རྒྱ་གར་ནང་ཏོག་དབྱིབས་ཀྱི་ནད་རླབས་གསུམ་པ་ཡོང་སྲིད་པས་གྲ་སྒྲིག་ཨང་གསར་དགོས་པའི་ཉེན་བརྡ་བཏང་།

ཏོག་དབྱིབས་ནད་པ་ཛ་དྲག་ཅན་རྣམས་གཙོ་བོར་དམིགས་པའི་རྒྱ་གར་གྱི་ཏོག་དབྱིབས་སྨན་ཕྱེ་ 2DG ལ་སྨན་གཞན་ལས་དྲག་སྐྱེད་ཀྱི་ཕན་ནུས་མགྱོགས་པ་ཡོད་སྐོར་བསྒྲགས་འདུག་ཀྱང་སྨན་ཕྱེ་དེ་བེད་སྤྱོད་གཏོང་ཕྱོགས་དང་གཏན་འབེབ་རིན་གོང་སོགས་ད་ལྟ་ཁ་གསལ་མི་འདུག

རྒྱ་གར་དབུས་འཕྲོད་བསྟེན་ལྷན་ཁང་གི་གྲངས་ཐོ་ལྟར་ན།  ཟླ་འདིའི་ཕྱི་ཚེས་ ༡༢ ནས་བཟུང་ཏོག་དབྱིབས་ནད་པའི་གྲངས་འབོར་བསྟུད་མར་ཆག་མགོ་བརྩམས་ཏེ། ཁ་སང་རྒྱལ་ཡོངས་ནང་ཁྱོན་ནད་པ་གསར་པ་ ༢,༦༧,༣༣༤ ཐོན་ཡོད་འདུག དེ་བཞིན་ཟླ་འདིའི་ཕྱི་ཚེས་ ༡༡ ནས་ ༡༧ བར་ཉིན་ལྟར་ཆ་སྙོམས་ཀྱིས་ཏོག་དབྱིབས་གཉན་རིམས་ཀྱི་བརྟག་དཔྱད་འབུམ་ ༡༨།༤༥ ལྷག་བྱས་ཡོད་ཅིང་། དེའི་ཁྲོད་ནས་མི་གྲངས་ཀྱི་བརྒྱ་ཆ་ ༡༦།༩ ལ་ཏོག་དབྱིབས་གཉན་རིམས་འགོས་ཡོད་ལ། སྤྱི་ཡོངས་ནས་འདས་པའི་བདུན་ཕྲག་གཉིས་ནང་། རྒྱ་གར་གྱི་ཛ་དྲག་ཆེ་བའི་མངའ་སྡེ་མ་དྷི་ཡ་པར་དྷེ་ཤི་དང་། ཨུ་ཏར་པར་དྷེ་ཤི། ཏེ་ལང་གྷ་ཎ། མཱ་ཧཱ་ར་ཤི་ཏྲ་བཅས་ནང་གི་རྫོང་ཁག་ ༡༩༩ ལྷག་གི་ཏོག་དབྱིབས་ནད་པའི་གྲངས་འབོར་མར་ཆག་མུས་ཡིན་འདུག་ལ། ཁ་སང་རྒྱ་གར་དབུས་གཞུང་གི་ཏོག་དབྱིབས་ལས་དོན་ཚོགས་ཆུང་གི་ཚོགས་གཙོ་སྨན་པ་ཝི་ཀེ་པཱོལ་ (V K Paul)གྱིས་གསར་འགོད་གསལ་བསྒྲགས་ཤིག་གི་སྟེང་། རྒྱ་གར་གྱི་མངའ་སྡེ་མང་པོའི་ནང་སྔོན་འགོག་གི་ཐབས་ཇུས་ལག་བསྟར་ཚགས་ཚུད་བྱས་པར་བརྟེན་གཉན་རིམས་ཀྱི་ནད་རླབས་གཉིས་པ་མར་འཇགས་ཀྱི་ཡོད་ནའང་། ཏཱ་མིལ་ན་ཌུ་དང་ཨན་དྷ་ར་པར་དྷེ་ཤི ནུབ་སྦེལ་གྷལ། ཨོ་ཌི་ཤ་བཅས་ཀྱི་གནས་སྟངས་ད་དུང་ཛ་དྲག་པོ་ཡིན་སྐོར་བརྗོད་འདུག་པ་ལྟར། ཁ་སང་ཉིན་གཅིག་ནང་རྒྱ་གར་རྒྱལ་ཡོངས་ནང་ཏོག་དབྱིགས་གཉན་རིམས་ཀྱི་རྐྱེན་པས་མི་གྲངས་ ༤༥༢༩ འདས་གྲོངས་སུ་གྱུར་ཡོད་ཅིང་། དེ་ནི་རྒྱ་གར་གྱི་ཉིན་གཅིག་གི་ནང་ནད་པའི་འདས་གྲངས་མཐོ་ཤོས་དེ་ཆགས་ཡོད་འདུག

ད་ལྟ་རྒྱ་གར་རྒྱལ་ཡོངས་ནང་ཏོག་དབྱིབས་གཉན་རིམས་ཀྱི་ནད་རླབས་གཉིས་པ་དེ་ཁྱབ་གདལ་འགྲོ་མུས་ཡིན་པའི་སྒང་དེར། རྒྱ་གར་གྱི་མགོ་འཁྲིད་དང་འཕྲོད་བསྟེན་མི་སྣའི་ཁྲོད་རྒྱ་གར་ནང་ནད་རླབས་གསུམ་པ་བསླེབ་ཉེན་ཡོད་པའི་ཉེན་བརྡ་བཏང་ཡོད་པ་རེད། དེ་ཡང་བདུན་ཕྲག་སྔོན་མར་རྒྱ་གར་གྱི་ཚན་རིག་སློབ་སྟོན་པ་གཙོ་བོ་ (Principal Scientific Adviser) སྐུ་ཞབས་ཀེ་ཝེ་ཇེ་ར་གྷ་ཝན་(K VijayRaghavan)ལགས་ཀྱིས། ད་ལྟའི་ཆར་ཏོག་དབྱིབས་གཉན་སྲིན་གྱི་རྫས་རྒྱུན་འགྱུར་བཞིན་པའི་གནས་སྟངས་འོག རྒྱ་གར་ནང་ཏོག་དབྱིབས་གཉན་རིམས་ཀྱི་ནད་རླབས་གསུམ་པ་བསླེབ་ངེས་ཡིན་སྐོར་དང་། དེའི་ཆེད་དུ་ད་ལྟ་ནས་གྲ་སྒྲིག་དགོས་སྐོར་བརྗོད་ཡོད་ཅིང་། རྒྱ་གར་གྱི་ཆེས་མཐོའི་ཁྲིམས་ཞིབ་ཁང་ངོས་ནས་ཀྱང་དབུས་གཞུང་ལ་ནད་རླབས་གསུམ་པའི་ཆེད་དུ་ད་ལྟ་ནས་སྲོག་རླངས་བཀོད་སྒྲིག་སོགས་ཀྱི་ཐད་ནས་གྲ་སྒྲིག་ཨང་གསར་དགོས་པའི་བཀའ་ཁྱབ་བཏང་ཡོད་པ་རེད།

དེ་ཙམ་དུ་མ་ཟད། ཟླ་འདིའི་ཕྱི་ཚེས་ ༡༨ ཉིན་ལྡི་ལིའི་སྤྱི་ཁྱབ་བློན་ཆེན་ཀེ་ཇི་རི་ཝཱལ་ (Arvind Kejriwal) ལགས་ཀྱིས། ད་ལྟ་སིང་གྷ་པུར་ (Singapore) དུ་ཐོན་བཞིན་པའི་རྣམ་པ་མི་འདྲ་བའི་ཏོག་དབྱིབས་གཉན་སྲིན་དེ་བྱིས་པ་རྣམས་ལ་ཧ་ཅང་ཉེན་ཚབས་ཆེན་པོ་ཡིན་པ་མ་ཟད། དེ་ཉིད་རྒྱ་གར་ནང་ནད་རླབས་གསུམ་པའི་ཚུལ་དུ་བསླེབ་སྲིད་པར་བརྟེན། དབུས་གཞུང་ངོས་ནས་འཕྲལ་དུ་སིང་གྷ་པུར་དང་མཁའ་ལམ་འགྲིམ་འགྲུལ་འགོག་དགོས་པ་མ་ཟད། རྒྱལ་ནང་དུ་བྱིས་པར་སྔོན་འགོག་སྨན་ཁབ་བརྒྱབ་རྒྱུའི་ལས་གཞི་མྱུར་དུ་གཏོང་དགོས་པའི་རེ་སྐུལ་ཞུས་ཡོད་འདུག འོན་ཀྱང་སྤྱི་ཁྱབ་བློན་ཆེན་གྱི་གནས་ཚུལ་དེ་སྤེལ་བའི་རྗེས། སིང་གྷ་པུར་གྱི་འཕྲོད་བསྟེན་ལྷན་ཁང་ངོས་ནས་ཡུལ་དེའི་ནང་ཏོག་དབྱིབས་གཉན་སྲིན་གསར་པ་ཐོན་མེད་སྐོར་གྱི་བརྡ་ལན་སྤྲད་ཡོད་འདུག

འཕྲོད་བསྟེན་གྱི་ཞིབ་འཇུག་སྙན་ཐོ་སྐོར་ཞིག་གི་ནང་། རྒྱ་གར་གྱི་ཏོག་དབྱིབས་གཉན་རིམས་ཀྱི་ནད་རླབས་དང་པོའི་ནང་ལོ་རྒན་པ་དང་། ད་ལྟའི་ནད་རླབས་གཉིས་པའི་སྐབས་སུ་གཞོན་པར་དོ་ཕོག་ཤུགས་ཆེ་བ་སྤྲོད་བཞིན་ཡོད་པ་ལྟར། ནད་རླབས་གསུམ་པའི་སྐབས་བྱིས་པར་ཉེན་ཚབས་ཆེན་པོ་ཡོད་སྐོར་གྱི་ཚོད་དཔག་བྱས་ཡོད་། དེ་བཞིན་འདས་པའི་ཉམས་མྱོང་ལྟར་ནའང་། ནད་རླབས་དང་པོའི་ནད་པའི་ཁྲོད་ནས་བྱིས་པའི་བརྒྱ་ཆ་ ༢ མ་གཏོགས་ལོངས་ཀྱི་མེད་ཀྱང་། ནད་རླབས་གཉིས་པའི་སྐབས་བརྒྱ་ ༡༡ ལ་འཕར་ཡོད་སྟབས། གནས་སྟངས་དེའི་འོག་ནད་རླབས་གསུམ་པའི་སྐབས་བརྒྱ་ཆ་ ༢༨ ནས་ ༣༠ ལ་འཕར་སྲིད་སྐོར་བརྗོད་ཡོད། ཡིན་ནའང་། རྒྱ་གར་གྱི་འཕྲོད་བསྟེན་ཆེད་མཁས་པ་རྣམས་ཀྱིས་ད་ལྟའི་ཆར་ནད་རླབས་གསུམ་པས་བྱིས་པ་ཚོར་ཉེན་ཚབས་ཆེན་པོ་སྤྲད་སྲིད་པའི་ཞིབ་འཇུག་གི་གྲུབ་དོན་གང་ཡང་མེད་སྟབས། དེར་འཇིགས་སྣང་བྱེད་དགོས་དོན་མེད་ནའང་གཞུང་ངོས་ནས་དེ་ལྟར་ཡོང་སྲིད་པར་གྲ་སྒྲིག་དགོས་སྐོར་རྗོད་ཀྱི་འདུག

གང་ལྟར་ཡང། ཆེད་མཁས་མི་སྣའི་ཁྲོད་ནད་རླབས་གསུམ་པར་གྲ་སྒྲིག་གི་ཆེད་དུ་བྱིས་པ་རྣམས་ལ་གང་མགྱོགས་སྔོན་འགོག་སྨན་ཁབ་བརྒྱབ་དགོས་པའི་བསམ་ཚུལ་འདོན་མཁན་མང་པོ་བྱུང་བ་བཞིན། དེ་རིང་རྒྱ་གར་གྱི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་གར་གྱི་སྨན་རྫས་དོ་དམ་ལས་ཁུངས་ངོས་ནས་རྒྱ་གར་གྱི་བྷ་རཏ་སྐྱེ་དངོས་འཕྲུལ་རིག་བཟོ་གྲྭ་ (Bharat Biotech) ཡིས་བཟོ་སྐྲུན་བྱས་པའི་ཁོ་ཝེག་སིན་ (Covaxin) སྔོན་འགོག་སྨན་ཁབ་དེ་ལོ་ན་ ༢ ནས་ ༡༨ བར་གྱི་ཕྲུ་གུ་རྣམས་ལ་དངོས་སུ་ཚོད་ལྟ་བྱ་རྒྱུའི་ཆོག་མཆན་སྤྲད་ཡོད་པ་རེད་འདུག

གཞན་ཡང་། ཟླ་འདིའི་ཕྱི་ཚེས་ ༡༥ ཉིན་རྒྱ་གར་གྱི་འཕྲོད་བསྟེན་བློན་ཆེན་དང་བདེ་སྲུང་བློན་ཆེན་རྣམ་གཉིས་ཀྱིས། རྒྱ་གར་བདེ་སྲུང་ལྷན་ཁང་གི་ཁྱབ་ཁོངས་བདེ་སྲུང་ཉམས་ཞིབ་དང་ཡར་རྒྱས་ལྟེ་གནས་ཁང་ (Defence Research and Development Organisation) དང་། རྒྱ་གར་གྱི་སྒེར་གཉེར་སྨན་པ་རེ་ཌི་ཡི་བརྟག་དཔྱད་ཁང་ (Dr. Reddy’s Laboratories) གཉིས་ཀྱིས་མཉམ་འབྲེལ་ཐོག་བཟོ་སྐྲུན་བྱས་པའི་ཏོག་དབྱིབས་གཉན་རིམས་ཀྱི་སྨན་ཕྱེ་2-DG  (2-deoxy-D-glucose) ཞེས་པ་དབུ་འབྱེད་གནང་ཡོད་ཅིང་། སྨན་ཕྱེ་དེ་ནི་རྒྱ་གར་རང་གིས་བཟོས་པའི་ཏོག་དབྱིབས་སྨན་ཐོག་མ་དེ་ཡིན་པ་རེད། སྨན་ཕྱེ་དེ་གནས་སྟངས་ཛ་དྲག་ཡིན་པའི་ཏོག་དབྱིབས་ནད་པ་ཚོར་དམིགས་པ་ཞིག་ཡིན་འདུག་ཀྱང་། ད་ལྟའི་ཆར་སྨན་ཕྱེ་དེ་བེད་སྤྱོད་གཏོང་ཕྱོགས་དང་གོང་ཚད་སོགས་ཁ་གསལ་མི་འདུག འཕྲོད་བསྟེན་བློན་ཆེན་གྱིས་འགྲེལ་བརྗོད་གནང་བ་ལྟར་ན། སྨན་ཕྱེ་དེ་ད་ལྟ་སྤྱོད་བཞིན་པའི་སྨན་གཞན་དང་བསྡུར་ན། ནད་པ་རྣམས་དྲག་སྐྱེད་ཡོང་རྒྱུ་མྱུར་དུ་གཏོང་བ་མ་ཟད། འཕྲུལ་ཆས་ཀྱི་སྲོག་རླུང་ལ་དེ་ཙམ་བརྟེན་མི་དགོས་པའི་ཕན་ཐོགས་ཡོད་པ་དང་། སྨན་དེའི་གྲུབ་ཆ་སོགས་ཀྱི་ཆ་ནས་དུས་ཚོད་ཐུང་ཐུང་ནང་ཕོན་ཆེན་པོ་བཟོ་སྐྲུན་བྱེད་ཐུབ་ཀྱི་ཡོད་པར་བརྟེན། ཡོང་རྒྱུའི་ཕྱི་ཟླ་ ༦ པའི་ཚེས་ཤར་ལ་སྨན་དེ་སྨན་ཁང་ཚང་མའི་ནང་ཡོད་པར་བྱ་རྒྱུ་ཡིན་འདུག

གསར་འགོད་པ། པ་སངས་ཚེ་རིང་།