མགོ་ལོག་རྨ་སྟོད་རྫོང་གི་ས་ཡོམ་ཁྲོད་མི་རྒྱུ་གཉིས་ལ་གྱོང་གུད་ཚབས་ཆེན་ཕོག་པ་དང་ཁྱོན་མི་གྲངས་ཁྲི་བདུན་དང་ཕྱེད་ཀ་མ་ཟིན་ཙམ་ལ་གནོད་སྐྱོན་ཐེབས་ཡོད་འདུག
ཉེ་སྔོན་བོད་མཚོ་སྔོན་ཞིང་ཆེན་མགོ་ལོག་ཁུལ་རྨ་སྟོད་རྫོང་ཁོངས་སུ་ཚད་རིམ་ ༧་༤ ཅན་གྱི་ས་ཡོམ་བརྒྱབས་རྗེས། འདི་གའི་གསར་ཁང་ལ་ས་ཡོམ་དང་འབྲེལ་བའི་གནས་ཚུལ་རིམ་པ་འབྱོར་བ་དང་། དེ་རིང་གསར་དུ་ཤེས་རྟོགས་བྱུང་བའི་གནས་ཚུལ་ལྟར་ན། མགོ་ལོག་ཁུལ་གྱི་ས་འགུལ་དེ་མགོ་ལོག་རྨ་སྟོད་རྫོང་དང་རྨ་ཆེན་རྫོང་། པདྨ་རྫོང་། དགའ་བདེ་རྫོང་། དར་ལག་རྫོང་། ཆུ་དམར་ལེབ་རྫོང་། ཁྲི་འདུ་རྫོང་བཅས་རྫོང་བདུན་དང་ཡུལ་ཚོ་བཞི་བཅུ་བཅས་ཀྱི་ནང་བྱུང་སྟེ། ཁྱོན་མི་གྲངས་ཁྲི་བདུན་དང་ལྔ་སྟོང་ལྷག་ལ་གནོད་སྐྱོན་ཐེབས་ཡོད་པ་རེད་ལ།ཉེ་ལམ་ནས་རྒྱ་ནག་གཞུང་གིས་མགོ་ལོག་ཕྱོགས་སུ་དམག་མི་འགྲེམ་འཇོག་གིས་དམ་དྲག་བྱེད་ཀྱི་ཡོད་སྟབས། ས་ཡོམ་སྐོར་གྱི་ཞིབ་ཕྲའི་གནས་ཚུལ་འགྲེལ་བརྗོད་གནང་ཕོད་ཀྱི་མི་འདུག
འདི་གའི་གསར་འགོད་པས་བོད་ནང་གི་འབྲེལ་ཡོད་བོད་མི་ཞིག་ལ་ས་ཡོམ་སྐབས་ཀྱི་དངོས་ཡོད་གནས་སྟངས་ག་འདྲ་ཡིན་མིན་སྐོར་སྐད་ཆ་དྲིས་པར་ཁོས། ས་འགུལ་ཁྲོད་མི་རྒྱུ་གཉིས་ལ་གྱོང་གུད་ཚབས་ཆེན་ཐེབས་ཡོད་པ་རེད། འོན་ཀྱང་། ཤི་རྨས་ཐེབས་པའི་གྲངས་འབོར་ཏག་ཏག་ཅིག་བཤད་རྒྱུ་མེད། ཅེས་བརྗོད་བྱུང་བ་དང་། ཉེ་སྔོན་རྒྱ་ནག་གཞུང་གིས་ས་གནས་མང་ཚོགས་ལ་དམ་དྲག་གིས། ས་ཡོམ་དང་འབྲེལ་བའི་གནས་ཚུལ་ཕྱི་བསྒྲགས་བྱས་མི་ཆོག་པའི་ཉེན་བརྡའང་བཏང་ཡོད་པ་རེད།
ཡང་གནས་ཚུལ་མཁོ་སྤྲོད་པས། མགོ་ལོག་རྨ་སྟོད་རྫོང་དང་དགའ་བདེ་རྫོང་གཉིས་ནང་གི་དུ་ཁྱིམ་མང་པོའི་ཁང་པ་རྦད་དེ་རྩ་བརླག་ཐེབས་པ་དང་ནོར་ནག་དང་། རི་ཆེན་དང་ལམ་འགྱེལ་བ་སོགས་ཀྱི་གནས་ཚུལ་བྱུང་ཡོད་སྐོར་བརྗོད་བྱུང་བ་དང་། མགོ་ལོག་གི་ས་ཡོམ་འགུལ་ཐེངས་ ༡༠༤ བྱུང་ཡོད་པ་དང་ཐོག་མའི་ཆར་རྒྱ་ནག་གཞུང་གིས་ས་ཡོམ་གྱི་ཚད་རིམ་ ༧་༤ ཡིན་པར་ངོས་འཛིན་བྱས་ཡོད་ཀྱང་། ད་ལྟ་རྒྱ་ནག་གི་གསར་འགྱུར་བརྒྱུད་ལམ་ཚང་མའི་ནང་ཡོངས་གྲགས་ཀྱིས་མགོ་ལོག་གི་ས་འགུལ་གྱི་ཚད་རིམ་ ༥་༢༢ ཡིན་སྐོར་སྒྲོག་གི་འདུག
ཡང་ཉེ་སྔོན་འདི་གར་བོད་ནས་འབྲེལ་ཡོད་ཅིག་གིས་གནས་ཚུལ་མཁོ་སྤྲོད་གནང་བ་ལྟར་ན། བོད་མགོ་ལོག་རྨ་སྟོད་རྫོང་ཁོངས་ནས་མི་ ༢༠ ལྷག་འདས་གྲོངས་དང་། ཚད་རིམ་མི་འདྲ་བའི་རྨས་སྐྱོན་བྱུང་བ་ ༣༠༠ ལྷག་དང་། མི་ ༡༣ ལྷག་གར་སོང་ཆ་མེད་དུ་གྱུར་ཡོད་སྟབས། ས་གནས་སུ་སྨན་པ་དང་དམག་མི་ཧ་ཅང་མང་པོ་ཞིག་འབྱོར་ཡོད་སྐོར་དང་། ཐེངས་འདིའི་ས་ཡོམ་ཁྲོད་རྐྱེན་འདས་སུ་ཕྱིན་པའི་འདས་པོ་རྣམས་ཀྱི་ཁྱིམ་མིར་རྒྱ་སྒོར་ཁྲི་ལྔ་རེ་གུན་གསབ་ཏུ་སྤྲོད་ཀྱི་ཡོད་སྐོར་ཡང་བརྗོད་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
