ཀང་རཱ་རྫོང་ནང་ཕྱི་ཟླ་ ༥་ཚེས་ ༡༠ ནས་ཚེས་ ༡༧་བར་ཐེམ་སྤང་བཀའ་རྒྱ་བསྒྲགས་འདུག

ཉིན་རེའི་སྔ་དྲོའི་ཆུ་ཚོད་ ༨ ནས་ ༡༡ བར་ཉེར་མཁོའི་ཅ་དངོས་ཉོ་ཚོང་དང་ལས་དོན་ཆེད་ཕྱི་རུ་འགྲོ་སྐྱོད་ཆོག་གི་འདུག

ཁ་སང་ཕྱི་ཚེས་ ༩ ཉིན་ཧི་མ་ཅལ་མངའ་སྡེའི་ཁོངས་ཀང་རཱ་རྫོང་གིས་བཀོད་ཁྱབ་ཞིག་བཏང་བའི་ནང་། འདས་པའི་ཉིན་ཤས་རིང་ཀང་རཱ་རྫོང་ཁོངས་སུ་ཏོག་དབྱིབས་གཉན་རིམས་འགོས་ཁྱབ་ཤུགས་ཆེར་འགྲོ་བཞིན་པ་སོགས་ཀྱི་གནས་སྟངས་འོག དེ་རིང་ཕྱི་ཚེས་ ༡༠ ཉིན་ནས་ཚེས་ ༡༧ ཉིན་བར་དུ། ཉིན་རེའི་སྔ་དྲོའི་ཆུ་ཚོད་ ༨ ནས་ ༡༡ བར་ཉེར་མཁོའི་ཅ་དངོས་ཉོ་ཚོང་དང་ལས་དོན་ཆེད་ཕྱི་རུ་འགྲོ་སྐྱོད་ཆོག་པ་ལས་གཞན་ཐེམ་སྤང་བཀའ་རྒྱའི་འོག་སྡོད་དགོས་པ་དང་། བཀག་སྡོམ་སྐབས་སྒེར་གྱི་རླངས་འཁོར་སོགས་སྨན་བཅོས་དང་འགོག་ཁབ་རྒྱག་པ་སོགས་ཚུད་པའི་ཛ་དྲག་གི་གནས་སྟངས་སྐབས་སུ་མ་གཏོགས་འགྲོ་སྐྱོད་མི་ཆོག་པ་སོགས་བཀོད་འདུག

ཀང་རཱ་རྫོང་གི་བཀོད་ཁྱབ་དེའི་ནང་། བཀག་སྡོམ་གྱི་དུས་སུ་ཆོག་མཆན་ཡོད་པའམ་དམིགས་བསལ་གུ་ཡངས་ཡོད་ན་མ་གཏོགས་མི་སུའང་རང་ཁྱིམ་ནས་ཕྱིར་ཐོན་མི་ཆོག་པ་དང་། ཁྲོམ་སྲང་དང་ལམ་ཁ། འདུ་འཛོམས་བྱེད་ས་སོགས་སུ་མི་ལྔ་ལས་མང་བ་འཛོམས་ཚེ་ཁྲིམས་འགལ་ཡིན་པ་དང་། སྒེར་འཁོར་བེད་སྤྱོད་བྱས་ཏེ་ཉེར་མཁོའི་དངོས་ཟོག་དང་སྨན་སྐྱེལ་འདྲེན། གཞན་སྤྱི་ཚོགས་ཞབས་ཕྱི་ཞུས་ཚེ་ཆོག་མཆན་དགོས་སྐོར་དང་། བཀག་སྡོམ་མེད་པའི་དུས་སྐབས་སུ་ཆོག་མཆན་ཐོབ་པའི་ཚོང་ཁང་ཚོས་ངེས་པར་དུ་མགྲོན་པོས་རྒྱང་ཐག་འཛིན་རྒྱུར་འགན་འཁུར་ལེན་དགོས་པ་དང་། ས་གནས་ཉེན་རྟོག་ལས་ཁུངས་ནས་གནད་ཡོད་ས་ཁུལ་དུ་ཉེན་རྟོག་ལས་མི་འགྲེམས་འཇོག་བྱ་རྒྱུ་ཡིན་སྐོར་བཀོད་འདུག

ཆུ་ཚོད་ཉེར་བཞིའི་རིང་འཕྲོད་བསྟེན་དང་འབྲེལ་བའི་སྨན་ཁང་དང་སྨན་ཚོང་ཁང་། སྨན་རིག་དང་འབྲེལ་ནས་བརྟག་དཔྱད་ཁང་སྒོ་འབྱེད་དང་ཞབས་ཕྱི་ཁག་བྱས་ཆོག་པ་མ་ཟད། ཛ་དྲག་གི་ནད་པ་དང་འགོག་ཁབ་རྒྱག་ཆེད་དུ་འགྲོ་སྐྱོད་ཆོག་སྐོར་དང་། སྔ་དྲོའི་ཆུ་ཚོད་ ༡༠ ནས་ཕྱི་དྲོའི་ཆུ་ཚོད་ ༢ བར་དུ་དངུལ་ཁང་དང་སྦྲག་ཁང་། འགན་ལེན་ཚོང་ལས་ཁང་ (Insurance company) སོགས་སྒོ་འབྱེད་ཆོག་པ་དང། སྔ་དྲོའི་ཆུ་ཚོད་ ༨ ནས་ ༡༡ བར་དུ་སྔོ་ཚལ་དང་སིལ་ཏོག སྒོ་ང་དང་ཤ། འོ་མ་སོགས་ཉེར་མཁོའི་ཚོང་ཁང་ཁག་སྒོ་འབྱེད་བྱས་ཆོག་པ་དང་། ཞིང་ལས་ཀྱི་ལུད་རྫས་དང་ས་བོན་སོགས་ཀྱི་ཚོང་ཁང་སྒོ་འབྱེད་ཆོག་པ། དེ་བཞིན་གཅེས་ཉར་སེམས་ཅན་དང་གཅེས་ཉར་སེམས་ཅན་གྱི་ཟ་ཆས་ཚོང་ཁང་། སྒོ་ཟོག་སོགས་ཀྱི་གཟན་ཆས་ཚོང་ཁང་སྒོ་འབྱེད་ཆོག་པ་བཀོད་འདུག

གཞན། བཀག་སྡོམ་སྐབས་རྫོང་ལས་ཁུངས་དང་འབྲེལ་ཡོད་ནས་ལག་འཁྱེར་བཟོ་བའམ་ཆོག་མཆན་སྔོན་ནས་ཞུ་དགོས་ཡོད་པ་དང་། ཡང་ན་ཛ་དྲག་གི་དུས་སྐབས་སུ་གུ་ཡངས་ཡོད་པའི་ཁོངས་སུ་འདས་གྲོངས་སུ་ཕྱིན་པའི་ཕུང་བོ་ཞུགས་འབུལ་དང་འདས་མཆོད་བསྒྲུབ་ཆེད་འགྲོ་སྐྱོད་བྱེད་པ་དང་། རླངས་འཁོར་དང་སྒེར་འཁོར་ཁག་སྨན་བཅོས་དང་འགོག་ཁབ་རྒྱག་པ། ཏོག་དབྱིབས་གཉན་རིམས་བརྟག་དཔྱད་ཆེད། རླངས་འཁོར་གྱི་མིའི་ཤོང་ཚད་བརྒྱ་ཆའི་ ༥༠ ལས་མ་བརྒལ་བ་དགོས་ཀྱི་ཡོད་པ་དང་། ཉེན་རྟོག་པ་སོགས་སྤྱི་དམངས་ཀྱི་ཁྲིམས་སྒྲིག་སྲུང་སྐྱོབ་བྱེད་མཁན་དང་རྫོང་ལས་ཁུངས་ཀྱི་ལས་མི། རྡོ་སྣུམ་དང་ས་སྣུམ། ཐབ་རླངས་ (LPG Gas) སོགས་སྐྱེལ་འདྲེན་དང་དེ་འབྲེལ་གྱི་ལས་ཁུངས་ཁག ཚགས་པར་པར་བསྐྲུན་དང་འགྲེམས་སྤེལ། གསར་འགོད་ལས་མི་ལ་ངོ་སྤྲོད་ལག་འཁྱེར་ཚད་ལྡན་དགོས་པ། བརྡ་འཕྲིན་དང་འབྲེལ་བའི་ཞབས་ཕྱི་དང་གློག  མེ་དང་ཆུ། དུག་སེལ་དང་དེ་འབྲེལ་གྱི་ཞབས་ཞུ་དང་ལས་མི་སོགས་ཡོད་སྐོར་བཀོད་འདུག

ཉེ་ལམ་ནས་རྒྱ་གར་རྒྱལ་ཡོངས་སུ་ཏོག་དབྱིབས་གཉན་རིམས་ཀྱི་ཚ་རླབས་གཉིས་པ་བྱུང་སྟེ་ལྡི་ལི་དང་པན་ཇབ་མངའ་སྡེ་སོགས་ཀྱི་ནང་ཛ་དྲག་གི་གནས་སྟངས་བྱུང་སྟབས། ཧི་མ་ཅལ་མངའ་སྡེ་གཞུང་གིས་ཟླ་འདིའི་ཕྱི་ཚེས་ ༧ ཉིན་ནས་ཚེས་ ༡༧ ཉིན་བར་དུ་མངའ་སྡེའི་ཁྱོན་ཡོངས་སུ་ཐེམ་སྤང་བཀའ་རྒྱ་བཏང་ཡོད་པ་རེད། བཀོད་ཁྱབ་དེའི་འོག་ནས་རྫོང་རིམ་པའི་དབང་ཆ་སྤྱད་དེ་ཀང་རཱ་དང་སོ་ལན་རྫོང་ (Solan) གཉིས་ཀྱིས་སྔ་དྲོའི་ཆུ་ཚོད་ ༨ ནས་ ༡༡ བར་དང་། ཅམ་པཱ་རྫོང་ (Chamba) གིས་སྔ་དྲོའི་ཆུ་ཚོད་ ༡༠ ནས་ཉིན་རྒྱབ་ཆུ་ཚོད་ ༡ བར་དང་། དེ་བཞིན་སྤི་ཏི་རྫོང་དུ་སྔ་དྲོའི་ཆུ་ཚོད་ ༡༡ ནས་ཕྱི་དྲོའི་ཆུ་ཚོད་ ༢ བར་དུ་མ་གཏོགས་ཐེམ་སྤང་བཀའ་རྒྱ་ལག་བསྟར་གནང་གི་ཡོད་འདུག

གསར་འགོད་པ། ཀླུ་མགོན་ཐར།