ནེའུ་ཛི་ལན་ཌི་གཞུང་ནས་རྒྱ་ནག་ཐད་ལངས་ཕྱོགས་བརྟན་པོ་ཡིན་པའི་རྣམ་འགྱུར་བསྟན།

ནེའུ་ཛི་ལན་ཌིའི་སྲིད་བློན་ལཅམ་ཇཱེ་སིན་ཌ་ཨཱར་དི་རཱེན་ལགས་ཀྱིས་རྒྱ་ནག་དང་ནེའུ་ཛི་ལན་ཌི་དབར་གྱི་འགལ་ཟླ་རྣམས་འདུམ་འགྲིག་བྱེད་ཐབས་ཁག་པོ་ཆགས་ཡིན་ལ་རྒྱ་ནག་གིས་འགན་འཁུར་སྤང་བླངས་ཚུལ་བཞིན་བྱ་དགོས་སྐོར་བརྗོད་ཡོད་འདུག

དེ་རིང་དབྱིན་ཡུལ་དུ་ཡོད་པའི་གྷར་ཌིན་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་ལམ་སྲིད་བློན་ལྕམ་ལྕམ་ཇཱེ་སིན་ཌ་ཨཱར་དི་རཱེན་ (Jacinda Ardern) ལགས་ཀྱིས་སྣེ་ཁྲིད་པའི་ནེའུ་ཛི་ལན་ཌི་གཞུང་གིས། ཚོང་འབྲེལ་ཁེ་ཕན་ལ་དམིགས་ཏེ་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གླེང་སློང་བྱེད་ཀྱི་མེད་པ་དང་། རང་གི་མནའ་འབྲེལ་རྒྱལ་ཁབ་ཀྱི་ལྡོག་ཕྱོགས་སུ་ལངས་ནས་རྒྱ་ནག་དང་ཚོང་འབྲེལ་ཤུགས་ཆེར་བྱེད་བཞིན་པ་དེར་རྒྱལ་ཁབ་ཕྱི་ནང་གཉིས་ནས་སྐྱོན་བརྗོད་ཆེན་པོ་བྱེད་བཞིན་པའི་སྐབས་འདིར། སྲིད་བློན་ཇཱེ་སིན་ཌ་ཨཱར་དི་རཱེན་ལགས་ཀྱིས། རྒྱ་ནག་གི་ཚོང་དོན་ཚོགས་འདུ་ཞིག་གི་སྟེང་། རྒྱ་ནག་དང་ནེའུ་ཛི་ལན་ཌིའི་བར་ལ་གནད་དོན་འགའ་ཤས་ཀྱི་སྟེང་མོས་མཐུན་ཡོང་ཐབས་མེད་པ་དང་། ནེའུ་ཛི་ལན་ཌིའི་ངོས་ནས་ཡོངས་ཁྱབ་ཀྱི་ཐོག་ནས་ཡུ་གུར་མི་རིགས་རྣམས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཐད་བློ་འཚབ་ཡོད་སྐོར་སོགས་ཀྱི་གཏམ་བཤད་སྤེལ་གནང་ཡོད་འདུག

གཏམ་བཤད་སྐབས་ཁོང་མོས། རྒྱ་ནག་དང་ནེའུ་ཛི་ལན་ཌི་དབར་གྱི་འགལ་ཟླ་རྣམས་འདུམ་འགྲིག་བྱེད་ཐབས་ཁག་པོ་ཆགས་ཡིན་པ་དང་། རྒྱ་ནག་ངོས་ནས་རང་ཉིད་འཛམ་གླིང་གི་སྟོབས་ཤུགས་ཅན་གྱི་རྒྱལ་ཁབ་ཅིག་ཡིན་པའི་ཆ་ནས་འགན་འཁུར་སྤང་བླངས་ཚུལ་བཞིན་བྱ་དགོས་སྐོར་སོགས་བརྗོད་འདུག་ཀྱང་། ཕྱོགས་གཉིས་ཀྱི་འབྲེལ་ལམ་དེ་འགལ་ཟླའི་ཆ་ཁོ་ན་ལ་རག་ལས་ཀྱི་མེད་པར་བརྟེན། འགལ་ཟླ་དེ་དག་གིས་ཕན་ཚུན་གྱི་འབྲེལ་ལམ་ཉམས་རྒུད་དུ་གཏོང་དགོས་དོན་མེད་པར། རྒྱ་ནག་དང་ནེའུ་ཛི་ལན་ཌི་ལ་རྒྱལ་སྤྱིའི་ཚོང་དོན་དང་། གོ་ལའི་གནམ་གཤིས་འགྱུར་ལྡོག ཏོག་དབྱིབས་གཉན་རིམས་ལ་འགོག་རྒོལ་བཅས་ཀྱི་ཐོག་ལ་མཉམ་ལས་བྱ་རྒྱུའི་གོ་སྐབས་ཡོད་སྐོར་བརྗོད་ཡོད་འདུག

ཨ་རི་དང་། ཁེ་ན་ཌ། དབྱིན་ཡུལ། ཨོ་གླིང་། ནེའུ་ཛི་ལན་ཌི་བཅས་ལས་གྲུབ་པའི་མིག་ལྔའི་མནའ་འབྲེལ་རྒྱལ་ཚོགས་ (Five Eyes)ཀྱིས། རྒྱ་ནག་གིས་དམག་དོན་ལས་འགུལ་དང་ལྷོ་རྒྱ་ནག་རྒྱ་མཚོའི་ཁུལ་དུ་བཙན་བཀོལ་རྒྱ་སྐྱེད་ལས་འགུལ་བཅས་ལ་དོ་ནན་གྱིས་རྟོག་ཞིབ་བྱེད་ཤུགས་ཆེ་རུ་བཏང་ཡོད་པ་མ་ཟད། མནའ་འབྲེལ་ཚོགས་པ་དེ་ཉིད་འབྱུང་འགྱུར་རྒྱ་ནག་ལ་ཁ་གཏད་གཅོག་པའི་སྟོབས་ཤུགས་གལ་གནད་ཅན་ཞིག་ལ་ངོས་འཛིན་གྱིས་ཕན་ཚུན་བར་གྱི་མཉམ་ལས་ཤུགས་ཆེ་རུ་བཏང་ཡོད་ལ། འདས་ལོར་རྒྱ་ནག་གིས་ཧོང་ཀོང་ནང་རྒྱལ་ཁབ་བདེ་འཇགས་ཁྲིམས་ཡིག་གསར་པ་གཏན་འབེབ་ལག་བསྟར་བྱས་པ་དེར་ཡོངས་ཁྱབ་ཀྱི་ཐོག་ནས་མཉམ་འབྲེལ་གྱི་བསྒྲགས་གཏམ་ཞིག་ཀྱང་སྤེལ་ཡོད།

འོན་ཀྱང་ཉེ་བའི་ཆར་ནེའུ་ཛི་ལན་ཌིའི་སྲིད་བློན་དང་ཕྱི་སྲིད་བློན་ཆེན་གྱི་གཏམ་བཤད་སོགས་ཀྱི་ཐོག་ནས་ནེའུ་ཛི་ལན་ཌི་འདི་རང་གི་མནའ་འབྲེལ་ཚོགས་པ་དང་རྒྱང་ཐག་ཇེ་རིང་དང་། རང་གི་ཚོང་འབྲེལ་རྒྱལ་ཁབ་ཆེ་ཤོས་རྒྱ་ནག་དང་ཇེ་ཉེར་འགྲོ་བཞིན་པའི་རྣམ་པ་ཤུགས་ཆེར་མངོན་ཡོད། དེ་ཡང་འདི་ལོའི་ཕྱི་ཟླ་ ༤ ནང་། ཨ་རི་གཙོས་པའི་མིག་ལྔའི་མནའ་འབྲེལ་རྒྱལ་ཁབ་རྣམས་ཀྱིས་རྒྱ་ནག་གི་ཞི་བདེ་རྒྱ་མཚོའི་ཁུལ་དུ་སྟོབས་ཤུགས་རྒྱ་སྐྱེད་བྱེད་བཞིན་པར་ཐུན་མོང་གི་འགོག་རྒོལ་སྲིད་ཇུས་ཤིག་འདིང་རྒྱུའི་གླེང་སློང་འབྱུང་བཞིན་པའི་སྐབས་དེར། ནེའུ་ཛི་ལན་ཌིའི་ཕྱི་སྲིད་བློན་ཆེན་ན་ན་ཧེ་མ་ཧུ་ཏ་(Nanaia Mahuta) ཡིས། མིག་ལྔའི་མནའ་འབྲེལ་རྒྱལ་ཚོགས་དེ་གསང་བའི་ལས་དོན་ཐད་ཀྱི་ཚོགས་པ་ཞིག་ཡིན་སྟབས། ང་ཚོར་དེ་ལས་བརྒལ་བའི་ལས་དོན་ནང་ཞུགས་རྒྱུའི་འདོད་པ་མེད་ལ། ནེའུ་ཛི་ལན་ཌིའི་ངོས་ནས་རྒྱ་ནག་ཐོག་སྲིད་ཇུས་ག་རེ་གཟུང་དགོས་མིན་དེ་ནེའུ་ཛི་ལན་ཌི་རང་གིས་ཐག་གཅོད་བྱ་རྒྱུ་ཡིན་སྐོར་བརྗོད་ཡོད་ལ། འདས་ལོའི་མནའ་འབྲེལ་རྒྱལ་ཁབ་ཚོས་རྒྱ་ནག་ལ་སྐྱོན་བརྗོད་ཀྱི་བསྒྲགས་གཏམ་དེར་ཡང་མིང་རྟགས་འགོད་རྒྱུར་འདོད་པ་མེད་པའི་རྣམ་འགྱུར་བསྟན་ཡོད་པ་རེད།

རྒྱ་ནག་ནི་ནེའུ་ཛི་ལན་ཌིའི་ཚོང་འབྲེལ་ཆེ་ཤོས་ཀྱི་རྒྱལ་ཁབ་ཅིག་ཡིན་ཞིང་། འདས་ལོའི་ཕྱི་ཟླ་ ༡༡ ནས་བཟུང་ནེའུ་ཛི་ལན་ཌིས་རྒྱ་ནག་ལ་ཕྱིར་འདྲེན་བྱས་པའི་ཚོང་འབྲེལ་རིན་འབབ་དེ། ནེའུ་ཛི་ལན་ཌིས་ཨོ་གླིང་དང་། ཨ་རི། དབྱིན་ཡུལ། ཉི་ཧོང་བཅས་ལ་ཕྱིར་འདྲེན་བྱས་པའི་ཕྱོགས་བསྡོམས་རིན་འབབ་ལས་ཀྱང་མཐོ་བ་ཆགས་ཡོད་པ་མ་ཟད། ཕྱི་ལོ་ ༢༠༡༧ ནས་བཟུང་རྒྱ་ནག་དེ་ནེའུ་ཛི་ལན་ཌིའི་ཚོང་འབྲེལ་ཆེ་ཤོས་ཀྱི་རྒྱལ་ཁབ་ཅིག་ཡིན་ལ། ད་ལྟའི་ཆར་ནེའུ་ཛི་ལན་ཌིའི་ནང་འདྲེན་གྱི་བརྒྱ་ཆ་ ༢༩ རྒྱ་ནག་ནས་འབྱུང་གི་ཡོད་པ་རེད། ཉེ་ཆར་ནེའུ་ཛི་ལན་ཌི་དང་རྒྱ་ནག་དབར་གྱི་ཚོང་འབྲེལ་གྲོས་ཆོད་དེ་ཉིད་བསྐྱར་སྣོན་བྱས་ཏེ། ནང་འདྲེན་གྱི་ཐོག་ནས་ནེའུ་ཛི་ལན་ཌི་ལ་རྒྱ་ནག་གི་ཕྱོགས་ནས་ཁེ་ཕན་ཆེན་པོ་ཐོབ་ཡོད་པ་རེད།

ཡང་ཕྱོགས་གཅིག་ནས་མིག་ལྔའི་མནའ་འབྲེལ་ཚོགས་པའི་ཚོགས་ཁོང་ཨོ་གླིང་རྒྱལ་ཁབ་ཀྱིས་འདས་པའི་ལོ་གཅིག་ནང་། ཧོང་ཀོང་གི་གནད་དོན་དང་། ཏོག་དབྱིབས་གཉན་རིམས། ཤར་ཊུར་ཀི་སི་ཐན་གྱི་ཡུ་གུར་མི་རིགས་ཀྱི་གནད་དོན་སོགས་ཀྱི་ཐོག་ནས་རྒྱ་ནག་ལ་ཡོངས་ཁྱབ་ཀྱི་ཐོག་ནས་སྐྱོན་བརྗོད་དང་འགོག་རྒོལ་ཤུགས་ཆེར་བྱས་རྐྱེན། རྒྱ་ནག་གིས་ཨོ་གླིང་གི་ཆང་གིས་མཚོན་པའི་ཚོང་ཟོག་ཁག་བཀག་སྡོམ་བྱས་ཡོད་ལ། ནང་འདྲེན་བྱས་པའི་ཚོང་ཟོག་ལ་རྒྱལ་ཁྲལ་སྤར་བ་སོགས་དང་། དེ་བཞིན་རྒྱའི་མི་སེར་རྣམས་ཨོ་གླིང་དུ་མི་བསྐྱོད་རྒྱུའི་གཞུང་འབྲེལ་ལམ་སྟོན་བྱས་པ་སོགས་དཔལ་འབྱོར་སྟོབས་ཤུགས་སྤྱད་དེ་ཨོ་གླིང་ལ་འཁོན་ལན་བསློགས་ཏེ། འདས་ལོར་གཅིག་པུར་ཨོ་གླིང་ལ་ཨོ་སྒོར་ཐེར་འབུམ་ ༤༧།༧ གྱི་གྱོད་གུད་ཕོག་ཡོད་པའི་གནས་ཚུལ་ཐོན་ཡོད་པ་རེད། རྒྱ་ནག་དང་ཨོ་གླིང་དབར་གྱི་འབྲེལ་ལམ་ཛ་དྲག་ཏུ་འགྱུར་བཞིན་པའི་དུས་སྐབས་ཏེ། འདི་ལོའི་ཕྱི་ཟླ་ ༡ ནང་ནེའུ་ཛི་ལན་ཌིའི་ཚོང་འབྲེལ་བློན་ཆེན་ཌེ་མིན་ཨོ་ཁོ་ནོར་ (Damien O’Connor) གྱིས་ཨོ་གླིང་གི་ངོས་ནས་རྒྱ་ནག་དང་འབྲེལ་བ་འཇོག་སྟངས་ཐད་ནེའུ་ཛི་ལན་ཌིར་དཔེ་བལྟ་དགོས་པ་དང་། རྒྱ་ནག་ལ་བརྩི་བཀུར་བྱ་དགོས་སྐོར་སོགས་བརྗོད་ཡོད་པ་རེད།

དབྱེ་ཞིབ་པས་ནེའུ་ཛི་ལན་ཌི་གཞུང་གིས་བྱེད་སྟངས་དེས། རང་དབང་གིས་མཚོན་པའི་དམངས་གཙོའི་རིན་ཐང་ལས་ཚོང་ཁེ་གཉིས་ལས་ཕྱི་མ་དེ་གཙིགས་ཆེར་འཛིན་བཞིན་པ་མཚོན་གྱི་ཡོད་སྐོར་རྗོད་ཀྱིན་འདུག་ལ། ནེའུ་ཛི་ལན་ཌི་དང་རྒྱ་ནག་དབར་གྱི་ཚོད་འབྲེལ་གྲོས་ཆོད་དེ་བཞག་རྗེས། རྒྱ་ནག་གི་གཞུང་འབྲེལ་གོ་ལའི་དུས་བབ་ཀྱིས། ཨོ་གླིང་དང་ནེའུ་ཛི་ལན་ཌི་གཉིས་ཀྱི་རྒྱ་ནག་ལ་ལྟ་ཕྱོགས་དེ་མེ་དང་འཁྱག་པའི་དཔེ་ལ་སྦྱར་ཏེ། ཨོ་གླིང་གིས་རྒྱ་ནག་ལ་གྲང་དམག་སྐབས་ཀྱི་ལྟ་ཕྱོགས་འཛིན་གྱི་ཡོད་པ་དང་། དེ་དང་བསྡུར་ན་ནེའུ་ཛི་ལན་ཌི་ཡིས་རྒྱ་ནག་གི་ཡར་རྒྱས་ལ་དགའ་བསུ་དང་གུ་ཡངས་བྱེད་ཀྱི་ཡོད་སྐོར་བཤད་ཡོད་འདུག

ནེའུ་ཛི་ལན་ཌིའི་ཨེག་ཊི་སྲིད་དོན་ཚོགས་པས་ (Act Party) ཡུལ་དེའི་གྲོས་ཚོགས་ནང་རྒྱ་ནག་གིས་ཤར་ཊུར་ཀི་སི་ཐན་ནང་མི་རིགས་རྩ་མེད་གཏོང་བཞིན་པའི་གནས་སྟངས་ལ་བགྲོ་གླེང་བྱ་རྒྱུའི་གྲོས་ཆོད་ཅིག་བཏོན་ཡོད་ནའང་། གྲོས་ཆོད་དེ་གྲོས་ཚོགས་ནང་ཚུད་པར་གཞུང་འཛིན་ངལ་རྩོལ་ཚོགས་པའི་རྒྱབ་སྐྱོར་དགོས་ཀྱི་ཡོད་སྟབས། ད་ལྟའི་ཆར་ངལ་རྩོལ་ཚོགས་པ་ནང་ཁུལ་དུ་བགྲོ་གླེང་བྱེད་མུས་ཡིན་འདུག འདས་པའི་ཟླ་ཤས་ནང་ཨ་རི་དང་། ཁེ་ན་ཌ། དབྱིན་ཡུལ་བཅས་ཀྱི་གྲོས་ཚོགས་ནང་རྒྱ་ནག་གིས་ཤར་ཊུར་ཀི་སི་ཐན་ཁུལ་དུ་ཡུ་གུར་གཙོས་པའི་ཁ་ཆེ་གྲངས་ཉུང་མི་རིགས་རྣམས་རྩ་མེད་གཏོང་བཞིན་པའི་གྲོས་ཆོད་བཞག་ཟིན་པ་མ་ཟད། རྒྱ་ནག་གི་དཔོན་རིགས་ཚོར་དཔལ་འབྱོར་གྱི་ཉེས་ཆད་ཀྱང་བཅད་ཡོད་པ་རེད།

གསར་འགོད་པ། པ་སངས་ཚེ་རིང་།