བྱིས་སྒྲུང་གླིང་གི་དྲ་ཚོམས་དུ་རིགས་གཅིག་རྐང་འཛིན་གྱིས་མི་ལོ་བཞི་དང་ཕྱེད་ཀྱི་རིང་ལ་བྱིས་པ་གསོ་སྐྱོང་བྱེད་ཐབས་ཀྱི་སྐོར་ནས་གླེང་གཞི་བདུན་བཅུ་ལྷག་སྤེལ་ཏེ་བགྲོ་གླེང་བྱས་པའི་ཉམས་མྱོང་ལ་གཞིགས་པ་ཡིན་ན། རྙོག་འཛིང་ཆེས་ཆེ་བའི་གླེང་གཞི་དེ་ནི་བྱིས་པར་གཅར་རྡུང་བྱེད་ཚུལ་གྱི་སྐོར་ཡིན་ཞིང་། ནམ་རྒྱུན་གླེང་གཞི་འདིའི་སྟེང་དུ་མཉམ་ཞུགས་བྱེད་མཁན་མང་ཞིང་ཚོར་ཤུགས་ཀྱང་ཆེན་པོ་ཡོད། ནང་བསྟན་མཚན་ཉིད་རིག་པ་དང་དེང་དུས་ཀྱི་སེམས་ཁམས་རིག་པའི་ལྟ་གྲུབ་ལ་གོ་རྟོགས་ཅུང་ཟད་ཡོད་པ་དང་བྱིས་སྐྱོང་སློབ་གསོའི་སྐོར་ལ་དོ་སྣང་ཅན། བྱིས་པའི་སེམས་ཁམས་ཀྱི་འཕེལ་འགྱུར་དང་དགའ་སྡུག་ལ་རྒྱུས་མངའ་ཡོད་པའི་དགེ་རྒན་དང་ཕ་མ་རྣམས་ཀྱིས་གཅར་རྡུང་ནི་སློབ་གསོའི་བྱེད་ཐབས་ཤིག་མ་ཡིན་པའི་རྒྱུ་མཚན་བཤད་ཀྱི་ཡོད་ཅིང་། སྲོལ་རྒྱུན་དང་ཡུལ་སྲོལ་གྱི་གོམས་གཤིས་ཤུགས་ཆེ་བ་དང་རང་ལྟ་མཆོག་འཛིན་ཅན་གྱི་ཕ་མ་ཚོས་བུ་ཕྲུག་ལ་གཅར་རྡུང་བྱེད་པ་ནི་འོས་ཤིང་འཚམ་པ་ཞིག་ཡིན་པར་བརྗོད་དེ་བགྲོ་གླེང་དང་རྩོད་པ་བྱས་དང་བྱེད་བཞིན་ཡོད། དེ་ལྟར་ན་གཤམ་དུ་བྱིས་པར་གཅར་རྡུང་བྱས་ན་མི་སྐྱོན་པའི་བསམ་བློའི་འབྱུང་ཁུངས་དང་གཅར་རྡུང་གི་ངོ་བོ། གཅར་རྡུང་གི་མཇུག་འབྲས་བཅས་ཀྱི་སྐོར་རགས་ཙམ་བརྗོད་པར་བྱའོ།།
བྱིས་པར་གཅར་རྡུང་བྱེད་དགོས་པ་དང་གཅར་རྡུང་བྱས་ན་མི་སྐྱོན་པའི་འདུ་ཤེས་དེ་ནི་བོད་མི་སྐྱ་སེར་མང་བོའི་ལུས་ངག་ཡིད་གསུམ་ལ་འཇགས་པའི་ཀུན་སྤྱོད་ཅིག་ཡིན་པའི་སྣང་ཚུལ་བྱུང་ཞིང་། དེའི་འབྱུང་རྩ་དེ་སྲོལ་རྒྱུན་དང་ཡུལ་སྲོལ་ལ་ཐུག་ཡོད་པར་སེམས། བྱིས་པ་སེམས་ཀྱིས་གཅེས་ན་བྱིས་པའི་ལུས་ལ་གཅར་རྡུང་བྱས་ན་མི་སྐྱོན་པའི་གཏམ་དཔེ་ཡང་མང་བོ་ཡོད་པ་རེད། དཔེར་ན། བུ་ཆུང་སེམས་ཀྱིས་གཅེས་ན་ཐལ་ལྕག་གིས་རྒྱུན་མི་ཆད་ཟེར་བ་དང་། གཅར་ནི་མེད་གཅེས་ནི་མེད་ཅེས་བོད་པའི་ཕ་མ་ཚོས་བྱིས་པ་ལ་གཅར་རྡུང་བྱས་ན་མི་སྐྱོན་འདོད་ཀྱི་ཡོད་པ་མ་ཟད། ཁོ་ཚོས་སྐད་ཆ་འདི་ལྟར་བཤད་ཀྱི་ཡོད། ཁོ་ཚོ་ཆུང་དུས་ཕ་མས་གཅར་རྡུང་བྱས་ཏེ་འཚར་ལོངས་བྱུང་བ་ཡིན་པ་དང་། བསམ་པ་བཟང་བོ་དང་དམིགས་ཡུལ་ཡག་པོ་ཞིག་ཡོད་ན། བྱིས་པར་གཅར་རྡུང་བྱས་ན་བཟང་ཞེས་ལབ་ཀྱི་ཡོད། ཡང་ལ་ལ་ཞིག་གིས་ཁོ་ཚོས་ཕྲུ་གུར་གཅར་རྡུང་བྱེད་ཀྱི་ཡོད། མ་གཅར་ན་ཁ་ལ་ཉན་གྱི་མི་འདུག་ཅེས་རང་ཉིད་ཀྱི་འདོད་འདུན་གཙོ་བོར་བཞག་སྟེ་དེ་ལྟར་བཤད་ཀྱི་ཡོད། ཡང་ཁོ་ཚོའི་ཁྲོད་ཀྱི་རེ་ཟུང་ཞིག་གིས་དེང་རབས་ཀྱི་སེམས་ཁམས་རིག་པ་དང་སྤྱི་ཚོགས་བདེ་དོན་ཉམས་ཞིབ་པ་ཚོས་བཏོན་པའི་ཞིབ་འཇུག་གི་གྲུབ་དོན་དང་བོད་པའི་བྱིས་པ་སྐྱོང་ཚུལ་གཉིས་ལ་འབྲེལ་བ་ཡོད་པ་མ་རེད། མ་གཞི་ནས་བོད་པའི་བྱིས་པ་དང་ཕྱི་རྒྱལ་གྱི་བྱིས་པ་ཚོ་འདྲ་བོ་ཡོད་པ་མ་རེད། བོད་པའི་བྱིས་པར་གཅར་རྡུང་མ་བྱས་ན་ཁ་ལ་ཉན་གྱི་མ་རེད་ཅེས་བཤད་དེ་བྱིས་པ་གཙོ་སྐྱོང་བྱེད་པ་རང་གི་ཁ་ལ་ཉན་པའི་ཆེད་ཡིན་པ་བཤད་ཀྱི་ཡོད། ཡང་ལ་ལས་བོད་པ་ལ་བོད་པའི་རིག་གཞུང་ཞིག་ཡོད་པས། ཕྱི་རྒྱལ་གྱི་བྱིས་པ་སྐྱོང་ཚུལ་ལ་ལད་ཟློས་བྱེད་དགོས་དོན་ཡོད་པ་མ་རེད། ཕ་མས་བྱིས་པར་གཅར་བ་ནི་འོས་ཤིང་འཚམ་པ་ཞིག་ཡིན་པ་བཤད་ཀྱི་ཡོད། ཡིན་ནའང་། སྐད་ཆ་འདིའི་རིགས་བཤད་མཁན་རྣམས་ཀྱིས་གཅར་རྡུང་དང་འབྲེལ་བའི་ལུས་ངག་གི་སྦྱོར་བའི་འབྱུང་ཁུངས་དང་གཅར་རྡུང་གི་ངོ་བོ། གཅར་རྡུང་བྱས་པའི་མཇུག་འབྲས་བཅས་ཀྱི་སྐོར་ལ་བསམ་བློ་ཞིབ་ཚགས་གཏོང་མྱོང་མེད་པ་དང་། ལྷག་པར་དུ་ནང་བསྟན་མཚན་ཉིད་རིག་པ་དང་དེང་རབས་སེམས་ཁམས་རིག་པའི་སྐོར་ལ་སློབ་སྦྱོང་གི་བག་ཆགས་མེད་མཁན་རྣམས་ཡིན་པའི་ཚོར་སྣང་བྱུང་། ཡང་ཉུང་ཤས་ཤིག་གིས་ཧ་ཅང་ཤེས་མདོག་གིས་སྒྲ་བསྒྱུར་མར་བ་ལོ་ཙ་བས་རྗེ་བཙུན་མི་ལ་རས་པར་སྡུག་པོ་བཏང་ཚུལ་གྱི་ལོ་རྒྱུས་བཤད་དེ་ཀུན་སློང་བཟང་བོ་ཞིག་ཡོད་ན་བྱིས་པར་གཅར་རྡུང་བྱས་ན་མི་སྐྱོན་པར་བཤད་ཀྱི་ཡོད། དེ་ནི་བྱིས་པ་གསོ་སྐྱོང་བྱེད་ཐབས་ལ་སྦྱར་ན་ཞྭ་དཔེ་ལྷམ་འགེབ་ཀྱི་དཔེ་ལས་མ་འདས་པར་སེམས། ཡང་བྱིས་སྒྲུང་གླིང་དུ་དགེ་འདུན་པ་ཞིག་གིས་རྫ་དཔལ་སྤྲུལ་རིན་པོ་ཆེས་བུ་དང་བུ་མོ་རྡུང་ན་ཉན་ཞེས་གསུངས་ཡོད་པ་རེད། ཕ་མས་བུ་ཕྲུག་ལ་གཅར་རྡུང་བྱེད་པ་ཁ་ལ་ཉན་པའི་ཆེད་དུ་རེད་ཅེས་སྤོབས་པ་ཆེན་པོས་བཤད་པ་རེད། དོན་ངོ་མར་རྫ་དཔལ་སྤྲུལ་རིན་པོ་ཆེས་དེ་འདྲ་ཞིག་གསུངས་ཡོད་མེད་མི་ཤེས་མོད། གལ་སྲིད་བུ་ཕྲུག་ཁ་ལ་ཉན་པའི་ཆེད་དུ་དེ་འདྲ་ཞིག་གསུང་ཡོད་པའི་དབང་དུ་བཏང་ནའང་། དེ་ནི་དངོས་ཡོད་གནས་ཚུལ་ལ་བསམ་གཞིགས་མ་བཏང་བའི་ལོག་བཤད་ཅིག་ཡིན་པ་ལས་ལེགས་བཤད་ཅིག་ཡིན་པར་མི་འདོད་ཅིང་། ལྷག་པར་དུ་བརྡ་འཕྲིན་དང་འཕྲུལ་རིགས་ཀྱི་དུས་རབས་སུ་འབོད་པའི་དུས་རབས་ཉེར་གཅིག་པའི་ནང་དུ་འོས་ཤིང་འཚམ་པའི་སློབ་གསོ་ཞིག་རྩ་བ་ནས་མ་རེད། དེ་ལྟར་ན། ང་ཚོས་སྲོལ་རྒྱུན་དང་ཡུལ་སྲོལ་གྱི་བཀག་རྒྱ་ལས་བརྒལ་ཏེ་སྙིགས་དོར་བཅུད་ལེན་གྱི་ལམ་ལ་ཞུགས་ཏེ་བྱིས་པར་གཅར་རྡུང་བྱས་ན་མི་སྐྱོན་པའི་འདུ་ཤེས་དོར་ནས་གནའ་དེང་ཟུང་འབྲེལ་གྱི་བྱིས་སྐྱོང་གི་ཐབས་སྣ་ཚོགས་ལ་བརྩོན་དགོས་པར་སེམས་སོ།།
སྐྱེས་ཆེན་ལྷ་མོ་དོན་འགྲུབ་ཚང་གིས་བརྩམས་པའི་བྱམས་བརྩེའི་ནུས་སྟོབས་ཀྱི་དཔེ་ཆའི་ཤོག་ངོས་༥༠་ནང་དུ་ནང་སེམས་ཀྱི་ཚོར་མྱོང་ལ་བཟང་ངན་གྱི་རིགས་གཉིས་ཡོད། ཁོང་ཁྲོ་ལ་སོགས་པའི་ཚོར་མྱོང་ནི་ངན་པའི་རིགས་ཡིན་པས། འདིའི་རིགས་རྒྱུད་ལ་སྐྱེས་པ་ཙམ་གྱིས་སེམས་མ་སྐྱིད་པ་བཟོ་གི་ཡོད་པ་དང་། ཕུགས་སུའང་ལས་ངན་པའི་བག་ཆགས་འཇོག་གི་ཡོད། ལས་ངན་འདི་དག་གིས་སྐྱེ་བོ་གཞན་ལ་གནོད་པ་སྐྱེལ་བ་དང་ཆབས་ཅིག་རང་ཉིད་ཀྱང་ཕུགས་སུ་སྡུག་བསྔལ་ལ་སྦྱར་གྱི་ཡོད་ཅེས་གསུངས་ཡོད་པ་ལྟར། ཁོང་ཁྲོ་ལ་སོགས་པའི་ཚོར་མྱོང་ངན་པའི་རིགས་རང་སེམས་ལ་མངོན་དུ་གྱུར་བའི་སྐབས་སུ་བུ་ཕྲུག་ལ་གཅར་རྡུང་བྱེད་རྩ་བ་ནས་མི་ཉན་པར་འདོད། གལ་སྲིད་ཁོང་ཁྲོ་གཙོ་བོར་བྱས་པའི་ཚོར་མྱོང་མ་རུངས་པ་རྣམས་རང་སེམས་ལ་མངོན་དུ་གྱུར་བའི་སྐབས་སུ་རང་སེམས་ཀྱང་སྐྱིད་པོ་མེད་པ་ཆགས་ཀྱི་ཡོད། ཡང་སྐྱེས་ཆེན་ལྷ་མོ་དོན་གྲུབ་ཚང་གིས་སེམས་ཀྱི་ཞི་བདེ་དཀྲུག་མཁན་གཙོ་བོ་དེ་ཁོང་ཁྲོ་ཡིན་ཞེས་གསུང་ཡོད་པ་རེད། དེས་ན་ཕ་མ་ཚོས་གཅར་རྡུང་ནི་ཁོང་ཁྲོའི་ཐོན་འབྲས་ཡིན་པ་དང་གཅར་རྡུང་གི་ངོ་བོ་འཚེ་བ་ཡིན་པ། གཅར་རྡུང་གི་འབྲས་བུ་སྡུག་བསྔལ་ཡིན་པ་ངོས་འཛིན་བྱེད་ཐུབ་དགོས། གལ་སྲིད་དེ་ལྟར་ངོས་འཛིན་མ་བྱས་པ་ཡིན་ན། ནང་བའི་སེམས་འདུལ་བའི་སློབ་གསོ་དང་། དེང་རབས་ཀྱི་སྤྲོ་སྣང་སློབ་གསོའི་རྩ་འཛིན་རྣམས་དང་འགལ་གྱི་ཡོད་པ་རེད། ཞི་བདེ་དང་སྤྲོ་སྣང་བྲལ་བའི་སློབ་གསོའི་བྱེད་ཐབས་ལ་མཇུག་འབྲས་ངན་པ་ཡོད་སྲིད་པས་གཟབ་དགོས། དེ་ལྟར་ན། བུ་ཕྲུག་གིས་ཕ་མས་སྐུལ་བའི་ལས་དོན་མ་འགྲུབ་དང་། ནོར་འཁྲུལ་ཤོར་བ་སོགས་ཀྱི་སྐབས་སུ། ཕ་མས་རང་གི་སེམས་ཁམས་ལ་སྙོམ་སྒྲིག་བྱེད་དགོས་པ་ལས། ཁོང་ཁྲོའི་བཙན་འཛུལ་འོག་ཏུ་བུ་ཕྲུག་ལ་གཅར་རྡུང་རྩ་བ་ནས་བྱེད་མི་ཉན། གལ་སྲིད་ཕ་མས་བུ་ཕྲུག་ལ་གཅར་རྡུང་བྱས་ཏེ་སེམས་ཁམས་སུ་ན་ཚ་བཟོས་པ་ཡིན་ན། དེའི་མཇུག་འབྲས་ངན་པ་དེ་ཕ་མ་དང་བུ་ཕྲུག་ཐུན་མོང་གིས་མྱོང་དགོས། ཡང་བྱམས་བརྩེའི་ནུས་སྟོབས་ཀྱི་དཔེ་ཆའི་ཤོག་ངོས་༤༩ ནང་དུ་ཉོན་མོངས་ཟེར་བ་འདི་སེམས་རྒྱུད་མ་ཞི་བ་བཟོ་མཁན་ཞིག་ཏུ་བསྟན་ཡོད། ང་ཚོར་སེམས་མ་སྐྱིད་པ་དང་ཟོས་མ་བདེ་ཡོང་བ་འདི་གཙོ་བོ་ཉོན་མོངས་དང་། ཚུལ་མིན་ཡིད་བྱེད་ཀྱི་དབང་གིས་ཡོང་གི་ཡོད་ཅེས་གསུངས་ཡོད། དེ་ལྟར་ན་ང་ཚོ་བུ་ཕྲུག་གི་ཕ་མ་རུ་མ་གྱུར་བའི་སྔ་རོལ་ནས་ལམ་རིམ་བློ་སྦྱོང་དང་དེང་རབས་སེམས་ཁམས་རིག་པའི་སྐོར་ལ་བག་ཆགས་ཅུང་ཟད་རེ་བཞག་ཏེ་ཞེ་སྡང་དང་ཁོང་ཁྲོའི་སྐོར་ལ་ངོས་འཛིན་གསལ་བོ་ཞིག་བྱེད་ཐུབ་ན་བཟང་བ་དང་། གལ་སྲིད་བུ་ཕྲུག་ལ་གཅར་རྡུང་བྱས་ན་རང་སེམས་ཀྱི་ན་ཟུག་རེ་ཞིག་འཇོམས་སྲིད་ཀྱང་། དེ་ནི་མནར་གཅོད་གཏོང་སྟངས་ཤིག་ཡིན་པ་ཤེས་དགོས། ཡང་སྐྱེས་ཆེན་ལྷ་མོ་དོན་གྲུབ་ཚང་གིས་མཛད་པའི་བྱམས་བརྩེའི་ནུས་སྟོབས་ཀྱི་དཔེ་ཆའི་ཤོས་ངོས་༥༡ ནང་དུ་སྤྱིར་བཏང་ཁོང་ཁྲོས་གནོད་སེམས་འདྲེན་གྱི་ཡོད་པ་དང་། གནོད་སེམས་ལ་བཟང་བོའི་ཆ་ཅུང་ཟད་ཀྱང་མེད་ཅེས་གསུངས་ཡོད་དོ།།
བོད་ཀྱི་ན་གཞོན་རྩོམ་པ་པོ་གྲགས་ཅན་སྐུ་ཞབས་ཞོགས་ལྗང་ལགས་ཀྱིས་ཉེ་ཆར་བྲིས་པའི་རྩོམ་ཡིག་ཁ་བྱང་ལ་གཅར་རྡུང་སློབ་གསོ་དང་འབྲེལ་བའི་སྐད་ཆ་འགའ་ཞེས་པ་དེའི་ནང་དུ་གཅར་རྡུང་གི་ངོ་བོ་གདུག་རྩུབ་ཡིན། གདུག་རྩུབ་ཀྱིས་བསྐྱེད་པའི་མིའི་རིགས་ཀྱི་གྱོང་གུད་ལ་ཚད་མེད་ཅེས་གསུངས་འདུག་པ་ལྟར། གལ་སྲིད་ཞེ་སྡང་དང་ཁོང་ཁྲོའི་གཞན་དབང་དུ་གྱུར་བའི་ཕ་མ་ཞིག་གིས་རང་ཉིད་ཀྱི་བུ་ཕྲུག་ལ་འཆར་ཅན་དུ་གཅར་རྡུང་བཏང་བ་ཡིན་ན། དེའི་མཇུག་འབྲས་ནི་རང་གི་མི་རབས་ཚ་རྒྱུད་ཀྱིས་ཉམས་སུ་མྱོང་དགོས་པ་ཞིག་ཡིན། ཕྱི་རྒྱལ་གྱི་སེམས་ཁམས་རིག་པ་བ་ཚོས་དེ་རིང་གི་མནར་གཅོད་མྱོང་མཁན་གྱི་བྱིས་པ་དེ། སང་ཉིན་གྱི་མནར་གཅོད་གཏོང་མཁན་གྱི་ཕ་མ་རུ་འགྱུར་འགྲོ་ཞེས་ལབ་ཀྱི་ཡོད་པ་རེད། གལ་སྲིད་ཕ་མས་བུ་ཕྲུག་ལ་འཇིགས་སྐུལ་དང་དྲག་སྤྱོད་བཀོལ་རྒྱུ་མང་དྲགས་ན་བུ་ཕྲུག་གི་རང་གཤིས་བརླགས་ཏེ་གནས་ལུགས་དང་རྒྱུ་མཚན་ལ་བསམ་བློ་གཏོང་མི་ཐུབ་པའི་གཤིས་སྤྱོད་རྩུབ་པོ་ཅན་ཞིག་ཏུ་འགྱུར་འགྲོ་བ་ཡིན། དེས་ན་རང་གི་བུ་རབས་ཚ་རྒྱུད་ཀྱིས་གཅར་རྡུང་གིས་བསྐྱེད་པའི་སྡུག་བསྔལ་མྱོང་ན་མི་འདོད་ན། བུ་ཕྲུག་ལ་གཅར་རྡུང་བྱེད་མཚམས་འཇོག་དགོས། གལ་སྲིད་ཕ་མས་བུ་ཕྲུག་ལ་སྡུག་དམོད་བྱེད་ཞོར་དུ་ལས་བྱ་འབྲི་རུ་བཅུག་ན། བུ་ཕྲུག་གི་དྲན་པ་རབ་རུབ་ཏུ་འགྱུར་བ་དང་རིག་པ་ཇེ་རྟུལ་དུ་འགྲོ་བར་བཤད། གལ་སྲིད་ཕ་མས་དྲག་སྤྱོད་ཀྱི་ལམ་ནས་བུ་ཕྲུག་ལ་གནོན་བཙུར་བྱེད་རྒྱུ་མང་དྲགས་ན། བུ་ཕྲུག་གི་རང་མཐོང་དང་སྤོབས་པ། རང་བཀུར་གྱི་འདུ་ཤེས་སོགས་བརླག་སྟེ་མི་ཚེ་གང་བོར་ཞེད་སྣང་དང་མཚེར་སྣང། དོགས་སྣང་ཁྲོད་དུ་གནས་དགོས་ཡོད་པ་རེད། རང་གཤིས་དྲང་མོ་ཅན་གྱི་བྱིས་པ་ཚོས་རྫུན་བཤད་པ་དང་རྐུ་བྱེད་པ་ནི་ཕ་མར་འཇིགས་ཤིང་སྐྲག་པས་ཡིན་པར་བཤད། གལ་སྲིད་བུ་ཕྲུག་གིས་སྐད་ཆ་དྲང་མོ་བཤད་པའི་སྐབས་སུ་ཕ་མས་ཁོང་ཁྲོ་ཟོས་ཏེ་གཅར་རྡུང་བྱས་པ་ཡིན་ན། དེ་ནས་བཟུང་བུ་ཕྲུག་གིས་སྐད་ཆ་དྲང་བཤད་བྱེད་མི་ཕོད་པར་རྫུན་བཤད་སྲིད་པ་ཡིན། མདོར་དེད་ན་བུ་ཕྲུག་ལ་གཅར་རྡུང་བྱས་ན། བུ་ཕྲུག་གི་རང་མཐོང་དང་རང་རྩིས། རང་བཀུར་གྱི་འདུ་ཤེས་སོགས་ལ་གནོད་པར་བཤད། ལུས་ལ་གཅར་ན་སེམས་ལ་ན་ཟུག་བསྐྱེད་ཟེར་བ་ལྟར། ཕ་མས་བུ་ཕྲུག་ལ་གཅར་རྡུང་བྱས་ན། བུ་ཕྲུག་གི་སེམས་ཁམས་འཁྲུགས་ཏེ་སེམས་ཀྱི་རང་བཞིན་གཙང་མ་དེ་རྒྱུན་གནས་བྱེད་མི་ཐུབ་པར། མ་འོངས་པར་ཁྱིམ་ཚང་གི་འཆམ་མཐུན་དང་སྤྱི་ཚོགས་ཀྱི་བདེ་འཇགས་དཀྲུག་མཁན་གྱི་མི་ཞིག་ཏུ་འགྱུར་སྲིད་པ་ཡིན་པས་གཟབ་དགོས། དེར་བརྟེན་གཅར་རྡུང་གི་བྱེད་ཐབས་སྤྱད་དེ་བུ་ཕྲུག་གི་སྤྱོད་པ་བཅོས་ཐབས་བྱེད་པ་དེ་ནི་སྐབས་ཐོག་གི་ན་ཟུག་འཇོམས་བྱེད་ཀྱི་གཟེར་སྨན་ལྟ་བུ་ཞིག་ལས་ཕུགས་སུ་བུ་ཕྲུག་ནུས་མེད་ཉམ་ཆུང་། བྲན་གཤིས་ཅན་ཞིག་ཏུ་བསྒྱུར་སྲིད་པས་ཕ་མ་ཚོས་གཟབ་དགོས་པར་སེམས་སོ།།
མདོར་བསྡུས་ན་ལོ་བཞི་དང་ཕྱེད་ཀྱི་རིང་ལ་རིགས་གཅིག་རྐང་འཛིན་གྱིས་བྱིས་སྐྱོང་སློབ་གསོའི་སྐོར་ལ་བོད་པའི་ཕ་མ་སྟོང་ཕྲག་ལྷག་དང་ལྷན་དུ་གླེང་སློང་བྱས་པའི་ཉམས་མྱོང་ལྟར་ན། བྱིས་སྐྱོང་སློབ་གསོའི་གཞུང་ལུགས་འདྲ་མིན་ལ་སློབ་སྦྱོང་བྱེད་མྱོང་མཁན་དང་། བྱིས་པ་གསོ་སྐྱོང་གི་བྱ་བཞག་ལ་དགའ་བའི་ཕ་མ་ཉམས་མྱོང་ཅན་རྣམས་ཀྱི་ཁྲོད་དུ་བུ་ཕྲུག་ལ་གཅར་རྡུང་བྱས་ན་ཡག་པོ་རེད་འདོད་མཁན་གཅིག་ཀྱང་མི་འདུག ལྷག་པར་དུ་བྱིས་པའི་སེམས་ཁམས་རིག་པའི་སྐོར་ལ་ཤེས་རྟོགས་ཟབ་པའི་བོད་ཀྱི་ན་གཞོན་རྩོམ་པ་པོ་གསོན་པོ་ལགས་ཀྱིས་སློབ་གསོའི་ལྡེ་མིག་ཅེས་པའི་དཔེ་ཆ་ཞིག་བྲིས་ཏེ་གཅར་རྡུང་ནི་སློབ་གསོའི་ཐབས་ལམ་ཞིག་མ་ཡིན་པ་ལུང་དང་རིག་པ། ཉམས་མྱོང་གསུམ་གྱི་སྒོ་ནས་དགག་སྒྲུབ་གནང་ཡོད་པ་རེད། དེ་དང་ལྷན་དུ་བྱིས་སྒྲུང་གླིང་གི་རྐང་འཛིན་དགེ་རྒན་རྣམས་ཀྱི་གཙོས་པའི་ཕ་མ་མང་བོས་བུ་ཕྲུག་ལ་གཅར་རྡུང་བྱེད་མཚམས་བཞག་སྟེ། བྱམས་བརྩེ་དང་ཞི་བའི་ཐབས་ལམ་སྣ་ཚོགས་ཀྱི་སྒོ་ནས་བུ་ཕྲུག་གསོ་སྐྱོང་གི་ལས་དོན་འབྲས་བུ་གཡུར་དུ་ཟ་བ་བླངས་དང་ལེན་བཞིན་པ་ལགས་སོ།།
