོའི་བསམ་བློ་གཏོང་སྟངས་ནོར་གྱི་ཡོད་པ་རེད། གཉིས་པ་དེ་ང་ཚོའི་ལྟ་གྲུབ་དང་ལངས་ཕྱོགས། སྨྲ་བརྗོད་རང་དབང་དང་དམངས་གཙོ། འགྲོ་བ་མིའི་ཐོབ་ཐང་སོགས་བོད་ནང་ཡོད་མ་རེད། རྒྱ་གར་དུ་ལྟ་གྲུབ་དང་ལངས་ཕྱོགས་ག་རེ་ཡིན་རུང་འཛིན་ཆོག་པ་ཞིག་ལ་ངོས་འཛིན་བྱེད་ཀྱི་ཡོད། བཙན་བྱོལ་དུ་གནས་སྟངས་ཁྱད་མཚར་པོ་དང་ལྟ་གྲུབ་ལངས་ཕྱོགས་འཛིན་མ་ཆོག་པའི་གནས་སྟངས་ཡོང་ན་བློ་ཕམ་པོ་རེད། བཙན་བྱོལ་དུ་ལྟ་གྲུབ་དང་ལངས་ཕྱོགས་མཐུན་དང་མི་མཐུན་དེ་འགལ་ཟླར་འགྲོ་རྒྱུའི་ཉེན་ཁ་ཆེན་པོ་རེད། ངའི་ངོས་ནས་ལྟ་གྲུབ་ལངས་ཕྱོགས་རང་བཙན་དང་དབུ་མའི་ལམ་ཡོད་པ་དེ་ངེས་པར་དུ་དགོས་པ་ཞིག་ལ་ངོས་འཛིན་བྱེད་ཀྱི་ཡོད།

ཐུན་མོང་མ་ཡིན་པའི་དྲི་བ་གཉིས་པ།

ངག་དབང་བློ་གྲོས།

ད་ལྟ་ཁྱེད་རང་དང་དཔུང་པ་གཤིབ་ནས་འོས་བསྡུའི་འགྲན་བསྡུར་ནང་ཞུགས་བཞིན་པའི་སྤྱི་འཐུས་ཚོར་རེ་བ་ཆེ་ཤོས་ག་རེ་ཡོད་དམ།

ལན། ང་ཚོའི་སྤྱི་འཐུས་འོས་མི་ཚང་མ་དང་སྤྱི་འཐུས་གནང་མྱོང་མཁན་རྒན་པ་མང་པོ་ཡོད་རེད། ཁོང་རྣམ་པ་ཚང་མ་ཉམས་མྱོང་ལྡན་པ་དང་དུས་རྟག་ཏུ་སོ་སོའི་ངོས་ནས་བརྩི་བཀུར་ཞུ་ཡི་ཡོད། དེ་བཞིན་ཕྱག་རོགས་འོས་མི་ཐུབ་བསྟན་བཀྲ་ཤིས་ལགས་ཁོང་མདོ་ཁམས་ཆུ་བཞི་སྒང་དྲུག་གི་སྐབས་ ༢༡ པའི་དྲུང་ཆེ་རེད། ང་ཚོ་འདྲིས་པོ་ཡོད་ལ། ཁོང་ལྷག་བསམ་རྣམ་དག་གི་ཐོག་ནས་ཕྱག་ལས་གནང་མཁན་ཞིག་རེད། དེ་བཞིན་དབང་འདུས་རྡོ་རྗེ་ལགས་སྐད་རིགས་གང་ཅིའི་ཐོག་ནས་ཐོགས་པ་མེད་པ་རེད། སྤྱི་དོན་ཐོག་ལ་སེམས་ཤུགས་ཡོད་མཁན་རྐྱང་རྐྱང་རེད། དེ་བཞིན་ཕྱག་རོགས་དྲུང་ཆེ་སྙིང་མིག་ལགས་དང་ཨོ་རྒྱན་འཇིགས་མེད་ལགས་ཡོད་རེད། ཚང་མ་ཆུ་བཞི་སྒང་དྲུག་གི་རྒྱུན་ལས་ཤ་སྟག་རེད། འོས་མི་ཆ་ཚང་ཚད་དང་ལྡན་པ་དང་སློབ་སྦྱོང་ལྡན་པ། ལྷག་བསམ་ཡོད་མཁན་ཤ་སྟག་རེད་འདུག  ང་རང་གི་ངོས་ནས་གང་ཐུབ་ཅི་ཐུབ་ཀྱིས་སྤྱི་ཚོགས་ཞབས་ཕྱི་ཞུས་པ་ཡིན་ལ། གལ་སྲིད་སྤྱི་འཐུས་ཆགས་པ་ཡིན་ནའང་མ་འོངས་པར་གང་ཐུབ་ཅི་ཐུབ་བྱ་དགོས་བསམ་པའི་ཀུན་སློང་ཡོད།  ད་ལྟ་འདིའི་ནང་ལ་ཚང་མ་ཚད་དང་ལྡན་པ་ཤ་སྟག་རེད་འདུག་པས། ང་རང་ཡིན་ནའང་བློ་བདེ་པོ་འདུག་ལ། ཁོང་རྣམ་པར་ཡིད་ཆེས་དང་རེ་བ་ཆེན་པོ་ཡོད།

ཐུབ་བསྟན་བཀྲ་ཤིས།

སྤྱི་འཐུས་ཀྱི་ལས་ཡུན་ལོ་ལྔ་ནང་ཁྱེད་ཀྱིས་འཆར་གཞི་གཙོ་བོ་ག་རེ་བསྒྲིགས་གནང་ཡོད་དམ།

ལན། ང་རང་གལ་སྲིད་བོད་མི་མང་སྤྱི་འཐུས་སྐབས་ ༡༧ པ་ཆགས་པ་ཡིན་ན། ང་རང་བོད་ནང་འཚར་ལོངས་བྱུང་བ་དང་སློབ་སྦྱོང་གི་གོ་སྐབས། སྤྱི་ཚོགས་ནང་དུ་ལས་ཀ་བྱས་མྱོང་མཁན་གྱི་གང་ཟག་ཅིག་དང་། བཙན་བྱོལ་དུ་བསླེབས་པའི་རྗེས་སུ་གཞུང་དང་གཞུང་འབྲེལ་མིན་པའི་ཚོགས་པ་མང་པོའི་ནང་དུ་སོ་སོས་ལྷག་བསམ་རྣམ་དག་གི་ཐོག་ནས་ཞབས་ཕྱི་སྒྲུབ་རྒྱུའི་གོ་སྐབས་བླ་ན་མེད་པ་རག་མྱོང་མཁན་ཞིག་ཡིན་དུས། བོད་མི་མང་སྤྱི་འཐུས་སྐབས་ ༡༧ པ་ཆགས་ན། དེ་དག་གི་ཉམས་མྱོང་གཞི་ལ་བཞག་པའི་ཐོག་ནས་སྤྱི་འཐུས་ཚད་ལྡན་ཞིག་གི་ལས་ཀ་བྱེད་ཐུབ་ཀྱི་རེད་བསམ་པའི་སྤོབས་པ་དང་གདེང་ཚོད་ཡོད། དེ་བཞིན་བཙན་བྱོལ་བོད་མིའི་སྒྲིག་འཛུགས་འདི་གཞིས་ལུས་མི་མང་གི་མགྲིན་ཚབ་པ་ལྟ་བུ་ཡིན་ཙང་། ང་རང་བོད་གཞིས་བྱེས་གཉིས་ཀྱི་ནང་དུ་འཚར་ལོངས་བྱུང་བ་མ་ཟད། ཉམས་མྱོང་ཚད་དང་ལྡན་པ་ཡོད། ད་ལྟའི་ཆར་བཙན་བྱོལ་གཞུང་གི་སྤྱི་འཐུས་རྐུབ་བཀྱག་རག་ན་ཞབས་ཕྱི་ཚད་དང་ལྡན་པ་སྒྲུབ་ཐུབ་ཀྱི་རེད་བསམ་གྱི་ཡོད། དེ་བཞིན་ཤེས་ཡོན་གྱི་ཐོག་ནས་བོད་ཀྱི་སྐད་ཡིག་དང་རིག་གཞུང་ནི་བོད་མི་རིགས་ཀྱི་སྲོག་རྩ་ལྟ་བུ་ཆགས་ཡོད་དུས། འདས་པའི་ལོ་ཡུན་ནང་ཤེས་ཡོན་དང་བོད་ཀྱི་སྐད་ཡིག  རིག་གཞུང་གི་སྒང་ལ་རྩོམ་ཡིག་བྲིས་པ་དང་ལས་ཀ་མང་པོ་བྱས་ཡིན། མ་འོངས་པར་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་བྱ་རྒྱུ་དང་ཁྲིམས་བཟོ་ལྷན་ཚོགས་ནང་ལ་བསླེབ་ན་རྒྱལ་སྤྱིའི་གནས་སྟངས་དང་བོད་ནང་གི་ཆབ་སྲིད་ཀྱི་གནས་སྟངས། དེ་བཞིན་བཙན་བྱོལ་གནས་སྟངས་ཐོག་ལ་རྒྱུས་མངའ་དང་ཤེས་ཚད་ཀྱི་ཐོག་ནས་འདང་གི་རེད་ལ། དེ་དག་ལ་ཆར་པ་ཆུ་གྲོགས་དང་ཉི་མ་མེ་གྲོགས་ཀྱི་ཐོག་ནས་ཐུགས་ཕན་གསོ་ཡི་རེད་བསམ་པའི་ཐོག་ནས་གྲ་སྒྲིག་ཨང་གསར་ཡོད།

དབང་འདུས་རྡོ་རྗེ།

ད་ལྟའི་གྲོས་ཚོགས་ཀྱི་དཀའ་ངལ་ཆེ་ཤོས་ག་རེ་གཟིགས་ཀྱི་འདུག  ཁྱེད་རང་སྤྱི་འཐུས་ཆགས་རྗེས་དེ་ལ་ལེགས་བཅོས་ག་འདྲ་གནང་གི་ཡིན།

ལན། ང་རང་ཚོའི་བོད་མིའི་སྒྲིག་འཛུགས་ཀྱི་གྲོས་ཚོགས་འདི་ད་ལྟའི་ཆར་ཡག་པོ་འགྲོ་ཡི་འདུག  དམངས་གཙོའི་གསོལ་རས་དེ་༧གོང་ས་མཆོག་གིས་གནང་བ་གཞིར་བཟུང་ཚང་མས་དམངས་གཙོ་ལག་བསྟར་གནང་རྒྱུའི་ཐོག་ལ་ང་རང་གི་ངོས་ནས་མིག་དཔེ་བལྟ་ས་དང་སྦྱང་རྒྱུ་མང་པོ་འདུག ང་རང་གིས་ད་ལྟའི་ཆར་ཕྱི་ལོག་ནས་ལྟ་ཡི་ཡོད་པ་རེད་དེ། མ་འོངས་པར་གལ་སྲིད་ང་རང་གྲོས་ཚོགས་ཀྱི་འཐུས་མིའི་ནང་བསླེབ་ན། ངའི་ངོས་ནས་འཐུས་མིའི་ངོ་བོ་འཁྱེར་བ་ཙམ་མིན་པར་གྲོས་ཚོགས་ནང་གི་ལས་ཀ་གལ་ཆེན་པོ་རེད་ལ། གྲོས་ཚོགས་ཀྱི་ཕྱི་ལོག་ལ་འཐབ་རྩོད་དང་ལས་འགུལ། མི་མང་གི་དཀའ་ངལ་སེལ་རྒྱུ་དེ་གལ་ཆེན་པོ་རེད། ལས་ཀ་མང་བ་དེ་གྲོས་ཚོགས་ཀྱི་ཕྱི་ལོག་ལ་ཡོད་པའི་ཚོར་སྣང་ཆེན་པོ་ཡོད། ང་རང་ཡིན་ནའང་འདས་པའི་ལོ་ལྔ་ནང་སྤྱི་ཚོགས་ནང་ལས་ཀ་བྱེད་ཕྱོགས་དང་རྒྱ་གར་གྱི་དཔོན་རིགས་དང་འབྲེལ་བ་ཡོད་པ། ཉམས་མྱོང་དེ་ཚོ་གཞིར་བཞག་ནས་མ་འོངས་པར་གྲོས་ཚོགས་ནང་བསླེབ་པ་ཡིན་ན། བདེན་མཐའ་གསལ་བའི་ཆེད་དུ་འབྲེལ་བ་གཏིང་ཟབ་ཏུ་གཏང་བ་དང་མཐུན་སྒྲིལ་ཡར་རྒྱས་གཏང་གི་ཡིན། གཙོ་བོ་གྲོས་ཚོགས་འཐུས་མི་ཚོས་རྒྱལ་སྤྱིའི་སྟེང་མཐུན་སྒྲིལ་ཡར་རྒྱས་བཏང་ནས་འཐབ་རྩོད་ཆེད་དུ་ཁྲིམས་ཡིག་དང་སྲིད་ཇུས་གང་མང་གཏན་འབེབས་བྱ་རྒྱུའི་གོ་སྐབས་འཚོལ་དགོས་ཀྱི་འདུག  དཔེར་ན་ཕྱི་ལོ ༢༠༢༠ ལོར་བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་འཆར་དེ་ང་རང་ཚོས་མཐུན་སྒྲིལ་བྱས་པའི་བཀའ་དྲིན་གྱིས་རེད། ང་རང་ཚོའི་ངོས་ནས་ཕྱི་ལོག་ལ་ཤུགས་མང་བ་རྒྱག་དགོས་ཀྱི་འདུག

གསར་འགོད་པ། བསྟན་འཛིན་ཕུར་བུ།