དེ་རིང་ཕྱི་ཚེས་ ༥ ཉིན་༧གོང་ས་མཆོག་གིས་སྒོམ་ཉམས་ལེན་དང་རྣམ་ཤེས་སྐོར་ལ་བོད་པའི་དགོན་སྡེ་ཁག་ཏུ་ཞིབ་འཇུག་གནང་མཁན་ཨུ་རུ་སུའི་ཚན་རིག་པ་ཁག་ཅིག་དང་མཉམ་དུ། ཚན་རིག་གི་ཐབས་ལམ་ཐོག་སྒོམ་སྒྲུབ་ཉམས་ལེན་ལ་ཉམས་ཞིབ་བྱེད་སྟངས་ཞེས་པའི་བརྗོད་གཞིའི་ཐོག་བཀའ་བསྡུར་བགྲོ་གླེང་དང་། ཚོགས་ཞུགས་པའི་དྲི་བ་མང་པོར་བཀའ་ལན་གནང་སོང་།
ཚོགས་ཞུགས་པས་ཚན་རིག་གི་ལམ་ནས་ཐུགས་དམ་སྐོར་ཉམས་ཞིབ་གནང་ཕྱོགས་དང་། དེ་ཡིས་འགྲོ་བ་མི་ལ་ཕན་ཐོགས་ཅི་ཡོད་སྐོར་སོགས་བཀའ་འདྲི་ཞུས་པར་༧གོང་ས་མཆོག་གིས། ༧གོང་ས་མཆོག་གིས། མིའི་རྣ་དཔྱོད་ཀྱི་ཐོག་ནས་གནས་ཚུལ་ག་པར་ལའང་ཞིབ་འཇུག་བྱེད་མཁན་གྱི་ངོས་ནས་བཤད་ན། ཐུགས་དམ་གྱི་སྐོར་དེ་དངོས་སུ་མཐོང་གི་ཡོད་རེད་ལ། དེ་གང་འདྲ་བྱས་ནས་ཡོང་གི་ཡོད་པ་དེ་ཀླད་པའི་ཐོག་ནས་འགྲེལ་བཤད་རྒྱག་ཐུབ་རྒྱུ་ཁག་པོ་རེད། སྤྱིར་ནང་པ་སངས་རྒྱས་པའི་ཆོས་དང་ལྷག་པར་དུ་སེམས་ཕྲ་རགས་ཀྱི་དབྱེ་བ་ཕྱེས་ནས་གསུངས་པ་དེ་གསང་སྔགས་བླ་མའི་སྒོ་ནས་ཤུགས་ཆེ་བ་ཡོད་པ་རེད། ཐུགས་དམ་བཞུགས་མཁན་ཚོ་ལ་ཀུན་རྟོགས་བརྒྱད་བཅུ་ནི། སྣང་བའི་རང་བཞིན་གྱི་རྟོག་པ་སུམ་ཅུ་སོ་གསུམ། མཆེད་པའི་རང་བཞིན་གྱི་རྟོག་པ་བཞི་བཅུ། ཉེར་ཐོབ་རང་བཞིན་གྱི་རྟོག་པ་བདུན་སོགས་ཀྱི་འགྲེལ་བཤད་མང་པོ་ཡོད་རེད། ང་ཚོས་འདི་ལ་ཞིབ་འཇུག་བྱ་དགོས་འདུག ནམ་རྒྱུན་ཐུགས་དམ་བཞུགས་མཁན་ཚོ་སྣང་མཆེད་ཐོབ་གསུམ་མ་ཆགས་གོང་གི་རླུང་གཟུགས་རགས་པ་འདི་འཐིམ་པའི་སྐབས་སུ་ཡིན་གྱི་རེད་བསམ་གྱི་འདུག སྟོང་པ་གསུམ་གྱི་སྐབས་སུ་ཡིན་མིན་ཞིབ་འཇུག་བྱ་དགོས་འདུག ཐུགས་དམ་བཞུགས་མཁན་ཁ་ཤས་ལ་ལུས་ཀྱི་དྲོད་ཡོད་པ་ལྟ་བུ་འདུག དེ་འདྲ་ཡིན་ན་སྣང་མཆེད་ཐོབ་སྐྱེས་པའི་སྐབས་སུ་མ་རེད། ས་ཆུ་ལ་འཐིམ། ཆུ་མེ་ལ་འཐིམ། མེ་རླུང་ལ་འཐིམ། རླུང་རྣམ་ཤེས་ལ་འཐིམ། རྣམ་ཤེས་ནམ་མཁའ་ལ་འཐིམ་སྟེ་རང་བཞིན་བརྒྱད་བཅུའི་ཀུན་རྟོགས་དགག་གི་ཡོད་རེད། དེར་བརྟེན་ཐོག་མར་ས་ཆུ་ལ་འཐིམ། ཆུ་མེ་ལ་འཐིམ་པའི་སྐབས་སུ་ཡིན་མིན་ཞིབ་འཇུག་བྱ་དགོས་འདུག ཚན་རིག་གི་ཐོག་ནས་རྣམ་ཤེས་ཕྲ་རུ་འགྲོ་བ་དེ་ང་ཚོས་ཤེས་གསལ་རེད། ཐུགས་དམ་བཞུགས་མཁན་འགའ་ཤས་ང་ཚོས་མཐོང་གི་ཡོད་རེད། ཚན་རིག་གི་ཐོག་ནས་ཞིབ་འཇུག་བྱ་རྒྱུ་ཡོད་རེད། འགྲོ་བ་མི་སྤྱི་ལ་འབྲེལ་བ་དམིགས་བསལ་ཡོད་མ་རེད། སངས་རྒྱས་པའི་གཞུང་ནང་ཚེ་སྔ་ཕྱི་བཤད་ཀྱི་ཡོད་རེད། ཚེ་འདི་ནས་འཆི་སྟེ་སྐྱེ་བ་རྗེས་མ་འགྲོ་ཡི་ཡོད་རེད། དེ་ཚོའི་གྲས་ནང་པའི་གཞུང་ལ་གསུངས་ཡོད་རེད། དམིགས་བསལ་དོ་སྣང་བྱེད་མཁན་ཚོས་ཞིབ་འཇུག་བྱ་རྒྱུ་ཡོད་རེད་ལ། ཚན་རིག་པའི་ངོས་ནས་ཉམས་ཞིབ་བྱེད་དགོས་རེད། ཅེས་སོགས་བཀའ་ལན་གནང་སོང་།
ཡང་ཚན་རིག་པ་ཚོས་སྒོམ་གྱི་སྐོར་གཅིག་པོ་མིན་པར་ནང་པའི་ལྟ་གྲུབ་ཀྱི་སྐོར་ལ་ཤེས་རྒྱུའི་ཐབས་ཤེས་བྱེད་ཀྱི་ཡོད་རེད། བྱས་ཙང་ནང་པའི་ལྟ་གྲུབ་ཀྱི་སྒོ་ནས་ཚན་རིག་པ་སྤྱི་ཡོངས་ལ་ཀླད་པའི་ཉམས་ཞིབ་ཐོག་ལ་ལྟ་གྲུབ་ག་རེ་ཕན་ཐོགས་ཆེ་བ་ཡོད་བཀའ་འདྲི་ཞུས་པར། ༧གོང་ས་མཆོག་གིས། འདས་པའི་ལོ་རྒྱུས་ནང་ཚན་རིག་དེ་ནུབ་ཕྱོགས་ནས་བྱུང་བ་རེད། དེ་ཡང་ཚན་རིག་གི་ཉམས་ཞིབ་བྱེད་ས་གཙོ་བོ་ཕྱི་དངོས་པོ་རེད། ཚན་རིག་པ་ཚོས་ཐུགས་སྣང་གནང་ས་དེ་རྒྱུན་ལྡན་གྱི་མི་ཚེའི་ནང་ལ་སེམས་ཀྱི་ཞི་བདེ་གལ་ཆེན་པོ་ཡིན་པ་ར་སྤྲོད་པ་ཙམ་མ་ཟད། ཚན་རིག་པ་མང་པོས་སེམས་ཀྱི་ཞི་བདེ་ཚད་ལྡན་བསྐྲུན་རྒྱུའི་ཐབས་ཤེས་ཐོག་ལ་དམིགས་བསལ་གྱི་ཐུགས་སྣང་གནང་གི་ཡོད་རེད། སེམས་ཀྱི་ཞི་བདེ་བག་ཕེབས་ཚད་དང་ལྡན་པ་ཡོད་ན་སོ་སོའི་གཟུགས་པོའི་འཕྲོད་བསྟེན་ལ་ཕན་གྱི་ཡོད་རེད། སེམས་ཁྲལ་ཧ་ཅང་ལངས་པ་དང་ཁོང་ཁྲོ་ཚ་པོ། སེམས་ཞུམ་པ་ཡོད་པ་དེ་ཚོས་སོ་སོའི་གཟུགས་པོའི་འཕྲོད་བསྟེན་ལ་གནོད་ཀྱི་ཡོད་རེད། ཚེ་འདི་ལ་སེམས་ཀྱི་བདེ་སྐྱིད་བསྐྲུན་ན་གཟུགས་པོའི་འཕྲོད་བསྟེན་ལ་ཕན་གྱི་ཡོད་རེད། ཚན་རིག་པ་ཚོས་མིའི་བདེ་སྡུག་གི་སྐོར་ལ་དམིགས་བསལ་ཐུགས་སྣང་གནང་གི་ཡོད་དུས་མིའི་སེམས་ཀྱི་ཞི་བདེ་དཀྲུག་མཁན་གྱི་རྒྱུ་རྐྱེན་གཙོ་བོ་དེ་ཁོང་ཁྲོ་ཆགས་ཀྱི་ཡོད་རེད། ཁོང་ཁྲོ་ལ་སོགས་པའི་ཉོན་མོངས་པའི་བློའི་རིགས་ཀྱི་སེམས་ཀྱི་ཞི་བདེ་ལ་གནོད་མཁན་རིགས་ལ་བཏང་སྙོམས་བྱ་རྒྱུའི་སྨན་གྱི་ཐབས་ལམ་སྟོན་པ་དེ་འཕྲལ་སེལ་གྱི་ཐབས་ལམ་རེད། དེ་མིན་བྱམས་སྙིང་རྗེ་ཉམས་ལེན་བྱས་ནས་ཁོང་ཁྲོ་དང་སེམས་ཞུམ་པ་སོགས་ཡོང་གི་མ་རེད།
ད་ལྟ་ཚན་རིག་པ་ཚོས་སྐྱེ་བ་ཕྱི་མར་ཉམས་ཞིབ་གནང་གི་ཡོད་མ་རེད། ནང་པའི་ཆོས་ཀྱི་སྒོ་ནས་ཚེ་འདི་ལ་ཞི་བདེ་བསྐྲུན་རྒྱུའི་ཉམས་ཞིབ་གནང་གི་ཡོད་རེད། འཛམ་གླིང་ནང་མི་ཐེར་འབུམ་བདུན་ལྷག་ཆ་ཚང་བདེ་བ་འདོད་པ་དང་སྡུག་བསྔལ་མི་འདོད་པ་ཤ་སྟག་རེད། མིའི་སྤྱི་ཚོགས་ནང་དཀའ་ངལ་མང་པོ་ཡོང་བ་དེ་མིས་བཟོས་པ་རེད། སེམས་ཀྱི་ཞི་བདེ་བག་ཕེེབས་ཡོང་བར་ང་ཚོས་སྤྱི་ཡོངས་ཀྱི་བློའི་འགྲོ་སྟངས་ཤེས་དགོས་པ་གལ་ཆེན་པོ་རེད། དཀའ་ངལ་བྱུང་བའི་སྐབས་སུ་བསམ་བློ་གཏོང་སྟངས་ཀྱི་ཐོག་ནས་དཀའ་ངལ་སེལ་ཐུབ་ཀྱི་ཡོད་པ་རེད། སྙིང་རྗེ་ལ་བསྟེན་པའི་ཐོག་ནས་བཟོད་པ་ཉམས་ལེན་བྱས་ན། སེམས་ཀྱི་ཞི་བདེ་ཡོང་བར་ཕན་ཐོགས་ཆེན་པོ་ཡོད་རེད། ཅེས་སོགས་བཀའ་སློབ་ལམ་སྟོན་སྩལ་གནང་སོང་།
གསར་འགོད་པ། བསྟན་འཛིན་ཕུར་བུ།
