༧གོང་ས་མཆོག་གིས་ལྟ་གྲུབ་ཀྱི་ཐོག་ནས་ཆོས་ལུགས་ཕན་ཚུན་དབར་མི་འདྲ་བ་ཆེན་པོ་ཡོད་ནའང་། ཆོས་ལུགས་ཡོངས་ཀྱི་ཐུན་མོང་གི་བསླབ་བྱ་ནི་མི་བཟང་པོ་དང་དྲང་བདེན་བྱ་རྒྱུ་དེ་ཡིན་གསུངས།
ཁ་སང་༧རྒྱལ་བ་རིན་པོ་ཆེ་མཆོག་གི་དྲ་རྒྱའི་ནང་དུ་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༣ ནས་ ༡༥ བར་ཨ་རིའི་རྒྱལ་ས་ཝ་ཤིང་ཊོན་དུ་ཚོགས་པའི་རྒྱལ་སྤྱིའི་ཆོས་ལུགས་རང་དབང་གི་ཚོགས་འདུ་ཆེན་མོར་བརྙན་ལམ་བརྒྱུད་༧གོང་ས་མཆོག་ནས་བཀའ་སློབ་སྩལ་ཏེ། འཛམ་གླིང་གི་མི་ཚང་མ་མཉམ་ལས་མཉམ་འཚོ་བྱ་རྒྱུ་ནི་གལ་ཆེན་པོ་ཡིན་སྐོར་གསུངས། དེ་ཡང་མགོན་པོ་གང་ཉིད་མཆོག་གིས། མཆེད་གྲོགས་ཕོ་མོ་ཡོངས་ལ་ཞུ་རྒྱུར། སྤྱིར་ང་ཚོ་འགྲོ་བ་མིའི་རིགས་ལ་སེམས་ཅན་གཞན་དང་མི་འདྲ་བའི་རྣམ་དཔྱོད་ཡོད་པ་དང་མ་འོངས་པར་ཚོད་དཔག་བྱ་རྒྱུའི་ནུས་པའང་ཡོད། དེ་མཚུངས་བཞིན་ཆོས་ལུགས་མི་འདྲ་བ་མང་པོ་དར་འཕེལ་བྱུང་བ་དང་། ཆོས་དད་རང་དབང་ནི་དོན་དངོས་ཐོག་བསམ་བློའི་རང་དབང་དང་མཚུངས་པ་ཡིན། འཛམ་གླིང་གི་ཆོས་ལུགས་ཚང་མར་ལྟ་གྲུབ་དང་སྲོལ་རྒྱུན་མི་འདྲ་བ་ཡོད་ཀྱང་། ཆོས་ལུགས་ཚང་མས་གཅིག་གྱུར་ཐོག་བྱམས་བརྩེ་དང་འདོད་ཆུང་ཆོག་ཤེས། བཟོད་སྒོམ། ཚུལ་ཁྲིམས་སོགས་ཉམས་ལེན་བྱེད་ཀྱི་ཡོད། དེ་བཞིན་ཆོས་མེད་མཁན་རྣམས་ལའང་འདོད་ཆུང་ཆོག་ཤེས་དང་ཚུལ་ཁྲིམས། གཞན་གཅེས་འཛིན་གྱི་བསམ་པ་དེ་དག་འབྲེལ་བ་ཡོད་པ་རེད།
ཆོས་ལུགས་ཚང་མས་སྙིང་རྗེ་དང་གཞན་ལ་གུས་བརྩི། གཞན་ཕན་གྱི་བསམ་བློ་བསྐྱེད་དགོས་པ་བསླབ་ཀྱི་ཡོད་པ་རེད། འོན་ཀྱང་ལྟ་གྲུབ་ཀྱི་སྒོ་ནས་ཆོས་ལུགས་ལ་མི་འདྲ་བའི་ཁྱད་པར་ཆེན་པོ་ཡོད་པ་རེད། ང་ཚོས་ཆ་གཉིས་ཀྱི་ཐོག་ནས་དེ་ལྟ་དགོས་ཀྱི་ཡོད། དེ་ཡང་ཆ་གཅིག་ནི་ཆོས་ནས་གསུངས་པའི་བཟང་པོའི་ཡོན་ཏན་ནི་དྲང་ཚུགས་དང་ཚུལ་ཁྲིམས་རང་སོར་གནས་དགོས། དེ་བཞིན་གཞན་ཕན་གྱི་བསམ་པ་བཅངས་ཤིང་ཁོང་ཁྲོ་ཇེ་ཆུང་དུ་གཏང་དགོས་པ་ཡིན་ཞིང་། ཆོས་ལུགས་ཚང་མས་ཀྱང་དེ་ལྟར་སློབ་ཀྱི་ཡོད་པ་རེད། ཆ་གཞན་ནི་ལྟ་གྲུབ་ཀྱི་སྒོ་ནས་མི་འདྲ་བ་མང་པོ་ཡོད་ཀྱང་། ལྟ་གྲུབ་ཡོངས་རྫོགས་ཀྱིས་བརྩེ་བ་གོང་མཐོར་གཏོང་རྒྱུར་དམིགས་པའི་ཐབས་ལམ་ཡིན་ཞིང་། དེ་དག་གིས་དོན་དངོས་སུ་བརྩེ་བ་བསླབ་ཀྱི་ཡོད་པ་རེད། དཔེར་ན། འཇིག་རྟེན་བཀོད་པ་པོ་འདོད་མཁན་རྣམས་ཀྱིས་འཇིག་རྟེན་ཀུན་གྱི་བྱེད་པོོ་དཀོན་མཆོག་ཡིན་པ་ཁས་ལེན་གྱི་ཡོད་པ་རེད། འཇིག་རྟེན་བཀོད་པ་པོ་མི་འདོད་མཁན་གཅེར་བུ་བ་དང་ནང་པ་རྣམས་ཀྱིས་རྒྱུ་མཚན་བཀོད་སྟངས་གོང་དང་མི་འདྲ་བར་གཞན་ཞིག་གི་རྗེས་སུ་འབྲང་གི་ཡོད་རེད། འོན་ཀྱང་ཆོས་ལུགས་ཡོངས་ཀྱིས་ཐུན་མོང་བའི་བསླབ་བྱ་ནི་མི་བཟང་པོ་དང་དྲང་བདེན་བྱ་རྒྱུ་དེ་རེད། ད་ལྟའི་ཆར་ང་ཚོས་ཆོས་ལ་དད་ཅིང་ཡིད་ཆེས་པའི་རིམ་པ་གཅིག་དང་ཆོས་ཀྱི་བསླབ་བྱ་བདེན་པར་སྨྲ་བ་དང་བྱམས་བརྩེ་དངོས་སུ་ཉམས་ལེན་མཁན་གྱི་རིམ་པ་གཉིས་སུ་དབྱེ་ཆོག་གི་རེད། དེང་གི་དུས་སུ་ང་ཚོ་འགྲོ་བ་མི་ཐེར་འབུམ་བདུན་པོ་ཚང་མ་གཅིག་གྱུར་གྱི་འདུ་ཤེས་འཆང་དགོས་རྒྱུ་ཤིན་ཏུ་གལ་ཆེན་པོ་ཆགས་ཀྱི་ཡོད་པ་རེད། དེ་ཡང་མི་ཡིན་པའི་ཆ་ནས་གཅིག་གྱུར་གྱི་འདུ་ཤེས་དང་། ཕན་ཚུན་གུས་བརྩི་དང་གཅིག་ཕན་གཅིག་གྲོགས་བྱ་དགོས། ཆོས་མེད་མཁན་ཚོར་དེ་ལྟར་དགོས་ངེས་ཡིན།
འདས་པའི་དུས་སུ་དང་དེང་སང་ཡང་སྟབས་མི་ལེགས་པ་ཞིག་ལ་ཆབ་སྲིད་དང་དབང་ཆའི་ཁེ་ཕན་སྲུང་སྐྱོབ་སླད་ཆོས་ལུགས་བེད་སྤྱོད་བྱེད་ཀྱི་ཡོད་པ་རེད་ལ། དེའི་དབང་གིས་རང་ཉིད་ཀྱི་དབང་ཆ་དང་ཁེ་ཕན་སོགས་ཀྱི་ཆེད་དུ་ཆོས་ལུགས་རྗེས་འབྲང་བ་ཕན་ཚུན་དབར་འཐབ་རྩོད་བྱུང་གི་ཡོད་རེད། འོན་ཀྱང་ད་ལྟའི་ཆར་ང་ཚོས་འདི་ལྟ་བུའི་འཁོན་འཛིན་གྱི་བསམ་པ་དེ་དག་རིང་དུ་འདོར་དགོས། ད་ལྟ་དུས་རབས་ཉེར་གཅིག་པའི་སྐབས་འདི་ལ་ང་ཚོར་ཉམས་མྱོང་མང་པོ་བྱུང་ཡོད་པ་རེད། དེར་བརྟེན་ད་ལྟའི་ཆར་ང་ཚོས་ཆོས་ལུགས་ཀྱི་འཐེན་འཁྱེར་ཁ་ལ་འཁྱེར་ནས་འཁྲུག་རྩོད་བྱ་རྒྱུ་མཚམས་འཇོག་བྱ་དགོས། དུས་དེ་རིང་ནས་བཟུང་ང་ཚོ་མཉམ་ལས་མཉམ་འཚོ་བྱ་རྒྱུ་ནི་ངོས་ཀྱི་འབོད་སྐུལ་གཙོ་བོ་དེ་ཡིན། ཞེས་གསུངས།
གསར་འགོད་པ། བསྟན་འཛིན་ཕུར་བུ།
