རྒྱལ་སྤྱིའི་སའི་གོ་ལ་ཉིན་མོ་དང་བསྟུན་༧གོང་ས་རྒྱལ་བ་རིན་པོ་ཆེ་མཆོག་ནས་ང་ཚོས་མཉམ་རུབ་ཀྱིས་ལས་དོན་མ་སྒྲུབ་པར་ཐབས་ལམ་གཞན་རྙེད་དུ་མེད་ལ་མ་ཡུམ་གོ་ལ་འདིས་ཀྱང་གཅིག་གྱུར་གྱི་འདུ་ཤེས་སློབ་སྟོན་བྱེད་ཀྱི་ཡོད་སྐོར་གསུངས་འདུག
དེ་རིང་ཕྱི་ཚེས་ ༢༢ ཉིན་རྒྱལ་སྤྱིའི་སའི་གོ་ལ་ཉིན་མོ་དང་བསྟུན་༧གོང་ས་རྒྱལ་བ་རིན་པོ་ཆེ་མཆོག་ནས་འགྲོ་བ་ཐུན་མོང་གི་རྟེན་གཞིར་གྱུར་པའི་གོ་ལ་འདིའི་གདོང་ལེན་བྱེད་དགོས་པའི་དཀའ་ངལ་དང་། གོ་སྐབས་གཉིས་ཀར་དོ་སྣང་ཆེ་ཙམ་གནང་དགོས་པ་དང་། མཛེས་སྡུག་ལྡན་པའི་གོ་ལ་འདིར་བཟང་ཕྱོགས་ཀྱི་འགྱུར་བ་གཏོང་ཐབས་སུ་རང་རང་གི་འཁོས་བབ་དང་བསྟུན་ཏེ་འབད་བརྩོན་བྱ་རྒྱུའི་དམ་བཅའ་འཇོག་དགོས་སྐོར་གྱི་བཀའ་སློབ་ལམ་སྟོན་སྩལ་འདུག
འཛམ་གླིང་གི་དཀའ་ངལ་དག་གིས་འགྲོ་བ་མི་གཅིག་གྱུར་གྱི་འདུ་ཤེས་དགོས་པའི་སློབ་སྟོན་གནང་གི་ཡོད་སྐོར་ལ་༧གོང་ས་མཆོག་གིས། ཟླ་བ་དང་སྐར་མ་རྣམས་མཐོང་སྣང་ལ་མཛེས་ཀྱང་། དེ་དག་གི་སྟེང་འཚོ་ཐབས་བྱས་ན་དཀའ་ངལ་ཡོང་གི་རེད་ཅེས་ངོས་ཀྱིས་རྩེད་མཚར་དང་སྦྲགས་ཡང་ཡང་བཤད་ཡོད། སའི་གོ་ལ་འདི་ནི་ཡིད་དུ་འོང་བའི་རང་རེའི་རྟེན་གཞི་ཞིག་ཡིན་ལ། འདིའི་འཚོ་གནས་དང་འདིའི་མ་འོངས་པ་ང་ཚོའི་འཚོ་གནས་དང་ང་ཚོའི་མ་འོངས་པ་ཡིན། སའི་གོ་ལ་འདི་ནི་ཨ་མ་དང་འདྲ་སྟེ། བུ་ཕྲུག་རྣམས་ཨ་མ་ལ་བརྟེན་པ་དང་མཚུངས་པར་ང་ཚོའང་གོ་ལ་འདིར་བརྟེན་ཡོད། གོ་ལའི་ཚ་དྲོད་རྒྱས་བཞིན་པ་དང་། རང་བྱུང་བླ་བྲེ་ཉམས་རྒུད་དུ་སོང་སྟེ་འཛམ་གླིང་སྤྱི་ལ་དཀའ་ངལ་འཕྲད་པའི་དུས་སྐབས་འདིར་ཚོགས་སྒེར་བྱེ་བྲག་པ་དང་། རྒྱལ་ཁབ་རེ་ཟུང་ཞིག་གིས་ཕན་རླབས་ཐོན་དཀའ་བས། ང་ཚོས་མཉམ་རུབ་ཀྱིས་ལས་དོན་མ་སྒྲུབ་པར་ཐབས་ལམ་གཞན་རྙེད་དུ་མེད། མ་ཡུམ་གོ་ལ་འདིས་ཀྱང་གཅིག་གྱུར་གྱི་འདུ་ཤེས་སློབ་སྟོན་བྱེད་ཀྱི་ཡོད། ཅེས་གསུངས་འདུག
ཡང་ཁོར་ཡུག་སྲོང་སྐྱོབ་གལ་ཆེན་ཡིན་སྐོར་གྱི་ཐད། ཆུའི་དཀའ་ངལ་ལྟ་བུ་ལ་མཚོན་ན། སྔར་དང་མི་འདྲ་བར་འཛམ་གླིང་གི་ས་ཕྱོགས་གང་སར་མི་མང་སྤྱི་དང་། ལྷག་པར་མ་དང་བྱིས་པ་རྣམས་ལ་ཆུས་མི་ལྡང་བ་སོགས་ཀྱིས་འཕྲོད་བསྟེན་ལ་དཀའ་ངལ་ཆེ་བ་དང་། དཀའ་ངལ་འདི་དག་ལྡོག་ཐབས་ཡོད་པ་ཞིག་ཡིན་ཡང་། འཛམ་གླིང་སྤྱིའི་མི་འབོར་ཐེར་འབུམ་གཉིས་ཙམ་ལ་གཞི་རྩའི་མཐུན་རྐྱེན་ལྡང་ངེས་མེད་པའི་དཀའ་ངལ་འདི་རིགས་འཕྲད་བཞིན་པ་ནི་སེམས་འཚབ་སྐྱེ་གཞི་ཞིག་ཡིན། མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེས་རྒྱལ་སྤྱིའི་ཁྱོན་ཡོངས་ནས་ཁོར་ཡུག་སྲུང་སྐྱོབ་ཀྱི་ལས་འགུལ་ཛ་དྲག་ངང་སྤེལ་དགོས་པའི་སྐུལ་མ་གནང་བ་ལ་ཡི་རངས་ཡོད། ཅེས་དང་། གལ་ཏེ་གོ་ལ་འདི་མུ་མཐུད་དེ་གནས་དགོས་ན། ཁོར་ཡུག་གི་ཤེས་བྱ་དང་། དོ་བདག་རང་ཉིད་ལ་འཁྲི་བའི་ལས་འགན་གྱི་ཤེས་རྟོགས་གང་མཐོར་གཏོང་དགོས་ལ། ཁོར་ཡུག་སྲུང་སྐྱོབ་བྱེད་རྒྱུ་དེ་ཉིན་རེའི་བྱ་གཞག་གི་ཆ་ཤས་གལ་ཆེན་ཞིག་ཏུ་འགྱུར་བར་བྱ་དགོས། ཞེས་ལམ་སྟོན་གནང་འདུག
དེ་བཞིན་སའི་གོ་ལ་ཉིན་མོ་དང་བསྟུན་ཨ་རིའི་སྲིད་འཛིན་བྷེལ་ཌན་མཆོགགི་གོ་སྒྲིག་འོག་འཛམ་གླིང་གི་དབུ་ཁྲིད་རྣམ་པས་ཁོར་ཡུག་གི་དཀའ་ངལ་ཐད་བགྲོ་གླེང་གནང་གི་ཡོད་པ་ལ་བསྔགས་བརྗོད་དང་། གཅིག་ལ་གཅིག་རྟེན་ནི་དངོས་པོའི་ཆོས་ཉིད་ཡིན་ལ། ཆོས་ཉིད་འདི་མ་རྟོགས་པའི་དབང་གིས་རང་བྱུང་ཁོར་ཡུག་ཙམ་དུ་མ་ཟད། འགྲོ་བ་མིའི་སྤྱི་ཚོགས་ལའང་གནོད་སྐྱོན་ཆེན་པོ་བཏང་ཡོད་པས། རང་རེ་འགྲོ་བ་མིས་ངེས་པར་དུ་གཅིག་གྱུར་གྱི་འདུ་ཤེས་སྤེལ་དགོས་པ་དང་། རང་གཞན་ཚང་མས་རང་ཉིད་གཅིག་པུ་དང་། ཁྱིམ་ཚང་། རྒྱལ་ཁབ་བྱེ་བྲག་པ་ལྟ་བུ་ཕྱོགས་རེ་བའི་དོན་ཙམ་མ་ཡིན་པར་འགྲོ་བ་མི་སྤྱིའི་བདེ་དོན་ལ་བསམ་བློ་གཏོང་དགོས་སྐོར་གྱི་ལམ་སྟོན་གནང་འདུག
གསར་འགོད་པ། ཀླུ་མགོན་ཐར།
