དེ་རིང་ཉི་ཧོང་ནང་གི་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་པའི་ཉན་ཞིབ་སྟེང་ཨ་རི་ལྟར་ཉི་ཧོང་གྲོས་ཚོགས་ངོས་ནས་ཀྱང་བོད་དོན་སྲིད་ཇུས་དང་རྒྱབ་སྐྱོར་ཁྲིམས་འཆར་འདོན་དགོས་པའི་རེ་སྐུལ་ཞུས་ཡོད་འདུག
བོད་མིའི་སྒྲིག་འཛུགས་ཀྱི་དབྱིན་ཡིག་དྲ་བའི་སྟེང་གནས་ཚུལ་སྤེལ་བ་ལྟར་ན། ཉི་ཧོང་ནང་གི་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གྲོས་ཚོགས་ཀྱི་ཉན་ཞིབ་དེའི་སྟེང་། ད་ལྟ་རྒྱ་ནག་གཞུང་གིས་བོད་ཀྱི་སློབ་གྲྭ་ཁག་ནང་བོད་ཀྱི་སྐད་ཡིག་སློབ་སྦྱོང་བྱ་རྒྱུར་བཀག་འགོག་བྱེད་ཀྱི་ཡོད་པ་མ་ཟད། བོད་ཀྱི་ཆོས་ལུགས་ལས་དོན་དང་དགོན་སྡེ་ཁག་གི་འཛིན་སྐྱོང་ལམ་ལུགས་ལ་ཐེ་ཇུས་བྱེད་པ་སོགས་རྒྱ་ནག་གཞུང་གིས་བོད་ནང་དམ་དྲག་སྔར་བས་ཤུགས་ཆེར་བྱེད་ཀྱི་ཡོད་སྐོར་འགྲེལ་བརྗོད་གནང་ཡོད་པ་དང་འབྲེལ། འདས་ལོར་ཨ་རིའི་གཞུང་གིས་གཏན་འབེབ་བྱས་པའི་བོད་དོན་སྲིད་ཇུས་དང་རྒྱབ་སྐྱོར་ཁྲིམས་ཡིག་ (Tibet Policy and Support Act of 2020) སྐོར་འགྲེལ་བརྗོད་དང་སྦྲགས། ཉི་ཧོང་གི་གྲོས་ཚོགས་འཐུས་མི་རྣམས་ཀྱིས་ཀྱང་དེ་ལྟ་བུའི་ཁྲིམས་འཆར་ཞིག་འདོན་དགོས་པའི་འབོད་སྐུལ་ཞུས་ཡོད་འདུག
ཉི་ཧོང་གི་གྲོས་ཚོགས་འོག་མའི་ལས་ཁུངས་སུ་གོ་སྒྲིག་ཞུས་པའི་ཉན་ཞིབ་དེར་ཆབ་སྲིད་ཚོགས་པ་འདྲ་མིན་གྱི་གྲོས་ཚོགས་འཐུས་མི་ ༣༠ ལྷག་མཉམ་ཞུགས་གནང་ཡོད་ཅིང་། ཉན་ཞིབ་གཙོ་སྐྱོང་གནང་མཁན་གྲོས་ཚོགས་འཐུས་མི་སྐུ་ཞབས་ཝ་ཏ་ན་པེ་ཤུ་ (Watanabe Shu) ལགས་ཀྱིས། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ཉན་ཞིབ་འདི་ནི། ཉི་ཧོང་གི་གྲོས་ཚོགས་འཐུས་མི་རྣམས་ཀྱིས་བོད་དོན་ཤེས་རྟོགས་བྱེད་ཐབས་དང་། བོད་དོན་ལ་རྒྱབ་སྐྱོར་ཇི་ལྟར་བྱེད་དགོས་མིན་འབད་རྩོལ་གྱི་ཆ་ཤས་ཤིག་ཡིན་སྐོར་བརྗོད་ཡོད་འདུག
དེ་བཞིན་ཉན་ཞིབ་སྟེང་ཉི་ཧོང་གི་ཊོ་ཀྱོ་གཙུག་ལག་སློབ་གྲྭ་ཆེན་མོའི་ (University of Tokyo) ཁྲིམས་ལུགས་དང་ཆབ་སྲིད་སློབ་གླིང་གི་སློབ་དཔོན་སྐུ་ཞབས་སཱ་ཊོ་ཤི་ཧི་རཱ་ཎོ་ (Satoshi Hirano) ལགས་ཀྱིས། རྒྱ་ནག་གཞུང་གིས་ཕྱི་ལོ་ ༡༩༤༩ ལོ་ནས་བཟུང་བོད་ནང་བཙན་འཛུལ་གྱིས་བོད་ཀྱི་ཆོས་རིག་སྐད་ཡིག་དང་བཅས་པ་གཏོར་བརླག་གཏོང་རྒྱུའི་སྲིད་ཇུས་ཇི་སྤེལ་དང་། ད་ལྟ་རྒྱ་ནག་གཞུང་གིས་བོད་ནང་ཧན་མི་རིགས་སྔར་བས་ཕོན་ཆེན་གནས་སྤོ་བྱས་ཏེ། བོད་མི་རྣམས་ལ་རང་གི་ཐུན་མོང་མ་ཡིན་པའི་རིག་གཞུང་དང་ངོ་བོ་སྲུང་སྐྱོབ་བྱ་རྒྱུར་འགོག་རྐྱེན་ཆེན་པོ་འཕྲད་ཀྱི་ཡོད་པ་དང་། བོད་ནང་གི་སློབ་གྲྭ་ཁག་གི་སློབ་འཁྲིད་སྐད་ཡིག་དེ་བོད་ཡིག་ནས་རྒྱ་ཡིག་ཏུ་སྒྱུར་རྒྱུའི་སྲིད་ཇུས་ལག་བསྟར་བྱེད་ཀྱི་ཡོད་སྐོར་དང། དེ་བཞིན་བོད་ནང་རང་གི་རིག་གཞུང་དང་ཁྲིམས་ལུགས་ཐོབ་ཐང་སྲུང་སྐྱོབ་ཐད་གོང་རིམ་ལ་ཞུ་གཏུག་བྱེད་མཁན་གྱི་བོད་མི་རྣམས་གང་བྱུང་བཙོན་འཇུག་བཀག་ཉར་བྱེད་ཀྱི་ཡོད་སྐོར་གྱི་གནས་སྟངས་འགྲེལ་བརྗོད་གནང་ཡོད་འདུག
གཞན་ཡང་། ཉན་ཞིབ་སྟེང་ཨརྱ་ཚེ་དབང་རྒྱལ་པོ་ལགས་ཀྱིས། བོད་མིའི་སྒྲིག་འཛུགས་ངོས་ནས་ཟླ་འདིའི་ཕྱི་ཚེས་ ༡༧ ཉིན། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གིས་བཙན་ཁྲིད་བྱས་ཏེ་ལོ་ངོ་ ༢༦ འཁོར་བའི་ཉིན་མོ་དང་བསྟུན་དབུ་འབྱེད་བྱས་པའི་རྐུ་ལ་ཤོར་བའི་བོད་ཀྱི་བྱིས་པ་ (Tibet’s Stolen Child) ཞེས་པའི་དབྱིན་ཡིག་དཔེ་དེབ་ཉི་ཧོང་སྐད་ཐོག་བསྒྱུར་བ་དེ་ཉིད་གྲོས་ཚོགས་འཐུས་མི་རྣམས་ལ་ཕུལ་ཡོད་འདུག
གསར་འགོད་པ། པ་སངས་ཚེ་རིང་།
