བོད་ཀྱི་ས་མཚམས་ཁུལ་དུ་དོགས་ཟོན་ཤུགས་ཆེ་རུ་བཏང་།

རྒྱ་ནག་གཞུང་གིས་བོད་ཀྱི་ས་མཚམས་ཁུལ་གྱི་ས་རྟགས་རིགས་འགུལ་སྐྱོད་གཏོང་བ་དང་ཡིག་ཆ་ཁུངས་འཕེར་མེད་པར་འགྲོ་འོང་བྱས་པ་སོགས་བྱ་སྤྱོད་རིགས་ ༡༥ བགྲངས་ནས་དེ་དག་དང་འགལ་བའི་མི་སུ་ཞིག་ཡིན་ཡང་ཁྲིམས་ཆད་ལྗིད་པོ་གཅད་རྒྱུ་ཡིན་འདུག

ཁ་སང་རྒྱ་ནག་གི་གཞུང་འབྲེལ་གོ་ལའི་དུས་བབ་ (Global Times) དྲ་རྒྱའི་སྟེང་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༥ པའི་ཚེས་ ༢༣ ཉིན་རྒྱ་ནག་གིས་ཆ་བགོས་བྱས་པའི་བོད་རང་སྐྱོང་ལྗོངས་ཟེར་བས་བོད་བཅིངས་གྲོལ་བཏང་ནས་ལོ་ངོ་ ༧༠ འཁོར་བའི་དུས་དྲན་སྲུང་གཙི་བྱ་རྒྱུ་ཡིན་པ་དང་བསྟུན། བོད་ཀྱི་ས་མཚམས་ཁག་ཏུ་ཁྲིམས་འགལ་གྱི་འགྲོ་འོང་སོགས་ཀྱི་བྱ་སྤྱོད་རིགས་ལ་སྔར་བས་སྟངས་འཛིན་ཤུགས་ཆེ་རུ་བྱ་རྒྱུ་ཡིན་སྐོར་བསྒྲགས་འདུག

བོད་རང་སྐྱོང་ལྗོངས་ཀྱི་མི་མང་བདེ་འཇགས་དང་ཕྱི་འབྲེལ་ལས་དོན་ལས་ཁུངས་ཟེར་བས་གཤམ་འོག་གི་འབྲེལ་ཡོད་ལས་ཁུངས་ཁག་ལ་བཀའ་ཁྱབ་ཅིག་བཏང་བའི་ནང་། ཡིག་ཆ་ཁུངས་འཕེར་མེད་པར་ས་མཚམས་ས་ཁུལ་དུ་འཛུལ་བ་དང་། ས་མཚམས་སུ་སྔོག་བཤེར་ལ་གཡོལ་ཐབས་བྱེད་པ། ཁྲིམས་འགལ་གྱི་ཐོག་ནས་མི་གཞན་ས་མཚམས་ནས་འགྲོ་འོང་བྱ་རྒྱུར་རོགས་འདེགས་བྱེད་པ། ས་མཚམས་ཀྱི་རྡོ་རིང་གིས་མཚོན་པའི་ས་རྟགས་རིགས་འགུལ་སྐྱོད་བཏང་བ་དང་། དམག་དོན་གྱི་ཡོ་བྱད་རིགས་གཏོར་བཤིག་གཏོང་བ་བཅས་ཀྱི་བྱ་སྤྱོད་རིགས་ངེས་པར་དུ་བཀག་འགོག་དགོས་སྐོར་བཀོད་འདུག

གཞན་ཡང་། བཀའ་ཁྱབ་དེའི་ནང་། ས་མཚམས་ཁུལ་དུ་རྒྱལ་ཁབ་རིམ་པའི་སྲུང་སྐྱོབ་སྲོག་ཆགས་རྔོན་པ་དང་རྩི་ཤིང་རིགས་འཐུ་བ། ས་མཚམས་ཁུལ་དུ་སྒེར་གྱི་གནམ་གྲུ་འཕུར་སྐྱོད་བྱེད་པ་དང་། ལམ་ཁ་དང་ཆུ་མོའི་ཁ་སྒྱུར་བ་སོགས་ཁྱོན་བྱ་སྤྱོད་རིགས་ ༡༥ ངོས་འཛིན་གྱིས། གལ་ཏེ་མི་སུ་རུང་གིས་བྱ་སྤྱོད་དེ་རིགས་སྤེལ་ཚེ་ཉེས་ཆད་ལྗིད་པོ་གཅད་རྒྱུ་ཡིན་སྐོར་བཀོད་ཡོད་འདུག

ཡང་རྒྱ་ནག་གི་གཞུང་འབྲེལ་དྲ་རྒྱ་དེའི་ནང་། ཀྲུང་གོའི་བོད་ལྗོངས་ཞིབ་འཇུག་ཁང་ཟེར་བའི་དམར་ཤོག་ཚོགས་པའི་མགོ་གཙོ་ཀྲུ་ཤའོ་མིང་ (Zhu Xiaoming) ཟེར་བ་དེས། དེ་དག་ནི་སྔོག་འགོག་གི་བྱེད་ཐབས་ཙམ་དུ་མ་ཟད། ས་མཚམས་སྲུང་སྐྱོབ་ཀྱི་རྒྱུན་ལྡན་ཐབས་ཇུས་ཡིན་སྐོར་དང་། ཡང་སི་ཁྲོན་གཙུག་ལག་སློབ་གྲྭ་ཆེན་མོའི་སློབ་དཔོན་དབྱང་མིན་ཧོང་ (Yang Minghong) ཟེར་བ་ཞིག་གིས། འདས་པའི་ལོ་ཤས་ནང་བོད་རང་སྐྱོང་ལྗོངས་ཁུལ་དུ་ཕྱིའི་སྟོབས་ཤུགས་ཀྱིས་ཤུགས་རྐྱེན་སྤྲོད་ཐབས་བྱས་ཡོད་པ་དང་། ད་ལྟ་བོད་བཅིངས་གྲོལ་བཏང་ནས་ལོ་ ༧༠ འཁོར་བའི་དུས་སྲུང་གཙི་ཞུ་གྲབས་ཡོད་སྟབས། འདི་ལྟ་བུའི་ཉེན་སྲུང་གི་བྱ་བ་སྤེལ་གལ་ཆེན་སྐོར་བརྗོད་ཡོད་འདུག

གསར་འགོད་པ། པ་སངས་ཚེ་རིང་།