ཨ་རིའི་ཕོ་བྲང་དཀར་པོའི་ནང་ས་ག་ཟླ་བ་སྲུང་གཙི་གནང་།

ཟླ་འདིའི་ཕྱི་ཚེས་ ༢༦ སྟེ་ས་ག་ཟླ་བའི་ཚེས་ཆེན་ ༡༥ ཉིན་ཨ་མེ་རི་ཀའི་ཕོ་བྲང་དཀར་པོའི་ནང་དུ་མར་མེ་མཆོད་འབུལ་གྱི་འདུ་འཛོམས་གནང་ཡོད་འདུག

ཨ་རིའི་ལོ་རྒྱུས་ནང་ཐེངས་དང་པོར་སངས་རྒྱས་བཅོམ་ལྡན་འདས་ཀྱི་འཁྲུངས་སྐར་དང་སངས་རྒྱས་པ། སྐུ་མྱ་ངན་ལས་འདས་པའི་ཉིན་མོ་ཕོ་བྲང་དཀར་པོའི་ནང་དུ་སྲུང་གཙི་ཞུས་ཡོད་པ་མ་ཟད། ཉིན་དེར་ཨ་རིའི་སྲིད་འཛིན་བྷའེ་ཌིན་མཆོག་ (Joe Biden) གིས་ཕོ་བྲང་དཀར་པོ་ནས་ས་ག་ཟླ་བའི་ཚེས་ ༡༥ དང་འབྲེལ་བའི་ཡོངས་ཁྱབ་གསུང་འཕྲིན་ཞིག་གནང་བའི་ནང་དུ། ང་དང་ (Jill) གཉིས་ཀྱིས་སངས་རྒྱས་བཅོམ་ལྡན་འདས་ཀྱི་འཁྲུངས་སྐར་དང་སངས་རྒྱས་པ། སྐུ་མྱ་ངན་ལས་འདས་པའི་ཉིན་མོར། ཨ་རི་དང་འཛམ་གླིང་ཡོངས་སུ་ཡོད་པའི་ནང་པ་རྣམས་ལ་འཚམས་འདྲི་ཞུ་ཡི་ཡིན། ནང་པ་སངས་རྒྱས་པའི་ཆོས་ལུགས་ཀྱིས་སྙིང་རྗེ་དང་གུས་ཞབས། རང་ཤེད་མེད་པ། བཟོད་སྒོམ་གྱི་སྐོར་ལ་དྲན་སྐུལ་བྱེད་ཀྱི་ཡོད་པ་རེད། འདིའི་ཉིན་མོར་ཨ་རིའི་ནང་དུ་ཡོད་པའི་ནང་པ་རྣམས་ཀྱིས་ང་ཚོའི་སྤྱི་ཚོགས་དང་རྒྱལ་ཁབ་ནང་དུ་ལེགས་བཅོས་བྱས་ཡོད་པ་དང་། ང་ཚོ་ཚང་མས་གཅིག་སྒྲིལ་གྱིས་འབྱུང་འགྱུར་མི་ཚེ་ལེགས་པོ་ཡོང་བའི་ཆེད་དུ་ལས་ཀ་བྱེད་ཀྱི་ཡོད་པ་རེད། ཅེས་གསུངས་འདུག

མར་མེ་མཆོད་འབུལ་གྱི་མཛད་སྒོ་དེ་ཨ་རིའི་རྒྱལ་སྤྱིའི་ནང་པའི་མཐུན་ཚོགས་(International Buddhist Association of America)ནས་གཙོ་སྐྱོང་གནང་ཡོད་པ་དང་། མཛད་སྒོ་དེའི་ཐོག་ནང་པའི་བླ་མ་ཁག་ཅིག་གདན་འདྲེན་ཞུས་པའི་ཁྲོད་དར་ཐང་རིན་པོ་ཆེ་མཆོག་ཀྱང་ཕེབས་ནས་མར་མེ་ཞལ་འབྱེད་དང་སྨོན་ལམ་གསུང་འདོན་གནང་ཡོད་འདུག

ཨ་རིའི་རྒྱལ་སྤྱིའི་ནང་པའི་མཐུན་ཚོགས་ཀྱི་འགན་འཛིན་དབང་མོ་ (Wangmo Dixey)ལགས་ཀྱིས། ཨ་རིར་ནང་ཆོས་ཉམས་ལེན་གནང་མཁན་གྱི་སྲོལ་རྒྱུན་རྩ་ཆེན་པོ་གསུམ་ནས་སྨོན་ལམ་འདེབས་པ་དེ་ངོ་མཚར་ཅན་ཞིག་རེད་འདུག སངས་རྒྱས་བཅོམ་ལྡན་འདས་ནས་ཆོས་འཆད་པའི་ཉིན་མོ་སྲུང་གཙི་བྱེད་པའི་ཉིན་མོ་དེ་འདྲ་བྱུང་བ་ནི་རྟེན་འབྲེལ་བཟང་པོ་རེད། ང་ཚོའི་ངོས་ནས་དེ་རིང་གི་ཉིན་མོར་སྨོན་ལམ་འདེབས་པ་དེས་མི་མང་ཡོངས་དང་། དམིགས་བསལ་གྱིས་རྒྱ་གར་ནང་ཡོད་པའི་ང་ཚོའི་མཆེད་གྲོགས་ཕོ་མོ་རྣམས་ལ་ཞི་བདེ་དང་དྲག་སྐྱེད་ཡོང་བའི་རེ་བ་ཡོད། དེ་བཞིན་ཨ་རིའི་ཕོ་བྲང་དཀར་པོ་ནས་འཕྲོས་པའི་མར་མེའི་འོད་ཀྱིས་འཛམ་གླིང་ཡོངས་ལ་རྣམ་དཔྱོད་དང་ཞི་བདེ་ཡོང་བའི་རེ་བ་ཡོད་སྐོར་བརྗོད་འདུག

གསར་འགོད་པ། བསྟན་འཛིན་ཕུར་བུ།