དྷ་རམ་ས་ལ་ནས་སྲོག་རླུང་(Oxygen) དགོས་མཁན་ཚོར་རིན་མེད་ངང་སྤྲོད་ཀྱི་འདུག

སྤྱི་འཐུས་ཟླ་བ་ཚེ་རིང་ལགས་ནས་དྷ་ས་ཁུལ་གྱི་ཁྱིམ་སྡོད་ཏོག་དབྱིབས་ནད་པ་རྣམས་ལ་སྲོག་རླུང་རིན་མེད་ངང་གནང་གི་འདུག

དྷ་རམ་ས་ལ་ཁུལ་དུ་བོད་མི་དང་རྒྱ་གར་བ་ཏོག་དབྱིབས་ནད་པ་ཧ་ཅང་ཇེ་མང་དུ་འགྲོ་བཞིན་ཡོད་པ་དང་། སྨན་ཁང་དུ་སྲོག་རླུང་དང་ཉལ་ཁྲི་རག་དཀའ་བ་སོགས་ཀྱི་རྐྱེན་གྱིས། ནད་པ་མང་པོ་ཞིག་སྨན་ཁང་དུ་མ་སོང་བར་རང་ཁྱིམ་དུ་སྡོད་དགོས་ཆགས་ཀྱི་ཡོད་འདུག

དྷ་རམ་ས་ལ་ཁུལ་ནས་ནད་པ་ཚོར་སྲོག་རླུང་(Oxygen) རིན་མེད་ཐོག་གནང་གི་ཡོད་པའི་གསལ་བསྒྲགས་ཤིག་སྤེལ་བཞིན་ཡོད་པ་ལྟར། འདི་གའི་གསར་འགོད་པས་སྤྱི་འཐུས་ཟླ་བ་ཚེ་རིང་ལགས་སུ་སྲོག་རླུང་ (Oxygen)ག་འདྲ་གནང་གི་ཡོད་མེད་སོགས་ཀྱི་སྐོར་བཀའ་འདྲི་ཞུས་པར་ཁོང་གིས། ནད་པ་སྨན་ཁང་ནང་སྡོད་མཁན་རྣམས་མིན་པར་ནད་པ་མི་སྒེར་སོ་སོ་སྡོད་མཁན་ལ་རིན་མེད་ཐོག་སྲོག་རླུང་སྤྲོད་ཀྱི་ཡོད། དེ་བཞིན་མ་འོངས་པར་རྒྱ་གར་དང་བོད་པ་ནང་ལ་ཁེར་རྐྱང་སྡོད་མཁན་ཚོར་ཛ་དྲག་གི་སྲོག་རླུང་དགོས་མཁན་བྱུང་ན་སྤྲོད་ཀྱི་ཡིན། ཞེས་གསུངས་བྱུང་།

ད་བར་རིན་མེད་ཐོག་ནས་སྲོག་རླུང་ ༨ ཙམ་དགོན་པ་དང་མི་སྒེར་འགའ་ཤས་ལ་གཡར་ཟིན་འདུག་ལ། ཁོང་གིས། ད་ལྟ་ (Oxygen Cylinder) ༢༠ དང་ ༣༠ ལེན་གྱི་ཡོད། ནམ་རྒྱུན་ལས་ཀ་བྱེད་པའི་སྐབས་སུ་བེད་སྤྱོད་བཏང་གི་ཡོད་ཀྱང་། ད་ལྟ་མི་མང་ལ་ཛ་དྲག་གིས་དགོས་མཁན་དང་སྨན་པའི་ཁུངས་སྐྱེལ་ཡོད་མཁན་རྣམས་ལ་གཡར་གྱི་ཡོད། དེ་མིན་ཛ་དྲག་གི་ཆེད་དུ་ནང་ལ་ཉར་མཁན་ཚོར་གཡར་གྱི་མེད། མེག་གྷན་དུ་སྡོད་མཁན་རྒྱ་གར་ལའང་སྤྲོད་ཀྱི་ཡིན། ཞེས་གསུངས་བྱུང་ལ། སྐུ་ངོ་ཟླ་བ་ཚེ་རིང་ལགས་ཀྱི་ཞལ་པར་ཨང་གྲངས་ནི་9418185475རེད་འདུག

རྒྱ་གར་གཞུང་ནས་ཟླ་འདིའི་ཚེས་གཅིག་ནས་རང་ལོ་ ༡༨ ནས་ ༤༤་བར་ལ་ཏོག་དབྱིབས་འགོག་ཁབ་བརྒྱབ་རྒྱུའི་འཆར་གཞི་ཡོངས་བསྒྲགས་གནང་ཡོད་པ་ལྟར། འདི་གའི་གསར་འགོད་པས་ཞལ་པར་བརྒྱུད་བདེ་ལེགས་སྨན་ཁང་གི་སྨན་པ་བརྩོན་འགྲུས་ལགས་སུ། ཏོག་དབྱིབས་འགོག་ཁབ་དེ་རྒྱག་ཐུབ་ཀྱི་ཡོད་མེད་དྲིས་པར། ཁོང་གིས། ད་བར་དུ་རང་ལོ་ ༡༨ ནས་ ༤༤་བར་དུ་འགོག་ཁབ་གཅིག་ཀྱང་བརྒྱབ་ཐུབ་མེད་པ་དང་། དེའི་རྒྱུ་མཚན་ནི་འགོག་ཁབ་མ་རག་པའི་དཀའ་ངལ་འཕྲད་ཀྱི་ཡོད་སྐོར་བརྗོད་བྱུང་ལ། ཕྱི་ཟླ་ ༣ ཚེས་ ༢༥ ནས་ཕྱི་ཟླ་ ༤ ཚེས་ ༣༠ བར་དུ་ལོ་ ༤༤ ཡན་ལ་འགོག་ཁབ་བརྒྱབ་ཡོད་པ་རེད། ཅེས་བརྗོད་བྱུང་།

གསར་འགོད་པ། བསྟན་འཛིན་ཕུར་བུ།