ཧི་མ་ཅལ་གྱི་སྤྱི་ཁྱབ་བློན་ཆེན་ཟུར་བ་ཞིག་འདས་གྲོངས་སུ་ཕྱིན་པར་ཐུགས་གསོའི་གསུང་འཕྲིན་བསྩལ།

བོད་མིའི་སྒྲིག་འཛུགས་དང་༧གོང་ས་རྒྱལ་བ་རིན་པོ་ཆེ་མཆོག་ནས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་བ་སྐུ་ཞབས་ཝར་བྷ་དྷཱ་རཱ་ལགས་འདས་གྲོངས་སུ་ཕྱིན་པར་གཞུང་འབྲེལ་གདུང་སེམས་མཉམ་སྐྱེད་དང་ཐུགས་སྨོན་གནང་འདུག

དེ་རིང་སྔ་དྲོར་ཧི་མ་ཅལ་མངའ་སྡེའི་བློན་ཆེན་ཟུར་བ་སྐུ་ཞབས་ཝར་བྷ་དྷཱ་རཱ་ལགས་འདས་གྲོངས་སུ་ཕྱིན་པའི་གནས་ཚུལ་ཐོན་པ་དང་༧གོང་ས་རྒྱལ་བ་རིན་པོ་ཆེ་མཆོག་ནས་བློན་ཆེན་ཁོང་གི་སྐུ་ཟླ་པི་ཊེ་བྷ་སིང་(Pratibha Singh) ལགས་ཀྱི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་ཏེ། འདས་པོ་དམ་པ་ཁོང་གི་ཤུལ་ལུས་ནང་མི་ལྟོས་བཅས་ཡོངས་ལ་ཐུགས་གསོ་ཞུས་གནང་འདུག

ཐུགས་གསོའི་གསུང་འཕྲིན་ནང་༧མགོན་པོ་གང་ཉིད་མཆོག་གིས། སྐུ་ཞབས་ཝར་བྷ་དྷཱ་རཱ་ལགས་གཞན་ཕན་གྱི་ལས་ལ་ཞུགས་ཏེ་ཡུན་རིང་འཚོ་བཞུགས་ཐུབ་ཅིང་དོན་སྙིང་ལྡན་པའི་མི་ཚེ་སྐྱེལ་ཐུབ་ཡོད། ཁོང་གིས་མི་མང་གི་དགོས་མཁོ་བརྩེ་བ་དང་སྙིང་རྗེ་ཡིས་སྐྱོང་གི་ཡོད་པར་ངོས་ནས་ཡི་རངས་གནང་གི་ཡོད། ངོས་རང་སྒེར་ལ་ཆ་བཞག་ན། ངེད་གཉིས་ངོ་ཤེས་པའི་འདས་པའི་ལོ་མང་རིང་ཁོང་གིས་ངོས་ལ་བཅིངས་པའི་གྲོགས་པོའི་མཛའ་བརྩེ་དེ་བཀའ་དྲིན་ཆེན་པོ་ཡིན། ཞེས་གསུངས།

ཡང་གསུང་འཕྲིན་ནང་། ལོ་རྒྱུས་ནང་དེ་སྔའི་བྷ་ཤཱར་རྒྱལ་རྒྱུད་ཀྱི་མངའ་སྡེའི་མི་མང་དང་ནུབ་ཕྱོགས་སུ་འཁེལ་བའི་ཁྱིམ་མཚེས་བོད་གཉིས་བར་འབྲེལ་བ་ཧ་ཅང་ཉེ་བོ་བྱུང་ཡོད། སྐུ་ཞབས་ཝར་བྷ་དྷཱ་རཱ་ལགས་ནི་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སྲི་ཞུ་སྒྲུབ་མཁན་དུས་ཡུན་རིང་ཤོས་དེ་ཆགས་ཡོད་པས། ཁོང་ནམ་ཡང་དྲན་པ་བརྗེད་ཐབས་མེད། ཅེས་ཐུགས་སྨོན་དང་བཅས་གསུངས།

དེ་བཞིན། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་བློན་ཆེན་ཟུར་བ་ཁོང་གི་སྐུ་ཟླ་པི་ཊེ་བྷ་སིང་(Pratibha Singh) ལགས་ཀྱི་མཚན་ཐོག་ཏུ་ཐུགས་གསོ་གནང་བའི་ནང་། སྐུ་​ཞབས་ཝར་བྷ་དྷཱ་རཱ་སིང་ལགས་འདས་གྲོངས་སུ་ཕྱིན་པ་ཤེས་རྟོགས་བྱུང་བས་ཧ་ཅང་སྐྱོ་གདུང་བྱུང་། ངས་བོད་མིའི་སྒྲིག་འཛུགས་དང་བོད་མི་མང་གི་ཚབ་བྱས་ནས་ཁྱེད་དང་ཁྱེད་ཀྱི་ནང་མི། དེ་བཞིན་ཧི་མ་ཅལ་མངའ་སྡེའི་མི་མང་ལ་སེམས་གསོ་ཞུ་ཡི་ཡོད། ཅེས་དང་། སྐུ་ཞབས་ཝར་བྷ་དྷཱ་རཱ་སིང་ལགས་ནས་རང་གི་ཡང་དག་པའི་མགོ་ཁྲིད་འོག ལོ་བཅུ་ཕྲག་འགའི་རིང་རྒྱ་གར་སྤྱི་དང་ལྷག་པར་དུ་ཧི་མ་ཅལ་མངའ་སྡེའི་ནང་ཞབས་འདེགས་ཞུས་སྟབས། ཁོང་གིས་མི་མང་པོའི་སེམས་ནང་གསུབ་མི་ཐུབ་པའི་དྲན་རྟགས་ཤིག་བཞག་ཡོད། དེ་མཚུངས་བཞིན། ༧གོང་ས་མཆོག་དང་བོད་མི་མང་གིས་འདས་པོ་དམ་པ་ཁོང་གི་འདས་པའི་ལོ་མང་རིང་གི་གཏོང་ཕོད་ཆེ་བའི་རྒྱབ་སྐྱོར་དག་དྲན་གྱི་ཡོད། ཅེས་གསུངས་འདུག

ཡང་དེ་རིང་བོད་མིའི་སྒྲིག་འཛུགས་ཀྱི་བཀའ་དྲུང་ཡིག་ཚང་ནས་བོད་མིའི་སྒྲིག་འཛུགས་ཀྱི་ལྷན་ཁང་ཁག་ལ་བཀའ་ཁྱབ་ཅིག་བཏང་སྟེ། དེ་རིང་ཉིན་གུང་ཆུ་ཚོད་ ༡༢ ནས་ ༡ བར་བོད་མིའི་སྒྲིག་འཛུགས་ཀྱི་ལས་ཁུངས་ཁག་སོ་སོ་ནས་འདས་པོ་དམ་པ་སྤྱི་ཁྱབ་བློན་ཆེན་ཁོང་གི་ཆེད་དུ་མཆོད་འབུལ་སྨོན་ལམ་གསུང་འདོན་གནང་ཡོད་ཅིང་། ཉིན་རྒྱབ་ནས་གཞུང་འབྲེལ་གདུང་སེམས་མཉམ་སྐྱེད་མཚོད་སླད་ལས་ཁུངས་ཁག་གི་ལས་དོན་མཚམས་འཇོག་གནང་གི་ཡོད་འདུག

གསར་འགོད་པ། སྐལ་བཟང་སྦྱིན་པ།