༸གོང་ས་རྒྱལ་བ་རིན་པོ་ཆེ་མཆོག་གིས་ཚན་རིག་པ་ཚད་ལྡན་ཞིག་ལ་ཆ་བཞག་ན་འགྲོ་བ་མི་སྤྱིའི་བདེ་སྡུག་སྐོར་ལ་དགོངས་པ་བཞེས་ཀྱི་རེད་མ་གཏོགས་ངའི་རྒྱལ་ཁབ་དང་ང་ཚོའི་ཆོས་ལུགས་ཟེར་བའི་བསམ་བློ་གཙོ་བོ་འཛིན་གྱི་མ་རེད་ཅེས་གསུངས།
དེ་རིང་སྔ་དྲོའི་ཆུ་ཚོད་ ༩ པའི་ཐོག་ཡུ་རོབ་ཀྱི་སེམས་དང་སྲོག་གི་ཚོགས་པའི་གོ་སྒྲིག་འོག ༸གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་བརྒྱུད། ཚན་རིག་པ་སྐོར་ཞིག་དང་ལྷན་དུ་ལྷོ་ཨ་མེ་རི་ཁའི་རྒྱལ་ཁབ་ཅི་ལི་(Chile) ནས་ཡིན་པའི་སྐྱེ་དངོས་རིག་པ་བ་དང་དབང་རྩའི་ཚན་རིག་པ་འདས་པོ་སྐུ་ཞབས་ཧྥ་རན་སི་ཁོ་ཝ་རེ་ལ་ (Francisco Varela) ལགས་ལ་རྗེས་དྲན་དང་འབྲེལ། འཛམ་གླིང་བཟང་ཕྱོགས་སུ་སྐྱོད་ཚུལ་ཞེས་པའི་བརྗོད་གཞིའི་ཐོག་བགློ་གླེང་མཛད།
བགྲོ་གླེང་སྟེང་སྐུ་ཞབས་ཧྥ་རན་སི་ཡི་སྐོར་ལ་༧གོང་ས་མཆོག་གིས། ངོས་རང་ལོ་ན་ཆུང་དུས་སྐབས་ནས་འཕྲུལ་ཆས་རིགས་ལ་དམིགས་བསལ་དོ་སྣང་བྱེད་ཀྱི་ཡོད། དེ་དུས་གློག་བརྙན་སྟོན་རྒྱུའི་འཕྲུལ་ཆས་ (Projector) ཤིག་ཡོད་པ་རེད། འཕྲུལ་འཁོར་འཁོར་བའི་ནུས་ཤུགས་ལ་བརྟེན་ནས་གློག་སྒྲུབ་པ་མཐོང་བས་འདི་ལ་དམིགས་བསལ་གྱིས་ཡིད་འཕྲོག་སྟེ་ཐོག་མའི་དབྱིངས་བསླེབས་སོང་། ཆུང་དུས་ནས་ནང་པའི་ལྟ་གྲུབ་སྐོར་སློབ་སྦྱོང་བྱས་ཡོད་པ་རེད། ཝ་རེ་ལ་ཐོག་མར་མཇལ་བའི་སྐབས་སུ་ཕྱོགས་གཅིག་ནས་ཁོ་རང་ཚན་རིག་པ་ཆགས་ཀྱི་ཡོད་པ་རེད། ཚན་རིག་པ་ཡིན་པ་ཙམ་དུ་མ་ཟད། ཕྱོགས་གཞན་ཞིག་ནས་ནང་ཆོས་ལ་དབྱིངས་ཡོད་པ་ཞིག་རེད་འདུག ང་ཚོ་གྲོས་མོལ་བྱེད་པའི་སྐབས་སུ་ནང་ཆོས་སྐོར་ལ་བཀའ་མོལ་ཞུས་པ་ཡིན་ན་ནང་པའི་ཞྭ་མོ་གྱོན་ནས་བཀའ་མོལ་ཞུ་ཡི་ཡིན་གསུང་གི་རེད། ཡང་ཚན་རིག་སྐོར་ཞུས་པའི་སྐབས་སུ་ཚན་རིག་གི་ཞྭ་མོ་གྱོན་ནས་བཀའ་མོལ་གནང་གི་རེད། ནང་ཆོས་ལ་དབྱིངས་ཡོད་པ་ཞིག་དང་ཚན་རིག་ལ་ཤེས་རྟོགས་ཡོད་མཁན་མི་འདི་ངོས་རང་ལ་དགོས་འདུག་དྲན་བྱུང། ངོས་རང་གི་ངོ་ཤེས་པའི་ནང་ནས་ཁོ་རང་ངོས་རང་གི་ཡིད་འཕྲོག་ས་ཞིག་ཆགས་ཀྱི་ཡོད་པ་རེད། ངོས་ཀྱི་སྡོད་ཁང་ནང་ག་དུས་ཡིན་རུང་ཁོང་གི་སྐུ་པར་ཉར་ནས་བསྡད་ཡོད། ཅེས་གསུངས་ཡོད་འདུག
མགོན་པོ་ཁོང་གིས་མུ་མཐུད། སེམས་འདི་སྤྱང་གྲུང་དོད་པོ་ཞིག་རེད་འདུག དེ་ཡང་སོ་སོའི་ངོས་ནས་བསམ་བློ་གང་ཡིན་རུང་གཏང་རྒྱུ་ཡོད་པ་དང་སྒོམ་གང་ཡིན་རུང་བརྒྱབ་རྒྱུ་ཡོད་པ་ཞིག་འདུག དེ་ལ་བརྟེན་ནས་སེམས་ལ་བཟང་ཕྱོགས་ཀྱི་འགྱུར་ལྡོག་འགྲོ་ཡི་ཡོད་པ་དང་སྒོམ་བརྒྱབ་ནས་བསམ་བློ་བཟང་དུ་གཏོང་རྒྱུ་ཡོད་པ་ཞིག་རེད། བསམ་བློ་བཟང་ཕྱོགས་སུ་བསྐྱོད་པའི་དབང་གིས་ནང་གི་སེམས་ཀྱི་ཞི་བདེ་ཡོང་ཐུབ་ཀྱི་ཡོད་པ་རེད། དེ་ནས་རིམ་གྱིས་ཚན་རིག་པ་མང་པོའི་མཉམ་དུ་ཐུག་འཕྲད་བྱུང་བ་རེད། ཝ་རེ་ལ་ལགས་ཀྱིས་ཚན་རིག་དང་ཆོས་གཉིས་དཔུང་པ་མཉམ་གཤིབ་བྱས་ནས་འགྲོ་ཐུབ་ཀྱི་ཡོད་པའི་མིག་དཔེ་བསྟན་པ་རེད། ནང་པའི་ངོས་ནས་སྐྱེ་བ་ནས་སྐྱེ་བ་ལ་ཡིད་ཆེས་བྱེད་ཀྱི་ཡོད་པ་རེད། ངོས་ཀྱི་ངོ་ཤེས་པ་ཉེ་བའི་ནང་དུ་ཝ་རེ་ལ་སྐྱེས་ཡོད་པ་ཡིད་ཆེས་བྱེད་ཀྱི་ཡོད། ལས་ཀྱི་འབྲེལ་བ་ཡོད་དུས་སེམས་ནང་ལ་བག་ཆགས་ཀྱི་ཁྱད་པར་ཡོད་རེད་མ་གཏོགས་རྩ་བའི་འགྲོ་བ་སེམས་ཅན་ཡིན་པ་གཅིག་གྱུར་དང་འགྲོ་བ་སེམས་ཅན་ནང་ནས་མི་ཡིན་པ་གཅིག་གྱུར་རེད། ཁོ་རང་ངོས་ཀྱི་མི་ཚེ་འདིའི་ནང་དམིགས་བསལ་གྱི་འབྲེལ་བ་ཆགས་ཀྱི་ཡོད་པ་རེད། ངོས་རང་ལོ་བཅུ་བཅོ་ལྔ་མུ་མཐུད་ནས་གནས་པ་ཡིན་ན་ཝ་རེ་ལ་དང་འབྲེལ་བའི་ཐོག་ནས་བཀའ་མོལ་གནང་ཐུབ་མཁན་ཞིག་འཕྲད་ཀྱི་རེད་བསམ་གྱི་འདུག དེར་བརྟེན། དེ་རིང་གོ་སྐབས་འདི་དང་བསྟུན་ནས་ཁོང་གི་རྗེས་དྲན་དང་འབྲེལ་ནས་ཁོང་གི་སྐོར་ལ་བཀའ་མོལ་ཞུ་རྒྱུ་བྱུང་བ་དགའ་པོ་ཡོད། ཁོང་གི་སྐུ་ཟླ་གྲོས་མོལ་ནང་ཕེབས་ཡོད་རེད། ཚང་མ་ལ་ཐུགས་རྗེ་ཆེ་ཞུ་ཡི་ཡིན། ཞེས་གསུངས་གནང་སོང་།
ཡང་༧གོང་ས་མཆོག་གིས། འཛམ་གླིང་བཟང་ཕྱོགས་སུ་བསྐྱོད་ཚུལ་གྱི་བརྗོད་གཞི་འདི་ཞེ་དྲགས་གལ་ཆེན་པོ་རེད། ཕྱིའི་དངོས་པོའི་ཡར་རྒྱས་ཆེན་པོ་ཕྱིན་ཡོད་པ་རེད། དེ་ཡང་གོ་མཚོན་གྱི་ཡར་རྒྱས་ཤུགས་ཆེན་པོ་ཕྱིན་ཡོད་རེད། ངའི་རྒྱལ་ཁབ་དང་ང་ཚོའི་མི་རིགས་ཟེར་བའི་བསམ་བློ་ཤུགས་ཆེན་པོ་ཕྱིན་ཡོད་དུས་སོ་སོའི་རྒྱལ་ཁབ་ཀྱི་ཁེ་ཕན་ལ་གཙོ་བོར་དམིགས་པའི་དགོངས་པ་བཞེས་སྟངས་ཆགས་ཀྱི་ཡོད་པ་རེད། འགྲོ་བ་མིའི་རིགས་གཞན་གྱི་ལྟ་བ་དང་དགོངས་པ་བཞེས་ཕྱོགས་ཀྱིས་བསམ་བློའི་ལངས་ཕྱོགས་མི་མཐུན་པ་ཡོད་དུས་དེ་དག་སོ་སོའི་དགྲར་འཛིན་གྱི་ཡོད་པ་རེད། ཚན་རིག་པ་ཚད་ལྡན་ཞིག་ལ་ཆ་བཞག་ན། འགྲོ་བ་མི་སྤྱིའི་བདེ་སྡུག་སྐོར་ལ་དགོངས་པ་བཞེས་ཀྱི་རེད་མ་གཏོགས་ངའི་རྒྱལ་ཁབ་དང་ང་ཚོའི་ཆོས་ལུགས་ཟེར་བའི་བསམ་བློ་གཙོ་བོ་འཛིན་གྱི་མ་རེད། དཔེར་ན་ཝ་རེ་ལ་ཁོང་གི་དགོངས་པ་བཞེས་ཕྱོགས་དེ་ག་རང་རེད། འཛམ་གླིང་འདིའི་ནང་ཕྱིའི་དངོས་པོ་ཡར་རྒྱས་ཤུགས་ཆེན་པོ་ཕྱིན་བསྡད་ཡོད་རེད་དེ། བསམ་བློའི་ནང་སོ་སོའི་ཕྱོགས་དེ་ལ་ཕྱོགས་རིས་ཀྱི་བསམ་བློ་ཤུགས་ཆེན་པོ་ཡོད་པ་དང་འདིའི་དབང་གིས་བདག་དང་གཞན་གྱི་ཕྱོགས་རིས་བྱས་ནས་རང་གི་ཕྱོགས་དང་གཞན་གྱི་ཕྱོགས་ཟེར་བའི་དགྲ་གཉེན་གྱི་ཕྱོགས་གཉིས་བཟུང་སྟེ་འཚོ་བའི་ནང་དུ་རང་ཕྱོགས་དང་གཞན་ཕྱོགས་ཀྱི་ཆ་གཉིས་ཡོང་གི་ཡོད་པ་རེད། རྒྱ་ཆེ་ས་ནས་བསམ་བློ་བཏང་བ་ཡིན་ན་དེ་འདྲའི་བསམ་བློ་གཏོང་ཕྱོགས་དེར་འགྱུར་བ་འགྲོ་རྒྱུ་ཡོད་པ་རེད། ངོས་རང་གི་རྩ་བའི་དམ་བཅའ་བཞི་ནང་ནས་གཅིག་འཛམ་གླིང་གི་འགྲོ་བ་མི་ཚང་མ་གཅིག་གྱུར་གྱི་འདུ་ཤེས་གོང་འཕེལ་གཏོང་རྒྱུ་དེ་ཆགས་ཀྱི་ཡོད་པ་རེད། ང་ཚོ་གོ་ལ་འདིའི་ནང་ཕན་ཚུན་གཤིབ་ནས་སྡོད་དགོས་ཀྱི་ཡོད་རེད། དཔལ་འབྱོར་གྱི་ཐད་ནས་ཆ་བཞག་ན་རྒྱལ་སྤྱིའི་དཔལ་འབྱོར་ཆགས་བསྡད་ཡོད་པ་རེད། འཛམ་གླིང་གི་བྱང་ཕྱོགས་དང་ལྷོ་ཕྱོགས་གང་ཡིན་རུང་ཕན་ཚུན་འབྲེལ་བ་ཡོད་དུས་དཔལ་འབྱོར་གྱི་ཆ་ནས་འབྲེལ་བ་ཤུགས་ཆེན་པོ་རེད། གོ་ལའི་གནམ་གཤིས་འགྱུར་ལྡོག་སྒང་ནས་བསམ་བློ་བཏང་བ་ཡིན་ན་འཛམ་གླིང་གི་ཚ་དྲོད་རྒྱས་ཀྱི་ཡོད་པ་རེད། དེ་འདྲའི་དཀའ་ངལ་ཡོད་པའི་སྐབས་སུ་དཀའ་ངལ་དེ་ལ་གདོང་ལེན་མཉམ་དུ་བྱེད་དགོས་ཀྱི་ཡོད་རེད། ངའི་རྒྱལ་ཁབ་སོགས་ཕྱོགས་རིས་ཀྱི་བསམ་བློ་མ་བཏང་བར་གཅིག་གྱུར་གྱི་འདུ་ཤེས་ངེས་པར་དུ་འཆང་དགོས་ཀྱི་ཡོད་པ་རེད། ངོས་རང་བཙན་བྱོལ་དུ་བསླེབས་པ་ནས་བཟུང་རྒྱ་གར་དུ་བསྡད་པ་རེད། ལོ་རྒྱུས་ཐོག་ནས་རྒྱ་གར་དང་བོད་གཉིས་དམིགས་བསལ་གྱི་འབྲེལ་བ་ཡོད་པ་རེད། དེར་བརྟེན་གཅིག་གྱུར་གྱི་འདུ་ཤེས་རང་བཞིན་གྱི་ཡོང་གི་འདུག དེ་ཙམ་དུ་རྒྱལ་ཁབ་གཞན་ག་པར་ཕྱིན་རུང་མི་ཡིན་པ་གཅིག་གྱུར་གྱི་འདུ་ཤེས་ཀྱི་ཐོག་ནས་ཐུག་འཕྲད་བྱེད་ཀྱི་ཡོད། ང་ཚོས་འགྲོ་བ་མི་གཅིག་གྱུར་གྱི་འདུ་ཤེས་བཟུང་ན་སེམས་ནང་ཞི་བདེ་ཡོང་གི་འདུག ཞེས་བཀའ་སློབ་སྩལ་གནང་སོང་།
བཀའ་འདྲི་བཀའ་ལན་གྱི་ལས་རིམ་ནང་ཝ་རེ་ལ་ཡི་དགོངས་པ་གཙོ་བོ་དེ་ཚན་རིག་པ་སྒེར་གྱི་མི་ཚེའི་ཉམས་མྱོང་དེ་ལ་དཔག་ནས་སེམས་ཀྱི་རང་བཞིན་འཚོལ་ཐབས་བྱེད་པའི་དགོངས་པ་ཡོད་པ་རེད། ཚན་རིག་ལ་འགྱུར་བ་ཆེན་པོ་འགྲོ་བཞིན་པ་རེད། ཚན་རིག་དང་ནང་པ་གྲོས་མོལ་བྱེད་པར་བརྟེན་ཚན་རིག་གི་ཐོག་ནས་སེམས་ཀྱི་དཔྱད་པ་བྱེད་སྟངས་ཀྱི་ཐོག་ནས་འགྱུར་བ་འགྲོ་ཡོད་པའི་སྐོར་ནས་བཀའ་འདྲི་ཞུས་པར། ཚན་རིག་དེ་ཕྱིའི་དངོས་པོ་ལ་དམིགས་པ་མ་གཏོགས་ལུས་པོ་ལ་ཆ་བཞག་ན་ཀླད་པས་དཔྱད་པ་བྱེད་ཀྱི་ཡོད་པ་རེད། ཀླད་པར་རྟེན་མཁན་གྱི་ཤེས་པ་དེ་གཟུགས་ཅན་མ་རེད། ཀླད་པ་རྩད་གཅོད་བྱས་ནས་ཤེས་པའི་འགྲོ་སྟངས་ཤེས་ཐུབ་རྒྱུ་ཁག་པོ་རེད། ཚན་རིག་པས་གཟུགས་ཅན་གྱི་སྒང་ལ་ཉམས་ཞིབ་བྱེད་ཀྱི་ཡོད་རེད། དེར་བརྟེན་ཚན་རིག་པའི་ངོས་ནས་དེའི་སྒང་ལ་དཔྱད་པ་བྱ་རྒྱུ་ཁག་པོ་རེད་དྲན་གྱི་འདུག རྒྱུ་མཚན་ནི་ཚན་རིག་པ་ཚོས་གཟུགས་ཅན་གྱི་སྒང་ལ་ཉམས་ཞིབ་བྱེད་ཀྱི་ཡོད་པས་རེད། འོན་ཀྱང་རྒྱ་གར་གྱི་གནའ་རབས་ནས་སེམས་ཁམས་རིག་པ་ཡོད་པ་དེ་གནད་འགག་ཆེན་པོ་རེད། ཀླད་པ་ལས་ལོགས་སུ་ཤེས་པ་ཡོད་པ་དེ་ལ་ཞིབ་ཚགས་པོས་དཔྱད་པ་བྱས་ཏེ་སེམས་ཀྱི་ཞི་བདེ་དང་ལུས་པོའི་འཕྲོད་བསྟེན་ལ་བསམ་བློ་བཏང་ནས་སེམས་ཀྱི་ཞི་བདེ་གོང་འཕེལ་གཏོང་བ་དང་། སེམས་མ་དུལ་བའི་ཆ་དེར་སེམས་རང་གིས་རྒྱུ་མཚན་དང་བསམ་བློ་བཏང་ནས་ཤུགས་ཆུང་དུ་གཏོང་རྒྱུ་གལ་ཆེན་པོ་རེད། འདི་ནི་སྐྱེ་བ་སྔ་ཕྱི་དང་ཆོས་ཀྱི་སྐད་ཆ་མ་རེད། འཕྲལ་དུ་སེམས་ལ་ཞི་བདེ་གང་འདྲ་དགོས་པ་དང་ཁྱིམ་ཚང་དང་སྤྱི་ཚོགས་ཀྱི་ནང་དུ་སེམས་ལ་ཞི་བདེ་གང་འདྲ་དགོས་ཀྱི་ཡོད་པ་དེ་སློབ་ཚན་བརྒྱུད་བསླབ་དགོས་པ་དེ་གལ་ཆེན་པོ་མཐོང་གི་འདུག ངོས་ཀྱི་རེ་བ་ལ་ཚན་རིག་གིས་དེའི་སྐོར་ལ་ཤེས་རྟོགས་བྱུང་སྟེ་རིམ་པས་སློབ་གྲྭར་སློབ་སྦྱོང་བསླབས་ན་དྲན་གྱི་འདུག ཞེས་བཀའ་ལན་གནང་སོང་།
གསར་འགོད་པ། བསྟན་འཛིན་ཕུར་བུ།
