བོད་མཚོ་སྔོན་ཞིང་ཆེན་སྐྱེ་རྒུ་མདོ་ཁུལ་རྫ་སྟོད་རྫོང་ཨག་སྟོད་ཡུལ་ཚོའི་བོད་མི་ཁག་ཅིག་རི་ལ་བསང་གསོལ་བཏང་བར་ཕྱིན་པར་བརྟེན་རྒྱ་གཞུང་ཉེན་རྟོག་པས་འདྲི་རྩད་བྱས་ཡོད་པ་མ་ཟད་བོད་མི་གཅིག་འཛིན་བཟུང་བྱས་ཡོད་འདུག
འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༣ ཚེས་ ༡༤ དང་བོད་ཟླ་ ༢ ཚེས་ ༡ ཉིན་སྐྱེ་རྒུ་མདོ་ཁུལ་རྫ་སྟོད་རྫོང་ཨག་སྟོད་ཡུལ་ཚོའི་བོད་མི་ཁག་ཅིག་རི་མགོར་བསང་གསོལ་བཏང་བར་ཕྱིན་ཏེ་ཉིན་གསུམ་ཙམ་གྱི་རྗེས་སུ། ས་གནས་ཉེན་རྟོག་པ་མང་པོ་ཡུལ་ཚོའི་ནང་དུ་ཡོང་སྟེ་རི་མགོར་འགྲོ་དགོས་དོན་གང་ཡིན་དང་། བསང་གསོལ་ག་རེ་བྱས་ནས་བཏང་བ་ཡིན་སོགས་འདྲི་རྩད་བྱས་ཏེ། བོད་མི་གཅིག་འཛིན་བཟུང་བྱས་ཡོད་པ་མ་ཟད། རི་མགོར་བསང་གསོལ་གཏོང་བར་ཕྱིན་པའི་བོད་མི་ཚོའི་ཐོབ་ཐང་ལག་འཁྱེར་གཞུང་བཞེས་བཏང་བ་དང་། མི་སྒེར་གྱི་ཁ་པར་ཨང་གྲངས་དང་སྐད་འཕྲིན་ཁ་བྱང་སོགས་ཐོ་འགོད་བྱས་ཡོད་པ་མ་ཟད། རྗེས་མ་བསང་གསོལ་གཏོང་བར་འགྲོ་བ་སོགས་ཀྱི་གནས་ཚུལ་བྱུང་ན་ཕ་མ་ཚོས་འགན་ལེན་དགོས་པ་དང་། ཕ་མ་མེད་མཁན་ཡིན་ན་ཉེ་འབྲེལ་དང་ཡང་ན་ས་གནས་མགོ་འཁྲིད་ཚོས་འགན་འཁུར་དགོས་པའི་བཀའ་རྒྱ་ཡང་བཏང་ཡོད་འདུག
གཞན་ཡང་། མཚོ་སྔོན་ཞིང་ཆེན་ནང་རྒྱ་ནག་གཞུང་གིས་སྔར་ལས་དམ་དྲག་ཆེ་རུ་གཏོང་གི་ཡོད་པ་མ་ཟད། བདུན་ཕྲག་རེའི་ནང་ས་གནས་ཁག་ཏུ་ཚོགས་འདུ་ཐེངས་རེར་བསྡུས་ནས་མི་མང་ལ་རྒྱ་ནག་གཞུང་བཀའ་དྲིན་ཆེན་པོ་ཡིན་པ་ལྟར་དྲིན་ཤེས་པ་དགོས་པ་སོགས་ཀྱི་སློབ་གསོ་རྒྱག་གི་ཡོད་པ་མ་ཟད། བོད་མི་ནང་ཁུལ་གྱི་གནས་ཚུལ་བསྡུ་ལེན་ཆེད་དངུལ་སྤྲད་ནས་གསང་ཉུལ་གྱི་ལས་ཀ་བྱེད་མཁན་ཇེ་མང་དུ་གཏོང་གི་ཡོད་པ་དང་། མི་མང་ནང་དུ་མངོན་གསལ་དུ་ཐོན་མཁན་དང་གནས་ཚུལ་སྤྲོད་མཁན་རིགས་ལ་དངུལ་འཕར་མ་སྤྲད་ནས་རྒྱལ་ཁབ་ཞེན་ཆེ་བ་དང་སྤྱི་དམངས་ཀྱི་ལས་དོན་ཡག་པོ་སྒྲུབ་ཀྱི་ཡོད་པར་ངོས་འཛིན་བྱས་ཏེ་གཞུང་གིས་རྒྱབ་སྐྱོར་དང་རོགས་རམ་འཕར་མ་སྤྲོད་བཞིན་ཡོད་པའི་རྐྱེན་གྱིས། བོད་མི་ནང་ཁུལ་ལ་སྐད་ཆ་འདྲ་མི་འདྲ་དང་པར་རིས་སོགས་བརྒྱུད་སྤྲོད་སོགས་བྱེད་པར་ཧ་ཅང་གིས་འཛེམས་ཟོན་བྱེད་ཀྱི་ཡོད་འདུག
ང་ཚོའི་གནས་ཚུལ་མཁོ་སྤྲོད་པས་གནས་ཚུལ་བཏང་བ་ལྟར་ན། བོད་མི་དེ་དག་ནི་ཨག་སྟོད་ཡུལ་ཚོའི་་བསྟན་འཛིན་བཟང་པོ་དང་རིན་ཆེན་ཚེ་རིང་། ཐུབ་བསྟན་ཕུན་ཚོགས། མགོན་པོ་ཤེས་རབ་བཅས་ཡིན་འདུག་ལ། ཐུབ་བསྟན་ཕུན་ཚོགས་ལགས་འཛིན་བཟུང་བྱས་ཏེ་ད་ལྟའི་གནས་སྟངས་སོགས་གསལ་ཁ་མི་འདུག
གནས་ཚུལ་དང་འབྲེལ་བའི་པར།
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
