ས་ག་ཟླ་བའི་རིང་བོད་ནང་དམ་དྲག་སྔར་ལྷག་བྱེད་ཀྱི་ཡོད་འདུག

ས་ག་ཟླ་བའི་རིང་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ཁུལ་གྱི་མི་མང་བར་སྐོར་དང་གླིང་སྐོར། རྩེ་སྐོར་སོགས་སུ་འགྲོ་མི་ཆོག་པར་བཟོས་ཏེ་ཆོས་ཕྱོགས་ཀྱི་བྱེད་སྒོར་ཉུང་ཙམ་ཞུགས་དགོས་ཟེར།

ལོ་རེའི་བོད་ཟླ་བཞི་བ་ནི་ས་ག་ཟླ་བ་ཡིན་ཞིང་ཚེས་བཅོ་ལྔའི་ཉིན་སངས་རྒྱས་བཅོམ་ལྡན་འདས་སྐུ་བལྟམས་པ་དང་སངས་རྒྱས་པ། མྱ་ངན་ལས་འདས་པ་བཅས་དུས་ཆེན་གསུམ་འཛོམས་ཀྱི་ཟླ་བ་ཞིག་ཆགས་ཀྱི་ཡོད་པ་ལྟར། བོད་ཕྱི་ནང་གཉིས་དང་ནང་པ་སངས་རྒྱས་པ་ཁྲི་ཕྲག་མང་པོས་ས་ག་ཟླ་བའི་རིང་། ཕྱག་མཆོད་མཇལ་དང་གནས་སྐོར་སོགས་སྡུག་སྤོང་དགེ་སྒྲུབ་ཀྱི་ལས་ལ་བརྩོན་སྲོལ་ཡོད་ནའང་། ཟླ་འདིའི་ཕྱི་ཚེས་ ༩ ཉིན་ལྷ་ས་གྲོང་ཁྱེར་ནང་བསྟན་མཐུན་ཚོགས་ཟེར་བས། དོན་ཚན་བཞི་ཅན་གྱི་གྲོས་འདོན་ཡི་གེ་ཟེར་བ་ཞིག་བཏོན་ཏེ། ཏོག་དབྱིབས་གཉན་རིམས་འགོས་ཁྱབ་ཀྱི་མིང་འོག་ནས། རྒྱལ་ས་ལྷ་སའི་ཁུལ་གྱི་བོད་མི་ཚོ་འདུ་འཛོམས་ཆེ་བའི་ཆོས་ཕྱོགས་ཀྱི་བྱེད་སྒོར་མི་ཞུགས་པ་དང་བར་སྐོར་དང་གླིང་སྐོར། དེ་བཞིན་རྩེ་ཕོ་བྲང་པོ་ཏ་ལར་རྩེ་བསྐོར་འགྲོ་མི་ཆོག་པ་སོགས་ཀྱི་བཀའ་རྒྱ་བསྒྲགས་འདུག

ལྷ་ས་གྲོང་ཁྱེར་ནང་བསྟན་མཐུན་ཚོགས་ཀྱི་གྲོས་འདོན་ཡི་གེ་དེའི་ནང་། དད་ལྡན་མང་ཚོགས་ཀྱིས་ཏང་དང་སྲིད་གཞུང་གི་ཏོག་ནད་སྔོན་འགོག་གི་བྱ་ཐབས་ཁག་ལ་རང་འགུལ་ངང་གཞོགས་འདེགས་ཡག་པ་བྱས་ཏེ་འགོག་ཁབ་རང་འགུལ་ངང་གཟེད་པ་དང་། འདུ་འཛོམས་དང་ཕྱིར་ཉུང་ཙམ་བསྐྱོད་པ།  ཁ་རས་རྒྱག་པ་དང་ལག་པ་ཡང་སེ་འཁྲུ་བ། དེ་བཞིན་རྩེ་སྐོར་དང་བར་སྐོར། གླིང་སྐོར་སོགས་འདུ་འཛོམས་ཆེ་སར་མི་འགྲོ་བ་དང་། ཆོས་ལུགས་ལ་དཔྱོད་ཤེས་ཀྱི་ལྟ་སྟངས་བཟུང་ནས་ཡ་རབས་ངང་བསང་ཁ་བསང་གསོལ་དང་ལུགས་མཐུན་ངང་ཚེ་ཐར་གཏོང་བ་སོགས་བྱེད་དགོས་ཀྱི་ཡོད་སྐོར་དང་། གྲྭ་བཙུན་ཚོས་དུས་བཀག་ལྟར་ཚ་བ་ལྟ་བ་དང་སྤྱི་པའི་འདུ་འཛོམས་བྱ་ཡུལ་་དུ་དུག་སེལ་བྱེད་པ་དང་ཏོག་ནད་འགོག་ཁབ་དུས་ཐོག་ཏུ་གཟེད་དགོས་པ། རང་འགུལ་ངང་རྒྱལ་གཅེས་འཕྲོད་བསྟེན་ལས་འགུལ་ཟེར་བ་སྤེལ་བ་དང་ཤིང་འཛུགས་ནགས་བཟོའི་བྱེད་སྒོར་ཞུགས་ཏེ། དགོན་པ་དང་དེའི་མཐའ་འཁོར་གྱི་ཁོར་ཡུག་མཛེས་སུ་གཏོང་དགོས་སྐོར། རྒྱ་ཆེའི་ཡུལ་སྐོར་བས་ཆོས་མཇལ་དང་ཡུལ་སྐོར་བྱེད་རིང་། ཚ་བ་ལྟ་མཁན་ལ་རང་འགུལ་ངང་གཞོགས་འདེགས་བྱས་ཏེ་ལྟ་སྐོར་བྱེད་རིང་ཁ་རས་རྒྱག་པ་དང་། ཡ་རབས་དང་གོ་རིམ་ལྡན་པའི་སྒོ་ནས་ལྟ་སྐོར་བྱེད་པ་ལས་དགོན་པའི་ནང་ཡུན་རིང་མི་སྡོད་པ་དང་མི་མང་པོ་འཛོམས་སར་འགྲོ་མི་ཆོག་སྐོར། དེ་བཞིན། དགོན་སྡེ་ཁག་གིས་དགོན་པའི་ཞི་མཐུན་བརྟན་ལྷིང་སྲུང་སྐྱོང་དང་གྲྭ་བཙུན་གྱི་གཟུགས་གཞི་བདེ་ཐང་སྲུང་སྐྱོང་། ཏང་དང་སྲིད་གཞུང་གི་རིམས་ནད་སྔོན་འགོག་དང་ཚོད་འཛིན་གྱི་ལས་བྱེད་ལ་དོན་འཁྱོལ་ཏན་ཏིག་བྱས་ཏེ་དགོན་པར་ཕྱི་ནས་ཏོག་ནད་འགོ་བའི་ཉེན་ཁར་འགོག་ཟོན་བྱེད་དགོས་སྐོར་སོགས་བརྗོད་འདུག

རྒྱ་ནག་གཞུང་གིས་ལོ་རྟག་པར་ས་ག་ཟླ་བའི་རིང་བོད་མིའི་ཆོས་ཕྱོགས་ཀྱི་བྱེད་སྒོ་ཁག་ལ་དམ་དྲག་སྔར་ལྷག་བྱེད་ཀྱི་ཡོད་པ་དང་། འདས་ལོར་རྒྱ་ནག་གཞུང་གིས་ཏང་གི་ལས་བྱེད་པ་དང་སློབ་ཕྲུག་ཚོ་ས་ག་ཟླ་བའི་རིང་ཆོས་ཕྱོགས་ཀྱི་བྱེད་ཞུགས་མི་ཆོག་པའི་བཀའ་བསྒྲགས་པ་དང་། ཕྱི་ལོ་ ༢༠༡༩ ལོར་རྒྱ་ནག་དམར་ཤོག་ཚོགས་པའི་རྒས་ཡོལ་ལས་བྱེད་པ་དང་གཞུང་ཞབས་རྒས་ཡོལ་ཐོན་པ་རྣམས་དགོན་པར་འགྲོ་མི་ཆོག་པ་སོགས་ཀྱི་བཀའ་བསྒྲགས་ཡོད་ཅིང་། ཕྱོགས་གཅིག་ནས་རྒྱ་ནག་གིས་ཉེ་སྔོན་ཕྱི་ཚེས་ ༡༠ ཉིན་ནས་བོད་རང་སྐྱོང་ལྗོངས་ནང་ཕྱིའི་ཡུལ་སྐོར་བ་ཡོང་ཆོག་པའི་བཀའ་བཏང་བ་དང་ཕྱོགས་གཞན་ཞིག་ནས་ད་ལོར་དམིགས་བསལ་བར་སྐོར་དང་གླིང་སྐོར། རྩེ་སྐོར་སོགས་ལ་འགྲོ་མི་ཆོག་པར་བཟོས་པ་ནི་བོད་མིའི་ཆོས་དད་རང་དབང་ལ་རྡོག་རོལ་གཏོང་གི་ཡོད་པ་གསར་བོ་ཆགས་ཀྱི་ཡོད་པ་རེད།

གསར་འགོད་པ། སྐལ་བཟང་སྦྱིན་པ།