སྲིད་སྐྱོང་སྤེན་པ་ཚེ་རིང་མཆོག་ནས་མང་ཚོགས་ལ་གསུང་བཤད་ཐོག་མ་སྤེལ་གནང་སོང་།

སྲིད་སྐྱོང་མཆོག་ནས་འོས་བསྡུའི་འགྲན་རྩོད་ལ་བརྟེན་ནས་བསམ་ཚུལ་མཐུན་མིན་གྱི་ཕྱོགས་ཁག་ཅི་རིགས་ཡོང་རྒྱུ་ནི་ཆོས་ཉིད་ཡིན་ནའང་། སྒེར་ནད་སྤྱི་སྤུངས་དང་སྤྱི་དོན་ཐད་མི་མཐུན་པ་ཇི་བྱུང་སྒེར་གྱི་འཁོན་འཛིན་དུ་མ་བཟུང་བར་ཁ་གཏད་ངོ་མ་ཇི་བཞིན་ངོས་འཛིན་ཐུབ་པ་བྱེད་གལ་དང་། རང་ཡུལ་ཤོར་བའི་བཙན་བྱོལ་བ་ཡིན་པའི་ཆ་ནས། ང་ཚོ་ཚང་མ་བོད་ཀྱི་བདེན་མཐའ་གསལ་བའི་དམིགས་ཡུལ་སྒྲུབ་མཁན་གཅིག་གྱུར་ཡིན་ཞེས་གསུངས་སོང་།

དེ་རིང་སྔ་དྲོ་ཆུ་ཚོད་ ༡༡།༣༠ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་བོད་ཀྱི་དྲ་བརྙན་ཐད་གཏོང་བརྒྱུད་ཐོག་མར་འཚམས་འདྲི་དང་ཐུགས་རྗེ་ཆེ་ཞུ། བོད་དོན་བདེན་མཐའ་གསལ་ཐབས་དང་འཛིན་སྐྱོང་གི་ལས་དོན་བྱེད་ཕྱོགས། མང་གཙོའི་ལམ་ལུགས་ཚགས་ཚུད་དང་སྲ་བརྟན། དེ་བཞིན་གཞེན་སྐུལ་དང་སྨོན་འདུན་སོགས་ཁྱོན་པ་ཚན་ལྔ་ཅན་གྱི་དམ་འབུལ་གསུང་བཤད་ཅིག་སྤེལ་ཏེ། ༧གོང་ས་མཆོག་ནས་དམ་འབུལ་མཛད་སྒོར་བཀའ་ཆོས་བསྩལ་གནང་མཛད་པ་ནི་བསྐལ་བ་བཟང་ཞིང་། རང་ཅག་བོད་མི་སྤྱི་བོ་གནམ་བསྟན་ཡོངས་ནས་༸རྒྱལ་བ་དགྱེས་པའི་མཆོད་སྤྲིན་དུ་བཀའ་བཞིན་སྒྲུབ་པའི་འབད་བརྩོན་བྱེད་རྒྱུ་གལ་ཆེ་བ་ལྟར། འཛིན་སྐྱོང་གི་ངོས་ནས་ཀྱང་འབད་བརྩོན་ལྷོད་མེད་ཞུ་གི་ཡིན་སྐོར་གསུངས་འདུག

དེ་ཡང་སྲིད་སྐྱོང་མཆོག་ནས་ཤ་རུས་གདུང་རྒྱུད་གཅིག་པའི་གཞིས་བྱེས་བོད་རིགས་སྤུན་ཟླ་ཡོངས་དང་། རང་དབང་དང་དྲང་བདེན་ལ་དགའ་བའི་བོད་དོན་རྒྱབ་སྐྱོར་བ་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུས་པ་དང་ཆབས་གཅིག་ཏུ། ཨ་རིའི་ཕྱི་སྲིད་ལས་ཁུངས་དང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནན་སི་པེ་ལོ་སི་མཆོག དེ་བཞིན་ཐའེ་ཝན་ཕྱི་སྲིད་བློན་ཆེན་སོགས་ཀྱིས་མཚོན་པའི་རྒྱལ་སྤྱིའི་ཁྱོན་ནས་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་ཁག་དང་། བོད་དོན་རྒྱབ་སྐྱོར་ཚོགས་པ་ཁག གཞན་ཚོགས་སྡེ་ཁག་དང་། མི་སྒེར་སོགས་ནས་བདམས་ཐོན་སྲིད་སྐྱོང་ལ་འཚམས་འཕྲིན་ཞུས་གནང་བར་འཚམས་འདྲི་དང་ཐུགས་རྗེ་ཆེ་ཞུ་གི་ཡོད་སྐོར་དང་། འདི་ལོའི་འོས་བསྡུའི་ནང་འོས་འཕེན་པ་བརྒྱ་ཆ་ ༧༧ ཙམ་བྱུང་སྟེ་འོས་བསྡུའི་ལས་རིམ་ཚགས་ཚུད་དང་ཞི་འཇམ་ངང་ལེགས་འགྲུབ་བྱུང་ཡོད་པ་ནི་བོད་གཞུང་མང་གཉིས་མཉམ་རུབ་ཀྱི་སྒོ་ནས་བྱུང་བའི་བོད་མིའི་མང་གཙོའི་རྒྱལ་ཁ་ཞིག་ལ་ངོས་གནང་གི་ཡོད་སྐོར། དེ་བཞིན་དེ་རིང་ཁྲིམས་ཞིབ་པ་ཆེ་བའི་མདུན་སྲིད་སྐྱོང་གི་ལས་ཁུར་དམ་འབུལ་ཞུ་སྐབས། བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང༌།  བློ་གཏད་ཀྱི་ཐོག་ནས།  སྲིད་སྐྱོང་གིི་ལས་འཁུར་ཞུ་སྒོ་མཐའ་དག བཅའ་ཁྲིམས་ཀྱི་དགོངས་དོན་འགལ་མེད་ཐོག རང་དོན་ཕྱོགས་ལྷུང་དང༌། འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས། རང་ནུས་གང་ཐེག་ཞུ་རྒྱུའི་མཆོག་གསུམ་དཔང་བཙུགས་ཀྱིས་དམ་བཅའ་བརྟན་པོ་ཞུ་རྒྱུ་ཡིན་ཞེས་ཞུས་ཟིན་པའི་རྒྱ་ལས་ནམ་ཡང་མ་བརྒལ་པ་ཞུ་རྒྱུ་ཡིན་སྐོར་སོགས་གསུངས་སོང་།

དེ་རྗེས། བོད་དོན་བདེན་མཐའ་གསལ་ཐབས་སྐོར་ལ་གསུང་བཤད་གནང་སྐབས། གཅིག་བཀའ་ཤག་གི་ལས་འགན་གཙོ་བོ་ནི། དཀའ་ཉེན་འོག་ཚུད་པའི་བོད་དང་བོད་མིའི་ཛ་དྲག་གི་དཀའ་ངལ་རྣམས་སེལ་ཐབས་བྱ་རྒྱུ་དེ་ཡིན་པ་དང་། དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར། བོད་ཕྱི་ནང་གི་མང་ཚོགས་ཀྱི་ཚད་མཐོའི་རྒྱབ་སྐྱོར་ཐོབ་ཅིང་། བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཀྱིས་གཏན་ལ་ཕབ་པའི་དབུ་མའི་ལམ་ལ་བརྟེན་ནས་རྒྱ་ནག་གཞུང་དང་མཉམ་དུ་བོད་རྒྱ་གཉིས་སྨན་དང་། འབྲེལ་གཏུག་གྲོས་མོལ། འཚེ་མེད་ཞི་བ་བཅས་ཀྱི་རྩ་དོན་གཞི་རྩར་བཞག་སྟེ་བོད་རྒྱའི་དཀའ་རྙོག་སེལ་ཐུབ་པ་བྱུང་ན། འཛམ་གླིང་སྟེང་རྩོད་རྙོག་ཞི་འགྲིག་ལ་མིག་དཔེ་བཟང་པོ་ཡོང་རྒྱུའི་རེ་བ་འཛིན་གྱི་ཡོད། གཉིས་མཐར་ཐུག་གི་དཀའ་སེལ་མ་ཐུབ་བར་དུ། ང་ཚོས་གཞིས་ལུས་བོད་མིའི་མགྲིན་ཚབ་པ་བྱས་ཏེ། སོ་སོའི་ནུས་རྩལ་ཡོད་ཚད་མཉམ་སྤུངས་ཀྱིས་རྒྱལ་སྤྱིའི་ནང་བོད་དོན་ཞུ་གཏུག་གི་ལས་འགུལ་རྒྱ་ཆེར་སྤེལ་རྒྱུ་དང་། བོད་ཀྱི་ཁོར་ཡུག་དང་བོད་མི་རིགས་ཀྱི་ངོ་བོ་སྲུང་སྐྱོབ་བྱེད་པའི་རྩ་དོན་ཐོག་གནོད་སྐྱོན་ཇི་ཆགས་ཞིབ་འཇུག་དང་ལྟ་ཞིབ་ཟབ་ནན་ཐོག རྒྱ་ནག་གི་ནོར་འཁྲུལ་སྲིད་ཇུས་ཐེར་འདོན་བྱས་ཏེ། ཡོ་བསྲང་། མཚམས་འཇོག བཟོ་བཅོས་ཡོང་ཐབས་བཅས་ལ་འབད་བརྩོད་བྱ་རྒྱུ་དང་། དེ་མཚུངས་གཞིས་བྱེས་དབར་འབྲེལ་གཏུག་དང་། ༸གོང་ས་༸སྐྱབས་མགོན་ཆེན་པོ་མཆོག་རྒྱ་ནག་ཏུ་ཆིབས་བསྒྱུར་གྱི་ཐུགས་རེ་འགྲུབ་ཐབས་ལ་རམ་འདེགས་ཞུ་སླད། རྒྱ་གཞུང་ལ་འབྲེལ་མཐུད་ཞུ་སྒོ་གང་ཡོང་བྱ་རྒྱུ། གསུམ་མ་འོངས་པར། དུས་དང་བསྟུན་པའི་ཐབས་ལམ་འགྱུར་བ་གཏོང་དགོས་གྱུར་ཚེ། དེ་ཡང་མང་གཙོའི་ལམ་ལུགས་དང་མཐུན་པར་འབྲེལ་ཡོད་ལ་གོ་བསྡུར་སྦྱངས་བཤད་བརྒྱུད་ཐག་གཅོད་བྱ་རྒྱུ། བཞི་འཛིན་སྐྱོང་གི་ངོས་ནས་རྒྱ་གར་དང་། ཨ་རིས་གཙོས་པའི་རྒྱལ་སྤྱིའི་ནང་འབྲེལ་བ་བྱེད་སྐབས། དངོས་ཡོད་གནས་ཚུལ་དང་མཐུན་པར་བབ་ལྷིང་བརྟན་གསུམ་གྱི་སྒོ་ནས་འབྲེལ་འཇོག་བྱ་རྒྱུ། ལྔ་རྒྱ་ནག་གཞུང་གིས་འདི་ཟླའི་ཚེས་ ༢༡ ཉིན་རྒྱ་ནག་དབུས་གཞུང་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་ནས་བོད་ཞི་བའི་བཅིངས་འགྲོལ་དང་། དར་རྒྱས་གོང་འཕེལ་ཞེས་པའི་རྒྱབ་ཤ་དཀར་པོའི་དེབ་ཅིག་འདོན་འགྲེམས་བྱས་འདུག  དེའི་ཐོག་ད་ལྟ་བརྗོད་འདོད་པ་ནི། དེབ་དེར་འཁོད་པའི་བརྗོད་དོན་ཐོག་ང་ཚོའི་ངོས་ནས་གནས་སྟངས་ངོ་མ་མྱང་བརྩད་བྱེད་པོ་གཏོང་ཆོག་ཡིན་། ཞེས་གསུངས་སོང་།

མང་གཙོའི་ལམ་ལུགས་ཚགས་ཚུད་དང་སྲ་བརྟན་སྐོར་ལ་སྲིད་སྐྱོང་མཆོག་གིས། བཀའ་ཤག་གི་ངོས་ནས། གཅིག་ཆེས་མཐོའི་ཁྲིམས་ཞིབ་ཁང་ལ་ཆེ་མཐོང་དང་བརྩི་བཀུར་ཞུས་ཏེ་ཁྲིམས་ལུགས་དབང་འཛིན་གྱི་ལས་དོན་ནུས་ལྡན་ལམ་ལྷོང་འབྱུང་བར་མཐུན་འགྱུར་གང་ཡོང་ཞུ་རྒྱུ་དང་། གཉིས་བོད་མི་མང་སྤྱི་འཐུས་ལྷན་ཚོགས་ལ་འགན་ཁུར་བའི་ཐོག་ནས་གྲོས་ཚོགས་ཀྱི་ལས་དོན་ཁག་ལ་མཐུན་འགྱུར་གང་ཡོད་ཞུ་རྒྱུ། གསུམ་རང་དབང་ཅན་གྱི་སྡེ་ཚན་ཁག་གི་རང་དབང་ལ་དོ་ཕོག་མ་སོང་བའི་སྒོ་ནས་ལས་དོན་ཡར་རྒྱས་ཚགས་ཚུད་ཀྱི་ཕྱོགས་སུ་འགྲོ་བར་མཐུན་འགྱུར་སྦྱར་རྒྱུ། བཞི་གསར་འགྱུར་བརྒྱུད་ལམ་ཁག་མིང་དོན་མཚུངས་པའི་མང་གཙོའི་ཀ་བ་བཞི་པ་ཆགས་ཐབས་སུ་འཛིན་སྐྱོང་གི་ངོས་ནས་རང་དབང་དང་ཆེ་མཐོང་ཕུལ་བའི་ཐོག་ནས་སྒྲིག་འཛུགས་ཀྱི་མཐུན་རྐྱེན་གང་ཡོད་སྦྱར་རྒྱུ། ལྔ་གཞུང་ཁོངས་མ་ཡིན་པའི་ཚོགས་སྡེ་ཁག་ལ་ལུང་ཚན་དང་ཆོས་བརྒྱུད། ལྟ་བ་ལངས་ཕྱོགས་ཀྱི་དབྱེ་བ་མེད་པར་ནུས་པ་མཉམ་སྤུངས་བྱེད་ཕྱོགས་གོ་བསྡུར་བྱ་རྒྱུ། དྲུག་ས་གནས་སྒྲིག་འཛུགས་ཁག་དང་། མང་ཚོགས་ལ་འཛིན་སྐྱོང་གི་ལས་དོན་ཁག་ཕྱི་གསལ་ནང་གསལ་བྱས་ཐོག  འཛིན་སྐྱོང་གི་ངོས་ནས་བྱེད་སྒོ་མཐའ་དག་རྒྱ་ཆེའི་མང་ཚོགས་ལ་འགན་ཁུར་དང་། ལན་འདེབས་དང་རྩིས་རྒྱག་ཞུ་རྒྱུ་དང་། འཛིན་སྐྱོང་གི་ལས་དོན་བྱེད་ཕྱོགས་དང་འབྲེལ།་གཅིག་འཛིན་སྐྱོང་གི་ལས་དོན་གྱི་ཐོག་མར་བཀའ་བློན་རྣམ་པ་དང་ལས་བྱེད་རྣམ་པ་མང་ཚོགས་ལ་སྲི་ཞུ་ཞབས་འདེབས་སྒྲུབ་མཁན་ཡིན་པའི་ངོས་འཛིན་གསལ་པོ་བཟོས་ཐོག  ལས་དོན་བྱེད་སྐབས་ཀྱང་མང་ཚོགས་ལ་སྲི་ཞུ་སྒྲུབ་རྒྱུའི་དམིགས་ཡུལ་འདོར་མི་ཆོག་པའི་བཀོད་མངགས་ནན་པོ་བྱ་རྒྱུ། གཉིས་བཀའ་ཤག་གིས་གཏན་འབེབས་བྱས་པའི་སྲིད་ཇུས་འོག་ལས་འཆར་ལག་བསྟར་བྱེད་སྐབས་ལས་བྱེད་པའི་ཉམས་མྱོང་དང་བསྒྲིལ་ནས་ནུས་པ་མཉམ་སྤུངས་བྱ་རྒྱུ། གསུམ་སྤྱི་ནོར་༸གོང་ས་༸སྐྱབས་མགོན་པོ་མཆོག་གིས་དབུས་པའི་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པའི་བཀའ་སློབ་ལམ་སྟོན་གཞིར་བཟུང་། རིས་སུ་མ་ཆད་པའི་དགོན་སྡེ་ཁག་གི་བོད་ཀྱི་ཆོས་རིག་རྒྱུན་འཛིན་དར་སྤེལ་གྱི་ལས་དོན་ཁག་ལ་རམ་འདེགས་དང་མཐུན་འགྱུར་གང་འོས་ཞུ་རྒྱུ། བཞི་དོན་སྙིང་ལྡན་པའི་ཤེས་ཡོན་སྦྱོར་སྤྲོད་ཆེད། སློབ་ཕྲུག་གི་ཁེ་ཕན་གཙོ་བོར་བཞག་སྟེ་སློབ་གྲྭ་ཁག་ཟླ་བསྒྲིལ་དང་། སློབ་གཉེར་གྱི་མཐུན་རྐྱེན་ཡར་རྒྱས་གང་ཐུབ་གཏོང་རྒྱུ། ལྔ་བོད་མི་འདུས་སྡོད་ས་གནས་ཁག་ཡར་རྒྱས་ཚགས་ཚུད་སླད་གཞི་རིམ་གྱི་དགོས་མཁོ་ཁག་སྐོང་སྒྲུབ་ཐོག དམིགས་སུ་བཀར་ནས་དབུལ་ཕོངས་ལ་ལྟ་སྐྱོང་བྱ་རྒྱུ་དང་། ལས་གཞིའི་ངོ་བོ་ལ་གཞིགས་པའི་སྟེང་ནས་གཤམ་དང་གཤམ་ནས་སྟེང་དུ་འཆར་སྒྲིག་ལག་བསྟར་བྱ་རྒྱུ། དྲུག་ལུས་སེམས་གཉིས་ཀྱི་འཕྲོད་བསྟེན་གལ་ཆེར་བཟུང་སྟེ། ནད་གཞི་སྔོན་འགོག་དང་སྨན་བཅོས་ལ་ཤུགས་སྣོན་དང་། ནད་གཅོང་དང་རྒས་འཁོགས་ལ་ལྟ་སྐྱོང་ཚད་ལྡན་ཡོང་ཐབས་འབད་བརྩོན་བྱ་རྒྱུ། བདུན་བོད་གཞུང་མང་གཉིས་དཔལ་འབྱོར་ཐོག་རང་ཁ་རང་གསོ་ཡོང་བའི་དམིགས་ཡུལ་འགྲུབ་ཆེད། འཆར་གཞི་ལྡན་པའི་སྒོ་ནས་ཚོང་ལས་དང་། ལག་ཤེས་བཟོ་ལས། གསར་གཏོད་ལས་གཞི། གཞིས་མི་དང་གཞིས་ཟུར་དབར་གཅིག་ཕན་གཅིག་གྲོགས་ཀྱི་ལས་གཞི་བཅས་པར་མཐུན་འགྱུར་གང་ཡོད་སྦྱར་རྒྱུ། བརྒྱད་བོད་མིའི་སྤྱི་ཚོགས་ནང་ཤེས་ཡོན་ཅན་དང་། གཞོན་སྐྱེས་ཀྱི་ནུས་པ་སྐུལ་སྤེལ་ཐོག བོད་མིའི་སྒྲིག་འཛུགས་དང་མཉམ་རུབ་ཀྱིས་ཆབ་སྲིད་གཙོ་བོར་གྱུར་པའི་ལས་འཆར་གང་མང་སྤེལ་རྒྱུ། དགུ་སྲིད་སྐྱོང་གི་ངོས་ནས་བོད་རྒྱའི་དཀའ་རྙོག་སེལ་ཐབས་དང་། སྲིད་གཞུང་ཁག་ལ་འབྲེལ་བ། བོད་མིའི་སྒྲིག་འཛུགས་དང་མང་ཚོགས་དབར་འབྲེལ་བ་དམ་ཟབ་ཡོང་བའི་འགན་ཁུར་གཙོ་བོ་ལེན་རྒྱུ། བཅུ་བཀའ་བློན་རྣམ་པས་སོ་སོའི་ལས་བགོས་ལྟར་གྱི་ལས་འགན་སྒྲུབ་རྒྱུའི་ཐོག  ལས་དོན་སྒྲུབ་སྐབས་༧གོང་ས་༧སྐྱབས་མགོན་ཆེན་པོ་མཆོག་ཐུགས་བསུན་མི་ཡོང་བའི་འགན་ཁུར་ལེན་ཐུབ་དགོས་པའི་ཆ་རྐྱེན་ལྟར་སྒྲུབ་ཐབས་བཀོད་མངགས་བྱེད་ཀྱི་ཡིན། བཅུ་གཅིག་བོད་མིའི་སྒྲིག་འཛུགས་ཀྱི་ལས་དོན་ཁག་འཆར་འགོད་ཚད་ལྡན་དང་། ལག་བསྟར་ནུས་ཐོན་གྱི་གཞི་མར་བཙན་བྱོལ་བོད་མིའི་སྤྱི་ཡོངས་གནས་སྟངས་གསལ་པོར་རྟོགས་ཐུབ་པའི་མི་འབོར་ཞིབ་བཤེར་གྱི་ལས་གཞི་སྤུས་དག་ཅིག་གང་མགྱོགས་འགོ་འཛུགས་བྱ་རྒྱུ་ཡིན་ཞེས་གསུངས་སོང་།

མཇུག་ཏུ་སྲིད་སྐྱོང་མཆོག་ནས་འོས་བསྡུའི་འགྲན་རྩོད་ལ་བརྟེན་ནས་བསམ་ཚུལ་མཐུན་མིན་གྱི་ཕྱོགས་ཁག་ཅི་རིགས་ཡོང་རྒྱུ་ནི་ཆོས་ཉིད་ཡིན་ནའང་། སྒེར་ནད་སྤྱི་སྤུངས་དང་སྤྱི་དོན་ཐད་མི་མཐུན་པ་ཇི་བྱུང་སྒེར་གྱི་འཁོན་འཛིན་དུ་མ་བཟུང་བར་ཁ་གཏད་ངོ་མ་ཇི་བཞིན་ངོས་འཛིན་ཐུབ་པ་བྱེད་གལ་དང་། རང་ཡུལ་ཤོར་བའི་བཙན་བྱོལ་བ་ཡིན་པའི་ཆ་ནས། ང་ཚོ་ཚང་མ་བོད་ཀྱི་བདེན་མཐའ་གསལ་བའི་དམིགས་ཡུལ་སྒྲུབ་མཁན་གཅིག་གྱུར་ཡིན་ཞིང་། སྤྱི་ཚོགས་ནང་འགྲིག་མ་འགྲིག་གི་རྩོད་རྙོག་ཕྲན་བུ་བྱུང་སྐབས། ང་ཚོས་མང་གཙོའི་སྒྲིག་འཛུགས་དང་ཁྲིམས་སྒྲིག་གི་ཐོབ་ཐང་ལོངས་སུ་སྤྱད་དེ་ཚུལ་མཐུན་གྱི་ཐོག་ནས་རྩོད་པ་སེལ་ཆོག་པ་དང་། འཛིན་སྐྱོང་གི་ངོས་ནས་རྒྱུ་མཚན་དང་ལྡན་པའི་བསམ་ཚུལ་དང་སྐྱོན་བརྗོད་ཀྱི་སྨྲ་བརྗོད་རང་དབང་ལ་བརྩི་བཀུར་བྱས་ཏེ། དེར་བདག་སྤྲོད་དང་ཉན་འཇོག་བྱེད་ངེས་ཡིན་པས། རྒྱ་ཆེ་མང་ཚོགས་ཀྱི་ངོས་ནས་ཀྱང་མཉམ་རུབ་དང་མཉམ་ལས་ཀྱི་འགན་ཁུར་སྔར་ལྷག་གནང་གལ་ཆེ་བའི་འབོད་སྐུལ་ཞུས་པ་དང་སྦྲགས། ཁྲིམས་ཀྱིས་དབང་བསྒྱུར་གཙིགས་སྣང་བཟུང་བའི་སྤྱི་སྙོམས་དྲང་བདེན་དང་། རང་གཞན་རོགས་གསུམ་གདུང་ཤུགས་གཅིག་ཏུ་བསྒྲིལ་བའི་ནུས་པ་མཉམ་སྤུངས། རྒྱུན་མཐུད་ཡར་རྒྱས་ཕུགས་དམིགས་སུ་གཏད་པའི་གོམ་པ་མདུན་སྤོ་བཅས་སྲོག་སྙིང་དུ་བཟུང་བའི་བསྒྲགས་ཚིག་འདི་གསུམ་ལག་ལེན་དོན་འཁྱོལ་གྱི་སྐབས་ཤིག་བྱུང་བ་ཡིན་ན། བོོད་དོན་བདེན་མཐའ་གསལ་ཐབས་དང་། བཙན་བྱོལ་བོད་མིའི་སྤྱི་ཚོགས་བདེ་དོན་སྒྲུབ་ཐབས་ཀྱི་བྱེད་སྒོ་རྣམས་བཟང་ཕྱོགས་སུ་ཁྲིད་ཐུབ་པར་མཐུན་རྐྱེན་ངེས་ཅན་ཞིག་འཛོམས་ཡོད་པའི་ཡིད་ཆེས་བྱེད་ཆོག་ཅེས་ཡོངས་ཁྱབ་ཏུ་ཞུས་ཟིན་པ་ལྟར། དེ་རིང་ནས་བཟུང་སྟེ་ང་ཚོ་ཚང་མ་ལེའུ་གསར་པ་ཞིག་འབྱེད་པའི་གོམ་ཁ་གསར་པ་ཞིག་སྒྱུར་འགོ་འཛུགས་དགོས་ཀྱི་རེད། ཡང་ཕྱི་ཚེས་ ༢༣ ཉིན་མགོ་ལོག་ཁུལ་དུ་ས་ཡོམ་གྱི་གནོད་པ་བྱུང་འདུག་སྟེ། མི་ཕྱུགས་ཀྱི་ཚེ་སྲོག་ལ་གནོད་སྐྱོན་ཆེ་བ་བྱུང་མི་འདུག་ཀྱང་། རང་རེའི་སྤུན་ཟླ་ཚོར་འབྱུང་བའི་བར་ཆད་བྱུང་བར་གདུང་སེམས་མཉམ་བསྐྱེད་ཞུ་བཞིན་ཡོད་སྐོར། དེ་བཞིན། ད་ཆ་འཛིན་སྐྱོང་གི་ལས་དོན་ཛ་དྲག་ཆེ་ཤོས་ནི་རྒྱ་བལ་གཉིས་ཀྱི་བོད་མིའི་གཞིས་སྒར་ཁག་ཏུ་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་སེལ་ཐོག་དབུས་དང་ས་གནས་ཁག་གི་ཛ་དྲག་ཚོགས་ཆུང་ཁག་བསྐྱར་སྒྲིག་བྱས་ཏེ། དགོས་ངེས་མཐུན་རྐྱེན་སྦྱོར་སྤྲོད་བྱ་རྒྱུ་དེ་ཡིན་ཅིང་། ཉིན་གཉིས་ཀྱི་རྗེས་སུ་འཛིན་སྐྱོང་གི་ངོས་ནས་བྱེད་ཐབས་དང་ལམ་སྟོན་བྱེད་སྒོ་ཁག་གསལ་བསྒྲགས་ཞུ་རྒྱུ་ཡིན་སྐོར་སོགས་གསུངས་སོང་།

གསར་འགོད་པ། སྐལ་བཟང་སྦྱིན་པ།