༧གོང་ས་མཆོག་ནས་མ་ཧཱ་ར་ཤི་ཊའི་ཆུ་ལོག་ཐད་གདུང་སེམས་མཉམ་སྐྱེད་ཀྱི་ཐུགས་གསོ་སྩལ།

༧གོང་ས་མཆོག་གིས་མ་ཧཱ་ར་ཤི་ཊའི་ནང་ཆུ་ལོག་གི་གོད་ཆག་བྱུང་བར་ངལ་སེལ་རོགས་དངུལ་དང་གདུང་སེམས་མཉམ་སྐྱེད་ཀྱི་ཐུགས་གསོའི་གསུང་འཕྲིན་སྩལ་ཡོད་འདུག

ཉེ་བའི་ཉིན་འགའི་རིང་རྒྱ་གར་གྱི་མངའ་སྡེ་མ་ཧཱ་ར་ཤི་ཊའི་ (Maharashtra) ཁུལ་དུ་ཆུ་ལོག་གི་གོད་ཆག་བྱུང་སྟེ་མི་མང་གི་འཚོ་བར་བརྡབ་གསིག་བཟོས་ཡོད་པར་༧གོང་ས་མཆོག་གིས་འབྲེལ་ཡོད་མངའ་སྡེ་བློན་ཆེན་བྷ་ལ་སཱ་ཧེ་བྷི་ (Uddhav Balasaheb Thackeray) ལ་གདུང་སེམས་མཉམ་སྐྱེད་ཀྱི་གསུང་འཕྲིན་ཞིག་སྩལ་བའི་ནང་། མ་ཧཱ་ར་ཤི་ཊའི་ཁུལ་དུ་ཆུ་ལོག་གི་གོད་ཆག་ཚབས་ཆེན་ཐེབས་པའི་རྐྱེན་གྱིས་དགའ་གཉེན་སྤུན་མཆེད་སོགས་ཀྱི་ཚེ་སྲོག་ཤོར་བར་ངོས་རང་བློ་ཕམ་བྱུང་། ཆར་ཞོད་ཆེ་བའི་རྐྱེན་གྱིས་ཆུ་ལོག་གི་གོད་ཆག་བྱུང་བར་མངའ་སྡེའི་གཞུང་ནས་མི་མང་ལ་རོགས་སྐྱོར་གང་ཐུབ་གནང་གི་ཡོད་པ་ངོས་ནས་ཤེས་ཀྱི་ཡོད། མ་ཧཱ་ར་ཤི་ཊའི་མི་མང་རྣམས་གདུང་སེམས་མཉམ་སྐྱེད་ཀྱི་རྣམ་པ་མཚོན་ཆེད་དུ་ངོས་ནས་ཏཱ་ལའི་བླ་མའི་དགེ་རྩ་ཚོགས་པར་ཞལ་འདེབས་གནང་དགོས་པའི་རེ་སྐུལ་ཞུས་ཡོད། ཅེས་གསུངས།

ཟླ་འདིའི་ཕྱི་ཚེས་ ༢༣ ཉིན་རྒྱ་གར་གྱི་སྲིད་བློན་མུ་དྷི་མཆོག་ནས་འབྲེལ་ཡོད་མངའ་སྡེ་བློན་ཆེན་ལ་ཆུ་ལོག་གི་སྐོར་ནས་བཀའ་མོལ་བྱུང་བ་བཞིན། མ་ཧཱ་ར་ཤི་ཊའི་ཆུ་ལོག་གི་གོད་ཆག་ཐད་དབུས་གཞུང་ནས་རོགས་སྐྱོར་གང་ཐུབ་གནང་རྒྱུའི་ཁས་ལེན་ཞུས་ཡོད་སྐོར་བརྗོད་ཡོད་པ་དང་། དེ་བཞིན་མངའ་སྡེ་བློན་ཆེན་བྷ་ལ་སཱ་ཧེ་བྷི་ལགས་ཀྱིས། སང་ཉིན་ཕྱི་ཚེས་ ༢༧ ཉིན་གྱི་སྐྱེས་སྐར་ཚབ་ཏུ་རོགས་སྐྱོར་ཐེབས་རྩ་ཞིག་བཙུགས་ཏེ། ད་ལྟའི་ཆུ་ལོག་དང་ཏོག་དབྱིབས་ཀྱི་གནས་སྐབས་འདིར། ང་ཚོས་སྤྱི་ཚོགས་ཀྱི་འགན་ཁུར་ཏེ་ཕན་ཚུན་ལ་རོགས་སྐྱོར་བྱ་དགོས་པས། ངའི་སྐྱེས་སྐར་གྱི་རོགས་སྐྱོར་ཐེབས་རྩར་རྒྱབ་སྐྱོར་གནང་རོགས་ཞེས་འབོད་སྐུལ་ཞུས་ཡོད་པ་མ་ཟད། མངའ་སྡེ་མི་མང་ཡོངས་ནས་སྲིད་བློན་ཁོང་གི་སྐྱེས་སྐར་སྲུང་གཙི་མི་ཆོག་པ་དང་མི་གཅིག་ཀྱང་སྐྱེས་སྐར་འཚམས་རྟགས་སོགས་སྐྱེལ་བར་ཡོང་མི་ཆོག་པའི་འབོད་སྐུལ་ཞུས་ཡོད་འདུག

དེ་རིང་རྒྱ་གར་གྱི་སྤྱི་ཚོགས་དྲ་ལམ་ཁག་ཏུ་གནས་ཚུལ་སྤེལ་བ་ལྟར་ན། ཉིན་གསུམ་གྱི་རིང་རྒྱ་གར་གྱི་མངའ་སྡེ་མ་ཧཱ་ར་ཤི་ཊའི་ཁུལ་དུ་ཆར་ཞོད་ཆེན་པོ་བབས་པའི་རྐྱེན་གྱིས་གྲོང་ཁྱེར་པོ་ནེ་ (Pune) དང་ ཀོན་ཁན་(Konkan) ས་ཕྱོགས་སུ་ཆུ་ལོག་དང་ས་རུད་སོགས་ཀྱི་རྐྱེན་ངན་འཕྲད་ཡོད་འདུག  ད་ལྟའི་ཆར་ཆུ་ལོག་གི་རྐྱེན་གྱིས་ཡུལ་མི་ ༢༥༡ ཙམ་རྐྱེན་འདས་སུ་ཕྱིན་འདུག

གསར་འགོད་པ། བསྟན་འཛིན་ཕུར་བུ།