ཏཱ་ལའི་བླ་མ་མཐོ་སློབ་ཀྱི་སློབ་སྤྱི་གསར་པ་ལྕམ་ཀཱ་ཝེ་རཱི་གྷལ་ལགས་སུ་བཅར་འདྲི་ཞུས།

རྒྱ་གར་གྱི་དཔལ་འབྱོར་རིག་པའི་འབུམ་རམས་པ་ལྕམ་ཀཱ་ཝེ་རཱི་གྷལ་(Dr. Kaveri Gill)ལགས་ཁ་སང་ཕྱི་ཚེས་ ༡༤ ཉིན་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་འབྱོར་ཏེ་ད་ལྟ་ཟུར་བཀག་ཏུ་བཞུགས་མུས་རེད་འདུག་ལ། སློབ་སྤྱི་གསར་པའི་ཕྱག་ལས་མགོ་འཛུགས་གནང་སྟེ་བདུན་ཕྲག་གཉིས་ལྷག་འགྲོ་བཞིན་འདུག

འདི་གའི་གསར་འགོད་པས་སློབ་སྤྱི་གསར་པ་ལྕམ་འབུམ་རམས་པ་ཀཱ་ཝེ་རཱི་གྷལ་ལགས་སུ་ཁ་པར་བརྒྱུད་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་སྤྱི་གནང་བའི་དགོས་དམིགས་ཅི་ཡིན་དྲིས་པར་ཁོང་མོས། མཐོ་སློབ་གང་ཡིན་རུང་ངོ་བོ་མཉམ་འདུས་དང་ཤེས་ཡོན་གྱི་གནས་ཚད་མཐོ་བའི་ལྟེ་གནས་ཁང་ཞིག་ཆགས་ཡོད་པ་རེད་ལ། ཏཱ་ལའི་བླ་མ་མཐོ་རིམ་སློབ་གཉེར་ཁང་ཡང་དེ་ལས་མ་འདས་པ་ཞིག་རེད། མགོ་ཁྲིད་སུ་ཡིན་ནའང་མདུན་ནས་མགོ་ཁྲིད་དགོས་ངེས་རེད་ལ། སློབ་སྤྱིའི་ལས་འགན་ནི་འཆར་སྣང་ལྡན་པའི་ཤེས་ཡོན་སློབ་གསོའི་ཐད་ལ་སྣེ་ཁྲིད་ཀྱི་ནུས་པ་འདོན་རྒྱུ་དང་། དེ་ཡང་རྒྱ་ཆེ་གུ་ཡངས་དང་གཏིང་ཚུགས་པའི་ལྟ་ཚུལ་གྱི་སྣེ་ཁྲིད་འོག་ནས་འཕྲལ་ཕུགས་གཉིས་ཀྱི་དམིགས་ཡུལ་འགྲུབ་ཀྱི་ཡོད་པ་རེད་ལ། ངས་དགོས་དམིགས་འདི་བསྒྲུབ་ཐུབ་པར་རེ་བ་བྱེད་ཀྱི་ཡོད། ཏཱ་ལའི་བླ་མ་མཐོ་རིམ་སློབ་གཉེར་ཁང་ནི་དམིགས་བསལ་ཞིག་རེད། རྒྱུ་མཚན་ནི་ཏཱ་ལའི་བླ་མ་མཐོ་རིམ་སློབ་གཉེར་ཁང་འདི་བོད་པའི་མཐོ་རིམ་སློབ་གཉེར་ཁང་ཡིན་པ་དང་། སློབ་གཉེར་ཁང་འདིས་དེང་དུས་ཀྱི་ཤེས་ཡོན་སློབ་གསོ་སྤྲོད་པ་དང་ལྷན་དུ་གནའ་རབས་ཀྱི་རིག་གཞུང་དང་། སྐད་ཡིག་དེ་དག་གཅེས་ཉར་བྱེད་ཀྱི་ཡོད་པ་རེད། ང་རང་རྒྱ་གར་གྱི་གཙུག་ལག་སློབ་གཉེར་ཁང་ནང་དེང་དུས་ཀྱི་ཤེས་ཡོན་སྦྱངས་པ་དང་ལྷན་དུ་བོད་པའི་ལྟ་གྲུབ་དང་རིག་གཞུང་། སྲོལ་རྒྱུན་ལ་དགའ་མོས་ཤིན་ཏུ་ཆེ་བས་ཕྱོགས་གཉིས་ཀྱི་ཐད་ནས་ངས་ཡར་རྒྱས་གཏོང་བའི་ཐབས་ཤེས་བྱ་རྒྱུ་ཡིན། ཞེས་བརྗོད་བྱུང་།

ཟླ་འདིའི་ཕྱི་ཚེས་ ༦ ཉིན་ཏེ་༧སྐུའི་འཁྲུངས་སྐར་དང་བསྟུན་ལྕམ་ཀཱ་ཝེ་རི་གྷལ་ལགས་ནས་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་ཤེས་ཡོན་གནས་ཚད་མཐོར་འདེགས་ཆེད་ནུས་པ་གང་ལེགས་འདོན་རྒྱུ་ཡིན་སྐོར་གསུང་བཤད་གནང་ཡོད་པ་ལྟར། མ་འོངས་པར་མཐོ་རིམ་གཙུག་ལག་སློབ་གཉེར་ཁང་ཁག་གི་ཤེས་ཡོན་དམིགས་ཚད་དང་མཉམ་པ་ཡོང་ཐབས་སུ་འཆར་གཞི་གང་ཡོད་དྲིས་པར་ཁོང་མོས། ཏཱ་ལའི་བླ་མ་མཐོ་རིམ་སློབ་གཉེར་ཁང་ལ་ངའི་འཆར་གཞིའི་ཚན་པ་ཆེ་འབྲིང་ཆུང་གསུམ་བཅས་ཡོད། ང་རང་གི་ཐོག་མའི་དམིགས་ཡུལ་ནི་ཏཱ་ལའི་བླ་མ་མཐོ་སློབ་ཀྱི་གནས་སྟངས་དང་ལས་ཀ་བྱེད་སྟངས་ཐད་ལ་རྒྱུས་ལོན་བྱ་རྒྱུ་ཡིན། དེ་ཡང་མཐོ་སློབ་ཀྱི་སྒྲིག་འཛུགས་དང་ལས་བྱེད་སོགས་ལ་རྒྱུས་ལོན་བྱས་ཏེ། གནས་སྟངས་ལ་དཔག་པའི་འགྱུར་བ་གཏང་རྒྱུ་ཡིན། དེ་བཞིན་དུས་རབས་ཉེར་གཅིག་པར་དགོས་ངེས་ཅན་དང་དམིགས་བསལ་གྱིས་ཏོག་དབྱིབས་གཉན་རིམས་ཀྱི་དུས་སྐབས་འདིར། དྲ་རྒྱའི་བརྒྱུད་ལམ་བེད་སྤྱོད་བྱས་ནས་རྒྱལ་སྤྱི་དང་རྒྱ་གར་གྱི་སློབ་གསོ་བ་དང་སློབ་གསོའི་བསྟི་གནས་ཁང་ཕན་ཚུན་འབྲེལ་འདྲིས་ཀྱིས་ཡར་རྒྱས་གཏང་རྒྱུ་ཡིན། དཔེ་མཚོན་གཞན་ཞིག་ནི། ང་ཚོའི་དྲ་རྒྱ་དུས་ལྟར་བསྐྱར་གསོ་དང་ཡིད་དབང་འཕྲོག་པ་ཞིག་བཟོ་ཡི་ཡིན། ཏཱ་ལའི་བླ་མ་མཐོ་རིམ་སློབ་གཉེར་ཁང་ལ་སློབ་ཚན་དང་སློབ་ཕྲུག་གི་དགོས་མཁོ་གཞིར་བཟུང་འཆར་གཞི་ཆེ་འབྲིང་རྣམས་གཏིང་ཟབ་པོའི་ཐོག་ནས་རྒྱ་སྐྱེད་གཏང་གི་ཡིན། དཔེར་ན་དབྱིན་ཡིག་ཆེད་སྦྱོང་གི་སློབ་ཚན་དང་འབུམ་རམས་པའི་བསླབ་རིམ་གཉིས་པ་སྐྱེད་བསྲིང་བྱེད་ཀྱི་ཡོད། དེ་བཞིན་པར་འགྲེམས་ནི་སློབ་གསོ་འཕེལ་རྒྱས་ཀྱི་ལྡེ་མིག་ལྟ་བུ་ཡིན་པ་ལྟར་ངས་དགེ་རྒན་ཚོར་པར་འགྲེམས་ཀྱི་ལས་དོན་གང་མང་གནང་ཐུབ་པར་སྐུལ་མ་གཏོང་གི་ཡིན། ཞེས་དང་། སློབ་ཕྲུག་ཚོར་འབྲེལ་འདྲིས་ཟབ་པོ་གནང་རྒྱུ་དང་། དམིགས་བསལ་གྱིས་སློབ་མ་རྒན་པ་དང་འབྲེལ་འདྲིས་བྱས་ཏེ་མདུན་ལམ་སློབ་སྟོན་སྲ་བརྟན་དང་དཔྱད་ཞིབ་ཀྱི་ཐབས་ལམ་སྤྱད་དེ་མ་འོངས་མདུན་ལམ་དང་འཆར་གཞི་ཕན་ནུས་ལྡན་པ་ཞིག་བྱེད་ཐབས་གནང་རྒྱུ་ཡིན་སྐོར་དང་། འཛམ་གླིང་ཐོག་མཚན་སྙན་ཆེ་བའི་༧གོང་ས་ཏཱ་ལའི་བླ་མ་མཆོག་གི་མཚན་ཐོགས་པའི་མཐོ་སློབ་འདི། རྒྱ་གར་ལྷོ་ཕྱོགས་ཀྱི་རྒྱལ་སའི་ཉེ་འགྲམ་དུ་གནས་ཤིང་བོད་མིའི་གཞིས་ཆགས་ཆེ་ཤོས་དེའང་ཉེ་འཁྲིས་སུ་ཡོད་ལ། མ་འོངས་ལོ་ ༢༠ ནས་ ༣༠ རིང་ལ་ཡར་རྒྱས་གོང་འཕེལ་དུ་གཏང་སྟེ་ཕུགས་རེ་འགྲུབ་པ་གནང་རྒྱུ་ཡིན་སྐོར་བརྗོད་བྱུང་།

དཔལ་འབྱོར་རིག་པའི་འབུམ་རམས་པ་ལྕམ་ཀཱ་ཝེ་རཱི་གྷིལ་ལགས་ཕྱི་ལོ་ ༡༩༩༨ ལོར་ལྡི་ལི་གཙུག་ལག་སློབ་ཆེན་ནས་དཔལ་འབྱོར་རིག་པའི་ཐོག་ཉེ་བའི་གཙུག་ལག་རབ་འབྱམས་པ་ཐོན་ཡོད་པ་དང་། ཕྱི་ལོ་ ༡༩༩༦ ལོར་དབྱིན་ཡུལ་དུ་རྟེན་གཞི་བྱས་པའི་ཁམ་བྷེ་རེ་ཇི་གཙུག་ལག་སློབ་གྲྭ་ཆེན་མོར་ཞུགས་ཏེ་མུ་མཐུད་དཔལ་འབྱོར་རིག་པའི་ཐོག་སློབ་གཉེར་གནང་སྟེ་ཕྱི་ལོ་ ༢༠༠༣ ལོར་གཙུག་ལག་རབ་འབྱམས་པ་ཐོན། ད་ལྟ་བར་དུ་ཞི་བ་ནཱ་ཏར་གཙུག་ལག་སློབ་གཉེར་ཁང་(Shiv Nadar University)གི་རྒྱལ་སྤྱིའི་འབྲེལ་ལམ་དང་གཞུང་འཛིན་རིག་པའི་སྡེ་ཚན་གྱི་སློབ་དཔོན་ཆེན་མོ་དང་། བློ་འདོན་པ། ལྡི་ལི་གསར་པར་རྟེན་གཞི་བྱས་པའི་ཨོཀ་སི་ཧྥོར་ཌི་སྲིད་ཇུས་དོ་དམ་ལས་ཁུངས་ཀྱི་དཔལ་འབྱོར་རིག་པའི་གཙོ་འགན་པ། དེ་བཞིན་རྒྱ་གར་དུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་སྤྱི་ཚོགས་སྲིད་ཇུས་དང༌། འཆར་འགོད། སྟངས་འཛིན་བསྐྱར་ཞིབ་བཅས་ཀྱི་བློ་འདོན་པ་སོགས་ཡིན་འདུག་ལ། པ་ཀི་སི་ཐན་དང་། བྷང་གྷ་ལ་དྷེ་ཤི། བལ་ཡུལ། སིང་གྷ་ལ་བཅས་ཚུད་པའི་ལྷོ་ཨེ་ཤ་ཡའི་ཁུལ་དུ་ཕྱག་ལས་སྣ་མང་གནང་མྱོང་ཡོད་འདུག

ཕྱི་ལོ་ ༢༠༡༦ ནས་བཟུང་ལས་ཞོར་དུ་ལྕམ་ཀཱ་ཝེ་རཱི་གྷལ་ལགས་ནས་ལྡི་ལི་བོད་ཁང་དུ་ནང་པའི་སེམས་རིག་པ་དང་ལྟ་གྲུབ། རིགས་ལམ་སོགས་ཀྱི་ཐོག་སློབ་གཉེར་གནང་སྟེ། ད་ལྟ་མངོན་པ་མཛོད་དང་གསང་སྔགས་སྐོར་སོགས་ལ་སློབ་སྦྱོང་གནང་བཞིན་ཡོད་པ་མ་ཟད། ཕུགས་འདུན་མངོན་འགྱུར་བྱུང་བའི་ས་གནས་འདོད་རྒུ་གླིང་ཞེས་པ་དང་། ཅིའི་ཕྱིར་རྒྱ་གར་གསར་འགྱུར་བརྒྱུད་ལམ་གྱིས་སྣེ་ཁྲིད་པའི་ལ་དྭགས་ཆེད་མཁས་པ་ཚོའི་དམིགས་ཡུལ་མ་འགྲུབ་པ་རེད། རྒྱ་གར་ནང་ནལེནྜའི་སྲོལ་རྒྱུན་རིག་གཞུང་བསྐྱར་དར་དང་། རྒྱ་གར་མཁས་པ་ཞིག་གི་འགྲུལ་བཞུད། ཏཱ་ལའི་བླ་མ་དང་སྤྱི་ཚོགས་དྲ་ལམ། ནོར་འཁྲུལ་ཤོར་བའི་ལོ་ཙཱ་ཞེས་པ་ལ་སོགས་པའི་བོད་གནས་དང་འབྲེལ་བའི་དཔྱད་རྩོམ་མང་པོ་དུས་དེབ་དང་ཚགས་པར་ཁང་མང་པོའི་ནང་སྤེལ་གནང་ཡོད་འདུག

གསར་འགོད་པ། བསྟན་འཛིན་ཕུར་བུ།