ཕྱི་ལོ་ ༢༠༡༩ ཟླ་ ༨ ཚེས་ ༡ ཉིན་རྔ་བ་རྫོང་ཁོངས་ཀོར་མདོ་ས་ཚིགས་ནས་རྫོང་ཉེན་རྟོག་པས་འཛིན་བཟུང་བྱས་ཤིང་། རྔ་བ་ཁུལ་གྱི་བོན་དགོན་ཆེ་ཤོས་སྣང་ཞིག་དགོན་པའི་གྲྭ་རིན་ཆེན་ཚུལ་ཁྲིམས་ལགས་སུ་ཁྲི་ཏུན་གྲོང་ཁྱེར་གྱི་ཁྲིམས་ཁང་ཞིག་གིས་ལོ་ ༤ བཙོན་འཇུག་ཁྲིམས་ཐག་བཅད་འདུག
འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༣ ཚེས་ ༢༦ ཉིན་རྔ་བ་རྫོང་ཉེན་རྟོག་ཁང་གིས་གྲྭ་རིན་ཆེན་ཚུལ་ཁྲིམས་ལགས་ཀྱི་ཕ་མ་གཉིས་སྐད་བཏང་སྟེ། གྲྭ་ཚུལ་ཁྲིམས་ལགས་སུ་ལོ་བཞི་དང་ཕྱེད་ཀའི་བཙོན་འཇུག་ཁྲིམས་ཐག་བཅད་ཡོད་པ་དང་། ནང་མི་ཚོ་ཁོང་ལ་ཐུག་གི་སོང་ན་ཆོག་གི་ཡོད་སྐོར་བཤད་ཡོད་ཀྱང་། གྲྭ་ཚུལ་ཁྲིམས་ལགས་སུ་ག་དུས་ནས་ལོ་བཞི་དང་ཕྱེད་ཀའི་བཙོན་འཇུག་ཁྲིམས་ཐག་བཅད་པ་དང་། ཁྲིམས་ཐག་གཅོད་དོན་དང་ཉེས་འཛུགས་ག་རེ་བཏགས་ཡོད་མེད་སོགས་གསལ་བོ་བཤད་མེད་པ་རེད། ད་ལྟ་གྲྭ་ཚུལ་ཁྲིམས་ལགས་ཁྲི་ཏུའོ་གྲོང་ཁྱེར་ཉེ་འཁྲིས་ཀྱི་བཙོན་ཁང་ཞིག་ཏུ་བཙོན་འཇུག་བྱས་ཡོད་འདུག
གྲྭ་ཚུལ་ཁྲིམས་ལགས་འཛིན་བཟུང་བྱས་པའི་གནས་ཚུལ་དང་འབྲེལ་ནས་དེ་སྔ་མིང་བརྗོད་འདོད་མེད་པའི་དྷ་སར་གནས་སྡོད་འབྲེལ་ཡོད་ཅིག་གིས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། ཕྱི་ལོ་ ༢༠༡༨ ལོར་རྒྱ་ནག་གཞུང་གི་ཉེན་རྟོག་པས་གྲྭ་རིན་ཆེན་ཚུལ་ཁྲིམས་ལགས་ཀྱི་སྐད་འཕྲིན་ནང་སྔོག་བཤེར་བྱས་པ་བརྒྱུད། ཁོང་གིས་ཕྱི་ལོགས་ཀྱི་བོད་མི་ཁག་ཅིག་དང་མཉམ་དུ་བོད་དོན་གླེང་སློང་བྱས་ཡོད་སྐོར་ཉེས་འཛུགས་བྱས་ཏེ། ཁོང་དང་ཁོང་གི་ནུ་བོ་ནོར་བུ་ཚེ་རིང་ཐེངས་གཉིས་ལ་འཛིན་བཟུང་བྱས་ཡོད་པ་དང་། སྐབས་དེར་རིན་ཆེན་ཚུལ་ཁྲིམས་ལགས་ཀྱི་སྐད་འཕྲིན་ཡང་བཀོལ་སྤྱོད་མི་ཆོག་པ་བཟོས་ཡོད་འདུག དེ་བཞིན་རྒྱ་ནག་གཞུང་གིས་གྲྭ་རིན་ཆེན་ཚུལ་ཁྲིམས་ལགས་ཀྱིས་ཕྱི་ལོ་ ༢༠༡༩ ལོའི་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་གི་སྐུའི་འཁྲུངས་སྐར་ཉིན། ཕྱི་རྒྱལ་ན་ཡོད་པའི་བོད་མི་ཞིག་དང་མཉམ་དུ་དུས་ཚོད་གཉིས་ལྷག་ལ་ཁ་པར་བརྒྱུད་ཁ་བརྡ་བྱས་ཡོད་ལུགས་ཀྱི་བརྒྱུད་རིམ་ཆ་ཚང་སྒྲ་འཇུག་བྱས་ཡོད་འདུག
གྲྭ་རིན་ཆེན་ཚུལ་ཁྲིམས་ལགས་ནི་ཁཱ་ཤུལ་སྡེ་བའི་གཉེར་བ་ཚང་ཞེས་པའི་ཞིང་པའི་ཁྱིམ་ཚང་དཀྱུས་མ་ཞིག་ཏུ་སྐྱེས་ཤིང་། ད་ལྟ་རང་ལོ་ ༢༩ ཡིན་པ་དང་ཁོང་དགུང་ལོ་དྲུག་ཙམ་ནས་རྔ་ཡུལ་གྱི་བོན་དགོན་ཆེ་ཤོས་སྣང་ཞིག་དགོན་པར་ཆོས་ཞུགས་བྱས་ཏེ་སྔགས་ཀྱི་འཛིན་གྲྭར་ཐོན་ཡོད་འདུག ཁོང་གི་ཕ་མིང་ལ་བཀྲ་ཤིས་དོན་གྲུབ་དང་ལོ་ ༦༨ ཡིན་ཞིང་། མ་མིང་ལ་མཚོ་མོ་ཟེར་ཞིང་ལོ ༥༧ ཡིན་འདུག ཁོང་ལ་ཀུན་བཟང་སྒྲོལ་མ་ཚུད་པའི་ཕ་མ་གཅིག་གི་སྤུན་མཆེད་ ༥ ཡོད་འདུག
