བདུན་ཕྲག་སྔོན་མའི་ནང་རྒྱ་གར་དང་བལ་ཡུལ་ནང་བོད་མི་ཏོག་དབྱིབས་ནད་པ་ ༧༢ བྱུང་ཡོད་ཀྱང་ད་ལན་གྱི་འདས་པའི་བདུན་ཕྲག་གཅིག་ནང་ནད་པ་ཇེ་ཉུང་དུ་ཕྱིན་ཏེ་མི་ ༥༢ མ་གཏོགས་བྱུང་མི་འདུག
ཁ་སང་བོད་མིའི་སྒྲིག་འཛུགས་ཀྱི་ཏོག་དབྱིབས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐོག་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་ཀྱིས། ནད་རླབས་གསུམ་པ་བསླེབས་པའི་དབང་དུ་བཏང་ན། ང་ཚོས་སྔོན་འགོག་གི་ཐབས་ལམ་རྣམས་མུ་མཐུད་ནས་ལག་བསྟར་གནང་རོགས། ཕྱི་ལ་ཕེབས་པའི་སྐབས་སུ་མི་གང་ཉུང་ཉུང་ལ་ཐུག་རོགས་གནང། སོ་སོའི་གཟུགས་པོ་བདེ་པོ་མེད་པ་ཡིན་ན་སྨན་པ་ལ་ཡིན་ཅིག་གསུང་རོགས་གནང་། དེ་བཞིན་དུས་ཐོག་ཏུ་ཞལ་ལག་མཆོད་རོགས། ཏོག་དབྱིབས་འགོག་ཁབ་རྒྱག་རོགས་གནང་། ཞེས་བརྗོད་སོང་།
དེ་ནས་སྨན་པ་མཚམས་གཅོད་ལགས་ཀྱིས་འགྲེལ་བརྗོད་གནང་བ་ལྟར་ན། བདུན་ཕྲག་འདིའི་ནང་རྒྱ་གར་ནང་ས་གནས་གྲངས་ ༡༤ དང་བལ་ཡུལ་ནང་ས་གནས་གྲངས་ ༥ ཁྱོན་བསྡོམས་པའི་རང་ཁྱིམ་དུ་བཞུགས་མཁན་མི་གྲངས་ ༣༨༩ དང་། ཚོགས་སྡེའི་ཟུར་བཀག་ནང་བཞུགས་མཁན་མི་གྲངས་ ༥༤༠ འདུག གསོ་རིག་ལུས་སེམས་ནུས་གསོའི་སྨན་དང་འབྲེལ་བའི་ཐོག་ནས་འདས་པའི་ལོ་གཅིག་དང་ཕྱེད་ཀ་ལྷག་ཙམ་གྱི་རིང་ལ་ཁྱོན་གསོ་རིག་ལུས་སེམས་ནུས་གསོའི་སྨན་སྟོང་ཕྲག་ ༣༧ ལྷག་བོད་ཀྱི་སྨན་རྩིས་ཁང་དང་བོད་མིའི་སྒྲིག་འཛུགས་ངོས་ནས་རིན་མེད་ཐོག་གནང་ཟིན་འདུག བདུན་ཕྲག་འདིའི་ནང་མི་གྲངས་ ༣༡ ལ་ཁ་པར་ཐོག་ནས་འབྲེལ་བ་གནང་སྟེ་སེམས་ཁམས་ཐད་སློབ་གསོ་ལམ་སྟོན་གནང་ཐུབ་པ་བྱུང་འདུག བདུན་ཕྲག་འདིའི་ནང་རྒྱ་གར་དང་བལ་ཡུལ་ནང་བོད་རིགས་སྐྱེས་པ་གྲངས་ ༣༧ དང་བུད་མེད་གྲངས་ ༡༥ བཅས་ཁྱོན་ཏོག་དབྱིབས་ནད་པ་གྲངས་ ༥༢ བྱུང་བའི་ཁྲོད་ནས་རང་ལོ་ ༩༠ སོན་པ་གཅིག་རྐྱེན་འདས་སུ་ཕྱིན་ཡོད་འདུག འདས་པའི་ལོ་གཅིག་དང་ཕྱེད་ཀ་ལྷག་གི་རིང་རྒྱ་གར་དང་བལ་ཡུལ་ནང་ནད་གཞི་ཕོག་པའི་གྲངས་ ༥༢༠༨ དང་། དྲག་སྐྱེད་སོང་བའི་མི་གྲངས་ ༤༧༩༧། རྐྱེན་འདས་སུ་ཕྱིན་པའི་མི་གྲངས་ ༡༣༢། ནད་ཀྱིས་མནར་བཞིན་པ་མི་གྲངས་ ༢༧༩ ཡོད་འདུག
མཇུག་ཏུ་བདེ་ལེགས་སྨན་ཁང་གི་སྨན་པ་བརྩོན་འགྲུས་ལགས་ཀྱིས། རྒྱ་གར་ནང་དུ་འདས་པའི་ཆུ་ཚོད་ ༢༤ ནང་ཏོག་དབྱིབས་ནད་པའི་གྲངས་འབོར་འཕར་ཡོད་པ་དང་། ད་ལྟའི་ཆར་ཧི་མ་ཅལ་མངའ་སྡེའི་ནང་དུ་ཡུལ་སྐོར་སྤྲོ་འཆམ་པ་མང་པོ་ཕེབས་པའི་དུས་ཚོད་ཡིན་པས། ང་ཚོའི་ངོས་ནས་གཟབ་གཟབ་གནང་དགོས་ཀྱི་འདུག ནད་རྟགས་ཡོད་མཁན་ཡོད་ན་ངེས་པར་དུ་བརྟག་དཔྱད་གང་མགྱོགས་གནང་རོགས་གནང་། བརྟག་དཔྱད་གང་མགྱོགས་གནང་བ་ཡིན་ན་དྲག་སྐྱེད་མགྱོགས་པ་འགྲོ་ཡི་རེད། ཏོག་དབྱིབས་འགོག་ཁབ་བརྒྱབ་མེད་མཁན་རྣམས་ཀྱིས་འགོག་ཁབ་བརྒྱག་རོགས་གནང་། ཞེས་བརྗོད་སོང་།
ཟླ་འདིའི་ཕྱི་ཚེས་ ༡ ཉིན་སྤེལ་བའི་བོད་མིའི་སྒྲིག་འཛུགས་ཀྱི་ཏོག་དབྱིབས་ལས་དོན་ཚོགས་ཆུང་གི་གནས་ཚུལ་ལྟར་ན། རྒྱ་གར་ནང་ཏོག་དབྱིབས་གཉན་རིམས་ཀྱི་འགོག་ཁབ་རིམ་པ་དང་པོ་དང་གཉིས་པ་གཉིས་ཀ་བརྒྱབས་ཟིན་པའི་བོད་མི་ཁྱོན་ ༡༤༧༠༣ བྱུང་ཡོད་པ་དང་། འགོག་ཁབ་རིམ་པ་གཉིས་ཀ་བརྒྱབས་ཟིན་པ་དང་དང་པོ་ཁོ་ན་བརྒྱབས་ཟིན་པ་བཅས་ཀྱི་གྲངས་འབོར་གྱིས་རྒྱ་གར་རྒྱལ་ཡོངས་ཀྱི་བོད་མིའི་བརྒྱ་ཆའི་ ༨༩ ཟིན་ཡོད་འདུག
གསར་འགོད་པ། བསྟན་འཛིན་ཕུར་བུ།
