ངོས་ཀྱི་གྲོགས་པོ་རྣམ་པ་ཚོས་འཛམ་གླིང་གོ་ལ་གཅིག་འགྱུར་གྱི་འདུ་ཤེས་སྤེལ་བར་ངོས་ལ་དཔུང་གྲོགས་གང་ཐུབ་གནང་རོགས་གནང་ཞུ་རྒྱུ་ཡིན།

༧གོང་ས་མཆོག་ནས་ཤུགས་རྐྱེན་ཆེ་བའི་ན་གཞོན་ཁག་ཅིག་ལ་བཀའ་སློབ་གནང་སྐབས་ཆོས་ལུགས་མི་འདྲ་བའི་ཁྱད་པར་ལ་བལྟས་ནས་ངའི་ཆོས་དང་གཞན་གྱི་ཆོས་ཟེར་ནས་དབྱེ་བ་ཕྱེས་པའི་དུས་ཚོད་འདས་ཟིན་ཞིང་འཛམ་གླིང་སྤྱི་ཡོངས་ལ་ཆོས་ལུགས་མང་པོ་ཡོད་པ་དེས་ཕན་ཐོགས་ཡོང་གི་ཡོད་སྐོར་གསུངས་སོང་།

དེ་རིང་ཕྱི་ཚེས་ ༡༢ ཉིན་གྱི་སྔ་དྲོའི་ཆུ་ཚོད་ ༩ ནས་ ༡༠ བར་དུ། ༧གོང་ས་མཆོག་གིས་འཛམ་གླིང་སྔར་ལས་བཟང་བ་ཞིག་དང་བྱམས་བརྩེའི་བདག་ཉིད་བགྱིས་ཞེས་པའི་བརྗོད་གཞིའི་ཐོག་དྲ་ལམ་བརྒྱུད་བཅོས་བསྒྱུར་མཁན་དང་ཤུགས་རྐྱེན་ཆེ་བའི་ན་གཞོན་བཅུ་གཉིས་ལ་བཀའ་སློབ་དང་བཀའ་ལན་སྩལ་ཡོད་པ་དང་། བཀའ་འདྲི་གནང་མཁན་ལས་འགུལ་བ་རྣམས་ནས་སྤྱི་ཚོགས་དང་། རེ་བ། སྙིང་རྗེ། གནམ་གཤིས་འགྱུར་ལྡོག་བཅས་ཀྱི་བརྗོད་གཞིའི་ཐོག་འགྲོ་བ་མི་རྣམས་འཇིག་རྟེན་སྤྱི་ལ་འགན་ཁུར་དང་དྲན་ཤེས་ཆེས་ཆེར་བསྟེན་ཐབས་སོགས་ཀྱི་སྐོར་བཀའ་འདྲི་ཞུས་སོང་།

ཐོག་མར་༧གོང་ས་མཆོག་གིས། ངོས་རང་ལོ་ན་ ༨༦ ཆགས་ཡོད་པ་དང་། ངོས་རང་གི་མི་ཚེ་གང་པོའི་ཉམས་མྱོང་དེ་འཛམ་གླིང་དམག་ཆེན་དང་པོ་དང་དམག་ཆེན་གཉིས་པ། དེ་བཞིན་ས་ཕྱོགས་གང་སར་ཕན་ཚུན་དྲག་རྩུབ་དང་སྲོག་གཅོད་པ་མང་པོ་བྱུང་བ་རེད། འདིས་མཐའ་མའི་གྲུབ་འབྲས་དེ་མི་མང་ལ་སྡུག་བསྔལ་དང་ཁོང་ཁྲོ་ཤུགས་ཆེ་རུ་བཏང་བ་སོགས་བྱས་ཡོད་རེད། དེང་སང་ཡུ་རོབ་སྤྱི་མཐུན་ཚོགས་པ་ནང་ཡོད་པའི་རྒྱལ་ཁབ་དེ་དག་དེ་སྔོན་ཕན་ཚུན་དགྲ་ཡིན་རུང་ཕྱིས་སུ་དེ་ཕན་ཐོགས་མེད་པ་ཤེས་ཡོད་པ་རེད། དཔེར་ན་དེ་སྔོན་ཧྥ་རན་སི་དང་འཇར་མན་ནི་དགྲ་ཡིན་ཡང་ཕྱིས་སུ་རྒྱལ་ཁབ་དེ་གཉིས་ཀྱིས་ཡུ་རོབ་ནང་ཡུ་རོབ་སྤྱི་མཐུན་ཚོགས་པ་བཙུགས་པ་རེད། ངོས་རང་ཆ་བཞག་ན་དེ་འདྲའི་ཕན་ཚུན་མཉམ་མཐུན་གྱི་འདུ་ཤེས་ལ་ཡི་རངས་བྱེད་ཀྱི་ཡོད། ང་ཚོ་གོ་ལ་གཅིག་འགྱུར་འདིའི་ཁོངས་སུ་གཏོགས་པ་རེད། དེར་བརྟེན་འཛམ་གླིང་སྤྱི་ཡོངས་ཀྱི་མི་མང་གི་བདེ་སྡུག་དང་འཛམ་གླིང་སྤྱི་ལ་ཁྱབ་པའི་སེམས་འཁུར་བཅངས་དགོས་པ་དེ་གལ་ཆེན་པོ་རེད། དེང་སང་སོ་སོའི་རྒྱལ་ཁབ་དང་སོ་སོའི་མི་རིགས་ཙམ་གྱི་བསམ་བློ་བཏང་ན་འགྲིག་གི་ཡོད་མ་རེད། དོན་དངོས་སུ་ཕན་ཚུན་ལྟོས་ནས་གྲུབ་པ་ཞིག་རེད། འཛམ་གླིང་གི་ཚ་དྲོད་གོང་འཕེལ་ཕྱིན་པ་དེ་སྤྱི་ལ་ཁྱབ་པའི་དཀའ་ངལ་ཆགས་ཀྱི་ཡོད་པས། སོ་སོའི་རྒྱལ་ཁབ་དང་སོ་སོའི་གླིང་ཕྲན་ཙམ་མིན་པར་འཛམ་གླིང་མི་སྤྱིའི་བདེ་སྡུག་དང་འཛམ་གླིང་མི་སྤྱི་ཡོངས་ཀྱི་བདེ་འཇགས་ཐད་བསམ་བློ་གཏོང་དགོས་པ་དེ་གལ་ཆེན་པོ་རེད། གཞི་རྩའི་ང་ཚོ་མི་ཡིན་པ་གཅིག་འགྱུར་རེད། དེར་བརྟེན་གོ་ལ་འདིའི་ནང་དུ་མཉམ་དུ་སྡོད་དགོས་པ་དེ་དངོས་ཡོད་གནས་ཚུལ་ཆགས་ཀྱི་ཡོད་པ་རེད། དེ་འདྲ་སོང་ཙང་ངོས་རང་གི་དམ་བཅའ་གཅིག་འཛམ་གླིང་མི་འབོར་ཐེར་འབུམ་བདུན་ཚང་མ་གཅིག་ཏུ་འཛིན་པའི་འདུ་ཤེས་གོང་འཕེལ་དུ་གཏོང་རྒྱུ་དེ་རེད། གལ་ཆེ་ཤོས་དེ་འཛམ་གླིང་སྤྱི་ཡོངས་ཀྱི་བསམ་བློ་དང་འགྲོ་བ་མི་སྤྱིའི་སེམས་འཁུར་བྱ་དགོས་པ་དེ་གལ་ཆེན་པོ་རེད། འདས་པའི་མི་རབས་ནང་ཆབ་སྲིད་དབང་བསྒྱུར་བྱས་པའི་རིང་ལུགས་མི་འདྲ་བ་དར་གྱི་ཡོད་རེད། ཡིན་ནའང་། གོ་ལ་གཅིག་འགྱུར་གྱི་འདུ་ཤེས་བཅངས་དགོས་རེད། དེར་བརྟེན་དེའི་ཐོག་སེམས་འཁུར་བསླངས་ནས་ལས་འགུལ་མི་འདྲ་བ་སྤེལ་དགོས་རེད། གོ་ལ་གཅིག་འགྱུར་གྱི་འདུ་ཤེས་སྤེལ་བ་དེ་ངོས་རང་གི་ཡིད་ཆེས་དང་དམ་བཅའ་ཡིན། ངོས་རང་གི་གྲོགས་པོ་རྣམ་པ་ཚོ་དང་ཁྱེད་རང་ཚོས་འཛམ་གླིང་གོ་ལ་གཅིག་འགྱུར་གྱི་འདུ་ཤེས་སྤེལ་བར་ངོས་ལ་དཔུང་གྲོགས་གང་ཐུབ་གནང་རོགས་གནང་ཞུ་རྒྱུ་ཡིན། རྒྱལ་ཁབ་མི་འདྲ་བའི་ཁྱད་པར་ཕྱེས་པ་དང་བདག་གཞན་གྱི་ཕྱོགས་རིས་བྱས་པ། དེ་བཞིན་ཆོས་ལུགས་མི་འདྲ་བའི་ཁྱད་པར་ལ་བལྟས་ནས་ངའི་ཆོས་དང་གཞན་གྱི་ཆོས་ཟེར་ནས་དབྱེ་བ་ཕྱེས་པའི་དུས་ཚོད་འདས་ཟིན་པ་རེད། འཛམ་གླིང་སྤྱི་ཡོངས་ལ་ཆོས་ལུགས་མང་པོ་ཡོད་པ་དེ་ཕན་ཐོགས་ཡོང་གི་ཡོད་པ་རེད། གཞི་རྩའི་ཆོས་ལུགས་ཡོངས་ཀྱི་བསླབ་བྱ་དེ་བྱམས་དང་སྙིང་རྗེ་ཉམས་ལེན་བྱ་དགོས་པ་གསུངས་ཀྱི་ཡོད་རེད། ལྟ་གྲུབ་མི་འདྲ་བ་མང་པོ་ཡོད་ཀྱང་གཞི་རྩའི་ཉམས་ལེན་གཅིག་འགྱུར་ཡིན་པས་ཆོས་ལུགས་མི་འདྲ་བ་ཡོད་ནའང་མཉམ་མཐུན་བྱས་ནས་བསྡད་ཐུབ་ཀྱི་ཡོད་པ་རེད། ཁྱེད་རང་ངོས་ཀྱི་གྲོགས་པོ་ཡིན་པའི་ཆ་ནས་འཛམ་གླིང་བདེ་སྐྱིད་ལྡན་པ་དང་འགྲོ་བ་མིིའི་རིགས་ཀྱི་བདེ་སྐྱིད་གང་ཐུབ་ཡོང་བར་ཁྱེད་རང་ཚོས་གང་ཐུབ་གནང་རོགས་གནང་ཞུ་ཡི་ཡིན། ཞེས་གསུངས་སོོང་།

དེ་ནས་དྲི་བ་དྲིས་ལན་གྱི་ལས་རིམ་ནང་། འཛམ་གླིང་སྤྱི་ལ་ཁྱབ་པའི་སེམས་འཁུར་གྱི་བཀའ་སློབ་ལམ་སྟོན་གནང་གི་འདུག དེ་འདྲའི་ཐུགས་འཁུར་བཞེས་པའི་དུས་ཚོད་དང་རྐྱེན་ག་རེའི་སྒོ་ནས་བྱུང་བ་རེད། དེ་ལ་སྙིང་སྟོབས་གོང་འཕེལ་དུ་གཏོང་བའི་རྒྱུ་རྐྱེན་ག་རེ་ཡིན་པའི་སྐོར་དྲིས་པར། དེའི་བཀའ་ལན་དུ་༧གོང་ས་མཆོག་གིས། ངོས་རང་ཆོས་པ་ཞིག་ཡིན། ཆུང་བྱིས་པའི་དུས་ནས་ཆོས་ཀྱི་སློབ་སྦྱོང་བྱས་ཡོད་པ་རེད། སྐབས་དེ་དུས་ནས་མ་སྐྱེས་སེམས་ཅན་ཟེར་བའི་ཐ་སྙད་དེ་ཁ་ལ་སྦྱར་བ་ཞིག་ཆགས་ཀྱི་ཡོད་རེད། དེ་ནས་རྒྱ་གར་དུ་བཙན་བྱོལ་ལ་བསླེབས་ནས་བཟུང་བསམ་བློ་གཏོང་སྟངས་ལ་འགྱུར་བ་མང་པོ་ཕྱིན་ཡོད་རེད། རྒྱ་གར་དུ་མ་འབྱོར་གོང་ང་ཚོ་བོད་པ་ཟེར་བའི་འདུ་ཤེས་ཤུགས་ཆེན་པོ་ཡོད་རེད། རྒྱ་གར་དུ་འབྱོར་ནས་མི་མང་པོ་ཐུགས་པ་དང་རྒྱ་གར་གྱི་མི་རིགས་ཙམ་མིན་པར་འཛམ་གླིང་ས་ཕྱོགས་གང་སར་ནས་ཕེབས་པའི་མི་མང་པོ་ཞིག་ཐུགས་འཕྲད་བྱས་པའི་གོ་སྐབས་བྱུང་། དེའི་ཉམས་མྱོང་གི་སྒོ་ནས་གཟུགས་པོའི་ཆགས་སྟངས་དང་ཚོར་བ་དྲག་ཞན། བསམ་བློ་གཏོང་སྟངས་སོགས་ནས་མི་ཡིན་པ་གཅིག་པ་ཆགས་ཀྱི་ཡོད་རེད། འདས་པའི་མིའི་ལོ་རྒྱུས་ནང་མིའི་འབྱུང་རབས་ལ་བལྟས་ན་བདག་གཞན་གྱི་ཆ་ནས་མི་མཐུན་པའི་ཁྱད་པར་དང་དབྱེ་འབྱེད་ཀྱི་བསམ་བློ་ཤུགས་ཆེན་པོ་ཡོད་དུས། དེའི་དབང་གིས་འཛམ་གླིང་ནང་དམག་འཁྲུག་དང་དྲག་རྩུབ་མང་པོ་ཡོང་གི་ཡོད་རེད། དེ་འདྲ་ཡོང་བ་དེ་གཙོ་བོ་བསམ་བློ་གུ་དོགས་པོ་ཡོད་པའི་རྐྱེན་གྱིས་རེད། དེང་སང་དུས་རབས་ ༢༡ ནང་། འཛམ་གླིང་མི་སྤྱིའི་བདེ་སྡུག་སྐོར་ལ་བསམ་བློ་གཏོང་རྒྱུ་དེ་གལ་ཆེན་པོ་རེད། སྤྱིར་བཏང་བསམ་བློའི་ཉམས་ལེན་ནང་མ་སྐྱེས་སེམས་ཅན་ཐམས་ཅད་བྱེད་དགོས་པས་དོན་དངོས་སུ་དེ་དང་མཐུན་པའི་ལུས་ངག་གི་སྤྱོད་པ་དགོས་ཀྱི་ཡོད་པ་རེད། དེར་བརྟེན་མི་ཚང་མ་གཅིག་འགྱུར་ཡིན་པའི་འདུ་ཤེས་དགོས་ཀྱི་འདུག  འདི་དངོས་ཡོད་གནས་ཚུལ་ཡིན་པ་དང་ཕན་ཐོགས་ཀྱང་ཡོང་གི་འདུག  ངོས་རང་ཆ་བཞག་ན་སོ་སོའི་ཉམས་མྱོང་ཕྲན་བུའི་སྒོ་ནས་ཞུས་ན། འཛམ་གླིང་ཡོངས་རྫོགས་ལ་གཅིག་འགྱུར་གྱི་འདུ་ཤེས་ཡོད་ན། སོ་སོའི་སེམས་གུ་དོགས་པོ་དེ་ནས་བཅིངས་གྲོལ་བཏང་བ་ལྟ་བུའི་ཕན་ཐོགས་ཡོང་གི་འདུག  མ་སེམས་ཅན་ཐམས་ཅད་ཉམས་ལེན་སྒོ་ནས་ཁ་འདོན་དང་དགེ་སྦྱོར་བྱེད་དུས་དོན་དངོས་སུ་བྱ་བའི་སྒང་ལ་དེ་འདྲ་བྱ་དགོས་པ་དེ་གལ་ཆེན་པོ་མཐོང་གི་འདུག  འཛམ་གླིང་ནང་གི་དཀའ་ངལ་དེ་དག་སྤྱིར་བཏང་གི་དཀའ་ངལ་ཕྲན་བུའི་དབང་གིས་ང་ཚོ་དང་ཁོ་ཚོ་ལབ་ནས་དབྱེ་བ་ཕྱེས་ན། འདི་ཤེས་རྒྱ་ཆུང་བ་དང་དུས་ཚོད་ལ་འདས་ཟིན་པའི་བསམ་བློ་གཏོང་སྟངས་ཤིག་ཆགས་ཀྱི་ཡོད་པ་རེད། ཅེས་བཀའ་ལན་གནང་སོང་།

དེ་ནས་བྲན་གཡོག་གི་རིང་ལུགས་དར་བ་དང་ལྷག་པར་དུ་བུད་མེད་ལ་བྲན་གཡོག་གི་ཐོག་ནས་དཀའ་ངལ་མང་པོ་འཕྲད་ཡོད་རེད་དེ། དེའི་སྐོར་ལ་གཏམ་བཤད་དང་གླེང་མོལ་བྱེད་མཁན་ཡོད་མ་རེད། ང་ཚོས་བྱམས་བརྩེ་དང་འབྲེལ་བའི་སྒོ་ནས་བུད་མེད་ལ་དམན་པར་ལྟ་བའི་བསམ་བློ་དེ་ལ་ཁ་གཏད་ག་འདྲ་གཅོག་དགོས་སྐོར་བཀའ་འདྲི་ཞུས་པར། ༧གོང་ས་མཆོག་གིས། དེའི་རྩ་བ་དེ་ང་ཚོས་སློབ་སྦྱོང་གི་ཐོག་ནས་གདོང་ལེན་བྱེད་དགོས་པ་དེ་གལ་ཆེན་པོ་རེད། བུད་མེད་ལ་དམན་པར་ལྟ་བའི་བསམ་བློའི་རིགས་ལ་ངེས་པར་དུ་ཁ་གཏད་གཅོག་དགོས་རེད། འཛམ་གླིང་ནང་བུད་མེད་ཀྱི་དབུ་ཁྲིད་མང་ཙམ་ཐོན་ཐུབ་ན་འཛམ་གླིང་ལ་བུད་མེད་ཀྱི་བྱམས་བརྩེའི་རང་བཞིན་ཅན། སྐྱེས་པ་ལས་ཀྱང་ལྷན་སྐྱེས་ཀྱི་བྱམས་བརྩེའི་ནུས་པ་ཆེ་བ་ཡོད་པས་མིག་དཔེ་སྟོན་ཐུབ་པ་བྱུང་ན། འཛམ་གླིང་ཞི་བདེ་གོང་འཕེལ་དུ་ཡོང་བར་བུད་མེད་ཚོས་དམིགས་བསལ་གྱིས་སེམས་འཁུར་བླངས་དགོས་རེད། དེ་ཡང་སློབ་སྦྱོང་ཡག་པོ་བྱས་པའི་ཐོག་ནས་འཛམ་གླིང་ཞི་བདེ་གོང་འཕེལ་གཏོང་ཐུབ་ན་ཡག་པོ་ཡོད་པ་རེད། ལོ་ངོ་སྟོང་ཕྲག་གོང་གི་གོམས་གཤིས་ལ་སྐྱེས་པ་ཟེར་བ་དེ་མཐོ་བ་རྩིས་པ་དང་བུད་མེད་དེ་དག་དམན་པར་རྩིས་པའི་གོམས་གཤིས་ལ་འགྱུར་བ་འགྲོ་བར་སློབ་སྦྱོང་གི་སྒོ་ནས་འགྱུར་བ་གཏོང་དགོས་རེད། ཅེས་སོགས་བཀའ་ལན་གནང་སོང་།

གསར་འགོད་པ། བསྟན་འཛིན་ཕུར་བུ།