དེ་རིང་ཟླ་ས་ག་ཟླ་བའི་ཚེས་ ༡༥ སྟེ་༧གོང་ས་རྒྱལ་བ་རིན་པོ་ཆེ་མཆོག་ནས་སྟོན་པའི་རྗེས་འཇུག་པ་ཡོངས་ལ་འཚམས་འདྲི་གནང་བ་དང་དྲ་ལམ་བརྒྱུད་བཀའ་ཆོས་སྩལ།
དེ་ཡང་འཚམས་འདྲིའི་གསུང་འཕྲིན་ནང་༧གོང་ས་རྒྱལ་བ་རིན་པོ་ཆེ་མཆོག་གིས། སངས་རྒྱས་པའི་ཆོས་ནི་ལག་ལེན་ལ་གཞིར་བཞག་པ་ཞིག་ཡིན་པ་དང་། དེ་ནི་རྒྱལ་ཁབ་དང་ཚོགས་སྡེ་བྱེ་བྲག་ཞིག་ལ་མིན་པར་འགྲོ་བ་ཡོངས་ལ་གསུངས་པ་ཞིག་རེད། མི་ཚོས་རང་ཉིད་ཀྱི་ཁམས་དང་མོས་པ་ལ་བརྟེན་ནས་ཉམས་ལེན་གནང་ཆོག་པ་ཞིག་རེད། དཔེར་ན་ངོས་རང་བྱིས་པ་ཡིན་སྐབས་ནས་ནང་བསྟན་ལ་སྦྱང་བ་བྱེད་མགོ་བཙུགས་ཡོད་པ་དང་། ད་ལྟ་རང་ལོ་ ༨༦ ལ་སླེབས་ཡོད་ནའང་མུ་མཐུད་སྦྱོང་གི་ཡོད་པ་རེད། དེ་བས་ངོས་ཀྱིས་རྟག་ཏུ་སངས་རྒྱས་ཆོས་ཀྱི་རྗེས་འབྲངས་པ་རྣམས་ལ་དུས་རབས་ཉེར་གཅིག་པའི་ནང་པ་ཞིག་བྱེད་དགོས་པ་རེད་ཅེས་རྗོད་ཀྱིན་ཡོད། ཅེས་དང་། ཡང་མགོན་པོ་གང་ཉིད་ནས། སྟོན་པའི་དུས་སྐབས་ནས་ད་བར་འཛམ་གླིང་ལ་འགྱུར་ཆེན་པོ་ཐེབས་ཡོད་པ་དང་། ད་ལྟ་ལོ་ངོ་ ༢༦༠༠ ཙམ་ཕྱིན་ཡོད་ནའང་། སྟོན་པའི་བཀའ་གསུང་གི་སྙིང་བོ་རྣམས་ད་ལྟའི་དུས་སུའང་འབྲེལ་བ་ཆེན་པོ་ཡོད་པ་རེད། པ་ལིའི་ལུགས་དང་ལེགས་སྦྱར་གྱི་ལུགས་གཉིས་ཀར་ཉོན་མོངས་དང་སྡུག་བསྔལ་ལས་གྲོལ་བའི་ལམ་ཡོད་པ་རེད། བཅོན་ལྡན་འདས་ཀྱིས་དུས་ནམ་ཡིན་ཡང་ཐབས་ལམ་ཡོད་རྒུ་ལ་བརྟེན་ནས་གཞན་ལ་གནོད་འཚེ་བྱེད་པ་སྤོངས་བ་དང་གཞན་ལ་ཕན་པ་བྱེད་དགོས་པ་གསུངས་ཡོད་པ་རེད། ཅེས་གསུངས་འདུག
ཡང་རང་ཉིད་ལ་བདེ་སྐྱིད་ཡོང་ཐབས་སུ་བྱམས་བརྩེ་གོང་འཕེལ་གཏོང་དགོས་སྐོར་ལ་གསུང་འཕྲིན་གྱི་ནང་། འགྲོ་བ་གཞན་ཀྱང་རང་ཉིད་ལྟར་བདེ་བ་འདོད་པ་དང་སྡུག་བསྔལ་མི་འདོད་པ་ཡིན་པ་ངོས་འཛིན་བྱས་པའི་ཐོག་ནས། གཞན་ལ་གནོད་འཚེ་བྱེད་པ་སྤོངས་བ་དང་ཕན་པ་བསྒྲུབས་པ་མགོ་འཛུགས་བྱེད་ཐུབ་པ་ཞིག་ཡིན་པ་དང་། སྡུག་བསྔལ་ལས་གྲོལ་ཏེ་རང་དབང་དང་བདེ་སྐྱིད་ཀྱི་དོན་དུ་འབད་པ་ནི་སྐྱེས་དུས་ནས་ཡོད་པའི་ཐོབ་ཐང་ཞིག་ཡིན་ནའང་། སྒེར་གྱི་བདེ་སྐྱིད་ནི་གཞན་ལ་ཅི་བྱས་ནས་འབྱུང་གི་ཡོད་སྟབས། རང་ཉིད་ཁོ་ན་སྙམ་པའི་བསམ་བློ་སྟེ་རང་ཉིད་ཀྱི་སྡུག་བསྔལ་མང་པོ་ཞིག་གི་འབྱུང་ཁུངས་ཡིན་པའི་བློ་དེ་ཤུགས་ཆུང་དུ་བཏང་སྟེ། གཞན་ལ་གུས་བརྩི་བྱེད་པ་དང་། གཞན་གྱི་བདེ་སྡུག་ལ་སེམས་འཁུར་བྱེད་པའི་ཐོག་ནས་རང་ཉིད་ཀྱི་བྱམས་བརྩེའི་ནུས་པ་ཆེ་རུ་གཏོང་བ་ནི་བདེ་སྐྱིད་ཀྱི་འབྱུང་ཁུངས་ཡིན་སྐོར་དང་། དེ་རིང་གི་དུས་བཟང་ཉིན་མོར་སངས་རྒྱས་པའི་ཆོས་ཀྱི་རྗེས་འབྲངས་པ་ཚོས་རྡོ་རྗེ་གདན་དང་ལུམྦི་ནི། དེ་བཞིན་ཁན་ཌི་ (Kandy) སོགས་སྟོན་པའི་གནས་རྩ་ཆེན་ཁག་ཏུ་སྨོན་ལམ་གསུང་གི་ཡོད་པ་དང་། འཛམ་གླིང་ཁྱོན་ཡོངས་སུ་དཀའ་ངལ་དང་ན་ཟུག་ཆེན་པོ་འཁྱེར་ཡོང་མཁན་གྱི་ཏོག་དབྱིབས་གཉན་རིམས་ཚུད་པའི་གོ་ལའི་འཇིགས་པ་ཐམས་ཅད་ཞི་ཐབས་སུ་ཚང་མས་མཉམ་དུ་གདོང་ལེན་བྱེད་དགོས་སྐོར་སོགས་གསུངས་འདུག
དེ་བཞིན། དེ་རིང་སྔ་དྲོའི་ཆུ་ཚོད་ ༨ ཙམ་གྱི་སྟེང་། སོག་ཡུལ་དགའ་ལྡན་ཐེག་ཆེན་གླིང་དགོན་པས་ཇི་ལྟར་གསོལ་བ་བཏབ་པ་ལྟར་༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་བརྒྱུད་སོག་ཡུལ་རྒྱལ་ཡོངས་ས་ག་ཟླ་བའི་དུས་ཆེན་སྲུང་གཙི་དང་འབྲེལ་བཀའ་སློབ་སྩལ་ཡོད་པ་དང་། སྐབས་དེར་༧གོང་ས་མཆོག་ནས། སངས་རྒྱས་བཅོམ་ལྡན་འདས་ཀྱིས་བདག་ཉིད་བདག་གི་མགོན་ཞེས་གསུངས་ཡོད་པ་བཞིན་རང་ཉིད་ཀྱི་བདེ་སྡུག་དེ་རང་ཉིད་ཀྱི་ལག་ཏུ་ཡོད་པ་གསུང་གི་ཡོད་པ་དང་། ཆོས་ལུགས་གཞན་གྱིས་རང་ཉིད་ཀྱི་བདེ་སྡུག་དེ་དཀོན་མཆོག་གི་ལག་ཏུ་ཡོད་པ་ཞིག་ཡིན་སྟབས། སངས་རྒྱས་པའི་ཆོས་ཀྱིས་སོ་སོ་མི་ཡག་པོ་ཞིག་བྱས་པ་དང་ལས་བཟང་པོ་བསགས་ཚེ་རང་ཉིད་ལ་བདེ་སྐྱིད་ཡོང་བ་ཞིག་དང་། ལས་བཟང་པོ་ཞིག་བྱེད་མ་ཐུབ་ཚེ་སངས་རྒྱས་ཀྱིས་ཀྱང་སྐྱོབ་ཐུབ་ཐབས་མེད་པ་ཞིག་གསུངས་ཡོད་སྐོར་དང་། རང་ཉིད་ཀྱི་སེམས་ཅི་ཙམ་མ་འདུལ་བ་ཡིས་གཞན་ལ་གནོད་པ་ཞིག་དང་སེམས་འདུལ་བ་བྱུང་ཚེ་གཞན་ལའང་ཕན་གྱི་ཡོད་སྟབས། སེམས་འདུལ་ཐབས་སུ་སྨོན་ལམ་བརྒྱབས་ནས་ཡོང་ཐབས་མེད་པར་སོ་སོའི་སེམས་མ་ཞི་བ་དེ་ཞི་བར་བྱེད་པ་དང་མ་འདུལ་བ་དེ་གདུལ་བར་བྱེད་དགོས་སྐོར། དེ་བཞིན་མིའི་རང་བཞིན་ནི་སྤྱི་ཚོགས་ལ་བརྟེན་པ་ཞིག་ཆགས་ཡོད་པ་དང་། རང་ཉིད་འཚོ་བར་སྤྱི་ཚོགས་ལ་བརྟེན་དགོས་པ་ཡིན་སྟབས། སྤྱི་ཚོགས་ལ་བརྩེ་བ་ཞིག་རང་ཤུགས་ཀྱིས་སླེབས་ཡོད་པ་དང་། བྱ་དང་དུད་འགྲོ་སོགས་རང་ཉིད་འཚོ་ཐབས་སུ་རང་ཉིད་ཀྱི་སྡེ་དེ་ལ་རང་བཞིན་གྱིས་བརྩེ་བ་ཞིག་ཡོད་སྐོར་ཚན་རིག་པ་ཚོས་ཀྱང་བཤད་ཀྱི་ཡོད་ནའང་། མི་རྣམས་རིམ་བཞིན་ནར་སོན་སྐབས་རང་ཉིད་ཀྱིས་བྱེད་ཐུབ་པའི་བསམ་བློ་ཤུགས་ཆེ་རུ་ཕྱིན་ཏེ་སྤྱི་ཚོགས་ལ་བརྟེན་དགོས་པ་དེའི་ཐོག་ལ་དོ་སྣང་མེད་པར་ཆགས་པ་ལ་བརྟེན། རང་རྒྱལ་གཞན་ཕམ་གྱི་གནས་ཚུལ་དེ་ཡོང་གི་ཡོད་སྐོར་སོགས་གསུངས་འདུག
ཡང་༧གོང་ས་མཆོག་ནས། བོད་དང་སོག་པོ་གཉིས་ལ་ཐུན་མོང་མ་ཡིན་པའི་འབྲེལ་བ་ཞིག་ཡོད་པ་ཞིག་ཆགས་ཡོད་སྐོར་དང་། སོག་ཡུལ་གྱི་དགོན་པ་ཁག་གི་ནང་འདོན་པ་ཁོ་ན་བཏོན་ནས་མི་འདུག་པར། གཞུང་ཆེན་དག་སློབ་ཁྲིད་བྱ་རྒྱུ་ཧ་ཅང་གལ་ཆེན་ཡིན་པ་དང་། རྒྱ་གར་གྱི་གདན་ས་ཁག་ཏུ་སློབ་གཉེར་བྱེད་བཞིན་པའི་སོག་པོའི་དགེ་འདུན་པ་ཚོ་རིམ་བཞིན་སློབ་ཐོན་བྱུང་རྗེས། སོག་ཡུལ་དུ་ཁོང་ཚོར་དམིགས་བསལ་གྱི་འགན་སྤྲད་དེ་དཔེ་ཆ་ཁྲིད་དུ་འཇུག་དགོས་པ། དེ་བཞིན་སློབ་ཁྲིད་ཀྱི་སྐབས་སུ་དགེ་འདུན་པ་ཚོར་ཆུང་ཆུང་སྐབས་ནས་བློ་རིག་དང་རྟགས་རིགས་སོགས་བསླབ་དགོས་སྐོར་དང་། སངས་རྒྱས་པའི་ཆོས་ཀྱི་འགྲོ་སྟངས་རྣམས་རིག་པས་དཔྱད་པ་བྱས་པའི་ཐོག་ནས་སངས་རྒྱས་པའི་ཆོས་ལ་སོ་སོས་ཡིད་ཆེས་དང་དད་པ། ཉམས་ལེན་བྱེད་པ་ཞིག་བྱུང་ན་དུས་རབས་ཉེར་གཅིག་པའི་ནང་པ་ཆགས་པ་ཡིན་པ་ལས། གཞན་ལུགས་སྲོལ་དང་མི་གཞན་གྱིས་དེ་འདྲ་ཟེར་གྱི་འདུག་ཅེས་བཤད་པའི་ཐོག་ནས་བརྟག་དཔྱད་མ་བྱས་པར་ཕྱིན་པ་ཡིན་ན་རྨོངས་དད་ཆགས་ཀྱི་ཡོད་པ་དང་། སངས་རྒྱས་པའི་ཆོས་ཀྱི་ངོ་བོ་ནི་རྨོངས་དད་མིན་པ་ལ། ཁྱད་པར་དུ་དཔལ་ནཱ་ལེནྜའི་ཆོས་བརྒྱུད་འཛིན་མཁན་རྣམས་ཀྱིས་རིག་པའི་ཐོག་ནས་གཏན་ལ་ཕབས་ཀྱི་ཡོད་པ་ཞིག་ཡིན་སྐོར། དེ་བཞིན་སོག་པོ་མི་མང་གིས་དཔེ་ཆ་བལྟ་རྒྱུ་ནི་གྲྭ་པས་བྱེད་པ་རེད་ཅེས་ཟེར་བ་སོགས་མི་བྱེད་པར། མི་ཚེ་འཆམ་པོ་དང་སྐྱིད་པོ་ཡོང་བ་ཞིག་ཡོང་ཐབས་སུ་ནང་པའི་སེམས་ཁམས་རིག་པར་སློབ་གཉེར་གནང་དགོས་པ་དང་། རིམ་བཞིན་ཆོས་དང་མ་འབྲེལ་བའི་ཐོག་ནས་སློབ་གྲྭ་ཁག་གི་ནང་རིགས་ལམ་སོགས་བསླབ་དགོས་སྐོར་དང་། འཛམ་གླིང་མ་འཇིགས་བར་དུ་ནང་པ་ཚོས་སངས་རྒྱས་པའི་གཞུང་ཚན་རིག་དང་མཐུན་ཞིང་། རིགས་ལམ་གྱི་ཐོག་ནས་གཏན་ལ་ཕབས་ཡོད་པ་དེར་བདག་པོ་ཡག་པོ་ཞིག་བརྒྱབ་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་གསུངས་འདུག
དེར་མཐུད་རྒྱལ་སྤྱིའི་དགེ་ལྡན་ལྷན་ཚོགས་ཀྱིས་ཇི་ལྟར་གསོལ་འདེབས་ཞུས་པ་བཞིན་༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་བརྒྱུད་དད་ལྡན་མང་ཚོགས་ལ་རྗེ་ཙོང་ཁ་པས་མཛད་པའི་བྱང་ཆུབ་སེམས་དཔའ་དང་འབྲེལ་བཀའ་ཆོས་སྩལ་གནང་ཡོད་པ་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། བར་སྐབས་རྒྱ་གར་ནང་ཏོག་དབྱིབས་གཉན་རིམས་ཤུགས་ཆེན་པོ་བྱུང་ཡོད་པ་དང་། ད་ལྟ་རིམ་བཞིན་གནས་ཚུལ་བཟང་ཕྱོགས་སུ་འགྲོ་བཞིན་ཡོད་པ་ལྟ་བུ་ཞིག་ཏུ་སྣང་བ་དང་། མོན་དང་ལ་དྭགས། བལ་ཡུལ་གྱི་ཕྱོགས་སུའང་ནད་ཡམས་ཀྱི་དཀའ་ངལ་འོག་ཡོད་སྟབས། ས་ཁུལ་དེ་གའི་ནད་ཡམས་རིམ་བཞིན་ཞི་ཐུབ་ཐབས་སུ་སྒྲོལ་མའི་གཟུངས་སྔགས་གསོག་སྒྲུབ་གང་ཐུབ་བྱེད་དགོས་པ་དང་། གཟུངས་སྔགས་བགྲངས་ན་ག་ལེར་ནད་ཡམས་དེ་ཞི་ནས་འགྲོ་བ་ཞིག་ལ་རེ་བ་བྱེད་ས་ཞིག་ཡོད་སྟབས། སྒྲོལ་མའི་གཟུངས་སྔགས་གང་ཐུབ་གསོག་སྒྲུབ་བྱས་ན་ནད་པ་རྣམས་ལ་ཕན་པ་མ་ཟད། ཡུལ་ཁམས་སྤྱི་ལ་ནད་ཡམས་དེ་འདྲ་མི་ཡོང་བར་ཕན་ཐོགས་ཡོད་སྐོར་དང་། མགོན་པོ་གང་ཉིད་ནས་ཞོགས་ལྟར་ཐུབ་དབང་གི་སྐུ་མདུན་ནས་སྒྲོལ་མའི་གཟུངས་སྔགས་གསོག་གིན་ཡོད་པ་དང་། བརྒྱ་ཕྲག་ཁ་ཤས་ཤིག་སྤྱིའི་འཛམ་གླིང་ཡོངས་དང་ཡང་སྒོས་སུ་རྒྱ་གར་ནང་ནད་ཡམས་མྱུར་དུ་ཞི་བའི་སྨོན་ལམ་གསུང་གི་ཡོད་པ་དང་། ཡང་ཕྲེང་སྐོར་གཅིག་ཙམ་སྐུ་སྒེར་ལ་ནད་ཡམས་དེའི་རིགས་མི་ཡོང་བར་དམིགས་ཏེ་གསོག་སྒྲུབ་མཛད་ཀྱི་ཡོད་པས། ཚང་མས་སྒྲོལ་མའི་གཟུངས་སྔགས་གསོག་དགོས་སྐོར་གྱི་བཀའ་སློབ་ལམ་སྟོན་མཛད་འདུག
གསར་འགོད་པ། ཀླུ་མགོན་ཐར།
