སྤྱི་འཐུས་གསར་པ་གཉིས་ནས་ལས་འཁུར་དམ་བཅའ་ཕུལ།

བོད་མི་མང་སྤྱི་འཐུས་ཚོགས་གཞོན་ཨཅརྱ་ཡེ་ཤེས་ཕུན་ཚོགས་མཆོག་གི་མདུན་དུ་སྨན་རམས་པ་རྣམ་རྒྱལ་ཁྱུ་གསར་ལགས་དང་དགེ་བཤེས་རྔ་བ་གངས་རི་ལགས་རྣམ་གཉིས་ནས་སྐབས་ ༡༦ པའི་བོད་མི་མང་སྤྱི་འཐུས་ཀྱི་ལས་ཁུར་དམ་འབུལ་ཞུས་སོང་།

དེ་རིང་སྔ་དྲོའི་ཆུ་ཚོད་ ༡༠ ཙམ་གྱི་སྟེང་། བོད་མི་མང་སྤྱི་འཐུས་ལྷན་ཁང་དུ་སྨན་རམས་པ་རྣམ་རྒྱལ་ཁྱུ་གསར་ལགས་དང་དགེ་བཤེས་རྔ་བ་གངས་རི་ལགས་རྣམ་གཉིས་ནས་བོད་མི་མང་སྤྱི་འཐུས་ཚོགས་གཞོན་ཨཅརྱ་ཡེ་ཤེས་ཕུན་ཚོགས་མཆོག་གི་མདུན་དུ་སྐབས་ ༡༦ པའི་བོད་མི་མང་སྤྱི་འཐུས་ཀྱི་ལས་ཁུར་དམ་འབུལ་ཞུས་སོང་བ་དང་།  དམ་འབུལ་སྐབས་ཚོགས་གཞོན་མཆོག་གི་གཙོས་སྤྱི་འཐུས་རྒྱུན་ལས་རྣམ་པ་བདུན་ཕེབས་འདུག

སྐབས་དེར་ཚོགས་གཞོན་མཆོག་གིས། དེ་རིང་ལྷག་དཀར་ཀྱི་ཉིན་མོ་དང་བསྟུན་བཅའ་ཁྲིམས་དོན་ཚན་ ༥༧ དང་བཅའ་ཁྲིམས་དོན་ཚན་ ༤༧ པའི་དོན་ཚན་གཉིས་པའི་ནང་གསེས་བཅའ་ཁྲིམས་ལེའུ་ ༥ པའི་དགོངས་གཞི་བོད་མི་མང་སྤྱི་འཐུས་ལྷན་ཚོགས་སྐབས་ ༡༦ འདེམས་ཐོན་དམ་འབུལ་ཟིན་པའི་ཕྱག་འབྲེལ་སྤྱི་འཐུས་སྨན་རམས་པ་རྣམ་རྒྱལ་ཁྱུ་གསར་ལགས་དང་། དགེ་བཤེས་རྔ་བ་གངས་རི་ལགས་རྣམ་གཉིས་ལ་ཕྱག་འབྲེལ་སྤྱི་འཐུས་རྒྱུན་ལས་རྣམས་དང་སྤྱི་ཡོངས་ཀྱི་སྤྱི་འཐུས་རྣམ་པ། དེ་བཞིན་བོད་མི་ཡོངས་ཀྱི་ཚབ་ཞུས་ཏེ། དེ་རིང་དམ་འབུལ་ཟིན་པའི་ཐོག་ལ་རྣམ་པ་གཉིས་ལ་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ་ཡི་ཡོད། ཞེས་གསུངས་སོང་།

ཡང་ཚོགས་གཞོན་མཆོག་གིས། རྩ་བའི་དུས་ཚོད་འཁྱུར་ལ་ཉེ་བའི་དུས་ཡུན་ཐུང་ཐུང་ཞིག་རེད། ཡིན་ནའང་དུས་ཡུན་རིང་ཐུང་ལ་མ་ལྟོས་པར་རྣམ་པ་གཉིས་དང་མཉམ་དུ་སྐབས་བཅུ་དྲུག་པའི་ནང་ང་ཚོས་མཉམ་དུ་ཕྱག་ལས་གནང་བའི་གོ་སྐབས་བཟང་པོ་ཐོབ་པ་དེ་སོ་སོའི་ངོས་ནས་དགའ་སྤོབས་ཞུ་ཡི་ཡོད། དེ་རིང་རྩ་བའི་ལྷག་དཀར་གྱི་ཉིན་མོ་འདིར་ཕྱག་ལས་ནང་ལ་བཞུགས་ཏེ་གནང་དགོས་པ་ཞིག་རེད་དེ། ནམ་རྒྱུན་ཁྲིམས་ལུགས་གཞིར་བཟུང་གི་འགྲོ་སྟངས་ཀྱིས་འོས་བསྡུ་ལས་ཁང་ནས་དུས་ཚོད་གཏན་འབེབ་གནང་བ་དང་། ང་ཚོར་ཚུར་སྙན་གསེང་ཞུས། དེ་ནས་རྣམ་པ་ཚོར་སྙན་གསེང་ཞུས་ཏེ་དེ་རིང་ཞོགས་ཚོགས་ཉིན་མ་བཟང་པོ་དང་དུས་བཟང་པོ་ཞིག་གི་ཐོག་ལ་བཞག་གནང་བ་རེད། རྩ་བའི་རྒྱུན་ལས་བཅུ་གཅིག་ནང་ནས་གཉིས་ཀྱིས་རྩ་དགོངས་ཞུས་སྟབས། ད་ལྟ་འདིར་རྣམ་པ་གཉིས་སྤྱི་འཐུས་ནང་ཕེབས་པ་རེད། གཞན་གཉིས་དེ་རིང་དགོངས་ཞུའི་ནང་དུ་ཡོད་སྟབས། དགོངས་ཞུའི་ནང་དུ་ཡོད་ཚེ་ཕེབས་དང་མ་ཕེབས་སོ་སོའི་ཐུགས་འདོད་རེད། ཅེས་གསུངས་འདུག

བོད་མི་མང་བཅའ་ཁྲིམས་དོན་ཚན་ཞེ་བདུན་པ་སྤྱི་འཐུས་ཀྱི་དམ་འབུལ་གྱི་ནང་། འདེམས་ཐོན་སྤྱི་འཐུས་ཁོངས་ནས་སྤྱི་འཐུས་ལས་རྒྱུན་རིང་ཤོས་དེར་སྤྱི་འཐུས་རྒྱུན་ལས་ཀྱིས་བར་བརྒལ་ཚོགས་གཙོར་བསྐོ་གཞག་བྱེད་དགོས། གལ་ཏེ་ལས་རྒྱུན་འདྲ་མཉམ་བྱུང་ཚེ་དེའི་ཁོངས་ནས་རང་ལོ་བགྲེས་ཤོས་དེར་བསྐོ་གཞག་བྱེད་དགོས། བར་བརྒལ་ཚོགས་གཙོས་ཆེས་མཐོའི་ཁྲིམས་ཞིབ་པ་ཆེ་བའི་མདུན་སར་དམ་འབུལ་ཞུས་རྗེས། སྤྱི་འཐུས་རེ་རེས་རང་ཉིད་སྤྱི་འཐུས་ཀྱི་ལས་འཁུར་དུ་མ་ཞུགས་གོང་བར་བརྒལ་ཚོགས་གཙོའི་མདུན་སར་ཁྲིམས་ལུགས་སུ་གཏན་འབེབ་བྱས་པའི་ཚིག་གཞི་ལྟར་ལས་འཁུར་དམ་བཅའམ། ཁས་ལེན་བྱེད་དགོས། ཚོགས་གཙོ་དང་ཚོགས་གཞོན་འདེམས་ཐོན་བྱུང་རྗེས་ཚོགས་གཙོའི་མདུན་སར་དམ་འབུལ་ཞུ་དགོས་པ་དང༌། ཚོགས་གཙོ་ས་གནས་སུ་མེད་སྐབས་ཚོགས་གཞོན་མདུན་སར་དམ་འབུལ་ཞུ་དགོས། ཞེས་གསལ་ཡོད་པ་རེད།

གསར་འགོད་པ། ཀླུ་མགོན་ཐར།