བོད་པའི་ཁང་པ་བཙན་གྱིས་གཏོར།

ལྷ་ས་གྲོང་ཁྱེར་སྲིད་གཞུང་གིས་བོད་པའི་ཁང་པ་མང་པོ་ཁྲིམས་འགལ་ཡིན་ལུགས་བརྗོད་དེ་བཙན་གྱིས་གཏོར་གྱི་ཡོད་འདུག

ཟླ་འདིའི་ཕྱི་ཚེས་ ༡༣ དང་ ༡༤ ཉིན་ལ་ལྷ་ས་གྲོང་ཁྱེར་སྲིད་གཞུང་གིས། གཡོལ་བ་དང་གབ་པའི་ཁྲིམས་འགལ་གཉིས་ཟེར་བའི་སྲིད་ཇུས་ལག་བསྟར་གྱིས། ཚལ་གུང་ཐང་ཁྲོམ་གཞུང་ཚལ་གྲོང་ཚོའི་ཚོགས་ཆུང་ལྔ་བ་ཟེར་བའི་ས་ཁུལ་དུ་འཛུགས་སྐྲུན་བྱས་པའི་ཁང་པ་ཞིག་ཁྲིམས་འགལ་ཡིན་པའི་ཉེས་མིང་འོག་བཙན་གྱིས་གཏོར་བཤིག་བཏང་ཡོད་འདུག

རྒྱ་ནག་གཞུང་འབྲེལ་གྱི་གནས་ཚུལ་ནང་། འབྲེལ་ཡོད་ལྷ་ས་གྲོང་ཁྱེར་གྱི་ས་ཁང་དོ་དམ་ཞིབ་བཤེར་ཚན་པ་ཟེར་བས། ཁྲིམས་འགལ་ངང་ཁང་པ་འཛུགས་སྐྲུན་བྱེད་བཞིན་ཡོད་པ་དང་། དོ་བདག་གིས་ཞིང་སྤྱོད་ས་ཆ་ལྐོག་ཏུ་ས་ཆ་ཉོ་ཚོང་བྱས་ཡོད་ལུགས་བརྗོད་དེ། ས་རྐོ་འཕྲུལ་འཁོར་ཆེད་གཏོང་གིས་ཁང་པ་གཏོར་བཤིག་བཏང་ཡོད་འདུག

རྒྱ་ནག་གཞུང་འབྲེལ་གྱི་གནས་ཚུལ་དེའི་མཇུག་ཏུ་མང་ཚོགས་ལ་དྲན་སྐུལ་ཟེར་བའི་ནང་། ཁྲིམས་ལས་འགལ་ནས་འཛུགས་སྐྲུན་བྱེད་མཁན་ལ་ཕོག་པའི་སྣ་སུན་བསླབ་བྱར་བརྩིས་ཏེ་མ་དངུལ་ཁྲིམས་མཐུན་གྱི་གཉེར་སྐྱོང་ཐོག་སྤྱོད་དགོས། སྲིད་གཞུང་གིས་སྔ་ཕྱི་བར་གསུམ་དུ་ཁྲིམས་འགལ་སྒྲིག་འགལ་ངང་འཛུགས་སྐྲུན་བྱེད་པའི་བྱེད་སྤྱོད་ལ་མཐའ་གཅིག་ཏུ་ལྷོད་གཡེང་སྤུ་ཙམ་མེད་པར་ཐག་གཅོད་ནན་པོ་བྱེད་བཞིན་ཡོད་པས། ཁྲིམས་འགལ་ངང་འཛུགས་སྐྲུན་བྱེད་པའི་བྱེད་སྤྱོད་སྤེལ་ཚེ་མཐར་གྱོང་གུན་ཆེན་པོ་ཕོག་རྒྱུ་ཉག་གཅིག་རེད། ཅེས་བརྗོད་འདུག

རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།